ﻣﻦ ﻋﺎﻟﻤﻲ
# ﻋﻜﺲ _ ﺍﻟﺘﻴﺎﺭ
ﺣﻠﻘﻪ 44
" ﻋﺰﻭ ﺻﻜﺮ ﻣﻮﺑﺎﻳﻞ .. ﻛﻨﻬﺎ ﺍﻣﻲ ﻛﻨﻬﺎ
ﺭﺣﺎﺏ .. ﺷﻜﻠﻪ ﻫﺒﻂ ﻋﻠﻴﻬﺎ ﺍﻟﺴﻜﺮ ﺩﺍﺧﺖ ﻋﻠﻴﺎ ﻳﺎﻋﺰﻭ ﺗﻌﺎﻝ ﺷﻮﻓﻬﺎ
ﻧﺰﻝ ﻋﺰﻭ ﻳﺠﺮﻱ ﻭﻣﺎﻣﺎ ﻣﻘﻤﻌﺰﻩ ﻉ ﺻﺎﻟﻮﻥ
ﻋﺰﻭ .. ﺟﻴﺒﻲ ﻣﻴﻪ ﻭﺳﻜﺮ ﺑﺴﺮﻋﻪ
ﻣﺎﻣﺎ ﺑﺼﻮﺕ ﻭﺍﻃﻲ .. ﻣﺎﻓﻴﺎ ﺷﻲ ﺳﺎﻫﻠﻪ ﺳﻜﺮ ﻫﺒﻂ
ﻋﺰﻭ ﻣﻘﻤﻌﺰ ﺭﻛﺒﻪ ﻭﻧﺺ ﻭﻣﺎﺳﻚ ﺍﻳﺪﻳﻬﺎ .. ﻣﺎﺧﺬﻳﺘﻲﺵ ﺣﺒﻪ ﺍﻟﺮﻳﻖ ﺻﺎﺡ ﻭﺍﻣﺘﺎﻉ ﺍﻟﻬﻀﻢ ﺻﺎﺡ
ﻣﺎﻣﺎ .. ﻧﺴﻴﺘﻬﻦ
ﺭﺣﺎﺏ ﺟﺖ ﺗﺠﺮﻱ ﺑﺎﻟﻄﺎﺳﻪ .. ﺧﻮﺫﻱ ﻳﺎﻣﺎﻣﺎ ﺍﺷﺮﺑﻲ
ﻋﺰﻭ .. ﻛﻨﻚ ﻣﺶ ﻣﺮﻛﺰﻩ ﻉ ﺍﻣﻲ ﻑ ﺩﻭﺍﻫﺎ
ﺭﺣﺎﺏ .. ﻉ ﺳﺎﺱ ﺗﺎﺧﺬ ﻓﻴﻬﻦ ﻧﺴﺄﻝ ﻓﻴﻬﺎ ﺩﻳﻤﺎ
ﻣﺎﻣﺎ .. ﻣﺶ ﺷﻮﺭﻫﺎ ﺍﻧﺎ ﻧﺴﻴﺘﻬﻦ ﻋﺎﺩﻱ ﺧﻼﺹ
ﻋﺰﻭ .. ﻻ ﻣﺶ ﻋﺎﺩﻱ ﻳﺎﺍﻣﻲ ﺷﻔﺘﻲ ﺗﻮﺍ ﻫﺒﻂ ﻋﻠﻴﻚ ﺳﻜﺮ
ﻣﺎﻣﺎ .. ﺑﺎﻩ ﺍﻥ ﺷﺎﺀ ﺍﻟﻠﻪ ﺗﻮﺍ ﻣﻌﺶ ﻧﻨﺴﻰ
ﺭﺣﺎﺏ ﻗﻤﻌﺰﺕ ﺗﻼﻫﺎ ﻭﻣﺴﻜﺖ ﺍﻳﺪﻫﺎ .. ﺍﻟﺤﻖ ﻋﻠﻴﺎ ﻣﻔﺮﻭﺽ ﻧﺘﺎﺑﻊ ﻓﻴﻚ
ﻣﺎﻣﺎ .. ﻣﺎﺩﺧﻠﻜﺶ ﺍﻧﺘﻲ ﻻﻫﻴﻪ ﺑﻘﺮﺍﻳﺘﻚ
ﺭﺣﺎﺏ .. ﻻﻻ ﻣﻔﺮﻭﺽ ﻧﺸﻮﻓﻚ ﻭﻧﺪﻳﺮ ﺑﺎﻟﻲ ﻣﻨﻚ ﺣﻘﻚ ﻋﻠﻴﺎ ﻳﺎ ﻣﺎﻣﺎ
ﻣﺎﻣﺎ ﺣﻄﺖ ﺍﻳﺪﻫﺎ ﻉ ﺭﺃﺳﻬﺎ ﻭﺭﺣﺎﺏ ﺣﻄﺖ ﺭﺍﺳﻬﺎ ﻉ ﺻﺪﺭ ﻣﺎﻣﺎ
ﺭﺣﺎﺏ .. ﺷﻨﻮ ﺣﺴﻴﺘﻲ ﺭﻭﺣﻚ
ﻣﺎﻣﺎ .. ﺍﻟﺤﻤﺪﺍﻟﻠﻪ
ﻋﺰﻭ ﺭﻓﻊ ﺍﻳﺪﻳﻬﺎ ﻭﺑﺎﺳﻬﻦ .. ﺭﺑﻲ ﻳﺨﻠﻴﻚ ﻟﻨﺎ ﻳﺎ ﻏﺎﻟﻴﻪ
ﻣﺎﻣﺎ ﺍﺑﺘﺴﻤﺖ .. ﻭﻳﺨﻠﻴﻜﻢ ﻟﻴﺎ ﻭﻳﻔﺮﺣﻨﻲ ﺑﻴﻜﻢ
ﺭﻥ ﻣﻮﺑﺎﻳﻞ ﻋﺰﻭ ﺻﺒﻰ
ﻋﺰﻭ .. ﺍﻧﺎ ﻃﺎﻟﻊ ﺷﻮﻳﺎ ﻭﺗﻮﺍ ﻧﺠﻲ
ﻣﺎﻣﺎ .. ﻉ ﺭﺍﺣﺘﻚ
ﻃﻠﻊ ﻋﺰﻭ ﺑﺮﺍ ﻟﺠﻨﺎﻥ ﻭﺭﺩ ﻉ ﺍﻣﻴﺮﻩ ..
ﻋﺰﻭ .. ﺍﻳﻮﺍﻩ
ﺍﻣﻴﺮﻩ .. ﺷﻦ ﻓﻲ ﻳﺎﻋﺰﻭ ﻧﺸﻐﻠﺖ ﺳﻤﻌﺖ ﺻﻮﺕ ﺭﺣﺎﺏ ﻭ ﻫﻴﺎ ﺗﻌﻴﻂ
ﻋﺰﻭ .. ﺍﺳﻒ ﺻﻜﺮﺕ ﻋﻠﻴﻚ ﺑﺲ ﻣﻦ ﻓﺠﻌﻪ ﺍﻣﻲ ﻫﺒﻂ ﻋﻠﻴﻬﺎ ﺳﻜﺮ ﻭﺭﺣﺎﺏ ﺍﻧﻔﺠﻌﺖ ﻣﺎﻋﺮﻓﺘﺶ ﺗﺼﺮﻑ
ﺍﻣﻴﺮﻩ .. ﺷﻨﻮ ﺗﻮﺍ ﺑﺎﻩ ﻛﻮﻳﺴﻪ
ﻋﺰﻭ .. ﻻ ﻛﻮﻳﺴﻪ ﻏﻴﺮ ﻣﺶ ﻭﺃﺧﺬﻩ ﺍﻟﺤﺒﻮﺏ ﺍﻣﺘﺎﻋﻬﺎ ﻗﻌﺪﺕ ﻣﻌﺶ ﺗﺮﻛﺰ ﺑﻌﺪ ﻓﻀﻰ ﻋﻠﻴﻬﺎ ﺍﻟﺤﻮﺵ ﻭﺭﺣﺎﺏ ﺻﻐﻴﺮﻩ ﻻﻫﻴﻪ ﺑﻘﺮﺍﻳﺘﻬﺎ ﻣﺶ ﻣﺮﻛﺰﻩ ﺭﻳﻬﺎﻡ ﻛﺎﻧﺖ ﺩﻳﻤﺎ ﻣﻌﺎﻫﺎ
ﺍﻣﻴﺮﻩ .. ﻳﺎﻋﻤﺮﻱ ﻣﺘﻌﻠﻘﺔ ﺑﻴﻬﻦ ﻭﺍﺟﺪ ﺷﻜﻠﻬﺎ ﻫﺬﻱ ﺍﻟﺤﻴﺎﺀ ﺷﻦ ﺗﺒﻲ ﺍﺩﻳﺮ ﺻﺎﺡ ﺭﺣﺎﺏ ﻣﺰﺍﻟﺖ ﺻﻐﻴﺮﻩ
ﻋﺰﻭ .. ﺍﻫﻮ ﺷﻦ ﺑﻨﺪﻳﺮﻭ ﺗﻮﺍ ﻧﻘﻌﺪ ﻣﺮﻛﺰ ﻣﻌﺎﻫﺎ ﺧﺎﻳﻔﻪ ﺗﺘﻌﺐ ﻭ ﻫﻴﺎ ﺻﺎﺣﺒﻪ ﺳﻜﺮ ﻭﺿﻐﻆ
ﺍﻣﻴﺮﻩ .. ﺳﻼﻣﺘﻬﺎ ﺣﺒﻴﺒﻲ
ﻋﺰﻭ .. ﺳﻠﻤﻚ ﻳﺎﺳﻤﺤﻪ ﻣﻴﺮﻭ ﺗﻮﺍ ﻣﻄﺮ ﻧﺼﻜﺮ ﺑﻨﺨﺶ ﺗﻼﻫﺎ ﺷﻮﻳﺎ
ﺍﻣﻴﺮﻩ .. ﺧﻮﺫ ﺭﺍﺣﺘﻚ ﻳﺎ ﻋﻤﺮﻱ ﺑﻌﺪﻳﻦ ﻧﺤﻜﻮﺍ
ﻋﺰﻭ ﺍﺑﺘﺴﻢ .. ﺍﻧﺤﺒﻚ
ﺍﻣﻴﺮﻩ ﺗﻨﻬﺪﺕ .. ﻧﻤﻮﺕ ﻓﻴﻚ ﺑﺎﻱ
ﻋﺰﻭ .. ﺍﻭﻛﻲ
ﺻﻜﺮ ﻣﻨﻬﺎ ﻭﺍﺑﺘﺴﻢ ﻭﺧﺶ ﺗﻼ ﻣﺎﻣﺎ ﻭﺭﺣﺎﺏ "
" ﺍﻧﺎ ﻣﻘﻤﻌﺰﻩ ﻉ ﻭﻃﻰ ﻭﻧﻌﺼﺪ .. ﺗﺴﻨﻴﻢ ﻣﺪﻳﻠﻲ ﺍﻟﺼﻮﺍﻧﻲ ﻫﻴﺎ
ﺭﺷﺎ .. ﺍﺻﺒﺮﻱ ﻧﺤﻄﻮ ﻓﻴﻬﻦ ﻑ ﺯﺑﺪﻩ
ﺍﻧﺎ .. ﺑﺎﻩ ﻫﻴﺎ ﺑﺴﺮﻋﻪ
ﻣﺮﻳﻢ .. ﺍﻣﺲ ﻣﺎﻣﺎ ﻋﺼﺪﺕ ﺗﻘﻮﻝ ﺣﺎﺳﻪ ﺍﻧﻪ ﺩﻧﻴﺎ ﺑﺘﺠﻴﺐ
ﺭﺷﺎ .. ﻋﻠﻴﻚ ﻋﺼﻴﺪﻩ ﺗﻬﺒﻞ ﺑﺲ
ﻣﺮﻳﻢ ﺿﺤﻜﺖ .. ﺑﻜﻞ ﺍﻧﺘﻲ ﺍﻣﺲ
ﺭﺷﺎ .. ﺗﻤﺴﺢ ﺍﻟﻜﺒﺪ ﺗﻬﺒﻞ
ﻣﺪﺗﻠﻲ ﺗﺴﻨﻴﻢ ﺍﻟﺼﻮﺍﻧﻲ ﻭﺍﻧﺎ ﻧﺤﻂ ﻓﻴﻬﻦ ﻑ ﻋﺼﻴﺪﻩ ﻭﻧﻌﻄﻲ ﻟﺮﺷﺎ ﺗﺴﻘﻤﻬﺎ ﻭﺩﻳﺮﻟﻬﺎ ﺭﺳﻤﻪ
ﺣﻄﻴﻨﺎ ﻑ ﺍﻟﺼﻔﺮ ﻭﻃﻠﻌﻨﺎ ﺣﻄﻴﻨﺎ ﻟﺼﺒﺎﻳﺎ ﻭﻗﻤﻌﺰﻧﺎ
ﻗﻤﻌﺰﺕ ﺍﻧﺎ ﻭﺭﺷﺎ ﻭﻣﺮﻳﻢ ﻭﺑﺸﺮﻯ ﻭﺗﺴﻨﻴﻢ ﻣﻊ ﺑﻌﻀﻨﺎ ﻫﻞ ﺩﻧﻴﺎ ﻭﻣﻌﺎﻫﻢ ﺭﻳﻬﺎﻡ ﻭﺍﻋﻤﻴﻤﻪ ﻭﺭﺣﻤﻪ ﻭﻓﺎﻃﻤﻪ ﺑﺮﻭﺣﻢ
ﺍﻡ ﺩﻧﻴﺎ .. ﺍﻟﻲ ﻋﺼﺪﺕ ﺳﻠﻤﻬﺎ ﻋﺼﺎﺩﻩ
ﻣﺮﻳﻢ .. ﻣﻴﺲ ﻋﺼﺪﺕ
ﺍﻡ ﺩﻧﻴﺎ .. ﺳﻠﻤﻚ ﻋﺼﺎﺩﻩ ﺍﻥ ﺷﺎﺀ ﺍﻟﻠﻪ ﻧﻌﺼﺪﻭﻫﺎ ﻟﻜﻲ ﻑ ﺟﻴﺎﺑﻚ
ﺍﻧﺎ ﺍﺑﺘﺴﻤﺖ .. ﺗﺴﻠﻤﻲ ﺻﺤﻪ
ﻓﺎﻃﻤﻪ .. ﺍﻥ ﺷﺎﺀ ﺍﻟﻠﻪ ﻣﺎﺗﺤﻜﻲ ﺑﻴﻬﻦ ﺩﺍﺀ ﺍﻳﺪﻳﺎﺗﻚ
ﺍﻧﺎ .. ﺳﻠﻤﻚ ﻳﺎﺍﻋﻤﻴﻤﻪ ﺻﺤﻪ
ﻣﺮﻳﻢ .. ﺣﻠﻮﻩ ﻣﺸﺎﺀﺍﻟﻠﻪ
ﺗﺴﻨﻴﻢ .. ﺍﻫﺎ ﺗﻬﺒﻞ ﻳﻨﻌﻠﻴﺎ ﻧﺤﺒﻬﺎ ﺑﻜﻞ ﺍﻟﻌﺼﻴﺪﻩ
ﺑﺸﺮﻯ .. ﺳﻤﺤﻪ ﺍﻫﺎ
ﺍﻧﺎ .. ﺻﺤﻪ ﺳﻤﺤﻪ ﻭﻻ ﻳﻌﻨﻲ
ﺭﺷﺎ .. ﻻ ﻣﺸﺎﺀ ﺍﻟﻠﻪ ﺗﻬﺒﻞ
ﺍﻧﺎ .. ﺻﺤﻪ ﻭﻋﺎﻓﻴﻪ
ﻛﻠﻬﻦ .. ﺳﻠﻤﻚ
ﺷﻮﻳﺎ ﻭﺻﺒﻴﻨﺎ ﺷﻠﻨﺎ ﺍﻟﺼﻔﺮ ﻟﻜﻮﺟﻴﻨﻪ
ﺳﻠﻴﻤﻪ ﺧﺸﺖ .. ﻣﺸﺎﺀ ﺍﻟﻠﻪ ﻋﻠﻴﻬﺎ ﻳﺎﻣﻴﺲ
ﺍﻧﺎ ﺍﺑﺘﺴﻤﺖ .. ﺻﺤﻪ
ﺳﻠﻴﻤﻪ .. ﺳﻠﻤﻚ ﺍﻃﻠﻌﻲ ﺍﻛﻴﺪﻩ ﺗﺒﻲ ﺗﻬﺪﺭﺯﻱ ﻣﻊ ﺧﻴﺘﻚ
ﺍﻧﺎ .. ﺗﻮﺍ ﻧﻠﻤﻮ ﺍﻟﺤﻮﺳﻪ ﻭﻧﻄﻠﻌﻮ ﻣﻊ ﺑﻌﻀﻨﺎ
ﻣﺮﻳﻢ .. ﺻﺎﺡ ﻋﺪﻱ ﻳﺎﻣﻴﺲ ﺗﻮﺍ ﻧﺤﻦ ﻧﻠﻤﻮﻫﺎ
ﺍﻧﺎ .. ﺑﺎﻩ ﺗﻤﺎﻡ ﺭﺑﻲ ﻳﻌﺎﻭﻧﻜﻦ
ﻃﻠﻌﺖ ﻗﻤﻌﺰﺕ ﺗﻼ ﺭﻳﻬﺎﻡ
ﺍﻧﺎ .. ﺷﻦ ﺟﻮ
ﺭﻳﻬﺎﻡ .. ﺗﻤﺎﻡ ﻟﻌﻨﺪ ﺗﻮﺍ
ﺍﻧﺎ .. ﺷﻨﺠﻮﻩ ﺍﻧﺲ
ﺭﻳﻬﺎﻡ ﺍﺑﺘﺴﻤﺖ .. ﻛﻮﻳﺲ ﺟﻮﻩ ﺣﺘﻰ ﻛﻼﻣﻪ ﻣﺮﻳﺢ ﺑﻜﻞ ﻳﺎﻣﻴﺴﻮ ﺧﻄﺮ ﻋﻠﻴﺎ ﻛﻼﻣﻚ
ﺍﻧﺎ .. ﺟﺪ ﺑﺎﻫﻲ ﻉ ﻣﻬﻢ ﺍﻧﺘﻲ ﻣﺘﺮﻳﺤﻪ
ﺭﻳﻬﺎﻡ .. ﻳﻌﻨﻲ ﻣﺶ ﺣﻨﻘﻮﻝ ﻣﺘﺮﻳﺤﻪ ﻣﺘﺮﻳﺤﻪ ﺑﺲ ﻛﻴﻒ ﻣﺎ ﺗﻘﻮﻟﻲ ﺗﺎﻗﻠﻤﺖ ﻣﻌﺎﻩ ﺍﻣﺲ ﺻﺎﺭﺕ ﺣﺎﺟﻪ ﻭﻭﻭﻭﻭﻭ
