..شعرت بقبضة قوية تعتصر قلبها عند سماعها بهدره أمام عمتها بنيته للخلاص منها وتطليقها بأسرع مايكون..وبدون ان تشعر انسابت دموعها فوق وجنتها وهي تسير ناحية السلم بدلا من غرفتها ..نزلت ببطئ شديد ثم جلست فوق درجاته وهي تهمس لنفسها غاضبة..
.."..بتعيطي ليه ياهبلة وقلبك واجعك اوي كدة..مانتي كذا مرة تطلبي منه الطلاق ..واهي جاتلك ع الطبطاب وهتخلصي منه ومن تحكماته .."..
..تذكرت كلمته ترن بأذنها مرة اخرى .."..طبعا هطلقها.."..
..فشهقت وارتج صدرها وعاودت البكاء مرة اخرى وهي تدفن وجهها بين كفيها ...شعرت بمن يجلس بجانبها ويضمها لحضنه ويمسد فوق ذراعها بهوادة وحنو..
..رفعت راسها لتجد دادة فاطمة تهمس بجانب اذنها ..
.."..بس حبيبتي متعيطيش ..بس .."..
..لتفاجئها ايمان تنظر لها بقوة وقالت بصوت باكي يشوبه الكثير من الغيظ..
.."..انا مش بعيط.."..
..رفعت فاطمة حاجبيها بتعجب ثم قالت وهي ماتزال تمسد فوق ذراعها ..
.."..بجد ..طب كويس ..عارفة انتي لو تقوليلي ايه اللي مزعلك ..هترتاحي .."..
..استقامت بظهرها وقالت وهي تمسح وجنتيها بقوة ..
.."..انا كويسة ياست فاطمة اهو ..مافيش حاجة مزعلاني ..".
..ظل قلبها يؤلمها فكانت تريد ان تصرخ به لكي يكف عن هذا الالم الذي يعتصرها ولكن بدون جدوي ..ارادت ان تخرج من تلك الحالة فهبت لتقف وتقول بعصبية ..
.."..انتي طابخة ايه انهاردة.."..
..رفعت فاطمة رأسها لأعلى دون ان تنطق بكلمة ..فهبت لتقف بجانبها وقالت وهي تتأبط بذراعها ..
.."..تعالي معايا المطبخ وانا اقولك طابخة ايه.."..
..واثناء ذلك بغرفة ابراهيم شهقت العمة زهرة فور سماعها بقرار ابراهيم وقالت بصوت حزين..
.."..هتطلق ايمان ياابراهيم.."..
..زفر ابراهيم بضيق وقال بصوت غاضب وهو يمسك شعره بقوة يكاد ان يقتلعه..
.."..انا ...انا مش عارف ياعمتي ..ساعات ببقى عايز امسك في زمارة رقبتها ..وساعات ببقى عايز اخدها في حضني..."..
..تخطى عمته ورمي بنفسه جالسا فوق حافة الفراش ليجلس وهو ينظر امامه للفراغ ليستطرد قوله بصوت هادئ..
.."..أنا من ساعة ماعرفتها وانا حياتي كلها اتقلبت ..فجأة كدة حسيت بان روح جديدة دبت جوايا .."..
..جلست عمته بجانبه وظلت تسمعه دون ان تقاطعه وبوجهها ابتسامة تفترش كامل ملامحها..
..التفت ونظر لعمته بقوة وهو يقول متعجبا من نفسه..
.."..تخيلي ياعمتي اني اول مااقوم من النوم بحس اني مبسوط بس لاني هشوفها ..واول مااشوفها بتجنني وتعصبني وتضحكني .."..
..هب واقفا واخذ يغدو بالغرفة يمينا ويسارا وهو يقول بغيظ..
.."..انا ابراهيم سالم ..مابقتش استحمل يوم يعدي عليا من غير المجنونة دي ما تكون جزء اساسي فيه ..تخيلي ...انا مش عارف...مش عااارف.."..
..هزت عمته راسها بالايجاب وقالت حين وقفت..
