سلالة العنفوان ..(ذنب عيناك)

الذنب 31ج2

حييل وكمت امشي واتعثر الزم بالحايط ورحت صوب المغسلة وكفت توضيت اختلطت دموعي وي مي الوضوء ولساني مابطل يدعي وشهكاتي مسموعة
رفعت راسي للسما مقابيل الشباك وكلت ربي تسمع شهكاتي تشوف دموعي ربي والله جاي اتعذب ماعندي غيرك اللهي نجي ابو علي ورده الي سالم
لبست حرام الصلاة واباوع لهذا المكان جنه نصلي اني وياه هو مكتف اديه واني مسبلتهم ...
مايوم جبرني على شي ولا طلب اغير عقيدتي جان يحبني مثل ما اني يحب كل شي بيه مثلما اني احب كل شي بي بسلبياتي قبل ايجابياتي احتواني بكل مشاكلي وتحمل كلشي
ليش ينال الفراك منه بهاي الطريقة ياربي رجعة اليه مالي غيره ماشبعت منه ...
نزعت حرام الصلاة تذكرت جنه واكفين هنا هو يباوعلي مبتسم ومتخصر ... رحت خليت اديه على صدره
سألته بنفس الابتسامة بشنو تفكر ؟ تفكر بغيري ؟ اعترف اعترف ..
لزمني من كتفي وثبتني كدامه واذا اعترفت شسوين ؟
وبعدها لزم خدي كرصني بخفة
كتله اكتلكم انتوا الاثنين انت وياها
جاووب افاااا عجل وانه جنت مفكر نموت انه وياج سوى بنفس اليوم بنفس اللحظة مثل ما كل العشاگ بالدنيا يتمنون وانت تردين تتخلصين مني شون انطاج كلبج هيج تفكرين شوون يهون على كلبج تعيشين بدنيا وانه مو بيها
خليت اديه على حلكه اسكت عفية ترى والله شقة لتجيب سيرة الموت فدوة والله اني اشاقة
بلحظتها تحركت مشاعري ودمعت عيوني
هو طكاهه ضحكة وصل صداها لكلبي وعشكتها
وكال قرباني ياخبلة تعاي شو مشتاكلج كعد على السرير وكعدت بصفه منطيته ظهري وهو حاضني ومخلي ذقنه على كتفي
باس رقبتي وهمس باذني ها شنو رايج ماكتيلي ؟
باوعتله كتله بشنو ؟
جاوب نموت سوى ....
التافيت عليه بقووة اباوعله مخنزرة ...
هو كمل كلامه : بس كون كبار انت عجوزة وعطوبج بيضه مشيبة وانه التجاعيد ماليه وجهي وشواربي بيض واصلع
ضربته على صدره ترى دااتخيلك شنووو هاااي ...
كال وانه هم متخيلج عجوزة بس تظلين بعيني مثل ما انتي قربان الي عشكت نظرة عيونها
صحيت من ذكرياتي دموعي على خدي بس مبتسمة حتى تفكيري بي يواسيني ... وكفت بالغرفة احاجي طيفه ... ارجع ذياب وفي بوعدك الي نعيش سوى ونموت سوى ...
الله يرجعك اليه يا ذياب ما اتحمل فراكك والله يا ابو علي فراكك مثل الموت
..............................
