#عاشقة_محرومة ج2
الحلقة :: 6 ::
ايمان: هاااا هاااا خيرك الهم !!!!
رقية: عبدو هنا ووالع منك ولعة ماصارتش ،، نوضي شوفيه ياهم
ايمان: فوتيه مانيش طالعة 😒
رقية: ايه لما يبدا الراي رايك ،، تي نووووووضي يامصيبة
ايمان: اووووف باهي باااااهي بااااه
نضت غسلت وجهي ولبست وشاحي ومشيتله
ايمان: خير
عبدو: جيبي حوايجك وهيا
ايمان: ومن قالك اني مازال نرجع لحوشك يادكتوووور عبد الرحيم
عبدو: ايماااان اكسري الشر ونووووضي تحركي
ايمان: لا
عبدو: ماتبيش يعني !!!
ايمان: ايه ومادابيك ماتعبنيش زيادة وجيب ورقة طلاقي لهنا
عبدو: والله !!!
ايمان: والله ،، ماتلزمنيش عيشة النكد
عبدو: اوكي تمام ،، حتي انا ماتلزمنيش مرا تطلع بلا شوري
ايمان: علاش بنشاورك متلا !!! ،، انت درتلي قدر وقيمة باش نشاورك !!!
عبدو: اسمعي ايمااان ياترجعي بطيبة يااما مش ح يصير خير
ايمان: ع اساس صاير خير قبل !!!
عبدو: ايماااااااااااااان 😡
وقف ورفع صبعه يهدد: ارجعي والا قسما عظما انشحطك تشحيط ع الطلاق ره نخلييييك تتمني الموووووت
ضحكت ع الجنب ووقفت: اصلا في الحالتين بنتمنى الموووت ،، تعرف علاش ؟؟ ،، لاني كنت نحسااابك راااجل
ومانعرفش كيف ،، ضربني كف لين طحت لوطة واخر كلمة سمعتها ( ايمااان ،، ايمان)
فتحت عيوني بصعوبة شفت رقية وعبدو وامي واقفين عليا مدغدشات ،، قمت ايدي فوق شدتها رقية وطبست عليا بحنية وقالت : الحمد لله ع سلامتك ايمان 😔
ايمان: علاش!! ،، انا وين ؟؟
رقية: دوختي وجبناك للمصحة 😔
سندتني رقية وقعمزت وشبحت لامي: علاش شن صارلي ؟؟
امي: عادي يابنيتي تو تعوضيه مادام رويجلك معاك تجيبي بدل الواحد عشرة
ايمان: شن يللي قاعدة تفولي فيه يمة !!!
عبدو: فهموها بالشويا انا طالع وتو نجي
شبحتله باستحقار وطلع ،، شبحت لرقية : فهميني شن صار!
رقية: كنتي مع عبدو تهدرزي وبعدها اغمى عليك ،، ولما جبناك هنا رميتي الجنين يللي كان في بطنك 😔
ايمان: جنين ؟؟؟ ،، قصدك انا حااااامل !!
امي: العفو ماتندريش ع روحك !!!
ايمان: غير دقيقة يمة ،، يعني كنت حااامل انا !!!
رقية: ايه حبيبتي ،، بس الدكتورة طمنتنا وقالت قاعد في بدايته مايأثرش سلبيا ع صحتك
ايمان: حقير 😠
امي: من هوا !!
ايمان: نبي نطلع من هنا ،، بنروح معاك يمة
امي: تبي بوك يقتلك ،، قعمزي وريحي جمالك عند راجلك وبلا دوة فاضية
ايمان: اووووف ،، رقية جيبي عبايتك ىبنروح معاك
رقية شبحت لامي وقالتلي: ايمي عبدو يراجي فيك البرا ،، وغدوا ان شا الله ح نجي نطمن عليك باهي !!
ايمان: تي انتم خيركم توزعو فيا ؟؟؟؟ ،، مانبيشي عبدو انا ،، مانبيش نروح عنده افهموووني ،، هوا السبب الحيوان هدا ،، هوا ضربني كف يمة شوفي خدي هاااا ،، هوا ضربني وصار فيا هكي ،، وبعدين علاش ماسألتيش رقية ن جيبني انا في حوشها ؟؟؟ ،، واااضحة لانه كلب ودار فيا ماينداااار ،، حياتي سوووودا معاه والله
ع خشة هناء ومرت عمي وخوي نور ،، فنصت فيا امي ،، مسحت دموعي بالقوة وسلمت ع مرت عمي فتحية وبنتها هناء
فتحية: الحمد لله ع سلامتك غزيلة ،، تو تجيبي غيره عادي
ابتسمت مسايرة ليها ،، تغمرتني هناء ووشوشتلي: شن صاير خيرك تبكي !!!
