المهم بعد أسبوعين تسنيم قالت لي إنو دكتور أحمد ناوي يعقد عليها و بعد ما تخلص السمستر دا يعملوا العرس ، قلت ليها طيب هو ما يصبر بتعد تخلصي و تعملوهو عرس كامل ، قالت لي هو ما بحب يطلع و ينزل مع بت ماف رابط شرعي بيناتهم ، و ما بقدر يمر يوم من غير ما يشوفني فـ عشان ياخد راحتو أكتر و ما يكون حاسي بالذنب قال لي نعقد عديل عشان يكون عندي حق عليك ، قلت ليها شي حلو والله 💜
قالت لي فاجأني لمن قال لي العقد الجمعه دي يعني بعد تلات أيام ، قلت ليها شنو شنو!؟؟ قالت لي انا مصدومه أكتر منك ، هو مستعجل شديد ، المهم عايزاك انتي و شيماء تكونوا معاي في الأيام دي ، قلت ليها حاضر ، قلت ليها حتلبسي توب ولا فستان ؟ قالت لي حـ ألبس فستان، شالتني الهاشميه و قلت ليها اذاً الفستان علي و انا يا جماعه مفلسه عيني طالعه ، و نهاي ما حصل شلت من راشد قروش غير حقة مواصلات الجامعه و الأكل ، اصلاً هو خاتي لي القروش في الدولاب انا بشيل المحتاجاهو بس من غير ما أزيد عليهم ، المهم رجعت البيت و شفت القروش الكانت في الدولاب ياخ دي ما بتجيب أرخص فستان و انا أكيد ما حـ اشتريهو ليها فستان و بس ، بما إني ورطت نفسي معناها حـ اجيب فستان و طرحتو و معاهو إكسسوارات و كم حاجه غيرهم ، بقيت متمحنه و ما عارفه أجيب قروش من وين ، اليوم دا عديتو تفكير ساي و انا غالبني اقول لـ راشد أديني قروش و هو ذاتو حـ يقعد يسألني عايزاهم ليه و....و....اسئلتو المسيخه ديك ، في اليوم البعديهو مشيت الجامعه و انا و شيماء بقينا نتكلم مع تسنيم في موضوع العقد ، شيماء قالت ليها بعرف وحده شغاله في كوافير البت شاطره و شغلها حلو ممكن أجيبها ليك في البيت بتمكيج و بترسم، طبعاً تسنيم كانت متوتره و مقلقه و كل دقيقتين تقول لينا مفروض اعمل شنو؟ اشتري شنو؟ ألبس شنو؟....مع اننا رتبنا ليها أمورها ، بس كل دقيقتين بتسأل و انا بضحك عليها ساي ، المهم لمن رجعت البيت قلت لازم أخلص من موضوع الفستان دا ، راشد جا داخل الغرفه قال لي من جيتي من الجامعه سرحانه كدا في حاجه؟ قلت ليهو لا لا ماف شي ، بعد ما هو طلع قلت انا غبيه كنت اقول ليهو عايزا قروش، في قعدتي ديك جا حمودي ولد فاطمه يمكن عمرو 5 ، 6 كدا ما متأكده ، عاينت ليهو مسافه و قلت ليهو الله جابك لي ، قلت ليهو حمودي تعال لمن جاني كان عندي خمسين قلت ليهو عايزها؟ قال لي آيي ، قلت ليهو طيب حـ أديك ليها بس انت امشي لـ راشد قاعد برا الشارع ، قول ليهو مها قالت ليك عايزا قروش ، لو قلت ليهو كدا بديك الخمسين دي ، قال لي اقول ليو شنو؟
