{ناجيه و ضحيه}

الجزءالثاني..بارت ١٢

شِتاتُ ألنساء

..............................................

ليث.. دخلت واشوف شمس واكفه وترجف ولازمه التلفون
اخذت التلفون من ايده
ليث: شبيج
شمس: مابيه
ليث: شنو امج بيه شي
شمس: لا لا
شمس.. ليث  تمدد على القنفه واني واكفه اتراجف
من صخام الطمني اني شسويت
اني شلون احجيله واني ادري بيهم هذول  ماعليهم امان
امي شسوله ياربي
من كون نكطع الساني وماحجيت
ياربي دخيلك الله ياخذكم ويكفينه شركم
شمس.. دخلت الحمام فرجت وغسلت وبعدني افكر
طلعت كدام المرايه ضفرت شعري  وشديته ونوب صفنت
معقوله يسون شي
لا اصلا همه شعرفو هوا اني شكلت بس اسمه
بس هذول مامنهم خير
ياربي ولله اني  ثوله شحجاني
كلبي انقمت كلش دخيلك يالله
وبالي يم امي خاف سوله شي
ليث: شمس
شمس: ها ها
ليث: شبيج تمشين وتصفنين اكوو شي
شمس: لا لا
شمس.. باوعت لليث واني نعست كلش وهوا كام دخل الحمام
وطلع ويباوعلي
ليث: رح تضلين واكفه
شمس: لا رح انام هسه
ليث: اي رح اطفي الاضويه
شمس: تمام
شمس.. ليث طفه الاضويه واني اباوعله راح على الجربايه رفع الفرشه وتمدد
عبالي رح ينام على القنفه
تمدد ونطه ضهره ولزم تلفونه يكلب بي
اني ستحيت شلون رح اتمدد ابصفه
وبهاي بدلتي
خاف تصعد واني نايمه  حتاريت بعمري
واستحي ابدل
رحت وشلت الغطه وتمدد بس جسمي كش
تمددت وبتعدت كلش صرت بالطرف وتغطيت وأخاف اتحرك
حتى اخاف احك ايدي
ليث.. درت عليه وصايره بالطرف  وجنه واحد مشلول
ليث: شبيج رح طيحين ادني
شمس: لا مرتاحه
ليث: بكيفج
ليث.. عفت تلفوني وجريت الغطه وغطيت راسي ونمت
شمس..جر الغطه حيل ونام  واني ضليت بمكاني لمن تأكدت هوا نام
او ما تأكدت بس شفته ماتحرك وعده وقت
كلت نام
ادنيت ودرت  علي  وهوا منطيني ضهره
وتغطيت عدل وصرت اباوع لضهره
شوي دار واني نزيت ورجعت ليوره
طلع نايم
بقيت صافنه على وجه  واتمعن بجماله
ليث.. ما نمت انا وهيه بس تحوس
درت عليه واباوعله بنص عين مفتوحه وهيه صافنه عليه ومبتسمه
وترفع ايده تأشر على عيوني وشفايفي
ولله عليه سوالف جنه جاهل
نوب حطت ايده على حلكه
نوب دخلته جوه البطانيه ،محتاره شتسوي
شمس.. رجعت درت احسن  لان نعست ..
ليث.. نطتني ضهره وانا هم درت وانا اضحك
ليث: تصبحين على خير
شمس..فتحت عيوني مصدومه
شو هاذ كاعد
شمس: اجمعين
شمس..ياربييييي ولا اكعد خن اخمد احسن
انشالله ماشافني ببتسامتي الغبيه هاي..
....................................................
ليث.. فتحت عيوني وضوة الشمس مالي الغرفه
بس فتحت عيوني لكيت شمس بوجهي
شعره على وجه
وحاطه ايده جوه خده
ما متغطيه عدل والردن مال البدله نازل وطالع جتفه
وفاتحه حلكه شوي
شكله بريء
شفته و درت وفركت عيني
استغفرت  وجنت اريد ارجع انام بس  رفعت الغطه وكمت ماريد اضل نايم بصفه
غسلت وطلعت من الغرفه
....
شمس.. كعدت ومالكيت ليث بصفي
كمت وغسلت وفرجت وبدلت وتمكيجت وجنت فد متونسه ومرتاحه
كملت وطلعت من الغرفه صبحت على اهل ليث ولكيته توه كاعد يتريك على الميز
امه كلتلي اكعد اكل وياه
وكعدت كدامه اكلنه سوه
كملنه ولميت اني المواعين غسلتهن
وليث بدل وطلع
سألت امه اذا هوا بالدوام كلتلي لا بس طلع عنده شغله ويه اصدقائه علمود سياره هيج مافهمته عدل
دخلت اني ادرس بالغرفع لماً اذن صليت وطلعت اساعد عمتي بالغده
واجه ليث وصبينه وكعدنه ناكل واني كعدت بصف ليث بس هم مستحيه من اخوانه
ام ليث: ها يمه بعدين تجيب ليان  عبالي هسه تجيبه وياك
علاء: اي تره شتاقيناله البيت فاهي بلياهه
ليث: اي عساس اجيبه بس رتاج رادته يتغدون سوه
فكلت العصر اطلع اخذه واعشيه بره
ام ليث: ها
لعد خوش اخذ شموسه وياكم وطلعو وتونسو
شمس..باوعت لليث وبتسمت وهوا ما باوعلي
ليث: الله كريم
ام ليث: اخذه يمه شسالفه
ليث: انشالله
شمس.. لاهوا كايل اي ولاهوا كايل لا
خلصت اكل اني وكمت 
على ما خلصو وساعدت عمتي بالمواعين
ودخلت الغرف وليث بره يم  اخوانه ما دخل
بقيت ادرس انتضره يدخل
ساعتين هوا ما دخل واصلا يأست يدخل
صارت ب٤
انفتح الباب ودخل واني كاعده اطلع ملابسي حتى ادخل اسبح
ليث: رح تبدلين
شمس: رح اسبح
ليث: بدلي فد مرة  امشي وياي ناخذ ليان
شمس.. فد تونستتت اول مره  اطلع  هيج طلعه ونسه  او عشه بره
وماكو احد يضوجني ويذلني
طلعت ملابسي ودخلت سبحت وبدلت وطلعت من الحمام
وليث كاعد يبدل
وكفت كدام المرايه خفت احط مكياج خاف ما يقبل
لفيت الشال وماحطيت شي وهوا طلع
كملت وطلعت لكيته بره واكف منتضرني ويسولف ويه علاء
شمس: اني كملت
ليث: يلله امشي
ام ليث: ها يمه  تتعشون بره مو
ليث: اي
ام ليث: تمام يالله بالعافيه مقدماً
شمس: الله يعافيج
شمس.. طلع ليث وطلعت وراه امشي وجني اول مره امشي
احس روحي مستحيه مدري متفشله 
ليث فتحلي باب السياره وصعدت وهوا سد الباب و صعد
شمس: رح تضل تفتح الباب وتسده
ليث: ما اوثق بيج
شمس:  ضلت بخاطرك هذيج الركعه
كتلك اسفه  بعد ما اسده  ورح انتبه
ليث ضحك: كتلج ما اوثق
شمس.. اني درت على الجامه وضحكت
ليث حرك السياره ومشه
واني اباوع لطريق بس جنت متونسه ومتحمسه مثل الطفل
لفت انتباهي كامره موجوده  بصف ليث
شكله قديم
ضليت اباوعله عجبتني
وعليه مداليه ورده هيج وسوالف
وكف ليث السياره كدام بيت
ليث: انتضريني اجيب ليان واجي
شمس: تمام
شمس.. نزل ليث وصار فضولي كلش هلكامره
اشتهيت الزمه وخفت خاف مال صاحبه شي عيب
بس كأنما احد ويشاورني .. اخذيه وفتحيه
جريت ايدي ولزمته واباوع لدكم مالته منين تشتغل
شغلته وطلعت بوجهي صورة  لليان
شمس : فدوة
شمس.. بقيت امشي بالصور وطلعتلي صور لليان هيه ووياهه بنيه
ماعرفته وضل ببالي هاي منو الي وياها
صور ليان وعلاء
ومروة واسراء وليث
ضليت مبتسمه واضحك
اجيت ارجع الكامره بس ليث تأخر
كلت خل اكمل اشوف الصور حلوة ..
