Weird& horror

جريمه متجر الولوليمون

السلام عليكم عاملين ايه إن شاء الله تكونوا بخير 💜✨ومرحبًا بكم جميعًا My sugars🍭🍭

_فعلوا وضع ال Dark وأنتم بتقرأو أما لو كنتم عاملينه اصلا زي ف أنتم كفوا واقفلوا النور عشان تدخلوا في الاجواء .

_قصتنا انهارده طويله ودسمه عن محل أتحول من بيع مستلزمات رياضه لليوجا لمسرح جريمة دمويه أشبه بالمجزره والقاتل غير متوقع وعشان نعرف ايه اللي حصل كملوا قراءه القصه ، وحضروا مشروبكم المفضل ☕🍹ويلا نبدأ جريمتنا النهارده .

//____________//_____________//____________//

الساعة 8صباح يوم 12 مارس من عام2011 وقف بعض الأشخاص قدام محل أبل مستنيين أن أبواب المحل تفتح لإستقبال الزباين ، وعلى الجانب التاني من الشارع الموجود في مدينة بيثيسدا بولاية ماريلاند راحت المديرة رايتشل لفتح محل لولوليمون المختص ببيع ملابس اليوغا ، واللي يشتغل فيه 4 موظفين ، اتنين في النهار واتنينن في الليل ، والفريق الليلي مسؤول عن تنظيف المتجر وإغلاقه.

( صورة محل لولوليمون 👇👇)

................................
...................
.......
...
..

المديرة رايتشل لاحظت أن باب المحل مفتوح وده اللي خلاها تستغرب جدًا ، وفكرت للحظه بأنها غلطة من الموظفين ، بعدين كملت مشيها لجوا عشان تتصدم بمنظر المحل اللي كان بحاله فوضويه ، الهدوم مرميه على الأرض ،وحاجات كتيرة مش في مكانها ، ومع تقدمها أكتر وأكتر كانت الفوضى بتزيد ،وصناديق المحاسبة كانت مفتوحة والفلوس مختفيه
رايتشل هنا حست بخوف شديد فخرجت من المحل وهي متوترة ، فعرض عليها واحد من الواقفين في طابور محل أبل ، واسمه" رايلند" المساعدة بعد لما لاحظ توترها، وافقت رايتشل أن رايلند يدخل معاها عشان يشوفوا الوضع المريب اللي جوا المحل ، وكملوا الأتنين مشيهم وبكل خطوة كانت فوضى بتزيد أكتر لحد ما أنتهت عند المخزن الخلفي للمحل، وهناك كانت مستنياهم مفأجاة محدش كان يتوقعها .
................................
...................
.......
...
..
.
المرة دي الفوضى كانت أسوء ، لما وقعت عينهم على حاجه أثارت الرعب في نفوسهم وهي آثار دم على الأرض ، كمل رايلند مشي ببطء وتتبع آثار سير الدم ،ومع المشي أكتر كان الدم بيزيد لدرجه أنه غطى الحيطه والأبواب ، ولما وصلوا لممر ضيق قدام باب طوارئ المحل اتفاجأ رايلند ببركة دم وفوقها سيدة نايمه على بطنها والدم حواليها بشكل كبير بطريقة دموية ، رايلند فورًا اتصل بالشرطة ، و في أثناء إتصاله سمع حاجه بتتحرك شويه، ف راح لمصدر الصوت عشان يتفاجأ بمنظر بشع تاني لسيدة نايمه على الأرض تم ربط ايدها وفيه إصابة في رأسها ، ولما قرب منها لاحظ أنها لسه بتتنفس،
وصلت الشرطة والإسعاف وتم نقل السيدتان للمستشفى ، رايتشل قدرت أنها تتعرف على السيدتان وإكتشفت أنهما الموظفتان اللي بيشتغلوا معاها في دوام المحل الليلي ، وهما بريتني نوروود - 29 عامًا، وجينا موراي - 30 عامًا ، وللأسف مقدروش الأطاء انقاذ جينا بسبب اصابتها الكبيره ، اما الموظفة التانية بريتني عاشت ، و في أثناء تواجدها بالمستشفى تم إستدعاء سيدة بتشتغل في الاستشارات النفسية عشان تتكلم مع بريتني اللي كانت في حالة إنهيار وبكاء شديد على أمل أنها تقولها اللي حصل في الليلة اللي فاتت ؟
( صورة بريتني نوروود👇👇)