اعقل مجنون

البارت العاشر

ممل أن تكون عقلانياً دائماً
ففي بعض الجنون حياة..

__________

فهد : من وين تحب نبدأ..

أدهم : من نقطة تحولك لإنسان كاسر..

فهد : من اخذت بايسكلي وطرت بيه سريع ، تدري حبيت الشعور من أسوق وجنت فرحان حاسس مشتري افخر انواع السيارات ، بس الله لا يوفق اللي جان منتظرني حتى يصطادني، مشيت بكل سرعتي بدون ما التفت وراية وصلت للبستان وحبيت امشي بداخل الزرع ، وشافوني ولد الكلب ...

وسرد باقي تفاصيل الحادثة من اخذوه وشلون تم الإعتداء لمدة ست ايام وسبع ليالي ، عمو ادهم يترجم للدكتور والاخير يكتب ، عاكد حاجبه..

فهد : وتعرف بعدما انعرف وضعي شلون ابوك احتوى الموقف بجمع عمامك وفضيحتي بدل تكتمه على الخبر والي زاد الطين بلة ، نظرتهم اللي تغيرت عني والكل صار يشوفني نكرة ،

الوحيدة بيهم اللي احتوتني وتقبلتني مثلما اني بكل عيوبي ومساوئي اللي هما خلقوها بداخلي ، هي بنت عمي وزوجتي الأولى رواية ، جانت تسمعلي وتحاول تسحب كمية الغضب اللي بداخلي وتهدأ من روعي ،

وبيوم من الأيام صارت مشكلة وياها و وية باقي ولد عمامي جنا كلنا صغار يعني نتعارك ونتصالح ، بس من شفتهم ضربوها دمي احترك عليها ،كمزت وكطعتهم بالواير خليت صراخهم يملئ المكان ، بسبب هذه الحادثة ، اتفقوا بالاجماع على دخولي للمصح اول مرة..

امي تجمع بجنطتي ساكتة بدون ما تنطي رأيها وكأنما هي هم حبت تخلص مني ، وتخفف عنها اعباء الحمل مالتي ،تقربت منها احجي خايف واقرض بأظافري تعبان مهدود حيلي واني بهذا العمر ، ما جنت ادري راح احط رجلي على اول مصايب حياتي ...

فهد : يمة ماريد اعوفج اخاف وين انام هذا فراشي متعلم عليه.

جاوبتني بنتر..

فردوس: اني تعبت من وراك يومية مشكلة يومية مسويلك حجاية وية عمامك ومنا شغل البيت شنو اصير اني ..

فهد : يوم راح اصير عاقل بس لا تخليهم ياخذوني عفية.

فردوس : ذاك ابوك وروح احجي وياه.

فهد : اخاف منه يضربني.

فردوس : ما راح يضربك صدكني انت بس روح وحاجيه هسه يقنع..

فهد : انتِ احجي وياه.

فردوس : وخر فهد عندي شغل بكد شعر راسي شوكت اخلصه.

احجي وياها وعيوني تتنقل بينها وبين ملابس الموت الكاعد تسفطهن الية، كاعد تحضر بكل اريحية جنطة نهايتي..

باوعت لعمو ادهم يمسح دموعه بشهكة مخفية واني تبللت ملابسي هالكد ما بجيت وفهد يافهد اول مرة اشوفه يرجف ايده تتحرك بارباك تتحسس وجهه ورقبته ، ينشف العرق الصب من اثر التوتر الكاعد يمر بيه ، تنهد عمو ادهم وكال.