.."..كمل ياحبيبي...و ايه تاني ..كمل.."..
..وقف مشدوها وهو يقول بصوت غاضب...
.."..اكمل ايه بس ياعمتي ..انتي مبسوطة للحالة اللي انا فيها دي.."..
..اتجهت ناحيته واحاطت وجهه بكلتا كفيها وهي تقول بسعادة..
.."..جدا...سعيدة جدا جدا..لان المجنونة اللي انت بتقول عليها دي ..قدرت ومن غير ماتقصد ..تأسر قلبك بكل سهولة ..انت حبيتها ياابراهيم.."..
..اتسعت عينيه عن اخرها وتراجع للوراء خطوتين وهو ينظر لعمته بهلع وقال وهو يضحك بسخرية ويهز رأسه نافيا ..
.."..لا ..لا ياعمتي ..بتقولي ايه بس ..انا حبيتها ..مستحيل طبعا.. دا انا عايز انزل دلوقتي اكسر دماغها على اللي عملته فيا .."..
..شبكت زهرة ذراعيها ومالت برأسها جانبا وقالت بصوت قوي ...
.."..ابراهيم ..تنزل حالا تعتذر لايمان عن موقفك البايخ معاها..وتقعدوا وتتكلموا بهدوء ..وموضوع الحب دا ابقى انا اتفاهم فيه معاك بعدين.."..
..اشار ابراهيم لنفسه وصاح بصوت غاضب..
.."..انا اللي انزل واعتذر ..ياعمتي انتي متعرفيش هي عملت فيا ايه انهاردة..اقل مايقال عن اللي حصل انهاردة في الشركة والشارع ..انه مهزلة ..عارفة يعني ايه مهزلة..مستحيل انزل...المفروض هي اللي تيجي وتعتذر.."..
..صاحت به زهرة بغيظ وهي تنزل بذراعيها جانبا ..
.."..ابراااهيم.."..
..واثناء ماكان يحدث بغرفة ابراهيم كانت ايمان تلتهم مافي طبقها بنهم شديد وفمها ممتلئ عن اخره ..تنظر للفراغ امامها بعينين تمتلأ بالدموع ..تضرب الملعقة بالطبق بصوت جعل كل من بالمطبخ يختلس النظرات نحوها بتعجب كما انتابهم شعور بالحزن تجاهها ..جلست دادة فاطمة بجانبها لتربت فوق ظهرها وهي تقول بصوت هادئ بجانب اذنها..
.."..ايمان حبيبتي ..كلي على مهلك..وكفاية عياط ..وجعتيلي قلبي عليكي.."..
..لم تنصاع ايمان لما قالته فاطمة وظلت تضرب بمعلقتها حتى كاد ان ينكسر الطبق لنصفين ..دلف السائق إمام للمطبخ والقى التحية ولكن لم يجيبه أحد حتى عائشة التي تخضب وجنتيها بالاحمرار فور سماع صوته واختلست نظرة خاطفة نحوه ..رجعت تنظر بقلق لايمان التي كانت حالتها غير مطمئنة ..
..اتجه نظره لما ينظر الجميع فوجد تلك التي تأكل بنهم وبيدها الثانية تمسح وجنتيها ..ذهب للمنضدة ليجلس على يمينها بقبالة دادة فاطمة وقال بتوجس وهو ينظر لجانب وجه ايمان..
.."..انسة إيمان ...حضرتك كويسة .."..
..رجعت ايمان بظهرها للوراء لتستند فوق ظهر كرسيها ثم نظرت لدادة فاطمة وقالت وهي تبلع طعامها بصعوبة ..
.."..ست فاطمة ..انتي ليه مش موافقة بجواز بنتك عيشة من اسطى إمام.."..
..ساد الصمت المطبق المكان واتسعت عيني فاطمة عن اخرها..ووقع من يد عائشة الطبق فتهشم عندما وضعت يدها فوق فاهها بعد ان اصدرت شهقة خافتة..أما السائق إمام فتسمر بمكانه وتوقفت انفاسه للحظات وظل ناظرا لتلك التي فجرت قنبلته فجأة وبدوي اصم اذنيه ..لم يجرؤ على النظر لفاطمة التي تلكئت بكلماتها وقالت وهي تنتقل بعينيها بينهما ...
