عشق في بلاد حروبها لا تنتهي 5 ( شهيد الواجب )

البـــ السابع ـــارت

_
_
عِــشق فـي بِـلاد حُـروُبِهـــا لا تنتّٰــهي 5 ( شهيـد الـواجب )

في البارت السابق
ضحكت سما ورفعت عيونها لـ الطاقيه لـ حولتها وهيا تستغل في رخيت يديه من علي خصرها ونقزت بعيد عليه بضحكه وهيا تلف لـ جيهة السرير التانيه وتلبس في الطاقيه وتحط في يدها علي فمها :حليلي من الصلوعي هههههه
نفخ منذر وحط يده علي صلعته :ازح لابس الطاقيه باش ماتشوفيهاش وتنخلعي
زادت ضحكت سما لخلت منذر يبتسم بفرح وشعور تخلل قلبه مريح وجميل جدا وهوا يقرب من السرير لتمدد عليه وقال :فكينا من لهروب وتحملي شكلي المقرف
هدت سما من ضحكتها وقعمزت قدامه علي السرير :مقرف عينك تهبل محلاك زي لعسل
هز منذر راسه بـ تضيقت عيون :تتسهوكي عليا وله
سما :هههه لا وحقربي تتاكل ماكله باين كيوووت
قرب منذر منها وهوا يرفع في حواجبه :هههه تي انتي لتنزرطي زرط
وهجم عليها وهوا يدغدغ فيها من بين ضحكاتها وعياطها لتحاول تكتمهم باش مايسمعوهاش لي برا ...

قراءة ممتعة 💛
البـــ السابع ـــارت
.
.
الحُـب من طـرف واحـد ، كـ جَـرح ينـزف بـ غـزارة في كـف يـد مُتمسكـة بـ حبـل إن أفلتتـه تمـوت 🍁⛓
.
.
بتسمت رانيا وتلفتت لـ الجيها التانيه وردت بـ همس :مـريم مش وقتك اني في حوش عمي جمال اونا اتصلي بـ ماما
مـريم فنصت في علاء :تي اركح يافرخ
وردت علي رانيا :وشن رفعك لحوش عمي جمال
وقفت رانيا وطلعت من الصاله لـ الممر :عازمين صاحباتهم وبنات خالاتهم مشي قالولي
مـريم رفعت حاجبها :غريبه كانو خوتهم مانعين عليهم يعزمونا بكل
رانيا نفخت :اووووف تو شنو تبي
مـريم :تفوه ياحيوانه خلاص اقلبي وجهك تو نكلم أمي نشوفها كان نقدر نحط عندها الصغار
رانيا :اتصلي توا لانه ممكن بتمشي عند خالتي نجيه
مـريم :ايح علينا كان هدا ايح علينا هي سكري وسلميلي علي لبنات
ضحكت رانيا وسكرت منها وهيا ترجع في خصلات شعرها الاحمر الواصل لـ نهاية ظهرها ورا ودنها وأول ماتلفتت شبحاته واقف علي أخته جنات .
رتسمت بسمة عريضه علي مبسم رانيا بـ فرحة نكسرت مع قلبها اول ماجاها كلام هارون لـ مفنص في جنات :اني شني مقايللكم علي بنات عمي حسين
جنات :بابا قال أعزموها وبعدين حرام عليك ماعمرنا رينا منهم حاجه وبعدين رانيا مشاءالله عليها
هارون :ايه مشاءالله عليهم اختها هاربه خمسه ايام لايده علي حل شعرها مشاءالله عليها وهيا ابصر شن مدايره من عمايل ، اهو قلتها اول مره وأخر مرة وأحمدو ربي صالح خدمه كان يندري عليكم عازمينها يقلبها علي راسكم
نفخت جنات :ماخصنيش اني كلمو بابا هوا لـ قالنا
وتلفتت علي صوت ازهار لـ نادتها من المظبخ :جناااات تعالي بسرعة
خشت جنات لـ المظبخ وخلت هارون اللي اول ماتلفت شبح رانيا واقفه قدام الحمام وعيونها مليانه دموع لـ نزلو علي خدودها وخلوها تنزل راسها وتخلي شعرها الطويل يخبي وجها الابيض ، ومسحت دموعها بـسرعه وبخفه منها ، وقربت منه خطوة بـ بتسامه رسمتها علي مبسمها غصب بـ عيون معلقات في الارض :اهلين
وقبل مايرد عليها هارون جاهم صوت ازهار من وراه :رنو تعالي معانا في المظبخ
تخطاته رانيا ومشت وخلاته يتلفت يشبحلها كيف خشت لـ المظبخ وهيا ماسكة دموعها وعبرتها من لكلام لسمعاته منه ، برغم تعرف رايه فيها وفي مـريم بس لما سمعت لكلام من فمه جرحها ، ألمها هلبا ، ألمها علي قد فرحتها لما بدي يكلم فيها وياخد ويعطي معاها .