ﺍﻧﺎ .. ﺗﺼﺮﻓﻪ ﺣﻠﻮ ﺑﻜﻞ ﻳﺒﻴﻚ ﺗﻔﻜﺮﻱ ﺑﻴﻨﻚ ﻭﺑﻴﻦ ﺭﻭﺣﻚ ﻭﻣﺎﻳﺒﻴﺶ ﻳﻀﺎﻳﻘﻚ ﺑﻜﺜﺮ ﻛﻼﻣﻪ
ﺭﻳﻬﺎﻡ .. ﻻ ﻻ ﺑﺲ ﺍﻧﺎ ﻧﺒﻴﻪ ﻳﻘﻌﺪ
ﺍﻧﺎ ﺍﺑﺘﺴﻤﺖ .. ﻭﻫﺬﺍ ﺑﺪﺍﻳﻪ ﺍﻟﺤﺐ ﻭﻻ ﺷﻨﻮ
ﺭﻳﻬﺎﻡ .. ﺗﻌﻮﺩ ﻣﺎﺣﺘﻰ ﺣﺐ ﻑ ﺍﺳﺒﻮﻉ
ﺍﻧﺎ .. ﻭﻟﻴﺶ ﻻ ﺍﻧﺎ ﺣﺒﻴﺖ ﺍﻳﻬﻢ ﻑ ﺍﺳﺒﻮﻋﻴﻦ ﺑﺲ ﻭ ﺷﻔﺘﻲ ﻛﻴﻒ ﺣﺒﻲ ﻟﻪ ﻭﺗﻌﻠﻘﻲ ﺑﻴﻪ
ﺭﻳﻬﺎﻡ .. ﺍﻧﺘﻲ ﺗﻔﺮﻗﻲ ﻋﻠﻴﺎ ﻭﺍﺟﺪ ﺭﺍﻩ ﺍﻧﺘﻲ ﻛﺎﻥ ﻗﻠﺒﻚ ﻓﺎﺿﻲ
ﺍﻧﺎ .. ﻣﻤﻜﻦ ﺻﺎﺡ ﺑﺲ ﺗﻘﺪﺭﻱ ﺗﺤﺒﻲ ﺍﻧﺲ
ﺭﻳﻬﺎﻡ .. ﺍﻥ ﺷﺎﺀ ﺍﻟﻠﻪ ﻳﺎﺭﺏ
ﺷﻮﻳﺎ ﻭﻃﻠﻌﻦ ﺍﻟﺒﻨﺎﺕ ﻫﺪﺭﺯﻧﺎ ﻭﺭﻭﺣﻮ ﻫﻞ ﺩﻧﻴﺎ ﻗﻌﺪﻧﺎ ﻧﺤﻦ ﺑﺲ ﻭﺑﻌﺪﻫﺎ ﺧﺸﻮ ﺍﻟﺸﺒﺎﺏ
ﺍﻳﻬﻢ .. ﻣﺸﺎﺀﺍﻟﻠﻪ ﺍﺳﻢ ﻉ ﻣﺴﻤﻰ ﺯﻳﻨﻪ
ﺍﻣﺠﺪ .. ﺗﺴﻠﻢ ﻳﺎﻧﺼﻲ
ﻣﺤﻤﺪ .. ﺗﺮﺍ ﻧﻤﺴﻜﻬﺎ ﻳﺎﺍﻳﻬﻢ
ﺍﻳﻬﻢ ﻣﺪﻫﺎ ﻟﻪ
ﻣﺤﻤﺪ .. ﻣﺸﺎﺀﺍﻟﻠﻪ ﺭﺑﻲ ﻳﺤﻤﻴﻬﺎ
ﺍﻣﺠﺪ .. ﺍﻥ ﺷﺎﺀ ﺍﻟﻠﻪ ﻧﺸﻮﻓﻬﺎ ﻋﻨﺪﻙ
ﻣﺤﻤﺪ .. ﺗﺴﻠﻢ ﺍﻥ ﺷﺎﺀ ﺍﻟﻠﻪ
ﻃﻠﻊ ﻓﻠﻮﺱ ﻣﻦ ﺟﻴﺒﻪ ﻭﺣﻄﻬﻦ ﻋﻠﻴﻬﺎ
ﺍﻣﺠﺪ .. ﻋﻠﻴﻚ ﻃﺮﻭﺡ ﻣﺎﻓﻴﺶ ﺩﺍﻋﻲ
ﻣﺤﻤﺪ .. ﻣﺶ ﺷﻮﺭﻙ ﺷﻮﺭ ﺯﻳﻨﻪ ﻫﺬﻳﻨﺎ
ﺍﻣﺠﺪ ﺿﺤﻚ .. ﺑﺎﻫﻲ ﺑﺠﻮﻙ
ﻣﻨﻴﺮ .. ﺍﻧﺎ ﻣﻦ ﺭﻭﺣﺖ ﻭﺍﻧﺎ ﻣﺴﻜﻬﺎ ﺗﻬﻴﺎﻟﻲ ﻣﻠﺖ ﻣﻨﻲ ﺍﻟﺒﻨﺖ ﺑﺲ ﻫﺎﺗﻲ
ﺩﻧﻴﺎ ﺗﻀﺤﻚ .. ﺍﻣﺴﻜﻬﺎ
ﻣﻨﻴﺮ .. ﻫﺎﺩﻳﻪ ﻣﺶ ﻛﻴﻒ ﺳﺎﺭﻳﻨﻪ ﻭﺳﻦ
ﺍﻧﺎ .. ﺣﻲ ﻭﺣﻲ ﻗﺼﺪﻙ ﻛﺒﺪﺕ ﻑ ﺯﻳﻨﻪ
ﻣﻨﻴﺮ ﺿﺤﻚ .. ﻻ ﻻ ﻭﺳﻦ ﺑﺮﻭﺣﻬﺎ ﺍﻟﻔﺮﺧﻪ ﺗﺘﺎﻛﻞ ﻋﺴﻞ ﺑﻜﻞ
ﺍﻧﺎ ﻧﻀﺤﻚ .. ﻧﺤﺴﺎﺑﻚ ﻓﺘﺘﻬﺎ
ﻣﺤﻤﺪ .. ﺗﺸﺒﻪ ﺭﺷﺎ ﺑﻜﻞ
ﻣﻨﻴﺮ .. ﺗﻲ ﺍﻭﻛﻲ ﺍﻭﻛﻲ ﻓﻜﻨﺎ ﻣﻦ ﻃﻮﺍﻃﻲ ﻭﺍﻟﻄﺮﻭﺡ ﺗﺮﺍ
ﻣﺤﻤﺪ ﻳﻀﺤﻚ .. ﺑﺎﻩ ﻳﺎﺗﻴﺲ ﺑﻌﺪﻳﻦ ﻫﻴﺎ ﺭﺷﺎ
ﺭﺷﺎ ﺻﺒﺖ .. ﻫﻴﺎ ﺑﺎﻩ ﺗﺼﺒﺤﻮ ﻉ ﺧﻴﺮ ﻳﺎﺟﻤﺎﻋﻪ
ﻧﺤﻦ .. ﺗﻼﻗﻮ ﺍﻟﺨﻴﺮ
ﺍﻋﻠﻴﻮﻩ ﺟﺎﺀ ﻟﺼﻖ ﻑ ﺍﻳﻬﻢ
ﺍﻳﻬﻢ .. ﺗﻌﺎﻝ ﻫﻲ
ﺍﻣﺠﺪ .. ﺍﻟﻔﺮﺥ ﻳﺤﺒﻚ ﺑﻜﻞ ﻳﺎﺭﺍ
ﺍﻳﻬﻢ .. ﺗﻲ ﺻﻘﻊ ﻋﻠﻴﻚ ﻭﺧﻼﺹ
ﺍﻣﺠﺪ .. ﺗﻌﺎﻝ ﺍﻋﻠﻴﻮﻩ ﺧﻼﺹ ﻧﺮﻗﺪﻭ ﻭﻗﺖ ﻧﻮﻣﺘﻚ
ﺍﻋﻠﻴﻮﻩ ﻣﺴﻚ ﻑ ﺭﻗﺒﻪ ﺍﻳﻬﻢ .. ﻣﺒﻴﺶ
ﺍﻳﻬﻢ .. ﺧﻼﺹ ﺧﻠﻴﻪ ﻳﺮﻗﺪ ﻣﻌﺎﻧﺎ
ﺩﻧﻴﺎ .. ﻻﻻ ﺧﻠﻴﻪ ﻳﺎﺍﻳﻬﻢ ﺗﻮﺍ ﻳﺠﻌﺰﻛﻢ
ﺍﻧﺎ .. ﻻﻻ ﺧﻠﻴﻪ ﻣﻌﺎﻧﺎ ﺩﺍﻳﺮ ﺟﻮ ﻋﻄﻴﻨﻲ ﺩﺑﺸﻪ ﻭﻛﻞ ﺣﺎﺟﻪ ﻟﻪ
ﺩﻧﻴﺎ .. ﺗﻲ ﻣﺎﺗﺠﻴﺶ ﻋﺎﺩ ﻫﺮﺟﺘﻪ ﻭﺍﺟﺪﻩ ﺍﻧﺎ ﻋﺎﺭﻓﺘﻪ
ﺍﻧﺎ .. ﻣﺎﺭﻳﺘﻠﻪ ﻫﺮﺟﻪ ﺧﻼﺹ ﻫﺎﺗﻴﻪ
ﺻﺒﻰ ﺍﻳﻬﻢ ﺷﺎﻣﺮﻩ ﻑ ﺍﻳﺪﻩ
ﺍﻳﻬﻢ .. ﻭﻳﻦ ﺩﺑﺸﻪ
ﺗﺴﻨﻴﻢ .. ﺗﻮﺍ ﻧﺨﺶ ﻧﺠﻴﺒﻪ ﻟﻜﻲ
ﺧﺸﺖ ﺗﺴﻨﻴﻢ ﺟﺎﺑﺖ ﺷﻨﻄﻪ ﻭﺍﻧﺎ ﻣﺴﻜﺘﻬﺎ ﻭﻣﺎﺳﻜﻪ ﻗﻌﺎﺩ ﻭﺳﻦ
ﺍﻧﺎ .. ﻫﻴﺎ ﺗﺼﺒﺤﻮ ﻉ ﺧﻴﺮ
ﻛﻠﻬﻢ .. ﻭﺍﻧﺘﻢ ﺑﺨﻴﺮ
ﺭﻛﺒﻨﺎ ﻟﺸﻘﻪ ﺍﻣﺘﺎﻋﻨﺎ "
" ﻣﺤﻤﺪ .. ﺭﺷﺎ ﻛﻨﻚ ﻃﻮﻟﺘﻲ ﻓﻲ ﺣﺎﺟﻪ
ﺭﺷﺎ ﺗﻜﺢ .. ﺷﻮﻳﺎ ﻳﺎﺍﺣﻤﻴﺪﺍ ﺑﺲ
ﻣﺤﻤﺪ .. ﻛﻨﻚ ﺷﻐﻠﺘﻴﻨﻲ ﻋﻠﻴﻚ ﺷﻦ ﻓﻲ
ﺭﺷﺎ ﻃﻠﻌﺖ ﻣﺎﺳﻜﻪ ﺑﻄﻨﻬﺎ .. ﺷﻜﻠﻲ ﻛﺜﺮﺕ ﺍﻟﻴﻮﻡ
ﻣﺤﻤﺪ .. ﺍﺳﺘﻔﺮﻏﺘﻲ ﻭﻻ ﺷﻨﻮ
ﺭﺷﺎ .. ﺍﻫﺎ ﺣﻄﻴﺘﻪ ﻛﻠﻪ
ﻣﺤﻤﺪ .. ﺗﻮﺍ ﻧﺪﻳﺮﻟﻚ ﻟﻴﻢ ﻭﺯﻫﺮ ﻋﺪﻱ ﻗﻤﻌﺰﻱ
ﺭﺷﺎ .. ﻳﺎﺭﻳﺖ
ﻣﺤﻤﺪ .. ﺧﻼﺹ ﻋﺪﻱ ﺑﺎﻩ
ﻣﺸﺖ ﻗﻤﻌﺰﺕ ﻉ ﺻﺎﻟﻮﻥ ﻭﺣﺎﻃﻪ ﺍﻳﺪﻫﺎ ﻉ ﺑﻄﻨﻬﺎ
ﻣﺤﻤﺪ ﺟﺎﺀ ﻣﺎﺳﻚ ﺍﻟﻜﺒﺎﻳﻪ .. ﺍﻣﺴﻜﻲ ﺍﺷﺮﺑﻴﻬﺎ ﺗﻮﺍ ﺗﺮﻳﺤﻲ ﺷﻮﻳﺎ
ﺭﺷﺎ ﻣﺴﻜﺘﻬﺎ ﻭﻗﻌﺪﺕ ﺗﺸﺮﺏ
ﻣﺤﻤﺪ .. ﺣﺴﻴﺘﻲ ﻛﺒﺪﻙ ﺯﻋﻤﺖ ﻧﺒﺪﺭﻱ ﻭﻻ ﻛﻴﻒ
ﺭﺷﺎ .. ﺍﻫﺎ ﻣﺸﻌﺎﺭﻓﻪ ﻛﻴﻒ ﻛﺎﻧﻲ ﺷﻤﻴﺖ ﺣﺎﺟﻪ ﺷﻴﻨﻪ ﻫﻜﻲ ﻣﺶ ﻋﺎﺭﻓﻪ ﻭﺍﻟﻠﻪ
ﻣﺤﻤﺪ .. ﻋﺎﺩﻱ ﻣﺶ ﻣﺸﻜﻠﻪ ﺗﺼﻴﺮ ﺗﻮﺍ ﺍﺷﺮﺑﻲ
ﺭﺷﺎ .. ﺑﺎﻩ ﻧﺸﺮﺏ ﺍﻫﻮ
ﻣﺤﻤﺪ .. ﻛﻤﻠﺘﻴﻬﺎ
ﺭﺷﺎ .. ﺍﻫﺎ ﻛﻤﻠﺘﻬﺎ ﺗﺴﻠﻢ ﺍﻳﺪﻳﻚ
ﻣﺤﻤﺪ .. ﺳﻠﻤﻚ ﻛﺎﻥ ﺗﺤﺴﻲ ﻑ ﺣﺎﺟﻪ ﻗﻮﻟﻴﻠﻲ ﺭﺍﻩ ﺗﻘﻌﺪﻱ ﻭﺃﺧﺬﻩ ﺑﺮﺩ ﺻﻘﻊ ﺍﺻﻼً
ﺭﺷﺎ .. ﻻﻻ ﻣﺎﺣﺘﻰ ﺑﺮﺩ ﻳﻌﻨﻲ ﻻﻧﻪ ﺑﻌﺪ ﻧﺎﺧﺬ ﺑﺮﺩ ﺍﻧﺎ ﺭﺍﺳﻲ ﻳﺒﺪﺃ ﻓﻴﺎ
ﻣﺤﻤﺪ .. ﺑﺎﻩ ﺻﺒﻲ ﺧﻠﻲ ﻧﺨﺸﻮ ﻟﺪﺍﺭ ﺻﻘﻊ ﻫﻨﺎ
ﺭﺷﺎ ﺻﺒﺖ ﻭﺧﺸﺖ ﻣﻌﺎﻩ ﻟﺪﺍﺭ
ﻣﺤﻤﺪ ﺭﻗﺪ ﻉ ﺳﺮﻳﺮ ﻭﺟﺖ ﺭﺷﺎ ﺭﻗﺪﺕ ﻉ ﺍﻳﺪﻩ
ﻣﺤﻤﺪ .. ﻣﻦ ﺟﺎﺀ ﺍﻟﻴﻮﻡ ﺧﺎﻃﻲ ﻫﻞ ﺩﻧﻴﺎ
ﺭﺷﺎ .. ﻣﺤﺪ ﻧﺤﻦ ﻭﻫﻞ ﺩﻧﻴﺎ ﻭﺟﺖ ﺭﻳﻬﺎﻡ ﺍﺧﺘﻲ
ﻣﺤﻤﺪ .. ﺍﻫﺎ ﺷﻔﺘﻪ ﺍﻧﺲ ﻣﺸﺎﺀﺍﻟﻠﻪ ﻋﻠﻴﻪ ﻣﺤﺘﺮﻡ
ﺭﺷﺎ .. ﺭﺑﻲ ﻳﻬﻨﻴﻬﺎ ﺷﺎﻏﻠﻪ ﺑﺎﻟﻨﺎ
ﻣﺤﻤﺪ .. ﺗﻮﺍ ﺗﺎﻗﻠﻢ ﻭﺗﻌﻮﺩ ﻋﻠﻴﻪ
ﺭﺷﺎ .. ﺍﻥ ﺷﺎﺀ ﺍﻟﻠﻪ
ﻣﺤﻤﺪ ﺑﺤﺖ ﻓﻴﻬﺎ ﻭﺍﺑﺘﺴﻢ
ﺭﺷﺎ .. ﻛﻨﻚ
ﻣﺤﻤﺪ ﺗﻨﻬﺪ .. ﺷﻲ ﻧﺤﻤﺪ ﻑ ﺭﺑﻲ ﺍﻧﻪ ﻋﻼﻗﺘﻨﺎ ﺍﻧﺘﻬﺖ ﺑﺎﻟﺤﻼﻝ
ﺭﺷﺎ ﺍﺑﺘﺴﻤﺖ .. ﺍﻟﺤﻤﺪﺍﻝﻟﻪ ﻳﺎﺭﺏ ﺍﺣﻠﻰ ﺣﺎﺟﻪ ﻑ ﺩﻧﻴﺎ ﺍﻧﻚ ﺗﺎﺧﺬﻱ ﺍﻟﻲ ﺗﺤﺒﻴﻪ
ﻣﺤﻤﺪ .. ﺟﺪﻳﺎﺕ ﺻﺎﺡ ﺗﻘﻌﺪ ﻫﻜﻲ ﻓﺮﺣﺎﻥ ﺗﺤﺲ ﺭﻭﺣﻚ ﺩﺭﺕ ﺇﻧﺠﺎﺯ
ﺭﺷﺎ .. ﻭﺍﻟﻠﻪ ﻣﺶ ﻏﻴﺮ ﺇﻧﺠﺎﺯ ﻓﺮﺣﻪ ﺣﻠﻮﻩ
ﻣﺤﻤﺪ ﺣﻀﻨﻬﺎ ﺑﻘﻮﻩ .. ﺭﺑﻲ ﻳﺨﻠﻴﻨﺎ ﻟﺒﻌﻀﻨﺎ
ﺭﺷﺎ ﺿﺤﻜﺖ .. ﺑﺸﻮﻳﺎ ﺣﻤﺎﺩﻱ ﻛﻨﻚ
ﻣﺤﻤﺪ ﺑﺎﺱ ﺭﺍﺳﻬﺎ .. ﺧﻠﻴﻚ ﻫﻜﻲ
