الشهر ٧ من الحمل :
- انت نمت ؟
- بنام عندى شغل الصبح بدري هصحي ٦ ونص
- عاوزه شاي واسقسقه فى بسكويت
- ودا ايه مش لسه وأكله كيكه وشاي بلبن
- نفسي راحت لشاي والبسكويت الساده
- بسيطه هعملك الشاي فين البسكويت ؟
- هيكون فين فى جيبي فى السوبر ماركت اكيد
- الساعه دلواقتي ٣ بعد منتصف الليل و السوبر ماركت بعيد والعربيه انتى عارفه انها مش شغاله ..
- وأنا مالي بمشاكلك دى ، دى مشاكلك وانت تحلها براحتك ..لكن انا دلواقتي عاوزه بسكويت نفسي فيه جدا ومش هعرف انام ..
- طيب ايه رايك تقومي انا وانتي ونعمل مع بعض البسكويت من البيت ونضيف و ..
- بقولك مش قادره وعاوزاه جاهز. انت مستخسر فيا باكو بسكويت ، شايف يا بيبي ابوك مستخسر فيك باكو بسكويت شاطر بس يجيبك ويرميك
- ايه اجيبه وارميه دى حسيتيني انى رميته فى ملجأ ..
- عاوزه بسكويت يا ناس .. بسكويت واسقسقه فى الشاي يا ناس
- خلاص خلاص هنزل وامري لله .. فوضت أمري فيك يارب
- بتدعي عليا انا وابنك متشكره متشكره
- استغفر الله العظيم
- وكمان بتتحسبن علينا ..مش قد مجايب العيال ليه عملت فيا كده ها ..ها ..؟
- عاوزه حاجه تاني يا حبيببتي
- مش فاكره خد الموبيل معاك ولما تبقي هناك كلمني هبقي اقولك ..
- حاضر .. لله الامر من قبل ومن بعد ..هانت ٣ شهور ونخلص من الهرمونات الطافحه ومطفحاني فى عيشتي دى
- بتقول حاجه
- لا باكد ع نفسي البسكويت ..
الشهر ٨ من الحمل :
- اسندني كده
- فى ايه ؟
- مش قادره اقف حاسه انى هقع فى اى لحظه
- عملتي ايه ؟
- عملتلك الغدا ..
- كتر خيرك ..
- بتتريق ودا بدل شكرا اني وقفت وعملتلك الاكل
- حبيببتي تسلميلي ..
- غير هدومك بقي واغرف ليا وليك انا هسبقك ع السفره
- ها ..
- ها ايه .. انت مش شايف ولا ايه ..بقولك مش قادره
- تمام ..
ع السفره :
- تسلم ايدك ع الاكل
- الف هنا بس انت بتاكل ايه ؟
- باكل الاكل
- والله كنت فاكره بتاكل نفسك .. ايه الل فى ايدك دا ؟
- دا ورك فرخه ..فيها حاجه ولا ايه ؟
- انا عاوزه ورك الفرخه دى وانت كل الصدر
- لكن ..
- نفسي رايحالها والورك سهل الهضم وانا نفسي غامه عليا .. ولا انت مستخسرها فينا ..
- لا طبعا .. اتفضليها اهو
- اقسملي الورك ل دبوس مش هقدر اقسمه ..
- حاضر ..
بعد ٥ دقائق : انت بتاكل ايه ؟
- صدر الفرخه؟
- خد الورك وهات صدر الفرخه..الورك تقيل
- انتى عاوزه ايه ؟
- بلاش اكل يعني ماشي مش هاكل
- بصي ادى الصدر وأدى الورك وكلي الل انتم عاوزينه
- وأنت؟
- لا مش مهم ..
- لا ازاى .. خد الورك كله ولا اقولك الصدر .. بص
- خلاص مش عاوز خلاص ..
- يبقي مش هاكل .
- إللى تجبيه هاكله ..انتى حطيلي فى الطبق
بعد دقيقتين: مش عارفه انا نفسي رايحه اصلا للسمك
- نعم ..؟
- مش هاكل فراخ انا
- متأكده ولا زى المره إللى فاتت قولتي مش هاكل وبعدها دورتي عليها ..
- ماهو انا معرفش نفسي بتهفني ع حاجات كده
- هو الوحم دا مش هيخلص
- معرفش .. كله منك انت السبب لغبطتلي حالي ومزاجي الله يسامحك ..
- نفسي افهم حاجه هو كان غضب عنك يعني ضحكت عليكي مش كان برضاكي ..
- مكنتش اعرف هكون كده ..
- ولا انا كنت هعرف انك هتكوني كده ولا هعيش الل عايشه دا معاكي .. حبيببتي انا عايش مع هرمونات مش مع مرآتي كل دقيقه بحال ..
- اعمل ايه طيب ؟
- بس بس متعيطيش لو فتحتي مش هتقفلي ..قوليلي عاوزه السمك مشوي ولا مقلي اتصل اطلبه
- لا حمرلي طبق بطاطس هنقنق فيه
- من عنيا..
الشهر ٩ :
- بولد
- متاكده
- مش عارفه حاسه ؟
- يعني نروح المستشفي
- لا ..
- مش كنتي روحتي قعدتي عند مامتك
- علشان انت تبقي ع راحتك صح
- ليه بتقولي كده ؟
- هو إللى انا فيه دا امي السبب فيه علشان تشيل المسؤؤلية معايا .. ولا حضرتك .. انت السبب فى الل انا فيه دا ولازم تشيل نتيجه عمايلك ..
- انا استحملت ٩ شهور وهانت استحمل كام يوم ميضرش ..
- انت بتمن عليا.. مش انت إللى قولتلي قبل ما تتجوز ان الجواز دا رحله بين شخصين بيكونوا مع بعض فى كل حاجه ..
- انا قولت كده ؟
- ايوه ..
- لا انا مكنتش اعرف ان هتكون الرحله كده
- يعني هتعمل ايه ؟
- الغي رحلتي
- نعم .. ايه دا ايه دا
- فى ايه؟
- باين بولد بجد أجل لاغيان الرحله و الحقنيييييييي ..!
إعتبروها إسكريبت واضحكوا 💁♀️🤣
ولو مضحكتش اضحك عافيه واعمله شير 👍🤣