.
لعنتِـي علي قلبـي المُحِـب لـ مُذلـة 💔
.
.
كُل مِنــا مشَاعر الكُـره لـ ذَاك الشَخص الـدّٰي يُقارِنونَنــا ويُفرقِـون فِي التَعامــل بينَنــا وبينَـه ، وإنْ كَـان لا ذَنب لــهَ سـَ نضَـل نتحَسس مِنــه فِي أبْـسط حَركـه لْــه 💔
.
.
رفع رواد حواجبه بـ دهشة وعدم استوعاب لـ بوه المبتسم وهوا يأشرله بـ يده لـ المندار :تعالي تعالي قعمز جنبي
وتلفت شبح لـ نعيمة وكمل :ديرينا شاهي اني ورواد
تلفت رواد لـ امه بـ بلاها وقال وهوا يأشر لـ بوه :من هدا يام
ضرباته امه علي يده لـمأشر بيها علي بوه وقالت بـ تفنصية:ارزن وفكنا من المشاكل وطولت السانك
ضيق رواد عيونه لـ امه وهوا يغير في ملامحه وقال :مش قالك بوي ديرينا شاهي بري هيا بري
فتحت نعيمة فمها وقبل ماتتكلم تخطاها رواد وقرب قعمز جنب بوه لـ زادت بتسامته وقال :ايه شن أخبار الكلية
اتكئ رواد بـ ضهره علي الحيط وهوا يقلب في طاقيته ورد بـ ألامبلاء :ماشية
بوه عبدالقادر :باهي الحمدالله ، قلت لـ امك تتصل بيك تقولك وين حطيت مفاتيح الورشة قالتلي تلقا فيك مقفل
تلفتله رواد بـ راسة وقال بـ رفعت حاجب :وخيرك انت ماتصلتش بيا
تلعتم عبدالقادر بـ كليماته لـ خانوه يلقا من بينهم سبلة ، وقال :زي اني زي امك شنو الفرق
رواد هز راسه بـ همس :زي طياح سعدك ومزالك
فنص عبدالقادر بـ عيونه وقال:شنو حسك قولت
تنهد رواد وعلا صوته بـ صياح :قتلك علاش تبي مفاتيح الورشة
عبدالقادر:بنعطيهم لـ خوك حمزة
رجع رواد تلفت لـ بوه بـ أعصاب مشدوده :وعلاش مش يخدم
عبدالقادر بـ حركة بـ يده :قداش ليه مسيب ، قتله يسيب باش يقدر يمشي لـ جامعته ياناري تعب بين خدمة وجامعة وقلت نعطيه الورشة اهو لما يروح يكسد فيها خير مايقعد في الحوش مكسد
ضحك رواد بـ غيظ :هههه لا عندك الحق الصراحة ياناري بيخدم ويقرا هلبا عليها بنيتنا
ووقف وهوا يكمل في كلامه بـ عصبية:ياناري عليا اني مطيوح المزال والسعد
قرن عبدالقادر حواجبه وقال :وين ماشي
جبد رواد تيشرته بـ يديه الزوز :بنهج بنهاجر بنمشي نموت الله لا يردني
وتلفتله قبل مايطلع :بتمشي معاي
رفع عبدالقادر ايده وصيح :ياقليل الرباية اخخخخ تفيه عليك وعلي اللي ماعرفت اتربيك ياكلب هكي تكلم بوك
شبحله رواد لـ تانيه وتلفت طلع علي صياحة لـ كملة :قلنا نخشاشوه العسكريه بالك يتعسكر حاله وعقله يتسقم طلعت قليل الاصل ماينفع فيك شي ياكلب لكلاب تعالا جاي وين مفاتيح الورشه تعالا
طلع رواد تليفونه من جيبه وهوا يتمتم بـ سبات يطلعو منه بـ قهر وغل من تصروفات بوه والفرق لـ يدير فيه بينه وبين خوه لـ يعاني منه من صغرة .