ﺭﺷﺎ ﻟﻔﺖ ﺍﻳﺪﻳﻬﺎ ﻉ ﺿﻬﺮﻩ .. ﻗﺎﻋﺪﻩ ﻫﻜﻲ ﺣﺘﻰ ﺍﻧﺎ
ﻣﺤﻤﺪ .. ﺍﺭﻗﺪﻱ ﺗﺼﺒﺤﻲ ﻋﻠﻰ ﺧﻴﺮ
ﺭﺷﺎ ﺗﻨﻬﺪﺕ .. ﻭﺍﻧﺖ ﻣﻦ ﺍﻫﻠﻲ "
" ﺭﻳﻬﺎﻡ ﺗﺒﺤﺖ ﻑ ﺍﻧﺲ ﻭﻫﻮ ﻳﺴﻮﻕ ﻭﺳﺎﻛﺖ .. ﺍﻧﺲ
ﺍﻧﺲ ﻳﺴﻮﻕ ﻭﻳﺒﺤﺖ ﻑ ﻃﺮﻳﻖ .. ﻧﻌﻢ
ﺭﻳﻬﺎﻡ .. ﺑﺤﺖ ﻓﻴﺎ ﻧﺤﻜﻴﻠﻚ
ﺍﻧﺲ ﺍﺑﺘﺴﻢ .. ﺗﻲ ﻛﻴﻒ ﺑﻨﺒﺤﺖ ﻭﺍﻧﺎ ﻧﺴﻮﻕ ﻭﺿﻼﻡ ﻭﺍﻧﺎ ﻋﻨﺪﻱ ﺿﻌﻒ ﻧﻈﺮ
ﺭﻳﻬﺎﻡ .. ﺻﺎﺡ ﻋﻨﺪﻙ ﺿﻌﻒ
ﺍﻧﺲ .. ﺍﻫﺎ ﻗﻮﻟﻴﻠﻲ ﻛﻨﻚ
ﺭﻳﻬﺎﻡ .. ﺷﻲ ﻛﻨﺖ ﺑﻨﻘﻮﻟﻚ ﺗﻬﺒﻞ ﺍﻟﺒﻨﻮﺗﺔ ﺻﻮﺭﺗﻬﺎ ﺣﺘﻰ
ﺍﻧﺲ ﺍﺑﺘﺴﻢ .. ﺑﺎﻫﻲ ﺍﻥ ﺷﺎﺀ ﺍﻟﻠﻪ ﺗﻄﻠﻌﻠﻬﺎ ﺯﻳﻨﻪ ﻛﻴﻒ ﺍﺳﻤﻬﺎ
ﺭﻳﻬﺎﻡ .. ﺍﻥ ﺷﺎﺀ ﺍﻟﻠﻪ ﻭﻳﺮﺯﻗﻨﺎ
ﺍﻧﺲ ﺑﺤﺖ ﻓﻴﻬﺎ ﻭﺭﻳﻬﺎﻡ ﺍﺑﺘﺴﻤﺖ
ﺭﻳﻬﺎﻡ .. ﺭﻛﺰ ﻉ ﻃﺮﻳﻖ ﻛﻨﻚ ﺗﺒﻲ ﺗﻮﺩﺭﻧﺎ
ﺍﻧﺲ ﺭﺩ ﻳﺒﺤﺖ ﻑ ﺍﻟﻄﺮﻳﻖ .. ﻣﻌﺶ ﺗﺤﻜﻴﻠﻲ ﻣﺎﻩ
ﺭﻳﻬﺎﻡ .. ﺑﺎﻩ ﺍﻣﺘﻰ ﺑﻨﻮﺻﻠﻮ ﻣﻠﻴﺖ ﺭﺍﻩ
ﺍﻧﺲ .. ﺧﻼﺹ ﺍﻫﻲ ﺍﻟﻔﺘﺤﻪ ﺍﻣﺘﺎﻉ ﺍﻟﻘﺮﻳﻪ
ﺭﻳﻬﺎﻡ ﺗﻜﺖ ﻉ ﻣﺴﻨﺪ ﺍﻟﻜﺮﺳﻲ .. ﻭﺍﺧﻴﺮﺍً
ﺍﻧﺲ ﺳﻜﺖ ﻭﻗﻌﺪ ﻳﺴﻮﻕ ﻟﻴﻦ ﻭﺻﻠﻮ ﻗﺪﺍﻡ ﺍﻟﺸﺎﻟﻴﻪ
ﺭﻳﻬﺎﻡ ﻓﺘﺤﺖ ﺍﻟﺒﺎﺏ ﻭﺍﻧﺲ ﻧﺰﻝ ﺻﻜﺮ ﺍﻟﺒﺎﺏ ﻭﺟﺎﺀ ﺷﻮﺭ ﺭﻳﻬﺎﻡ
ﺍﻧﺲ ﻓﺘﺢ ﺍﻟﺒﺎﺏ .. ﻫﻴﺎ ﺧﺸﻲ ﺻﻘﻊ
ﺭﻳﻬﺎﻡ .. ﻭﻳﻦ ﻣﺎﺷﻲ ﺍﻧﺖ
ﺍﻧﺲ .. ﺷﻮﻳﺎ ﻣﺶ ﺣﻨﻄﻮﻝ
ﺭﻳﻬﺎﻡ .. ﻻ ﻻ ﻣﺎﺗﻌﺪﻳﺶ ﺧﻠﻴﻚ
ﺍﻧﺲ .. ﻣﺶ ﻣﻄﻮﻝ ﻧﺒﻲ ﺻﺎﺣﺒﻲ ﺭﺑﻊ ﺳﺎﻋﻪ ﺑﺲ
ﺭﻳﻬﺎﻡ .. ﺑﺎﻩ ﻛﺎﻥ ﻃﻮﻟﺖ ﺣﻨﺴﻜﻦ ﻧﺮﻥ ﻋﻠﻴﻚ
ﺍﻧﺲ ﺿﺤﻚ .. ﺑﺎﻩ ﺗﻤﺎﻡ ﺧﺸﻲ ﻫﻲ
ﺭﻳﻬﺎﻡ ﺍﺑﺘﺴﻤﺖ ﻭﻗﺮﺑﺖ ﻣﻨﻪ ﺻﻜﺮﺕ ﺳﻮﺳﺖ ﺍﻟﻜﺒﻮﻁ .. ﺻﻘﻊ ﺗﻮﺍ ﺗﻤﺮﺽ
ﺍﻧﺲ ﺍﺑﺘﺴﻢ .. ﺣﺘﻤﺮﺿﻲ ﺍﻧﺘﻲ ﺧﺸﻲ ﺧﻼﺹ
ﺭﻳﻬﺎﻡ .. ﺑﺎﻩ ﺑﺎﻱ ﺗﻮﺍ
ﺍﻧﺲ .. ﺍﻭﻛﻲ
ﺧﺸﺖ ﺭﻳﻬﺎﻡ ﻟﺪﺍﺭ ﻣﺴﺤﺖ ﺍﻟﻤﻜﻴﺎﺝ ﻭ ﻃﻠﻌﺖ ﺩﺑﺸﻬﺎ ﻭﺧﺸﺖ ﻟﺤﻤﺎﻡ ﺩﻭﺵ ﻭﻃﻠﻌﺖ ﻛﻴﻒ ﺑﺘﺤﻞ ﺩﻳﺸﻨﺒﺮ ﺧﺶ ﺍﻧﺲ ﻻﻓﺘﻪ ﺑﺴﺮﻋﻪ ﻭﻫﻮ ﻗﻌﺪ ﻳﺒﺤﺖ ﻓﻴﻬﺎ ﻭﻗﺮﺏ ﻣﻨﻬﺎ
ﺭﻳﻬﺎﻡ ﻣﻨﺰﻟﻪ ﺭﺍﺳﻬﺎ
ﺍﻧﺲ ﻗﻌﺪ ﻳﻤﺸﻲ ﻑ ﻛﻒ ﺍﻳﺪﻩ ﻉ ﺧﺪﻫﺎ
ﺭﻳﻬﺎﻡ ﺭﻓﻌﺖ ﻋﻴﻮﻧﻬﺎ ﻑ ﻋﻴﻮﻧﻪ ﻭﻗﻌﺪﺕ ﺗﺒﺤﺖ ﻓﻴﻬﻦ
ﺍﻧﺲ ﺍﺑﺘﺴﻢ .. ﺷﻨﻮ
ﺭﻳﻬﺎﻡ ﺯﻣﻄﺖ ﺭﻳﻘﻬﺎ ﻭﺳﺎﻛﺘﻪ
ﺍﻧﺲ ﺣﻮﻝ ﺍﻟﻤﻨﺸﻒ ﺍﻟﻲ ﻉ ﺷﻌﺮﻫﺎ ﻭﻏﻤﺾ ﻋﻴﻮﻧﻪ ﻳﺸﻢ ﻑ ﺭﻳﺤﺘﻬﺎ
ﺭﻳﻬﺎﻡ ﺗﺒﺤﺖ ﻓﻴﻪ ﻭﺳﺎﺭﺣﻪ
ﺍﻧﺲ ﻣﺴﻚ ﺧﺼﺮﻫﺎ ﻭﻗﻌﺪ ﻳﻮﺧﺮ ﺑﻴﻬﺎ ﻟﻌﻨﺪ ﻭﺻﻞ ﻟﺴﺮﻳﺮ ﻭﺭﻳﻬﺎﻡ ﻣﺴﻜﺖ ﻑ ﺭﻗﺒﺘﻪ ﻧﺰﻝ ﺑﻴﻬﺎ ﻭﻭﻭﻭﻭﻭﻭﻭ "
" ﺍﻧﺎ .. ﺷﻨﻮ ﻳﺎﺍﻋﻠﻴﻮﻩ
ﺍﻋﻠﻴﻮﻩ ﻳﺤﻂ ﻑ ﺍﻳﺪﻳﻪ ﻑ ﻭﺫﺍﻧﻪ .. ﺍﺯﺯﺯﺯﺯ
ﺍﻧﺎ ﻗﻌﺪﺕ ﻧﻀﺤﻚ ﻋﺎﺭﻓﺘﻪ ﻳﺒﻲ ﻳﻠﻌﺐ .. ﺍﻳﻬﻢ ﺗﻌﺎﻝ ﺍﻟﻌﺐ ﻣﻌﺎﻧﺎ
ﺍﻳﻬﻢ ﺑﺤﺖ ﻓﻴﻨﺎ .. ﺷﻦ ﺗﻠﻌﺒﻮ
ﺍﻧﺎ .. ﺍﺯﺯﺯﺯﺯ ﺑﺤﺖ ﻫﺎﻩ ﺍﻧﺎ ﻭﺍﻋﻠﻴﻮﻩ ﻧﻠﻌﺒﻮ
ﺍﻳﻬﻢ ﺑﺤﺖ ﻓﻴﺎ ﺑﻨﺺ ﻋﻴﻦ .. ﻫﺬﺍ ﻣﺎﻧﺎﻗﺺ ﻋﻠﻴﺎ ﺑﺎﻟﻠﻪ ﻗﻤﻌﺰﻱ ﺭﻳﺤﻲ ﺍﻋﻀﺎﻣﻚ
ﺍﻧﺎ .. ﻋﺪﻱ ﻣﻠﺢ ﻧﻠﻌﺐ ﺍﻧﺎ ﻭﺍﻋﻠﻴﻮﻩ
ﺍﻳﻬﻢ ﻓﻨﺺ ﻓﻴﺎ ﻭﺳﻜﺖ
ﺍﻧﺎ ﻗﻌﺪﺕ ﻧﻀﺤﻚ ﻭﻧﻠﻌﺐ ﺍﻧﺎ ﻭﺍﻋﻠﻴﻮﻩ
ﺍﻳﻬﻢ .. ﺣﻮﻟﻲ ﻫﻴﺎ ﺩﻭﺭﻱ
ﺍﻧﺎ ﻣﺪﻳﺖ ﺍﻳﺪﻳﺎ .. ﻣﺶ ﺣﺘﻘﺪﺭ ﻋﻠﻴﺎ
ﺍﻳﻬﻢ ﺿﺮﺑﻨﻲ ﺑﻘﻮﻩ ﻉ ﺍﻳﺪﻳﺎ
ﺍﻧﺎ ﻧﻀﺤﻚ .. ﺍﺍﺍﺍﻳﻴﻲ ﻳﺎﺍﺳﺎﻣﻂ ﻭﺍﻋﺮﻩ
ﺍﻳﻬﻢ ﺿﺤﻚ .. ﻣﺶ ﺑﺘﻠﻌﺒﻲ
ﺍﻧﺎ .. ﻣﻌﺶ ﺑﻨﻠﻌﺐ ﻏﻴﺮﺕ ﺭﺃﻱ ﺍﻳﻴﻲ ﻣﺤﺮﻫﺎ ﺷﻮﻑ ﺍﻳﺪﻳﺎ ﺣﻤﺮ
ﺍﻳﻬﻢ ﺿﺤﻚ .. ﺍﻧﺎ ﻫﺬﺍ ﻟﻌﺒﻲ ﺗﺒﻲ ﺗﻠﻌﺒﻲ ﺑﺎﻫﻲ ﻣﺎﺗﺒﻴﺶ ﺑﺎﻫﻲ ﺑﺮﺿﻮ
ﺍﻧﺎ ﻛﺸﺨﺖ ﻋﻠﻴﻪ .. ﺧﺰﻱ ﺍﻳﻲ ﻭﺍﻋﺮﻩ
ﺍﻳﻬﻢ ﻣﺴﻚ ﺍﻳﺪﻳﺎ .. ﻋﻠﻴﻚ ﺷﻮﺭﺥ ﻛﻠﻪ ﺍﻧﺘﻲ ﻭﻫﺎﻩ
ﺑﺎﺱ ﺍﻳﺪﻳﺎ ﺍﻻﺛﻨﻴﻦ
ﺍﻧﺎ ﺍﺑﺘﺴﻤﺖ .. ﺧﻼﺹ ﺣﻮﻝ ﺍﻟﻌﻴﻞ
ﺍﻳﻬﻢ ﺑﺮﻡ ﻉ ﺍﻋﻠﻴﻮﻩ .. ﺍﻋﻠﻴﻮﻩ ﺗﺒﻲ ﺍﻟﺤﻤﺎﻡ
ﺍﻋﻠﻴﻮﻩ ﻫﺰ ﺭﺍﺳﻪ
ﺍﻧﺎ .. ﺗﻮﺍ ﻧﺸﻴﻠﻪ ﻭﺧﻼﺹ ﺧﻠﻲ ﻧﺨﺸﻮ ﻧﺮﻗﺪﻭ
ﺷﻠﺖ ﺍﻋﻠﻴﻮﻩ ﻟﺤﻤﺎﻡ ﻭﻣﺸﻴﻨﺎ ﻟﺪﺍﺭ ﺷﻤﺮﺗﻪ ﻭﺣﻄﻴﺘﻪ ﻑ ﻧﺺ ﺑﻴﻨﺎ
ﺍﻳﻬﻢ .. ﺗﻌﺎﻝ ﺍﻋﻠﻴﻮﻩ ﺍﺭﻗﺪ ﻉ ﺍﻳﺪﻱ
ﺯﻗﺐ ﺍﻋﻠﻴﻮﻩ ﻉ ﺑﻄﻦ ﺍﻳﻬﻢ
ﺍﻳﻬﻢ .. ﺍﺍﺍﺍ ﻳﺎﻋﻤﻮ ﺑﺸﻮﻳﺎ
ﺍﻧﺎ .. ﻭﺳﻦ ﻃﺎﻳﺤﻪ ﻉ ﻧﻮﻡ ﺗﻘﻮﻝ ﻛﺎﻧﺖ ﺗﺤﻮﺱ ﻣﻌﺎﻧﺎ
ﺍﻳﻬﻢ .. ﺧﻠﻴﻬﺎ ﺭﺍﻗﺪﻩ ﻣﺘﺮﻳﺤﻪ
ﺧﺸﻴﺖ ﻣﻌﺎﻫﻢ ﻭ ﺭﻗﺪﺕ ﻉ ﺳﺮﻳﺮ
ﺍﻳﻬﻢ ﺑﺮﻡ ﻃﻔﻰ ﺍﻟﻮﻧﺎﺳﻪ .. ﺗﺼﺒﺤﻲ ﻋﻠﻰ ﺧﻴﺮ
ﺍﻧﺎ .. ﻭﺍﻧﺖ ﻣﻦ ﺍﻫﻠﻮ "
" ﺍﻧﺲ .. ﻣﺒﺮﻭﻙ ﻗﻌﺪﺗﻲ ﻣﺪﺍﻡ
ﺭﻳﻬﺎﻡ ﻏﻄﺖ ﻭﺟﻬﺎ ﺑﺎﻟﻔﻮﻃﻪ
ﺍﻧﺲ ﺿﺤﻚ .. ﺗﺤﺸﻤﺘﻲ ﺗﻮﺍ
ﺭﻳﻬﺎﻡ .. ﺍﻧﺴﺴﺲ ﺣﻮﻝ ﺧﻼﺹ ﺧﻠﻴﻨﻲ
ﺍﻧﺲ .. ﻣﺘﺤﺸﻤﻪ ﻣﻨﻲ ﻳﺎﻋﻤﺮﻱ
ﺭﻳﻬﺎﻡ ﻣﻐﻤﻀﻪ ﻋﻴﻮﻧﻬﺎ ﻭﻣﺒﺘﺴﻤﻪ
ﺍﻧﺲ ﻗﺮﺏ ﺣﻀﻨﻬﺎ ﻣﻦ ﻻﻭﺭﻩ .. ﺍﻧﺘﻲ ﺭﺍﺿﻴﻪ ﻋﻠﻲ ﺻﺎﺭ
ﺭﻳﻬﺎﻡ .. ﺍﻧﺖ ﺷﻔﺖ ﻛﻴﻒ ﺍﻧﺎ ﻣﻌﺎﻙ ﻣﻌﻨﺎﻫﺎ ﺷﻨﻮ
ﺍﻧﺲ ﻳﺪﻭﻱ ﺑﺼﻮﺕ ﺩﺍﻓﻲ ﻉ ﺭﻗﺒﺘﻬﺎ .. ﻳﻨﻌﻠﻲ ﻣﻨﻚ ﺧﻠﻴﻨﺎ ﺑﻜﺮﺍ ﻧﺪﻭﺷﻮ
ﺭﻳﻬﺎﻡ ﺣﻄﺖ ﺍﻳﺪﻳﻬﺎ ﻉ ﺍﻳﺪﻳﻪ .. ﺗﻤﺎﻡ ﺧﻠﻴﻨﺎ ﻧﺮﻗﺪﻭ ﺗﻮﺍ
ﺍﻧﺲ ﺑﺼﻮﺕ ﻫﺎﺩﻱ .. ﺗﺼﺒﺤﻲ ﻋﻠﻰ ﺧﻴﺮ
ﺭﻳﻬﺎﻡ ﺗﻨﻬﺪﺕ .. ﻭﺍﻧﺖ ﻣﻦ ﺍﻫﻞ ﺍﻟﺨﻴﺮ "
" ﺍﻟﻴﻮﻡ ﺛﺎﻧﻲ ﻑ ﺻﺒﺢ ..
