{ناجيه و ضحيه}

الجزء الثاني..بارت ٣

{شُتات النساء}
..................................
شمس.. احد حط ايده على صدري واني كمزت من مكاني واخترعت خرعه
درت ولكيت عمي ضياء واكف
روحي طاحت بالكع وصرخت
وهوا حط ايده على حلكي سكتني
اني اباوعله وفاكه عيوني منصدمه وميته خوف  وهوا نضراته بيهن الف شيطان
عمي: شششششششششش
شمس.. دفعني واني من الصدمه صوتي انكطع وانخرست كلش
ركضت وصعدت وقفلت الباب ووكفت  جمدت بمكاني
كلي ارجف واديه تنكت
اكول هاذ حلم
مستحيل الي صار
عمييي عميييييييي
شمس..رجلي صارت ماتشيلني وكعدت بالكاع مثل المخبل .. بلحضه طفرت رحت للباب تأكدت منه مقفول
وصرت مثل المخبله اروح واجي وحاطه اديه على حلكي
كمت اشك بروحي اتخبلت
مستحيل الي صار مستحيل اكيد اني متهومه ومن كد التفكير
صوتي  ما يطلع ولساني انربوط والصدمه ماليتني ...
.................
ليث.. كعدت الصبح على وكت وانا ناوي على شغله
ليان بعدهي نايمه
كمت ودخلت الحمام سبحت حتى يصفى بالي
بدلت وطلعت من الغرفه
دخلت المطبخ والباب مفتوح وامي برا
طلعت ولكيته كاعده تخبز
ليث: ها يالوالده  شعهلصباح الحلو بريحة خبزج وسمسمج وريحت اديج ادين العافيه
ليث.. بسته بخده
ام ليث ضحكت: ها يما صباح الخير شو اليوم انت تخبل
ليث: هيج مصبح اخبل
ليث.. اخذت خبزه حاره وكعدت على الكرسي
ليث: اويلي عشتي عشتي
عاد قلن نسوان هلوكت وين اكو الي تخبز عدل
ام ليث: لا اكو يخبزن يمه
ليث: حتى لو الكه ما ابدل خبزج  المعدل
ام ليث: الله يديم مزاجك هيج يمه
امبين هلبنيه خوش فتحت نفسيتك
ليث.. باوعت لمي
ليث: اي اليوم انا عندي شغله
ام ليث: اي كول اكيد عليه متويس
ليث: ايييييي
رح اروح لنجف ازور ريم
امي دارت عليه  تباوعلي وراحت الابتسامه منه
ام ليث: تزور ريم
ليث: اي شبيج
ام ليث: يمه انت كل شهر ورايح
ليث: اي واروح
ام ليث: ليش
ليث: ارد اروح شنو ليش
ام ليث: وهم رح تاخذ ليان
ليث: لا على المره الجايه
ذيج المره تعبت كلش بالطريق
ف بين فتره وفتره انوب اخذه
ليث.. باوعت امي وكأنما تريد تحجي ولازمه نفسه
بقت ساكته وما باوعتلي
ليث: اي انا هسه رح اطلع
ام ليث: بالسلامه يحفضك الله
ليث.. دخلت الغرفه وليان نايمه
اخذت تلفوني وسويجي وطلعت وخليت الباب مفتوح
سلمت على امي وطلعت بسيارتي
حركت السياره وانا ماليني الاشتياق والهفه
المشاعر الي تشيلني نفسه ب ايام خطوبتي من ريم
من كل مره اطلع من البيت حتى اروح اشوفه
نفس الشعور والهفه والحب الي ما طفى
طلعت بطريقي واريد الطريق يخلص .....
مرت الساعات ووصلت النجف زرت الامام علي( عليه السلام)  اول وصليت ونوب طلعت
ورحت لنفس المكان الي كل مره اشتري من عنده ورد وبخور
دخلت المكبره وشلت قرأني ونزلت من السياره
بكل لهفه انا ادور على ريم  وبكل شوك مالي كلبي
وصلت لريم والابتسامه ملت وجهي
ليث: ريم
اجيتج اجيتج  اليوم انتِ الوحيد المتلهف على الكعده كربج اجيتج
ليث حطيت الورد وكعدت
ليث: شتاقيتلج يا بعد روحي
يا بعد عيني
يابعد كلبي
يابعد سلامتي
يابعد عافيتي
شتاقيت لشوفتج وملكاج
كل ما اضيع يمج يلاكوني
ليث.. حطيت ايدي على التراب وامشيهه علكيف
ليث: اسف
انا رح اضل اعتذر كل ما اجيج
بس يمتي تقبلين اعتذاري وتريحين كلبي
مرت سنين ريم وانتِ جوة التراب ماكفتج هلسنين
ما مليتي
فكدتج هواي صدكيني
ما ناويه تحنيلي وترديلي
وتردين لبتج الشاليه من ريحتج عطر ومن  وجهج ملامح
ليث.. جريت الورد وكمت احطه داير ماددايره نفس كل مره
ليث: كل ورده احطه شالعه من كلبي
شكد ماحطيت ما يكفن عن شوكي
ليث.. خلصت ورجعت ليوره  شغلت البخور
وقريت الفاتحه
وكعدت اقره قرأن  بالنص ساعه
حطيت القرأن على صفحه وبديت احجي جني  كاعد ويه محبوبتي
ليث: صح انكشف الحق
بس وره ما انضلمتي
اريد ارد حقج مس ما اعرف شلون
يجوز بهل البنيه الي رح اخذه اكدر اصحح غلطي
ولو شوي من الي سويته اكدر اصححه
كل صبح اصبح بيه على طاري ذيج اليله ..
امس انتِ اليوم شمس باجر غير وحده
وبنيه من بنيه الي تنجبر ووتنهان وتتأذه وتنغصب على شي ماتريده وتنضلم  بسبه  ضمير ميت
الناس وصلت مرحله اهم شي نفسه
وغيره الي يدفع الثمن
ماكدرت انقذج على رغم كل حبي الج
طلع الحب ما يكفي
لذالك رح احاول انقذ شمس بدون الحب
من بعدج ما احب غير ليان
لان شايله بروحها انتِ
ليث..بقيت كاعده بالساعه واكثر
كمت ورجعت ليوره  وصافن على  كبرهه  وأبالي الافكار تتصارع
البشره مايسوه شي
بيوم وليله ممكن يصير جوه التراب
الايام والسنين تركض
شكد احنه نقترف ذنوب واشياء غلط وان جانت صغيره  ونقنع نفسنه انو هيه بسيطه
بس يوم يصير المكتوب ونصير جوه التراب والكتاب ينقفل
محد يرحح يصحح اخطأنه ويمحي ذنبنه
محد رح يحجي الي ما حجيناه
محد رح يسوي الي ما سويناها
مارح نكدر نرجع ونصحح الي جنه دارين او حتى شاكين  بي غلط
لو نستغفر عن ذنب أجلناه
لو حتى جذبه بالشقه اتناسينه نعترف بيه
ممكن بلحضه والثانيه كلشي يصير ماضي وكل فعل وفكره احنه شايله تروح ويانه للتراب
الوقت ما ينتضر احد
بس احنه ننتضر الكل بلا سبب
ننطي اعذار وتأجيلات  الى الا شيء
وما نحس برهبه الموت القريبه عنه ولا رهبه الوقت الي ماينتضرنه
لماً البشر يتغاضى عن كلشي ويتناسه كلشي
ويسرح ببحر الحياة على اشياء مهما جانت بسيطه بس لكل شي الى جواب وعقاب 
الوقت   مستمر
ف الخطأ الي ما يتصلح   مكتوب ألى درس