#عاشقة_محرومة ج2
الحلقة : 1 :
كنت نحساب صورة عرسي نهاية لمأساتي ،، كنت نحساب زواجي من عبدو ح ينهي كل آلم حسيته ،، كل جرح توجعته ،، كل مرّ ذوقته ،، و ح يتحقق كل حلم حلمته 😍،، بس هيهآآآت ،، تميت حلقة من حلقات الألم ،، والحبل ع الجرار ،، انا ماتزوجت عبدو 😦،، لا لا ،، تزوجت خوته وحناه ،، يللي اتفكرتهم بعد ماجيت انا ع هالقصر ،، جية لا يحسد عليها ،، كأن عبدو تزوجني باش نكون شغالتهم ،، الصبر وماعنديش غيره ،، مستحيل نزيد أمي وخواتي ونور ع مابيهم ،، طبعا مش ح نحكيلكم ع بوي لان رجع لعيوبه القديمة وحتى بعد ماغيرنا عتبة الحوش 😞 ،، كنت واقفة ع الروشن نشوف لسطح حوشنا القديم ،، كانت الرؤية واااضحة ،، عبدو شاف هبالي اولا بأول 😅
قطع ع ضحكتي صوت باب داري يدق ،، الحاجة الوحيدة الخاصة بيا في هالحوش
حطيت الوشاح ع راسي وفتحت الباب ،، وكانت حناه سعدة ،، تنفخ واتمتم 😒
ايمان: نعم حنينة ،، تبي حاجة ؟؟
سعدة: وخيرك ياحنة تقولي فيها من غير نية 😠
آوف والله ماخاطري في نكد ووجع راس
ايمان: لاوالله ماصارت ،، قوليلي تبي شي ؟؟؟ ☺️
سعدة: نبي نتغدا ،، جعت خلااااص
في خاطري والله تريحيني شن نشوف منك ع الصفرة الا النكد ،،
ايمان: حاااضر ،، ماتبيش تراجي عبدو ولاه!!
لوت شاربها،، وقالت: وخيرك تقولي فيها فرحانة 😒
مصنع بيبسي مايفوتك ياحنينته انتي 😤
ايمان: شوفي حنينة انا تربيت ع اللمة ،، فاكيد مش ح اضايقيني ع الصفرة ،، لكن مادامك تبي بروحك ف عادي اللي يريحك يصير 🤗
شافتلي من فوق للوطة ،، وقامت رداها ونزلت ،، سكرت الباب طبعا بهدووء ،، مش خاطري في مشاكل 😒
وكيف بنسكر الروشن ،، شفت سيارة عبدو ادرست ،، فرحت 😃 ،، شوفته بس تريحني وتفرحني ،، سكرت الروشن ولبست وشاحي كوويس ونزلت نجري ،، وفي الدروج من غير ما ننتبه خوه عماد راكب وخبطت فيه
عماد: ماتشوفيش انتي 😠
ايمان: ماركزتش 😒
عماد: وامتي عندك عقل انتي 😏
ايمان: ايه صح ،، والدليل قاعدة اناقش فيك 😤
تلفتت القدام لما سمعت باب الحوش انفتح
عماد: عيل 😒
ايمان: مبردك 😒
عماد: شن قلتي ؟؟
ايمان: سلامتك 😁
كملت طريقي لعبدو ،، خديت منه دجاكته والشنطة
ايمان: الحمد لله ع سلامتك 😊
عبدو: الله يسلمك ،، شن جوك ايمي 😊
ايمان: الحمد لله ،، خش كيف بنحط الغدي لحنينة
عبدو: ايه والله جعااااان لين خلااااص ،، نبدل ونجي 😘
ركب وانا نشوفله بفرحة ،، وابتسامة ،، حتي نكدهم ننساااه لما نشوفه 😍
قطعت عليا اللحظة الرومانسية حنااااااه،، آآخ منها
سعدة: تي هيااااا وانتي تتمرخي 😤
ايمان: باهي باه
خشيت للكوجينا وتيت الغدي ،، وبما انهم عيلة اتيكيت ع مايقولو ،، كل واحد وصونيته ع الطاولة ،، جبت المية
ايمان: حنينااااااا ،، عبدوووو ،، عمااااااد ،، عليووووة هيا تعالو تغدووو 😊
