Hate Poem Written With Love࿐

[25] (ပြန်လည်အမှားပြင်ခြင်း )(ျပန္လည္အမွားျပင္ျခင္း)

" ကျွီ... "

ပွင့်ဟလာသော တံခါးနောက်တွင် တစ်ချိန်လုံးစောင့်ဆိုင်းနေရသော လူတစ်ယောက်က ထွက်ပေါ်လာသည်။ ပြဒါးရံက စက္ကန့်မလပ်ပင်အချိန်ကို ကောင်းကောင်းအသုံးချလျက် အလေးအနက်ထားကာ ဆင့်ရဲ့ ပုခုံးနှစ်ဖက်ကို ကိုင်လျက်ပြောခဲ့သည်။

" ကိုယ်အလုပ်ကိစ္စ ချိန်းထားတာလေး ရှိလို့ပြန်တော့မယ်။ ဒီည 9 နာရီ Oasis ကိုလာခဲ့ပါ ကိုယ်မင်းကို အရေးတကြီးပြောစရာရှိတယ် ။ဆင့်မလာမချင်း ကိုယ်စောင့်နေမှာ။ "

" ဒီညက Happy new yearညပဲ။ ကျွန်တော့်အချိန်ဇယားအရ ဒီညမအားဘူး "

" ဖျက်လိုက် "

" ကိုရံ "

ပြဒါးရံက ပိုမိုသိမ်မွေ့စွာ တိမ်ယံဆင့်ကို နားချလေသည်။

" ဖျက်လိုက်ပါ....ကိုယ့်ဘဝအတွက် အရမ်းအရေးကြီးတဲ့စကားကိုပြောမှာမလို့ ဒီတစ်ညတော့ ကိုယ်ကလွဲပြီး အခြားဘယ်သူ့ကိုမှ အရေးမပေးပါနဲ့ "

" ကိုရံဘာဖြစ်နေတာလဲ အရေးကြီးရင်အခုကျွန်တော့်ကို ပြောလို့ရပါတယ် "

" မရဘူး ခုကအခြေအနေကောင်း မဟုတ်သေးဘူး ။ကိုယ်ကဆင့်ကို အကောင်းဆုံးဆိုတာတွေပဲပေးချင်တာ "

နားမလည်နိုင်စွာ တန်ပြန်ငေးကြည့်နေသော တိမ်ယံဆင့်၏ မျက်ဝန်းတစ်စုံတွင် ပြဒါးရံ၏အလေးအနက်ထားမှုတို့က ရောင်ပြန်ဟပ်နေခဲ့သည်။ ထိုတောက်ပနေသော မျက်လုံးတစ်စုံကို ပြဒါးရံက နက်ရှိုင်းယုယစွာ စိုက်ကြည့်နေခဲ့ကာ လက်ကိုညင်သာစွာမြှောက်လျက် တိမ်ယံဆင့်၏ ပါးပြင်မှတစ်ဆင့် တဖြည်းဖြည်းအပေါ်သို့တက်ကာ မျက်ဝန်းတစ်ဝိုက်ကို ခပ်ဖွဖွပွတ်သပ်နေခဲ့သည်။ ထို့ပြင် ကြားရန်ခဲယင်းလှသည့် တိုးဖွဖွစကားတစ်ခွန်းကလည်း ကပ်လျက်ပါလာခဲ့သည်။

" ဆင့် မင်းရဲ့မျက်လုံးတွေကလေ အရမ်းကိုလှပလွန်းတယ်။ ဒါပေမယ့် ကိုယ် ဘယ်အချိန်မှများ ဒီမျက်ကပ်မှန်တွေကို မဟုတ်ဘဲ မင်းရဲ့မျက်ဝန်းအစစ်တွေကို မြင်ခွင့်ရနိုင်မှာလဲ "

ထိုစကားကြောင့် ဆင့်က တောင့်တင်းစွာထုဆစ်ထားသော အသက်မဲ့သည့်ကျောက်ရုပ်အဖြစ် ကူးပြောင်းသွားလေသည်။ ဤသည်မှာ လေပြေရှင်းတောင်မသိသော ကိစ္စရပ်ပင်ဖြစ်သည်။ဒီမျက်ကပ်မှန်တွေက သူ့မျက်လုံးအစစ်တွေနဲ့ ထပ်တူကျလုနီးပါးရှိနေခဲ့သည်မှာ အချိန်အတော်ကြာနေခဲ့ပြီဖြစ်သည့်အတွက် သူကိုယ်တိုင်တောင် ရံဖန်ရံခါတွင် မျက်လုံးအစစ်တို့ဖြင့် မှားယွင်းနေပြီဖြစ်သည်။ ပြဒါးရံက ထိုကိစ္စကိုဘယ်လိုများ သိနေခဲ့ပါသနည်း။ သူ့အနီးအနားကလူတွေတောင် သတိမထားမိခဲ့တဲ့ ဖြစ်ရပ်တစ်ခုကိုလေ။ လက်မခံချင်သော်လည်း အမှန်တရားကသူ့ကိုအသိပေးနေခဲ့သည်။ ပြဒါးရံက သူဆိုသောတိမ်ယံဆင့်နှင့် ပက်သက်လာလျှင် အသေးအဖွဲလေးကအစ သတိထားမိသည်ဆိုသော အကြောင်းအရာပင်။