البارت الثامن🌹🌹🌹
مضى الوقت وأصبح الوقت مناسب لإخراج فيروز قبل حضور حازم إليهم وكان قد طلب من ممرضة إحضار عباءة قطنية واسعة حتى ترتديها فيروز وعندما جهزت ذهب محمد الي مدير المشفى وطلب منه عربة إسعاف مجهزة لنقل مريضة الي السفارة المصرية للضرورة القصوى فسمح له المدير بذلك لصداقته القوية معه وادخل محمد فيروز الي سيارة الإسعاف ومعها حسنات واحضر معه شنطة مجهزة بالأدوية والعقاقير والمسكنات حتى يستطيع التعامل مع حالاتها اذا حدث لها أي مضاعفات وبالفعل ذهبت السيارة الي السفارة وقابلهم ياسر صديق محمد وعندما راء فيروز بتلك الحالة اقسم ان يذيقه العذاب ولكن نظرت له فيروز والدموع تغرق وجهها
فيروز: ارجوك ياسيادة الملحق انا مش عايزة يحصله حاجة فنظر لها باستغراب فأكملت مش علشانه لان لو علشانه كنت طلبت تحبسوه تموتوه لكن علشان ماما حسنات ارجوك يافندم ماما حسنات مالهاش غيره انا مش عايزة غير انه يطلقني وارجع بلدي وبس ارجوك
ياسر: حاضر يامدام فيروز حاضر وخرج ياسر وأرسل في طلب قائد الحرس وابلغه ان يذهب هو واثنان ثلاثة من السفارة الى المدعو حازم وإحضاره وإحضار جواز سفره وجواز سفر فيروز وحسنات أيضاً وأمره ان يتم ذلك في سرية تامة وسرعة وبالفعل ذهب الرجل وتم إحضار حازم بالقوة بعد رفضه واحضروا معه أوراق فيروز وحسنات وايضا جواز سفره وعادوا للسفارة مرة اخري
ودخلوا للملحق العسكري واخذ منهم جوازات السفر وطلب منهم إدخاله والدخول معه وكان معه في الغرفة حسنات ومحمد وفيروز تنام علي الأريكة الموجودة بالغرفه ودخل حازم وعندما راء فيروز حاول الاقتراب منها ولكن امسكه الرجلان الذين بجواره ونظر له الملحق العسكري
ياسر: عارف لو كنت بس لمستها تاني كنت ح اخليك عبرة لمن لا يعتبر انا لولا هي والست والدتك كنت نسفتك نسف فأنفعل حازم وصاح به
حازم: انتم بتتحاموا في مراكزكم بس انا اقدر كويس قوي اعمل اللي انا عايزة غصب عن عين اي حد فوقف ياسر وانتفضت عروقة ونظر لحسنات واقترب منها وهمس
ياسر: سامحيني ياحاجة على اللي ح اعمله مش ح اقدر اسكت وكمان طلبكم مابلغش بس مش ح اعديها له ورفع رأسه واستدار واعطي لحازم بونية اوقعته أرضاً واقترب منه يرفعه عن الأرض لو انت فاكر اني بتحامي في وظيفتي تبقي غلطان انا ممكن اخدك بره السفارة واكسحك وبعدها بقى ح البسك كام قضية معتبرة بقولك ايه يا جدع انت انا مش طايق اهلك ادامي ارمي يمين الطلاق على المدام فيروز وتوقع الورقة دي علشان اثبت الطلاق والا قسماً عظماً أبلغ البوليس حالا واعمل محضر تعدي بالضرب على المدام والدكتور محمد كمان وانا شاهد والست الوالدة كمان شاهدة ايه رايك تمضي بالذوق ولا نمشيها قلة ذوق وفضايح فنظر حازم لأمه
حازم: ح تشهدي ضدي يا امي
