علميني ي دنياي وش ذنبي

Part 11

ثاني يوم واليوم المنتضر بنسبه لـ لينا وفارس
الفجر الساعه 10 كان الجميع بلا استثناء محتاس ومشنغل حتى طارق وخوله
عند البنات
لينا وهي متوتررره مرهه كانت ساكته وهاديه وذا طبعها اذا توترت
ميلاف : ناخذ الفساتين معنا للمشغل نلبس هناك؟؟
سُلاف : اي ايي
خوله : يلا متى نمشي للمشغل
ميلاف : بكلم احد اشوف
انصلت على عساف : الو
عساف وهو منشغل : هلا
ميلاف : تودين للمشغل؟
عساف : مشغول مقدر بشوف نياف لحضه.. لف يدور نياف لقاه مع ابوه يشتغل .. تنتضرن شوي!؟
ميلاف : لاا راح الوقت
عساف : طيب اشوف احد يوديكم .. قفل
ميلاف نزلت الجوال على دخلو ريم وهيام وام سند
ريم : شسويتو
ميلاف : مالقينا احد يودينا للمشغل
ريم : بشوف سعد اذا ما بعد يودينا
اتصلت وقال سعد انه برا يطلعن
ميلاف : طيب اجل بروح اقول لـ امي وعساف لاجاء يوديه وحنا ننهج مع اخوتس
راحت وقالت ل امها واخذو البنات فساتينهن واغراضهم وراحو مع سعد
بالسياره
ريم : سعد اضغط البلوتوث
شغل سعد البلوتوث وشبكة ريم وشغلة لهم اغاني وهم منطربين لاكن طبعاً بدون صوت عشان سعد موجود
وصلو المشغل نزلو البنات وراح سعد متوجه للعيال
وصل ونزل لهم
سعد : ها وش باقي؟؟
نياف : صح النوم
سعد ضحك بحراج اول مانتبه انهم خلصو كل شي وانه تأخر : وديت الحريم للمشغل
عساف قرص نياف : ماعليك منوه عادي خذ راحتك
ابو عساف جا لهم وقال : ها خلاص كل شي؟
سند : اي يعمي خلصنا
ابو عساف : يعطيكم العافيه والله انكم اجوديين ونشامه ماقصرتو
سعد : الله يعافيك يعمي واجبنا
سند : الله يعافيك يعم وابد حنا عيالك
ابو عساف : ونعم العيال والله
راح ابو عساف يريح شوي اما العيال فا توجهو للحلاق يحلقون
خلصو حلاقه ع الساعه 2:30 وراح فارس يتوجه لبيت عمه وتحديداً غرفة عساف يلبس ويتجهز بها عشان الزفه الاولى "تكون فيها العرسان فقط يصورون وكذا لين المغرب"
دخل يتروش وطلع لبس ثوبه شاف البشت معلق واول ماخذه شم ريحة البخور والعطر به استغرب من الي مبخره ومعطره بس مافكر كثير من شاف الوقت توجه للتسريحه يشمط شعره تعطر وحط من دهن عود بيده على النبض وبدا يمشي يده بأماكن النبض عشان الريحه تثبت تعطر مرا ثانيه نزل العطر وللحضه حس بضيق بدال الفراشات الي بقلبه قبل شوي والفرحه الكبيره .. كان وده امه بهاليوم معه تفرح له وتبخره وتبارك له نزل راسه بحزن : الله يرحمك .. راح لبس بشته وبيقول للعامله تجيب له بخور لاكن لف على طق الباب : ادخل
دخلت ام عساف  ومعها بخور وهي تزغرت : الف الف الف مبروك يمه
فارس ابتسم وحس الفرحه مو سايعته توه يتمنى امه تدخل عليه ومعها بخورها تبخره وتزغرت له وتبارك وتفرح له وكل ذا سوته ام عساف وكأنه تثبت له انه مو وحيد وتذكره انها بحسبة امه وتعده زي عيالها
فارس : الله يبارك فيك يبعد حيي
ام عساف قربت تبخره وهي تقول : بخرت لك بشتك وعطرتوه هو وثوبك
فارس باس راسها : الله يخليك لي والله اني فقدت لي ام وعوضني ربي بـ ام ثانيه
ام عساف ببتسامه حزن تحاول تخفيه : الله يرحمهّ
دخلو عساف ونياف ونياف يحاول يزغرت : مبرووووككك يعريس مبروووك
فارس ببتسامه شاقه وجهه : الله يباررك فيكك
