لمن خالتو إشراقه جات و شافتو ماسك يدي حسيتو اتحرج شديد منها و طوالي فكاني ...يستاهل عشان تاني ما يمسكني بالغصب ، خالتو إشراقه دي انا ما عارفه مشكلتها معاي شنو! عبير دي شاكلتها انا ولا راشد؟ ...جاطت شديد و رغم انو سبب انفعالها راشد إلا انو كلامها كلو كان داير حوليني انا ، قالت ليهو تشاكل اختك و تبكيها و الواقفه جنبك دي ما بتسألها ليه ؟ ...مشيت اشتريت ليها طرحه بس ما انفعلت فيها زي ما عملت مع أختك! شوف يا ولدي انا شغل التفرقه و الأفضليه دا ما بنفع معاي ، يا تعاملهم كلهم زي بعض يا بتي دي تاني ما تتدخل في حاجه بتخصها ، انا أمها و بعرف اتصرف معاها ، قالت كدا و طوالي مشت بعديها انا كمان دخلت الصاله و خليت راشد واقف في مكانو ، كلامها زعلاني شديد بس قلت ما مشكله على كل الأحوال راشد حـ يطلقني و خلقتي دا تاني ما حـ تشوفها ، طبعاً ناس إسراء كلهم كانوا زعلانين شديد و يبكوا ساي و خالتو إشراقه واقفه مع عبير و بتحنس فيها ، قلت ليهم لو كان سمعتوا كلامي من البدايه ما كان راشد شاكلكم ، خليتهم و مشيت منهم لـ مرام ، بعد شويه اشوفهم ليك في نص الصاله برقصوا ساي كأنهم ما الكانوا ببكوا قبل شويه ، طبعاً الناس كلها انتبهت لـ للطرح الشتره الكانوا لابسنها و علقوا عليهم ، غيتو شكلهم كان بضحك بالجد 😂🤣
بعد ما تعبوا من الرقيص مشوا قعدوا و مشيت لحقتهم و انا ميته من الضحك ، قلت ليهم ما شفتوا منظركم بيش كيف ، سندس قالت لي نلقاها منك ولا من الناس يا مها؟ إسراء ضحكت و قالت ليها حتى لو الناس سكتت و نست القصه مها ما حتنساها و تاني حتمسكها لينا ليوم الدين ، قعدت معاهم و بقينا نتونس أول ما عبير قامت و مشت مننا إسراء لكزتني و قالت لي شوفي نسيبتك ، عاينت وراي و رجعت عاينت لـ إسراء قلت ليها بإستغراب مالا؟
طبعاً كلهم قعدوا يضحكوا و انا ما فاهمه حاجه ، قلت ليها ردي مالا خالتو إشراقه؟
ضحكت بصوت عالي و قالت لي شكلو الحنين عاودها ما شايفاها من قبيل واقفه مع أبوك كيف ! قلت ليها برضو ما فهمتك ، حنين شنو الإنتي بتتكلمي عنو دا ؟
إستبرق قالت ليها شكلها ما عارفه حاجه ، رهام قالت لي خليني اقول ليك ، جدنا ربنا يرحمو في قرابه بعيده شديد بينو و بين جدود خالتو إشراقه الأصلهم من ربك ، فعشان هم يقوا الرابط البيناتهم و يقربوا القرابه البعيده دي قرروا يعرسوا بتهم يلي هي خالتو إشراقه لـ ابوك ، في الزمن داك هو كان مسافر و ما عارف و هم هناك نشروا الخبر و هي فرحت شديد لمن عرفت لأنها بتعرف أبوك كويس لأنو كان بجيهم كتير في ربك ، المهم ابوك لمن جا و عرف قال ليهم انا مدي كلمة لـ ناس غيركم يلي هم أهل أمك ، قالوا ليهو ما مشكله عرسهن الإتنين ، بس خالتو إشراقه زعلت شديد و رفضت ، اظنها قايلاهو حـ يحنسها ، لكن ولا عبرها و طوالي مشى عرس أمك و عشان ما تحصل زعزعه و خلافات بين جدي و اقربائهم الفي ربك ديلك جدي خلى عمي صلاح الدين يعرسها و دا الحصل و هي شكلها لمن شافت عشيقها القديم الحنين عاودها 😂😂