حسنات: طلقها يابني طلقها وسيبها تروح لحال سبيلها كفاية اللي عملته فيها طلقها وارحمها من قسوتك وجبروتك وهنا نظرت له فيروز
فيروز: ابويا رماني ليك وجوزني ليك بالأجبار والغصب والتهديد وانا معرفش ليه وحرمني اسلم حتى على امي وبالرغم من كده ما اعترضتش روحت معاك ومن اول يوم وأنت بتضربني وبتهيني وبالرغم من كده عمري ماقلت لك لا ولا وقفت ادامك او حتى زعقت وبالرغم من ان المظلوم مابيقدرش يظلم وانت اتظلمت واتوجعت لكن انت افتريت وظلمتني وجرحتني وهنتني وضربتني انا ح اقولك حاجة واحدة بس ربنا حسبي ووكيلي فيك وفي اللي ظلمني ورماني ليك وماتفتكرش اني ضعيفة لا انا بس صعبان عليا ماما حسنات اللي وقفت جانبي من اول يوم وكانت بتحامي عني صعبت عليا اني احرمها من ابنها اللي استغل سكوتي وبكل جبروت بقى عمال يكسر فيا ده بالاسم اني مراتك المفروض تحميني لكن للأسف كنت انت سبب عذابي مش عايز تطلقني ماشي بس احب اقولك ربنا مش ح يسيب حقي وح ياخده منك في حياة عيني وح ابقى خصيمتك يوم القيامة واخد حقي منك كانت تتحدث وهي تبكي وترتعش من الألم و لم تتحمل حسنات كلامها ووجعها فاقتربت منها وضمتها مقبلة رأسها
حسنات: طلقها ياحازم وخليك راجل مرة في حياتك طلقها والا ورحمة ابوك انا اللي ح اعمل فيك بلاغ وارتاح منك كان حازم يستمع لكلمات فيروز ووجهه أرضاً ودموعه تنهمر على وجهه فرفع وجهه لأمه وابتسم بحزن ونظر لفيروز
حازم: اسف لكل حاجة يافيروز انتي طالق فين الورقة اللي مفروض امضي عليها
ياسر: اتفضل امضي هنا ومضى حازم على الورقة ونظر لفيروز واستدار وخرج فوراً وهنا انهارت فيروز وأخذت تبكي بقهر ووجع على حياتها التي تدمرت بسبب ووالدها فضمتها حسنات بقوة
حسنات: الحمدلله يافيروز اهو طلقك وارتاحتي ح تعملي ايه دلوقتي يابنتي
محمد: ماتخافيش يا امي انا ح ارجعها مصر انا كده كده كنت مسافر خلاص كمان يومين فنظرت فيروز له ومسحت دموعها
فيروز: ارجوك يادكتور محمد انا عايزة اسافر النهاردة والتفتت لحسنات وامسكت يدها ماما ارجوكي تعالي معايا انا ح اعيش معاكي واخد بالي منك حبيبتي فأبتسمت لها حسنات
حسنات: كان نفسي ومنى عيني بس حازم يافيروز حازم مكسور قوي انا لازم افضل جانبه مهما كان ده ابني اللي مالوش غيري ح ينفع تسافر فعلا النهاردة يادكتور محمد
ياسر: محمد هي ح تقدر اصلا على السفر الموضوع اعتقد انه صعب قوي
فيروز: ارجوكم عايزة ارجع لأمي واخويا ارجوكم ح استحمل اي حاجة بس رجعوني
محمد: ياسر معلش شوف لنا اي حجز وانا ح اسافر بيها لازم اكون معاها علشان اقدر اتابعها ومش فارق يومين من دلوقتي ح اروح بس الفندق اللي كنت قاعد فيه اقفل حسابي واجيب حاجتي واجي ونظر لحسنات ح تيجي معايا يا امي اوصلك فوضعت يدها على وجهه وابتسمت
حسنات: لا يابني روح انت انا م اقعد مع فيروز أطول وقت وبعدها ح ابقى اركب اي حاجة واروح