ﺩﻧﻴﺎ .. ﻛﺎﻥ ﻗﻌﺪﻧﺎ ﻑ ﺷﻘﺘﻨﺎ ﻫﻨﺎ ﻣﺘﺤﺸﻤﻪ ﻣﻦ ﻣﻨﻴﺮ
ﺍﻣﺠﺪ ﻳﻠﺒﺲ ﻑ ﺗﻴﺸﺮﺗﻪ .. ﻣﻨﻴﺮ ﺩﻳﻤﺎ ﻃﺎﻟﻊ ﻣﺶ ﻗﺎﻋﺪ ﻭﺍﻣﻲ ﺗﺒﻴﻚ ﺧﻼﺹ ﺍﺻﺒﺮﻱ ﻋﻨﺪ ﺍﺭﺑﻌﻴﻦ ﻭﻧﺮﻛﺒﻮ ﻟﺸﻘﺘﻨﺎ
ﺩﻧﻴﺎ .. ﺍﻥ ﺷﺎﺀ ﺍﻟﻠﻪ ﻧﺰﻝ ﺍﻋﻠﻴﻮﻩ ﻳﺰﻋﺠﻬﻢ ﻗﺎﻟﺘﻠﻲ ﺭﻗﺪ ﺑﻴﻨﺎ ﺍﻭﻝ ﺍﻣﺲ
ﺍﻣﺠﺪ .. ﺑﺎﻩ ﺗﻮﺍ ﻧﺰﻟﻪ ﺍﺣﺴﻦ ﺣﺎﺟﻪ ﺳﺮﺍﻳﺮﻧﺎ ﺍﻛﺒﺎﺭ ﻳﺴﺪﻥ
ﺩﻧﻴﺎ .. ﺍﻫﺎ ﻳﺴﺪﻧﺎ
ﺍﻣﺠﺪ .. ﺍﻧﺎ ﻃﺎﻟﻊ ﺗﺒﻲ ﺣﺎﺟﻪ ﺗﻮﺍ
ﺩﻧﻴﺎ .. ﻻﻻ ﺳﻼﻣﺘﻚ ﺣﺒﻴﺒﻲ
ﺍﻣﺠﺪ ﻃﺒﺲ ﻋﻠﻴﻬﺎ ﻭﺑﺄﺱ ﺭﺍﺳﻬﺎ .. ﺍﻭﻛﻲ ﺳﻼﻡ ﺗﻮﺍ
ﺩﻧﻴﺎ ﺍﺑﺘﺴﻤﺖ .. ﺳﻼﻡ ﺭﺩ ﺑﺎﻟﻚ ﻣﻦ ﺭﻭﺣﻚ
ﺍﻣﺠﺪ .. ﺣﺎﺿﺮ "
" ﺳﻔﻴﺎﻥ .. ﻭﻳﻨﻚ ﺍﻣﺲ ﺭﻧﻴﺖ ﻋﻠﻴﻚ ﻣﺎﺗﺮﺩﻳﺶ
ﺭﺣﺎﺏ .. ﺍﻣﺲ ﻣﺎﻣﺎ ﺩﺍﺧﺖ ﻋﻠﻴﺎ ﻭﺍﻧﻔﺠﻌﺖ ﻭﻗﻌﺪﺕ ﻣﻌﺎﻫﺎ ﻣﺎﻗﺪﺭﺗﺶ ﻧﺴﻴﺒﻬﺎ ﻭﻣﻮﺑﺎﻳﻞ ﻑ ﺩﺍﺭ
ﺳﻔﻴﺎﻥ .. ﺍﻫﺎ ﺑﺎﻩ ﻻﺑﺄﺱ ﻋﻠﻴﻬﺎ ﻛﻨﻬﺎ
ﺭﺣﺎﺏ .. ﻫﺒﻂ ﻋﻠﻴﻬﺎ ﺍﻟﺴﻜﺮ ﻣﺎﺗﺨﺬﺵ ﻑ ﺍﻟﺤﺒﻮﺏ ﻭﺍﻧﺎ ﻗﻌﺪﺕ ﻣﻨﺸﻐﻠﻪ ﻋﻠﻴﻬﺎ ﻭﺍﺟﺪ ﻻﻧﻲ ﻣﺎﻧﻔﻀﺶ ﺩﻳﻤﺎ ﻧﻘﺮﺍ ﻭﻫﻜﻲ ﺿﺎﻳﻘﺖ ﺷﻮﻳﺎ ﻳﺎﺳﻔﻴﺎﻥ
ﺳﻔﻴﺎﻥ .. ﻋﻠﻴﺶ ﺗﻀﺎﻳﻘﻲ ﺑﺎﻟﻌﻜﺲ ﺍﻣﺲ ﺭﺑﻲ ﻳﺒﻲ ﻳﻮﺭﻳﻚ ﺍﻧﻚ ﻫﻤﻠﺘﻴﻬﺎ ﻭﻫﻴﺎ ﻣﺶ ﻣﻘﺼﺮﻩ ﻣﻌﺎﻙ
ﺭﺣﺎﺏ ﺗﻨﻬﺪﺕ .. ﺑﺎﻩ ﺍﻥ ﺷﺎﺀ ﺍﻟﻠﻪ ﺣﻨﻘﻌﺪ ﻭﺭﺍﻫﺎ ﺍﻣﺲ ﺧﻔﺖ ﻭﺍﺍﺟﺪ ﺑﻜﻞ ﺧﻔﺖ ﻧﻔﻘﺪﻫﺎ ﻭﺍﻟﻠﻪ ﻧﻤﻮﺕ ﺍﻧﺎ ﻫﻴﺎ ﻭﻋﺰﻭ ﺣﺎﺟﻪ ﻛﺒﻴﺮﻩ ﻋﻨﺪﻱ
ﺳﻔﻴﺎﻥ .. ﺑﻌﻴﺪ ﺳﻮﺀ ﻋﻠﻴﻬﺎ ﻣﺎﺗﺨﺎﻓﻴﺶ ﺳﻜﺮ ﺍﻟﻲ ﻫﺒﻂ ﺭﺍﻩ ﺣﺎﺟﻪ ﺑﺴﻴﻄﻪ ﻣﺎﺗﺰﻋﻠﻴﺶ ﺭﻭﺣﻚ
ﺭﺣﺎﺏ .. ﺣﺎﺿﺮ
ﺳﻔﻴﺎﻥ .. ﺷﻨﻮ ﻣﺎﻋﺪﻳﺘﻴﺶ ﻟﻤﻌﻬﺪ ﺍﻣﻼ
ﺭﺣﺎﺏ .. ﺍﻫﺎ ﻣﺎﻋﺪﻳﺘﺶ ﻣﺎﻋﻨﺪﻳﺶ ﻧﻴﻪ ﻏﻴﺮ ﻧﻌﺪﻱ ﻧﻘﻌﺪ ﻣﺶ ﻣﺮﻛﺰﻩ ﺧﻠﻴﻨﻲ ﻧﻘﻌﺪ ﻑ ﺍﻟﺤﻮﺵ ﻭﺧﻼﺹ
ﺳﻔﻴﺎﻥ .. ﺑﺎﻫﻲ ﺗﻤﺎﻡ ﺑﺲ ﻣﺶ ﺩﻳﻤﺎ ﺗﻘﻌﺪﻱ
ﺭﺣﺎﺏ .. ﺍﻥ ﺷﺎﺀ ﺍﻟﻠﻪ
ﺳﻔﻴﺎﻥ .. ﺗﻮﺍ ﻛﻨﺖ ﻑ ﻣﻌﺮﺽ ﺍﺛﺎﺙ ﺍﺧﺘﺮﺕ ﺩﺍﺭ ﺍﻟﻨﻮﻡ
ﺭﺣﺎﺏ .. ﺟﺪ ﺣﺒﻴﺒﻲ ﻭﺭﻳﻬﺎ ﻟﻴﺎ
ﺳﻔﻴﺎﻥ .. ﻻﻻ ﻫﺬﻱ ﺑﺎﻟﺬﺍﺕ ﻻ
ﺭﺣﺎﺏ .. ﻭﺭﺍﺳﻚ ﻋﻨﺪﻱ ﻭﺭﻳﻬﺎ ﻟﻴﺎ
ﺳﻔﻴﺎﻥ .. ﺗﺆﺗﺆ ﺗﻮﺍ ﺗﺸﻮﻓﻴﻬﺎ ﺑﻌﺪ ﺗﻮﺻﻠﻴﻨﻲ
ﺭﺣﺎﺏ ﺍﺑﺘﺴﻤﺖ .. ﺑﺎﻩ ﺍﻥ ﺷﺎﺀ ﺍﻟﻠﻪ ﺗﻮﺍ ﺧﻠﻴﻨﻲ ﺑﻨﻤﺸﻲ ﻧﺸﻮﻑ ﻣﺎﻣﺎ
ﺳﻔﻴﺎﻥ ﺗﻨﻬﺪ .. ﺍﻭﻛﻲ ﻧﺤﺒﻚ
ﺭﺣﺎﺏ .. ﻧﻤﻮﺕ ﻋﻠﻴﻚ ﺑﺎﻱ
ﺻﻜﺮﺕ ﻭﻗﻌﺪﺕ ﻣﺒﺘﺴﻤﻪ "
" ﺭﻳﻬﺎﻡ ﻧﺎﺿﺖ ﻗﺒﻞ ﺍﻧﺲ ﻭﻗﻌﺪﺕ ﻣﻘﻤﻌﺰﻩ ﻉ ﺳﺮﻳﺮ ﻭﺗﺒﺤﺖ ﻓﻴﻪ ﻣﺒﺘﺴﻤﻪ ﺑﻌﺪﻫﺎ ﻧﺎﺿﺖ ﺩﻭﺷﺖ ﻭﻃﻠﻌﺖ ﻟﺒﺴﺖ ﻭﺍﻧﺲ ﻣﺰﺍﻝ ﺭﺍﻗﺪ ﺟﺖ ﻗﻤﻌﺰﺕ ﻉ ﺳﺮﻳﺮ
ﺭﻳﻬﺎﻡ .. ﺍﻧﺲ ﻧﻮﺽ
ﺍﻧﺲ ﻳﺤﻂ ﻑ ﺍﻳﺪﻳﻪ ﻉ ﻭﺟﻪ
ﺭﻳﻬﺎﻡ .. ﺍﻧﺴﺲ ﻫﻴﺎ ﻧﻮﺽ
ﺍﻧﺲ ﻳﻌﻤﺶ
ﺭﻳﻬﺎﻡ ﺿﺤﻜﺖ .. ﺻﺒﺎﺍﺍﺡ ﺍﻟﺨﻴﺮ
ﺍﻧﺲ ﺍﺑﺘﺴﻢ ﻭﺑﺼﻮﺕ ﻣﺒﺤﻮﺡ .. ﺻﺒﺎﺡ ﺍﻟﺨﻴﺮﺍﺕ
ﺭﻳﻬﺎﻡ .. ﻫﻴﺎ ﻧﻮﺽ ﺩﺭﺕ ﻋﺮﻡ ﺣﺎﺟﺎﺕ ﻭﺍﻧﺖ ﺭﺍﻗﺪ
ﺍﻧﺲ ﺍﺑﺘﺴﻢ ﻭﻛﺮ ﺍﻳﺪﻫﺎ ﺑﺎﺱ ﺧﺪﻫﺎ .. ﻓﻲ ﺍﺣﻠﻰ ﻣﻦ ﻫﻜﻲ ﺻﺒﺎﺡ
ﺭﻳﻬﺎﻡ ﺍﺑﺘﺴﻤﺖ .. ﺑﺎﻩ ﻧﻮﺽ ﺩﻭﺵ ﻋﻠﻲ ﻣﺎﺩﺭﺕ ﻓﻄﻮﺭ
ﺍﻧﺲ ﻗﻤﻌﺰ ﻭﻣﺰﺍﻝ ﻳﻌﻤﺶ ﻑ ﻋﻴﻮﻧﻪ
ﺭﻳﻬﺎﻡ ﻗﺮﺑﺖ ﻣﻨﻪ ﻭﺣﻮﻟﺖ ﺷﻌﺮﻩ ﻣﻦ ﻉ ﻭﺟﻪ .. ﻫﻴﺎ ﻧﻮﺽ
ﺍﻧﺲ .. ﺑﺎﻩ ﻫﻮ ﻧﻀﺖ ﺧﻼﺹ ﻋﺪﻱ ﺍﻧﺘﻲ
ﺭﻳﻬﺎﻡ ﺻﺒﺖ .. ﺗﻤﺎﻡ ﺭﺍﻙ ﻃﻮﻝ
ﺍﻧﺲ .. ﺍﻭﻛﻲ ﺑﺎﻩ
ﻃﻠﻌﺖ ﺭﻳﻬﺎﻡ ﻣﻦ ﺩﺍﺭ ﻭﻗﻌﺪﺕ ﺗﻮﺗﻲ ﻑ ﺍﻟﻔﻄﻮﺭ ﻭﻫﻴﺎ ﻣﺒﺘﺴﻤﻪ ﻭﺗﻔﻜﺮ ﻑ ﻟﻴﻠﺘﻬﻢ ﺍﻣﺲ ﻛﻴﻒ ﻛﺎﻧﺖ
ﺍﻧﺲ ﺣﻀﻨﻬﺎ ﺑﻘﻮﻩ ﻣﻦ ﻻﻭﺭﻩ ﻟﻴﻦ ﺭﻳﻬﺎﻡ ﻧﻄﺖ .. ﻫﻬﻬﻬﻪ ﻓﻴﺶ ﻛﻨﺘﻲ ﺗﻔﻜﺮﻱ ﺑﻴﺶ ﺳﺎﺭﺣﻪ ﻫﻜﻲ
ﺭﻳﻬﺎﻡ ﺍﺑﺘﺴﻤﺖ .. ﻋﻠﻴﺶ ﺧﻮﻓﺘﻴﻨﻲ ﻫﻜﻲ ﻳﺎ ﺳﺎﻣﻂ
ﺍﻧﺲ .. ﺷﻔﺘﻚ ﻣﺒﺘﺴﻤﻪ ﻭﻣﺶ ﻣﺮﻛﺰﻩ ﺣﺒﻴﺖ ﻧﺨﻮﻓﻚ ﻣﺎﻗﻠﺘﻴﻠﻴﺶ ﻓﻴﺶ ﻛﻨﺘﻲ ﺗﻔﻜﺮﻱ
ﺭﻳﻬﺎﻡ ﺗﻨﻬﺪﺕ .. ﺷﻲ ﻫﻜﻲ ﻓﺮﺣﺎﻧﻪ ﻭﺧﻼﺹ ﺍﻧﺎ
ﺍﻧﺲ ﺿﺤﻚ .. ﺑﺎﻩ ﺗﻤﺎﻡ ﺭﺑﻲ ﻳﺪﻭﻡ ﻋﻠﻴﻨﺎ
ﺭﻳﻬﺎﻡ ﺗﻬﺰ ﻑ ﺟﺴﻤﻬﺎ .. ﺍﻥ ﺷﺎﺀ ﺍﻟﻠﻪ
ﺍﻧﺲ ﺯﺍﺩ ﺣﻀﻨﻬﺎ ﺑﻘﻮﻩ .. ﺑﻄﻠﻲ ﻫﺰ
ﺭﻳﻬﺎﻡ ﺗﻀﺤﻚ .. ﺑﺎﻩ ﺣﺘﻜﺴﺮ ﺿﻠﻮﻋﻲ ﺭﺍﻩ
ﺍﻧﺲ ﺑﺎﺱ ﺭﻗﺒﺘﻬﺎ ﺑﻬﺪﻭﺀ .. ﻋﺎﺩﻱ ﺣﻘﻲ
ﺭﻳﻬﺎﻡ .. ﻋﻨﺠﺪ ﺣﻘﻲ ﺍﻳﻴﻲ ﺑﺸﻮﻳﺶ
ﺍﻧﺲ .. ﺑﺎﻩ ﻫﺎﻩ ﺭﺧﻴﺖ ﻛﻮﻳﺲ ﺗﻮﺍ
ﺭﻳﻬﺎﻡ ﺍﺑﺘﺴﻤﺖ .. ﺗﻤﺎﻡ ﺧﻼﺹ ﺍﻃﻠﻘﻨﻲ ﺧﻠﻴﻨﻲ ﻧﺤﻂ ﺍﻟﻔﻄﻮﺭ
ﺍﻧﺲ ﻃﻠﻘﻬﺎ ﻭﺧﺮ ﻭﻫﻴﺎ ﺻﺒﺖ ﺍﻟﺤﻠﻴﺐ
ﺭﻳﻬﺎﻡ .. ﺗﻔﻀﻞ
ﺍﻧﺲ .. ﻳﺎ
ﺭﻳﻬﺎﻡ ﺿﺤﻜﺖ .. ﻳﺎﺍﻧﺲ
ﺍﻧﺲ .. ﺗﺆ ﻳﺎ ﻣﻦ
ﺭﻳﻬﺎﻡ .. ﺍﻣﻤﻤﻤﻢ ﻳﺎﻧﻮﺳﻲ
ﺍﻧﺲ ﺍﺑﺘﺴﻢ ﻭﻫﺰ ﺭﺍﺳﻪ .. ﺣﺘﻰ ﻫﻜﻲ ﺭﺍﺿﻲ ﺑﻴﻬﺎ ﺗﻌﺎﻟﻲ ﻫﻴﺎ ﻗﻤﻌﺰﻱ
ﺟﺖ ﻗﻤﻌﺰﺕ ﺗﻼﻩ ﻭﻗﻌﺪﻭ ﻳﻔﻄﺮﻭ ﻭﻳﻬﺪﺭﺯﻭ
ﻟﻴﺲ ﺍﻟﺤﺐ ﻟﻠﺤﺒﻴﺐ ﺍﻷﻭﻝ !
ﺇﻧﻤﺎ ﺍﻟﺤﺐ ﻟﻤﻦ ﻭﻋﺪ ﻭ ﻭﻓﻰَ .. ﻭﻣﻦ ﺇﺫﺍ ﻧﺎﺩﻳﺘﻪ ﺃﺗﻰَ ..