.."..جواز ....جواز ايه بس ..خلينا فيكي انتي.."..
..ضربت ايمان المنضدة بقبضتها بقوة فانتفض الجميع وهو ينظر لها بتوجس وخوف وسمعوها تقول..
.."..انا كويسة ياست فاطمة..مافييش حاجة ..زي الفل ..ومتقوليش تاني ايمان هانم دي ..وكمان انا كنت ناوية اكلمك في الموضوع دا من مدة بس معلش ..اتلبخت في التكاتيك اللي لازم اتعلمها والشركة اللي لازم اروحها..انا بس عايزة اسألك سؤال ..ممكن ياست فاطمة.."..
..رمشت فاطمة بعينيها وقالت بعد ان ارتسم الضيق فوق صفحة وجهها..
.."..ممكن يابنتي ..اتفضلي.."..
..اشارت ايمان باصبعها لكل الموجودين حتى وقفت بأصبعها فوق انف السائق إمام فرجع بوجهه للوراء بسرعة فقالت له..
.."..لموأخذة ياسطى.."..
..ثم نظرت لفاطمة وقالت ..
.."..في حد من الموجدين دول كلهم بيختار مين ابوه ولا أمه .."..
..هزت فاطمة رأسها بالنفي وهي تقول بصوت خافت وتنظر لها بتمعن..
.."..لا يابنتي ..كله قدر ومكتوب.."..
..ضربت ايمان المنضدة مرة اخرى وهي تقول عندما اقتربت بوجهها من وجه فاطمة..
.."..اومال ليه عايزة تحاسبي الجدع الغلبان دا بذنب امه الله يرحمها ..ولا بذنب جوزك الله يرحمه راخر.."..
..وقفت دادة فاطمة وقالت بنبرة صوت حازمة..
.."..الموضوع دا خاص يابنتي ومينفعش نتكلم فيه .."..
..وقفت ايمان وقالت بتحفز وعناد وكأن شحنة الغضب بداخلها وجدت منفذها اخيرا ..
.."..مافيش حاجة اسمها خاص وعايم ..احنا كلنا اسرة مع بعضينا ..وانا اعتبرت نفسي اخت اسطى اؤمؤم..الراجل الجدع ..الطيب ..اللي انتي عارفة من جواكي ياست فاطمة انه هيصون بنتك ويتقي ربنا فيها ..ولو انا كلامي فيه حاجة غلط ..قولي .."..
..تنهدت فاطمة بيأس واضح دون ان تنطق او تنظر لأحد ..التفتت ايمان لإمام فضربت ذراعه من الخلف وقالت من بين اسنانها له بغيظ ..
.."..ماتنطق ياجدع انت وتقول حاجة.."..
..تنحنح إمام وقال بتلعثم وهو ينتقل بعينيه بين الجميع..
.."..ياست فاطمة انا كل أملي في الحياة اني اتجوز عيشة ..ومستعد اتعهدلك واقسملك قدام الناس كلها اني هصونها وهتقي ربنا فيها.."..
..زفرت فاطمة بضيق وقالت ..
.."..استغفر الله العظيم ..بص ياسطى إمام ..انا هفكر في الموضوع دا وكمان لسة هاخد رأي عيشة ......"..
..توقفت فاطمة عن الكلام عندما صاحت ايمان بصوت عال وبقوة وهي تشير لعائشة التي تقف جانبا تفرك كلتا كفيها بتوتر ملحوظ وتلهث في صمت..
.."..عيشة موافقة .."..شهقت عائشة بصوت عال عندما توجهت انظار الجميع اليها ..استطردت ايمان قولها وهي تغمز لها ..
.."..مش كدة ياعيشة ..مش انتي موافقة.."..
..نظرت عائشة لوالدتها التي كانت تناظرها بنظرات قاتلة فقالت بتلكؤ..
.."..انا ..اللي هتقول عليه امي انا موافقة عليه.."..