طبعاً لمن قالت لي كدا بقيت خاته يدي على خشمي و بعاين ليهم ، دقيقتين حتى قدرت استوعب الكلام الإنقال و هم بضحكوا ساي ، كدا ياداب عرفت ليه خالتو إشراقه شاماني و ليه لمن مشينا ليهم في وفاة جدي كانت صاره لينا وشها للسبب دا أمي ما باتت في بيتها و على طول رجعت بيت البكى ، عاد كيف ما تكرهني و انا بت عشيقها على قول رهام ، إستبرق قالت لينا غيتو جدي و اعمامي ديل بحبوا اللخبطه و الفوضى ، يعني بعد ما عرسوها لـ أخوهو ، يعرسوا بت عشيقها لـ ولدها؟!! حاره والله ، طبعاً كلهم قعدوا يضحكوا ، شكلهم شامين خالتو إشراقه دي شديد عشان كدا شمتانين فيها و للحق هي ذاتا لا تطاق بس الحصل حصل زمان و ما مفروض تعاقبني على حاجه انا ما لي دخل فيها و اساساً ما كان عندي عِلم بيها ، المهم الحفله خلصت و عملنا ليهم الجرتق و ودعناهم و قعدنا نبكي ، بعديها كل الناس مشت ، سقنا معانا جدي و حبوبه و خالاتي و خيلاني للبيت مع إنهم كانوا رافضين و قالوا برجعوا سنار في ليلهم داك أو يأجروا ليهم مكان ينوموا فيهو ، طبعاً حبوبه عشان زعلانه من أبوي لأنو عرس في أمي رفضت تبيت معانا في البيت و ما جاتنا للعرس دا إلا قبل العقد بشويه ، أبوي أصر على خالي عثمان و قال ليهو ما بتبيتوا في مكان غير بيتي و ذاتو عيب في حقنا ، بعد تحانيس مننا حبوبه وافقت و مشوا معانا البيت ، طبعاً بيتنا بقى مليان لأنو عماتي و بنات اعمامي برضو موجودين ، رقدنا الناس الكبار في السراير و انا و بنات خالاتي و اعمامي جبنا فرشتين و مخدات و أغطيه و رقدنا بس خالص ما نمنا ، الجو كان حلو و السما ملانه نجوم ، فـ قعدنا نحكي لبعض مواقف و تفاصيل حصلت معانا ، ناضمنا كدا لغاية ما نمنا...
الصباح صحيت على صوت حركه و ناس داخله و طالعه لمن فتحت عيوني لقيت انو الزمن بدري شديد و لسه في ضلام ، قعدت في الفرشه و إتلفت حوليني لقيتهم كلهم ماف و براي النايمه في الفرشه، شايفه أنوار الغرف شغاله قلت معناها راجعين و فعلاً لمن مشيت ليهم لقيتهم بجهزوا في نفسهم ما هم بس حتى عماتي و خالتو إشراقه كانوا بجهزوا في نفسهم و أمي بتعمل ليهم الشاي ، قلت لـ خالتي إمتنان ليه مستعجلين كدا خليكم معانا ! طبعاً خالتي إمتنان و حبوبه زعلانين مني بسبب الكلام القلتو خالتي و أمي لمن أبوي عرس فيها و هي سافرت ليهم عشان كدا بتكلموا معاي بآخر نفس ، قالت لي عرس و حضرناهو تاني نقعد لـشنو؟
عاينت لـ حبوبه و قلت ليها عليك الله اقعدي معانا كم يوم يا حبوبه والله مشتاقين ليك ، قالت لي المشتاق دا بتصل أو بجي يزور الناس و يسأل عنهم ما بس كلام خشم ، شويه كدا تلفون خالتي إمتنان رن ، قالت لينا دا عثمان ، ردت عليهو و قالت ليهو جاهزين والله ، بس نشرب الشاي ، بعد ما قفلت منو قالت ليهم اسرعوا يا جماعه و قالت لي امشي شوفي امك دي لو الشاي حقها قرب عشان نحنا مستعجلين الباص ما يفوتنا ، قلت ليها طيب ، مشيت لأمي في المطبخ و جهزت ليها الكبابي ، كبينا الشاي في السيرمس و أمي ودتو للنسوان قالت لي كبي شاي في سيرمس تانيه للرجال و اتصلي على واحد من اخوانك ديل يجي يشيل صينية الشاي ، قلت ليها تمام ، عبير و إسراء جوني في المطبخ قلت ليهم يغسي عليكم ليه مستعجلين كدا؟ ....اقعدوا معانا كم يوم ياخ ، إسراء ضحكت و قالت لـ عبير مها دي شكلها نست إنها ذاتها كم يوم و حـ ترجع لينا هناك ، قلت ليها بري ما راجعه والله ، عبير قالت لي عايزا تسكّني أخوي معاكم هنا ولا شنو؟ 😂 ، قلت ليها لو عايز يقعد خليهو يقعد ساي بس انا نهاي ما راجعه ،....