شمس..واني اشوف بصور ليان
فجأة تطلعلي صوره ليث ويه مرة
مرة بيضه شعره اسود وعيونه كبار
بوجه شامه هيج على حنجه
راحت الابتسامه من وجهي
منو هاي؟؟؟
عبرت باقي الصور
كل صور ليث وياها
-وهمه لازمين ايد ب ايد
-ليث حاضنه
-هيه تبوسه بخده
-صورة وهمه مبدلين
-صور هاي البنيه شاليه طفله مكمطه
-وصورة ليث شايله
هاي ليان الي شايله 
هاي ام ليان
شمس.. مثل الساعقه اجت بمخي
صورة للبنيه لابسه مثل بدله النوم وليث نايم بصفه ويبوسه بخده حيل
صورة وهوا حاضنه
وهوا لازم شعره
شمس.. سديت الكامره ورجعته
بس حسيت نااااار شبت بكلبي
نار وطشت بكل روحي
مثل البركان احس روحي رح انفحر
شعور يكلي هاي ام ليان
وشعور يكلي لا
شلون لا  اذا مو مرة ليث لعد منو وكل هلصور وياها يعني اكيد مرته
الف سؤال صار  ببالي قاطعهم ..ليث صعد السياره
شمس..باوعتله وصعد ليان وحطه بحضنه وسد الباب
ليث: وهاي شموسه
شمس: هلاااو
شتاقيتلج
ليان: اني هبين
شمس: فدوة حبيبي تونستي
ليث: اي تونست تونست ويه خاله رتاج اتشبعج دلال هاا
شمس.. ليث باس ليان بخده وحرك السياره
ليث: اي بابا شسويتو
ليان: لحنه مطعم كلينه واااااجد
ليث: وبعدين
ليان: اجينه البيت ولعبنه ويه خاله ياسمين
بس انت ما طيتني كامره
ليث: اييي هاي انتِ نسيتي غير اذكريني
ليان: صولنه  بتلفون رتاج
ليث: صولتو صول حلوة
ليان: اييييي
ليث: ونمتي يم رتاج
ليان: اي يمه واجت خاله ياسمين نامت يمنه هم
ليث: هااا
اي هسه هم رح نطلع نتعشه انا وانتِ وشموسه
ونتونس
شبعي
ليان: شموسه هم ويانه
شمس..باوعتله وابتسمت
ليث: اي ليش ماترديه
ليان: لا اريده
ليث: اي هسه حروح مطعم الي انتِ تحبي
شمس..ليث رجع باس ليان وشغل اغاني ويغني وليان تصفك
اني صفنت على الطريق واباوع
ضل باي يم الصور
حطيت ايدي على كلبي الي احس صارت بي نار
احاول افهم نفسي انو هاي جانت مرته وتوفت والله يرحمه ما داعي افكر بالموضوع
بس يرجع الف سؤال  ببالي
-ليش امبقي الصور بالكامره
-معقوله يرجع ويباوع بهذني الصور
-بعده يحبه؟؟
.............................
ليث..انتبهت لشمس ماله خلك من صعدت ودايره وجه على الجام
وصلنه المطعم ونزلت ليان وانا اجره ب اديه واشياله امرجحه وهيه تضحك وشمس وراي تمشي وساكته
دخلنه وكعدنه وهيه حطت ايده على خده
شمس.. ليث حط المنيو كدام ليان ويسأله شتريد
ليث: شمس شنو مشتيه
شمس: وياك شنو تاكل
ليان: اختالي اختالي
ليث: على كوله ليان اختالي
شمس: لا اني ماعرف 
اكل نفسك
ليث: بلله الي اريد اطلبه انتِ ماتحبي
شمس: لا احبه
ليث رفع حاجبه وابتسم: بكيفج
شمس..ليث طلب وكعد يسولف ويه ليان واني اباوعلهم
وببالي صورة هوا وهذيج البنيه مرته
هذيج الصوره هوا يبوسه بخده
صفنت على ليث واني اتخيله ويه مرته القديمه
من يحضنه ويبوسه
ويسولف وياها
اتخيل لحضاتهم الحلوة ..
ليث: وين صافنه
شمس..لكيت ليث حاط وجه بوجهي ورافع حاجبه وحتى ارتبكت من نضرته
شمس: ماء هيج سرحت
ليث: الي يصفن وراه سالفه هاذ
شمس: لا شوراي ما وراي هيج صفنت عادي
ليث:جوعانه
شمس: اي شوي
ليث: شلون راسج
شمس: راسي شبي
ليث: مو جان يأذيج امس ومصدعه
شمس: ها لا صار احسن
ليث: حلو
شمس.. اجه الاكل واني اباوع لليث يوكل ليان ب ايده ويحط بحلكه
ونوب خلاها هيه تاكل
ليان: بابا
ليث: ها
ليان: هم جنت توكل ماما مثلي
ليث: اي هسه اكلي عوفي الحجي
ليان: ماتوكل شمس
شمس..ليث باوعلي وواحد صفن بوجه الثاني
ليث: ليان اكلي
ليان: شمس انتِ تحبين ابوي
شمس..انصدمت وضليت اباوعله وباوع لليث
ليث: شنو هل اسأله
ليان: بابا رتاج كلتلي اكول
ليث: رتاج
ليان: شمس تحبين ابوي
شمس: ليان مايصير الحجي على الاكل لاتغصين
اكلي ومن نصعد بالسياره انسولف
ليان: اني بكيفي احجي
ليث: ليااان
ليان: بابا
ليث: سكتي واكلي
شمس.. ليان شمرت الخاشوكه على الصحن وجتفت اديه بس انتبهت لليث عصب وصار يخزر بليان
ليث: رح احسب من ١ لل٣ وترجعين تاكلين وتحترمين نفسج
ليان: ماريد
ليث: واحد
ليان: ماااريد
ليث: ثنين
شمس..ليان نزلت ودفعت الكرسي وطلعت تمشي واني  كلش انصدمت منه شبيه هيج بسع كلبت توه تضحك ويه ابوهه
ليث كام بسع وعصب كلش ولزمه من ايده وشاله
ورجع وحطه على الكرسي وكعد
ليث: تاكلين لو لا
ليان: لا
ليث: لعد كعدي عاقله
شمس..ليان جتفت اديه ودنكت
ليث: شمس كملي اكلج
شمس.. من شفت ليان هيج وليث  معصب  انسدت نفسي
وبقيت اكلب ب الاكل
وليث يباوعلي
ف اكلت حتى لا يحجي
كملنه وطلعنه وليان مغندبه
اجيت اصعد كدام وهيه وكفت بوجهي
ليان: اني اكعد كدام كل مره يم ابوي
ليث: اي بابا هسه صرتي جبيره كعدي ورة
ليان: من اجت شمس وانت تكعدني وره
اريد اكعد كدام
ليث: انتِ منين جايبه هلسان من يمتى تحجين هييج
صعدي وروه
ليان: بابا
شمس: خلص اني اكعد ورة اصلا ما احب الكدام
شكس.. خليت وصعدت ورة وليان صعدت كدام وصعد ليث وحرك وما حجه شي
وصلنه البيت  ونزلت اني وسديت باب السياره
رفعت راسي وليث يباوعلي  جنه يكلي انا جاي افتحه واسده الج
نطيته ضهري ودخلت  وماكو احد
دخلت الغرفه وجنت ارجف 
نزعت حجابي واسمع ليث يحجي ويه امه
طلعت هدومي ودخلت الحمام وقفلت الباب
ووكفت جوه الدوش وراسي مصدع بشكللل
المفروض اتونس بس انغثيت من ليان على السوته ويه ابوهه
وومن ورة الصور الي احاول ما اهتم الهن
طلعت ولكيت ليث مبدل وواكف
ليث: نعيماً
شمس..  وكفت كدام المرايه وانشف شعري
ليث.. حاجيته ما ردت وما باوعتلي
ليث: احاجيج
