_________________________
في اليوم البعديهو صحيت متأخره و حقيقة انا نوم ما نمت و الليل كلو بتخلع و حبوبه و عماتي مساهرات معاي ، لمن صحيت قلت ليهم انا بس ماشه لأمي ما عايزا اقعد هنا دقيقه واحده ، حبوبه قالت لي ختي الرحمن في قلبك يا بتي خلعه و دخلت فيك ، الوسخ دا الله لا كسبو ، عمتي بثينه قالت لي يستاهل الضرب الإنضربو ، المهم في اليوم دا ما مشيت الجامعه و البعديهو برضو ما مشيت ما عارفه بس فجأه كدا بقيت أخاف و كل ما أغمض عيوني بتذكر الراجل و كيف كان جاريني معاهو و الحصل كلو ، تسنيم و شيماء لمن اتصلوا علي قلت ليهم عيانه ، زي العصريه كدا ناس فاطمه كانوا بتونسوا و جابوا سيرة الحصل ، إسراء قالت ليهم راشد ما قصر معاهو ، فاطمه قالت ليها المضحكني إنو جاب ليهم عربيه و خماهم كلهم خمة شوالات الوساخه ، قعدوا يضحكوا على العملو فيهم راشد و انا الوحيده المتفاجأه لأني ما كنت عارفه ، في اليوم البعديهو مشيت الجامعه ، حذيفه أخوي اتصل علي بس عشان كنت زعلانه منو ما رديت ، هو بعد ما عرف الحصل جا عشان يشوفني بس انا ما كنت في حاله تسمح لي أشوف زول أو اتكلم مع زول ، اصلاً لو ما هو جبرني أمشي ليهم ما كان دا كلو حصل معاي ، اساساً من البدايه القعده مع اعمامي ما كانت عاجباني و لمن حذيفه خيرني بين القعده معاهم أو يرجعني لأمي اضطريت أمشي ليهم و اخترت اقعد في بيت عمي الصادق لأنو ما بقدر أقعد في بيت عمي رضوان متأكده فاطمه و تهاني مرة عمي ما حـ يرحموني ، انا قبل كدا قعدت معاهم تلات أيام فيها أكلوا لحمي أكل و كرهوني حياتي ، عموماً نسوان اعمامي كلهم ما كويسات و العداوه دي جاريه في دمهم بس قلت في بيت عمي صديق حـ يكون الوضع أخف قدراً ، مرتو ما بتقعد كتير في بيتها ، يعني ما حـ اتقابل معاها كتير ، عكس بيت عمي رضوان الدايماً بحصل فيهو تجمعات للنسوان عشان يشربوا الجبنه، و البمسكوا سيرتها في الجبنه دي لحمها كلو بتقطع و عينك عينك يطعنوك بالكلام ، أنا بيت عمي صلاح فـ دا ما فكرت فيهو خالص و مستحيل أمشي ليهم لو أبيت في الشارع ، المهم حذيفه لمن ما رديت عليهو تاني كرر اتصالاتو في الآخر فتحت الخط و قلت ليهو ايوه؟
قال لي مها ليه ما بتردي علي ، قلقتيني عليك كويسه انتي؟ قلت ليهو لا ما كويسه و كلو بسببك يا حذيفه حالياً انا خايفه شديد و بتخلع لمن أي راجل يجي ماري بجنبي و كلو بسببك انت لو ما جبرتني اقعد مع أعمامي ما كان دا حصل معاي ، قال لي اقسم بالله لو كنت قاعد ما كان رحمتو ، قلت ليهو حـ اقفل بعد دا داخله لـ محاضره ، قال لي تمام بعدين حـ أجيك هناك ، المهم قفلت منو و مر اليوم الجامعي بنفس الروتين بقعد مع شيماء و تسنيم و بنقعد نتكلم بس خالص ما جبت ليهم سيره ، لمن رجعت بيت عمي الصادق لقيت أعمامي قاعدين معاهو و كمان معاهم رامي و أسامه سلمت عليهم و كنت حـ أدخل ، عمي رضوان قال لي ارتاحي و تعالي عايزنك في موضوع ، استغربت شديد هم عايزني ليه ، قلت معناها عايزين يفتحوا موضوع الطلاق و يحاولوا يصلحوا بيني و بين راشد بس ما يحلموا.....
