#عاشقة_محرومة ج2
الحلقة :2:
،، وحطيت الوشاح حطاان ،، لقيتهااااا 😱😱😱
مقعمزة هي والجيران في الصالة ،، شفت لمنظري كيف مبهدلة وعيوني منفخات من النوم ،، وشعري مكشكش ،، انصدمت ،، قمت عيوني فيهم لقيتهم يوشوشو لبعضهم ،، باهي وانا ؟؟؟؟؟
ايمان: سامحوني ،، بس حنينة قالت ماصارلكمش من الجي 😞
سعدة: عيييت وانا انادي ليهم ساعة هنا
ايمان: بالله عليكم سامحوني ،، هي شويا بس نبدل وانجي
هما مازالو في حالة صدمة ،، وانا كيف طلعت من الصالة ،، سمعت سعدة تقوللهم ( هذا حالها من يوم جتنا ،، ياناري ع وليدي عبدو منين ملقط الدعي ؟؟؟ )
دموعي في عيوني ،، وعبرتي خنقتني ،، مسحت ع عيوني وكيف بنركب ،، سمعت الجارات يتكلمو
_غريبة ياحاجة ،، بنات مجيد معروفات فالحات ومن يومهم في القضية
_ايه والله ،، بوهم كان واااعر فيهم مايعرفش الحن معاهم بكل
سعدة: اللي داره فيها بوها رداته فينا 😏
كيف قدمت خطواتي بنوريها الزنباع وين ينبااع 😤 ،، بس تفكرت عبدو ،، مانبيش انضايقه وبعدين شن ماقالو الجيران معاهم حق ،، اكيد مش ح يكذبو عيونهم ويصدقو تبريراتي للموقف ،، اما سعدة ااااخ ربي يصبرني
باقي اليوم تجاهلتها حتى تلقح مابيتش نرد عليها ،، روح عبدو مع الساعة 10 ،، لقاني راقدة ع كرسي الصالون ،، جي نوضني
عبدو: خيرك ايمي راقدة هنا ؟؟؟
تكسلت شفت للساعة وشفتله : عطلت هلباااا
عبدو: هدا وين طلقوني الولاد ،، هي نوضي ارقدي في الدار
ايمان: وانت ؟؟
عبدو: بندوش قبل
ابتسمت وكيف بنمشي ،، شدني من ايدي : خيره عيونك حمر ؟؟
ايمان: ممكن من التعب بس
عبدو: كنتي تبكي ؟؟؟
ايمان: لا علاش بنبكي هههه ،، ربي مايجيب بكي 😊
عبدو: ههههه يااارب ،، حق فكرتي في الموضوع ؟؟
ايمان: ايه
عبدو: وشن قررتي ؟؟
ايمان: نبي نواصل في قرايتي 😔
عبدو: ههههه تمام ،، هكي ايمي الصح ،، من غدوا بنبدا في الاجراءات ان شا الله
ايمان: ان شا الله ،، هي تصبح ع خير
ركبت لداري والكمدة في قلبي ،، نبي نطلع من الحوش باش نرتاح منها هالعزوز ،، وتيت حوايج عبدو ،، وخشيت لسريري رقدت 😴
الصبح ،، فتحت اغنية لفيروز وبديت انضم في الحوش ،، وبما ان كبدي دم ع العزوز قويت الصوت باش تنوض ،، عماد مشي للكلية ،، يعني راسي وراسها ،، قعدت نقربع في الاماعيين ،، وفتحت الرواشن ونفضت الجلسة ومسحت الغبرة ،، بعدين خشيت لدارها وقعدت نمسح في دولابها
سعدة: اللطف ماتعرفيش تفتحي بالشوياااا
ايمان: سامحيني ،، لكن بنضم والبايرة بس ترقد الوقت هدا 😏
سعدة: سكررري الروووشن عيوووني
ايمان: خدنييييي ع بلااااااادي 😜