واول ماحط تليفونه علي ودنه ، جاه صوت مرت بوه ليلي لـ نازلة من حوشها :رواد شن روحت
نزل رواد تليفونه وتلفتلها بـ ابتسامة مجامله :لا والله قعد في الطريق
ضحكت مرت بوه :هههه ستحشناك انت وبرادتك
ضحك رواد وهوا يشبح في بوه لـ طالع وقال :اهو قعد علي قلبكم يومين هي هي نشوفك بعدين شباني النحس طالع بكمل عقاب هزايبه
وضربلها التحيه بـ ضحكة وتلفت طلع جري من باب الجنان وخلاها تتلفت بـ ضحكة لـ عبدالقادر لـ صيح :تعالا هني يافرخ تعالا
.
.
أسـف وطنـي ، فـ إبنتـكـ جعــلتني أعشقهــا فـي مستـوي عشقـي لكـ ↗️💛
.
.
بتسمت سما بـ خجل وهيا تشبح لـ منذر لـ شد يداها وباسهم ورفع راسه وقرب باسها علي خدها بـ بطئ مقصود وهمس :احلي يوم في حياتي
ضحكت سما ورفعت يداها لـ قعد شادهم منذر بين يديه وبعداته :بابا يراجي
نفخ منذر لـ بعد خطوه الورا وهوا يقلب في طاقيته ساواها بـ ميلت راس :خيره عمي مستعجل جايك بكري
سما تلفتت لـ بهار لـخشت عليهم :خديتو اكتر من وقتكم راكم وهيا ياللي ماتتحشمي مخليه بوك يراجي لوطه
شبح منذر لـ سما لـ ضيقت عيونها :انتي مصرة تحشميني قدام خوك
بهار ردت بـ ضحكه :اكيد هدا دور لحماوات في حياة الكنة هههههه
ضحك منذر ورفع يده مس خشم سما بـ غمزة منه ليها :ماتعدليش عليها غايرة منا
شهقت بهار وقبل ماتتكلم سبقها منذر لـ قال وهوا يتخطا فيها ويجبد فيها من تشرتها باش يغيظها وقال :بشويه عليك ياحبي تو ننزل نهدرز علي نسيبي مابين نزلتي
وطلع وخلا بهار لـ صيحت وهيا تساوي في تيشرتها :ياكلب تفوه
وتلفتت لـ سما لـ تضحك عليها وهيا تجبد في شنطتها واول ماتلفتتلها صيحت فيها بهار :ماعاش تضحكي
حطت سما يداها علي فمها بـ ضحكة :اوك ياغيورة هههههه
.
.
إن الله يأخذ مـنـكـ أشياء ، ويعطيكـ شيء ينسيكـ كل مافقدتـه بـه ❣️☘️
.
.
باس قاسم راس امه نجوي وبعد قال :بعيد السوء عليك يام ردي بالك علي روحك حتي انتي مهملة هلبا تطلعي بـ حوايج رقيقه وماتلبسيش زين والجو صقع
هزت اخته حور راسها وقالت :صح والله لبسها ديما رقيق وماتعدلش هدا علاش حصلتها البردة
نجوي ضحكت :وكبرتو ووليتو تعطو فيا علي راسي هههههه
ضحك قاسم وهوا يتلفت لـ خوه الصغير جود لـ خاش يجري وجي حضنه :بطلعني وله وله
قاسم:غدوة نطلعو اليوم شن رايك نلعبو بلاستيشن
صيح جود بـ فرحة :يس يس يس هيا هيا هيا توا نلعبو
فنصت نجوي في جود وقالت :بشويه علي خوك خليه يهدرز عليا شوي
حور:قعمز شوي وانت جاي زي المصروع خليه يشرب قهوته
قرن جود حواجبه :لالالا توا توا نلعبو قاسم هيا هيا
نفخ قاسم ورفعه في حضنه ووقف علي صوت امه :قعمز ماتعدلش عليه تو ينفخلك راسك وماعاش يطلقك
باس قاسم جود علي خده لـ لف يديه علي رقبته بـ فرحة وقال :لالا نلعبو شوي ونخشو نرقدو باهي
هز جود راسه بـ ضحكة :باهي هيا هيا
مشي قاسم لداره مع جود وخلا حور لـ نفخت :مخلاناش حتي نقصقصوه علي جوالكلية
نجوي :شوي وبري طلعيه من عنده تو ينفخله راسة ياناري مروح بيرتاح روح علي دوشة جود
حور :حاضر يام ارتاحي انتي انوض نجيبلك شربة سخونه
نجوي :لالا ماخاطريش خلي لين يروح بوك حطينا لعشي مره وحده قعمزي رتاحي توا واتصلي بـ اختك سهير خلي نشوفو يزن شن حاله قالت امبكري مريض محصل بردة
رجعت حور قعمزت وخدت تليفونها وهيا تتصل بـ أختها ...
