البدوي العاشق

3

#البدوي العاشق(3)
#بقلمي : زينب أمير

مر اسبوعين بدون اي  أحداث مهمه،، غير قرايتنا مع بعض والمعسكرات حقات القرايه، قبلها ب يومين تلاته كده كان بدينا نعمل ماسكات طبيعيه في وشوشنا بطلب من فاطمه نظرا ل انو عرس اختها بعد اسبوع طوالي من نهايه الامتحانات،، بعد طلعنا من الجامعه اتوادعنا واتحركنا انا ورغد ع البيت سوا، فاطمه دي اصلا ساكنه في داخليه جنب الجامعه طوالي، ورقيه زاتها معاها، رقيه دي شهاده عربيه جات للجامعه وكده،،

بعد وصلت البيت،، لقيت مع امي نسوان الصندوق وبشربو في الجبنه والبسبوسه والفشار،، سلمت عليهم ودخلت جوه،، اخدت شور وصليت الضهر، مشيت ع المطبخ اعمل لي حاجه أكلها،أثناء م بقلب في الحلل، فكرت قلت اشتري اندومي طولت منو، شلت لي قروش َلبست لي عبايه ومشيت طوالي في جنبنا واحد م بعيد يعني، لمن رجعت البيت لقيت النسوان طلعو، امي سألتني اشتغلت كيف، قلت ليها تمام الحمدلله،،، اتونست معاها حبه، بعدها عملت اندوميني اكلتو ونمت،،

اليوم البعدو، الساعه كانت تسعه، جاتني رغد علشان نقرأ سوا زي م اتفقنا كنا اووف وشغالين يوم بعد يوم،،

إستمرينا كده لحدي م خلصنا واجزنا خلاص،،

تاني يوم بديت طوالي اجهز في ملابسي م فضيت ليهم نهائي الا أسي.. جاتني امي داخله، قعدت في طرف السرير وختت لي قروش.. قالت لي ديل بكفوك ولا ازيدوك حبه!؟ ،، رديت ليها لالا بكفوا وكتير كمان،، ي ربي في حاجه تاني انا نسيتها،، بقيت أتلفت،، الشاحن ودخلتو، تلفوني وشاحنو فل الفل،،بقيت بقلب في الدولاب طلعت منو طرحه ودخلتها في الشنطه وجريتها معاي بره،،امي ماشه وراي  بتأكد لي في الحاجات الشايلاها معاي،، كنا في الصاله لمن ابوي جا داخل وبنادي لي، وقال لي العربيه دي واقفه بره والبنات ديل منتظرنك م طلعتي لسه،، قلت ليهو خلاص م عندي حاجه انا.. ودعتهم وانا شايله شنطتي حقت اليد وابوي كان بجر لي في الشنطه الكبيره ل بره،، سلمت ع البنات وركبت،، دقائق ووقفنا قدام بيت ناس رغد اللي بدورها طلعت ووراها امها، بتوصي فيها تنتبه ع نفسها،، الوكت داك كان الواطه لسه م فتحت زي الناس كانت سته الا تقريبا، حسب كلام فاطمه لينا لازم نطلع بدري علشان نصل مع وكت الفطور وعلشان زاتو الجو م يسخن لينا في الشارع،، آها مع الونسه، والمشاغلات، وبعد مرور تلاته  ساعات تقريبا دخلنا ع قريتهم دي،، وهي تشيل وتوصف لينا ده الدكان ود الجامع ودي الساحه، لحدي م وقفنا قدام باب بيت كبيررر وفيهو ضجه كده والناس داخله  وطالعه،، قبلت علينا فاطمه ب ورا  "وب ابتسامه " قالت لينا اهلا بيكم نورتو وشرفتو! .. نزلنا ودخلنا معاها جوه وأصوات الزغاريد دي م تديك الدرب لدرجه بقينا نتلفت انا والبنات سوا، فاطمه لمن لاحظت لينا قالت عادي عادي وقعدت تضحك،، كان م اخاف الكضب نص ساعه كامله ونحنا واقفين بنسلم،، بعدو ضيفونا جوه البيت وجابو المويه والضيافه،، م عدت خمسه دقايق ونزلو لينا صينيه الفطور م شاء الله تبارك الله، معروف ناس البلد ديل كريمين ل درجه بعيده،،، بعد موال الفطور،، شربنا الشاي والقهوه والعصيررر،، وبقينا قاعدين نتونس مع بنات خالاتا و عماتا ل فاطمه،، غايتو فيهم الظريفه وفيهم الما ادتنا وش زاتو ،، عدينا اليوم ونسه وضحك ولمن ارتحنا خلاص روقنا نفسنا،،وطلعنا ليهم بره..

البنات كانن بدقن في الدلوكه،، والأصوات عاليه شديد والشفع بتجاروا من هنا ل هنا، المغرب لمن اذن المكان ضلم لحدي م جابو الكشافات الكبيره ديك وشغلوها،، بقينا نعاين للبنات البغنن ديل،، واي مره تجي داخله تقعد تزغرد وباقي النسوان يشيلو معاهو ويزغردتن،، لكزتني رغد قالت لي أسي ي لجين كنا ح نفوت القعدات والفرفشه والانبساط ده؟ رديت ليها والله الحمدلله السمعت كلامك وكلمت امي زاتي م اتوقعتها توافق بالسرعه دي، قالت لي انا قلت ليك من الناحيه دي م تشيلي هم فاطمه وبعرفوها سمح،، ميلت علينا رقيه وقالت لينا بصوت واطي: بتوسوسوا في شنو انتو؟ عليكم الله شوفو الناس ديل مبسوطين كيف والأجواء دي ياخي ولا اجواء قطر زاتها،، قلت ليها قطر لكن، حقك تقولي كده ي ناس قطر،،وقعدنا نضحك سوا،، فجأه كده يجو داخلين شباب.. شايلين خضروات وشولات السكر والزيت،، والدقيق،، البنات كلهن وقفن غنا وبقو مركزين مع الدخلو ديل..

#خاطره:
اعتدت ع البقاء وحدي الا ان وجدتك.. ♡

يتبع...