ﻭﻣﻦ ﺃﻋﻄﻰَ ﺩﻭﻥ ﻃﻠﺐ ،، ﺇﻧﻤﺎ ﺍﻟﺤﺐ ﻟﻤﻦ ﻳﺴﺘﺤﻖ "
" ﻣﺮﺭﺕ ﻓﺘﺮﻩ ﺍﺳﺒﻮﻋﻴﻦ ﻫﻜﻲ ﻭﺧﺸﻴﻨﺎ ﻑ ﺷﻬﺮ ﺍﺭﺑﻌﻪ ﻛﺎﻥ ﺟﻮ ﺣﻠﻮ ﻭﺻﺎﻓﻲ ﻃﺒﻌﺎً ﺍﻣﺠﺪ ﻣﺎﺩﺍﺭﺵ ﺍﺳﺒﻮﻉ ﻭﺯﻋﻮ ﻟﺤﻢ ﺑﺲ
ﺍﻳﻬﻢ .. ﺷﻦ ﺩﻳﺮﻱ
ﺍﻧﺎ .. ﻧﺘﻔﺮﺝ ﻉ ﺻﻮﺭﻧﺎ ﺷﻮﻑ ﻣﺤﻼﻫﻦ
ﺍﻳﻬﻢ ﺍﺑﺘﺴﻢ .. ﺍﻫﺎ ﺣﻠﻮﺍﺕ ﺑﻜﻞ ﻭﺳﻦ ﻭﻳﻦ
ﺍﻧﺎ .. ﺗﺠﺮﻱ ﺑﺎﻟﻤﺸﺎﺉ ﺟﺎﻱ ﻭﻏﺎﺩﻱ ﺗﻮﺍ ﻛﺎﻧﺖ ﻫﻨﺎ ﺍﻛﻴﺪﻩ ﺧﺸﺖ ﻟﻠﻤﻤﺮ
ﺍﻳﻬﻢ ﺿﺤﻚ .. ﺧﻠﻴﻬﺎ ﻋﺎﻳﺸﻪ ﻟﺤﻈﺘﻬﺎ
ﺍﻧﺎ .. ﺍﻫﻲ ﺟﺖ ﺗﺠﺮﻱ
ﺟﺖ ﻋﻨﺪ ﺍﻳﻬﻢ ﻭﺗﺮﻓﻊ ﻑ ﺍﻳﺪﻳﻬﺎ
ﺷﻤﺮﻫﺎ ﺍﻳﻬﻢ ﻑ ﺍﻳﺪﻩ
ﺍﻳﻬﻢ .. ﻣﺶ ﺍﻟﻴﻮﻡ ﺑﺘﻤﺸﻲ ﺍﻟﻬﻠﻚ
ﺍﻧﺎ .. ﺷﻮﻳﺎ ﻭﻧﺼﺒﻲ ﻧﻮﺗﻲ ﺭﻭﺣﻲ
ﺍﻳﻬﻢ .. ﻣﻴﺴﻲ
ﺍﻧﺎ .. ﻧﻌﻢ ﻳﺎﻋﻤﺮﻱ
ﺍﻳﻬﻢ .. ﻣﺎﺗﺒﻴﺶ ﻣﺎﻧﻊ
ﺍﻧﺎ .. ﻋﻠﻴﺶ ﺍﻧﺖ ﺗﺒﻲ ﻣﺎﻧﻊ
ﺍﻳﻬﻢ .. ﻻ ﻋﺎﺩﻱ ﺑﺲ ﺗﻮﻗﻌﺘﻚ ﺗﻘﻮﻟﻲ ﺗﺒﻲ ﻣﺎﻧﻊ
ﺍﻧﺎ .. ﻻ ﻻ ﺧﻠﻴﻨﻲ ﻫﻚ ﺑﻴﻤﺎ ﺍﻧﻪ ﻧﺮﺿﻊ ﻳﻘﻮﻟﻮ ﻣﺎﻧﻊ ﻃﺒﻴﻌﻲ ﻭﺗﻮﺍ ﺟﺎﻣﻌﻪ ﻣﺼﻜﺮﻩ ﻛﺎﻥ ﺣﻤﻠﺖ ﻋﺎﺩﻱ ﻭﺳﻦ ﻛﺒﺮﺕ ﻋﻤﺮﻫﺎ ﺳﺖ ﺷﻬﻮﺭ
ﺍﻳﻬﻢ .. ﺻﺎﺡ ﺍﻫﺎ ﻟﻌﻨﺪ ﻣﺎ ﺗﺠﻴﺒﻲ ﺗﻘﻌﺪ ﻣﺼﻜﺮﻩ ﺳﻨﻪ
ﺍﻧﺎ .. ﻛﻨﻚ ﻳﺎﺍﻳﻬﻢ ﺣﺴﻴﺘﻚ ﻣﺎﺗﺒﻴﺶ
ﺍﻳﻬﻢ .. ﻻ ﻋﻠﻴﺶ ﻧﺒﻲ ﻧﻜﺮﻩ ﻛﻨﻚ ﺯﻋﻠﺘﻲ
ﺍﻧﺎ .. ﻣﺎﺯﻋﻠﺘﺶ ﺑﺲ ﺍﻧﺖ ﺭﺍﻳﺢ ﻫﺎﻣﻠﻨﻲ ﻭﺍﺟﺪ
ﺍﻳﻬﻢ ﻗﺮﺏ ﻣﻨﻲ ﻭﻣﺴﻚ ﺍﻳﺪﻱ .. ﻣﻌﻘﻮﻟﻪ ﻫﺎﻣﻠﻚ ﻳﺎ ﻋﻤﺮﻱ
ﺍﻧﺎ ﺗﻨﻬﺪﺕ .. ﺍﻫﺎ ﻫﺎﻣﻠﻨﻲ ﻣﻌﺶ ﺩﻭﺭ ﻓﻴﺎ ﻭﺍﺟﺪ
ﺍﻳﻬﻢ .. ﺣﺮﺍﻡ ﻋﻠﻴﻚ ﺑﺲ ﻣﻤﻜﻦ ﻣﻦ ﻋﻤﻞ ﻣﻌﺶ ﻧﺴﻬﺮ ﻣﻌﺎﻙ ﻭﺍﺟﺪ
ﺍﻧﺎ .. ﻣﺶ ﻋﺎﺭﻓﻪ
ﺍﻳﻬﻢ .. ﻛﻨﻚ ﻣﻴﺲ
ﺍﻧﺎ .. ﺷﻲ ﻳﺎﺍﻳﻬﻢ ﻛﻨﺖ ﻧﺒﻴﻚ ﺗﻔﻄﻦ ﺑﺮﻭﺣﻚ ﺑﺲ ﻣﺎﻓﻄﻨﺘﺶ
ﺍﻳﻬﻢ .. ﺣﻘﻚ ﻋﻠﻴﺎ ﺑﺎﻩ
ﺍﻧﺎ ﺑﺮﻣﺖ ﺣﻀﻨﺘﻪ
ﺍﻳﻬﻢ ﺑﺎﺱ ﻛﺘﻔﻲ .. ﺻﺒﻲ ﻏﻴﺮﻱ ﻫﻴﺎ ﻭﻗﺖ ﻋﻠﻴﻚ
ﺍﻧﺎ .. ﺑﺎﻩ ﻣﺎﺷﻴﺎ ﻫﻲ
ﺍﻳﻬﻢ .. ﻭﺳﻦ
ﺍﻧﺎ .. ﺧﻠﻴﻬﺎ ﺗﻮﺍ ﻧﻐﻴﺮﻟﻬﺎ ﺑﻌﺪ ﻧﻐﻴﺮ
ﺧﺸﻴﺖ ﻟﺪﺍﺭ ﻟﺒﺴﺖ ﻭﻏﻴﺮﺕ ﻟﻮﺳﻦ ﻭﻃﻠﻌﻨﺎ
ﺍﻳﻬﻢ .. ﺑﺤﺘﻲ ﻛﻴﻒ ﺗﻨﻂ
ﺍﻧﺎ ﺿﺤﻜﺖ .. ﺑﻄﻴﺮ ﺷﻮﻳﺎ ﺃﺧﺮﻯ ﺍﻫﻤﺪﻱ ﻳﺎﺑﻨﺖ
ﺍﻳﻬﻢ .. ﺧﻠﻴﻬﺎ
ﺍﻧﺎ .. ﻛﺎﻥ ﺗﺸﻮﻓﻬﺎ ﺑﻌﺪ ﺗﺸﻮﻑ ﻋﺰﻭ ﻋﻠﻴﻚ ﺳﻌﺎﺩﻩ
ﺍﻳﻬﻢ ﺿﺤﻚ .. ﻫﺎﺑﺎ ﻋﻠﻴﻬﺎ ﺍﻟﻔﺮﺧﻪ ﻣﻦ ﺗﻮﺍ
ﺍﻧﺎ .. ﺧﻄﻴﺮﻩ ﺑﻜﻞ
ﺍﻳﻬﻢ .. ﻧﺰﻟﻲ ﻫﻲ ﺍﻣﺘﻰ ﻧﺠﻴﻚ
ﺍﻧﺎ .. ﺗﻮﺍ ﻧﻜﻠﻤﻚ ﺍﻧﺎ
ﺍﻳﻬﻢ .. ﺗﻢ ﻫﻴﺎ ﺑﺎﻱ ﻳﺎﺑﺎﺑﺎ
ﺍﻧﺎ ﻣﺴﻜﺖ ﺍﻳﺪ ﻭﺳﻦ ﻭﺣﺮﻛﺘﻬﺎ .. ﺑﺎﻱ ﻳﺎ ﺑﺎﺑﺎ
ﺻﻜﺮﺕ ﺍﻟﺒﺎﺏ ﻭﻣﺸﻴﺖ ﻟﺒﺎﺏ ﺩﻗﻴﺖ ﻭﻓﺘﺤﻠﻲ ﻋﺰﻭ
ﻋﺰﻭ .. ﺧﻴﺮ ﻳﺎﺧﺎﻟﻮ ﺧﻴﺮ ﻳﻨﻌﻠﻲ ﻣﻦ ﺍﻟﺤﻤﻮﺭﻱ
ﺍﻧﺎ .. ﻋﻠﻴﻚ ﻓﺮﺣﻪ ﺑﻄﻴﺮ
ﻋﺰﻭ ﺭﻓﻌﻬﺎ ﻓﻮﻕ ﻭﻫﻴﺎ ﺗﻀﺤﻚ ﻭﺗﻨﺎﻏﻲ
ﻋﺰﻭ .. ﺷﻨﺠﻮﻙ
ﺍﻧﺎ .. ﺗﻤﺎﻡ ﺍﻟﺤﻤﺪ ﺍﻟﻠﻪ ﺟﻦ ﺍﻟﺒﻨﺎﺕ
ﻋﺰﻭ .. ﺟﻦ ﺍﻫﺎ ﻣﻦ ﻧﺒﺪﺭﻱ
ﺍﻧﺎ .. ﺑﺎﻩ ﺗﻤﺎﻡ
ﺧﺸﻴﺖ ﻟﺤﻮﺵ
ﺍﻧﺎ .. ﺍﻟﺴﻼﻡ ﻋﻠﻴﻜﻢ
ﻛﻠﻬﻦ .. ﻭﻋﻠﻴﻜﻢ ﺍﻟﺴﻼﻡ
ﻣﺎﻣﺎ .. ﻭﻳﻨﻚ ﻃﻮﻟﺘﻲ
ﺍﻧﺎ .. ﻫﺬﻙ ﻫﻮ ﻳﺎ ﻣﺎﻣﺎ ﺷﻨﺠﻮﻛﻦ
ﺭﺷﺎ & ﺭﻳﻬﺎﻡ .. ﺗﻤﺎﻡ
ﺍﻧﺎ .. ﺭﺣﺎﺏ ﻭﻳﻦ
ﻋﺰﻭ ﻳﺒﻮﺱ ﻑ ﻭﺳﻦ .. ﻑ ﻣﻌﻬﺪ ﻋﻼﺀ ﻣﺸﺎﺀ ﻳﺠﻴﺐ ﻓﻴﻬﺎ
ﺭﺷﺎ .. ﻋﻄﻴﻬﺎ ﻟﻴﺎ ﻫﻠﻲ ﻻﺑﺴﻪ ﺍﺣﻤﺮ ﻫﺬﻱ
ﺭﻳﻬﺎﻡ .. ﺧﻼﺹ ﻣﻌﺶ ﺣﺪ ﻳﻠﺒﺲ ﺍﺣﻤﺮ ﻧﺠﻴﻬﺎ ﻛﻴﻒ ﺗﻀﺤﻚ
ﺍﻧﺎ .. ﺑﻠﻌﻮﻃﻪ ﺩﺭﺟﻪ ﺍﻭﻟﻰ
ﻣﺎﻣﺎ .. ﺧﻠﻴﻬﺎ ﻳﺎﺧﻴﻪ
ﺭﻳﻬﺎﻡ ﻣﺴﻜﺘﻬﺎ ﻭﻗﻌﺪﺕ ﺗﺒﻮﺱ ﻓﻴﻬﺎ .. ﻣﺰﺍﻟﺖ ﻧﺴﺨﻪ ﺭﺷﺎ
ﺭﺷﺎ .. ﻳﻨﻌﻠﻲ ﺧﻠﻴﻬﺎ ﻛﻴﻒ ﺧﺎﻟﺘﻬﺎ
ﻋﺰﻭ ﺻﺒﻰ .. ﺑﺎﻩ ﺍﻧﺎ ﻃﺎﻟﻊ ﺗﺒﻮ ﺣﺎﺟﻪ ﺗﻮﺍ
ﻣﺎﻣﺎ .. ﺳﻼﻣﺘﻚ ﺑﺲ
ﻋﺰﻭ .. ﻫﻲ ﻣﻊ ﺳﻼﻣﻪ
ﻃﻠﻊ ﻋﺰﻭ ﻣﻦ ﺗﻼﻧﺎ
ﻣﺎﻣﺎ .. ﺷﻦ ﺩﺍﻳﺮﻩ ﻳﺎﻫﻮﻣﺎ
ﺭﻳﻬﺎﻡ ﺍﺑﺘﺴﻤﺖ .. ﺍﻟﺤﻤﺪ ﺍﻟﻠﻪ ﺗﻤﺎﻡ ﺑﻜﻞ
ﻣﺎﻣﺎ .. ﺑﺎﻩ ﺍﻟﺤﻤﺪﺍﻟﻠﻪ ﺭﺑﻲ ﻳﻬﻨﻴﻚ
ﺭﻳﻬﺎﻡ .. ﺍﻥ ﺷﺎﺀ ﺍﻟﻠﻪ
ﻣﺎﻣﺎ .. ﺷﻨﻮ ﻳﺎﺍﺭﺷﻴﻮﻩ ﻣﺎﻓﻴﺶ ﺣﺎﺟﻪ ﻑ ﺍﻟﻄﺮﻳﻖ
ﺭﺷﺎ .. ﻻﻻ ﺍﻟﻔﺘﺮﻩ ﺍﻟﻲ ﻓﺎﺗﺖ ﻗﻌﺪﺕ ﻧﺤﺲ ﻑ ﺍﻋﺮﺍﺽ ﺍﻟﺤﻤﻞ ﺑﺲ ﺩﺭﺕ ﺍﺧﺘﺒﺎﺭ ﺍﻟﻤﻨﺰﻟﻲ ﻃﻠﻊ ﺳﻠﺒﻲ
ﻣﺎﻣﺎ .. ﺑﺎﻩ ﺍﻥ ﺷﺎﺀ ﺍﻟﻠﻪ ﺭﺑﻲ ﻳﺴﺨﺮﻟﻚ
ﺭﺷﺎ .. ﺑﺲ ﻳﺎﻣﺎﻣﺎ ﻣﺰﺍﻟﺖ ﻧﺪﻭﺥ ﻭﺗﻘﻌﺪ ﺗﺠﻴﻨﻲ ﻛﺒﻮﻩ ﺣﺎﺭﻩ ﺗﺮﻛﺐ ﻣﻌﺎﻳﺎ ﻓﺠﺎﺀ ﻭﺗﺎﺧﺮﺕ ﻋﻠﻴﺎ ﻭﺍﺟﺪ
ﻣﺎﻣﺎ .. ﺷﻮﻓﻲ ﺍﻟﻤﺨﺘﺒﺮ ﺍﻟﺨﻴﺮ ﻣﺮﺍﺕ ﻳﺒﻠﺪ ﺍﻟﻤﻨﺰﻟﻲ
ﺭﻳﻬﺎﻡ .. ﺍﻫﺎ ﻣﻌﺎﻫﺎ ﺣﻖ ﺷﻮﻓﻲ ﺍﻟﻤﺨﺘﺒﺮ ﺧﻴﺮ
ﺍﻧﺎ .. ﺗﺴﺘﻔﺮﻏﻲ ﺑﺎﻩ
ﺭﺷﺎ .. ﻣﺮﺗﻴﻦ ﻣﻤﻜﻦ ﻭﻻ ﺗﻼﺗﻪ
ﻣﺎﻣﺎ .. ﻻ ﻣﻌﻨﺎﻫﺎ ﺣﺎﻣﻞ ﺷﻮﻓﻲ ﺍﻟﻤﺨﺘﺒﺮ
ﺭﺷﺎ ﺍﺑﺘﺴﻤﺖ .. ﺍﺯﻋﻤﻚ ﻳﺎﻣﺎﻣﺎ ﺣﺘﻰ ﺍﻧﺎ ﻧﻘﻮﻝ ﺍﻋﺮﺍﺽ ﺣﻤﻞ ﺑﺲ ﻣﺎﻧﺒﻴﺶ ﻧﻮﻫﻢ ﺭﻭﺣﻲ
ﺭﻳﻬﺎﻡ .. ﻻ ﻋﺪﻱ ﺑﻜﺮﺍ ﺷﻮﻓﻲ ﺭﻭﺣﻚ
ﺭﺷﺎ .. ﺍﻥ ﺷﺎﺀ ﺍﻟﻠﻪ ﺗﻮﺍ ﻧﻌﺪﻱ
ﺍﻧﺎ ﺣﻄﻴﺖ ﻭﺳﻦ ﻑ ﻣﺸﺎﺉ .. ﺍﻛﻴﺪﻩ ﺣﺎﻣﻞ ﺍﻥ ﺷﺎﺀ ﺍﻟﻠﻪ ﻧﺸﻮﻓﻚ ﻣﺎﻣﺎ
ﺭﺷﺎ .. ﺍﻥ ﺷﺎﺀ ﺍﻟﻠﻪ ﻳﺎﺭﺏ
ﻣﺎﻣﺎ .. ﻭﻋﻘﺒﺎﻝ ﻫﻮﻣﺎ
ﺭﻳﻬﺎﻡ .. ﺍﻥ ﺷﺎﺀ ﺍﻟﻠﻪ ﺣﺘﻰ ﺍﻧﺎ
ﻣﺎﻣﺎ .. ﺭﺑﻲ ﻳﺴﺨﺮﻟﻜﻦ
ﺍﻧﺎ .. ﺣﺪﺩﺗﻮ ﺍﻟﻌﺮﺱ
ﻣﺎﻣﺎ .. ﻳﻮﻡ 5\13 ﺍﻥ ﺷﺎﺀ ﺍﻟﻠﻪ
ﺍﻧﺎ .. ﺣﺼﻠﺘﻮ ﺻﺎﻟﻪ
ﻣﺎﻣﺎ .. ﺍﻫﺎ ﻫﺪﻳﻪ ﻣﻦ ﺻﺎﺣﺐ ﻋﺰﻭ
ﺍﻧﺎ .. ﺑﺎﻫﻲ ﺭﺑﻲ ﻳﻬﻨﻴﻪ ﺍﻥ ﺷﺎﺀ ﺍﻟﻠﻪ
ﺭﺷﺎ .. ﺷﻦ ﻣﺰﺍﻝ ﻑ ﺣﺎﺟﺎﺕ ﺍﻟﺴﻴﺎﻕ
ﻣﺎﻣﺎ .. ﻣﺶ ﻭﺍﺟﺪ ﺣﺎﺟﺎﺕ ﻗﺮﻳﺐ ﻧﻜﻤﻠﻪ
ﺭﻳﻬﺎﻡ .. ﺑﺎﻩ ﺗﻤﺎﻡ ﻭﺷﻘﺘﻪ
ﻣﺎﻣﺎ .. ﻻ ﻛﻤﻠﻬﺎ ﺗﻮﺍ ﺗﺮﻛﺒﻦ ﺑﻌﺪﻳﻦ ﺗﻔﺮﺟﻦ ﻣﺸﺎﺀﺍﻟﻠﻪ ﺗﺤﻞ ﺍﻟﻌﻴﻦ ﺍﻟﻤﻐﻤﻀﻪ
ﺍﻧﺎ .. ﺍﻟﺤﻤﺪ ﺍﻟﻠﻪ ﺍﻥ ﺷﺎﺀ ﺍﻟﻠﻪ ﻳﺘﻬﻨﻰ ﻣﻌﺎﻫﺎ ﻋﺰﻭ ﻳﺴﺘﺎﻫﻞ ﻛﻞ ﺍﻟﺨﻴﺮ
