اعقل مجنون

البارت السادس

لا يكون حكيماً من لا يخاف من المجنون..

________

Journey to the future
رحلة الى المستقبل..

ليلة 1\1\2022

ايفين
بعد دقائق قليلة نودع سنة 2021 ونستقبل سنة جديدة من عمرنا نتأمل نعيشها مرتاحين .

أول سنة راح أحتفل ببيتي الجديد ، سويته مثلما أحب ، فهد جان يدفع فلوس وبس بدون اعتراض ولا تعليق، البيت جان كبير و واسع وقريب من بيت عمو يوسف ، بهذه الفترة رجع فهد يشتغل ويه عمو بالسوك لأن ترك دوامه بشكل نهائي ، والحمدلله حياتنا مستقرة..

طلعت اني وعلاوي اشترينا زينة وحلويات حتى ثاني يوم نحتفل كلنا سوة ، وقررت اسوي عشا ، رجعت للبيت خابرت عيالي وبيت هجان وعلي وامه عزمتهم ، رواية اعتذرت ، من سمع فهد ضاج بس ما بينها سكتت وماحجيت شي ..

ثاني يوم حضرت البيت وعلگت الزينة وبلشت بالعشا جانت الساعة ستة ونص المغرب ، اندك الجرس باوعت بالكاميرا نرمان رحت فتحت الباب مديت راسي جان هجان بالسيارة رفع ايديه سلمت علية وراح ، دخلت نرمان اخذت منها تالين بوستها ودخلنا للبيت .

ايفين : نور البيت والله.

نرمان : بوجودكم حبيبتي .

ايفين : شلونج؟

جرت نفس وكالت..

نرمان : زينة على الله.

ايفين : صار شي جديد؟

هزت راسها عيونها دمعت وكالت.

نرمان : لا

ايفين : الله يهديه يارب.

نرمان : امين ، أروح أصلي وأساعدج بالعشا.

ايفين : خلصت ماعندي شي بس أخلي الدولمة على النار قبل لا يرجع فهد ويخربها..

نرمان : لازم نخلي حراسة على المطبخ اذا رجع من وقت..

ضحكت وگلتلها..

ايفين : تصدكين من كعدت ببيتي لحد الان ما مسوية دولمة ولا جايب السلك للبيت ولا حتى الشجر ولا بتيتة واني كلهن أحبهن ..

نرمان : لعد شلون تسوگتي اغراض الدولمة؟

ايفين : وية علاوي الله ينطيه العافية لهذا الولد شايلني شيل وهو المصبرني على مصايب أبوه ودكاته الماتخلص..

ضحكت نرمان فرشت سجادتها وكالت.

نرمان : بعده على سوالفه؟

ايفين : هجان بطلهن؟

نرمان : لا رجع للأتعس.

ايفين : نور الله عليج ، بالأخص هسه رجعت علاقتهم قوت مثل قبل وعندج الحساب ، كلما أحجي وياه أگوله لا تتأخر يگولي وية هجان رايح قابل وين وأنجب وأسكت.