قلت ليهو حيييا انا منك قول ليهو: "مها قالت ليك عايزا قروش " حتقول ليهو شنو؟ قال لي: "مها قالت عايزا قروش " قلت ليهو شاطر يلا أمشي ، المهم هو مشى و انا بقيت قاعده و منتظراهو يجي ، بعد مسافه جاني و قال لي عمو راشد قال ليك : بعد هناي....قلت ليهو بعد شنو؟
قال لي نسيت ، قلت ليهو كيف يعني نسيت؟ قال لي الكلام القالو لي طويل عشان كدا نسيتو ، قلت ليهو خلاص كتر خيرك هاك الخمسين أديتو ليها و مشى ، قلت المهم انو راشد عرف إني عايزا قروش و أكيد لمن يجي داخل حـ يديني ليهم ، اها يا جماعه زولنا تبع جهاز الأمن و المخابرات جا داخل ، طبعاً جهاز الأمن دا بحسسني بفخامه و هيبه كدا ما عاديه ، أول ما جا داخل عملت نفسي مشغوله بتلفوني ، قال لي الريموت وين؟ ...مديتو ليهو ، مسكو و قعد يقلب في القنوات و انا فاتحه خشمي و منتظراهو يقول حاجه و هو كأنو ما عارف ، قلت احتمال نسى ، وقفت على حيلي و بقيت انفض في الملايه و ارفع في المخده و ارجع أعاين تحت السرير ، قال لي بتفتشي في شنو انتي؟ قلت ليهو عندي قروش ختيتها هنا بس ما لاقياها ، قلت احتمال سيرة القروش دي تذكرو بس ما عارفاهو مالو! معقوله ما اتذكر! قال لي شوفي جوه الغرفه احتمال ختيتيها هناك ، دخلت الغرفه و انا بتأفأف ، بقيت ماشه و جايه في الغرفه و انا بطقطق في اصابعي ، لمن خلاص حار بي الدليل ، مشيت ليهو ، وقفت ليهو قصاد الشاشه و قلت ليهو راشد انت حمودي قال ليك شنو؟
قال لي حمودي منو؟ قلت ليهو ما تستهبل ياخ! قال لي ما متذكر قال شنو! ليه بتسألي ؟ قلت ليهو انا رسلتو ليك ، استحاله تنسى قال ليك شنو بالسرعه دي ، لو ما عندك قروش أو عندك و ما عايز تديني قول لي عشان اتصرف بس ما تستهبل و تقول ما متذكر 😊
قال لي و انتي بترسلي حمودي ليه؟ غرورك ما بسمح ليك تقولي لي عايزا قروش صح؟
قلت ليهو تمام احتفظ بقروشك ، ماف مشكله لو ما عايز تديني ، عملت نفسي زعلانه و دخلت جوه غرفتي و انا متأكده انو حـ يجي و يديني القروش ما عارفه جايبه الثقه دي من وين بس في الفتره الأخيره في احساس مميز إتولد بيني و بينو ، عشان كدا بقيت احس إنو زعلي ما بهون عليهو حتى لو ما قال لي كدا كفايه إنو افعالو بتدل على كدا ، فعلاً جا داخل و هو مغيوظ مني ، فتح الدولاب و جا مدى لي بطاقتو بتاعة الصراف قال لي إياك تضيعيها ، قلت ليهو لا أديني كاش لأنو احتمال تضيع مني ، قال لي ما شافعه انتي عشان تضيع منك ، قلت ليهو دا كلامك انت ، قال لي طيب انتي عايزا كم؟