.
.
نَظرت لـيِ بـ سَـواد حِينْ نَظرت لَـكـ بـ حُـبٌ 💔
.
.
رفع هارون راسه لـ باب الدار لـ انفتح عليه :ها خيركم
خش خوه صالح :نوض تعشي
رجع هارون حط راسه علي لمخده بـ كسل وقال :لالا ماخاطريش كولو
صالح:نقولهم يخلولك
هارون :ايه عادي
طلع صالح وسكر الباب وراه وخلا هارون لـ رفع تليفونه قدام وجهه وهوا يفتح فيه علي محاذثته مع رانيا لـ راد علي اخر رساله باعتتهاله في الفايبر.
قعد يتأمل في المحادثه متعهم بـ سرحان دكره في موقف امبكري ، وفي دموعها لـ حبستهم بـ بتسامة ، حس بـ تأنيب الضمير اتجاها ، وزاد تأنيبه علي ردت فعلها لما اتصلت بـ عمه لـ جي روح بيها قبل مايجو صاحبات خواته حتي ، مهما يكون شعوره اتجاها ، وعلي فكرته السيئه عليها وعلي مـريم ، ماكانش لازم تسمعه يقول عليها هكي حتي لو كان مقتنع بـ كلامه بس ماتمناهاش تسمعه ولا كان يبي يحطها في موقف قدامه زي لـ حطها فيه ، ماكانش قصده بتاتًا انه تسمع رائيه في انه مايبيهاش تخالط خواته ولا انه تجي لحوشهم .
قطع حبل افكاره صوت رسالة رانيا لـ ردت عليه ( الحمدالله وانت )
هارون (تمام ) ( شني اديري )
جاه تم الرؤية وتعطلت في الرد لـ خلاه يحس بـ شعور باايخ ويزيد يأنبه ضميره لـ مش عارفه خيره زايد علي تأنيبه ليه اتجاها .
تنهد هارون وناض قعمز وهوا يتكي بـ ضهره علي المندار ويتصل بيها ، بس اول ماشد الخط خش عليها انتظار ، رفع حاجبه وهوا يبعد في التليفون من علي ودنه ويشبح في الساعه لـ لقاها الـ11:30 فليل ، وكان بسكر بس انفتح الخط وجاه صوتها :الو
حط هارون التليفون علي ودنه ورد :كـ انه ليل علي المكالمات ولا شني
قرنت رانيا حواجبها بـ عدم فهم :شني
هارون :لا شي سلامتك
رانيا :اممم غريبه متصل بيا
هارون :وله هي خلاص نخليك تكملي باقي مكالمتك لـ قطعتها عليك
تنهدت رانيا وهيا تفهم علي تلميحاته :هدا سامح خوي في الصحراء متصل يسأل علينا
تحمحم هارون وهوا يحس انه زاد عماها ، وقال محاول يغير الدوة :شن حالة
رانيا :الحمدالله
هارون :باهي كويس
سكتت رانيا وماعاش تكلمت لين خلت هارون لـ حط السبسي بين شفايفه و ولعه وهوا يجبد منه وينفخ في دخانه مع تنهيده وقال :ايه
رانيا :هارون
هارون :انعم
رانيا :علاش ماتبيش ازهار وجنات يكلموني
رجع هارون جبد من السبسي قبل مايطفيه في الطفاية وقال بـ استعباط:شن لخطر عليك توا
رفعت رانيا حواجبها بـ عيون لمعت فيهم الدموع :ماهو برغم انك تمنع في خواتك يكلموني ولا تبيهم يجوني ولا تبيهم يعزموني وخايف عليهم مني وانت تكلم فيا ومخليني نحب فيك اكتر ونتعلق فيك اكتر وكـ أني ...