عساف : مبروكك فروس
فارس : الله يبارك فيك
عساف : يلا رح للقاعه وحنا نجهز ونلحقكم
فارس : يلا
طلع فارس ولقا سند وسعد واقفين ينتضرونه وهم مشغلين السماعه حقت السياره وصلوه للقاعه  ورجعو
،
نروح للبنات
خلصو مكياج وشعر ودخلو يلبسن
ميلاف وهي تمشي كأنها عارضة ازياء : شراايكمم
البنات بصوت واحد : تهبليييييييننن
ميلاف بضحكه : ادري بدون محد يقولوه
ريم بضحك : يعع يشين النرجسيه
سُلاف قامت تلبس وجتهم وهي تدور بخجل : حلو ؟
هيام : انتِ حليتيه
لينا : يهولل "يهبل " عليتس يبعد حيي
ميلاف : يويليي حالييي ي تؤامي قمر اربع طعش
ريم : كلكِ حلا
سُلاف بخجل من مدحهم : عاد كنت طنيانه "زعلانه " مو عاجبن
البنات بصوت واحد : مع نفسك/ نفستس
ريم راحت تلبس وطلعت لهم وهي تمشي بدلع وغنج : اهبل صح!؟
ميلاف : وتقول عني نرجسيه هي وخشتها
البنات ضحكو
لينا : اكيد من غير مانحتسي تهولين "من غير مانقول تهبلين"
هيام : مافيها كلام ذي اكيد تهبلين
سُلاف : الثقه في محلها
خوله بغنج : بقوم ابدل ،، دخلت بدلت وطلعت لهم وهي تشمق بعيونها "قلك دلع" : حلو مو؟
البنات بدون نفس : اي
قامت هيام تلبس ورجعت لهم : ها ؟
ميلاف بضحكه : غطيتي على اختتس
ريم ضحكت : اول مرا تقولين كلام صح
سُلاف : هههههه انتن بس تقارشن "تحارشن" خلاص وبعدين ماشاءالله هيام تهولين يبعدي
اينا : بناتتت كلكم تهولون وش تركتو لي
ميلاف سحبتها وقالت : تركنالتس واجد امشي البسي فستانتس
لينا : طيب ساعدين بوه شوي وش كبروه الفستان
دخلت ميلاف تساعدها وطلعت وهي ماسكه يد لينا تساعدها تمشي
اول ماطلعت لينا صارو البنات يصفقن والي تصفر والي بالمشغل ابتسمو على فرحة البنات وهم مايعرفونهم
سُلاف وهي تسوي حالها بيغمى عليها : بناتت وشهوو ذاا بحرررننن "شوفن" الزينن ذا كلوه
ريم : تقولين مابقى لكِ شي انتِ مابقيتي جمال لغيرك ماشاءالله
هيام : ليوونهه شذا تكفين تاخذين العقل والله ماشاءالله عليك
لينا ماردت عليهم وبداء عندها التوتر وهي توها تحس انه صار وقت الجد لما لبست الفستان
ميلاف حضنتها : يااامليي والله الطقوعه " ياكل من لي والله الخوافه "
لينا ابتسمت بتوتر تمنع دموعها
ميلاف : يلا يلا الحين مين يودن للقاعه؟؟
سُلاف : بشوف ارسل على القروب
ارسلت على قروب عايلتهم : ي اهلي من فيكم يتكرم ويودن للقاعه ولا ناوين تتركونا بهالمشغل؟
نياف : ناوين نتركم
عساف : انا جاي وترا قريب منكم اطلعو
سُلاف : ياعلك بعد نياف
نياف : وش دخلن انا؟
ارسلت ضحكه وقفلت جوالها وقالت: عساف جاي وتراه قريب يقول اطلعو
لبسو البنات عباياتهم وحطو الشيله "طرحه" على وجههم عشان الميكب
..
كان فساتين البنات كا الاتي
ميلاف لابسه فستان وردي طفولي علاق ماسك لحد الخصر يوصل طوله لركبه 
سُلاف لابسه فستان بالون الموف ماسك لحد الخصر مفتوح ضهره طويل
خوله لابسه فستان برتقالي اكمام طويله ونازله .. ضيق وطويل
ريم لابسه فستان احمر حمار الدم ناعم مرره بدون اكمام واسع من تحت ومن عند الصدر على شكل V
هيام لابسه فستان ابيض اكمامه لين تحت الكوع بشوي وواسعه نفشه بسيييطهمم تحت الخصر
وعروستانا عاد معروف فساتين العروسات
..