قعدوا يضحكوا لأنهم قايلني بهظر ، قلت ليهم خلاص هش هش عايزا اتصل على حذيفه أخوي ، اتصلت عليهو مسافه في الآخر رد علي ، قلت ليهو تعال شيل ليهم الشاي ، قال لي شاي شنو يا زوله انا بايت برا البيت ، قلت ليهو غيتو البيت دا التقول زارعين ليك فيهو شوك ، قال لي براك عارفه عمك و أبوك ، قلت ليهو طيب حـ اتصل على عمر ، قفلت منو و إتصلت على عمر مره و مرتين و تلاته بس ما رد علي ، قلت أف دا كمان مالو ما برد!؟ عبير قالت لي يمكن نايم اتصلي على راشد ، قلت ليها لا لا حـ اتصل على عمر بس ، تاني اتصلت عليهو كتير بس ما رد ، خالتو إشراقه نادت عبير عشان تشرب الشاي و يطلعوا ، إسراء قالت لي ما تأخرينا ساي اتصلي على راشد ، قالت كدا و طلعت ، مشيت لبست توبي و شلت الكبابي و السيرمس مشيت بيهم على حوش الرجال قلت لو لمحت أي زول بديهم ليهو ، طبعاً الرجال كانوا كتار فيهم أولاد خيلاني و خالاتي و معارفنا قاعدين في الحوش و ما بقدر أجي ماره جنبهم و اصلاً أخواني ما بخلوني ولا أبوي برضى كدا ، الحاجه دي ممنوعه عندنا ، جنب الحيطه الفاصله بين الحوشين كان في شجره وقفت جنبها و بقيت اتابق براحه براحه ، شايفاهم داخلين و طالعين بس ماف زول قريب عشان أناديهو ، شويه كدا لمحت راشد بفرش في مصلايتو شكلو حـ يصلي قلت أنادي عليهو قبل ما يبدا الصلاة بس ما سمعني و طوالي بدا صلاتو و لحدي ما خلص انا واقفه و بعاين ليهو ، لمن حسيتو حـ يدخل رفعت صوتي شويه و قلت ليهو راشد ! ، إتلفت بس ما شافني لأنو الحته الواقفه فيها ضلام بس مع ذلك جا عشان يتأكد ، لمن وصلني قلت ليهو اخيراً ياخ من قبيل واقفه هنا و منتظراك ! مديت ليهو الكبابي و السيرمس ، قال لي كنتي تتصلي بس ، قلت ليهو اتصلت على عمر بس ما رد علي ، قال لي عمر دا في سابع نومه و اظن تلفونو صامت و إلا كنا سمعناهو ، بس كان ممكن تتصلي علي صح؟ 😊
قلت ليهو المهم ودي ليهم الشاي عشان خالي عثمان ما يقول أخرناهم ، كنت عايزا افتح معاهو موضوع الطلاق بس قلت دا ما وقتو لا الزمن لا المكان مناسب و بما اني ما حـ ارجع معاهم هسي فـ حيكون عندي زمن كافي عشان اتكلم مع أهلي و أمهد ليهم ، لمن رجعت لـ ناس أمي لقيتهم شربوا الشاي ، مشيت اتسوكت و صليت الصبح و جيت قعدت معاهم و شربت الشاي ، اهل أمي منتظرين خالي عثمان و أهل أمي منتظرين راشد و رامي و عمي صلاح الدين ، خالتي إقبال يلي هي أم خالد راجل مرام اختي قالت لي كويس إنك حـ تقعدي مع أمك كم يوم كدا عشان البيت حيكون جايط ، أمي قالت ليها والله زعلت منكم يا إقبال مفروض تقعدوا معاي كم يوم كدا ، قالت ليها ماف طريقه والله بنجيك مره تانيه ، خالتو إشراقه قالت غيتو نحنا ديل شكلنا ما مرحب بينا عشان كدا ماف زول عبرنا و قال لينا اقعدوا معانا كم يوم ، أمي قالت ليها العفو ياخ ، ما كدا والله ، فجأه كدا سمعنا صوت خالي عثمان بقول امرقونا يخوانا ، كلهم وقفوا على حيلهم و كل زول دخل شال حاجاتو و طلع ، طلعنا معاهم للشارع و زينب ذاتا مرقت معانا رغم انو حبوبه و خالاتي شامنها شديد و بعاينوا ليها بغيظ ، طبعاً خيلاني جابوا ليهم حافله عشان توديهم لموقف الباصات لأنهم كانوا كتار ، أما بالنسبه لـ عماتي و بناتهم جزوا ركب مع راشد في صندوق عربيتو و جزو تاني ركبو مع توفيق راجل مشتهى ، طبعاً مشتهى ما حتمشي معاهم أمي قالت ليهو خليها معاي فتره ، المهم ودعناهم و مشوا ، بعد ما دخلنا جوه حتى اتذكرت اني ما اتكلمت مع راشد عن موضوع الطلاق! ، هو ذاتو مشى من غير ما يقول لـ اهلي أو لي حاجه بخصوص الموضوع دا! !