ﻣﺎﻣﺎ .. ﺍﻳﻮﺍ ﻟﻠﻪ ﻋﺰﻭ ﻳﺴﺘﺎﻫﻞ ﺭﺑﻲ ﻳﻔﺮﺣﻨﻲ ﺑﻴﻪ
ﺭﺷﺎ ﺍﺑﺘﺴﻤﺖ .. ﺍﻟﺤﻮﺵ ﻫﺬﺍ ﻣﻦ ﺧﺸﻴﻨﺎﻩ ﻭﻫﻮ ﻭﺟﻪ ﺧﻴﺮ ﻋﻠﻴﻨﺎ
ﺭﻳﻬﺎﻡ ﺍﺑﺘﺴﻤﺖ .. ﻣﺶ ﻏﻴﺮ ﺧﻴﺮ ﺍﻟﺤﻤﺪ ﺍﻟﻠﻪ
ﺍﻧﺎ ﺑﺤﺘﺖ ﻓﻴﻬﺎ ﻭﺍﺑﺘﺴﻤﺖ
ﺭﺷﺎ ﺻﺒﺖ .. ﺭﺣﺎﺏ ﺷﻜﻠﻬﺎ ﻣﻄﻮﻟﻪ ﺧﻠﻲ ﻧﺪﻳﺮﻭ ﻗﻬﻮﺗﻨﺎ ﻧﺤﻦ
ﺍﻧﺎ ﺻﺒﻴﺖ .. ﺍﻫﺎ ﺷﻜﻠﻬﺎ ﺗﻮﺍ ﻧﺨﺶ ﻣﻌﺎﻙ
ﺧﺸﻴﺖ ﺍﻧﺎ ﻭﺭﺷﺎ ﻟﻜﻮﺟﻴﻨﻪ
ﺭﺷﺎ .. ﺑﺎﻳﻦ ﻗﻌﺪﺕ ﺗﺤﺒﻪ
ﺍﻧﺎ .. ﻳﺎ ﻋﻤﺮﻱ ﺍﻫﺎ ﻭﺍﺿﺢ ﻣﻦ ﻛﻼﻣﻬﺎ ﻭﻛﻴﻒ ﺗﺒﺘﺴﻢ
ﺭﺷﺎ .. ﺭﺑﻲ ﻳﻬﻨﻴﻨﻬﺎ ﺗﻮﺍ ﺍﻧﺎ ﺑﻜﺮﺍ ﺧﺎﻳﻔﻪ ﻧﻤﺸﻲ ﻟﻠﻤﺨﺘﺒﺮ ﻭﻧﻠﻘﻰ ﺳﻠﺒﻲ ﻣﺎﻧﺒﻴﺶ ﻧﻜﺪ ﻉ ﻣﺤﻤﺪ
ﺍﻧﺎ .. ﺑﺎﻩ ﻗﻮﻟﻴﻠﻪ ﺑﻨﻌﺪﻱ ﺍﻟﺪﻛﺘﻮﺭﻩ ﺑﻜﺮﺍ ﻣﺎﺳﻜﻪ ﺩﻛﺘﻮﺭﺗﻲ
ﺭﺷﺎ .. ﺻﺎﺡ ﺍﺯﻋﻤﻚ ﻧﻘﻮﻟﻪ ﺑﻨﺸﻮﻑ ﺭﻭﺣﻲ
ﺍﻧﺎ .. ﺍﻫﺎ ﻗﻮﻟﻴﻠﻪ ﻫﻜﻲ ﺧﻴﺮ ﻭ ﻫﻴﺎ ﺗﺸﻮﻓﻚ
ﺭﺷﺎ .. ﺑﺎﻩ ﺍﻥ ﺷﺎﺀ ﺍﻟﻠﻪ ﺧﻴﺮ
ﺍﻧﺎ .. ﺍﻥ ﺷﺎﺀ ﺍﻟﻠﻪ
ﺩﺭﻧﺎ ﻗﻬﻮﻩ ﻭﺭﻳﻬﺎﻡ ﺩﺍﻳﺮﻩ ﺩﻭﻧﺎﺕ ﺣﻄﻴﻨﺎﻩ ﻣﻊ ﺍﻟﻘﻬﻮﻩ ﻭﺟﺖ ﺭﺣﺎﺏ
ﺭﺣﺎﺏ .. ﻳﻨﻌﻠﻲ ﺩﻭﻧﺎﺕ ﻧﺤﺒﻪ ﺑﻜﻞ
ﺭﻳﻬﺎﻡ .. ﺻﺤﻪ ﻗﺒﻞ ﻛﻨﺖ ﺑﻨﺪﻳﺮ ﺳﻨﺎﺑﻮﻥ ﺍﻧﺲ ﻗﺎﻟﻲ ﺩﻳﺮﻟﻲ ﺩﻭﻧﺎﺕ ﺧﺎﻃﺮﻱ ﻓﻴﻪ
ﻣﺎﻣﺎ .. ﻋﻘﺒﺘﻴﻠﻪ
ﺭﻳﻬﺎﻡ .. ﺍﻫﺎ ﻋﻘﺒﺘﻠﻪ ﻣﻨﻪ
ﺭﺣﺎﺏ .. ﻭﺍﻧﺘﻦ ﺷﻦ ﺩﺭﺗﻦ
ﺍﻧﺎ .. ﺻﻔﻴﺤﻪ ﺗﻬﺒﻞ ﺗﻮﺍ ﺗﺬﻭﻗﻴﻬﺎ
ﺭﺷﺎ .. ﺑﻴﺘﺰﺍ
ﺭﺣﺎﺏ .. ﻣﺸﺎﺀ ﺍﻟﻠﻪ ﺳﻠﻤﻜﻦ ﺟﺎﻳﺒﺎﺕ ﻗﺒﻞ ﻻ ﻧﻌﺪﻱ ﺩﺭﺕ ﻓﻄﺎﻳﺮ
ﺍﻧﺎ .. ﺍﻫﺎ ﺷﻔﺘﻬﻦ ﺷﻜﻠﻬﻦ ﺳﻤﺢ
ﺭﺷﺎ .. ﺷﻦ ﻏﺪﺍﻛﻢ ﺑﺎﻩ
ﺭﺣﺎﺏ .. ﻣﻜﺮﻭﻧﻪ ﺍﻧﺎ ﻃﻴﺒﺖ
ﺭﻳﻬﺎﻡ .. ﻣﺸﺎﺀﺍﻟﻠﻪ ﻳﺎﺣﻮﺑﺎ ﺭﺍﻳﺤﻪ ﺗﺤﻮﺳﻲ
ﻣﺎﻣﺎ .. ﻣﻦ ﻳﺒﻲ ﻳﻨﻬﻀﻨﻲ ﻛﺎﻥ ﻫﺬﺍ ﻻﻗﻴﺘﻬﺎ ﻛﻴﻒ ﺍﻟﺪﻭﺍﺀ ﺗﺤﻮﺱ ﻫﻨﺎ ﻭﻫﻨﺎ ﻭﻣﺮﻩ ﺩﻳﺮ ﺍﻟﻐﺪﺍﺀ ﻭﺗﻌﺪﻱ ﻟﻤﻌﻬﺪ ﻭﺗﻘﺮﺍ ﺭﺑﻲ ﻳﻮﻓﻘﻬﺎ
ﺭﺣﺎﺏ ﺍﺑﺘﺴﻤﺖ
ﺍﻧﺎ .. ﻧﺠﻴﻬﺎ ﻛﺒﺮﺕ ﺣﻮﺑﺎ ﺍﻣﺘﻰ ﺍﻣﺘﺤﺎﻧﺎﺕ
ﺭﺣﺎﺏ .. ﻋﺪﺍ ﺍﻋﻠﻴﻮﻩ ﻟﻠﻤﺪﺭﺳﻪ ﻭﺟﺎﺑﻠﻲ ﻣﺬﻛﺮﺍﺕ ﺩﺍﻳﺮﻥ ﻧﻈﺎﻡ ﻣﺬﻛﺮﺍﺕ ﻧﻘﺮﻭﻫﻦ ﻭﻫﻨﺎ ﺍﻟﻲ ﻳﺨﺸﻦ ﻑ ﺍﻣﺘﺤﺎﻥ
ﺭﺷﺎ .. ﺑﺎﻩ ﻛﻮﻳﺲ ﺑﺪﻳﺘﻲ ﺗﻘﺮﻱ ﻓﻴﻬﻦ
ﺭﺣﺎﺏ .. ﺍﻫﺎ ﻣﺮﻩ ﻣﺮﻩ ﻧﻘﺮﺍ ﻓﻴﻬﻦ ﻣﺰﺍﻝ ﺑﺲ ﺍﻣﺘﺤﺎﻧﺎﺕ ﻑ ﺷﻬﺮ 8
ﺭﻳﻬﺎﻡ .. ﺍﻫﺎ ﻣﺰﺍﻝ ﺑﺪﺭﻱ
ﺍﻧﺎ .. ﺑﺎﻩ ﺍﻥ ﺷﺎﺀ ﺍﻟﻠﻪ ﺑﺎﻟﻨﺠﺎﺡ
ﻣﺎﻣﺎ .. ﺟﺎﻣﻌﺘﻜﻦ ﻣﺰﺍﻝ ﺍﻧﺘﻦ
ﺍﻧﺎ .. ﻣﺰﺍﻟﺖ ﻣﺼﻜﺮﻩ ﺍﻧﻈﺮ ﺍﻣﺘﻰ ﺗﻔﺘﺢ ﺍﻳﻬﻢ ﻗﺎﻟﻲ ﻧﺤﻄﻚ ﻑ ﻣﻌﻬﺪ ﺑﺲ ﻣﺎﻋﻨﺪﻳﺶ ﻧﻴﻪ ﻧﺒﻲ ﻧﺒﺪﺍ ﻣﻊ ﺩﻓﻌﺘﻲ ﺧﻴﺮ
ﺭﺷﺎ .. ﺻﺎﺡ ﺍﺑﺪﻱ ﻣﻌﺎﻫﻢ ﺧﻴﺮﻟﻚ
ﺭﺣﺎﺏ .. ﺗﻌﺎﻟﻲ ﻭﺍﻧﺘﻲ ﺗﺠﺮﻱ ﺟﺎﻱ ﻭﻏﺎﺩﻱ
ﻣﺎﻣﺎ .. ﻛﺎﻥ ﻧﻄﻠﻌﻮ ﻧﻔﺮﺷﻮ ﺑﺮﺍ ﺣﺘﻰ ﺗﺎﺧﺬ ﺭﺍﺣﺘﻬﺎ ﻑ ﺍﻟﺠﺮﻱ
ﺭﻳﻬﺎﻡ .. ﺻﺎﺡ ﺧﻠﻴﻨﺎ ﺑﺮﺍ ﺍﻟﺠﻮ ﺣﻠﻮ
ﺭﺣﺎﺏ ﺻﺒﺖ ﻭﺷﺎﻟﺖ ﺻﻔﺮﻩ .. ﺍﻃﻠﻌﻮ ﻋﻠﻲ ﻣﺎﻏﺴﻠﺖ ﺍﻟﻤﻮﺍﻋﻴﻦ
ﺍﻧﺎ .. ﻭﻳﻦ ﺍﻟﻔﺮﺷﻪ
ﻣﺎﻣﺎ .. ﻣﺤﻄﻮﻃﻪ ﻑ ﺍﻟﺨﺰﻳﻦ ﺟﻮﺍ
ﺍﻧﺎ .. ﺗﻮﺍ ﻧﻤﺸﻲ ﻧﻄﻠﻌﻬﺎ ﺍﻃﻠﻌﻦ ﺍﻧﺘﻦ ﻭﻃﻠﻌﻦ ﻭﺳﻦ
ﻃﻠﻌﻦ ﻭﺍﻧﺎ ﺧﺸﻴﺖ ﻃﻠﻌﺖ ﺍﻟﻔﺮﺷﻪ ﻭﻓﺮﺷﻨﺎ ﺑﺮﺍ
ﺭﻳﻬﺎﻡ .. ﺍﺍﻩ ﺭﻭﻳﺤﻪ ﺣﻠﻮﻩ
ﺍﻧﺎ .. ﺍﻫﺎ ﺗﻬﺒﻞ ﺑﻜﻞ ﺷﻨﻮ ﻫﺎ ﻓﺮﺣﺎﻧﻪ
ﺭﻳﻬﺎﻡ ﻣﺎﺳﻜﻪ ﺍﻳﺪﻳﻬﺎ .. ﺻﻔﻘﻲ ﻫﻲ ﺣﻲ ﻉ ﺷﻠﺶ
ﺍﻧﺎ ﺿﺤﻜﺖ .. ﻣﺎﻧﺤﻜﻴﻠﻚ ﻣﻨﻴﺮ ﻣﻘﻤﻌﺰ ﻏﻴﺮ ﻳﻌﻠﻢ ﻓﻴﻬﺎ
ﺭﺷﺎ .. ﺑﻴﻤﻮﺕ ﻋﻠﻴﻬﺎ ﻣﻨﻴﺮ
ﺍﻧﺎ .. ﺍﻫﺎ ﻣﺮﺍﺕ ﻳﺎﺧﺬ ﻓﻴﻬﺎ ﻭﻳﻄﻠﻊ ﺑﻴﻬﺎ
ﻣﺎﻣﺎ .. ﻧﺠﻴﻪ ﻳﺎﺧﻴﻪ ﺍﻣﺘﻰ ﻋﺮﺳﻪ ﻫﻮ
ﺍﻧﺎ .. ﺷﻬﺮ 7 ﺑﻌﺪ ﺭﻣﻀﺎﻥ ﻃﻮﻝ
ﻣﺎﻣﺎ .. ﺑﺎﻫﻲ ﻣﺸﺎﺀ ﺍﻟﻠﻪ ﺭﺑﻲ ﻳﻬﻨﻴﻨﻪ ﻭﺻﺒﻴﺘﻚ ﺍﻟﻲ ﻣﻦ ﺟﻴﻠﻚ ﻗﺎﻋﺪﻩ ﻣﺰﺍﻟﺖ
ﺍﻧﺎ .. ﻻ ﺍﻧﺨﺒﻄﺖ ﻗﻌﺪﻫﺎ ﻏﻴﺮ ﺍﻟﺼﻐﻴﺮﻩ
ﻣﺎﻣﺎ .. ﺗﻮﺍ ﻣﺴﺮﻉ ﻣﺎﺗﻜﺒﺮ ﻭﺗﻼﻗﻬﺎ ﺗﻘﻮﻟﻴﺶ
ﺍﻧﺎ .. ﻻ ﻣﻦ ﺗﻮﺍ ﻻﻗﻴﺘﻬﺎ ﻣﺸﺎﺀ ﺍﻟﻠﻪ ﻋﻠﻴﻬﺎ
ﺭﺷﺎ .. ﻓﺮﻓﻮﺷﻪ ﺑﻜﻞ
ﻗﻌﺪﻧﺎ ﻧﻬﺪﺭﺯﻭ ﻣﻊ ﺑﻌﻀﻨﺎ ﻭﻉ ﻣﻐﺮﺏ ﺟﺎﺀ ﻋﺰﻭ ﻭﺭﻛﺒﻨﺎ ﻓﻮﻕ ﻧﺸﻮﻓﻮ ﻑ ﺍﻟﺸﻘﻪ
ﺭﻳﻬﺎﻡ .. ﻣﺸﺎﺀﺍﻟﻠﻪ ﻳﺎﻋﺰﻭ ﻣﺮﻳﺤﻪ ﺑﻜﻞ ﺍﻟﺸﻘﻪ ﺭﺑﻲ ﻳﻬﻨﻴﻚ
ﻋﺰﻭ ﺍﺑﺘﺴﻢ .. ﺗﺴﻠﻤﻲ
ﺭﺷﺎ .. ﺻﺎﺡ ﺻﺪﻗﺖ ﻣﺸﺮﺡ ﻭﺣﻠﻮﻩ ﺍﻥ ﺷﺎﺀ ﺍﻟﻠﻪ ﺗﺨﺸﻬﺎ ﺑﺎﻟﻬﻨﺎﺀ
ﺍﻧﺎ .. ﺭﺑﻲ ﻳﻬﻨﻴﻚ ﺗﺴﺘﺎﻫﻞ ﻛﻞ ﺧﻴﺮ ﺣﻠﻮﻩ ﺷﻘﻪ ﻭﺑﺴﻴﻄﺔ ﻋﺎﺭﻓﻨﻲ ﻧﺤﺐ ﺍﻟﺒﺴﺎﻃﻪ ﺍﻧﺎ
ﻋﺰﻭ ﻣﺒﺘﺴﻢ .. ﺗﺴﻠﻤﻦ
ﺭﻥ ﻣﻮﺑﺎﻳﻠﻪ ﻭﻃﻠﻊ ﺑﺮﺍ
ﻋﺰﻭ .. ﺳﻤﺤﺘﻲ ﺧﻴﺮﺍﺕ
ﺍﻣﻴﺮﻩ ﺿﺤﻜﺖ .. ﺧﻴﺮ ﻳﺎﻏﺰﺍﻟﻲ
ﻋﺰﻭ ﺍﺑﺘﺴﻢ .. ﺷﻨﺠﻮ
ﺍﻣﻴﺮﻩ .. ﺍﻟﺤﻤﺪ ﺍﻟﻠﻪ ﺍﻧﺖ ﻭﻳﻦ ﺻﻮﺕ ﻫﺮﺟﻪ
ﻋﺰﻭ .. ﻑ ﺷﻘﺘﻨﺎ ﺧﻮﺍﺗﻲ ﺟﺎﻳﺎﺕ ﺍﻟﻴﻮﻡ ﻭﺭﻛﺒﻦ ﻳﺘﻔﺮﺟﻦ
ﺍﻣﻴﺮﻩ .. ﺟﺪ ﺣﺒﻴﺒﻲ ﺻﻮﺭﻟﻲ
ﻋﺰﻭ .. ﻻ ﻻ ﻣﺶ ﻣﺼﻮﺭ ﻓﻜﻴﻨﻲ ﻭﺣﺘﻰ ﺑﻌﺪ ﻳﺠﻮ ﻫﻠﻚ ﻳﻔﻜﻮﻧﺎ ﻣﻦ ﺗﺼﻮﻳﺮ ﻭﺗﻨﺰﻳﻞ ﻉ ﻧﺖ ﻣﺎﻧﺒﻴﺶ ﺣﺪ ﻳﻌﻄﻴﻨﺎ ﺑﻌﻴﻦ
ﺍﻣﻴﺮﻩ .. ﺣﺎﺿﺮ ﺑﺲ ﻧﺒﻲ ﻧﺸﻮﻑ ﻧﺒﻴﻬﻦ ﻳﺼﻮﺭﻥ
ﻋﺰﻭ .. ﺑﺎﻩ ﺑﺲ ﺗﻨﺰﻳﻞ ﻻ
ﺍﻣﻴﺮﻩ .. ﺣﺎﺿﺮ ﻳﺎﻋﻤﺮﻱ ﺑﺎﻩ ﺷﻦ ﻗﺎﻟﻦ ﺍﻟﺒﻨﺎﺕ ﻋﻠﻴﻬﺎ
ﻋﺰﻭ .. ﻋﺠﺒﺘﻬﻦ ﻗﺎﻟﻠﻲ ﺣﻠﻮﻩ
ﺍﻣﻴﺮﻩ .. ﺑﺎﻩ ﺭﺑﻲ ﻳﻬﻨﻴﻨﻪ ﻳﺎﻗﻠﺒﻲ
ﻋﺰﻭ ﺗﻨﻬﺪ .. ﺍﻥ ﺷﺎﺀ ﺍﻟﻠﻪ ﺣﺒﻴﺒﻲ ﺗﻮﺍ ﺧﻠﻴﻨﻲ ﻧﺼﻜﺮ ﺑﻨﻜﺴﺪ ﻣﻊ ﺑﻨﺎﺕ ﺷﻮﻳﺎ
ﺍﻣﻴﺮﻩ .. ﺧﻮﺫ ﺭﺍﺣﺘﻚ ﺣﺒﻴﺒﻲ
ﻋﺰﻭ .. ﺗﺸﺎﻭ ﻳﺎﺳﻤﺤﻪ
ﺍﻣﻴﺮﻩ ﺿﺤﻜﺖ .. ﺑﺎﻱ
ﺻﻜﺮ ﻋﺰﻭ ﻭﻧﺰﻟﻨﺎ ﻛﻠﻨﺎ ﺷﺮﺑﻨﺎ ﺍﻟﺸﺎﻫﻲ ﻣﻊ ﺍﻟﻤﻮﺍﻟﺢ ﻭﻫﺪﺭﺯﻧﺎ ﻣﻊ ﺑﻌﻀﻨﺎ ﻭﻉ ﺍﻟﻌﺸﺎﺀ ﺟﺎﻧﻲ ﺍﻳﻬﻢ
" ﺍﻳﻬﻢ .. ﺧﻴﺮﺍﺕ ﻳﺎﺑﺎﺑﺎ ﺷﻜﻠﻬﺎ ﺟﺮﺕ ﺑﺎﻟﻤﺸﺎﺉ ﻟﻴﻦ ﺑﻄﻠﺖ
ﺍﻧﺎ .. ﺍﻫﺎ ﻟﻌﺒﺖ ﻭﺍﺟﺪ
ﺍﻳﻬﻢ .. ﺑﺎﻩ ﻏﻴﺮﺕ ﺟﻮ
ﺍﻧﺎ .. ﻭﺣﺘﻰ ﺍﻧﺎ ﻏﻴﺮﺕ ﺟﻮ