شمس: ها ما سمعتك
ليث: شبيج ،ضجتي من ليان
شمس: لا عادي شسالفه
شمس.. ليث طلع وسد الباب
مشطت وحطيت كتاب الاحياء وكعدت اقره
ووره ساعه يلله دخل ليث وشافني اقره ما حجه شي
تمدد على الفراش ودخلت ليان
هوا دار ونطه ضهره
ليان: بابا
شمس.. ليث مارد عليه
بقيت اني اباوعلهم
ليان صعدت على الجربايه ولزمت ايد ليث وهوا ما مقلده
ليان: باباا
شمس.. ليث جر ايده من ليان وتغطه وما حاجاهه
ليان: اسفه لا تزعل يلله بابا
ليث دار على ليان: لا تحجين وياي طلعي وسدي الباب
ليان : بابا
شمس.. ليث يباوع لليان وهيه مدنكه
ليان: اسفه
ليث: اذا عديته بعد ماكو طلعه
ليان: ماعيده
هيه خاله رتاج كلتلي سوي هيج
ليث: رتاج
ليان: اي اي
ليث: يصير خير
ليان: اسفه
شمس..ليث جر ليان بحضنه وباسه وكعد يدغدغه
وحطه بحضنه  ويباوعون سوه بالتلفون
كملت اني اقره واقره
وكعدت بالكاع اقره
وليان نامت وليث شاله حطه بفراشه ورجع بفراشه
صارت ب٢ واني نعست وبقالي شوي واخلص  وجنت فرحانه حتى باجر بس  اراجع واضبطه
ليث: كومي نامي يالله ماتعبتي
شمس: لا خل اخلص
شمس..ليث دار وجه وعاف التلفون ونام
كملت ادرس وصارت ساعه ب٤ الفجر واخيرا كملت الاحياء
بس بطني جانت تأذيني بشكل
من رجعنه وهيه تخبط وتأذيني
واحس اريد اذب من راسي
سديت الكتاب  واني حاطه ايدي على بطني
كمت ومتأذيه واتلوه
حطيت الكتاب بالجنطه وكمت ابجي من قوه الالم
احس معدتي مو طبيعيه بيه حروره ولعبانه نفسي
كمت دخلت الحمام غسلت وطلعت  وبعده معدتي تأذيني
كعدت على القنفه واني ميته وجع وابجي وليث نايم
رجعت دخلت الحمام وكمت اذب من راسي واتقيأ*
طلعت روحي
غسلت وكلي ارجف وابجي وملابسي ادمرت
طلعت من الحمام عبالك رح يغمه عليه
ليث.. فزيت على صوت بجي وطكطكه
جنت نعسان كلش ومابيه حيل افتح عيني
فتحت عيني شوي واشوف شمس كدامي واكفه كاعده تنزع بملابسه
عبالي كاعد اتخيل وهاذ خيال
فتحت عيوني عدل وجانت شمس وحتى فاتحه شعره
نزعت ملابسه  ولزمت بالكنتور وحطت ايده على بطنه  وعرفته تبجي ،وانا كمت
ليث: شمس
شمس.. شفت ليث كام  واني لازمه بالكنتور بعد ماكدر اوكف من الالم
لزمني من اديه وكعدني على الجربايه
ليث: شبيج
شمس: بطني رح تموتني
ليث..رحت اشغل الضوة لان الغرفه ضلمه بس ضوة احمر خافت مشتغل
شمس: لا لا لاتشغله
ليث: شعدج لهسه كاعده
شمس: خلصت قرايه وبطني من بساع تأذيني
وهسه ذبيت من راسي
ليث: شبيه بطنج خاف جايستج بروده
شون صرتي هسه
شمس: مادري
هسه شوي احسن بس مابيه حيل اوكف رجلي يرجفن
ليث: هوا انتِ كلج ترجفين
ليث.. باوعتله وهيه بلا ملابس والغرفه بارده
ليث: ليش نزعتي هدومج
شمس.. حطيت ايدي على صدري واريده يوخر
شمس: لاتباوع
ليث: ما مباوعلج انتِ بيا حال
وين هدومج لا تزيدين وطكج بروده  لبسي
شمس.. على الجربايه طلعتهم
ليث لا تبااوع
ليث: ما مباااوع هيه الغرفه ضلمه
هااج لبسي
شمس.. جنت مطلعه دشداشه قصيره على الجربايه نطانيه ليث ولبسته
ليث: كومي تعاي تمددي تردين انطيج علاج  مسكن
شمس: لا صرت احسن  ماريد ماحب الادويه
ليث: شبيج  بساع قبل لا انام تقرين ومابيج شي
شمس: مادري يمكن من اكل المطعم
ليث: مو انا اكلت وياج مابيه شي
شمس: مادري هوا من رجعت واني معدتي تأذيني
ليث: نامي والصبح تصيرين احسن
شمس..تمددت وليث غطاني ونطاني كلاص ماي شربته
وغمضت عيوني اريد انام وحسيت بليث صعد بصفي
بس ماجان الي حيل اتحرك ابد ..
............
شمس.. فتحت عيوني الصبح والكه ليان نايمه بنصنه اني وليث
باوعتله وهيه شابكه ابوهه
واني ابتسمت
كمت دخلت غسلت وتذكرت الي ضار البارحه
واني احسب انشالله ليث ماركز بجسمي
واني شمالي هيج كدامه نخبصت
يربي
يلله هسه هيه غرفه ضلمه قابل شيشوف 
شمس.. بدلت وطلعت من الغرفه
ساعدت عمتي بالريوك
وكعد ليث وليان وسألني شلون صرت
وصبيتلهم ريوك تريكو
وكعدت ادرس وكلشوي اطلع يم عمتي وارجع ادرس
وليث طلع للشغل واني بقيت ويه ليان
نلعب ونسولف
بس بعدني افكر بالصور الي شفتهن
ابد ما يرحن من تفكيري  ..
يوم الي بعده الصبح كعدت وبددلت حتى اروح لدوام وليث جان كاعد قبلي  ومبدل حتى يوصلني ويروح للشغل
طلعنه  ووصلني للمدرسه اجيت انزل
ليث: منا ورايح اسراء تجي تاخذج وترجعج  لان انا ماكدر اوديج يوميه وارجع عليج  عندي شغل
انا تأخرت هسه ،وارجع بعدين المغرب 
شمس: تمام
ليث: هاج
شمس.. انطاني ٥
شمس: لا ماريد عندي
ليث: اخذي
شمس.. اخذته ونزلت وليث راح ودخلت المدرسه وتلكوني صديقاتي وكعدت سولفت الهم  على زواجي
بس بدون ما احجي الي صار ويه عمامي بس سولفتلهم انو اني عرست وتفاصيل الباقيه
وهنه ما صدكن و يردن يشوفن ليث ..
امتحنت احياء وجاوبت
بس الي غثني ورقتي بالرياضيات استلمته...
...........
شمس.. خلص الدوام ورجعت ويه ست اسراء وصلتني
دخلت البيت  وسلمت على عمتي ودخلت سبحت  وطلعت ساعدت عمتي بالغده  وصبينه وكعدنه نتغده واني اوكل ليان واسولف وياهه
دخلنه الغرفه وكعدت العبه وجنت متونسه وياها لان وحدي ومحد يمي
بعدين هيه نامت وكعدت اني ادرس
اني ادري بدراستي مو مال وحده تريد معدل
وحتى درجلتي بالمتحانات الي متحنته جانت ماعاجبتني
بس الظروف جانت ابد ما تساعدني
خفت اعيد سنه واني ماريد اضيع سنه من عمري
واقنع نفسي انو مو صعبه عله
رح اكدر اطلع معدل وانجح اذا الله راد
قابل اني الوحيده الي اصير عندي مشاكل
رح اسوي الي عليه والله رح يوفقني اني متأكده
الله كريم ..