قلت ليهو ما عارفه بس عايزا اشتري فستان مع طقم لـ صحبتي ....قلت ليهو بالمناسبه صحبك الإسمو أحمد عقدو يوم الجمعه الجايه دي و العروس صحبتي ، قال لي عارف ، أحمد كلمني ، قلت ليهو حتمشي ؟قال لي ما أظن ما فاضي أنا ، قلت ليهو دا حال ناس جهاز الأمن و المخابرات ، قال لي شايف الموضوع عاجبك شديد! قلت ليهو شااااديد ، قال لي معاك ما ضامن سري ، قلت ليهو والله العظيم ما حـ اقول لـ زول ، قال لي تمام ، بس ما قلتي لي عايزا كم؟ ولا أديك البطاقه؟ قلت ليهو لو ضاعت مني ما تلومني ....احسن تديني كاش بس شوف البتقدر عليهو ، المهم مشى على الدولاب ، طلع كيس أسود و أداني ليهو لمن إنخلعت ، قلت ليهو قدر دا أعمل بيهم شنو؟ قال لي شيلي العايزاهو ، بعد ما هو طلع شلت من القروش و رجعتهم محلهم ، مشكلتي بقت في إني ما بعرف لا سوق لا مول هنا ، و بمشوا ليهم بوين ذاتي ما عارفه ، قلت أحسن أكلم إسراء و أسوقها معاي بكرا لأنو اليوم ماف طريقه لأنو الزمن اتأخر ، شويه كدا تلفوني رن ، مسكتو و قعدت أعاين للإسم مره و مرتين و أنا ما مصدقه ، لمن فتحت الخط و قلت آلو ، قال لي مها كيفك كويسه انتي؟
قلت ليهو بإستغراب كويسه الحمدلله انت كيف و ناس أمي كويسين؟ يعني في زول حاصل عليهو حاجه؟ .....سكت ما رد علي ، قلت ليهو عمر اتكلم ما تسكت في شنو؟ مشتهى حاصله عليها حاجه؟
قال لي لا اطمني كلهم كويسين.....بقيت ساكته و منتظراهو يقول لي سبب اتصالو لأنو ما من عوايدو يتصل و يسأل عني يوم واحد ما عملها و رفع سماعة التلفون عشان يتفقدني ، هو فهم سكوتي ، قال لي عارف انو اتصالي حاجه غير متوقعه و قادر اعرف قدر شنو انتي مستغربه من اتصالي و عارف نفسي قدر شنو مقصر مع أخواتي ، يوم واحد ما وقفت جنب وحده فيكم ، ما حصل احتجتوني و لقيتوني جنبكم ، انا مقصر و شديد كمان ، حالياً انا قرفان شديد من نفسي و ما طايقها بعد الحصل لـ مشتهى احساس الذنب ما فارقني ، لو اتصرفت زي كل أخ ما كان وحده فيكم حـ تعاني ، أنا و حذيفه اسوأ أخوان في الدنيا دي و ما نستاهل يقولوا علينا أخوان ، فايدتنا شنو اذا اخواتنا استنجدوا بينا و خذلناهم! فايدتنا شنو اذا في الوقت الأخواتنا بتعذبوا فيهو نحنا ساكتين! فايدتنا شنو اذا نحنا ما قادرين نسند أخواتنا و ندعمهم و نحميهم....
نبرة صوتو و هو بتكلم حسستني قدر شنو هو متألم و حاسي بالذنب ، هو واصل في كلامو و انا بيجاي ما قادره اسكت نفسي ، كلامو لمسني و أثر فيني شديد لأني ما متوقعه حاجه زي دي من عمر خالص ، بالجد أول مره احس إنو هو أخوي ، قلت ليهو بصوت باكي عمر كفى ، انا ما زعلانه منك يا أخوي و مهما حصل بيناتنا نحنا أخوان في النهايه و الدم ما ببقى مويه ، قال لي حتى مسامحتك انا ما استاهلها احساسي بالذنب اضاعف أكتر و أكتر ، بس من اليوم انا أخوكم جد جد حـ أكون جنبكم و وراكم و قدامكم متى ما احتجتيني حتلقيني واقف قصادك انتي بس قولي عمر ، أي مشكله تحصل معاك و أي زول يضايقك ما تترددي اتصلي علي طوالي ، قلت ليهو حاضر ، قال لي هسي انتي كيف؟ في زول برفع يدو عليك ، قلت ليهو لا لا، قال لي ما تدسي مني يا أختي، صدقيني مستعد أجيك لغاية عندك و أرجعك معاي ، قلت ليهو لا يا عمر انا كويسه و ماف زول مضايقني انت اطمن ، قال لي متأكده؟ قلت ليهو ايوه و بعدين انت عارفني لو حصل لي شي ما بسكت انا 😂 قال لي فعلاً كنتي حـ تشتكي طوالي 😂
