البدوي العاشق

21

#البدوي العاشق(٢١)
#بقلمي : زينب امير

فلاش باك قبلي شهر :
ماف وحده فينا م بتتمنى انها تكون ام.. شعور الامومه بِخلِف وراهو حنيه غريبه مشاعر واحااسيس.. م بقول الاب م بحس.. بس الأم عندها طيبه وحنان ربنا زرعا فيها اكتر.. والأنثى بطبعها حنينه.. ف كونو اني م بقدر اجيب أطفال.. دي حاجه زعلتني شديدد وخلتني في حاله م يعلم بيها الا ربنا.. عارفه اي حاجه ل خير .. وكل شي مسطر ومكتوب.. انك تكوني ام دي حاجه عظيمه شديدد.. تسمعي كلمه ماما من بيبي صغير.. طفلك.. والطفل ده كل يوم بيكبر قدام عيونك لو مكتوب ليك.. زعلت بكيت حتى جاني اكتئاب.. اسبوعين وانا في الحاله ديك.. فجأة.. لمتين ح تبكي كده ي لجين.. انتي م ح تسمعي كلمه ماما.. بس اقلاها هو ح يقدر يسمع كلمه بابا.. اتنفضت من مكاني.. مشيت ع جهة الدولاب.. شلت جلباب.. اخدت شور.. صليت ركعتين.. وقعدت ادعي كتير واستغفر.. ي رب ي رب.. "لا اله الا انت سبحانك اني كنت من الظالمين " عندي امل كبير في ربي انو ح يستجيب دعائي ويحقق لي مطلبي.. خاصه وانو الدكتور قال ماف مشاكل بس لسه النصيب م جاا.. بعدها دخلت ع المطبخ.. رتبتو وقعدت اطبخ.. شغاله وفي نفس الوكت سرحانه.. في بالي حاجه لازم انفذاا..

بحرك في كبايه الشاي وبعاين للملعقه... كنت متردده في الكلام ال ح اقولو خاصه وانو صعب على شديدد.. ل نفسي م متقبلاهو بس كان لازم منو.. اتنهدت... رفعت راسي عاينت ليهو... كان مبسوط وع وشو ابتسامه.. م كان قادر يخبي فرحتو عارفاهو انبسط كيف ساعه شافني في حالتي ديك وكيف اتغيرت.. اتعاملتا معاهو عادي.. عادي ؟ عادي كيف وانتي لمن شفتيهو مشيتي عليهو وطبعتي قبله في خدو!.. اتنحنحتا وحاولت بقدر الإمكان كلامي يكون جادي شديدد وم اتوتر... مسك يدي بيدينو الاتنين وقال لي احكي.. يعني حسّه انو عندي كلام؟!..

قلت ليهو عارف؟ هزا راسو ب نفي.. ابتسمت وفي حلقي غصه : خليني اكمل طيب.. ضحك وقال لي منتظرك انا.. ختيت يدي التانيه فوق يدينو وضغطت عليهم.. قلت:
'-م نفسك يكون عندك أطفال؟ اتزوج ي عمر و
(قاطعني)
"_قصدك عندنا!! وانتي امهم صح.. بعدين مش انا قلت ليك ح نشوف ونفتش حل وم ح نستسلم.. ممكن نصبر شويه؟ أفكارك عجيبه ي لجين.. مش ياهو انا أسي معرسك انتي..
(المره دي قاطعتو انا وقلت بنبره سريعه متوتره:)

' _ كان انا أو أي مره غيري..لو هي الام او انا في النهايه انت ابوهو وطالما انت ابوهو معناها انا اكيد امو.. انا حاليا كل البهمني الطفل.. وافق عشاني انت.. خت نفسك مكاني..
(عاين لي مسافه بدون م يقول حاجه.. فكا يدي وقام ع حيلو ناديتو : وقف وقال:)

" _ طالما الطفل عندك مهم وانا لا.. وشكلو خلاص اخدتي قرارك.. ف ابشرك شوفي لي عروس وبعقد عليها أسي دي لو عايزه.. المهم ست لجين عايزه شنو ونحنا ننفذ..
(وقفت والتفت عليهو )
'_عُمر.. م تفهمني غلط انا م كان قصدي كده.. كل الموضوع انو انا..

(كالعاده م خلاني اكمل وطلع ع باب الحوش)

الحصل بعدها كان اقرب من الخيال.. جسمي كلو كشا وانا بشوفو تاني يوم جاا داخل لي وع وشو ابتسامه.. وبكل برود  الدنيا بقول لي م ح تباركي لي حققت ليك العايزاهو..
قلبي وجعني شديدد..حسيت اني عايزه ابكي.. جاتني رعشه وانا بمد ليهو يدي.. بحاول امسك في سيل الدموع العايز ينزل ده.. بصوت مهزوز واقرب للبكاء.. قلت ليهو مبروك شديدد شديدد و.. جراني من يدي وحضني عليهو.. يدو بتمسد فوق ل شعري.. دموعي نزلت حاره وانا بشهق.. يعني خلاص اتزوج؟

بعد مده ونحنا واقفين نفس الوقفه زحاني منو وهو بقول : لو الموضوع ده مزعلك كده بتطلبي مني طلب زي ده ليه.. زي م هو حار عليك انا علي اكتر،،مسح لي دموعي وكمل كلامو.. ممكن تبطلي بكا،، لانو ماف حاجه حصلت من اللي في بالك.. قلت ليهو عُمر! قعدني في السرير وباسني في جبيني.. وردّ لي قلب عمر.. حبيبه عُمر.. مرتو ل عُمر..ضحكت وقلت ليهو بحبك انا ي عُمر.. بحبك شديدد💗

باك :
=زعلانه ؟
_لا
=قاعده تبكي طيب؟
_مسحت دموعي : لا
=كان مفترض اسمع كلامك واتزوج صح؟ 
-غلط
=ابتسم :بتحبي البكى زي عيونك . لجين عايني لي هنا .
_م دايره . مرتاحه كده !. . اعتبرني م قلت حاجه .
= ي زوله انا خلاص سمعت كلامك ولقيت لي وحده فرفوشه . جنها هظار وضحك . انتي بكايه ياخ !
_زحيت منو وقرصتو في يدو : انت اقدر بس .
=ضحك بصوت عالي ورجعني ل حضنو تاني :
=بتعرفيني ؟
_ايوه اكيد .. ده سؤال اسي؟
=جااييك انا اصبري..
_اها
=بحب شنو انا ؟
_بتحبني؟
=بحبك ؟
_ايوه اكيد
=اسمعيني طيب
_ها
=بحبك
_ضحكتا : عارفه !

يتبع ..