Hate Poem Written With Love࿐

[30]

ဒီလိုနှင့် သူတို့သုံးယောက်လုံး ဆေးရုံပေါ်အချိန်ပြည့် သောင်တင်နေခဲ့ကြပြန်သည်။ ကိုးလ်၏ကျန်းမာရေးမှာလည်း ပြန်မကောင်းမွန်သေးသဖြင့် ကုသမှုဆက်လက်ခံယူနေရဆဲပင်။ သူတို့အားလုံး လေပြေရှင်းကို အနီးကပ်ကြည့်ရှုချင်သော်လည်း ဆေးရုံစည်းကမ်းအရ ပြင်ပမှပါလာသော ပိုးတွေကူးမည်ဆိုးသောကြောင့် လူနာမကျန်းမာခင်စပ်ကြား အခန်းတွင်းသို့ ဝင်ခွင့်မပြုပေ။ ထို့ကြောင့် မှန်တံခါးအပြင်ဘက်က တစ်ဆင့်သာ ရှင်း၏အခြေအနေကိုလေ့လာရသည်။

နေ့တိုင်း နေ့တိုင်း ဆင့်နှင့်ပြဒါးရံက ကိုးလ်အတွက် အာဟာရဖြစ်စေမည့်အစားအစာတွေကို ယူလာပေးလေ့ရှိပြီး အလုပ်အတွက် ခွင့်ရက်ရှည်ကြီးကိုလည်း ပေးထားသေးသည်။ လေပြေရှင်းရဲ့ အခြေအနေက 3ရက်ကြာသွားတဲ့အထိ မတိုးတက်သေးဘဲ ပုံမှန်အတိုင်းလည်ပတ်နေခဲ့သည်။ သတိရခြင်းမရှိသော်ငြား ထို့ထက်လည်း ပိုမဆိုးရွားသေးပေ။ ကိုးလ်ကတော့ တော်တော်လေး ထူထူထောင်ထောင်ပြန်ဖြစ်လာခဲ့ပြီး 4ရက်နေ့မနက်ပိုင်းကစလို့ ဆရာဝန်ကလူနာအား တွေ့ခွင့်ပေးလာခဲ့သည်။ မလှုပ်မယှက်လဲနေသော ဖြူဖျော့နေသည့်ပုံစံနှင့် ရှင်းကလုံးဝ မလိုက်ဖက်ပေ။ ထိုလူသားဟာ အမြဲတစေရွတ်နောက်နောက်နှင့် ရံဖန်ရံခါ တည်တံ့လွန်းသည့်အသွင်ကို ပိုင်ဆိုင်ထားသည်မဟုတ်ပါလား။ ယခုလိုအေးစက်မာကျောနေခြင်းက လေပြေရှင်းမဟုတ်သည့် လေပြေရှင်းပင်။

" ရှင်းအိပ်နေတာ 4ရက်တောင်ရှိပြီ သူအခုလိုတိတ်ဆိတ်နေတာ ပထမဆုံးပဲ "

တိမ်ယံဆင့် တစ်ယောက် ကိုးလ်ကိုလှည့်ကြည့်ပြီး ဆက်ပြောလာခဲ့သည်။ ထို့နောက် ဆင့်ကဆက်ပြောလိုက်သေးသည်။

" အရမ်းမစိုးရိမ်ပါနဲ့ ရှင်းကပျော့ညံ့တဲ့လူ မဟုတ်ပါဘူး သူပြန်နိုးလာမှာပါ "

" ကျွန်တော်သိပါတယ် ရှင်းပြန်နိုးလာမှာပါ....ကျွန်တော်တို့ကြားမှာ မပြီးပြတ်သေးတဲ့ ကိစ္စတွေအများကြီးရှိသေးတယ်လေ။ အတည်ပြုစရာတွေလည်း ရှိတယ်။ ရှင်း တစ်ကိုယ်ကောင်းဆန်သွားလို့ မရဘူး "

ဘာအဓိပ္ပါယ်နှင့်ပြောလည်း ဆင့်မသိသော်လည်း ကိုးလ်အသံက အလွန်တိုးတိမ်လွန်းလှသည်။ အားပျက်နေသောအသွင်ကြားမှ ယုံကြည်ချက်ခိုင်မာသော မျက်လုံးတစ်စုံသည် အမှောင်ယံမှာ တောက်ပနေသည့် ကြယ်တံခွန်များအလား။ ထိုးဖောက်လာသော မျှော်လင့်ချက်သည် လေပြေရှင်းပြန်လည် သတိရလာမည်ဟု ရေရွတ်လျက်ရှိသော စာတစ်ကြောင်းမျှသာ။