شمس.. بقيت ادرس وصارت ساعه ب٥ وكعدت ليان
مشطتله وهيه بدلت
وطلعت من الغرفه ولكيت عمتي كاعده تكنس
اخذت منه المكناسه وكتله اني اكمل
كملت كنس ووصلت لغرفه الولد
دخلت ارتبه ولكيت على المكتب اوراق بيهن حجي نكليزي
لزمتهن وبيهن صور هيج اشعه عضام وصور اعضاء
ولكيت الحاسبه مشتغله 
باوعتله وبيه مثل التقرير هيج ويمه صور 
بالنكليزي هاذ الفهمته
حاولت اقره الاوراق  عود مسويه روحي افتهم انكليزي
فجأة دخل علاء واني نزيت
علاء: اسم الله
شمس: اسفه اسفه ما جان قصدي العب بيهم بس شفتهن على الميز لميتهن
علاء ضحك: لا عادي هوا خلصت
شمس..علاء سد الابتوب
علاء: ثارن فضولج
شمس: اي هيج شي
علاء: شقريتي شفهمتي من الاوراق
شمس: ما لحكت اقره بس شوي واصلا اني مو هلكد بالنكليزي
علاء: اي تتعوديين عليه بعدين من ادخلين كليه
ويصير اسهل من العربي
شمس: انشالله ياريت  احب النكليزي اني
علاء: يعني تردين ادخلين طب
شمس: لا تخدير بس الطب هم حلو
علاء: الطب حلو والتخدير لل ابطال
شمس : انت هيج تكول
علاء: اي لعد شون
يعني انا هسه صح دكتور
بس اخاف اضرب ابره
شمس ضحكت: عود صدك وليش
علاء: يعني الدكاتره صح يتعلمون يضربون ابر وهسوالف لان تبقى اساسيات
بس احنه ما نتمرسه بشكل رسمي ويومي
يعني ماكو دكتور يضرب ابره لمريض قليل كلش
ف نشوفه صعبه
يعني انا ادخل عمليات كبرى
بس من توصل ابره اضل ارجف
شمس: ياا اول مرة ادري بهل شي
هيه كله ابره
علاء: بعد
شمس: اني اصلا كلش جبانه ومادري شلون رح ادخل تخدري وهوا يخوف
علاء ضحك: اتذكر جانت ويانه طالبه
شمس.. اباوع لعلاء كعد كدام الحاسبه ويحجي ومبتسم على الاخير
علاء: هم جبانه
واكثر من مرة ينغمي عليه خاصه من  صرنه ندخل ويه الدكتور يشرحلنه  وهوا يسوي بعمليته
شمس: اي
ليث: واكثر من مره هم تنطرد من المحاضره لان بس ترجف وشوي وتبجي
يعني الطب يرادله جرعه هم
شمس: يمه لعد اني مو بس يطردوني يشحتوني من الكليه طله
..علاء ضحك
شمس: انت  ماتخاف
علاء: لا بلعكس اتونس
شمس: شنو الي يونس اذا انت فاتح بطن واحد
علاء: موتيني ضحك
يعني هوا وكته  انا اصلا  مركز  يا ضحك ياخوف
شمس: هوا انت دكتور شنو بضبط
علاء:  جراحه
شمس: الملعب يم الاعب
علاء: حلوه هاي
شمس: صارلك شكد متخرج
علاء: ٤ سنوات
شمس: وتشتغل
علاء: انا خلصت طب بتركيا ووراها اخذت دبلوم  سنتين
شمس: حلو وهسه عندك عياده
علاء: لحد هسه لا
يعني اشتغل ويه دكاتره كبار بس بعدني ما فاتح عياده
اريد اكمل دراسه واخذ خبره
شمس: تاخذ يعني بعد شهاده
علاء: ايي  وكته افتح عيده بعد شي سنتين
شمس: هاا وما تتعب
علاء: انا ب اخر مرحله اصلا ردت اترك
واروح غير مجال
يعني ردت ادخل اي مجال اي كليه غير الطب
لان صارت وكته هواي مشاكل
وضغط جبير عليه وتعب
ف كرهت الطب بشكل وهملته
ونوب رجعت عن القرار ومادري شلون نجحت بهل مرحله
والحمدلله نجحت لان توقعت روحي رح اعيد
ونجحت بدرجه  عاليه يعني نكول امتياز وكته  حتى  اخذت تقدير هم
شمس: انت الي يسموك سجاج
علاء: لاا بس ب اخر لحضه رجعت لوعيي وتلاحكت الوضع ورجعت ادرس  يعني ستوعبت خطوره المرحله الي انا بيه
شمس: تنصحني ادخل طب
شمس..علاء دار عليه
علاء: شنو مو بعينج انا
دكتور واحد كافي ليش ثنين
شمس ضحكت: هاا يعني خاف اخذ مكانك
علاء: اي ما اقبل
شمس:لاتخاف اني  مو دكتوره
علاء: انشالله انشوفج بالتخدري تبدعين
شمس: نحو الاعلى لو الاسفل
علاء: لا طبعا لل اعلى
شمس: تفتح عياده هنا لو بتركيا
علاء: بعدني ما مقرر
بس انا ماريد ارجع لتركيا
صح عشت بيه عمر طويل يعني بال٨ سنوات  انا هناك
بس اريد اضل يم اهلي وتعبت من الروحه والرده
يعني ب الاكثر هنا افتح عياده
شمس: ها حلو
بس يمكن احسن شي سويته درست بتركيا
علاء: اي بس فراك الاهل صعب
وبنفس الوقت انا تعودت هناك
ف من اجي هنا احس روحي عكس التيار
شمس ضحكت: روح واخذني وياك  المره الجايه
علاء: غير تدللين
شمس: هسه انت جنت تدرس
علاء: اي
شمس: هاا يلله لا اخذ من وقتك
علاء: لا بالعكس اتونست  بالحجي وياج اخذي راحتج
شمس: هم اجيك تعلمني شلون اسوي عمليه حتى لا يغمه علي بالكليه
علاء طك ذيج الضحكه: تمام
شمس.. طلعت واني اضحك
كملت كنس البيت  وجنت منتضره ليث يجي حتى اخابر امي...
...................