المهم اتكلم معاي مسافه و قفل و انا بالجد عايزا أطير من الفرح ، أول مره أخوي يتصل و يسأل عني و يعترف بتقصيرو و يتعهد انو يقيف جنبي ، ما قادره استوعب الحصل بالجد! طوالي اتصلت على أمي و انا مبسوطه و كلمتها، قالت لي عمر ربنا يهديهو و يلين قلبو والله ليهو فتره متغير و تعاملو بقى كويس معانا كلنا و بقى مسؤول شديد ، أمبارح اتصل على مرام و اطمن عليها والله لمن كيفني ، اخيراً واحد من أولادي برد قلبي ، عقبال اخوك حذيفه.....بعد ما قفلت منها بقيت ألف و ألف من شدة الفرحه و اردد في سري الحمدلله ، حرفياً راشد و عمر فاجئوني بالتغير الحصل ليهم ، أبداً ما اتوقعت انو يجي يوم هم يتغيروا فيه ، بس ربنا قادر 💜
طلعت من الغرفه و انا مبسوطه و راشد دا يعاين لي ساي لغاية ما قعدت ، قال لي ما كذب السمى القروش بالضحاكات ، قلت ليهو أبداً والله ما مضحكاني قروشك ، قال لي يا شيخه!
قلت ليهو والله جد ، اسمع قبل شويه عمر أخوي اتصل علي ، انت قادر تستوعب! عمر بحالو اتصل علي و سأل عني و اعترف لي انو مقصر في حقنا و لام نفسو شديد و قال لي متى ما احتجتي لـ حاجه اتصلي علي و كلام كتير ما كنت متوقعه انو يقولو لي .....طبعاً قلت الكلام دا دفعه وحده و انا مبسوطه شديد لدرجة انو راشد ذاتو بقى مبتسم معاي ، قال لي الأخوان ديل في النهايه اخوان ، مهما يحصل بيناتهم رابط الأخوه ما بنقطع ، قلت ليهو بس مرات كتيره ما كنت بحس انهم اخواني ، يعني ما متذكره ليهم موقف حسسني انهم بالجد اخواني ، قال لي المشاعر في القلب ، مرات التعبير و الأفعال بتخون صاحبها و مرات القواعد و المبادئ الإتربى عليها الشخص بتفرض عليهو قيود هو ما بقدر يكسرها ، قلت ليهو حريقه في المبادئ و القواعد و التربيه الزفته البتخلي في فجوه بين الأخوان ، شويه كدا عبير جات داخله ، قالت لينا السلام عليكم ، راشد رد عليها بس انا سكته ، جات داخله و هي مشربكه أصابعها و متوتره ، راشد قال ليها في شنو؟
بتردد قالت ليهو عايزا قروش ، قال ليها و عشان كدا انتي متوتره و خايفه الخوف دا كلو؟ حـ اقتلك انا ولا حـ اقول ليك لا ما حـ أديك؟
