أبو رعب

البارت 48

( أبو رعب )
... القسم الثاني
بقلم نورس

.....................

اسمع صوت شهكاتها المتتالية وهي تحجي وتبجي : طلكها

جنت اتحرك وبيدي وصلة امسح بالطاولات مال استقبال .. وكفت من سمعتها حجت هيج واني اجر نفس براحة وابتسامة معتلية وجهي

لبوة: ايييه الحمدلله خلصنه منها

بعدين استوعبت الكلام اللي حجيته ورديت ابرر

.. قصدي يعني احسن ما يضلون مشاكل .. خلصوها بأخر فترة بس عرك وزعل كايمين كاعدين كالوا راح نطلك

ضلت تبجي .. خطية هي هم بين نارين تصير وي ابوي لو وي امها

عفت البيدي وكعدت ع التخم واني اتنهد

.. دكافي يا عيني .. يعني لتزعلين مني بس امج الجابت الاذية لنفسها مرة الله ساترج وعندج بيت معززة مكرمة ليش تحبين الخراب لغيرج ؟؟

حور: ما اعرف شجاها والله ما جانت هيج

لبوة: ضحكتيني .. امج من يوم يومها هاي سوالفها متحب الخير لغيرها وماشية بدرب السحورة من اول ما تزوجت ابوي ولهسه ما غيرت طبعها بحيث صارت اسطه بهل مجال

حور: كله من وراي ..

لبوة: شنو كله من وراج ؟ قابل انتي الضربتيها على ايدها وكتيلها سوي هيج

حور: لا لبوة مكاعد تفتهميني .. امي رادت تشبجني وي يوسف حاولت بكل وسيلة تقنعني ومن شافتني ما قبلت كامت تصرفت من يمها ورادت تخربة هو وخطيبته

لبوة: شوكت هل حجي ؟ شو ما كتيلي

حور: شحجي وشكول وبيا وجه .. من قبل لا اجيب سند وهي فوك راسي تريدني اقبل

هي تحجي واني اكل بروحي ..
ماردت احجي كدامها واقهرهة

سديت الخط منها واخذتلي صفنة بالنص ساعة ع الصار بأخر فترة ..
ووين وصلتنة سحورة ميسون حتى وصلنة لهل حال

يمكن جان جدو هسه بيناتنه
وابوي مجان طردني من البيت ورحت للعمارة
والله اليعلم بعد جم مشكلة ومصيبة صارت بذاك البيت من ورة مرت ابوي ...

تنهدت تنهيدة طويلة ، وكمت كملت شغلي

ما مر يمكن الا اسبوع على هل سالفة
.. وبوكت ظهرية جنة كاعدين ورة الغدة

ودك تليفون قسور .. شال تليفونة وباوع للاسم وعكد حاجبة

سألته بفضول

لبوة: منو ؟

قسور: حور

رأسن لزمت كَلبي متحظرة لمصيبة ..
لان مو عوايدها تتصل بقسور تريد شي تخابرني اني

نصيت التلفزيون وصبيت كل اهتمامي وتركيزي وي المكالمة وحديثهم ..

وجات احساسي بمكانة
اول ما شفته فز من مكانه وعدل كعدته وهو يهدئ بيها
.. مبينة تبجي