عليوة ( علي ) هذا الصغير وسمووه ع اسم بووه لان توفى وهوا في بطن امه ،، وكبر وهوا يقول لعبدو ( يابوي ) باعتبار انه عبدو رباااه وحل محل الاب ،، وتوفت امهم لما كان عمره 5 سنين ،، ولاخالة ولا عمة اهتمت بيهم ،، وقعدو في الغربة لين كمل عبدو قرايته في طب الاسنان ورجع هوا وخوته لبلادهم وبنو حياتهم بروحهم ،، علي عمره 11 السنة ،، وعماد 24 سنة ويقرا طب بشري انسان ممل ولسااانه طوويل ،، وماعنداش اسلوب ولا منطق ،، انطوائي هلبااا ،، وديما في داره مايطلعش الا في المناسبات 😂 ،، ممكن صايرتله حالة نفسية من وفاة امه وبوه ،، وهادي قصة عبدو وخوته
قعمزنا ع الطاولة ،، بما انه عبدو المسؤول ع هالعيلة مقعمز في الكرسي الاول مقدمة الطاولة ،، انا ع يمينه وحناه ع يساره وعماد جنب حناه وعليوة جنبي ،، مانعرفش ناكل معاهم لاني نتحشم من خوه عماد يللي مش محترمني نهائيا وكأني مش مرت خوه ،، كأني شغالة وممكن أقل 😦
سعدة: كووول عليووة ،، البركة فيك
عليوة بيرد ع حناه وهوا ياكل شرق ،، نضت نجري جبتله امية ،، شرب
عليوة: شكرا ☺️
سعدة: تي قريب موتت وهي تتمستك 😒
ايمان: حرام عليك 😞
سعدة: يحرررم جلدك عن عظمك 😤
شبحت لعبدو ،، غمضلي عيونه متاع ( اصبري ياايمي 😔 ) ،، كملت غداي وانا ساكتة وهيا قاعدة تلقح ،، رديت عليه بابتسامة 😊 ،، ناض عبدو وخش لداره بيرقد ،، اما عماد طلع ،، وعليوة يلعب بلايستيشن ،، وقمت الاماعيين وخشيت للكوجينا نغسل فيهم ،، خشت عليا سعدة ،، فتحت الثلاجة وقربعتها ،، مانعرفش هالعزوز امتى تريحني وترقد ،، مابيتش نتلفت ،، خديت فوطة وقعدت نمسح في الاماعيين ،،
سعدة: ديري بسبوسة
ايمان: ماعندناش سمادينة
سعدة: ابعتي عليوة
ايمان: باه 😒
سعدة: قولي ايمان ،، ماتبيش تمشي لماليك ؟؟؟
ايمان: لين يقوللي عبدو
سعدة: انتي تبي ؟؟
هادي خيرها تسأل شن يللي يدور في راسها هالشومة !!
مارديتش عليها ،، كملت اخر صونية وطلعت من الكوجينا لدرانا ،، لقيت عبدو راقد وجنبه تليفونه ،،
ايمان: عبدو رقدت !!!!
عبدو: امممم
ايمان: باهي عادي نكلم امي !!!
عبدو: اهو التليفون جنبك خوديه
ايمان: شكرااا
خديت التليفون وضربت رقم نور خوي وطلعت من الدار وقعمزت في دار تانية
نور: اه عبدو شنج ؟؟؟
ايمان: انا ايمان ،، كيف حالك نور ؟؟
نور: اوووه ايمان ،، شن جوك ؟؟
ةبعدين قعدت نسمع في دوشة خواتي جنبه قعدت نبكي
نور: خيرك ياهبلة ههههههه
ايمان: استاحشتك 😭
نور: انا بس هههههههه
ايمان: لا ياقرد والله كلكم ،، اخخخخي الجو هنا 😢
نور: هذا عبدو يللي تبيه 😜
ايمان: ههههههه مبردك ،، كيف حالكم كلكم ؟؟؟
نور: تمام والله الحمد لله ،، كيف حال عبدو وخوته كلهم ؟؟ ،، ان شا الله ماحشمتيناش بس 😂
ايمان: خزززززي عليك ،، تي نعجبك ياراس 😂
نور: امتى ناوية تجي ؟ ،، وووه كلهم يتعاركو يبو يكلمووووك ،، تي بالشويا وااااااك
نسمع فيهم يتعاركو قعدت نضحك ،، بعدين سمعت صوت خربشة قدام الباب 😨
سكرت الاتصال ،، ونضت شفت مني ،، لقيته عليوة
ايمان: خيرك عليوة تبي حاجة ؟؟
علي: اه لا لا ،، انتي تبي نجيبلك حاجة ماشي للمحل 😬
ايمان: نبي سمادينة ☺️
علي: متاع البسبوسة ولاااه !
