#إقتباس_الجارحي5...(الاقتباس اللي كسبتوه بالتحدي أهو عشان تعرفوا اني بحبكم بس 😍❤🫂)
اليوم كان مهلك للغاية كعادة ذلك الشهر المرهق، فبعدما استلم الشباب ادارة المقر وأصبحت الأمور غير مستقرة، لذا كان على عدي وعمر أن يتركوا عملهم فترة مؤقتة لمساعدة الشباب، واليوم بالتحديد هام لذا جلسوا جميعًا يعملون بجد قبل عودة "ياسين الجارحي" من إيطاليا، لف "معتز" رأسه يمينًا ويسارًا بتعبٍ ثم قال بإرهاقٍ شديد:
_أنا خلاص تعبت، مش هقدر أكمل غير لما أخد ساعة راحة على الأقل..
أغلق "جاسم" حاسوبه، ثم تمدد على سطح مكتبه وهو يردد بتعبٍ:
_مين سمعك، أنا خلاص ارهقت..
أضاف "رائد" وهو يقاوم النوم بصعوبةٍ:
_أنا بقالي ساعة شغال على الملف ده ومش عايز يخلص تقولش بيعاند هو كمان!
خلع "عمر" سترته السوداء ثم حرر الجرفات الخاص به وهو يصيح بغضب:
_يا جدعان أنا دكتور والله العظيم دكتــــــــور مش محاسب، جايبني اراجع حسابات أول مرة أشوفها.. ده أنا حتى كنت بخلع من حصة الرياضة اتقوا الله!
ضحك "أحمد" ثم قال وهو يوزع نظراته بين ابناء عمه:
_أيه يا عصب الجارحي، نخيتوا أوام كده أمال فين كلام الكفاح والمستقبل والعزيمة بتاع امبارح!
رد عليه جاسم بغضب:
_اقعد يا عم انت طول عمرك واخد على المرمطة دي ذنب أمنا أحنا أيه!
سأل معتز باستغراب:
_أمال فين ياسين وعدي وحازم!
أجابه عمر قائلًا:
_عدي وياسين فوق في مكتب عمي بيخلصوا شوية اجراءات على اللاب بتاعه، أما الحيوان ده فمعرفش فين بس أي كان هو فين فاكيد بيعمل كارثة جديدة..
ردد أحمد بعصبية:
_هو أحنا لحقنا!
قال رائد بغضب:
_قوم يا أحمد شوف أخوك في انهي داهية، وقسمًا بالله ما قادر لاي مصيبة جديدة واديك شايف بعينك شكلنا عامل ازاي... قوم.
زفر بضيقٍ ثم ترك حاسوبه ونهض عن مكتبه، فما أن اقترب من الباب حتى وجده يدخل حاملا بين يديه كارثة ستفتك بهما جميعًا، انتبه الجميع لما يحمله بين يديه فكانت علبة قيمة للغاية، ففتحها ليبرز ما تحمله بداخلها، فرفع أحمد حاجبيه وهو يردد باستغراب:
_شوكولا تشاكوبولجي مرة واحدة، جبتها منين دي؟
قال معتز بدهشة:
_ولا انت سارقها صح!!! ، لحقت تجبها ازاي دي!!
تساءل رائد بذهول:
_وقدرت على تمنها ازاي وانت ابوك ساحب منك الفيزا وكل ما تملك!
تدخل عمر حينما صاح بغضب:
_ما تنطق يالا هنتحيل عليك..
ابتسم حازم بغرور ثم وزع عليهم قطع الشوكولا ليقول وهو يلتهم احد القطع:
_عشان تعرفوا اني حنين لما سرقت سرقت عشانكم..
جحظت أعينهم بصدمة، فاسترسل قائلًا:
_االواد ياسين الواطي جايب لمليكة مراته افخم انواع الشوكولا في العالم وسايبنا هنا هنموت من التعب..
جذب أحمد ياقة قميصه وهو يردد بعصبية:
_يعني انت سرقت!
قال بكل فخر:
_اخدتها من المندوب اللي جاي بنفسه يسلمها، ابن ال... مرضاش يدهاني الا لما شاف بطاقتي وصدق اني من العيلة..
تناول رائد ما بيديه وهو يردد بتلذذ:
_لا جدع يالا، بصراحة طعمها لا يقاوم..
تناولها عمر وهو يردد بحزن:
_هي طعمها حلو مقولناش حاجة بس ياسين هيتضايق..
قال معتز وهو يجذب قطعة من العلبة التي يحملها حازم:
_ولا هيتضايق ولا حاجة هيطلب غيرها، المهم اننا لقينا حاجة تفتح نفسنا على الشغل..
ضحك احمد وهو يتابعهما ثم قال:
_انت بتحلم، انت عارف عشان يطلب نوع فاخر من الشوكولا دي تاني هياخد معاه وقت وفلوس اد أيه، دي بتتباع بالدولار يا حبيبي!
تناول حازم قطعة اخري ثم قال وهو يلوكها بنهمٍ:
_وهو هيغلب يعني...
ضحكوا سويًا، ولكن سرعان ما تلاشت الابتسامة حينما عاد ياسين وعدي، فقال عدي باستغراب:
_أيه اللي بيحصل هنا ده، كل واحد سايب شغله!
اقترب منهما ياسين والخوف يدب بقلوبهما، فجذب قطعة من الشوكولا ثم تناولها وهو يقول بتلذذ:
_جمييلة اوي، جايبها منين دي يا حازم؟
توقفت الشوكولا في فمه، بينما ردد عمر بصدمة:
_هي الشوكولا دي مش كانت جايلك يا ياسين..
رفع حاجبيه بدهشة:
_لا وأنا هطلب شوكولا لمين هنا!
لف معتز العلبة وهو يقول:
_ازاي بس!
قرأ أحمد الاسم المدون بصوت مقبض:
_السيد ياسين الجارحي!
ردد حمزة بخوف وكأنه يحاول تصديق ما سيقول:
_اهو مكتوب ياسين الجارحي...
ثم تطلع تجاه ياسين قائًلا:
_مش انت اسمك ياسين يابني ولا انا اتحولت..
سكنت الصدمة بالوجوه وخاصة حينما ولجت السكرتيرة للداخل لتخبرهما سربعا:
_ياسين باشا وصل المقر..
القى حازم العلبة من يديه لاحمد والقاها احمد لياسين وياسين لعمر وعمر لرائد ورائد لمعتز ومعتز القاها للوحش الثائر ثم في لحظة وجد الغرفة فارغة بأكملها،فأختبئ كلا منهما أسفل مكتبه،و لم يظل سوى عدي الذي يتطلع لهما باستغرابٍ وهو يحمل العلبة، وحينما استدار للخلف وجد أبيه يقف مقابله!
****______******
تشارك #إبداع_للترجمة_والنشر_والتوزيع في المعارض الحالية:
#معرض_عمان_الدولي_للكتاب_2022 في مكة مول عمان الأردن
#معرض_سوسة_الدولي_للكتاب_2022 في قصر المعارض في سوسة تونس
#معرض_الرحاب_الدولي_للكتاب في نادي الرحاب
في انتظار تشريفكم جميعا
أسعار وعروض خاصة جدا خلال فترة المعارض
مع استمرار التوصيل للمنازل عن طريق واتساب الرقم 01001631173
#إبداع_للترجمة_والنشر_والتوزيع
#شغف_القراءة
#في_كل_كتاب_حياة
#الأقوى_قادم
#معارض_الكتاب
#معارض_دولية
#معارض_محلية
