အနန္တဆောင်ခန်းများမှ လွတ်‌မြောက်ရာ [ မြန်မာဘာသာပြန် ]

《 Chapter 27 》

တနေ့လုံး လော်ကျန့်က ဖုန်းယွီလန်အဆင်ပြေဖို့အတွက် လှုပ်ရှားမှုတွေကို ဆက်တိုက်လုပ်ဆောင်ခဲ့တယ်။ စစချင်း သူ့ဗိုက်ကဒဏ်ရာကို သာမန်ကာလျှံကာ ပတ်တီးစီးထားလိုက်တယ်၊ ပြီးနောက် အနားယူမနေဘဲ အင်္ကျီနဲ့ ဘောင်းဘီအသစ်တွေကို သူချက်ချင်းဝယ်လိုက်တယ်—ကုန်ကုန်ပြောရရင် ဖုန်းယွီလန်တယောက် ဆေးရုံဝတ်စုံကြီးနဲ့ လမ်းကြိုလမ်းကြားတွေထဲ လျှောက်ပြေးနေရင်း သူ့ကို အရူးလို့ထင်သွားကြမဲ့အဖြစ်မျိုး သူလုံးဝအဖြစ်မခံနိုင်ဘူး၊ ဖြစ်လို့လဲမရဘူး?

ပိုဆိုးတာက ဖုန်းယွီလန်က မန္တန်ရဲ့သက်ရောက်မှုအောက်မှာရှိနေသော်ငြား သူက မရပ်မနား ပြေးလွှားနေရတာကြောင့် သူ့ရဲ့ရုပ်ပိုင်းဆိုင်ရာကြံ့ခိုင်မှုက လျင်မြန်စွာ ဆက်လက်ကုန်ခန်းလာတဲ့အပြင် သူ့ခါးမှာရှိတဲ့ အရှင်းမပျောက်သေးတဲ့ ဒဏ်ရာက ပြန်ပွင့်နိုင်ချေရှိနေတယ်။ လော်ကျန့် ဆေးနဲ့ ပိတ်ကျဲစ ပမာဏများများလေး ပြင်ဆင်ထားလိုက်တယ်။ ပုံမှန်ကြားကာလတခုမှာ သူက ဖုန်းယွီလန်အား သူတို့နှစ်ယောက်ဆုံဖို့ လုံခြုံတဲ့နေရာတခု စီစဉ်ထားဖို့ ဖုန်းဆက်ပြောလိုက်တယ်။ အဝတ်အစားတွေ လဲဝတ်ဖို့ သူ့ကိုပေးရမဲ့အပြင် သန့်ရှင်းတဲ့ပိတ်ကျဲစနဲ့ သူ့ဒဏ်ရာကို စည်းပေးရမှာဖြစ်ကာ၊ အဲ့ဒါပြီးရင်တော့ သွမ့်လိကို သူသွားထိန်းထားပြီး အချိန်ဆွဲထားရမှာဖြစ်တယ်။

သွမ့်လိကို သူ့လမ်းကြောင်းပေါ်ကနေ လွှင့်ပစ်ဖို့ရာ ဖုန်းယွီလန်က သူတတ်သမျှ လှည့်ကွက်မျိုးစုံကို ကြိုးကြိုးစားစား ထုတ်သုံးခဲ့ရတယ်။ ပြေးရင်းလွှားရင်းနဲ့ သူ့ကိုယ်သူ ရုပ်ဖျက်ဖို့အတွက် အဝတ်အစားတွေကို ဆက်တိုက် ပြောင်းလဲဝတ်ဆင်ခဲ့တယ်၊ ပြောရမယ်ဆိုရင် မိန်းကလေးစကပ်ကိုတောင် သူဝတ်ခဲ့တာ! အဲ့ဒီလိုလုပ်ခဲ့တာတောင်မှ၊ အကြိမ်တိုင်းမှာ၊ သွမ့်လိက မျှော်လင့်မထားရလောက်အောင် ခွေးတကောင်ထက်သာတဲ့ အနံ့ခံနှုန်းနဲ့ သူ့ကို ရှာဖွေဖော်ထုတ်နိုင်ခဲ့တယ်! အဲ့ဒီအချိန်မှာပဲ ဒီကြောင်နဲ့ကြွက်ဂိမ်းက ခဏရပ်ရမဲ့အချိန်ကို ရောက်လာခဲ့တယ်၊ ဖုန်းယွီလန်ခမျာ ချုံးချုံးကျနေပြီး လော်ကျန့်ကလည်း ထိုနည်းတူစွာ ဒဏ်ရာတွေနဲ့ဖြစ်နေတယ်။ အကုန်လုံးမဟုတ်ရင်တောင် ညှို့ယူဖမ်းစားခံရခြင်းရဲ့နောက်ဆက်တွဲ အကျိုးသက်ရောက်မှုက တဖြည်းဖြည်း သိသာထင်ရှားလာခဲ့တယ်၊ သူ့ရဲ့ဝိညာဉ်စွမ်းအားတွေကို အပြင်းအထန် မြှင့်တင်ပြီး သူ့အဆင့်နဲ့ သုံးစွဲခွင့်မရှိသေးတဲ့ ဂါထာမန္တရားတွေကို ရွတ်ဆိုခြင်းရဲ့ရလဒ်က ပြင်းထန်တဲ့ ခေါင်းကိုက်မှုဖြစ်ပြီး ၎င်းက လွန်ကဲပြင်းထန်တဲ့ အဆက်မပြတ် ခေါင်းကိုက်ခဲမှုပင်ဖြစ်တယ်။