المهم دخلنا نمنا شويه كدا و قمنا رتبنا البيت و انا بقيت اسقي الشجر ، شويه كدا سمعت صوت الباب ، قلت هسي عمر بمشي يفتحو ، الباب تاني ضرب مره و مرتين و ماف زول مشى يفتحو مع انو ناس ابوي موجودين ، لمن شفت انو ماف زول مشى فتح الباب ، دخلت جوه لبست توبي و مشيت على الباب ، عمر جا طالع و قال لي بفتحو انا.....انا وقفت و هو وصل الباب ، أول ما فتح الباب شفت راشد جاي داخل ، قال لـ عمر خلاص نومك كِمل؟
عمر ضحك و قال ليهو والله كنت تعبان و ما جايب خبر لأي زول ، الناس ديل مشوا؟ راشد قال ليهو آيي ، عمر قال ليهو لا ياخ غيتو اتلومت معاهم و ربنا يوصلهم بالسلامه ، طبعاً انا لسه كنت واقفه و مستغربه راشد دا هنا ليه ؟
لمن جوا يدخلوا عمر قال لي جهزي لي الشاي يا مها ، قلت ليهو طيب و انا لسه بعاين لـ راشد الرفع لي حاجبو نظام مالك بتعايني لي كدا؟
قلت معناها جا عشان يتكلم مع أهلي بخصوص موضوع الطلاق ، و اخيراً ياخ حـ اتحرر منو و من أمو الكريها ، لمن رجعت لناس أمي قالوا لي منو الكان في الباب؟ قلت ليهم دا راشد ، مشتهى قالت لي يعني هو ما رجع مع أهلو ؟أمي قالت ليها بدل تبقى ليهو سفرتين احسن يقعد معانا الكم يوم ديل عشان يرجع مها معاهو ، كنت عايزا اتكلم بس سكت ، دخلت عملت الشاي لـ عمر لأنو ما شرب كان نايم و مشتهى و زينب جهزوا الفطور ، نادينا عمر جا شال صينية الفطور و الشاي حقو ، سامعه عمي آدم قال ليهو الناس بتفطر و انت بتشرب ياداب في الشاي؟ حركات العطاله و الرمتاله دي احسن تخليها ، المهم نحنا ذاتنا قعدنا نفطر ، لمن خلصنا دخلت المطبخ اعمل لناس أبوي الشاي عشان ما يجوطوا فينا ، اثناء ما انا واقفه و بعمل فيهو راشد جا داخل شايل صينية فطورهم ، ختاها في المسطبه و قال لي الشاي جاهز؟ قلت ليهو قرب ، قعد و قال لي طيب حـ انتظرك تخلصيهو و اشيلو معاي ، طبعاً قعدتو دي وترتني و ما عرفت اعمل حاجه ، كل ما أتلفت بلقاهو بعاين لي و انا خلاص اعصابي تلفت ، قلت ليهو اها اتكلمت مع أهلي؟
قال لي بالنسبه لشنو؟ ...قلت ليهو كيف يعني بالنسبه لشنو! ناسي نحنا اتفقنا على شنو و انت جبتني هنا لشنو!؟
صلح قعدتو و قال لي بإستغراب بتتكلمي عن شنو انتي ما فاهم؟
قلت ليهو بزهج بتلعب بي صاح؟ اصلاً كنت حاسه انك بتكذب و مستحيل تتنازل بالسهوله دي و تطلقني ، طيب بتكذب علي ليه؟
وقف على حيلو و قال لي بإستغراب طلاق شنو الإنتِ بتتكلمي عنو و اساساً انا متين قلت ليك حـ اطلقك؟ ؟
يتبع......
