البدوي العاشق

10

#البدوي العاشق (10)
#بقلمي : زينب أمير

بعد اربعه شهور واسبوع.. ومع اخر امتحان فاينل.. طلعت من قاعه الامتحانات واتحركت ع كافتريا الجامعه.. طلبت عصير وقعدت في وحده من البينشات.. خمسه دقائق م عدت وجات فاطمه قعدت جنبي.. سألتها الشغل كيف قالت لي حلوو.. بتردد واضح قبلت علي وقالت،، اسمعيني ي لجين عايزه اقول ليك حاجه قبلي البنات يجوو.. عايزاك تفكري كويس قبلي م تاخدي قرارك،، هاا فكري! سألتها في شنو ي فاطمه.. قالت لي الموضوع وباختصار شديدد انا الليله جيتك ب عرض زواج.. شوفي م عارفه اقولا ليك كيف لكن ولد خالي قال عايزك.. شافك في العرس.. وقال لي اشوف رأيك شنو.. ولو قلتي خير هو يفتح اهلك في الموضوع ده ويعملو رسمي.. هي كانت بتتكلم لسه وانا م معاها خالص.. م انكر اني استغربت وشديدد كمان.. عايزه اسألها انتي قاصده منو؟ وكتير من الاسئله في بالي لكن وقتها لساني م اسعفني وكنت ساكته بس.. قاطعو كلامنا البنات وهم بقعدو في نفس الوكت..
قعدنا شويه واتحركنا تاني ع بوابه الجامعه..
رقيه ح تسافر بكره ل أهلها وفاطمه مسافره باقي اليوم ده..

م اتكلمنا كتير اتوادعنا بالدموع.. واحساس م ح نتقابل قريب تاني.. فاطمه حضنتني وهمست لي،، رأيك شنو تجي تعيشي معانا؟ وكتها لا ح تشتاقي لي لا ح اشتاق ليك.!

مر اسبوع كامل وم عندي خبر عن البنات.. غير رغد الكل يومين ي هي عندي ي انا عندها... يوم الاربع زي الساعه 9 مساء واثناء م بدردش مع  صحبتي من (بنات الدفعه وكده) .. رسل لي رقم( السلام عليكم وبعدها رساله تانيه كيفك ي لجين) اخدت مسافه.. وبعدها فتحت الدردشه ورديت السلام وكتبت منوو؟.. لقيت اخر ظهور قبلي نص ساعه..

تاني يوم الصباح طوالي لقيت رسائل من نفس الرقم (انا فاطمه ي لجين..تلفوني اتسرق من يوم سافرتاا وياداب قبلي يومين اشتريت واحد تاني وركبت فيهو شريحه جديده) سلمت عليها تاني وسألتها من أخبارا.. والحاصل معاها.. برضو م كانت متصله..

الا بعد الفطور لقيت منها مكالمه.. رجعت ليها وبقيت اتكلم معاها..
في نص الونسه قالت لي اها م فكرتي؟ قلت ليها اديك الحق! كلامك انا م اخدتو بجديه شديد.. انتي م اديتني تفاصيل.. بس اللهم واحد من أهلك طلب يدي،، بس هو منو وشغال ولا بقرأ لسه م قلتي لي.. حتى اسمو انا م عارفاهو.. والاسبوع الفات ده كلو م اتواصلتي معاي علشان تأكدي لي كلامك،، قالت لي ي زوله م فات شي أسي بحكي ليك.. ي ستي شغال في ورشه عربات وشبه حقتو.. شغلو كويس وماشي الحمدلله بالنسبه ل عمرو ف عندو 28 سنه..والله ي لجين م عشان هو ود خالي وكده بس هو م شاء الله عليهو خِلقه وأخلاق.. اسمو عمر! ووو قاطعت كلاما وقلت ليها قلتي لي منو ي فاطمه؟.. ردت لي عُمر ي لجين..عُمر!

طيب لو قلت ليك اسي اني موافقه ح ابقي خفيفه صح؟! بس انتي صحبتي عادي اكلمك! .. بس هو لا.. يومين وكلميهوو.. ضحكت وقالت لي جاده انتي؟ متأكده؟ اقصد موافقه يعني؟ اتنهدتاا وقلت ليها ده كراشي ع فكره.. انتي كلميني هو لمن قال ليك كلميني انتي كيف عرفتي انو قصدو انا؟! قالت لي ببساطه عشان هو وصفك لي.. وحده من البنات الجو معاك طويله وبتلبس نضاره.. في منو غيرك؟ (طبعا انا بلبس نضاره لكن م حقت نظر.. عندي حساسيه من الغبار.. مره مره بلبساا)..  بحماس واضح قالت لي من متين بقى الكراش؟!،، ابتديت احكي ليها وهي كل شويه تقاطع وتسأل تقاطع وتسأل..!!

#خاطره:
علي سبيل الغزل قلت: هل انت متعب؟ قال نعم.. لماذا؟ قلت لأنك تجوب عقلي باستمرار!!.. ♡

#يتبع...