وصل عساف وركبو معاه
نزلهم للقاعه ع وصول المصوره
هيام : انا وريم بنروح للصاله الي بيحطون بها العشاء على ماتخلصون تصوير وكذا
سُلاف : كلنا بندخل تبقى المصوره
لينا بسرعه : لا لا لا لا ضلو عندي
ميلاف : وش نوحتس انتِ تسذا منخرعه؟
لينا : مدري مدري متوترهه مييميي انتِ خلتس هنا ع الاقل
ميلاف : طيب طيب
دخلو البنات للصاله وقالت المصوره : روحي للغرفه الي فوق على الدرج اليمين والعريس بالجهه الثانيه اذا ارسلت لتس انزلي امسكي يد زوجتس بنص الطريق وانزلو مع بعض تمام؟
لينا هزت راسها بـ اي وراحت فوق وبقت ميلاف تحت جالسه
وصل فارس ودخل القاعه وقالت له المصوره كذالك نفس الي قالته بـ لينا
راح فوق ودقايق ونزلو على صوت الزفه الهاديه
اول ماوصلو لنص الدرج مسك يدها فارس وهو يقول : ياحظ يوم صرتي فيه نصيبي يبعد الدنياء
لينا ابتسمت بتوتر وماردت
كملو الطريق لين وصلو لتحت وصارت المصوره تقول لهم وضعيات يصورون فيها وميلاف تصور وفارس مبسووط بعكس لينا الي التوتر لاعب فيها وخلاجنه من طريقة التصوير قدام اختها
اما البنات فكانو فاكين فتحه بسيطه يشوفون فيها التصوير
خوله وهي مكشره : خاروف شوي ويقول ما
سُلاف بطرف عين : تارك الثقل لتس
ريم الي انقهرت منها وقالت عشان تقهر خوله : الي يشوف لينا يعرف يثقل ماشاءالله عليها تفتن
خوله : وع اصلاً مدري ليه ابوي خطبها لـ فارس ماهي بحلوه ولا بسنع ولا شي على ايش الخبل اخوي حبها مدري
ميلاف بعصبيه : والله يبعد حيي ان اختي ابرك منتس انتِ شايفه وجهتس ي السحليه عشان تتكلمين عن الزين وان جينا للسنع فا انتِ الي يسمعك يقول معذبتوه انتِ حتى شاهي شاهي يالظالمه ماتعرفيين يلا تقلعي للعن ثاويتس
ريم : معليك منها تعالي شوفي
كملو البنات يتفرجون
بعد نص ساعه وصلو ابو عساف وعساف ونياف عشان يصورون معهم كم صوره ويتوجهون لقاعة الرجال
نياف وقفهم عند الباب : يبه تكفى طالبك ييبه خلك واقف بهاه شوي بدخل انا وعساف بمقلب فارس
ابو عساف :وشهو الي بتمقلب الرجال بعرسوه ماتستحي انت ماتنتخي
عساف : يبه خلوه يسوي الي يبي اليله الكل فرحان ومقلب بسيط يزيد الوناسه
ابو عساف : انهجو يموه داخل بس خمس دقايق ماتخلصن من مقلبك بنهج وتركم
عساف ونياف : ابشر
دخل نياف وانتبهت المصوره له يأشر لها تجي وطبعاً هي عارفه انه اخو العروس توجهت له : هلا اخوي؟
نياف : معليتس امر يخوتس ابي تقولين للعريس يلف على انوه العروس تمسك ضهروه من ورا ويلف عليه بنسوي بوه مقلبن صغير وصورين انتي
المصوره ببتسامه للفكره : تمام خلوكم هنا شويه من يلف تعال
راحت وقالت لـ فارس الي صدق ولف وميلاف سحبت لينا  لورا بخفه بدون مايحس وصار مكانها نياف الي مايدري شلون ماسك ضحكته
حط يده على كتف فارس بخفه عشان مايحس بدفاشه ويكشفه
فارس لف وهو مبتسم واول ماشاف انه نياف ضحك بصدمه
اما نياف فا طاح عليه وهو ميتت ضحكك ونفس الحكايه عند الكل واولهم ميلاف الي ضحكتها تقل رقاصه ونياف كانه حمار يناهق " لكم حرية تخيل ضحكهم مع بعض هههههه "