ﺍﻳﻬﻢ .. ﺑﺎﻩ ﺍﻥ ﺷﺎﺀ ﺍﻟﻠﻪ ﺩﻳﻤﺎ ﻣﺒﺴﻮﻃﻪ
ﺍﻧﺎ ﺳﻜﺘﺖ ﻟﻴﻦ ﻭﺻﻠﻨﺎ ﻟﺤﻮﺵ ﻭﻧﺰﻟﻨﺎ ﺭﻛﺒﻨﺎ ﻟﺸﻘﻪ
ﺣﻄﻴﺖ ﻭﺳﻦ ﻑ ﺳﺮﻳﺮ ﻭﺍﻧﺎ ﺳﻠﺤﺖ ﻭﺷﺎﺣﻲ ﻭﺟﺎﻛﺘﻲ ﻭﺑﻨﺴﻠﺢ ﺳﻠﺴﻠﺘﻲ ﺧﺶ ﺍﻳﻬﻢ
ﺍﻳﻬﻢ .. ﺭﻗﺪﺕ ﻭﺳﻦ ﻗﺒﻞ ﻧﺒﻲ ﻧﻜﺴﺪ ﻋﻠﻴﻬﺎ
ﺍﻧﺎ .. ﺗﺄ ﺍﺳﺘﻐﻔﺮﺍﻟﻠﻪ
ﺍﻳﻬﻢ .. ﻛﻨﻚ
ﺍﻧﺎ .. ﻣﺎﻓﻲ ﺷﻲ
ﺍﻳﻬﻢ ﺟﺎﺀ ﺣﻀﻨﻲ ﻣﻦ ﻻﻭﺭﻩ .. ﻛﻨﻚ ﻳﺎ ﻋﻤﺮﻱ
ﺍﻧﺎ .. ﺍﻳﻬﻢ ﺣﻮﻝ ﺧﻠﻴﻨﻲ ﻧﻐﻴﺮ ﻣﺶ ﺟﻮﻙ
ﺍﻳﻬﻢ ﺿﺤﻚ .. ﻏﺎﻳﺮﻩ
ﺍﻧﺎ .. ﺣﻮﻝ ﺑﻄﻞ ﺗﺎﻓﻬﻪ ﻳﺎﺍﻳﻬﻢ ﺗﺆ ﻭﺑﻌﺪ ﻧﻘﻮﻟﻚ ﺍﻧﺖ ﻫﺎﻣﻠﻨﻲ ﺗﻘﻮﻟﻲ ﺍﻟﺸﻐﻞ
ﺍﻳﻬﻢ ﻳﺤﻜﻲ ﺗﻼ ﻭﺫﻧﻲ .. ﺍﺳﻒ ﻳﺎ ﺣﺒﻴﺖ ﻋﻤﺮﻱ
ﺍﻧﺎ ﻧﻔﻚ ﻑ ﺍﻳﺪﻳﻪ ﺑﺲ ﻣﺎﻗﺪﺭﺗﺶ ﻋﻠﻴﻪ
ﺍﻳﻬﻢ ﺑﺼﻮﺕ ﻫﺎﺩﻱ .. ﻭﻋﺪ ﻣﻌﺶ ﻧﻬﻤﻠﻚ ﺑﺲ ﻭﺍﻟﻠﻪ ﺍﻟﺸﻐﻞ ﻭﻣﺮﺍﺕ ﺑﻌﺪ ﺍﻟﻌﻴﺪ ﻋﻨﺪﻱ ﺳﻔﺮﻩ
ﺍﻧﺎ ﺑﺮﻣﺖ .. ﺷﻨﻮﻭﻭﻭﻭ ﺳﻔﺮﻩ ﻫﺬﺍ ﻭﻳﻦ ﻛﻤﻠﺖ ﻭﻣﻌﺶ ﻭﺩﻭﺭﺗﻨﻲ ﺑﻜﻞ ﻻ ﻻ ﻳﺎﺍﻳﻬﻢ ﺧﻠﻲ ﺍﻣﺠﺪ ﻭﻻ ﻣﺤﻤﺪ ﻳﻌﺪﻭ ﺍﻧﺖ ﻻ
ﺍﻳﻬﻢ ﺿﺤﻚ .. ﻭﺳﻌﻲ ﺑﺎﻟﻚ ﻛﻨﻚ ﺍﻧﺘﻲ
ﺍﻧﺎ ﺣﻀﻨﺘﻪ ﺑﻘﻮﻩ .. ﻻﻻ ﻗﺘﻠﻚ ﻣﺎﻧﻘﺪﺭﺵ ﻧﺒﻌﺪ ﻋﻠﻴﻚ ﻛﻨﻚ ﻫﻜﻲ ﺍﻧﺖ
ﺍﻳﻬﻢ ﻳﻤﺸﻲ ﻑ ﺍﻳﺪﻩ ﻉ ﺷﻌﺮﻱ .. ﺧﻠﻴﻨﻲ ﻧﻜﻤﻞ ﺑﺲ ﺳﻔﺮﻩ ﺑﻌﺪ ﻋﺮﺱ ﻣﻨﻴﺮ ﺃﻥ ﺷﺎﺀ ﺍﻟﻠﻪ ﻭﺗﻮﺍ ﻧﺸﻴﻠﻚ ﻣﻌﺎﻳﺎ
ﺍﻧﺎ .. ﻣﺘﺎﻛﺪ ﺗﺒﻲ ﺗﺸﻴﻠﻨﻲ
ﺍﻳﻬﻢ ﺍﺑﺘﺴﻢ .. ﺍﻫﺎ ﻣﺘﺎﻛﺪ ﻳﺎﻫﺒﻠﻪ ﺍﺭﻓﻌﻲ ﺭﺍﺳﻚ ﺑﺤﺘﻲ ﻓﻴﺎ
ﺍﻧﺎ ﺭﻓﻌﺖ ﺭﺍﺳﻲ ﻭﺑﺤﺘﺖ ﻓﻴﻪ .. ﻧﺤﺒﻚ
ﺍﻳﻬﻢ ﺑﺎﺱ ﺭﺍﺳﻲ .. ﻧﻤﻮﺕ ﻓﻴﻚ ﻳﺎﻫﺒﻠﻪ
ﺍﻧﺎ .. ﻋﻨﺪﻱ ﺷﻮﻱ ﺣﻮﺳﻪ ﻭﻧﺠﻲ ﻧﻜﺴﺪ ﻣﻌﺎﻙ
ﺍﻳﻬﻢ .. ﺑﺎﻩ "
" ﺍﻧﺲ .. ﺷﻨﻮ ﺍﻧﺒﺴﻄﺘﻲ
ﺭﻳﻬﺎﻡ .. ﻭﻭﻭﻭﺍﺍﺟﺪ ﺑﻜﻞ ﻭﻗﺖ ﺯﻳﺮﻩ ﺭﺷﺎ ﻭﻣﻴﺲ ﻣﺶ ﻗﺎﻋﺪﺍﺕ
ﺍﻧﺲ .. ﺑﺎﻩ ﻏﻴﺮﺗﻲ ﺟﻮ
ﺭﻳﻬﺎﻡ .. ﻧﻮﺳﻲ ﻋﺮﺱ ﻋﺰﻭ ﻗﺮﺏ ﻭﻧﺒﻲ ﻫﺪﻳﻪ
ﺍﻧﺲ .. ﺣﺎﺿﺮ ﺑﺪﻭﻥ ﻣﺎﺗﻘﻮﻟﻲ ﺣﺠﺰ ﻑ ﺻﺎﻟﻪ ﻭﻻ ﻣﺰﺍﻝ
ﺭﻳﻬﺎﻡ .. ﺣﺠﺰ ﻓﻴﻬﺎ ﻫﺪﻳﻪ ﻣﻦ ﺻﺎﺣﺒﻪ
ﺍﻧﺲ .. ﺷﻮﻓﻲ ﺷﻦ ﻧﺎﻗﺺ ﻭﻗﻮﻟﻴﻠﻪ ﺷﻮﺭﻱ ﻭﻻ ﻛﺎﻥ ﻫﺬﺍ ﻓﻠﻮﺱ
ﺭﻳﻬﺎﻡ .. ﺗﻌﺮﻑ ﻣﺰﺍﻝ ﻣﺎﺭﻛﺐ ﺍﻟﺸﺎﺷﺎﺕ ﻟﺸﻘﻪ
ﺍﻧﺲ .. ﺧﻼﺹ ﺗﻤﺎﻡ ﻗﻮﻟﻴﻠﻪ ﺑﻴﺶ ﻣﺎﻳﺎﺧﺬﻫﻨﺶ
ﺭﻳﻬﺎﻡ .. ﺗﻤﺎﻡ ﺑﺎﻩ
ﺍﻧﺲ ﻗﺮﺏ ﻣﻨﻬﺎ .. ﻣﺎﺭﺍﻳﻔﺘﻴﺶ ﻋﻠﻴﺎ
ﺭﻳﻬﺎﻡ ﺍﺑﺘﺴﻤﺖ .. ﻻﻻ ﺭﺍﻳﻔﺖ ﻋﻠﻴﻚ
ﺍﻧﺲ ﺑﺎﺱ ﺭﻗﺒﺘﻬﺎ ﻣﻦ ﻻﻭﺭﻩ .. ﻧﺤﺒﻚ
ﺭﻳﻬﺎﻡ ﻗﻠﺒﻬﺎ ﻗﻌﺪ ﻳﺪﻕ ﺑﻘﻮﻩ ﻻﻧﻪ ﺍﻭﻝ ﻣﺮﻩ ﻳﻘﻮﻟﻬﺎ ﻟﻬﺎ
ﺍﻧﺲ ﻣﺴﻚ ﺧﺼﺮﻫﺎ .. ﻫﻮﻣﺘﻲ ﻛﻨﻚ ﻧﺤﺒﻚ ﻳﺎ ﻋﻤﺮﻱ
ﺭﻳﻬﺎﻡ ﺯﻣﻄﺖ ﺭﻳﻘﻬﺎ ﻭﺑﺮﻣﺖ ﺣﻀﻨﺎﺗﻪ
ﺍﻧﺲ ﺿﺤﻚ .. ﺑﺎﻫﻲ ﺑﺎﻩ ﻑ ﻭﻗﺘﻬﺎ ﺍﺣﻠﻰ ﺻﺎﺡ
ﺭﻳﻬﺎﻡ ﺿﺤﻜﺖ .. ﺻﺎﺡ ﻑ ﻭﻗﺘﻬﺎ ﺍﺣﻠﻰ
ﺍﻧﺲ .. ﺭﺑﻲ ﻳﺨﻠﻴﻚ ﻟﻴﺎ
ﺭﻳﻬﺎﻡ ﺗﻨﻬﺪﺕ .. ﻭﻳﺨﻠﻴﻚ "
" ﺍﻟﻴﻮﻡ ﺛﺎﻧﻲ ..
ﺭﺷﺎ .. ﺣﻤﺎﺩﻱ
ﻣﺤﻤﺪ ﻳﺎﻛﻞ .. ﻫﻢ ﻧﻌﻢ ﻳﺎﻋﻤﺮﻩ
ﺭﺷﺎ .. ﻧﺒﻲ ﻧﻌﺪﻱ ﻟﺪﻛﺘﻮﺭﻩ
ﻣﺤﻤﺪ .. ﺩﻛﺘﻮﺭﻩ ﺷﻨﻮ ﻛﻨﻚ
ﺭﺷﺎ .. ﺩﻛﺘﻮﺭﻩ ﻧﺴﺎﺀ ﻧﺒﻲ ﻧﺸﻮﻑ ﺭﻭﺣﻲ ﻣﺶ ﻣﻄﻤﻨﻪ
ﻣﺤﻤﺪ .. ﻛﻨﻚ ﻳﺎﺭﺷﺎ ﻣﺎﻟﻨﺶ ﺧﻤﺲ ﺷﻬﻮﺭ ﻣﺠﻮﺯﻳﻦ ﻣﺰﺍﻝ ﺑﺪﺭﻱ
ﺭﺷﺎ .. ﺑﺎﻩ ﻧﺸﻮﻑ ﺑﺪﺭﻱ ﺑﺪﺭﻱ ﻛﺎﻥ ﻓﻴﺎ ﺣﺎﺟﻪ
ﻣﺤﻤﺪ .. ﻻ ﺣﻮﻝ ﺍﻟﻠﻪ ﺑﺎﻩ ﺗﻮﺍ ﻧﺸﻮﻓﻮ ﺣﺠﺰﺗﻲ ﺍﻧﺘﻲ ﻭﻻ ﻛﻴﻒ
ﺭﺷﺎ .. ﻻﻻ ﺣﺠﺰ ﻭﻗﺘﻲ
ﻣﺤﻤﺪ .. ﺍﻣﺘﻰ ﺗﻤﺴﻚ ﺑﺎﻩ
ﺭﺷﺎ .. ﺳﺎﻋﻪ 5 ﺑﺲ ﻧﻌﺪﻱ ﺑﺪﺭﻱ ﺑﻴﺶ ﻧﺤﺼﻞ ﻣﻜﺎﻥ
ﻣﺤﻤﺪ .. ﺑﺎﻩ ﺗﻤﺎﻡ ﺧﻼﺹ ﺑﻌﺪ ﺍﻟﻐﺪﺍﺀ ﻧﻄﻠﻌﻮ
ﺭﺷﺎ .. ﻧﺠﻚ ﻟﻴﺎ
ﻣﺤﻤﺪ ﺗﻨﻬﺪ .. ﻛﺎﻥ ﻋﻠﻴﺎ ﺣﺘﻰ ﻉ ﺳﻨﻪ ﻣﺰﺍﻝ ﺑﺪﺭﻱ ﺍﻧﺘﻲ ﺻﻐﻴﺮﻩ ﻣﺰﺍﻟﺘﻲ
ﺭﺷﺎ .. ﻳﻨﻌﻠﻴﺎ ﻣﻦ ﺍﻟﺸﺎﻳﺐ
ﻣﺤﻤﺪ ﺿﺤﻚ .. ﺷﺎﻳﺐ ﻋﻠﻴﻚ ﺻﺎﺡ ﻓﺮﻕ ﺑﻴﻨﺎ 8 ﺳﻨﻴﻦ
ﺭﺷﺎ ﻣﺴﻜﺖ ﻭﺟﻪ ﺑﻴﻦ ﺍﻳﺪﻳﻬﺎ .. ﻧﺠﻴﻪ ﺷﺎﻳﺒﻲ ﺍﻧﺎ ﻧﺤﺒﻪ ﻭﻧﻤﻮﺕ ﻓﻴﻪ
ﻣﺤﻤﺪ ﺍﺑﺘﺴﻢ .. ﺻﺒﻲ ﻫﻲ ﻟﻤﻲ ﺣﻮﺳﺘﻚ
ﺭﺷﺎ .. ﺑﺎﻩ ﻫﻴﺎ
ﺻﺒﺖ ﺭﺷﺎ ﻟﻤﺖ ﺣﻮﺳﺘﻬﺎ
ﻣﺤﻤﺪ ﻳﺒﺤﺖ ﻓﻴﻬﺎ .. ﺭﺷﺎ
ﺭﺷﺎ ﺑﺮﻣﺖ .. ﻧﻌﻢ ﺣﺒﻴﺒﻲ
ﻣﺤﻤﺪ .. ﺳﺎﻣﻨﻪ ﺭﺍﻳﺤﻪ
ﺭﺷﺎ .. ﺟﺪ ﺻﺎﺡ ﻣﻦ ﻭﻳﻦ
ﻣﺤﻤﺪ ﺣﻂ ﺍﻳﺪﻳﻪ ﻉ ﺍﺟﻨﺎﺑﻬﺎ .. ﻣﻦ ﺍﺟﻨﺎﺑﻚ ﻭﺍﺿﺢ
ﺭﺷﺎ .. ﻛﺬﺑﻪ ﺣﻲ ﻋﻠﻴﺎ ﻣﺎﻧﺤﺒﺶ ﺍﻟﺴﻤﻦ
ﻣﺤﻤﺪ ﺿﺤﻚ .. ﻣﻌﺶ ﺗﺎﻛﻠﻲ ﻑ ﻟﻴﻞ ﻓﻄﻨﺘﻠﻚ ﺍﻣﺲ
ﺭﺷﺎ .. ﻳﻨﻌﻠﻴﺎ ﻣﻌﺶ ﻧﺎﻛﻞ ﻣﺎﻧﺤﺒﺶ ﺍﻟﺴﻤﻦ ﺍﻧﺎ
ﻣﺤﻤﺪ ﺿﺤﻚ .. ﻫﻬﻬﻬﻪ ﺳﺎﻫﻠﻪ ﺗﻮﺍ ﺗﻨﻘﺼﻲ
ﺭﺷﺎ .. ﺑﻄﻞ ﻫﺰﻭﻩ ﺧﻴﺮﻟﻚ
ﻣﺤﻤﺪ .. ﻋﺪﻱ ﻫﻴﺎ ﺧﻴﺮ ﻣﺎﻧﺘﺎﺧﺮﻭ
ﺭﺷﺎ .. ﺑﺎﻩ
ﻛﻤﻠﺖ ﺭﺷﺎ ﺣﻮﺳﺘﻬﺎ ﻭﻃﻠﻌﻮ ﻟﻌﻴﺎﺩﻩ ﺣﺠﺰﺕ ﻭﻗﻌﺪﺕ ﺗﺮﺍﺟﻲ ﻟﻴﻦ ﺟﺎﺀ ﺩﻭﺭﻫﺎ ﻭﺧﺸﺖ ﻉ ﺩﻛﺘﻮﺭﻩ ﻃﻠﺒﺖ ﻣﻨﻬﺎ ﺗﺤﺎﻟﻴﻞ
ﻣﺤﻤﺪ .. ﺷﻦ ﻗﺎﻟﺘﻠﻚ
ﺭﺷﺎ .. ﻃﻠﺒﺖ ﺗﺤﺎﻟﻴﻞ ﻟﻮﻃﻪ ﻋﻨﺪﻫﻢ ﻣﺨﺘﺒﺮ
ﻣﺤﻤﺪ .. ﺑﺎﻩ ﻫﻴﺎ
ﻧﺰﻟﻮ ﻟﻮﻃﻪ ﻭﺩﺍﺭﺕ ﺗﺤﺎﻟﻴﻞ ﻭﻗﻌﺪﺕ ﺗﺮﺍﺟﻲ ﻟﻴﻦ ﻃﻠﻌﻦ
ﻣﺤﻤﺪ .. ﻣﺎﻗﺮﺗﻬﻨﺶ ﺍﻟﻲ ﺟﻮﺍ
ﺭﺷﺎ .. ﺍﺣﻤﻴﺪﺍ ﺣﺴﻨﻲ ﺧﺎﻳﻔﻪ ﻗﺎﻟﺘﻠﻲ ﺧﻠﻲ ﺩﻛﺘﻮﺭﻩ ﺗﻘﻮﻟﻚ ﺧﻴﺮ
ﻣﺤﻤﺪ .. ﻻ ﻣﺘﺨﺎﻓﻴﺶ ﺃﻥ ﺷﺎﺀ ﺍﻟﻠﻪ ﺧﻴﺮ ﺍﺭﻛﺒﻲ ﻫﻲ ﺷﻮﻓﻴﻬﺎ ﺷﻦ ﺗﻘﻮﻟﻚ ﻭﺣﺘﻰ ﻛﺎﻥ ﻗﺎﻟﺖ ﺣﺎﺟﻪ ﺷﻴﻨﻪ ﻻ ﺳﻤﺢ ﺍﻟﻠﻪ ﺍﺫﻛﺮﻱ ﺍﻧﻪ ﻣﺴﺘﺤﻴﻞ ﻧﺴﺘﻐﻨﻰ ﻋﻠﻴﻚ ﻓﺎﻫﻤﻪ
ﺭﺷﺎ ﺗﻨﻬﺪﺕ .. ﺑﺎﻩ ﺗﻤﺎﻡ
ﺭﻛﺒﺖ ﺭﺷﺎ ﻭﻣﺤﻤﺪ ﻗﻌﺪ ﻉ ﺍﻋﺼﺎﺑﻪ ﻳﺮﺍﺟﻲ
ﺷﻮﻳﺎ ﻭﺭﺷﺎ ﺧﺸﺖ ﻉ ﺩﻛﺘﻮﺭﻩ
ﺭﺷﺎ .. ﻃﻤﻨﻴﻨﻲ ﻳﺎ ﺩﻛﺘﻮﺭﻩ ﺍﻣﺘﺎﻉ ﺍﻟﻤﺨﺘﺒﺮ ﻗﺎﻟﺘﻠﻲ ﺧﻠﻲ ﺩﻛﺘﻮﺭﻩ ﺗﻘﻮﻟﻚ ﺧﻴﺮ
ﺩﻛﺘﻮﺭﻩ ﺍﺑﺘﺴﻤﺖ .. ﺧﻴﺮ ﺧﻴﺮ ﻣﺸﺎﺀ ﺍﻟﻠﻪ ﺍﻧﺘﻲ ﻗﺮﻳﺐ ﺗﺼﻜﺮﻱ ﺍﻟﺜﺎﻧﻲ
ﺭﺷﺎ ﺿﺤﻜﺖ .. ﻳﻌﻨﻲ ﺣﺎﻣﻞ ﺍﻧﺎ
