أبو رعب

البارت 5

ايدي مربطة وعيوني كوة مفتحهن من كثر ما ورامات
.. الدم اللي على وجهي جامد وجسمي كلة احسة يون علية
.. وعظامي احسها مطحونة

نزلت دمعتي ..

اي بجيت بقهر وذلة من تعامل ابوي وظلمة
.. محسسنة احنة صغار وهو لحد هل لحظة تعاملة ويانة هو هو

من واحد من عدنة يكسر كلمتة يبيتة برة البيت ويخلي بدون اكل .. لو يطلعنة نزرع الكاع بعز الحر وبالشتاء تتبهذل احوالنة من الطين وننصك من البرد

طول عمرة جان شاد ويانة ..
ما خلانة نكمل دراسة لأن جان يشوف ان الخير والفلوس العندة هي كافية بان تعيشنة وتلبي كل احتياجاتنة وبنظرة هو ما مقصر علينة بشي ..

وجان عندة الدراسة طربكة وسربتة وما راح نستفاد شي اذا كملنة .. واذا ع الشهادة يكول النة تاليتكم تكعدون بالبيت وتضل معلكة ع الحايط

.. ما اتحملت اشوف الطلاب شلون جانت تبدل وتروح مبدلة لمدارسهم .. الا انه اكعد من الصبح حتى أعين عمي بالكاع مالتة واوامر متخلص

وبعد توسلات بأمي خليتها تحجي وياه وبالشافعات يلا خلاني ادرس من بعد ما وصلت الموت

وهسه جاي يعيد عقوبتة الما كملها علية وانه صغير ...

بس لهنا وكافي يبو رعب
.. ما عاد اسكت مثل الاول
ولو انه لو انت

جنت احجي بيني وبين نفسي والسواد مخيم ع الغرفة ما حسيت على نفسي شوكت غفيت من التعب والوجع

واستمر الحال 3 ايام متتالية

ما شفت اي احد من اهلي ولا شفتة هو .. بس قسور جان يجيني باليوم مرة يحطلي اكل ويطلع بدون اي كلمة

جوع ، عطش ، ذلة
.. كلهن ولدّن شرارة حقد بداخلي ناحية ابوي

والذنب الوحيد اللي ارتكبته انو ردت اتزوج الانسانة اللي حبيتها

إلى أن بيوم

انفتح الباب مثل كل مرة ودخل للغرفة وهو بيدة صينية صغيرة وخلاها بالكاع .. وقبل ليدور وجهة ويطلع بصوت أقرب ما يكون للهمس

أسر: اوكف

دار وجهة باوعلي مستغرب .. كمت وكفت يم الباب اجاني صوتة

قسور: ترة ما راح تستفاد شي اذا شردت .. الحرس محوطين البيت من كل صفحة

سديت الباب ودرتلة

أسر: الساعة بيش هسه ؟

قسور: بال6

برجاء

أسر: راح اطلب منك خدمة مو من عم لابن اخوه لا .. اعتبرني اخو صديق ، دخيل ودخل عندك وساعدني

قسور: يعني شلون اكدر اساعدك .. تعرف انه ما بيدي شي ، اليكلي عليه جدي اسويه

اسر: طلعني مناه