سعدة: شن جاك اليوووم ؟؟
هيا تعلي في صوتها تحسابني مانسمعش فيها ،، طلعت من دارها وسكرت الباب بقوة ،، ضحكت ع منظرها كيف مخلوعة ،، سكرت المسجل وقعمزت بنرتاح شويا ،، طلعت من دارها وتحك في عيونها
سعدة: الساعة كم توا العفوو ؟؟
ايمان: الساعة 9:00
سعدة: تو التقربيع هدا كله والساعة تسعة 😱
ايمان: ايه ،، تبي قهوة ؟؟
كنت مدايرة السزوة ع النار ،، قلت كلمتي وخشيت للكوجينا ،، حطيت القهوة وهيا لحقتني
سعدة: نبي شاهي
ايمان: مش مدايرة فطور ،، في قهوة توا بس
سعدة: ساهلة ديري فطور والله حالة
تلفتلها والشرارة تطلع من عيوني: علاااش تعاملي فيا هكي ؟؟؟
سكتت وطلعت من المطبخ ،، سمعت صوت القهوة فاجت ،، اووووف تعب تعب في هالحوش مافيش غيره ،، قعدت في الغاز ،، سمعت سعدة تتكلم بالتليفون وتعمدت تعلي صوتها تبيني نسمعها تشكي لبنتها مني ،، 😏
حطيت الغدي ع النار بعدين طق الباب ،، لبست وشاحي وفتحته لقيته عليوة ،، خديت منه شنطته
ايمان: شن جو المدرسة اليوم؟؟
علي: اعععي كالعادة
وقعمز ع الصالون ،، قعمزت جنبه
ايمان: بالعكس احلا ايام هيا ايام المدرسة والقراية
علي: شن فيها من حلو ؟؟؟
ايمان: مش ح تحس بقيمة الشي لين تفقده 😞
علي: ممكن ،، انتي لوين قريتي ؟؟؟
ايمان: صف تانية اعدادي 😞
علي: مازالك هلباااااا ،، المفروض توا صف شني ؟؟
ايمان: جامعة ياحسرة 😭
علي: تفكيتي والله ،، قراية وهم زايد 😒
ايمان: عليوة ،، عادي تحكيلي ع عيلتكم شويا
علي: شن تبي تعرفي بالزبط ؟؟
ايمان: علاش عماد ديما معصب ؟؟ ،، وحناكم علاش هدا وين جتكم وعاشت عندكم ؟؟
علي: عماد من لما كبرت وهوا هكي مامعرفش خيره ،، لكن حنينة ع حسب ماقالت ان كان عندها ظروف هدا علاش ماجتناش الا توا ،، بيني وبينك مش مرتاحلها ههههه
ايمان: ههههه ،، قصدي عماد هكي معاك ؟؟
علي: كيف ؟؟
ايمان: توا انا اول ماجيت للحوش وهوا مش طايقني ولو غلطت يعيط في وجهي وتصرفاته باردة معاي 😢
علي: هوا هكي نكدي فوتيه ،، المهم بوي عبدو معاك مية مية 👍🏻
ايمان: ايه الحمد لله ☺️
علي: احني ياايمان ماعندنا حد ،، من لما بوي علي وامي توفو قعدنا بروحنا ،، كنا في بريطانيا لين كمل عبدو قرايته ،، مانتفكرش جد في يوم اتصل وسأل علينا ،، ولما بوي عبدو خطبك هبلو بنات العيلة كلهم 😂
ايمان: 😂😂،، علاش هما مايعرفوشي ؟؟
علي: ايه ماشافوشي من قبل ،، لان زي ماقلتلك مانواصلو في حد وماحد واصلنا 😂
ايمان: 😂
علي: ايه توا دورك تحكيلي ع عيلتكم ،، مانعرف عليكم شي الا انكم جيرانا 😂
ايمان: قصص ،، عيلتنا بروحها تبي كتاب 😂
