أبو رعب

البارت 6

( أبو رعب )
.. بقلم نورس

....................

وكفت السيارة كبال البيت ..
نزلت وشفت جهاد وهو ينزل وراي

حجيت

أسر: انت ابقى بمكانك .. السويتة وياي كلش كافي ، ماريدك تفوت وتصير بوجهك انت .. اطلع منها احسن وارجع ارتاح لبيتك

جهاد: شو انت متستحي .. شنو انه غريب ؟ اليصير عليك يصير علية انه هم

أسر: ميخالف ابو ريتاج انت بعدك متعرف منو ابوي .. لخاطر سهير عاد الباجر يصير ميصير خاف تطلع بوجهة هي ماريد ءأذيها

قنعته ومشيت باتجاه الباب الرئيسي
.. جان الباب مفتوح اجيت افوت وجان يطلع قسور صار بوجهي

فتح عيونة مصدوم من شافني ..  وصاح

قسور: انت شتسووي هناااااا

تجاهلته ومشيت لداخل البيت وصوتة يصيح وراي

.. لك ووووين رراااايح تخبللللتتت

دخلت للبيت شافتني أمي ضلت تبجي واجت تبوس بيه وتحجي بلوم

زهدية: ولك يمة ليش هيج تشلع كلبي .. لا كلت أمي ولا حسبت حساب لاحد ودرت ظهرك ورحت لييش ولك ؟؟

نزلوا أكرم وأشرف من غرفهم ع الصوت اول ما شافوني انصدموا وواحدهم يصيح بعلو صوتة .. جانت عيوني تدور ابوي من بين الموجودين لحد ما اجاني صوتة من وراي وهو يكول

علوان: ها يأسر ؟جنك رديت لهنا برجليك

درتلة اباوعلة بملامح جامدة

وكفتة المعتادة نظرتة تكول جان منتظرني ..

كمل مشيتة بكل برود وغرور وكعد على القنفة ويحجي بثقة

.. جن كلبي معلمني راح ترجع ، شوفت عينك حتى ما تعبت نفسي ادور عليك .. وجنك انت هم عرفت غلطك وانت تعرفني انه ابوك صح كسرت كلمتي بس راح اعديها الك وهاي اخر مرة انسى الصار وخلي نبدي صفحة جديدة ، والعفت اهلك علمودها وباعتك بليلة هسه راحت وتزوجت بق.................

قاطعتة

أسر: يعني انت الك ايد بالسالفة ؟

سكت للحظات يباوعلي بنظرات حادة .. وحجة بعد صمت دام لثواني

علوان: اذا قصدك على شيلتهم من العمارة ف اي انه الدزيت عليهم ناس وخليتهم يبيعون بيتهم .. وان جان قصدك على خطوبة بنتهم فهاي هم انه السويتها .. كافي مخلين بنتهم تفرفر من ورة ظهر أهلها وميدرون شنو لاعبة من وراهم وسوالف الحبجيات هاي كلها متوكل خبز عندي ، كالبتك علينة وصاير ما تحشم لا جبير ولا صغير فد نوووووووب !!!

.. هسه هي بعد راحت وابوها انطاها لابن عمها .. بعد انت ينراد يرد عكلك لراسك ومن باجر اخلي امك تدورلك مرة واكعد واستجن .. كافي عاد انت كبرت عمرك 25 سنة  ! البعمرك هسه ولدهم بطولهم وانت مخلصها الي تتمعشك