كلام من الاخر 😅😘

وهل لنا لقاء

رغم أن كنت مستنيه أن أعرف مين الكائن غريب الأطوار دا بس مش عارفه ليه كنت متوترة، لبست ونزلت كانت الساعه 4 فاضل ساعة مش مهم أستناه، وصلت وفضلت أتلفت حواليا عشان أشوفها وفجأه لقيت حد بيقدم لي ورد لا مش أي ورد دا ورد أسود ودا مافيش أي حد يعرف أن بحبه غير قوليلين أوي.

_أنت اللي بتبعتلي؟
_أيوا أنا، أنا مالك
_وتعرفني منين، وازي عرفت أن بحب الورد الأسود؟
_هقولك كل حاجه من البداية، بصي يا ستي أنا شوفتك من شهرين هنا على البحر وكنتي يومها شكلك مخنوقه أو تقريبا كنتِ بتعيطي وقتها كان عندي فضول أعرف مالك بس على ما جيت أكلمك جالي تليفون وعلى ما خلصت رجعت لاقيتك مشيتي، وفي نفس اليوم دا أنا كان مطلوب مني أكتب عن قصة حزينة لشخص وأن يشاء القدر أن يجمعه بشخص تاني يكون عوض ليه عن كل اللي حصله وياريت لو تكون القصة حقيقية لأن أكيد أنتِ عارفة أن دا بقا سيناريو معروف في كل القصص لأن الحقيقة بتختلف شوية، ف....
_أنا أقول لحضرتك ف أي حضرتك أما شوفتني كدا الفضول زاد عندك أن تعرف مالي واهي دي تكون قصة حضرتك وبالمره تكون أنت بطلها وتضيف الحبكه اللي تعجبك مش كدا
_اهدي والله الموضوع مش بالظبط كدا
_أمال أي يا أستاذ أنت فاكر إن مشاكل الناس بقت محور للقصص وإن نستغلها عشان نحقق نجاحنا وهدفنا وبس مش مهم هما، مش مهم أي حاجه تخصهم.
_أهدى بس واسمعيني للأخر...
_أنا مش عوزه أسمع حاجه وياريت تبطل تبعتلي تاني عن إذنك
_استنى بس....

مشيت وأنا حاسه أن كل حاجه هتقف من حواليا ازي يعمل كدا، ازي شافني مجرد كائن بمشاكله هيقدر يحقق اللي هو عوزه، لدرجة دي أنا هامش كدا أي حد محتاج حد يكمل بيه شغله ونجاحه يستغله بالشكل دا أنا مش متخيله نفسي كدا ولا أن حد فكر فيا كدا، وأنا اللي كنت فاكره أن فعلا كان يهمه يعرف عني كل حاجه، يهمه يعرفني أنا لشخصي لذاتي، مش عوز يعرف مشاكلي لمجرد أن يقدم عمل كويس.

وصلت البيت ونمت كنت محتاجه أهرب من كل الدوشة اللي جوايا، صحيت بليل على مسج منه:
_أولا انا اسف جدا مكنش حقي أعمل كدا، ثانياً انتي مدتنيش فرصة اوضحلك أن كنت بدور عليكي طول الفترة من بعد ما شوفتك ودا اللي خلاني أعرف عنك كل حاجه ومكنتش ناوي استغلك زي ما انتي فاهمه وإلا مكنتش جيت وحكيت ليكي، أنا بعد ما عرفتك أنا حبيتك بجد ومستعد أتنازل عن العمل اللي مطلوب مني بس انتي متزعليش.

شوفت الرسالة ومردتش مكنتش عارفه ارد بيه، ولا حتى أصدق انه فعلا حبني مش مصدقة غير أنه كان هيستغلني بجد، ويمكن الرسالة دي من ضمن اللي عوز يعمله بس أنا مش هسمح لحد أن يعمل معايا كدا ويحطني في موقف زي دا..

فضلت يومين قافله تليفوني ومطلعش البلكونه، وجيت أفتح الفون لاقيت رسايل كتير منه فتحتهم :
_أنا أسف بجد طب أقبلي أسفي وأنا هختفي خالص ومش هبعتلك تاني.
_طب ردي طيب قولي أي حاجه عتبيني زعقي بس ردي.
_طب البلكونة ذنبها أي مطلعتيش فيها خالص.
_حور بجد أنا اسف، وعلى العموم انا مش هبعتلك تاني والعمل انا اعتذرت عنه ومش هكتب حاجه بس ياريت متزعليش مني، واسف للآخر مره سلام.

قفلت الفون وأنا مش عارفة أرد بيه، أنا دلوقت صدقته بس الموقف من بدايته كان غلط ودا اللي خلاني واخده منه موقف كدا، بس هو فعلا ممكن ميبعتليش تاني، اممممم لو بعت تاني هبقا أرد عليه لكن لو بطل يبعت لي يبقا كويس واقفل الموضوع دا من بدايته..

بعد يومين حسيت ان واحشني رسايله اتعودت على وجوده حتى لو كان مجرد رسايل بس، رجعت اقعد في البلكونة على أمل أن يشوفني ويبعت بس برضه مبعتش ونزلت أقعد على البحر على أمل برضه اشوفه بس ولا مره شوفته، وعدا شهرين وقتها افتكرت جملة :
شهرين يا بخيل، ستين شمس.... وستين ليل...

وفي يوم نزلت أقعد في كافية على البحر وكان معايا رواية بقراها وأنا باصه في الراويه لاقيت حد واقف قدامي:
_استنيتك كتير معقول دا كله لسه زعلانه مني.
برفع عيني لاقيته هو اتوترت بس من جوايا كنت مبسوطه بس خفت يشوف دا في عيني وبعدين رديت:
_أنا أبدا مبقتش زعلانه ولا حاجه
_يعني خلاص سامحتيني
_قولت لحضرتك خلاص مبقتش زعلانه.
_بس أنا بقا زعلان
_نعم، وحضرتك زعلان من أي بقا
_زعلان أنك قدرتي تفضلي كل دا من غير ما تكلميني، وقولتلك لو مردتيش عليا مش هبعتلك تاني وانتي برضه مردتيش.
_امممم عادي يعني عشان وقتها كنت لسه مديقه من اللي حصل
_ودلوقت لسه برضه مديقه؟
_قولتلك لا خلاص.
_طب تسمحيلي اعزمك على قهوة وتكون بداية الطريق لينا
_وبعد ما تخلص القهوة لو الطريق كان لسه مخلصش هتسيب الطريق وترجع؟
_لا هبص لعيونك عشان تشبه قهوتي اللي بحب ريحتها وأحب أول حاجة اشوفها اول كل بداية يوم جديد.
_موافقه نتقاسم سوا القهوة.
_طب افتحي الرواية واقراي أول جمله عينيك جت عليها.
_"أشتهي احتضانك بروحي قبل جسدي، فقد أتت نهايتي بنتهائك أصبحتُ عظامًا مُتهالكة حين غابت روحك عن روحي، فإن الشوك قد أهلكني".
_وأنا الشوك قد أهلكني.

_هَنتقاسم القهوة سوا لكي ينتهي الطريق بنا.

#جهاد_العزب.
متابعه علشان كل جديد