ايمان: مضايقة بس
قعمزت جنبي وشدت ايدي: عادي ربي تو يعوضك 😊
نور: ههههههه هي نوووضي مش طالع عليك جو المرض 😂
ايمان: خززي عليك ،، حق طمني امتى حددت موعد عرسك !!!
نور: بالك الصيف ،، تو ع امها لانها مشت للكويت تروح بنتزوجو ان شا الله
ايمان: ان شا الله ،، روكا مدي عبايتي
مدتلي عبايتي لبستها ،، وشبحتلهم بالواحد: هي نوووضوا نكملو سهرتنا في حوشي
امي شبحتلي : لا بالك راجلك بياخد راحته معاك وبنضايقوه
ايمان: لا عادي اصلا عبدو هوا يللي قاللي اعزميهم 😊
روحنا لحوشي ،، وقعمزو في الصالة وخشيت نبدل في حوايجي ،، فتحت شنطتي وبديت نفركس ع قفطان باهي يلتبس ،، خش عليا عبدو بعد ماطق طقتين خفاف
عبدو: ايمااان انا بنقولك
ايمان: ماتقول شي ،، اصلا مش جاية باش نسمعك
عبدو: مانندريش عليك حامل والله
ايمان: هئ ،، اطلع لو سمحت
عبدو: عااارف والله ان موقفي ضعيف ،، ومعاااك حق في كل شي بس جاي بنتأس،،،
قطعت عليه وعليت صوتي شويا: دور وين تصرفها ،، اطلع برا عبدو والا اقسم بالله نعلي صوتي ونفضحك
عبدو: اوووكي خلاااص اهدي الدكتورة نبهتنا ماتتعصبيش
ايمان: باهي اطللللع ،، بنبدل
عبدو: باهي هونا جبتلك شغالة تعاونك مابين ماصحيتي
ايمان: ها هاها ،، ضحكتني ،، يعني الشغالة بتاخد دوري معاكم في الحوش 😏
عبدو: لا حشاااك ،، انتي عصبتيني هداك اليوم وخليتيني هكي ندوي
ايمان: اصلا انا درت فيك خير ،، ومانبيش نفضحك بس اول مايروحو ح نولي لحوش رقية وورقة طلاقي توصلني ،، هي براااا
تنهد وطلع قربع الباب وراه ،، نهديت ع السرير وقعدت نبكي بقوة ،، علاش حظي هكي بس 😭 ،، بدلت حوايجي ونزلتلهم ،، لقيت سعدة معاهم وتمثل بانها تحبني وتعامل فيا تقول بنتها او ممكن اعز ،، قعمزتني جنبها وتواسي فيا ،، اصلا انا فرحت مانبيش صغار من هالمتوحش هذا ،،
سعدة: والله عوينة عطوهالك يابنيتي ،، الحسد مايرحم حد ،، كانت هيا وعبدو زي السمنة ع العسل واشششي عليهم عايشة بينا تقول بنيتنا ولا من يوصل فيها ولا توصل في حد ،، الله غالب يابنيتي الحمد لله ماجتش فيك الحمد لله يااااربي
وهيا مازال تدوي وانا سارحة نتفكر في كل يللي صار بيني وبين عبدو ،، جابت الشغالة الشاهي والحلويات وفرقت علينا ،، وانا مابيتش ناكل ،،
سعدة: لا ماتشربيش شاهي مش باهي تو انووض نديرلك حسي دافي يدفيلك بطنك ونديرلك شوية خضرا مطبوخة تنشطك
وانا نشبحلها باستغراب ،، نفخت بملل
سعدة: تحملي يابنيتي هااانت هااانت
ايمان: شن هيا يللي هااانت !!! ،، فهميني ؟؟
هناء طول جت جنبي وشدت ايدي وقالت: معليشي ايمي اصبري هالايام بس وتو ترجعي تحملي من جديد
شبحتلها وسحبت ايدي منها ووقفت
امي: وين ماشية ايمان ؟؟
ايمان: بنرتاح شويا
سعدة: ايه بري ارتاحي في دارك تو نجيبلك عشاك لعندك ،، ونقيم الواجب مع اماليك ارتاحي ☺️
شبحتلها وضحكت ع جنب وطلعت ،، ركبت لداري تلوحت ع السرير وخداني النوم ،، شويا وحسيت الباب انفتح نضت مخلوعة لقيتها هناء
ايمان: اوووف خلعتيني
هناء: من تحسابي بيخش عليك ؟؟
ايمان: فوتي فوتي ،، تعالي قعمزي