نزل من السرير و دخل غرفتو و جا شايل ليها ربطات من القروش ، قالت ليهو دي كتيره! انا ما.....قال ليها يعني انا لمن شلتهم ما عارفهم كتار ولا شويه ، قالت ليهو طيب شكراً و مشت و هو طوالي قعد بزهج و ضيق كدا ما عادي ، ما عارفاهو مالو ، بقيت اعاين ليهو بس و ما سألتو عشان عارفاهو حـ يسكت و يسفهني ، لمن لقاني مركزه معاهو شديد ، قال لي بس نفسي أفهم انتوا بتخافوا من شنو و بتتوتروا لشنو!؟ عبير دي ما حصل وقفت قدامي و قالت لي عايزا قروش كانت بتشيل من القروش البديها لأمي بس ما حصل جات قالت لي محتاجه و اليوم لمن جات شوفة عينك كانت متردده و متوتره كيف ، عملت نفس حركتك ما قادر أفهم دا غرور منكم ولا شنو بالظبط ، للدرجه دي كبريائكم و غروركم مُصعب عليكم مسألة انكم تطلبوا مني قروش؟
قلت ليهو المسأله ما مسألة غرور أو كبريائي ، قصة عبير معاك زي قصتي مع أخواني ، نحنا من قمنا لقيناكم عاملين حواجز بيناتنا ، أدق تفاصلنا انتوا ما موجودين فيها، ما ليكم أي أثر في حياتنا و كل ما نكبر انتوا بتكبروا الفجوه البيناتنا ، احساس الأخوه جوانا منعدم على الآخر فـ كوننا نقيف قدامكم و نقول عايزين قروش زي كأننا واقفين قدام غريب و بنطلب منو قروش ، و انتوا السبب في دا كلو ، الحواجز البنيتوها بيناتنا بتمنعنا نطلب منكم أبسط الأشياء لأنكم معودننا على الرفض و عدم الإهتمام بحوائجنا و عندكم عادة التحقيق ، زي مثلاً عايزه قروش ليه!؟ حتجيبي شنو و لـ شنو! عشان كدا ما بنعشم فيكم و لو جيناكم بنكون مترددين زي حالة عبير هسي.....سكت ما رد علي بس أنا واثقه إنو كلامي أثر عليهو....
المهم في اليوم البعديهو ، مشيت لـ إسراء و قلت ليها عايزاك تمشي معاي السوق ، قالت لي طيب تمام ، قلت ليها ما هسي بعد ما أمشي الجامعه انتي ذاتك أمشي و نتلاقى في الموقف و من هناك نمشي السوق ، طيب؟ قالت لي ظابط ، لمن مشيت الجامعه ، شفت شيماء و تسنيم من بعيد قاعدات في البينشات ، مشيت ليهم و سلمت عليهم شيماء قالت لي عليك الله اتكلمي مع الغبيه دي! مفروض ما تجي الجامعه و تقعد في البيت تشوف ليها كريمات تتجلبط بيهم ، مالك و مال الشمس و المحاضرات؟
تسنيم قالت ليها منو القال ليك انا بجي عشان المحاضرات بس 🙈
شيماء قالت ليها الشفقه التطير ، أصلك تافهه 😂 بكرا أحمد يعرسك و الزمن كلو حـ تشوفي خلقتو دي لمن بطنك تطم منو ، تسنيم قالت ليها أبداً والله ، لو قعد قدامي العمر كلو ما حـ اشبع منو ، طبعاً انا و شيماء شغلناها ليها ، شيماء قالت باقي انا بس لا معرسه لا مخطوبه لا ناضمين فيني ، ضحكنا عليها ضحك ، تسنيم قالت ليها ما مشكله بجازفك ليك واحد من أخوان أحمد أو أولاد أعمامو انتي بس اتجيهي و خليك جاهزه ، المهم بعد ما طلعت من الجامعه مشيت على الموقف و إتلاقيت هناك مع إسراء ، قالت لي خلينا نمشي عشان الزمن ما يضايقنا ، قلت ليها نسيت ما كلمت راشد ، دقيقه اتصل عليهو عشان بعدين ما يطين عيشتي ، لمن جيت اتصل اكتشفت انو ما معاي رصيد فـ قلت لـ إسراء اتصلي عليهو انتي ، و فعلاً اتصلت عليهو و مدت لي التلفون ، قلت ليها لا اتكلمي انتي! قالت لي هسي مش كنتي حتتكلمي معاهو بتلفونك ولا كنتي حـ تديني اتكلم بدلك!؟ لمن فتح الخط قالت ليهو راشد كيفك؟ قال ليها تمام الحمدلله انتي كيف؟ قالت ليهو كويسه عايزا اقول ليك إنو انا و مها حـ نمشي سوق ()هي عايزا تشتري كم حاجه كدا ، اظنو قال ليها ليه هي ما اتصلت علي ، قالت ليهو ما عندها رصيد عشان كدا ، نحنا في موقف () ، قفلت منو و قالت لي قال هو قريب مننا و هسي بجي ، المهم بقينا واقفين في الشمس و منتظرنو ، مرت خمس دقايق و هو لسه ما ظهر ، و على الخمسه دي مروا عشره دقايق و بقوا ربع ساعه ، انا خلاص اتضايقت و فترت من الوقفه ، قلت لـ إسراء بزهج اتصلي عليهو ياخ ما معقوله يوقفنا الوقفه دي ، إسراء اتصلت عليهو بس ما رد ، لغاية ما مر نص ساعه و انا أعصابي باظت و أخلاقي وصلت لـ مناخيري ، ما بحب الإنتظار خالص خاصة لو طال الزمن ، شلت من إسراء تلفونها و بقيت اتصل عليهو كتير لغاية ما فتح الخط ، قبل ما يتكلم قلت ليهو اسمع لو ما جاينا قول لينا عديل ، الشمس دي سيحتنا عديل ، ما حـ ننتظرك ولا شي و ذاتو ما تجي....طوالي قفلت الخط ، طبعاً كلامي دا كلو قلت ليهو بزهج و بالجد كنت حـ اطق من الغضب ، إسراء قالت لي أعصابك أعصابك يا مها! الليله حـ ينتهي منك عشان اتكلمتي معاهو بالطريقه دي ، قلت ليها خلينا نمشي ، قالت لي لو جا و ما لقانا مشكله ، قلت ليها تمام انتي انتظريهو و انا حـ امشي و حـ اسأل من السوق دا لغاية ما ألقاهو ، أول ما اتحركت كدا تلفونها رن ، قالت لي دقيقه ما تمشي دا راشد ، فتحت الخط و قالت ليهو ايوه .....لا نحنا واقفين في الظلط ، جنب الحافلات....ما شايفني؟ ....رافعه ليك يدي.....تمام
قفلت الخط و قالت لي هنداك ليهو جاي علينا ، جا وقف قدامنا و قال لينا أركبوا ، ركبنا و انا أول ما قعدت قفلت الباب بزهج لمن عمل صوت عالي و إسراء دي شغاله تهمس و تقول لي روقي ياخ ، المهم هو اتحرك و انا لسه حاسه نفسي غضبانه و إسراء كل دقيقتين تعاين لي ، فجأه راشد قال ، بعد ما اتحركت اكتشفت انو العربيه ما فيها بنزين ، عشان كدا وقفت في أقرب طلمبه و مليت ، إسراء قالت ليهو ما مشكله و ذاتو كونو يملوا ليك بالسرعه دي حاجه كويسه ، طبعاً عارفه كلامو دا موجه لي أنا لكن نهاي ما عاينت ليهو ولا اتكلمت معاهو ، فجأه جاتني رسالة SMS ، لمن فتحت التلفون لقيتها من إسراء ، قالت لي واااي عايني ليهو مركز معاك كيف بـالمرآيه ، من قبيل بعاين ليك ساي 🙈
طبعاً عشان ما معاي رصيد ما رديت عليها ، تاني رسلت لي وحده كاتبه فيها : ورانا سبب تأخرو شنو عشان شافك زعلانه و ما قدر يستحمل فكرة إنك تزعلي منو 🙈💜
