နေရောင်မရှိ၊ လရောင်မရှိ၊ ကြယ်ရောင်မရှိ၊ အလင်းရောင် ကင်းမဲ့နေသည့် နေရာတစ်ခုတွင် သျှံဓနသည် ဦးတည်ရာမဲ့စွာ စမ်းတဝါးဝါး လျှောက်လှမ်းနေသည်။ သူ ဘယ်ရောက်နေခဲ့တာလဲ… သူကိုယ်တိုင်တောင် မသိပါ။ အရှေ့မှာ ဘာတွေ ရှိမလဲ… သူ မသိ။ လေးလံသောခြေလှမ်းများဖြင့် အရှေ့သို့ ဖြည်းဖြည်းချင်း လျှောက်လှမ်းနေခဲ့သည်။ တစ်နေရာသို့အရောက်… ခြေတစ်လှမ်း လှမ်းလိုက်စဉ်တွင် မြေကြီးပေါ်သို့ ခြေမကျဘဲ လွတ်ဟာသွားကာ သူ သိမ့်ခနဲ အောက်သို့ ပြုတ်ကျသွားသည်။ လေဟာနယ်ထဲသို့ သူ ကျဆင်းသွားသဖြင့် ရင်ထဲတွင် အေးခနဲ ဖြစ်သွားကာ စိတ်လှုပ်ရှားသွားသည်။ သို့သော်… သူ့ ခန္ဓာသည် အရှိန်ပြင်းထန်စွာ မကျဆင်းဘဲ ဂွမ်းစကလေးတစ်ခုလို ပေါ့ပါးစွာ တဖြည်းဖြည်း ကျဆင်းနေသည်။ တစ်စုံတစ်ခုပေါ်သို့ အကျတွင် သူ ကုန်းရုန်းထလိုက်၏။ ထိုစဉ် သူ့နှာခေါင်းထဲသို့ တိုးဝင်လာသည့် အနံ့တစ်မျိုးကို သူ သတိထားလိုက်မိသည်။ သူ သေသေချာချာ အာရုံခံ၍ ထိုရနံ့တို့ကို ရှုရှိုက်ကြည့်လိုက်သေးသည်။ သေချာပါတယ်… ဒီရနံ့ဟာ နှင်းဆီပန်းရနံ့။
ထိုစဉ် သူ ရောက်ရှိနေသည့် နေရာတွင် အလင်းရောင်တစ်ခု ဖျက်ခနဲ လင်းသွားသည်။ ဒီတော့မှ သူ အခန်းငယ်တစ်ခုထဲ ရောက်ရှိနေကြောင်း သိရှိသွားရသည်။ သို့သော်… သူ ဒီအခန်းကို မသိပါ။ တစ်ခါမှလည်း မမြင်ဘူးပါ။ သျှံဓနသည် ခေါင်းကို ဘယ်ညာရမ်းကာ အခန်းအတွင်းကို လေ့လာကြည့်လိုက်သည်။ အခန်းနံရံများကို အနီရောင်ဆေးများ သုပ်ခြယ်ထားသဖြင့် ဆွေးဆွေးနီ၍ နေသည်။ အခန်းအတွင်း ဘာပစ္စည်းတစ်ခုမှ ရှိမနေဘဲ နံရံတစ်ဖက်တွင် ပန်းချီကားတစ်ချပ်ကိုသာ ချိတ်ဆွဲထားသည်။
ဟင်…
ဘာကြောင့်မှန်းရယ် မသိလဲ ထိုပန်းချီကားကို တွေ့မြင်လိုက်သည်နှင့် သျှံဓန ရင်ထဲ ထိတ်ခနဲ လန့်သွားသည်။ ထိုပန်းချီကားကို အံ့ဩမင်သက်စွာ စိုက်ကြည့်နေမိဆဲမှာပင် အခန်းအတွင်းသို့ ကောင်လေးတစ်ဦး ဝုန်းခနဲ ဝင်လာခဲ့သည်။ ထိုကောင်လေးသည် လျှာထိုးဦးထုတ်အမဲရောင်ကို ခပ်ငိုက်ငိုက်ဝတ်ဆင်လျက် မျက်နှာတွင် Mask (နှာခေါင်းစီး) အနီရောင်တစ်ခုကို တပ်ဆင်ထား၍ ကောင်လေး၏ မျက်နှာကို သျှံဓန မမြင်ရပါ။ သျှံဓန မြင်နေရသည့် ထိုကောင်လေး၏ အစိတ်အပိုင်းက တစ်ခုတည်းသာ။ ကောင်လေး၏ မျက်ဝန်းတစ်စုံပင် ဖြစ်ပါသည်။ သျှံဓနကို စိုက်ကြည့်နေခဲ့သည့် ထိုမျက်ဝန်းများသည် စူးရှစွာ တောက်ပသည်။ အမုန်းတရားများ၊ ဒေါသရန်ငြိုးများဖြင့် ပူလောင်ပြင်းရှနေသည့် ထိုမျက်ဝန်းများကို သျှံဓန ကြောက်လန့်တကြား စိုက်ကြည့်နေမိသည်။