ايمان: ايه ،، رد باااالك تنسى وتجيبلي كسكسي 😂
علي: لا نزبط عيب عاااد 😜
رن التليفوون في ايدي انخلعت ،، لقيته نور ،، رديت عليه
امي: امونة بنيتي كيف حالك ؟؟
حسيت روحي مسافرة بلا عودة 😂
قداش حوش الاهل دااافي من غير دفاية ،، سعادة بلا ابتسامات ،، مهما كانت فيه مشاكل وهموم ،، يبقى #اساس_الفرحة ،، في العشية لقيت سعدة راقدة ،، ولله الحمد ،، درت فنجانين قهوة وحطيت من البسبوسة وركبت بيها لداري لقيت عبدو ،، يلبس في سوريته ،، ابتسمتله ،، ردلي الابتسامة
عبدو: مش ح نكسر بخاطرك ،، تعالي نطلعو للجنينة ونهدرزو شوي شن رايك ❤️
ياسلام هوا في حد يقدر يقول لا معاك عبودي 😘
قعمزنا في الجنان ،، كنت مازلت نتحشم منه ،، وخاطري ناخد راحتي معاه بالمزبوط باش نرتاح والحشم الزايد اللي عندي يتحوول ،،
عبدو: حقااا ايمي شن رايك تشتركي في امتحانات وتواصلي قرايتك ☺️
ايمان: مانقدرش حناك وخوتك مني بيهم 😞
عبدو: حتى انا قلتلك اشتراك ،، يعني تقري في الحوش وتمشي تمتحني بس
ايمان: تو نفكر
عبدو: ايه مادابيك توا قبل مايجينا البيبي المتتظر 😍
واطيت عيوني ابتسمت بخجل ،، ضحك بصوت عالي وقاملي وجهي بصبعه السبابة
عبدو: تسلم ايديك ع البسبوسة 😉
ايمان: صحتين 😍
عبدو: مش حابة تزوري اماليك اليوم ؟
ايمان: ايه والله ياااااريت ☺️
عبدو: خلاص طيري وتي روحك وتعالي ،، تلقيني في السيارة
ايمان: باهي خللي نقيم الصفرة 😊
عبدو: خليها توا وبري 😉
الشخص يللي قبل الزواج كنت نشوف فيه قمة في الغرور ،، اليوم شخص تاني بكل ،، حنون وشخصيته تهبل 😍
في اقل من ربع ساعة كنت وااااتية ،، سكرت داري بالمفتاح ونزلت من الدروج قابلتني حناااه ،، آووووف ضروري ماتنكد عليا
سعدة: ع خير ياطير ؟؟؟
ايمان: ماشية لاماليا 😌
سعدة: وماتعرفيش تشاوري !!
ايمان: عبدو يراجي فيا البرا 😅
سعدة: اليوم جايين الجيران بيباركو ،، قعمزي وريحي روحك
ايمان: لكن،،،،،،
ع خشة عبدو وقال: ايماااان شن صار معاك ؟؟؟
سعدة: عبيد تعالا جاي بنقولك
ودبة دبة مشتله ،، وانا في كمدة داخلي مش قادرة نطلعها بتعفس فيا ومش ح تخليني نمشي لاماليا
سعدة: جايين الجيران بيباركو وعيب تطلع ولاه!!
عبدو: حنااي قوليلهم طالعة ساااهلة قصدي
سعدة: لا ماتجيش ياوليدي بعد ماقلتلهم يتفضلو ،، وبعدين امبكري سالتها قالت ماتبيش تمشي شن يللي غيرلها رايها !!
ايمان: انا ماقلتش مانبيش ،، قلتلك لين يقوللي عبدو 😒
سعدة: شن انا نكذب !!
آوووف ،، مش ناوية تمشيها ع خير هالعزوز الغبرة ،، حطيت شنطتي ع طاولة الاكل ،، وشبحت لعبدو بمرارة ،، مالياااش شهر معاهم وهيا من عفسة لعفسة معاي 😤
عبدو: معليشي ايمان اليوم خليك غدوا نرفعك باهي !!