هناء: نبيك تحكيلي كل شي
ايمان: ماعندي مانحكي ،، مضايقة وحاسة روحي تاعبة لين خلاص
هناء: ع فكرة روحو اماليك كلهم قعدت انا بس هههههه
ايمان: كذااابة ،، امتى روحو علاش مانوضونيش ؟؟
هناء: انا قلتلهم خلوها ترتاح ،، وكبشت في امي لين خلتني نبااات بعد شيااااط ريق
تغمرتها وقعدت نضحك زي الهبلة: باهي اللي قعدتي انتي ،، الوحيدة يللي فاهمتني 😔
هناء: ايه ونزيدك تحملت تفتريش سعدة لين خداها النوم 😂 ،،، وكلووو ع شااانك يائمر ❤️
ايمان: منووورة ،، ياريتني انا بنت وقاعدين في حوش بروحنا 😍
هناء: كان انتي بنت منين بنلقوه الحوش بروحنا 😂
ايمان: ماتركزيش ،، قولي حقااا شن حال وليد ؟؟
هناء: متعاركين 😒
ايمان: ديما انتم 😂 ،،، امتى بيخطبك ؟؟
هناء: عام يللي بيجزو فيه البقر 😂😂
ايمان: والله الرجالة كلهم كلااااب اول مايشوفوك مايخلو مايديرو ع شانك ولما يوصلوك يستعملو الحيونة معاك ،، حقير
هناء: هذا يللي نبيه ،، علاش شن صاير معاك ؟؟
اتكيت عليها وبديت نحكي مع شوية بكيااات ،، تعبت من هالحالة وربي عااالم 😭
هناء: خلاص حبيبتي معاش تبكي ،، انا ح نقعد معاك لين تتحسني اوكي !!
ايمان: والله يارريت نقدر نتحسن بس بقعدتك عندي ،،، انا دواي طلاقي من عبدو بس بس 😞
هناء: اول شي حابة نذكرك بيه لو اطلقتي عابية ع عمي بيرحب بيك وترجعي لحياتك المأساوية يللي زمان ،، نكد وهم وغم ،، ومن بيرضى بيك باسم مطلقة ؟؟
ايمان: مايهمنيش ،، المهم معاش نبي نقعد معااااه
هناء: ايمان بنسألك سؤال ،، انتي تحبيه عبدو ؟؟
قمت راسي ومسحت بموعي وسرحت في ايامنا الحلوة ،، حركت راسي وطردت خيالي الواسع يللي رفعني لجزر المالديف ،، يحكو عليها قنينة وللعشاق ،، باهي انا ماعنديش مكان بين العشاق ،، شبحت لهناء وقلتلها: نكذب عليك لو قلت لا ؟؟ ،، بس حياتي المستقبلية اهم من حبي ليه ،، مش قادرة نعيش مع واحد مستحقرني وهازي عليا ولا مش هكي مشقيني مع خوته ،، يللي نشوف فيه القدام هوا حياتي مع صغاري ،، كيف بنربيهم مع واحد مش مدايرلي اي قيمة ولا قدر بين اهله ،، وطول الوقت يعايرني باني مش مهتمة بروحي ولا بمنظري ؟؟ ،، معاش نقدر نتقبله بكل
قطع هدرزتها رنة تليفون هناء ،، شافت الرقم وضحكت
ايمان: مني ؟؟؟
هناء: هذا وليد ،، فوتيه مش ح نرد
ايمان: علاااش ؟؟
هناء: القعدة معاك تسوا وليد واهله كلهم
ايمان: كخخخ فكينا من الدراما هادي وبري ردي عليه 😒
هناء: حيوانة ،،، باه
طلعت من الدار ومشت لدار الضيوف ترد ع وليد ،، وانا طلعت من داري وحاسة روحي مازلت دايخة ،، لقيت سعدة مقعمزة ع الصالون تشرب في الشاهي مع عليوة وعماد
ايمان: السلام عليكم
خشيت للمطبخ ،، طلعت خبزة وحكة تن وكيف فتحت القجر بناخد موس خش عليا عماد
مابيتش نعبره ،، قعمزت ع الطاولة ودرت نصي ،، وهوا قاعد واقف
عماد: امتى مروحة بنت عمك ؟؟
ايمان: ضايقاتك ؟؟
عماد: لا نسأل
ايمان: غدوا ان شا الله مروحين انا وياها
عماد: وين بتروحي انتي ؟؟
ايمان: خلاص معاش ليا لزمة هنا ،، نبي نتطلق ياسرني
عماد: الطلاق عندك ساهل !!
#Dudu