س
وزان
جنت كاعده عند بيت اهلي بعد ما طلع فاروق من السجن اجرلي بيت وكعدنه بي سوه
رحت من عند اهلي وكعدت بهذا البيت بس شنو اجت وئام تشوف فاروق لان طلع من السجن
كعدنه اني وياها جانت تبجي علئ ذياب ومنهاره كوه سكتتها وهدي بيها  واطمنها خطيه سكتت شويه
شويه واجتنه ام ذياب وهي متخبله وزعلانه كعدت هم ضلت تبجي علئ ذياب هي جانت عند بيت خالو ابو فريال
كالت تگاونت ويه فريال وامها وصبيحه
استغربت كلتلها...يااا عزا ليش
جرت نفس كالت...ما يستحن ولا يخجلن مسويات الهن سالفه علئ قربى حرمة ذياب وما مخليات واحد ما كايلات الو
ردت عليها وئام..سالفة ان عود قربى خانت ذياب ويه خطيبها السابق وذياب كتل خطيبها لان لكاهم سوه ونعاد السيناريو مال عمر وسهام ؟
ضحكت ام ذياب باستهزاء...لا مو بس هيج يكولن حامل بالحرام وهذا الطفل مو ابن ذياب هذا نغل ابن شرهان
وكفت مصدومه من كلامها كلتلها...هاااي صدك هيج يحجن هيج عندهن الطعن بالعرض شكد عيب عليهن ما يستحن ذن
وئام جرت نفس وتنهد..لا ما يستحن ما عولن يلكن سالفه يحجن بيها هسه يكولن شلون حامل وهو بالسجن
كلتلها...قبل لا يصير القتل ترا قربى كالت اني حامل وحتى هو ذياب كال الفاروق قربى حامل وديرو بالكم عليها
ام ذياب بحسره..سوده عليه يمه ذياب ولا وردت الها طفل وانت موجود دومه مو يمها ولا وكف الها بولادتها
اردفت بحزن...انه ما اشك بقربى اعرفها شنو واعرف أخلاقها اشك بروحي وما اشك بيها بس ذن شوهن سمعتها وين ما يرحن وحجن والعالم ما ترحم ما تصدك تلكه سالفه تلوج بيها
جاوبتها وئام...ما يكدر عليهن غير الشامخ وفريال اذا اجتمعت هي وصبيحه الامه تحترك كلي الجدي عليهن وخلي ياخذ صبيحه للغربيه ويرزل فريال ويطيح  حضها عيب عليهن احنه بيا حال وهن يسون مشاكل ويثيرن الفتنه وكت مشاكل هساع
ام ذياب جرت نفس وتنهد...اي والله انه روحي ذايبه علئ،ذياب انوب يطعن بمرته انه ما راضاها تضل حرمة ابني و ويلادها احفادي سمعتها من سمعتنه احنه بيت الشامخ
عضت اصبعها...ول ول تمنيت ذياب هينا وهو يسمع شلون يطعنون بعرض مرتو والله الا يجتل بيت عمه كلهم لا انوب قتيبه هم وياهن يصفك الهن وفريال دكول اي هي غرت قتيبه من قبل
عاد انه صفكتها راشدي علئ وجهها وطردتني انوب تريد تكتلني شكت حتئ ثوبي
وئام ردت عليها...الله يكسر ايدها ان شاء اللة هاي انجلبت بعد والله دواها الشامخ يشك حلكها
ضلن يسولفن وام ذياب متخبله علئ ابنها وكلبها طاك علئ احفادها وخاصه علي
.....................
قربئ...
جنت كاعده علئ السباط بالحوش الجو رطب البصره مشكله لا يفيد وياها شتا ولا يفيد وياها ربيع الحر يسمط
عيوني ما نشفت من الدموع علئ ذياب اكعد اصلي واقره قران اطلب من امي تدعيلي يرجعه اليه سالم غانم احس بينه قارات وهضاب احس ما كاعدين بنفس البلد قررت ارجع البغداد اكعد ويه فاروق وسوزان نفس ذياب ببغداد واني اتنفس لانفاسه ما اكدر اضل هنا و ذياب بعيد كل البعد عمي
علي جان متمدد بحضني واني امسح علئ شعره خطيه حركته قليله مو مثل قبل من وكع من الدرج لحد الان وهو ما يمشي هوايه ومن يمشي يكزل برجله
رفع عيونه اليه وهو نايم بحضني كال...اين بابا «وين بابا»
ابتسمت اله بشعور الخذلان ....هسه يجي حبيبي... راح يجيبلك سياره  حلوه مثلك
صفك باديه بحب...حلووووه سياره
وراح يلعب ويه البنات وبطه شايله غدير وتلعب وياها وبشه تركض وراهن وغدير ميته من الضحك خفت توكع منها صاحت عليها...بطه فدوه لا توكع منج
ردت عليه...لا غروبه لازمتها حييل ما توكع
عفتهن يلعب وكعدت يمي بيبيتي كالت بحنية...هااا يمه غروبه ما بطلتي نوح وبجي