محمد: طيب عن اذنكم ساعة ونص ساعتين بالكتير وراجع ياسر ماتنساش تشوف لنا اي طيران
ياسر: ماتقلقش انا ح اتصرف روح وتعال وانصرف محمد حتى ينهي كل شئ خاص به ويعود لها مرة اخرى وجلست حسنات بجوارها فنامت فيروز على قدمها وهي تمسك يدها تقبلها
فيروز: كان نفسي تبقى معايا ياماما
حسنات: على عيني ياقلب امك انا كمان كان نفسي ابقي معاكي بس انتي خلاص ح تروحي لأهلك بس اوعي تنسيني يافيروزة اوعي تنسى تسالي على ماما حسنات
فيروز: مقدرش ياماما مقدرش ح اسئل عليكي دايما وانتي خلي بالك من روحك ومن حازم حاولي تخليه يتعالج ياماما اضغطي عليه باي طريقة بلاش تسيبيه لشيطانه
حسنات: ان شاء الله ياقلبي انتي
فيروز: اقراءي ليا قرءان ياماما الألم جامد قوي
حسنات: حاضر ياقلبي ربنا يسوقك يادكتور محمد
🌺🌺🌺
في شقة سهيلة تجلس وحيدة تبكي حالها ولكن شيطانها مازال يحركها ويوسوس لها أن الكل مازال يحب فيروز فأخذت تحدث نفسها
سهيلة: حتى وانتي مش موجودة برضة محور وجودهم انا فهد يقولي انا مش ممكن المسك ليه هي أحسن مني في ايه انا واثقة اني أجمل واحلى بس ماشي انا وراك وراك لما نشوف انا والا المخفية دي وأخذت تنظر لنفسها في المرأة وهي مغرورة بشكلها الخارجي وتنسى فساد شكلها الداخلي وخطئها التي نسته وكأنها لم ترتكب معصية وكبيرة من الكبائر ولكن ان ربك لبالمرصاد
وبالاسفل تجلس امها واختها مع جدتهم وفريال
زهرة: وبعدين يا امي مش تخفي بقى والله احنا قلبنا وجعنا مش كفاية علينا اختفاء فيروز فنظرت لها امها وابتسمت وتحدث ببطء شديد
امال: في رو ز ح تر ج ع انا حا سة وانا ح ا خف
فريال: ان شاء الله يا ماما ان شاء الله حبيبتي فأقتربت ريم من جدتها تحتضنها وتقبل رأسها
ريم: ان شاء الله يا تيتا تخفي وتقومي بالسلامة وترجع فيروز وترجع ليالينا الحلوة وانا زي ما وعدتك بذاكر من نار وح ادخل هندسة زي مافيروز كان نفسها فأحتضنتها الجدة وقبلت رأسها
وكان الجد يجلس في مكتبه ومعه ولده احمد
مصطفي: اخوك عامل ايه
احمد: زي ماهو يابابا قاعد في فندق وطول الوقت قاعد مع صاحبه رجب ومدحت بيه ابو الست سهيلة هانم
مصطفي: انا حاسس بحاجة في موضوع سهيلة ده عاملة زي ماتكون لعبة عملتها علشان تتجوز فهد لأنها عارفة ان فريد وعمرو كل واحد فيهم مرتبط بفريدة وريم
احمد: كله ح يبان يابابا فهد استحالة يقبل بوجودها في حياته على طول وهو قالها سنة وح يطلقها بس كان لازم حد يعمل كده علشان خاطر زهرة بس ربنا يسهل
🌺🌺🌺
عاد محمد الي السفارة ودخل فوجد فيروز تتألم فأعطاها مسكن ونظر لياسر
محمد: عملت ايه يا ياسر
ياسر: تمام يا محمد حجزت لكم على الطيارة المغادرة النهاردة الساعة ٩ يعني كمان ساعة ونص ان شاء الله تكونوا في القاهرة على ١٢ بالليل