تاني رسلت لي : بعد كلامك معاهو قبل شويه اتوقعت انو اول ما يصل حـ يجوط فيك بس حصل العكس اظنو ب ح ب ك ، لا ما اظن ، متأكده 🙊🙈
طوالي حمرت ليها و دخلت التلفون جوه الشنطه ، و سكته سكته واحده لغاية ما وصلنا السوق ، نزلنا و هو ذاتو نزل معانا ، قال لينا خليكم وراي ، بقى ماشي قدامنا و نحنا وراهو لغاية ما وصلنا مكان ملابس كبييير و رهيب شديد ، دخلنا و بقينا أنا و إسراء نتفرج و نختار ، اشتريت ليها و لـ إيلاف و لـ نفسي فساتين و شنط و إكسسوارات ، يعني ما خلينا حاجه عجبتني و ما اشتريناها ، قربت أنسى الفستان حق تسنيم ، اشتريت ليها احلى فستان و شنطه و طرحه و ميك اب ، المهم لفينا في السوق كويس و طلعنا من المكان ، بس ما مشينا على اتجاه عربية راشد ، إسراء همست لي و قالت لي اسأليهو ماشين وين احتمال راسو لفى ، قلت ليها بري ما بسألو ولا شي ، المهم بقينا تابعنوا كدا لغاية ما دخلنا في مطعم ، ختينا حاجاتنا جنبنا و قعدنا ، راشد قال لينا عايزين تاكلوا و تشربوا شنو؟
إسراء قالت ليهو شاورما و عصير ليمون ، عاين لي عشان اتكلم ، قلت ليهو ما عايزا حاجه 😊
قام على حيلو مشى و جانا بعد مسافه قصيره ، ختى لـ إسراء الشاورما و العصير قدامها و جاب معاهو شاورما تانيه و معاها عصير منقا ، ختاهم على التربيزه و قعد ، ربعت يديني و قلت ليهو انا قلت ليك ما عايزا حاجه ، عاين لي و قال لي بـ ببرود بس دا ما ليك انتي!
طبعاً حسيت جبهتي دي طارت هناك ، غاظني شديد ، والله افتكرتو جابها لي و حـ يحنسني ، جعانه أنا ، طلع غياظ و دمو تقيل هسي لو قال لي خلي عنادك دا و أُكلي مالو! 😭
المهم هم أكلوا كويس و انا مغيوووظه ، لمن خلصوا أنا وقفت قبليهم و شلت حاجاتي و طلعت برا المطعم ، إسراء جاتني و هي بتضحك ساي ، قالت لـي ضيعتي نفسك ساي و فاتتك ألذ شاورما ، ما رديت عليها ، راشد جانا و قال لينا جيبوا اشيل ليكم ديل ، إسراء أدتو أكياسها و انا قلت ليهو بشيلهم براي ، ولا عبرني تاني ، مشينا و مشينا لغاية ما وصلنا العربيه ، ركبنا و انا بالجلاله بحاول أخفي دموعي ما عارفه ليه حسيت نفسي عايزا أبكي يمكن عشان سفهني و ما اشتغل بي ، إسراء قالت لي نسيت يا مها في فيديو عايزاك تشوفيهو ، فتحت تلفونها و مدتو لي عشان أشوفو و انا نهاي ما راضيه أتلفت عليها عشان ما تشوف دموعي ، قالت لي امسكي التلفون يدي وجعتني ياخ ، شلتو منها من غير ما أعاين ليها ، قربت مني أكتر و عاينت لي في وشي ، قالت لي بتبكي مالك؟
لمن قالت كدا طوالي راشد إتلفت علينا ، غطيت وشي بـ يديني و ياداب كدا دموعي نزلوا كويس ، قال لي مالك بتبكي؟
ما رديت على واحد فيهم و بقيت ببكي بس ، راشد وقف العربيه و قال لي بضيق اتكلمي ياخ ، مالك يا بت الناس!