جريت نفس وزفرته...ما اكدر بيبي ما اكدر ذياب ما ادري احس كلبي ما متطمن لازم اروح البغداد
لزمتني كالت...اكعدي واسكتي لا ترحين المكان خليج هنا
جاوبتها...خااايفه حييل خايفه من الشامخ من اهل ذياب خايفه علئ ذياب خايفه ياخذون علي وغدير مني ما اعرف شبيه ما متطمنه ابببد اخاف يغدرون بيه من يشوفون ذياب مو هنا
كالت...سوده عليه يا يده يا غروبه لا تخافين انه يدتج انه وياج
بست ايدها بحنان...ادري بيج بس خالي هم ما عنده ما اكدر أحمله اكثر من طاقته وهم عندي اطفال وانتم وضعكم علئ كد الحال لازم اروح ما اريد احملكم فوك طاقتكم
هزت راسها بنفي كالت...يا غروبه يده ابيع دياياتي « دجاجاتي » ابيع الصخول وكل حلالي واعيشج انت وفروخج
ضحكت علئ،كلامها وحضنتها مثل طفله فاقده امها واتنفست ريحتها جنه ريحة امي همست...احببج بيبي تذكريني بامي
عاد هي ضلت تنوح وتبجي وتذكرت امي وهي دكولها...روحي وروحج للزياره ونكعد تحت في المناره يا يمه ام سليم يمه تعاي شوفي حال غربه صارت غريبه من بعدج
بجيت علئ كلامها وهي سكتتني كالت غربه يمه كولي لذياب ...
يا همي وعذابي وحركت الروح كضيت ويا الحزن أجمل سنيني هم عود إني أشوفك وأكعد وياك وك أبوس تراب جدمك منتجيني
شهكت برعب...اي والله بيبي اي والله بس خلي يرجع والله ابوس تراب رجليه والله ابوس الكاع اليمشي عليها
لزمتني كالت...علئ كيفج يا يمه هدي هدي ترا بعد ما انعيلج
مسحت دموعي وبلعت الغصه اندك الباب الجينكو وراحت بشه فتحت الباب دخلو وهم يكول...يا الله وينكم يهل الديره
وكفت مصدومه من الخوف حسيت الطفل تكطع ببطني من الهبطه وكلبي يخفق بقوه ورجليه وحده تضرب بالثانيه هذا الشامخ مو غيره...
غمضت عيوني راح يبدي ويايه حرب نفسيه واني ما الي اي طاقه المواجهته ولا عندي طاقه ارد واحارب
شفته اخذ غدير من ايد بطه وباسها وهو يكلها...هلا بريحة ذيبي هلا ببنت ذياب وينو علاوي البطل
من شفته هيج حجه هيج قالب ثلج ونزل علئ صدري وتنفست بارتياح
سمعت فاروق يكول...اي هذا علاوي لابس احمر معرس ابوك مو ههههههه
طلعت الهم بيبتي وخالي استقبلهم دخلو جوه كعدنه كال جدي الشامخ...هاااا بويه ام علي شلونج شلونهم الويلاد
جاوبته بخجل...لا الحمد لله زينين انت شلونك ذياب ماكو خبر عنه
جر نفس كال...حاليا هو بمحضر التحقيق وبعدها اوراقو ما صاعده للمحكمه عينت الو محامي والله كريم
فاروق كال...ان شاء اللة ما نخلي وجاي نجاهد بكل ما نكدر حتئ نطلعه باقرب وقت بس المشكله هو زواجج منه
هزيت راسي بنفي...ماكو شئ يثبت زواجنه بس عقد الشيخ ما عاقدين بالمحكمه نكدر نكذب هذا الكلام
نفخ بضجر ورد عليه...هل كلام ما يخفئ،عن الحكومه بعد نشوف الله كريم تنحل بس كون فياض ما يلعب لعبته هو حاد اسنانه علينه
مسحت وجهي بتوتر كتله...بس هذا كتل امي اريد أرفع دعوه عليه
الشامخ رد عليه...بويه ما نكدر دليل قاطع ما عدنا
جاوبته...يوسف هو يشهد ضده هو الشاهد علئ مقتل امي
الشامخ...وين نلكاه يوسف
بللت شفايفي،بحيرة...هاااا هو عند خواله بس ما اعرف خواله وين اصلا
نفخ بضجر وتنهد كال..عجل خوش ندور علئ يوسف
مسحت وجهي بتوتر جاوبته...ام بثينه هي تعرف وين خوال يوسف وهي الي راح توصلنه اله وهي هم شاهده عن جريمتة ضد اهلي وامي
كال...عجل خوش خليها هي تشهد ضده
رديت عليه...لا هي تخاف ويهددها ما تكدر بس يوسف ما يخاف منه ويكرهه اكيد يشهد ضده
جاوبني فاروق كال...بس هم ما عنده دليل يا قربئ
باوعتله وجريت نفس...لعد شلون غير هم شهود وبعديم حتئ ذياب ما قتله لشرهان متبطر لا قتله لان هل حقير راد يقلني بامر من عمي...