حسنات: يالهوي ده متأخر قوي ح تعملي ايه يابنتي ده انتي في الإسماعيلية
محمد: ماتقلقيش يا امي احنا ح نطلع على المستشفى عند بابا اصلا في عربية إسعاف ح تكون في انتظارنا لاني ح اضطر ادي مدام فيروز مخدر طول الرحلة علشان تستحمل الوضع فنظرت فيروز له وهي تبكي
فيروز: عارفة اني لخبط كل حاجة لحضرتك وحملتك مسئولية مالكش دعوة بيها
محمد: ماتقوليش كده احنا اخوات وانا اعتبرتك اختي غصب واقتدار فأبتسمت فيروز من بين دموعها
فيروز: متشكره قوي يادكتور محمد بس انا عايز اتقل عليك شوية كمان
محمد: قلنا بلاش الكلام ده اؤمري عايزة ايه
فيروز: عايزة انزل من الطيارة اروح بيتنا امي وحشتني واخويا وجدي وجدتي ممكن حتى ممكن حضرتك بس تحجز لي عربية او حتى بيجو وانا اروح فيها
حسنات: يالهوي لوحدك في الوقت ده طيب استنى في المستشفى والصبح روحي
فيروز: ياماما ح يحصلي ايه تفتكري بمنظري ده
محمد: كده ازعل منك يا امي تفتكري انا ممكن اسيبها وحدها وطالما هي مصممة ترجع الإسماعيلية على طول انا ح اطلع معاها بعربية الإسعاف لغاية بيتها ماتقلقيش حضرتك انا مش ح اسيبها غير في المستشفى أو في بيتها
حسنات: ربنا يوقف لك دايما ولاد الحلال ويرزقك كل الخير
فيروز: ماما حضرتك روحي بقى لازم تبقي جانب حازم سامحيه ياماما انتم مالكوش غير بعض وساعدية يتعالج هو كويس بس اللي حصله أثر عليه بشكل وحش ربنا يهدي له حاله فنظر لها ياسر باستغراب
ياسر: انتي بتدعي له بعد اللي عمله فيكي انا مش قادر اصدقك انتي ازاي كده فأبتسمت بألم وعيونها تلمع بالدموع
فيروز: الفضل في ده يرجع لحبيبي الإنسان الوحيد اللي قلبي دق له واستحالة يدق لغيره علمني اسمع كويس للي ادامي وبعدين احكم قلبي مع عقلي وحازم اتظلم جامد قوي ومش اتظلم وبس لا ده ادمر جامد دمروا رجولته اعتقد انه احساس قاتل وعلشان كده كنت بستحمل بس بتمنى يتعالج ويرجع انسان سوي فنظر لها محمد
محمد: انتي انسانه جميلة قوي يافيروز بس كان فين حبيبك ساعة ما باباكي عمل كده فدمعت عيونها
فيروز: لو كان موجود كان بابا عمره مايجرؤ يعمل كده فيا لكن للأسف كان مسافر وفي مكان بعيد عن شبكة المحمول يعني اكيد ماعرفش غير لما رجع منه وزمانه قالب الدنيا عليا انا عارفة
ياسر: للدرجة دي واثقة فيه
فيروز: لانه اماني وحمايتي لانه فهدي انا وبس وأنا فيروزته هو وبس فأبتسموا جميعا لقوة هذا الحب وتنهد محمد
محمد: اوعدنا يارب بواحدة تحبني كده فضحكوا جميعاً ونظرت له فيروز
فيروز: بكره ربنا يرزقك بنت الحلال اللي تنور حياتك وتنور حياتها
ياسر: طيب يالا بقى لازم تتحركوا خلاص انا سهلت لك كل حاجة انتم ح تنزلوا من عربية الإسعاف على الطيارة ماشي يا محمد وانت كلم الدكتور عادل يبعت لك عربية إسعاف على المطار وانا برضة ح اعمل اتصالاتي علشان تخرجوا من الطيارة على عربية الإسعاف على بره على طول ماشي واول ماتوصلوا طمني