ليث..رجعت من الشغل وتعبان ومشتاق لليان
نزلت من السياره ولكيت بوجهي مسلم وعباس يفر بسبحته واكفين بباب البيت
عباس: هلا بنسيبنه المعدل
ليث.. مدلي ايده ويريد يسلم
بقيت واكف واباوعله وما تحركت
مسلم: السلام لله
ليث: شتردون
عباس: شو انت محمل علينه
ليث: شعدكم كدام باب البيت
عباس: رايدينك بكل الخير
ليث.. رفعت حاجبي واباوعله شلون مرعبل ويفر بالسبحه ويحجي ومسلم حاط الجكاره بحلكه
عباس: انا جايك اريد اطلب بت اختك مروة على سنه الله ورسوله
ليث: نعم
مسلم: جاين نخطب بتكم لبنه
ليث: عباس اخذ سبحتك وروح من كدام البيت يلله 
عباس: لا ولله شو انت تطردنه
جايك واحاجيك مثل الزلم
ليث: اهااا  مثل الزلم
وانا ما احجي ويه واحد ما يعرف يصير زلمه عدل
جاي تكلي مثل الزلم
تدري بروحك مرعبل لعد
دمشي منا يلله
ليث.. عباس حط سبحته بجيبه واجه كدامي وجره مسلم
عباس: انا جاي اكلم انو انا رايد بتكم الي على سنه الله ورسوله
لو انت حتى الصح ما يعجبك
ليث: منو كلك الي تسوي صح
انت شتخربط  جنك واحد سكران
هسه اركعك على صماخك افرك حلكك بالكاع كتلك امشي
ليث..انا منتضره يفور لان بنفسي اركعه بوكسي اكسر سنونه
لان انا هم على نار اعصابي
عباس: هيه حجايه وحده ماتعرف تحجي
جاي اكلك اريد مروة
ليث...دفعته وضربته بوكس على وجه وجريته من ياخته
ليث: اسمه لا يجي على لسانك
ماعدنه بنات لمثالك وبالحلم لا تجي ببالك
اذا اجيتني بعد تحجي بهل موضوع لو تكول اسمه على السانك الزفر اعلكك على الحايط
دمشو ولو  عاطلين
ولي من كدام البيت يلله
ليث.. صحت بيهم بعلو صوتي ودفعت عباس شكيت قميصه  وعباس جره مسلم ونطوني ضهرهم وراحو
هزيت ب ايدي ودخلت
ليث: كال يريد مروة كال
ليث..رحت دخلت كبل سلمت على امي ودخلت على شمس لكيته واكفه ترتب
ليث: عباس شدراه بمروة
شمس.. جنت ارتب ومنطيه ضهري للباب ودخل ليث بعصابه كبل حجه:عباس شدراه بمروة
واني كلبي طاح بالكاع
ليث: ماتحجين
شمس.. درت على ليث وكمت ارجف
شمسس: مروة
ليث: تدرين منو تلكاني بالباب
مسلم وعباس
يكلي اريد بت اختك مروة على سنه الله ورسوله
شمس: شنوووو
ليث: عباس شدراه بمروة
منين يعرف اسمه وشدراه بت اختي
شمس: مادري مادري اني
ليث: لعد انا ادري
هوا شعرفه بمروة اصلا وجاي يكلي اريده
شمس: مادري
شمس.. احس كلبي رح يوكف
صخام الصخمني اني شسويت
ليث:ما تحجيين ،كايلتلهم عنه
شمس: لا لا شكللهم ليث مستحيل
اني ادري بيهم هذول  شياطين
شلون اكللهم اصلا يمتى حاجيتهم
ولا رح احجي وياهم يعني حتى من جنت بالبيت ما احجي وياهك
ليث: انا احاجيهم لعد
شمسسس
شمس..ليث زمخ عليه  واني زدت خوف
ليث: منو كله بمروة
باعيلي عدل
اذا رجعو مرة ثاني العب بيهم لعب لان انا سكتت هواي عليهم
ومروة اذا انجاست  شعره من رموشه
اكلب الدنيا فوك راس عمامج والخلفوهم
شمس: لا لاتكول هيج شيسويله قابل
اصلا هسه طردتهم مارح يرجعون هاذهو اعصابك
مارح يدنون  واني ماكتلهم بشي ولا حاجيتهم ولاشي
اصلا  اني ما معتبرتهم ولد عمي من بعد ذيج الليله
ليث : ذيج الليله شصار
شمس..باوعت لليث وعيوني مدمعه
ليث: من اجيت ببيت عمج ودخلتي عليه بدمج
شنو صار
شمس: اعصابك هسه اكلك
ليث..باوعتله وهيه كله ترجف كعدت على الجربايه وانا فتحت دكم قميصي لان جسمي صار يفور
شمس: حتى استحي اكلك
ليث: احجي
شمس: باوع اول شي قبل لا احجي
ليث.. درت  واباوعله وهيه تنهدت  ودموعه نزلت
شمس: شايف من واحد يروح يتقدم لوحده
وتعجبه
ونوب يسألون عن اهله
يسألون جوارين
او ناس يعرفوهم
ويكلوله لا اهله خوش ناس
صايمه مصليه وشايفين منهم كل الخير
وهوا يكول مدام اهله هيج
وناس بيته هيج
ف هي اكيد معدله
بس من يكلوله لا اهله ناس بس مشاكل
وولدهم مو خوش
وسمعتهم  مو خوش
ف هوا يبطل
يكول اذا اهله هيج
قابل هيه شتطلع
اني عشت ببيت كله ضرب وغلط وسب
وولد عمي بالملاهي
وعمامي وراهم هواي مشاكل
ويضمضمون بيه
وليليه كايمه الهوسه
ف من تصير عليهم السمعه الشينه
تخصني وياها
ولد عمي اني يكبسلون ويتعاطون هاذ اخر شي بقى وسو
ليث.. شمس تحجي ودموعه تنزل على وجه وانا اباوعله
ليش همه ولد عمج شبقووو
شبقوو ما سوو
اذا كدامهم انتِ والي عساس عرضهم
كسرو بيج
شمس: ولله اني كلشي ما سويت وبريئه من نكاستهم وهمه  مايصدكوني
اني بس نضفت غرفتهم
ولكيت جيس بي حبوب عبالي علاج براسيتول هيج يعني اني ماعرف ولله
اخذته وحطيته ب جراري
ولكو عمامي واتهموني بيه
وصار الي صار  وكتلوني وكسروني وعباس ومسلم يدرون هاذ الهم بس بقو مصممين انو همه مالهم دخل وصار كلشي براسي
ومارادوك تاخذني لهيج كلولك طلك
حتى يموتوني كتل وينطوني لواحد على مرامهم يذبحني
ليث.. كامت تناشق  وتمسح بدموعه
و انا كدامه وكاف
شمس: بس ولله اني مالي دخل ليث صدكني....
.....
ريم: صدكني هاي مو اني
ريم: ولله مو اني ولله ما سويت ما سويت
ريم: ولله ماسويت شي
ريم: ليث لاااا ليث لاااااااااااا
ريم: اني شريفه صدكوني ماسويت شي
ريم: اني ماسويت
ورح احلف على القرأن
ريم: اني ما جبت عار
ريم: عليك الحسين لا تفركني عن بتي ليث...
........
كل هل اصوات صارت تضرب براسي
صوت ريم  كطع كل حس عني
انعصر كلبي وطلعت من الغرفه
طلعت بوجهي امي تحاجيني ومارديت عاليه
جنت مااسمع شي
طلعت من البيت وصعدت السياره وحركته واسوق بسرعه بدون وعي
...