بعد نوبة ضحك دخل ابو عساف وبدو يصورون ولما خلصو ع المغرب طلعو لـ قاعة الرجال
اما البنات والحريم الكبار فا قعدو يرقصن مع لينا والمصوره تصورهم لين صار وقت جيت المعازيم راحت لينا فوق وبقو الباقي
شوي شوي وازدحمت القاعه
وبرضو نفس الكلام عند الرجال
عند الرجال حطو العشاء للضيوف وراحو مع فارس يزفونه وكانت اصوات تطويط السيارات  "البوري " مالي الطريق والموكب الي زاف فارس كبيرر
وصلو للقاعه ودخل عساف ونياف وابو عساف وابو فارس وفارس للقاعه
،
عند الحريم
نزلت لينا على زفه هاديه لين وصلت للكوشه لفت وضلت واقفه على دخول 
فارس الي يمينه عمه ويساره ابوه وبالخلف نياف وعساف
وصلو لعندها وقف فارس جنبها وهو يمسك يدها
تقدم ابو عساف وهو يسلم عليها ويحضنها بعبره : والله وكبرت اكبر بناتي وصارت ازين عروس وراحة شمعة بيتنا مبرووك يبعد حيي الله يوفقتس ويكتب لتس الخير
لينا وهي تمسك دموعها : الله يبارك فيك يتاج راسي
ابو فارس سلم عليها : مبروك وانا عمتس
لينا : الله يبارك فيك
نياف سلم عليها وبارك لها
ولما صار دور عساف يسلم حضنها بقوه وهو يبارك لها وهنا تمسكت فيه لينا وهي حالياً حست انه خلاص ماعاد بتشوف اهلها كل يوم اول ماتقعد وقبل تنام ماعاد بتسهر معهم ولا يتابعون فلم مع بعض .. كان عساف اقرب اخوانها فا اول ماحضنها تمسكت فيه وهي تحاول لـ اخر لحضه تمسك دموعها
عساف باس راسها : افا وانا اخوتس تبتسين بهاليوم ذا؟ خليتس قويه وبعدين ترا كل يوم بنجي لتس وشكلوه بنشتري بيت عندكم بعد ولا تضيقين
لينا ابتسمت بهدوء وماردت عشان ماتبكي
عساف لـ فارس : حطها بعيونك يفارس والله ان نزلت دموع اختي حزن منك تشوف الي مايسرك
نياف : ترا ان زعلتها يويلك والله نجيك من حايل للرياض بغمضة عين نذبحك
فارس لاتوصون حريص بعيوني
ابو عساف : هاذا العشم بك هالله هالله ببنيتي لاتزعلها تراها دُره ثمينه
فارس ابتسم من كلامهم وهو عارف انهم واثقين به لاكن وجوب الوصاه ويذكرونه : بعيوني والله وجلعها ماتبكي عندي الا فرح
بعد كذا قامو الضيوف للعشاء وطلعت لينا وفارس للسياره متوجهين للفندق
ميلاف طلعت لـ حوش القاعه بعد ماطلعو اخوانها وشافت شخص معطي بطوله وعرضه الباب حق الشارع فا توقعته عساف وقالت : عساف
مافي رد
ميلاف : عساف ياخي تعال بصورك توقعت انك نهجت مع ابوي ونياف اشوى مارحت
سند تلي توتر خاف احد يشوفها تسولف معه ويفهم غلط قال : ماني عساف مضيعه يختي
ميلاف خافت لما عرفت انه مو اخوها وانحاشت داخل واستطمت بشي قدامها
ريم : اه وش فيك تركضين كذا؟؟
ميلاف بتوتر : ء اي ادور عساف يمكن ماراح مع ابوي
ريم : ترا سند عند الباب ارسلتني خالتي اعطيه سلك شاحن معها انتبهي تطلعين قدامه
ميلاف : ء طيب
راحت ريم عطت السلك سند ورجعت اما ميلاف فا دخلت اول غرفه بقاعة العرس تهدي حالها وقالت بنفسها : ميلاف ماشافتس عادي وبعدين انتي عبالتس انه اخوتس ماصار شي اهدي .. وبعدين انا غبيه شلون مالاحضه ان ذا انحف من عساف بشوي .. اووف لو شافني احد وش صار!