ﺩﻛﺘﻮﺭﻩ .. ﺣﺎﻣﻞ ﺍﻫﺎ ﺍﻟﻒ ﻣﺒﺮﻭﻙ ﺗﻌﺎﻟﻲ ﻧﺸﻮﻓﻮ ﺻﺤﻪ ﺍﻟﺠﻨﻴﻦ
ﺻﺒﺖ ﺭﺷﺎ ﺭﻗﺪﺕ ﻉ ﺳﺮﻳﺮ ﻭﺭﻓﻌﺖ ﺍﻟﺒﻠﻮﺯﻩ ﻭﺟﺖ ﻣﻤﺮﺿﻪ ﺩﺍﺭﺕ ﺟﻞ ﻭﻗﻌﺪﺕ ﺩﻛﺘﻮﺭﻩ ﺗﺸﻮﻑ
ﺩﻛﺘﻮﺭﻩ .. ﺍﻭﻭﻭﻭ ﻛﻴﺴﻴﻦ ﻣﻌﺎﻙ ﺗﺆﺍﻡ ﺍﻧﺘﻲ
ﺭﺷﺎ ﺗﻀﺤﻚ ﻭﺩﻣﻮﻉ ﻑ ﻋﻴﻮﻧﻬﺎ
ﺩﻛﺘﻮﺭﻩ .. ﺍﻟﺒﺎﻳﻦ ﺍﻧﻚ ﺭﻗﻴﻘﻪ ﺑﺲ ﺍﻟﺤﻤﻞ ﺳﻤﻨﻚ ﻓﺠﺎﺀ ﻭﺍﺿﺢ ﻑ ﺍﺟﻨﺎﺑﻚ
ﺭﺷﺎ .. ﺣﺎﻣﻞ ﺑﺘﺆﺍﻡ ﻳﺎﺭﺑﻲ ﻣﺶ ﻣﺼﺪﻗﻪ
ﺩﻛﺘﻮﺭﻩ ﺍﺑﺘﺴﻤﺖ .. ﺍﻟﻒ ﻣﺒﺮﻭﻙ ﻻﺯﻡ ﺗﺎﺑﻌﻲ ﻛﻞ ﺑﻌﺪ ﻓﺘﺮﻩ ﺍﻟﺤﺎﻣﻞ ﺑﺘﺆﺍﻡ ﺗﺤﺘﺎﺝ ﻋﻨﺎﻳﻪ ﻭﻣﺤﻔﺎﻇﻪ ﺃﻛﺜﺮ ﻣﻦ ﺍﻟﺤﺎﻣﻞ ﺑﺠﻨﻴﻦ ﻭﺍﺣﺪ
ﺭﺷﺎ ﺍﺑﺘﺴﻤﺖ ﻭﻧﺰﻟﺖ ﺑﻠﻮﺯﺗﻬﺎ
ﺩﻛﺘﻮﺭﻩ .. ﺗﻮﺍ ﻧﻜﺘﺒﻠﻚ ﻉ ﻓﻴﺘﺎﻣﻴﻨﺎﺕ
ﺭﺷﺎ .. ﺗﻤﺎﻡ ﺷﻜﺮﺍً ﻳﺎ ﺩﻛﺘﻮﺭﻩ
ﺩﻛﺘﻮﺭﻩ .. ﻭﻟﻮ ﻭﺍﺟﺒﻲ
ﻃﻠﻌﺖ ﺭﺷﺎ ﻭﻫﻴﺎ ﺣﺎﻃﻪ ﺍﻳﺪﻳﻬﺎ ﻉ ﺑﻄﻨﻬﺎ ﻭﻣﺒﺘﺴﻤﻪ ﻧﺰﻟﺖ ﻟﻮﻃﻪ ﻭﻣﺤﻤﺪ ﻛﺎﻥ ﻣﻘﻤﻌﺰ ﺑﻌﺪ ﺷﺎﻓﻬﺎ ﺟﺎﺀ ﻳﺠﺮﻱ
ﻣﺤﻤﺪ .. ﻫﺎﻩ ﺷﻨﻮ ﻃﻤﻨﻴﻨﻲ ﺭﺍﻩ ﻣﺸﻐﻮﻝ ﺑﺎﻟﻲ
ﺭﺷﺎ ﺿﺤﻜﺖ .. ﻟﻮﻻ ﺍﻟﻨﺎﺱ ﺭﺍﻩ ﺣﻀﻨﺘﻚ ﺗﻮﺍ
ﻣﺤﻤﺪ ﺍﺑﺘﺴﻢ .. ﺣﺎﺍﺍﻣﻞ
ﺭﺷﺎ ﺿﺤﻜﺖ .. ﺑﺘﺆﺍﻡ ﻳﺎﺣﻤﺎﺩﻱ ﺗﺼﺪﻕ ﻗﺮﻳﺐ ﻧﺼﻜﺮ ﺍﻟﺜﺎﻧﻲ ﺣﺘﻰ
ﻣﺤﻤﺪ ﻳﻀﺤﻚ .. ﺍﻟﺤﻤﺪ ﺍﻟﻠﻪ ﻳﺎﺭﺑﻲ ﺍﻟﺤﻤﺪﺍﻟﻠﻪ ﺧﺸﻴﺖ ﻭﺍﻧﺎ ﺧﺎﻳﻒ ﺗﻮﺍ ﺑﻨﻄﻠﻊ ﻭﺍﻧﺎ ﺑﻨﻄﻴﺮ ﻣﻦ ﺍﻟﻔﺮﺣﻪ
ﺭﺷﺎ ﻣﺒﺘﺴﻤﻪ ﻭﺗﺒﺤﺖ ﻓﻴﻪ .. ﻫﻴﺎ ﻧﺮﻭﺣﻮ
ﻣﺤﻤﺪ .. ﻭﺍﻧﺎ ﻧﻘﻮﻝ ﻋﻠﻴﺶ ﺳﺎﻣﻨﻪ ﻫﻜﻲ
ﺭﺷﺎ ﺿﺤﻜﺖ .. ﺍﻫﺎ ﺗﺆﺍﻡ ﺣﺘﻰ ﻫﻤﺎ
ﻣﺤﻤﺪ ﺗﻨﻬﺪ .. ﺭﺑﻲ ﻳﺨﻠﻴﻬﻢ ﻭﻳﺴﻠﻤﻬﻢ ﻫﻴﺎ ﻧﺮﻭﺣﻮ "
" ﻣﺮﻳﻢ .. ﺷﺮﻳﺖ ﻃﺎﻭﻟﻪ ﻭﺻﺎﻟﻮﻥ ﻭﺳﺘﺎﻳﺮ ﺑﺲ ﻛﻨﻚ
ﻣﻨﻴﺮ .. ﻣﺎﻩ ﻗﺘﻠﻚ ﺗﻮﺍ ﺍﻧﺎ ﻧﺠﻴﺐ ﻳﺎﻣﺮﻳﻢ
ﻣﺮﻳﻢ .. ﺑﺎﺑﺎ ﺣﺎﺏ ﻳﺸﻴﺮﻟﻲ ﻓﺮﺣﺎﻥ ﺑﻴﺎ ﺑﻌﺪﻳﻦ ﻣﺎﺗﺠﻴﺶ ﻳﺎﺣﺒﻴﺒﻲ
ﻣﻨﻴﺮ .. ﺑﺎﻩ ﻳﺎ ﻋﻤﺮﻱ ﻉ ﻣﻬﻢ ﺍﻟﻲ ﺗﺮﻳﺤﻚ ﺩﻳﺮﻳﻬﺎ ﺍﻧﺎ ﻧﺒﻲ ﺭﺍﺣﺘﻚ ﺑﺲ
ﻣﺮﻳﻢ .. ﻧﺠﻚ ﻟﻴﺎ ﻭﺧﻼﺹ
ﻣﻨﻴﺮ .. ﺩﺑﺸﻚ ﻛﻤﻠﺘﻴﻪ
ﻣﺮﻳﻢ .. ﺷﺒﻪ ﻛﻤﻠﺘﻪ ﻣﺰﺍﻝ ﺩﺑﺶ ﺍﻟﺤﻮﺵ ﺑﺲ
ﻣﻨﻴﺮ ﺍﺑﺘﺴﻢ .. ﻳﻨﻌﻠﻴﺎ ﻫﺬﺍ ﺑﺎﻟﺬﺍﺕ ﻛﺜﺮﻱ ﻣﻨﻪ ﺟﻮ ﺷﺮﺗﺎﺕ ﻭﺑﺪﻳﺎﺕ ﻻﺻﻘﻪ ﻫﺬﻳﻨﺎ ﺍﺣﻴﻴﻴﻲ
ﻣﺮﻳﻢ ﺗﻀﺤﻚ ﻉ ﺍﻟﺼﺎﻣﺖ .. ﺳﺨﻴﻒ ﺍﻧﺖ ﻭﺣﻘﺮﺑﻲ
ﻣﻨﻴﺮ .. ﻛﻨﻚ ﻣﻌﺎﻳﺎ ﺍﻧﺘﻲ ﻫﺬﺍ ﺣﻘﻲ ﺍﺯﻑ ﻧﺒﻲ ﻧﻤﺘﻊ ﺭﻭﺣﻲ
ﻣﺮﻳﻢ .. ﻛﻠﻪ ﺍﻧﺖ ﻳﺎﺭﺏ ﺍﻟﺼﺒﺮ
ﻣﻨﻴﺮ ﻳﻀﺤﻚ .. ﺑﺎﻩ ﻗﺘﻠﻚ ﺧﻮﻙ ﺍﻟﺘﺎﻓﻪ ﻳﺒﻲ ﻳﺮﺩﻟﻲ ﻫﺪﻳﺘﻲ ﻗﺎﻟﻲ ﺳﻔﺮﺗﻚ ﻋﻠﻴﺎ ﻭﻳﻦ ﺗﺒﻲ ﻳﺎﻓﺮﺧﻪ
ﻣﺮﻳﻢ .. ﻋﺎﺩﻱ ﺩﺑﻲ ﻭﻻ ﺍﻻﺭﺩﻥ
ﻣﻨﻴﺮ .. ﺩﺑﻲ ﺍﺣﻠﻰ
ﻣﺮﻳﻢ .. ﺩﻳﺮ ﺭﺍﻳﻚ ﺣﺒﻴﺒﻲ ﻋﺎﺩﻱ
ﻣﻨﻴﺮ .. ﺑﺎﻩ ﺗﻢ ﺍﻟﻴﻮﻡ ﺷﻔﺖ ﺍﻧﺎ ﻭ ﺗﺴﻨﻴﻢ ﺻﺎﻟﻮﻥ ﺣﻠﻮ ﻟﺪﺍﺭ ﻣﻌﻴﺸﻪ
ﻣﺮﻳﻢ .. ﺗﺒﻲ ﺗﺄﺧﺬﻩ
ﻣﻨﻴﺮ .. ﻣﺶ ﻋﺎﺭﻓﻪ ﺍﻳﻬﻢ ﻗﺎﻟﻲ ﺷﻔﺖ ﺍﻧﺎ ﻭﻣﻴﺲ ﻭﺍﺣﺪ ﻋﺠﺒﻨﻪ ﻳﺒﻲ ﻳﺎﺧﺬﻩ ﻫﻮ
ﻣﺮﻳﻢ .. ﺑﺎﻩ ﺷﻮﻓﻬﻦ ﺍﻻﺛﻨﻴﻦ ﻣﺮﺍﺕ ﺍﻟﻲ ﺍﺧﺘﺎﺭﻭﻩ ﻫﻤﺎ ﺣﻠﻮ
ﻣﻨﻴﺮ .. ﻫﻲ ﻫﺬﻱ ﺗﻮﺍ ﻧﺸﻮﻓﻪ
ﻣﺮﻳﻢ .. ﻻﺣﻈﺖ ﻣﻌﺶ ﻗﻌﺪﻧﺎ ﻧﺤﻜﻮﺍ ﻭﺍﺟﺪ ﻭﻛﺎﻥ ﺣﻜﻴﻨﺎ ﻧﺤﻜﻮﺍ ﻉ ﺷﻘﻪ
ﻣﻨﻴﺮ ﺍﺑﺘﺴﻢ .. ﺍﻟﻠﻪ ﻏﺎﻟﺐ ﻟﻴﻦ ﺗﻮﺻﻠﻲ ﻓﻴﺎ ﺑﻌﺪﻫﺎ ﻳﺼﻴﺮ ﺧﻴﺮ
ﻣﺮﻳﻢ .. ﺍﻣﺘﻰ ﺗﺒﻄﻞ ﺳﺨﺎﻓﻪ ﺍﻧﺖ ﺑﺲ
ﻣﻨﻴﺮ ﺿﺤﻚ .. ﻟﻴﻦ ﺗﻮﺻﻠﻲ ﻓﻴﺎ ﻭﻗﺘﻬﺎ ﻧﻮﺭﻳﻚ ﻛﻴﻒ ﺍﻟﺴﺨﺎﻓﻪ
ﻣﺮﻳﻢ ﺗﻀﺤﻚ .. ﺑﺎﻩ ﻳﺎﺣﺎﻧﻂ ﺍﺻﺒﺮ ﺷﻮﻳﺎ ﺣﺒﻴﺒﻲ ﻛﺄﻧﻲ ﻧﺴﻤﻊ ﻑ ﺻﻮﺕ ﺯﻏﺎﺭﻳﺖ ﻟﻮﻃﻪ
ﻣﻨﻴﺮ .. ﻛﻨﻬﻢ ﻃﻠﻌﻮ ﻓﺮﺣﻨﺎ ﻣﻦ ﺗﻮﺍ
ﻣﺮﻳﻢ ﺗﻀﺤﻚ .. ﻳﺎﺗﺎﻓﻪ ﺑﻨﻨﺰﻝ ﻧﺸﻮﻑ ﺑﺎﻱ ﺗﻮﺍ
ﻧﺰﻟﺖ ﻣﺮﻳﻢ ﺗﺠﺮﻱ .. ﻛﻨﻜﻢ ﺷﻦ ﻓﻲ
ﺑﺸﺮﻯ ﻣﺒﺘﺴﻤﻪ .. ﺭﺷﺎ ﺣﺎﻣﻞ
ﻣﺮﻳﻢ ﺿﺤﻜﺖ .. ﻛﺬﺫﺫﺫﺍﺑﻪ ﻧﺠﻚ ﻟﻴﺎ ﻣﺒﺮﻭﻙ
ﺭﺷﺎ ﻣﺒﺘﺴﻤﻪ .. ﺍﻟﻠﻪ ﻳﺒﺎﺭﻙ ﻓﻴﻚ ﻳﺎﻋﻤﺮﻱ
ﻣﺮﻳﻢ .. ﻣﺒﺮﻭﻙ ﻳﺎﺣﻤﺎﺩﻱ
ﻣﺤﻤﺪ ﺿﺤﻚ .. ﺍﻟﻠﻪ ﻳﺒﺎﺭﻙ ﻓﻴﻚ
ﻓﺎﻃﻤﻪ .. ﻣﺸﺎﺀﺍﻟﻠﻪ ﺭﺑﻲ ﻳﺤﻤﻴﻚ ﺣﺎﻣﻞ ﺑﺘﺆﺍﻡ ﻭﺍﻋﺮ ﻋﻠﻴﻚ ﺍﻟﺘﻌﺐ ﻭﺩﺭﻭﺝ
ﻣﺮﻳﻢ .. ﺗﺆﺍﻡ ﻳﺎﺧﻴﻪ ﻣﺸﺎﺀ ﺍﻟﻠﻪ ﺍﻥ ﺷﺎﺀ ﺍﻟﻠﻪ ﺗﺠﻴﺒﻲ ﻉ ﺧﻴﺮ ﻭﺳﻼﻣﻪ
ﺭﺷﺎ .. ﺍﻥ ﺷﺎﺀ ﺍﻟﻠﻪ ﻳﺎﺭﺏ
ﻓﺎﻃﻤﻪ .. ﻫﺬﺍ ﻭﻳﻦ ﻻﺣﻀﺘﻲ ﺍﻷﻋﺮﺍﺽ
ﻣﺤﻤﺪ ﺻﺒﻰ .. ﺍﻧﺎ ﻃﺎﻟﻊ
ﻣﺮﻳﻢ ﺗﻀﺤﻚ .. ﻋﺮﻓﻚ ﻧﺒﻲ ﺗﻔﻠﻤﻲ ﻳﺎ ﻣﺎﻣﺎ
ﻓﺎﻃﻤﻪ ﺗﻀﺤﻚ .. ﻳﺎﺧﻴﻪ ﻧﺴﺄﻝ ﻓﻴﻬﺎ ﻭﻫﻮ ﻣﺘﺤﺸﻢ ﻣﻦ ﻧﺒﺪﺭﻱ
ﺭﺷﺎ ﺍﺑﺘﺴﻤﺖ .. ﻭ ﺍﻟﻠﻪ ﻳﺎﺍﻋﻤﺒﻤﻪ ﻛﻨﺖ ﺷﺎﻛﻪ ﺑﺲ ﺩﺭﺕ ﺍﺧﺘﺒﺎﺭ ﺍﻟﻤﻨﺰﻟﻲ ﻃﻠﻊ ﺳﻠﺒﻲ
ﻓﺎﻃﻤﻪ .. ﻓﻜﻚ ﻣﻨﻪ ﺗﺤﻠﻴﻞ ﻫﻮ ﺍﻟﻲ ﻳﺒﻴﻦ ﺑﺎﻩ ﺍﻟﺤﻤﺪﺍﻟﻠﻪ ﺭﺑﻲ ﻓﺮﺣﻨﻲ ﺑﻴﻪ ﻭﻋﻴﻨﻲ ﺣﻴﻪ
ﺭﺷﺎ ﺍﺑﺘﺴﻤﺖ .. ﺭﺑﻲ ﻳﻄﻮﻝ ﻑ ﻋﻤﺮﻙ ﻳﺎﺍﻋﻤﻴﻤﻪ "
" ﺍﻧﺎ .. ﺍﻳﻬﻢ ﺑﻄﻞ ﻧﺘﻔﺮﺝ ﺑﻄﻞ ﺳﻤﺎﻃﻪ
ﺍﻳﻬﻢ ﻳﺒﻮﺱ ﻑ ﺭﻗﺒﺘﻲ ﺯﻳﻦ .. ﻣﻨﻀﺮﻙ ﺣﻠﻮ
ﺍﻧﺎ ﺑﺮﻣﺖ ﻋﻠﻴﻪ ﻭﺑﺴﺘﻪ ﻉ ﻓﻤﻪ .. ﻧﺤﺒﻚ ﺣﺒﻴﺒﻲ
ﺍﻳﻬﻢ .. ﻧﻤﻮﺕ ﻓﻴﻚ ﻳﺎﻓﺮﺻﺘﻲ ﻣﻦ ﺍﻟﺤﻴﺎﺀ
ﺍﻧﺎ ﺧﺸﻴﺖ ﺑﻴﻦ ﺍﻳﺪﻳﻪ .. ﻳﺎﺭﺏ ﻣﺎﺗﺨﺘﺒﺮﻧﻴﺶ ﻑ ﺍﻳﻬﻢ
ﺍﻳﻬﻢ ﺗﻨﻬﺪ .. ﺍﻣﻴﻦ ﻳﺎ ﺭﻭﺣﻲ ﺷﻦ ﺩﺭﺗﻴﻠﻨﺎ ﺍﻟﻴﻮﻡ ﺣﺎﺟﻪ ﺣﻠﻮﻩ
ﺍﻧﺎ .. ﻣﺎﺩﺭﺕ ﺷﻲ ﻣﺎﻋﻨﺪﻳﺶ ﻧﻴﻪ
ﺍﻳﻬﻢ .. ﺑﺎﻩ ﺗﻮﺍ ﻧﻄﻠﻊ ﻧﺠﻴﺐ ﻣﻦ ﺑﺮﺍ
ﺍﻧﺎ .. ﺧﻄﺮﺕ ﻋﻠﻴﺎ ﻧﺸﻮﻑ ﺭﺷﺎ
ﺍﻳﻬﻢ .. ﻛﻨﻬﺎ
ﺍﻧﺎ .. ﺷﺎﻛﻪ ﻑ ﺭﻭﺣﻬﺎ ﺣﺎﻣﻞ ﻭﺍﻟﻴﻮﻡ ﻣﺎﺷﻴﻪ ﺑﺘﺸﻮﻑ
ﺍﻳﻬﻢ .. ﺍﻫﺎ ﺑﺎﻩ ﺭﻧﻲ ﻋﻠﻴﻬﺎ
ﺍﻧﺎ ﺑﺮﻣﺖ ﻣﺴﻜﺖ ﻣﻮﺑﺎﻳﻠﻲ ﻭﻗﻌﺪﺕ ﻧﺮﻥ ﻋﻠﻴﻬﺎ "
" ﻣﻮﺩﻩ .. ﻭﺻﻞ ﻃﺎﺭﻕ
ﻳﻮﺳﻒ ﺗﻨﻬﺪ ﻭﻗﻤﻌﺰ ﺗﻼﻫﺎ .. ﻭﺻﻞ ﺍﻫﺎ
ﻣﻮﺩﻩ ...
" ﻳﺘﺒﻊ "..
ﺭﺍﻳﻜﻦ ﻳﺎﺑﻨﺎﺕ ﻫﻴﺎ ﺗﻔﺎﻋﻠﻦ
Anosha Alriany