ريم: ليث لاتحجي هيج ماريد اطلك
ريم: والقرأن وحلفت اني ما مسويه شي
ريم: صدكوني اني ماجبت عار
ليث.. وكفت السياره وعيوني نملت دموع
كمت ادك على الستيرن حيل
محد  بكدج كطع كلبي
شكد ستنجدتيني وطلبتيني
شكد ردتني اوكفلج واصدكج
وانا نطيتج ضهري من كون انكسر ضهري
عفتج ورحت وحتى من حلفتي على القرأن ماصدكتج
ولله  العضيم احبج 
احبج  مو بكد روحي لا يل صرتي اغلى من روحي
بس رجعيلي الوكت حتى اصدكج ما اهدج
من كون نعمت عيوني ولا صدكت الي شفته
من كون انكسرت ايدي ولا مديته عليج
من كون انكطع الساني ولا كتلج  هذيج الحجايه
بيا رحمه انا يغفرولي وانتِ جوه التراب
ولج ولله احبج بس جنه الحب مافاد
بيا عين صلفه اجي ازورج وره مادفنتج جوه التراب
وانتِ نمتي مضلومه  
جان رحمتي بحالي ورديتي اليه
بس اشلون وانا مارحمت بيج
نهشت بروحج  ورميتج
كون ميت ولا داخل عليج ذيج الليله
احبج  وابوسج واشمج ويه الهوه
ضميتني مثل الطفل ومثل فرعون انا  هديتج
وريتيني جمال الدنيا وصرتيلي الملاك
ودفنتج جوه التراب وصرتلج الموت
طلع الحب مو كافي يجبر كلشي
ويصحح كلشي
كسرتج الف كسره  ودرت ضهري
بس لو ترجع هذيج الايام
اوعدج  اشيلج على ضهري مثل ما شلتيني بكلبج وبعيونج
رحتي مني يالي ماعرفت المج
ليث.. لزمت الكامره وطلعت صور ريم
جانت دموعي كلش صعبه من تطيح على الصور
وانا اكلب بيهن
جان كلبي يحترك اشتهيت اشيله من نص صدري لان ناره ما تتطفى
نار كلبي ما تتطفى
كل يوم وهيه تزيد جمرهه وتزيد نارهه
وانا  بعدني اندفن  وانا عايش
محد ياخذ مكاج ريمي
ليث.. بست صورته ومشتهي احضنه
ليث: مصدكج انا  ولله ياروحي
لييث..رجعت الكامره وحركت بالسياره
بقيت افتر لان ماريد ارجع للبيت
الدنيه مضلمه بعيوني
صارت تنكط  وزاد المطر
والشوارع فارغه وبيه الوحشه
رجعت البيت ودخلت  ولكيت ليان كاعده
شلته ودخلت الغرفه وما انتبهت لشمس
حطيته على الجربايه وشميته حيييل
ومسحت على شعره
ليث: احبج
ليان: اني هم
شمس.. من طلع ليث بدون ما يحجي شي واني بالي يمه
دخل وما انتبه الي واكفه وهوا شايل ليان
ويشم بريحته  ويبوس بيه
باسه حتى برجليه
حط راسه يم ركبته وشمه حيل 
شبكه حييل وهيه هم تبوس بي
ضل شابكه ونوب هيه كامت
ليث: ها وين
ليان: اجيب اكلي
ليث: يلله
شمس..ليث كعد وشافني وليان طلعت
شمس: ضل بالي يمك
ليث: مابيه شي
شمس: اكيد
شمس..ليث ساكت
شمس: اصبلك عشه
ليث: لا اريد اسبح
شمس: احضر ملابسك
شمس..ليث هز  راسه ب اي ودخل الحمام
واني طلعت ملابسه ورحت صبيتله عشه وهوا طلع وبدل وحطيتله وكعد ياكل هوا وليان
خلصو وكعد هوا وليان بره وعلاء يمهم
اني بدلت  وكعدت ادرس بس كلش مالي خلك
ومتندمه على الي حجيته للعباس
عن مروة
خاف يسوله شي
خاف يرجعون لليث وتصير مشكله
يارب استر علينه واحفض مروة وكفينه شرهم هذول
شمس.. دخل ليث وهوا شايل ليان
صعد على الفراش ونيمه بصفه
اباوعله وليان تحجي وياه وهو صافن بعيونه
صافن و سرحان
هيه تحجي وتضحك اما هوا احسه غركان بملامح وجه
ضلت تسولف ليان وهوا كل شوي يبوسه لمن ليان نامت بحضنه
صعدت اني على طرف الجربايه
شمس: بعدك ضايج ،على الي صار
شمس..ليث باوعلي ببرود ونزل عيونه
شمس: انت دربالك منهم هذول
لان اذا اني بتهم وغدرو بيه
ليث: ادري
انا اعرف شلون اتصرف وويامن
واعرف هيج نماذج،مرت عليه
بس لو اعرف شدراه بمروة
شمس.. عبالك احد شاورني وكلي احجي
خفت اكول لان ادري رح تصير سالفه
بس ضميري رح يموتني
شمس: ليث
ليث: شنو
شمس: اني كلت
شمس.. ليث رفع راسه وباوعلي ورفع حاجبه
ليث: شكتيلهم
شمس: ولله ماجان قصدي
بس همه جبرووني
ليث: شكتييلهم
شمس.. ليث كام من مكانه واني خفت وكمت ارجف
شمس: بالخطوبه عباس شاف مروة
وسألني عليه وماكتله ولا حجيت
وهسه اخر مره من اتصلت علي امي اخذ التلفون منه و هم سألني على مروة
وكلي يريد يزوجه وهاي
ليث زمخ: وانتِ حجيتي
شمس.. اني كمت ابجي من الخوف
شمس: لا لا ولله ما كلت ولا ردت احجي
كال اذا ماتحجين هسه اضرب امج بصفي
واني من الخوف كتله اسمه وعمره  وسألني عنوان بيتهم بس كتله مادري
ليث : لا جان كتيله جان حجيتي ودليتي  على  البيت
انتِ تدرين بولد عمج هذول سكط وناس الله مطيح حضهم
ليش نسيتي  شسووو بيييج
يعني شمتووقعه مثلا
يجيني واحد مثل عباس ويكلي اريد مروة ازوجه واكله يلله اخذه
شمس: بس افهمني ولله ماردت احجي ادري بيهم هذول زباله حشاك بس همه جبروني
ليث: وانتِ اصلا ليش  تردين عليهم
شمس: همه اخذو التلفون من امي وكعد عباس يسألني
شمس..ليث زمخ بعلو صوته كمزني ومادري شبي لهدرجه معصب
ليث: ماعرفتتي تسدينه
من سمعتي الخره صوته ماعرغتي تسدينه بوجه
هاااااااا
من اول ما حجه
ماعرفتيي  اتسديي
شمس: ولله اسفه
ليث: كتلج انا اذا وصلو للبيت بعد لو جابو طاري مروة العب بيهم فلك
انتِ تدرين وين لازم مكاانهم هسه هاي الاشكال
لا مو بسجن
جوه التراب
تدرين شسوه بييج
ولج انا  من خطبتج وانا كل ليله انام وكلبي يلعب
لان حضره جنانبج بنفس البيت ويه نفس الرجال الي اغتصبج
ومحد يدري بس انا الادري
حتى امج ماتدرييي
وهسه طلعت سالفه جديده ولله يكبسلون
ليش هذول الحيوانات شيطلع منهم مثلا هااا
شمس: علكيفك اعصابك صلي على محمد 
ليث: مرة ثانيه من تخابرين امج وتسمعينهم يمه
اسمعين صوتهم يمه
مو الا يحجون وياج
لا حتى لو من بعيد تسمعين صوتهم
تسدين التلفون
افتهمتي
شمس: انشالله حاضر تمام هاذهو
شمس.. ليث خله وطلع واني اتراجف
من رجع وهوا معصب  ومغثوث
عساكم ما اجيتو لدنيا الله ياخذكم
شمس.. شفت ليان كامت
شمس: اسم الله حبيبتي نامي تعاي
شمس.. رحت بصفه ونيمته
وغسلت وجهي ورجعت بالفراش
دخل ليث وصعد وتغطه ونطاني ضهره ونام
واني بقيت الليل كله افكر بمروة
وهذول شرايدين منه
وعباس مايكعد اذا حط شي براسه يعني انتهت
بس الله اليستر ...
......................