هدت حالها ورجعت للباقي
،
انتهى العرس بكذا وكل شخص رجع بيته واول ماوصلو نامو من التعب...
ثاني يوم بعد عزيمة العرسان ودع سند وسعد ابو عساف والباقي وحركو للرياض ونفس الكلام ابو فارس
اما فارس فا راح هو ولينا مسافرين شهر عسل لـ فرنسا
،
مرت يومين بهدوء الاوضاع عند الجميع بدون اي حدث يذكر
الرياض ديوانية سند المغرب
رجع سند لـ عادته الي تركها اخر فتره من الشغط والدوام وروحته حايل
كان جميع حارتهم واصحابه ومعارفه عنده بالديوانه بعد الصلاه يتقهوون
عواد : والله لك فقده ي سند لاعاد تروح لحايل
سند : ليتك شايفها والله توسع الصدر والناس الي بها ماشاءالله عليهم
عواد : لا لا انا حدي الرياض وجده بسس
سند ضحك : ماش مايفيد اقناعك
احد المتواجدين بفضول : سند بتضل ديوانيتك مفتوحه بعد المغرب ولا مشغول هالايام
سند : لا ابد مفتوحه للجميع وان كاني ماني موجود يجماعه ديوانيتكم ذي متى مابغيتو تجون الله محييكم
الكل : الله يبقيك / الله يسلمك / ماتقصر
سند قام يقهوي وبعد مانزل الدله قال عواد : سند ابيك شوي برا
طلع معه سند : هلا؟
عواد بحرج كاذب : منحرج منك بس شسوي مالي غيرك يخوي
سند : افا لاتنحرج ولا شي وش تبي !؟
عواد : فلوس
سند : خلاص ابشر الحين احول لك . حول له سند وراح عواد
سعد طلع له : وش يبي المصلحجي
سند : سعدد
سعد : وش الي سعدد يعني منت عارف
سند : ادري والله ادري بس انا ان ساعدته احتسب الاجر لا غير وادري انه مصلحه يبي شي وبيروح
سعد : زين حلو انك تدري الحمدلله .. وش كان يبي
سند لانهاء السالفه : فلوس
سعد : وربي اني داري ماقال لك فقده ولاعاد تروح الا يبي شي المصلحجي
سند ضحك على نبرة سعد وهو يقولها وخبط ع كتفه وقال : ماودك نشوف الضيوف
سعد : امش امش الله يصبرنيي
دخلو وجلسو مكملين سوالف مع الموجودين
،
عواد طلع وشاف عايد ينتضره بالسياره
عايد : ها اخذت ؟
عواد : اي
عايد : زين زيين حلوو كذا كلما بغيت خذ منه
عواد : اي معليك دكتور قاعد على كنز 1000 او 500 كل فتره لي ماتضره ولا يفكر فيها اصلاً
عايد : ناس تتهنى وناس تتمنى
عواد : صدقت المهم يلا امش نفلها دامنا اغنياء
عايد ضحك : يلا
،
حايل بيت ابو عساف
ميلاف : طفش
سُلاف : صدق مابوه احدن نحارشوه
ميلاف : حتى نيافوه بدوام وامي دخلت تغفي ويننس يليناا اخيه بس
ابو عساف الي توه جا من صلاة الضهر : وش نوحتس انتِ وياها
ميلاف : طفشانات يملي
ابو عساف : انهجن معاي اجل
ميلاف : صدددق
ابو عساف : اي اروجن بساع
سُلاف وميلاف فزو بسرعه يلبسن عباياتهن وهن مايدرن وين بيروحن بس اهم شي يطلعن
ركبو السياره مع ابوهن
ميلاف : يبه وين بنغدي؟ "وين بنروح"
ابو عساف : بننهج نجيب طلين "طلي " صغير وفواكه ونشويه بالحوش نوسع صدورنا
ميلاف : هاااالله فعاليات
سُلاف : يبه شرايك لو تكون بالمزرعه مو احسن؟
ميلاف : ايي صح ومنها نشوف سهم واصيل
ابو عساف : انتن لو هو بكفكن سكنتن عند هالخيل مافي اليوم بالبيت باتسر لو بغيتن خلن اخوانكن يوديكن عندهم
ميلاف وسُلاف : طيبب
،
عند نياف وعساف