..اقتربت ايمان من فاطمة وامسكت بذراعها لتجعلها تنظر لعينيها وهي تقول بصوت هادئ ..
.."..انا عارفة انه يمكن الموضوع صعب عليكي شوية..بس كل الماضي دا هيتنسي اول ماتشوفي بنتك مبسوطة في بيتها مع واحد بيحبها وبتحبه وخصوصا بقى انه متربي في وسطيكم وعارفة اخلاقه كويس جدا ..مش احسن ماييجي واحد غريب منعرفش اصله من فصله ياخدها ويبهدلها معاه ..صح ياست فاطمة ..ولا ايه.."..
..عاود الجميع النظر لفاطمة التي تنهدت ووضعت كفها فوق كفها الاخر وهي تتوسد خصرها الممتلئ.. فتأبطت ايمان ذراعها وطبعت قبلة قوية فوق وجنتها وهمست لها ..
.."..سايق عليكي النبي ياشيخة لتوافقي ..والله الواد امام دا واد جدع وبيموت في بنتك..عشان خاطري يابطة بقى ..بصي جوزيه البت وطلعي عليه القديم والجديد.."..
.. تنهدت فاطمة وقالت بيأس واستسلام وشبح ابتسامة يتردد الظهور فوق ملامح وجهها ..
.."..الأمر لله ..انا موافقة.."..
..صاح الجميع بتهليل وزفرات ارتياح...
..وضعت ايمان يدها فوق صدرها وهي تتشهد بارتياح ثم احتضنت دادة فاطمة بقوة ثم قالت ..
.."..حبيبتي يابطة ...يا ريت البت عزة كانت هنا كانت رقعتلكوا احلى زغروطة .."..
..فقامت الخادمة زميلة عائشة بفرد كفها فوق شفتيها وزغزدت بصوت عال..نظر إمام لعائشة التي تخضب وجهها باللون الاحمر وتحركت شفتيه دون ان تنطق بكلمة .."..بحبك.."..
..كادت عائشة ان تقع مغشيا عليها لولا احتضان زميلتها لها ..
..لمحت ايمان مافعله إمام لعائشة الخجول..فارتسمت ابتسامة حزينة بشفتيها وشعرت بوجع يضرب قلبها ..وقبل ان تغشي عينيها بسحابة من الدموع صاحت بصوت مهزوز وهي ترفع كلتا ذراعيها عاليا..
.."..نقرا الفاتحة بقى .."..
..نظر الجميع لبعضهم البعض فرفعوا اذرعهم وهم يضحكون ..وبدأوا بقراءة الفاتحة بصوت هادئ مسموع..دلفت زهرة للمطبخ فتوقفت مكانها عند الباب عندما راتهم جميعا واقفين رافعين اذرعهم يهمسون ..بعد ان انهت
ايمان القراءة ومسحت وجهها بكفيها لمحت عمتها فاتجهت اليها وهي تقول ..
.."..تعالي ياعمتي ..باركي للست فاطمة..اسطى اؤمؤم خطب عيشة.."..
..وقف كل من بالمطبخ مطأطأ رأسه احتراما لسيدة البيت التي قالت بتعجب..
.."..اؤمؤم.."..
..اجابتها ايمان ..
.."..اسطى أمام..ياعمتي.."..
..هزت زهرة راسها والابتسامة تزين وجهها وقالت..
.."..الف مبروك يافاطمة.."..
..تبادلت فاطمة وإمام المباركة مع العمة زهرة التي امسكت بمرفق ايمان وقالت وهي تتجه بها ناحية المكتب ..
.."..انا وابراهيم دورنا عليكي وانتي هنا في المطبخ..ابراهيم في المكتب عايز يتكلم معاكي.."..
..وعند باب المكتب نفضت ايمان ذراعها وابتعدت للوراء خطوتين وهي تقول بصوت حاد ..
.."..مالوش لازمة ياعمتي..انا عارفة هيقول ايه ..واصلا انا مش عايزة لا اشوفه او اتكلم معاه.."..