علي: باهي كيف تعرفتي ع عبدو ؟
ايمان: خوك استفزازي هلباااا ،، عركة هيا سبب تعرفنا 😂
( راك تبطلي دوة وتنوضي توتي الغدي ،، عماد جي 😒 )
سمعت سعدة تتكلم من داخل دارها ،، صوت منكد 😑
ايمان: خلاص يوم تاني نحكيلك ،، هي خش بدل حوايجك بنحط الغدي 😀
علي: اوكي 😅
نضت للكوجينا ،، وتيت الغدي ،، خش عماد عليا خلعني
ايمان: تبي حاجة؟؟
ماردش عليا ،، اوووف قداش حيوان هالولد ،، تلفتت كملت الغدي ،،
عماد: اسمعي الولاد بيتعشو عندي الليلة ماتحشميناش 😒
مارديتش عليه ،، قمت الصواني وطلعت ،، كما تدين تدان 😌 ،، وليت للكوجينا لقيته يشرب في مية ،، عبيت المالقي مية وحطيته ع الصفرة سمعت الباب انفتح عبودي روح 😍 ،، طلعت نجري
عماد: خفيفة هالبنت 😒
ماعدلتش عليه ،، سلمت ع عبدو
عبدو: عندي خبر ح يفرحك 😌
ايمان: ان شا الله خيرر !
عبدو: سجلتك وتميت الموضوع
من الفرحة تغمرته وقلتله: شكرااا عبدو بجد ❤️
عبدو: ههههه المهم عندي تشدي في قرايتك وتنجحي 😉
جي وقف عماد ،، تجاهلته
عماد: عبدوو شن الجو؟
عبدو: ملييح ،، شن جو قرايتك ؟
عماد: تمام اهو الولاد اليوم جايين غدوا عندي امتحان 😒
عبدو: بالتوفيق ،، شد حيلك وريحنا ،، انت وايمان وعليوة وانا تقول بوكم 😂😂
عماد: ايمان ؟؟ ،، شن بتقرا ؟؟ 😳
عبدو: اشتراك ☺️
عماد ضحك ضحكة هزوة 😏 ،، وخشو قعمزو ع الطاولة ،، وانا واجعتني هزوته عليا ،،
عبدو: ايمان وين سارحة ؟؟
ايمان: لاشي ☺️
عبدو: ماعندك شي اليوم ؟؟
ايمان: عماد جايينه صحابه 😒
عبدو: وشن تبي منها ياعماد ؟؟
عماد: الولاد بيتعشو عندي مش قلتلك
عبدو: ايه وشن دخل ايماان ؟؟
ايمان: مش نوتيلهم عشاهم !!
عبدو: اصلا عماد مش متعود يجيب صحابه ويعشيهم في الحوش ،، خود فلوس وبرا لاي مكان كولو واقرو 😑
عماد: لكن،،،،،،
حط عبدو كاشيكه وقال بنبرة غضب: ايمان بنرفعها لاماليها اليوم ،، ياسرها قعاد بسبايبكم 😒
عماد عصب حط كاشيكه وناض من ع الطاولة وخش لداره ،، اول مرة نشوف عبدو هكي من لما تزوجنا
سعدة: وشن فيها كان قعدت اليوم وتتلهم عشاهم ؟؟
عبدو: حناي اطلعي من الموضوع
قربعت حتي هيا وناضت،،
علي: الحمد لله 😊
ناض لداره ،، انا شبحت لعبدو لقيته منسجم في الاكل
ايمان: عبدو ،، معليشي خللي نقعد اليوم
عبدو: لا ياااسر امس حنااي وشن دارت فيك 😒
ايمان: ومن قالك ؟؟
عبدو: استخباراتي
حط الكاشيك وحط ايده ع ايدي ،، لين رعشت ،،
عبدو: والله كبرتي في عيني يابنت 😍
وجهي ولّا احمر: هكي الاصول 🙈
عبدو: بس مافيش بنت تتحمل ماتحملتيه من اول يوم مشااااكل 😂
ايمان: ههههه تضحك !!