عساف بعد ماخلص شغل توجه لمكتب نياف يشوفوه خلص ولا لا عشانهم جابين بسياره وحده
عساف : خلصت؟
نياف : لا باقي شوي .. وبعدين وين التحيه ي عسكري؟؟
عساف : لا اله الا الله انت ناشبن لي على هالتحيه
نياف ضحك : شسوي يخوك اعلى منك منصب تتحمل
عساف : نياااف
نياف : امززح عوذه خلاص اجلس انتضرني
جلس عساف ينتضره
طق الباب ودخل عسكري دق التحيه واستراح بعد ماقال نياف : استرح
العسكري قال لنياف بموضوع شغل ومن ذا الكلام وطلع
نياف لف على عساف بضحك : شفت ذق التحيه مو لازم اذكره
عساف نزل نعله "الله يكرمكم " وقطها على نياف الي بعد بسرعه"
نياف : خلااص امزح قم ننهج للبيت
قامو وتوجهو للبيت
،
بيت سعد بعد صلاة العشاء بساعه
كانت مسيره عليهم ملاذ وامها
ام ملاذ : عاد ملاذ من رحتو وهي تحسب الايام متى تجون ولو بيدها جتكم امس مانتضرت ترتاحون
ملاذ بزعل : والدبه ذي من جت وهي تمدح بهم ماكأني لي كم انتضر تجي
الكل ضحك على وجه ملاذ الزعلان وهي تسولف ونبرتها
ريم حضنتها بضحكه : خلاص اسفه مرا ثاني مامدح احد غيرك هههههههه
ملاذ بضحك : ايي ادب
هيام جلست بينهن ومعها ورق عنب : كولن والله حلو طعمه
ملاذ : هلاا بالمحمول والله
هيام : يكلبه قولي بالحامل والمحمول جبر خواطر شوي
ملاذ : ماعندي عندي دعس الخواطر هههههه
ام سند جت وهي معها قطايف : سويتها اليوم اول ماقعدت شوفو ذوقيها
ام ملاذ ذاقتها : ماشاءالله طعمها يهبل كيف سويتيها انا ماتضبط معاي؟
ام سند قعدت تعلمها الطريقه
،
عند سند وسعد بالديوانية | بيت سعد
سعد وهو منسدح على رجل سند : والله فارس له وحشه
سند : اي والله بالوقت ذا لو هو هنا تلقاه يطقطق على خلق ربي ههههه
سعد : عاد فرنسا ماندري وش وقتهم الحين ولا نتصل عليه . نبحث نشوف ؟
سند : وش تبي بالرجال بشهر العسل انتضر هو يتصل علينا كل يوم واليوم متصل اصلاً العصر
سعد : ماني متصل ماعليك .. حرك سعد رجله الا تصقع بالشاهي وينكب عليه وهو حاااااااار فز اول مانكب عليه وهو يبعد البنطال عن رجله
سند فز : ماتشوف يحظي انت بعد تعال اشوف رجلك
سعد بألم : مافي شي تخف الحين
سند سحبه : وين الي بتخف الشاهي حار تعال اشوف .. رفع بنطلون سعد من تحت بحيث يشوف الحرق : اشوا ماهو حيل انتضر بجيب الميبو واجي
راح جابه وجلس عند رجل سعد يحط له بعد ماخلص رفع نضره لـ سعد وشافه مبتسم
سند : تتعاطى كنادر انت؟؟؟ محترق وتبوسم
سعد ضحك وقال بضحك : طلعت تخاف علي ههههههههههههههه
سند ضحك : انقلع ورع وقسم بالله. 
سعد بضحك : احرررج هههههه
سند : يبزر انت اسكت
،
نروح للمعاريس
فرنسا باالفندق
لينا كانت ماسكه القهوه وواقفه عند البلكونه
فارس جا وهو يلعب بشعرها : وش تسوين
لينا : ابحر بهاه "اشرف ذا "
فارس لف نضره للي تأشر عليه وكانت نافوره : يلا البسي وبنطلع نفطر برا ونتمشى
لينا : ابشر
راحت تلبس وطلعو يفطرون وبعدها يتمشون
...
انتهى البارت
بارتنا طويل 2770 كلمه 💗💗 رايكم بالعرس .. وبمقابلة سند وميلاف الغريبه🏃🏻‍♀️
اذا صار تفاعل على البارت كبير راح انزل البارت قبل موعده🫶🏻