..قبل ان ترد عمتها فتح ابراهيم باب المكتب ينظر لها نظرات جامدة جعلت صدرها يعلو وينخفض وازدادت حدة انفاسها فقالت وهي تبتعد بعينيها عن عينيه بشق الانفس لعمتها ..
.."..عمتي ..قولي للباشا مات الكلام..وورقتي مستنياها ..او لو حب يجيب المأذون دلوقتي ونخلص من الشبكة الهباب دي..يبقى احسن بردو .."..
..ظهر الغضب جليا على وجهه فاسرعت العمة زهرة بقولها ..
.."..مأذون ايه بس ياايمان ياحبيبتي ..دا ابراهيم كان بيدور عليكي عشان يقولك........"..
..توقفت عمتها عن الاسترسال عندما رفعت ايمان يدها وقالت بصوت جامد ..
.."..انا عارفة ياعمتي هو عايز يقول ايه ..انا سمعته وهو بيقولك انه هيطلقني ..وبصراحة دا كان احلى خبر سمعته من ساعة ماجيت البيت دا .."..
..تقدم ابراهيم للأمام وامسك بمعصمها وقال لعمته وهو يسحب ايمان معه داخل المكتب غير عابئ بمعارضتها ومحاولاتها لانفلات معصمها من براثن قبضته القوية..
.."..بعد اذنك ياعمتي انا ومراتي في حديث بينا مكملش وهنكمله في المكتب..ياريت محدش يدخل علينا. "..
..ظهر القلق جليا بملامح زهرة ولكنها همست لنفسها وهي تبتعد عن المكتب..
.."..ابراهيم عاقل وهيقدر يهديها .."..
..صرخت ايمان بوجهه وهي تحاول باصابع كفها الاخر ان تفك قبضة يده ..
.."..سيب ايدي ياجدع انت..مافيش بينا اي كلام ..هو انت ايه مابتسمعش.."..
..لم يترك معصمها بل ذاد من قوة قبضته ودفع بها لترتطم بصدره ..فشهقت بصوت عال وضربت صدره بقبضتها الحرة رفعت راسها لتنظر اليه وهي تصرخ..
.."..انت عايز مني ايه.."..
..ظل ينظر لها بوجه جامد حتى قال ..
.."..عايزك تهدي عشان نعرف نتكلم..زي اي اتنين عاقلين.."..
..اهتاجت اكثر لتعاود صراخها ..
.."..وانت تكلمني ليه من اصله.. انت مش سلمتني تسليم اهالي لجدي وعمتي وفضحتني قدامهم ..هو مش انا اللي هكون السبب اننا نخسر كل حاجة..مش قلت بعلو حسك انك خلاص فشلت وان مالكش دعوة بيا بعد كدة.."..
..لم يتحمل ان يكون هادئا اكثر من ذلك..فصرخ هو ايضا بوجهها ..
.."..ومسالتيش نفسك انا قلت و عملت كدة ليه..مش واخدة بالك باللي عملتيه ..كام مرة كلمتك ونبهتك ..وانتي ولا هنا ..بتعملي اللي انتي عايزاه وبس ..من غير ماتفكري في جدك والقضية اللي لو خسرها ممكن يروح فيها.."..
..حررت معصمها اخيرا لتبدا موجة جديدة من الصراخ بقولها..
.."..حاسب عندك ياباشا الا دي..مش انا اللي اعمل كدة ..انا مش عمك اللي رفع القضية على ابوه وهيطلعه قدام الناس راجل مجنون..وكمان انا عملت ايه لدا كله.."..
..رفع راسه لأعلى وهو يشد شعره ثم ضرب جبهتها بأصبعه وهدر بها..
.."..ممكن اعرف هنا في ايه ..انتي كمان بتسألي انا عملت ايه .."..
..لترد بقوة وهي تشير لجبهتها..
