قلب تائه

الفصل 47

توقف عُدي بالسيارة أمام الفندق الذي أقيم فيه حفل زفافهما ثم نزل من السيارة فنزلت تارا كذلك وقالت بتعجب وحيرة :
ـ عُدي احنا.. ده الاوتيل اللي عملنا فرحنا فيه

ابتسم وهو يُغلق باب السيارة قائلاً :
ـ بالظبط..

سألته وهي تبتسم :
ـ أيوة جايين نعمل إيه هنا؟ .. هنسهر هنا؟

أجاب بإبتسامة :
ـ يستي تعالي يلا وكفاية أسئلة بقى قولتلك..

قام بثني ذراعه فابتسمت واقتربت ووضعت يدها بذراعه ليأخذها إلى الداخل

أخذها إلى المُطعم التابع للفندق فاقترب أحد المسؤولين ورحب به ثم قادهما إلى الطاولة فعلمت تارا أنه قد قام بحجزها مُسبقاً

جذب لها عُدي الكرسي فجلست عليه بهدوء وهي تقول برقة :
ـ ميرسي..

ذهب ليجلس على الكرسي المقابل بعد أن فتح الزر الأوسط لسترته .. نظرت إليه فابتسم ثم بلل شفتيه وتنحنح فضيّقت عينيها وهي تدرك أنه يرغب في قول شئ ما

ازدرد لعابه وقال :
ـ تارا اناا..

نظرت إليه في ترقب فنظر إلى عيونها مباشرة وتابع :
ـ تارا انا.. جوايا دلوقتي.. مليون إحساس وإحساس مش عارف اعبر عنهم إزاي! ولا ابدأ بإيه؟! .. مليون كلمة بس.. مش عارف ارتبهم.. زي ما قولتي انا فعلاً حاسس إننا لسه عارفين بعض من اسبوع.. مش متجوزين وعندنا بنت.. يعني مينفعش أقعد قدامك متوتر كده بس دي الحقيقة.. تأثيرك عليا لسه هو هو من أول ما قابلتك.. فكرت إني مع الوقت هتعود على جمال عنيكي ومش هتأثر بيها بس كل مرة ببص فيهم بحس بحس إني بشوفهم م الأول.. بقع في حُبهم م الأول.. لسه جسمي بيقشعر أول ما بسمع نبرة صوتك .. لسه واحنا في وسط الكل ببقى مركز معاكي انتي دوناً عن الباقيين .. لو قاعدين وسط العيلة حتى.. ببقى ببصلك وعايزك تبصيلي زي ما نكون لسه بادئين نحب بعض.. ولا كأنك مراتي وان كلها ساعات ويمكن دقايق ونبعد عن الكل ونبقى مع بعض ولوحدنا .. لسه ببتسم غصب عني لما بشوفك بتبتسمي..

ابتسمت وهي تنظر إليه بتأثر فتابع :
ـ بصراحة.. مكدبش عليكي.. كنت خايف من إن.. من إن بعد الجواز .. شرارة الحب اللي بينا تبدأ تتطفي واحدة واحدة.. أو تفضلي غالية عليا وافضل احبك بس يبقى الموضوع عادي.. أو إني اتعود ع المشاعر دي وشوية شوية متبقاش مأثرة فيا.. بس محصلش كده.. بعد الجواز والمشاكل والخِلفة.. لسه حاسس بنفس اللهفة اللي كنت بحسها أول ما حبيتك.. بحس بإحساس حلو ماشي في كل حتة فيا لما ببصلك.. عارفة الـ.. الاحساس اللي حسيناه أول ما كتبنا الكتاب!! .. فرحتنا بإننا هنكون مع بعض! .. كان طبيعي تهدا وتخف كل يوم عن اللي قبله بس.. انا لسه حاسسها لحد دلوقتي.. كل يوم بصحى بلاقيكي جنبي بحس بنفس الإحساس ده.. بفرح كل يوم انك معايا.. لأنك أهم مصدر للسعادة في حياتي و.. وسبب كل حاجة حلوة حصلتلي.. وأهمهم ملك طبعاً