قلبي بيدهِ

بارت 29

شويه اجتي تمارة صعدتني فوك فتحتلي الغرفه الي كعدت بيها قبل لا ارجع لبيتنا حطيت غراضي ورتبت المكان

تمارة : خيتي جهزي نفسج امج تكول انريد نروح لصالون

اماني : وشعندنا بالصالون

تمارة : هي تكول هيج مدري

- انكسر كَلبي ع اماني ماكدر اباوع بعيونها

اجيت اطلع صديت عليها
بضحكه مصطنعه الحفه لايكتلج

اماني : شكراً
تذكرت امي جابتلي عبايه مثل عبايات الشيوخ هي والفستان مالها جواها لبستهن ورهمت وياهن شال وحذاء حطيت ايلاينر وكحل وحمره خفيفه

نزلت واحس كل نظرات النسوان متسلطه عليه وهاي الي تتبسبس وهاي الي تأشر عليه تصرفهن خله عندي شك بملابسي بس ماهتميت مشيت بنصهن ادور على امي لكيتها بغرفت مرت عمي ومرت عمي مدنكه راسها ولازمه ادين امي ومبين من عيون امي باجيه لان حمر

رسل : هااا بنيتي خلصتي يلا هسة البس عباتي وجيج كومي رفل ودينا لهاي ام الصالون

رفل : يلا خاالة اني جاهزة

اماني : طلعنا من الباب الخلفي لان الزلم تارسه الشارع

وصلنا لبيت ام الصالون وطبينا سلمت امي عليها ومدري شنو شاورتها المرة باوعت عليه بنظرات قهر وحزن وهي تهز راسها بنفي اعتقد الي كالته امي الها ماعجبها

اباوع على رفل طول الوقت مدنكه او تتجاهل تباوع بعيوني مدري شبيها معقولة زعلت لان ماسلمت على حسام من رجعنا

كالتلي ام الصالون اذب العبايه ذبيتها وضليت بس بالفستان الي جواها سئلتني شنو لون الفستان الي راح البسه وكتلها بنفسجي كامت تحطلي مكياج وهي تصلي على النبي كل شويه

ام الصالون يمه ماشاء الله بنتج كمر كمر ماشاء الله تبارك الرحمن

اماني : خلصتلي وجهي وبلشت بشعري وهي اول مافتحته تصلي ع النبي وتسمي

عافته على طوله كالت دام بطولج عوفيه هيج احلى برمته شويه من جوة ورفعته من فوك حتى يرفع عن طولي واكدر امشي براحتي نزلتلي خصلتين من كدام وحطتلي بروش من عدها لونه فضي وبيه كرستان كالت هاي هديه مني ويرهم ويه فستانج

لبست عباتي فوك الشعر مالي وشمرت الشال على راسي باوعت على مرايه اشوف نفسي

-لا لا مستحيل هاي اني تغيرت تغير جذري طلعت اخبل هههه هسة يكولون اني العروس خلصنا وقت مغرب لان كلش تاخرنا

طبينا للبيت وكل النسوان تباوع ونصهن يصلن على النبي والنص الثاني يتبسبسن مفهمت شكو لمحت خالة سهام حاطه ايدها على حلكها وعيونها حمرر شافتني وراحت لغرفتها معرفت شبيها

صعدت لغرفتي البس الفستان الي شريته لان امي كالتلي البسيه راح تبلش الحفله سئلتها اذا جانت الحفله بيت خالة او بيت العالم وجان جوابها انو راح تبدي واعرف التفاصيل