أبو رعب

البارت 47

( أبو رعب )
... القسم الثاني
بقلم نورس

.....................

دارلي ويحجي بحذر ويوصي بيه : نزلي البوشية وحاولي لتبينين والتسألج كليلها رجلي يخوني وجاية اسويلة محبة

باوعتلة بتوتر وكَلبي يدك يددك عبالك واحد يركض وراي

لبوة: وشلون لو شافتني ؟

مسح وجهة ودارلي كال

قسور: انتي بس ضلي تجنبيها وخليج طبيعية واذا  رادوج تطلعين وجهج بس اتصال واحد اطبكلج كبال الباب وتطلعيلي بسرعة ، وتذكررري

.. اهم شي الحيزبون متحس عليج

هزيت راسي بشرود وافرك بيدي ..
ضيك عيونة بشك وكال

.. ولج لبوة تخافين

هزيت راسي بلا ورديت

لبوة: شوف هواي ناس دتفوت وتطلع اخاف احد يطلع يعرفني

قسور: لا لا لتخافين هسه مو كتلج وجهج متغطي محد راح يعرف وعلمتج شتسوين ..

باوع للساعة وكال

.. شوفي الساعة هسه بال2 ونص احسبي حسابج منا لنص ساعة ادك عليج تعوفين الخط مفتوح وتخلين التليفون جوة الملابس

هو يحجي واني بس اهز براسي .. تنهد وكمل كلامة

.. انه ما ردت ادخلج بهيج مكان بس الحظ وازاني
اي شي يصير وياج لو احد حاول يضوجج بحجاية وحك علي اطب احرك هل بيت والبيه واسويه خرابة

ابتسمت وكتلة

لبوة: مو مرت ابو رعب التسكت عن حقها اليمسني بحجاية اردة بعشرة

قسور: يبعد روح العافية هيج اريدج نجررة بعد ابوج

نزلت مشيت بخطواتي باتجاه البيت القاصدته
وكفت على مسافة من الباب اللي جان شوي مفتوح

ودرت باوعت لسيارة قسور اللي صار نهاية الشارع وواكف يباوعلي .. اشرلي بيدة حتى ادخل

سميت بسم الله وفتت واني ادعي تعدي على خير ..

البيت اول ما تدخل بيه حوش عادي ، حالة حال هواي من البيوت الشعبية ..
بس من الداخل جان اكو بابين الاول مسدود والثاني باب كبير مفتوح على حيلة والنسوان تفوت

باوعت للاحذية والنعالات المكومة كبال الباب ..
نزعت حذائي وفتت

دخلت وانصدمت المكان واسع مثل الصالة الكبيرة ..
ومتروس نسوان واكو كم زلمة  واكفين على صفحة

محد اهتم ..
لان هم جانت اكو نسوان مبوشات وهاي الترفع بعباتها تغطي نص وجهة

اخذتلي جهة ووكفت وعيوني تباوع بالوجوه وتدورها
هناك وجان المحها كاعدة ودك سوالف وي مرة كاعدة بصفها