كال الشامخ...خلينه نعين بعد محامي تا يربط خيوط الجريمه وبلكي نكدر من هل عار
جاوبته ..تمام وفلوس ذياب كلهن عند خالتي ام ذياب جدي اخذهن كلهن وعين محامي والي تريده سوي
رد عليه...لا يبووي هاي فلوسج  وفلوس ذياب وفلوس ويلادكم ما اخذ منهم فلس احمر انع الله رازقني وان شاء اللة ما اقصر ويه ذيبي
ابتسمت علئ كلامه جاوبته..واني هاي الفلوس ما تهمني كلها فدا ذياب اخذهن جدي وتصرف بيهن براحتك المهم ذيب يطلع سالم
رد عليه ...كفو منج يحرم ذياب ويله حضري نفسج تا نرجع للغربية لازم تكونين قريبه مني تا احميج اخاف من فياض يجي ياخذج هذا اعرفو عناد بينه ياخذج ويبهذلج انتي،والويلاد
وكفت حضرت نفسي وفرحه تغلغلت الداخلي رغم ذياب بعيد عني بس حسيت اكو ناس وكفت بضهري وانطوني امل برجوع ذياب...
جمعت اغراضي واغراض علي،وغدير وطلعت واني شايله الجنطه ما اشوف الا المكان اقتحم وهو يصيح بصوته العالي الخشن
وييينج ويييينج لك كلبه كح....والله اليوم اذا ما طلعت دم شرهان من عيونج فلا اطلع فياض
جدي وكف وفاروق وياه كالو بذهول...هذا شرهان
طلعو من الاستقبال يركضون وهو وياه بعد واحد ما عرفت منو وهو يتهدد وينها جيبوها اليوم اذبحها
الشامخ رد عليه بحده...ول شلون عندك لسان وتغلط علئ حرمة ذياب والله ما جابتو امو الي يجيب سيرتها علئ اللسانك
رد عليه بعصبية...سلمها النه وخلي النفس عليكم راضيه لا والله العظيم هسه اسويها حرب
جاوبه فاروق...والله مو زلم وشواربنه علينه اذا نسلمك ام علي تحلم وما تطولها وانه اخوو ذياب
فياض ...ناويين علئ رواحكم انتم بيني وبينكم الدم يا اهل الغربية عشر زلم مكان شرهان وما تكفي أجيال اخليها تشهد علئ حيرتكم وعذابكم وتنكيس. روسكم من بعد موتت شرهان والله اكتل العالم كلها هسه اذا ما سلمتها لهل عااار
عاد الشامخ ما تحمل وكطف السحبه عليه اجت بصدره وعاط بيه ...ول تريد نسلمك شرفنه والله رواحنه تروح فده العرض ذياب
وهي صارت مكامش الشامخ نزع العبايه شمرها ما شاء اللة قوووي حيل ولزم عكاله
وفاروق بالمسحاة وصار الصريخ والعياط وفياض طلع مسدسه وهو ضل يخرط عامي شامي
الجهال كلها واكفه وبيت بيبي والبنات وهو الرمي الصار هد حيلي ما عرفت احمي منو
ما شفت روحي الا اركض بنص الشارع واصرخ واحشم بالعالم واسمع صوت الرمي وكل طلقه تنرمي احس تجي بكلبي الكل بخطر وكعت مغمي عليه وبعد ما عرفت الصار...
.
نهاية البارت ...يتبع
لا تنسوا التصويت و المشاركه بكم نكتمل🌷