شمس...كعدت من وكت حتى ادرس
وشفت ليث  اخذ سويجه وطلع
اذكرت  عنده دوام  وشفته طلع  من الغرفه
كمت  غسلت واخذت كتبي بالدوانيه هدوء
وبلشت ادرس من ساعه ٦
احاول اضبط المواد وادرس الفايتني
درست من كل ماده شوي واسمع صوتهم كعدو
صارت ب١٠ وطلعت واني فرحانه لان كملت درسه
هوا ما كملت
بس درست دراسه زينه ومشيت بالماده
ف تونست
طلعت واساعد عمتي بالريوك ورحت حتى اكعد ليان
وطلعت ليان من الغرفه
شمس: ليان حبيبي صباح الخير
ليان: صباح النور
شمس: يالله مدام كعدتي روحي للمطبخ يم عمو علاء تريكي
شمس..رجعت للغرفه ادرس
بعدين خلصو ريوك ولميت المواعين ونضفت البيت وعلاء وحسن طلعو
كعدت العب ويه ليان ومشطت شعره واسولف وياها
كملت ورشيت اله عطر
شمس: شنو جان اسم امج
ليان: يمه ريم
شمس: ها
ليان: ليش
شمس: هيج
شمس: ماتدرين مروة يمتى تجي
ليان: ببكن اليوم تجي
كلتلي يمه هيه تجي ويه عمه
شمس: اي تجي تتعشه يمنه يمكن
حتى نتونس سوة
ليان: اييي ونصلي سوة
شمس: لعد هسه اذن الضهر جيبي سجاددتج نصلي سوة
ليان: اوك
شمس.. جابت ليان مصلايته وتوضينه
ووكفت بصفي وصلينه سوه
ووره كل صلاة هيه تكلي تقبل الله
خلصنه وشبكته حيل وبسته
دخلت كلبي  وضليت شابكته
شمس: عادي اسأل سؤال
ليان: اي
شمس: منو هاي رتاج
ليان: خاله رتاج
اخت يمه ريم
شمس: وانتِ كل فتره بابا يوديج اله
ليان: اي تلعبيني
وتشتريلي وتبدلي
ونصور
شمس: تحبينه
ليان: واجد واجد
بابا يكلي هيه تشبه يمه ريم
شمس: ها
ليان: خن اروح اخابر بابا
شمس: يلله تمام
شمس..ليان طلعت وكمت اني لبست شالي وطلعت
ساعدت عمتي بالغده وتغدينه وكملنه
ورجعت الضهر ادرس للعصر
اجت مروة وست اسراء
كعدنه انسولف ونضحك وسويتلهم عصير
والمغرب ليان صلت ويه مروة
واني دخلت الغرفه
وره شوي دخلت مروة
مروة: هلاااو
شمس: هلا هلا تعاي
شمس..مروة جانت لابسه بدي  ابيض كصير وردن مالته بيه سوالف وخرز  ومنفوخ كلش حلو
وبنطرون ضيك وشعره ذيل حصان
شمس: لبسج كلش حلو انتبهتلج ذواقه
مروة: طبعا اني مروة مو اي احد
شمس: وعين البارده عليج تخبلين
مروة: الله الله شهل كلام الحلو
مو بكد جمالج حبيبي  نياله ليث
شمس.. اني ضحكت
مروة: اي بس محد يستاهل جمالي
شمس: مافهمت
مروة: اكلج قصدي نوب يجيني واحد الله مطيح حضه
مايستاهلني واصلا اني مو هينه
شمس: اوو او عيني عيني  باع الغرور
مروة: الغرور بس لصحابه
شمس: بعدج صغيره اصلا حتى تفكرين  تعرسين ودورين واحد يستاهلج
وانتِ ذكيه وتعرفين شتختارين الي مثلج والي يفهمج
شمس.. مروة رفعت حاجبه
مروة:  ياهو كلج ناويه اعرس ؟
وانتِ هم بعدج صغيره
شمس: اني الضروف جبرتني
بس اذا انتِ الساحه فاضيتلج
ف لعبي على الحبلين
مروة: على الحبلين مافهمت
شمس: قصدي بما انو انتِ كلشي ب ايدج والضروف لصالحج
ف تكدرين ب ايدج تاخذين وتنطين
وبحجايه وحده  توافقين وترفضين
ومبين عليج صاحبه قرار وتعرفين شتحجين
يعني مو ياهو الجان يجيج وكله بكيفج
مروة: اي طبعا اني تربيه خوالي
لذالك مو هينه حبيبي
شمس: الله يحفضهم الج
مروة: اصلا اني عندي هواي مخططات فارغه للزلم اني
شمس: اندري  شلج بيه
مروة: الله الله اذا ما وصل حجيج لليث
شمس ضحكت: ولج
شمس.. بقينه اني ومروة نسولف
هيه عفويه وحبابه وبنفس الوقت شخصيته قويه وبشكل واضح
طلعت من الغرفه  وكعدت بحضن علاء تضحك وتسولف
واني انتضر ليث
حتى ماعندي تلفون اخابره
عده الوقت وطلعت بره انتضر ليث بالكراج
بس جنت انتضره بلهفه انتضره وكلبي يدك
كمت اشك بروحي...
دخل ليث
شمس: الله يساعدك
ليث: ويساعدج
ليث.. دخلت ولكيت شمس منتضرتني
بس طبيت تلكتني بهل حجايتين وبنبره طفوليه وابتسامه بريئه
دخلت البيت وهيه ورايه
سلمت على مروة وخواني واسراء ودخلت الغرفه وشمس طبت وراي
شمس: حضرت ملابسك هاي
ليث.. جانت محضره ملابسي ومعطره الغرفه ومرتبته
شمس:  وحضرتلك الحمام اذا تريد تدخل تسبح
ليث.. باوعتله وهيه مرتبكه ماتدري شتحجي 
مبتسمه مادري تضحك
عيونه  تلمع وصافنه عليه
تذكرت حجايه ياسر من كلي المره واضح بعيونه العشك
ليث: لا رح ابدل
شمس: تمام رح انبلش انصب العشه على ما تكمل
ليث: اوك
ليث.. خذيت ملابسي وشمس طلعت
بدلت وطلعت وكعدنه على السفره والسوالف والضحك وليان بحضني وشمس بصفي
كملنه وشمس واسراء شالن السفره
شمس.. كملت شغلي وشفت ليث راح للغرفه دخل
اجيت اعبر من الصاله واروح للغرفه ودخل علاء من الباب البرا
علاء: تفضلو نورتو
شمس..وكفت  واشوف عمامي دخلو
ومسلم وعباس والولد
وسلمو على عمي
واني ضليت كلي ارحف
جابر: ها شموسه شلونج
شمس: هلا عمو
ضياء: شمسس شنو هاي تعاي سلمي
شمس.. رحت واني ارجف بوستهم بس متت خوف
شعدهم جاين
ونوب يسولفون ويضحكون  عادي
باوعت لعباس وغمزلي
عفتهم ورحت للغرفه  دخلت وليث واكف
وحتاريت شلون احاجي
ليث: شبيج ترجفين
شمس: اجو عمام
ليث: عمامج ،شعدهم
شمس: مادري توهم دخلو ماسمعت صوتهم
شمس..ليث خله وطلع سلم عليهم وكعد
واني وكفت يم باب الصاله اباوع وهمه يسولفون ويضحكون بس ليث كوه متحملهم ويحجي
ضياء: شلونه شموسه وياكم
ابو ليث: لا الحمدلله انشالله ما منه غير الخير
جابر: اذا قصرت بشي بس كول احنه بتنه ونعرف شنسويله
شمس.. باوعت لعمي وهوا مبتسم واني مغندبه
ضياء: احنه اجيناكم بموضوع ثاني هم وانشالله كل الخير
ابو ليث: اي تفضلو
ضياء: ادخلك وبدون مقدمات
ابنه شاف بتكم مروة الله يحفضه
وانشالله نذكره بس بالخير
واحنه مالنه عرف بهله ف اجينه لبابكم
رايديه لبنه عباس عله سنه الله ورسوله
شمس.. اني جمدت بمكاني واباوع الهم
وليث  راد يطفر من مكانه
جابر: ومو عيب هيه هاي قسمه ونصيب
وماتدري شلون تصير
ف احنه اجيناكم وانشالله نطلبه من ابوها
واجينه نفاتحكم بالموضوع وتوصلونه لبوها
ونطلبه منه  على سنه الله
ابو ليث: نتشرف بيكم وحجيكم على العين والراس  ولله بس انا ماكدر احجي  لان انا صح جده بس مالي حق يعني هي ابوهه موجود وعمامه
ف انشالله نوصلكم لبوها وانتم جاين من الباب ومانردكم
ليث: ابوها مايقبل
البنيه صغيره  ماتعرس 
علا: ليث