محمد: حاضر يا ياسر انا مش عارف اشكرك ازاي
ياسر: عيب عليك انت اخويا ياجدع ومدام فيروز كمان اخت فاضلة ودلوقتي ياحاجة حسنات ح ابعت معاكي حد علشان يروحك
حسنات: ربنا يخليك انا ح اروح معاهم المطار وقبل ما يدخلوا ح انزل واركب اي حاجة انا عايزة افضل مع فيروز على قد ما اقدر فأحتضنتها فيروز وقبلت يدها
فيروز: لا يا امي روحي انتي علشان ماتتعبيش في الرجوع كفاية كده وان شاء الله اول ما اوصل صحيح ح اتواصل معاكي ازاي يا امي
حسنات: ح اشتري تليفون انا ماكنتش عايزة اشيل تليفون علشان معنديش حد يكلمني لكن دلوقتي خلاص ح اجيب تليفون هاتي انتي اي رقم اقدر اتصل عليه في القاهرة
فيروز: ح اديكي رقم اخويا يا امي واول ماتجيبي خط كلميني علشان اقدر اكلمك على طول
محمد: ثواني ثواني وفتح هاتفه متصلاً بوالده فوجد هاتفه مغلق فقام بالاتصال بوالدته
محمد: مساء الفل ياست الكل ياقلبي انتي
جواهر: حبيب قلب ماما انت عامل ايه ياعيوني
محمد: انا تمام يا امي السيد الوالد عندك ياحبيبتي أصل تليفونه مقفول
جواهر: اه ياحبيبي ح يكلمك اهو محمد انت وحشتني قوي جي امتى بقي
محمد: انا ح اركب طيارة ٩ النهاردة ياست الكل فصرخت جواهر بفرح
جواهر: بجد يامحمد بجد حبيبي يعني ح اشوفك النهاردة يااااااااه خد بابا معاك اهو انا يادوب اقوم اعمل لك كل الاكل اللي بتحبه واغلقت الهاتف لعادل ولما تعطي له فرصة للرد
عادل: اهلا يامحمد ازيك يادوك
محمد: الحمدلله يابابا انا تمام بابا ماما مشيت من جانبك طبعاً فضحك عادل
عادل: اه ياسيدي قامت تجري علشان تعملك الاكل اللي بتحبه
محمد: بابا اسمعني كويس انا عايزك تطلع عربية إسعاف من المستشفي تستناني عند مهبط الطيارة ح يبلغهم انه من طرف العقيد ياسر الفرماوي فوقف عادل مكانه بقلق
عادل: محمد في ايه انت فيك ايه حصلك ايه يابني
محمد: بابا اهدي مش انا دي مريضة مصرية ولازم انزل بيها وانا كنت كده كده خلاص نازل بعد بكره ف بدرت بس الميعاد المهم انا مش ح ارجع على طول انا ح اطلع على الإسماعيلية الأول لازم اوصلها لأهلها
عادل: محمد
محمد: بابا ارجوك مافيش وقت احنا لازم نتحرك للمطار المهم انا ح افتح تليفوني المصري ابقى خلي السواق يكلمني عليه ماشي وطمن ماما انا ح ارجع اول ما اوصلها
عادل: انا ح استناك حبيبي لغاية ماتوصل
محمد: تمام ياحبيبي اشوف وشك بخير ان شاء الله
عادل: ان شاء الله حبيبي لا اله الا الله
محمد: محمد رسول الله
وأغلق محمد الهاتف مع ابيه وقام بنقل كل البيانات الموجودة عليه الي هاتفه المصري ثم امسك الهاتف واتجه لحسنات اتفضلي يا امي ده تليفوني وعليه خط كمان حضرتك خليه معاكي علشان انا كمان اعرف اطمن عليكي وح ادي الرقم انا لمدام فيروز فنظرت له حسنات بذهول وهزت رأسها