تنهدت ،، وشبحتلها بتعصب: عادي 😡
ردتلي ضحكة انتصار ،، ضحكة هزوة 😏
خديت شنطتي وركبت للدار ،، قربعت الباب ولوحت الوشاح ع طول ايدي ،، كان جايبتني من الشارع راهو مش هكي دارت ،، ااااخ يارب صبرني ،، حاسة الحظ بعيد كل البعد عليااا ،، بعد ماخديت الراجل يللي كل بنات الحارة يتمنووه ،، انتكبت بحناه 😔 ،، باهي شن الحل ؟؟ ،،، نبي نطلع ،، نبي نشكي لحد ،، لمن بنشكي ؟؟ ،، ماعنديش غير ربي ،، صليت ركعتين ارتحت فيهم ،، وين سلمت سمعت حناه تنادي ،، قعدت ندعي وفوتها بالطويل ،، بدي صوتها يتقرب ،، بعدين فتحت عليا الباب بالقووة وهيا تعيط ،، نخلعت جيت واقفة ونرعش مع بعضي
ايمان: خيرك ماطقيتيش ؟
سعدة: ناقصة غير تضربيني كفين ،، تعالي عادي ره
في خاطري والله فيك طريحة تمسح ع قلبي ،، كفين شويا فيك
سعدة: خيرك تفنصي !!
ايمان: مش متعودة في حوش اماليا حد يقربع عليا الباب
سعدة: اييييييه واااضح ،، لين عبدو سخف عليك من ضرب بوك وتزوجك 😏
انصدمت في كلامها ،، مني مقايلها بوي يضرب فيا ؟؟ ،، عبدو سخف عليا ؟؟ ،، 😳
كنت بنقوللها عبدو قعد يجري في جرتي لين راضيته ،، لكن مش ايمان يللي تكشف اسرار بينها وبين راجلها سوا زمان سوا توا ،، سكتت ،، نحيت بدلة الصلاة
ايمان: امتى الجيران بيجو ؟
سعدة: ومني قالك بيجو ؟؟
ايمان: كيف يعني مش قلتي جايين ؟؟؟
سعدة: وانتي زي الهبلة صدقتي ،، انزلي انزلي بلا كثر دوة وديريلي ليموناضة حاسة راسي بيتفجر من كثر ماناديت عليك 😑
وهادي صدمة تانية ،، قلبت عيوني بين فوق ولوطة ،، وتنهدت بتعب : باهي 😞
نزلت للكوجينا ،، وعصرت ليموناضة ،، ودفيتهالها شويا ،، وانا طالعة من الكوجينا ونشبح للطاسة ،، وخشيت في العزوز كانت جاية للكوجينا مانعرفش شن تبي ؟ ،، هوا صح تخابطنا لكن مش لدرجة اطييح ،، ع وقفة عماد
ايمان: اسفة ياحنينة ماشفتكش
وحطيت الطاسة ع الطاولة وتبسط بنقيمها دفتني ،، وشبحت لعماد : ريت كيف ياوليدي شافتني ضعيفة طيحتني 😢
شبحت لعماد يللي في عيونه غضب لا يوصف: لا والله ماشفتها ☹️
عماد: وييييين عيووووونك ،، تقاويتي ع عزوز !!!
ايمان: تي شن تقاويت ع عزوز ،، نقولك ماشفتهااااااش ماشفتهااااااش باش تفهم 😠
شدني من ذراعي بالقوة: وانتي خيرررك تعيييييطييييي ؟؟ ،، مش مقدرة حد ؟؟؟
وهديك العزوز ماصدقت ناضت تبكي بكي كدااابي ،، وانا تعرفوووني الدموع نشحت فيهم مستحيل ينزلو في وقتهم
ايمان: ارخي ايدي واحترم نفسك
عماد: ماديريش روحك شخصية علياااا فااااهمة ،، انتي مش قدي عسي ع روحك
فكلي ايدي بقوة وطلع قربع الباب ،، شبحتلي العزوز: يامازال يجيك
فنصت فيها وركبت لداري ،، تلوحت ع سريري وخداني النوم لاحلام مستحيل تتحقق 😪
فقت ع صوتها تنادي فيااا من لوووطة ،، فتحت عيوني لقيت الدنيا مظلمة ،، فاتني المغرب ،، نزلت وحاسة راسي رزيين ،، وحطيت الوشاح حطاان ،، لقيتهااااا 😱😱😱
#Dudu