.."..هيكون في ايه يعني ..رز باللبن ..في مخ طبعا..وايوة بسأل انا عملت ايه..كل اللي عملته اني ساعدت الراجل عشان يروح لمراته التعبانة ..والتاني صلحت عربيته بحكم ان دي شغلتي وكنا هنطلع تاني عشان الحصة...واللي حصل في الشارع...منعت عنك واحد كان هينصب عليك ..وفي الاخر طلعت انا اللي غلطانة .."..
..اقترب بوجهه من وجهها وهو يصرخ بها فرجعت للوراء بخوف ..
.."..مااالك انتي تساعدي وتصلحي ..انا جايبهم عشانك ..عشان يعلموكي ..مش جايبك انتي عشان تساعديهم..لكن ازاااي مينفعش ..وفي الاخر توديني القسم ..احمدي ربنا ان مافيش حد من الصحفيين كان هناك والا كانت هتبقى فضيحة.."..
..التمعت بعينيها غلالة رقيقة من الدموع وازدردت ريقها بصعوبة وهي تقول بصوت خافت ..
.."..توشكر ياباشا ..واديك خلاص هتخلص مني ومن فضايحي..تطلقني وكل واحد يروح لحاله.."..
..تفاجئت به وهو يمسك بذراعيها ويهزها بقوة بعد ما ارتسم الغضب والغيظ بملامح وجهه..
.."..مابتفكريش غير بنفسك وبس..عايزة تمشي وتسيبينا ..للدرجاتي انتي انانية وجبانة.."..
فرغ فاهها وهي تنظر لقسمات وجهه القاسية.. وكلماته الجارحة تنطلق كالرصاص مستهدفا كرامتها قبل قلبها..كان صدرها يعلو ويهبط بقوة فصرخت بوجهه..
.."..للمرة العشرومية بسالك عايز مني ايه.."..
..دفع بها ليرتطم ظهرها بالحائط فاستطرد قوله وهو يتقدم ناحيتها يهدر بها ..
.."..عايزك تفكري ازاي تساعديني بدل ماتهربي ..عايزك تكوني أد المسئولية ..مش قلتي للمحامي ان كلمتك سيف على رقبتك..ولا انتي بس قدام الناس تعملي فيها شجاعة و ساعة التنفيذ تهربي.."..
..تصاعدت السنة لهب غضبها عاليا داخل صدرها ..فضربت صدره بقبضتيها لتصيح بقولها.
.."..مش ايمان احمد اللي تهرب..وخد بالك انك بتغلط وانا ساكتالك بس لهنا وعندك...حوار القضية والمسئولية دا بقى بيني وبين جدي وانت مالكش فيه بعد كدة ..يعني تطلقني وكل واحد مع نفسه.."..
..لم يتحرك قيد انملة وضحك ساخرا وهو يقول..
.."..مافيش طلاق يابنت عمي..وطول مانتي على ذمتي هتكوني مسئولة مني ..ومافيش خطوة هتخطيها الا بعلمي وبموافقتي..امين يابنت عمي .."..
..اهتزت حدقتي عينيها بشدة فتجاوزته واخذت تلوح بيدها وهي تتجه للباب وصاحت بقولها بصوت عال ..
.."..انت ..انت ..بص انا هروح للكبير بتاعنا واللي دبسني التدبيسة المنيلة دي ..عشان شكلها كدة هربت منك ع الاخر..انا هروح لجدي ..وهطلق يعني هطلق..اصبر عليا.."..
..فتحت الباب وقبل ان تخطو خارجه رجعت بخطوتها للوراء وتسمرت مكانها عندما وجدت كل من بالبيت يلتفون حول محيط الباب.. يسترقون السمع لما كان دائرا من شجار حاد بالداخل..عمتها تنظر اليها والحزن مرتسم بوجهها..مراد واقفا مكتفا كلتا ذراعيه ورافعا لها حاجبيه ناظرا لها بحزن هو الاخر ..حتى العاملين بالمطبخ يقفون بعيدا لا يحيدون بأعينهم عنها ..انتبهت لصوت جدها الذي تقدم ناحيتها بكرسيه المتحرك والذي قال ..
.."..جدك جيه لحد عندك اهو ياحبيبة جدك ...عايزة تقولي ايه.."..