بعد مسافه قلت ليهو و انا ببكي لسه ما تسألني ما عندك بي شغله ، ما تتكلم معاي بس ، لمن قلت ليهو كدا طوالي دور العربيه و ساقها بأقصى سرعه و إسراء دي لسه بتسأل فيني راشد نهرها و قال ليها خليها إن شاء الله تبكي لـ بكرا ، كلامو دا وجعني زياده و خلاني ازيد في البكى ، إسراء ضمتني عليها و بقت بتحاول تهدي فيني ، لمن وصلنا البيت هو طوالي نزل و دخل من غير ما يجي يشوفني ، ما شلت معاي ولا حاجه من الحاجات الجبتهم ، نزلت و طوالي دخلت جوه و كويس انو ما كان موجود اظنو مشى البيت التاني ، دخلت غرفتي و اتجدعت في السرير بـ زهج ، إسراء لمت الحاجات و جابتهم لي جوه قعدت جنبي و قالت لي مالك يا مها؟ مش كنا كويسين؟ قلت ليها إسراء ما ناويه اتكلم في الموضوع دا ، قالت لي كنتي بتبكي ليه؟
قلت ليها إسراء! قالت لي خلاص سكته ، مشت جابت لي مويه و جات قعدت معاي شويه كدا بعدها شالت حاجاتها و مشت بيتهم و انا نمت في مكاني.....
لمن صحيت الساعه كانت 9 قمت مخلوعه و انا على بالي اني ما صليت من الضهر لغاية العشا ، أول ما قمت كدا اتذكرت انو اصلاً عندي عذر من الصباح ، المهم مشيت استحميت و بدلت ملابسي ، كنت جعانه جعانه شديد ، دخلت المطبخ عشان اشوف حاجه أكلها ، اتفاجأت بكيس على التربيزه القدامي ، لمن فتحتو لقيتا شاورما و عرفت لحظتها انو راشد هو الجابها من لمن كنا في المطعم ، من غير ما اتردد بقيت آكل فيها ، لمن خلصت شربت مويه و طفيت نور المطبخ و أول ما جيت طالعه لقيت راشد في وشي ، كان مربع يدينو و شكلو واقف هنا من قبيل ، ما اتكلمت معاهو قفلت المطبخ و اتحركت من جنبو ، والله كنت متوقعاهو يمسك يدي و يقول لي مالك انتي ، بس ولا هبب لي ، سغيل خلاص ، دخلت غرفتي و طاخ قفلت الباب ، في اليوم البعديهو ، صحيت بدري عملت الشاي و مشيت جهزت نفسي عشان امشي الجامعه ، فستان تسنيم قلت حـ اديهو ليها يوم العقد أو قبليهو بـ يوم نمشي ليها انا و شيماء ، المهم راشد كان نايم في الحوش ، شلت شنطتي و جيت ماره بـ جنبو ، وقفت قصادو و انا على بالي انو نايم ، قلت ليهو غياظ و سغيل و دمك تقيل ، لمن اتحركت من جنبو جاني صوتو و هو بقول لي و تاني؟
إتلفت عليهو مخلوعه ، قلت احسن امشي قبل ما يجي يكشطني كف ، طوالي مشيت سريع سريع....
المهم لمن وصلت الجامعه و جيت داخله كدا ، عميد كليتنا و اخو صاحب راشد كان جاي داخل معاي ، لمن شافني سلم علي و قال لي مها كيفك و وين مختفيه تاني ما شفتك! قلت ليهو كويسه الحمدلله ، والله الجامعه دي ذاتا ما بقعد فيها كتير بمجرد ما أخلص بيجاي بطلع بيجاي ، ضحك و قال لي معناها دي تعليمات راشد ، المهم يا زوله لو احتجتي حاجه أو واجهتك مشكله كلميني ، قلت ليهو حاضر أو ما اتحرك من جنبي ، قلت ليهو : يا استاذ ، إتلفت علي و قال لي ايوه ، قلت ليهو لغاية اللحظه دي انا ما بعرف اسمك 😅 ضحك و قال لي لو سألتيني كان عرفتي ، اسمي مبارك ......مبارك محجوب
يتبع.....