ابو ليث: ليث احنه ماندخل
همه جاينه خطابه وميه هلا وبيكم الخير
واحنه نوصل حجيكم لبوها ووياه تتفاهمون
ضياء: ماقصرت ولله ونعم منك
شمس.  مروة واسراء جانو بالغرفه  واني بمكاني حتاريت شسوي
ليث: البنيه ماتعرس
بعدهي صغيره وابوها مارح يقبل
وانا حجايتي هنا مثل حجايه ابوها
ف كل هلا بيكم
بس البنيه ماتريد تعرس
ابو ليث: ليثثث
شمس..ليث ضل بس يخزر وعصب
علاء: ليث خنوصل الشور لبوها والله كريم
ضياء: علكيفك ابني  انجدحت علينه
وتكمل البنيه دراسته انشالله ما واكفين بوجه احنه
نتفق ويه ابوهه ونتفاهم على الرايدي وناخذ شور البنيه
واحنه بالخدمه مانقصر
ابو ليث: مامنكم تقصير انشالله  ونعم  نتشرف بيكم وبأبنك انشالله كل الخير
شمس.. ليث كام من مكانه
ليث: جاي اكلك البنيه ماتعرس
لا ابوها رح يقبل ولا عمامه ولا احنه
حلت فضت
ابو ليث زمخ: لييييث  اكعد
شمس.. حطيت ايدي على حلكي وشفت ابو ليث عصب
ليث خله وطلع وهمه كعدو وابو ليث رجع يحجي وياهم
اني رحت للمطبخ وطلعت لليث ولكيته بوجهي
اجه عليه
شمس: ليث
ليث: شمس هذوول شجاي يحجون
شمس: اعصابك اعصابك 
ليث: يا اعصاب هيه بقت اعصاب  سمعتي شيحجي
ولله ررايده على سنه الله ورسوله
ليش هوا من يمتى يعرف الله ورسوله
ولله هسه اطب اشرب من دمه
شمس.. لزمت ايدين ليث واحاول اهدي بيه
شمس: سمعت سمعت بس اهدء انت عمي(ابو ليث) عصب هسه
مايصير تحجي هيج لان انت الوحيد الي تدري بعمايلهم
عمي مايدري ف اكيد مارح يرضه بحجيك
وهمه خليهم يوصلون ل ابو مروة مو تكول ما رح يوافق
هاذهو علكيفك
ومروة هم ما رح توافق ما هوا الشور ب ايده
بس لاتسوي مشكله واهدء
شمس.. طلع من الباب علاء
علاء: ليث شبيك انت
شون تحجي هيج كدام ابوي
ليث: ليش انت ماشفتهم
من كل عقلهم يردون ننطيهم مروة
ووره الي ثار
وبكل عين صلف وهمه يدرون بيه انا ادري بسوالفهم التعبانه
شمتوقعين مثلا الليله ازفلهم مروة
علاء: ادري ادري تره محد قابل
ليث: ويريد ياخذ الشور من ابوهه
هوا مروة انا الربيته على ايدي
واعرفه اكثر من ابوهه
لا انا انطيه ولا ابوها لو يجي مدري منو واصلا لايفكروووون بالموضووووع
علاء: محد ينطيه ليث شبيك نخبصت هااا
الشور ب ايد مروة،محد اله دخل
وهيه مارح توافق
لا بكيفنه ولا بكيفهم
خليهم يحجون لصبح ويطلعون
شبيك نخبصت مو من عوايدك
يعني  انت من كل عقلك مروة تاخذ هيج واحد
محد يرضى حتى ابوي بس خو ما يطردهم
ليث: لا ولله يستاهلون الطرد
شمس: ليث  مو كاعد يكلك الشور وبيد مروة
وحتى ابوها مارح يرضى بيهم
بس عمي خو مايطردهم على كوله علاء
علاء: مايصير هيج انت طفرت عوزك شوي وتكلهم امشو  وسدو الباب وراكم
ليث: لان فورو بعاصبي
يعني قبل جم يوم بتهم كتلوها وطلعوها كداميي وكدامي يحجون عليه وبدهم ياكلوها ويردون يبطلوها
هسه جاين ولله نريد نخطب بتكتم على سنه الله ورسوله ،وتكمل دراسه
عليمن يضحكون هااا
علاء: هييييج او هيج مروة ما رح ياخذووونه
نحلت فضت
خليك باردد والامور طبيعيه  لان لو يجزعون منا لباجر ما ننطيهم حجايه
وحتى لو جانو مو خوش ناس ف احنه مو بكيفنه نحجي
لازم يوصل خبر ل ابوها
وهاذهو
روح ادخل ولا تغندب لان حتى ابوي عصب
لا نكبر الموضع وننطيه اكثر من حجمه
شمس.. ليث وعلاء دخلو واني دخلت من المطبخ رحت يم مروة واسراء بس ماكتلهم الي صار وانو جاين يخطبون مروة
.......
ليث.. الجماعه كامو وسلمنه عليهم وراحو  وابوي صار يحجي شلون انا طفرت وحجيت وكلت لا وما تاخذوها.
حجينه ل اسراء الي صار وما قبلت وكالت مستحيل انطيهم بتي
واصلا لا توصلون خبر ل ابوها
بس ابوي جلب الا يحاجي ابو مروة
مروة مادرت بالي صار ولا نريده تدري
جنه نوسولف بالمطبخ  ومروة بقت يم شمس
طلعنه واسراء  ضاج خلكه 
بدلت هيه ومروة حتى يرجعون
وكتلهم انا ارجعهم
دخلت الغرفه ولكيت شمس وليان كاعدات
شمس: ها رح توديهم
ليث: اي
شمس: بعدك عصبي
ليث: لا
شمس.. ليث  اخذ السويج وطلع
ليث.. طلعت وصعدت مروة واسراء وحركت السياره
وبنص الطريق  شفت دراجه وراي
جان الشارع شبه فارغ
منو بهلدراجه
ثنين بس لابسين خوذة
واني شكيت بيهم عباس ومسلم ..
وصلت كدام بيت  اسراء ونزلو ودخلو
وحركت السياره طلعت من الفرع صفيته بفرع ثاني
ورجعت عل بيت اسراء امشي
جان بصف بيت اسراء قطعه فارغه على هلقطعه يصير شباك غرفه مروة
شفتهم عباس ومسلم واكفين
تكترت على صفحه واباوع الهم يفترون كدام البيت ووكف عباس يباوع لشباك غرفه مروة
ومادري وين حاطين دراجتهم
ونوب مشو ويضحون بصوت عالي
طلعو من الفرع   ويتمشون وانا وراهم
صرت وراهم كلش وهمه وصلو لدراجتهم
عباس: ولك هاي اذا افوته من ايدي ف انا***
مسلم: لا لا ماتفوته اعرفك هوا انت اصلا *** 
ليث.. لزمت عباس من قميصه من وره وجريته على وجهي
ليث: شتفوت
ليث.. درته وضربته بوكس بوجه شمرته بالكاع
مسلم: ولك***
ليث..ضربت مسلم على خشمه ضل يطفر دم
لزمت عباس من ياخته وحطيت وجه بوجهي
ليث: اذا ادنيت يم هلبيت لو وصلت لراس الشارع
انحرك واشرب من دمك
مروة اتشيله من راسك
لا ادفنك ب ايدي ومحد يشرد بيك مني
ليث.. رجعت ضربته بوكس
عباس: لخاطرك اذا ما اغتصبه
ليث.. انا شطت
ورفسته برجلي رفسه
وهوا سحل روحه وركض هوا ومسلم
ليث صاح: بس تعال ب ايدي ما اخلي بيك عضم صاحي
ليث.. جريت دراجتهم وشمرته على الحايط ودفعته برجلي وكسرت الجامه مالته
ضليت صام اديه الي صار بيه دم
وعيني على بيت اسراء
رجعت لسيارتي ومسحت اديه وحركت رجعت للبيت ...
...........
مروة.. كمت من على فراشي وصوت شي يضرب على شباك غرفتي
وخرت البرده واجت طابوكه بالشباك
فتحته  واشووف...
..................................

يتبع...

..............................................................
البارت ٦٧٥٠ كلمه
صوتو وعلقو انطوني رأيكم بالبارت هلشي يهمني
حتى اعرف اذا استمر او لا
هاي البارتات يمكن تحسوها بارده شوي بس انا كاعده امشي ب الاحداث نفس ما هيه بدون ما اغير او العب بيه
ممكن اخترصلكم بعض الاشياء
وانشالله البارتات الجايه تعجبكم اكثر
قرأة ممتعه للجميع.