حسنات: لا ياحبيبي مانحرمش منك انا ح اجيب خط والله ماتقلقش
محمد: ح ترفضي هديتي ليكي يا امي والله ده جديد مش قديم
حسنات: يابني انا مش بقول على كده بس ده رقمك
محمد: بصي ح اقول لحضرتك حاجة اعتبري انك بتعملي لي خدمة واي حد يكلمني يسئل عليا قولي له اني سافرت مصر لما اكلمك ابقى قولي لي مين اتصل بيا ايه رايك فضحكت وقبلت رأسه
حسنات: ماشي حبيبي حاضر يالا بقى علشان ماتتاخروش فوقف ياسر وودع محمد وفيروز ونظر لحسنات
ياسر: بصي ياحاجة في عربية ح تطلع وراكي وح تدخل معاكي لغاية سلم الطيارة علشان تكوني مع مدام فيروز لآخر وقت ولما تنزلي تركبي فيها ح يوصلك لحد البيت وده الكارت بتاعي اي حاجة سامعه اي حاجة تحتاجيها كلميني على طول في اي وقت متفقين فنظرت له وابتسمت
حسنات: متفقين يابني ربنا مايحرمني منكم يارب
ياسر: يالا دلوقتي اتكلوا على الله في رعاية الرحمن ح ابقى على اتصال بيك يامحمد وابقى ادي رقمي لمدام فيروز لا اله الا الله فردوا جميعا محمد رسول الله وانصرفوا الثلاثة وصعدوا الإسعاف التي كانت في انتظارهم وقام ياسر بتنظيم كل شئ حتى يسهل لهم كل شئ ووصلوا للمطار ودخلت الإسعاف حتى موقع الطائرة وهبطت حسنات منها ونزل الفراش التي تنام عليه فيروز وهبط محمد ايضا وارتمت فيروز في أحضان حسنات وهم يبكون ثم قامت حسنات باحتضان محمد أيضاً ونظرت لهم
حسنات: اوعوا تنسوني سامعين وكانت فيروز منهارة من البكاء فهزت رأسها وهي تمسك يدها وتقبلها
فيروز: مش ح يحصل ح اكلمك على طول ياماما خدي بالك من نفسك حبيبتي
حسنات: وانتي كمان ياقلب امك محمد رسول الله حبيبتي ونظر محمد للممرضين
محمد: اطلعوا لمدام فيروز بس بالراحة على قد ماتقدروا وانا وراكم وقام بتوصيل حسنات للسيارة وقبل راسها وطلب منها الدعاء لهم وانصرف عائدا الي الطيارة وكانوا قد وصلوا في ممر الطائرة واتجهت المضيفة لهم
المضيفة: مدام فيروز والدكتور محمد
محمد: ايوة حضرتك
المضيفة: اتفضلوا معايا محجوز لحضراتكم فيرست كلاس علشان المدام تقدر ترتاح واتجهت بهم الي المكان المخصص لهم وعدلت الكرسي حتى تستطيع فيروز ان تستلقي عليه وقام محمد بشكرها وأخرج حقيبته واعطي فيروز حقنة
محمد: مدام فيروز دي حقنة مخدرة ان شاء الله تخليكي تنامي طول الرحلة علشان ماتحسيش بأي ألم
فيروز: بجد انا مش عارفة اقول لحضرتك ايه انت انسان عظيم
محمد: ماتقوليش اي حاجة اتمنى تعتبريني اخ ليكي
فيروز: اكيد يادكتور محمد ده شرف ليا فضحك
محمد: في اخت تقول لاخوها دكتور فابتسمت
فيروز: حاضر يا ابيه محمد ربنا مايحرمني منك
محمد: غمضي عينك انتي خمس دقايق بالكتير وح تكوني نمتي
فيروز: ارجوك يادك فنظر لها محمد فابتسمت ارجوك يا ابيه ماتقومش من جانبي
محمد: ماتخافيش يافيروز انا مش ح اتحرك من جانبك وذهبت فيروز في النوم
🌺🌺🌺