عبدو: تعرفي شن تفكرت 😂
ايمان: شنو؟؟؟
عبدو: لما شفتك ترقصي في السطح زي الهبلة 😂😂
ايمان: خزززي عليك 😂😂
عبدو: هي نوضي وتي روحك
ايمان: مانبيش نمشي ،، نايضة بكري وتاعبة غدوا نمشي 😁
عبدو: مصحك والله ً،، تي نوضي بالك
ايمان: عيب والله عيب ،، معقولة بنخلي خوك يتعشا البرا وانا موجودة 😕 ،، ماتجيش والله ،، خليهم اماليا مش ح يهربو
عبدو وقف وجي جنبي ،، وقفت ع طول خفت يعصب غمضت عيوني ،، بس شد خدودي بيديه وباسني ع جبيني 😘
عبدو: ربي يخليك ليا 😘
تحشمت ،، وتوترت ،، قعدت نغطي في شعري ونرعش ،، ضحك 😂
ايمان: مبردك 😳
عبدو: هههههه لما تعرفت عليك ماشفتش هالحشم فيك 😂
ايمان: ماهوو ،، قصدي ،، قصدي في فرق 😊
عبدو: 😂😂،، ايمان احكيلي لما تعرفتي عليا شن كنت تشوفي فيا ؟؟؟
قعمز ع الكرسي ،، قعمزت وبديت نلعب بصوابعي بتوتر
ايمان: كنت نشوف فيك شرير هلبااا ،، عصبي وعنيد ،، وشخص مستفز ومغرور ،، بس لما تعرفت عليك ع الفيس حبيت شخصيتك 😍
عبدو: عندك الحق تشوفيني هكي مادرتش فيك طيب 😞
ايمان: خلاص انسى ☺️
عبدو: ماتبيش تعرفي نظرتي ليك ؟؟
ايمان: اكيييد 😅
عبدو: مرتي 😘
وباسني مرة تانية وناض لدارنا ويضحك 😂 ،، ابتسمت ،، وشفت الاماعيين قدامي ،، نضت غسلتهم وضميت الكوجينا ،، طلعت نتفرج ع التلفزيون ،، سمعت باب دار عماد انفتح ،، عدلت وشاحي ووقفت
ايمان: ءء عماد ممكن لحظة ☺️
عماد: شن تبي ؟😒
ماعنداش اسلوب نهائي هالفرخ ،، جيت قدمتله شويا
ايمان: شن تبيني نديرلك ع العشي ؟؟
عماد: انتي تقتلي القتيل وتمشي في جنازته ،، عبيت راس خوي باش عيط عليا وتوا جاية اديري في روحك طيبة معاي 😠
ايمان: والله ماقلتله حاجة ،، قدامك كل شي صار والله
عماد: ع العموم مانبي منك شي
ومشي للكوجينا ،، لحقته نبي نحاول نفك الحواجز يللي بينا ونبيه يرتاح بوجودي ،، مش تقول يشوف في شطان قدامه
ايمان: تبي نديرلك قهوة ؟؟
عماد: مالكش علاقة 😏
ايمان: عماد !!
عماد: هآآ
ايمان: خيرك تعامل فيا هكي ؟؟
عماد: ع فكرة انا مش راجلك ره ،، يعني مش مطّر نعاملك زي ماتحبي ره 😏
عصرت قبضة ايدي بتعصب وطلعت من الكوجينا ،، مهما درت مش ح يعاملني كوويس ،، صدقني عماد والله لما تندم ع كل يوم جرحتني فيه ،، وح نعاملك بأصلي ومش ح نراجي منك جزاءا ولا شكورا 😏
#Dudu
