البدوي العاشق

4

#البدوي العاشق (4)
#بقلمي : زينب أمير

الشباب الجو داخلين ديل واحدين فيهم دخلو المطبخ وختو علب الزيت والخضروات ع جنب،

والبقيه دخلو الغرفه الكناا قاعدين فيها وختو شوالات السكر وباقي الحاجات وطلعو طوالي،،

وشوشوهم دي نحنا البنات م رفعوها فينا وعاينو لينا ساي،،
رقيه قالت م شاء الله الناس ديل محترمين شديد ومؤدبين كمان ،، عينهم دي من الأرض م رفعوها ،، ردت ليها رغد فعلا فعلا،،

بعدها تاني انشغلنا معاهم بالخدمه،، جابو البطاطس والأسود والبصل.. قعدنا نحنا البنات نتونس ننضف ونقطع فيهم،،

رقيه مشت مع وحده من بنات خالات فاطمه اسمها سلمى ظريفه كده، شويه وجو طالعين بكبابي العصير وزعوها علينا وقامو يعملو تاني،،

بعد انتهينا خلاص والساعه مشت ل اتناشر اي زول شاف ليهو سرير ورقد نام فيهو،،

الا نحنا الما عرفنا ننوم وين نسبه للسرارير المليانه دي،، رغد قالت ننوم وين ي بنات؟ قلت ليها كدي دقيقه التجي فاطمه وتاني نشوف،،

فعلا ربع ساعه وجات لقتنا قاعدين في الوضايه،، قعدت في الأرض بتعب وقالت، حيلي اتهدا ي جماعه والله التقول اخير الجامعه،
قعدنا نضحك فيها،، رقيه قالت ليها آها ي الاخت النوم كيف؟ لمن م قادره من النعاس والتعب، فاطمه مدت ليها يدها نظام تقومها وكده بعد قامت نفضت ملابسها وردت ليها صحي والله الناس ديل كلهم نامو نحنا نرقد وين باقي الليل ده؟؟!

كدي دقيقه اتحركت.. بعد دقائق أشرت لينا من بعيد شويه،،،انو نصلا، بعدها اتحركنا وراها والمكان كان مضلم،، البركه ساي في ضوء القمره،، وغير الشخير وصوت الكلاب م بتسمعي حاجه تاني،،

دخلتنا في غرفه كده وقالت لينا، اي اتنين في سرير ارقدو يلا،، قلت ليها ده بيت منو ولا غرفه منو؟ ماف زول بجي هنا؟ ردت لي الغرفه دي بتنوم فيها حبوبه ومعاها اي وحده من البنات وهي أسي نايمه ب هناك،، المهم نومو الصباح رباح،، قلت ليها تعبانه بس، لكن م نعسانه،، كانت راقده جنبي رقيه، ناديتها كم مره م ردت لي وطبعا زاتو م شايفين زي الناس،، فاطمه قالت لي بتكون نامت،، قلت ليها شكلو كده،، رغد قالت بصوت ناعس،، لجين نومي عليك الله ولا اسكتي،، قلت ليها سكت خلاص، تصبحو ع خيرر،، ماف زول رد علي، رديت ل نفسي وانتي بخير وغمضت عيوني وبقيت أفكر في اليوم ده لحدي م شويه شويه النعاس غلبني ونمتااا...

الصباح لمن صحيت م كنت فاهمه اي حاجه،، الجو سخن،، والشمس بره ناار، رفعت راسي شويه وقعدت اعاين كان في بنات في السرير التاني بتونسن وبضحكن بصوت عالي حتى م راعو لي انا النايمه دي،

فجأه رقيه دي صحت وختت يدها في كتفي لمن خلعتني سألتني الساعه كم؟
قلت ليها م عارفه دقيقه بس، دخلت يدي تحت المخده وجريت تلفوني لقيتها تمنيه شوكه،،

قمت من السرير وكلمتها،،

رجعت رقدت تاني وعاينت لي وعاينت للبنات احساس ديل مالهم ولا الحاصل شنو؟ ابتسمت وهزيت ليها اكتافي،، قلت ليها قومي ي بتنا بعده نصحصح ونشوف الموضوع شنو! 

كنا قاعدين في المصلايه انا ورقيه ساعه دخلت فاطمه وماسكه صينيه فيها كبابي.. ووراها رغد شايله صحن بسكويت،، صبحو علينا،، فاطمه قالت قومو طيب نشرب الشاي علشان نمشي نشوف العروس امي قالت لي في بيت ناس خالي ب هناك ...

اي وحده لبست ليها عبايه وطلعنا سوا، في الطريق فاطمه بدا تحكي لينا عن أهلها شويه وقالت،،
طبعا جدي ده العمده او الناظر حق القريه،

رقيه قالت ليها يعني شنوو؟ فاطمه ضحكت وردت ليها عمده ي رقيه حبيبتي يعني زي م في الخرطوم مش في ناس كده كبار بتهتم بمشاكل السكان،،مثلا
لو في شح في المويه او في الأكل او مشاكل خطيره اللهم بالشكل ده،، يلا ناس القريه ديل بجو ل جدي ده،، فهمتيني؟

رقيه ردت ليها ايوه ايوه م شاء والله ربنا يحفظو ليكم، وبقت تشيل وتسأل فيها،، قلت ليها انا برضو عندي سؤال محيرني، البنات قعدو يضحكو،،

قلت ليهم اسكتو واسمعو، رغد قالت لي، اسألي ي بتنا الليله ي فاطمه ربنا يعينك، الليله يوم الاسئله، عاينت ليها بطرف عيني وقلت خليتو خلاص..

رقيه قالت لي خليهم واسألي ي لجين،، حتى ديلك سكتو شويه، عاينت ل فاطمه وقلت، لاحظت الناس عندكم كتار، والحاجات الجابوها امس دي للفطور كتيره وممكن تبوظ لحدي موعد العرس،، ليه طيب؟

رغد قالت لي والله سؤالك وجيه وفي محلو حتى انا كنت عايزه اسألها السؤال ده،،

صلحت طرحتي ورفعت راسي وبشماته كده. قلت ليها بتتعبي فاطمه بالاسئله الكتيره دي،
قرصتني وقالت بتتسدي فيني صح؟ قلت ليها دي ب ديك..!!

لقينا نفسنا وصلنا البيت خلاص،، فاطمه قالت لينا بعدين بحكي ليكم ي بنات ارح ندخل سريع ونطلع م بنقعد كتير علشان نساعد ناس البيت،، هزينا ليها راسنا ودخلنا..

يتبع...