وسكتت شوي بـ دموع سالو علي خدودها ، دموع وجع علي روحها لـ وجعتها نفسها لـ قعد حبها يرخص فيها ويذل فيها ليه ، وكملت :وحشاي ، حشاي اني مش كيف ماتفكر ياهارون ره
تحمحم هارون وهوا ينزل في راسه ويمسح عليه بـ يده بـ تلبك اول مره يشعر بيه اتجاها ، تلبك وخجل من تصرفه معاها ، وقال :خيرك انتي بتحوليها نكد ، كانك علي امبكري انتي فهمتي غلط
رانيا :مافهمتش غلط اني سمعت كل شي ، وره من حقك تخاف علي خواتك ، لكن مش من حقك تلعب بـ بنت عمك اللي من لحمك ودمك ، وزي ما أزهار وجنات عندهم انت اني عندي سامح
ضحك هارون بهزوه :وهدا وين ادكرتيه سامح ههههه
خدت رانيا نفسها بـ غصه زادت من سيل دموعها لـ وجعهم رده الهازي ، أو ممكن رده ماوجعهاش منه أكتر ماوجعها من نفسها ، وجعها كيف خلت من حبها يذل خوها ، كيف سمحت لـ روحها توطي شان خوها قدام ولد عمها ، كيف سمحت لنفسها تخلي ولد عمها يستهزاء بخوها .
مسحت دموعها بـ كف يدها وقالت :ديما مذكراته خوي ره ، بس ضعفت قدامك علي خاطر نـ...
وزمطت باقي كلمتها اللي لـ اول مره حستها رزينه انه تقولهاله ، وخلاته يتنهد بالصوت وقال :مش قصدي نهينك انتي تعرفيني كيف دوتي كلها فقش اللي في قلبي علي راس الساني
رانيا :ماهو هدي المشكله عارفه كل لقلته طالع من قلبك ومش دوه بس
هارون :وهدا الحق باهي شني تبيني ندوي بعد لداراته اختك و...
قصت عليه رانيا بنفعال :شنو هوا لداراته اختي
رفع هارون حواجبه وقال بعصبيه:لا مادارت شي غير قعدت خمس ايام برا الحوش من غير مانعرفو عليها حتي حاجه
صيحت رانيا بـ غيظ وغضب امتزجو بـ عبرتها ودموعها :اختي نخطفت ، نظلمت ، علاش مصرين انه الغلط منها علاش
هارون :لانه هيا الغالطه لو مش لاعبه بديلها مع فروخ الحرام ره لا حد قربها لا مسها وماتفهمينيش غير لكلام هدا
رانيا ضيقت عيونها المليانات دموع :انت تحساب روحك عايش في دبي ولا في امريكا ، تي حتي دبي وامريكا فيهم خطف وقتل مابالك بلادنا الحرب وكلها من راسها لا ساسها ، حرام عليك ره حرام عندك خوات ، خاف ربي يابني ادم في بنات عمك ، حني في بلاد لا فيها امن لا امان ولا رقيب ولا حسيب ، راهو خواتك يقرو يعني يطلعو من الحوش وماتندريش علي اللي كاتبه ربي ره لو كان ادير مادير اللي كاتبه ربي بصير
تحمحم هارون ولـ أول مره ماعرفش شن يرد ، وأساساً مالقاش جمل يرد بيهم عليها وهوا يسمع فيها تكمل في كلامها :وكانك علي مـريم اهو بـ راجلها وبـ حوشها وبـ صغارها وعايشه احسن عيشه مع راجل وتق فيها وخداها وهوا عارف بموضوع خطفها لانه عارف بلادنا جابت ماعندها وكانك عليا خزي عليا مليون مره مش الف علي خاطر كلمتك وحبيتك وجريت وراك ودليت روحي ليك
وسكرت الخط في وجهه وهيا تحذف في التليفون قدامها بـ دموع علنو علي سيل قوي ، سيل ناوي يجرف كل اللي قدامه ، ويستمر مع طول الليل ...
.
يــاقلبي كــافي ذل لـ نــاوي هجــركـ ، كــافي عشــق وتعــلق في اللــي ملقـــاه محال 💔
.
.
تَجربتِـي الفاشلــة جعلتنِــي كَــافيه بِـ نفـسي 🤞🏻🎈
.
.
رفعت ريم حواجبها بـ هزت راس خلت جوري تنفخ وهيا ترجع في يدها لـ شاده بيها التليفون ورا ضهرها وقالت :ماتخلينيش نهبل عليك ماعاش تلحقيني
وناضت طلعت من الدار وهيا ترجع تحط في سماعت التليفون علي ودنها وخشت لـ المظبخ وهيا تسمع في صوت حازم :الو وين مشيتي
قعمزت جوري علي الكرسي وردت :معاك معاك غير اختي خشت عليا
حازم :اها كويس ايه احكيلي علي روحك اكتر
جوري :شن بنحكي يعني كله قلته في المقابله الشرعية
حازم بتسم :عادي نبي نسمع تاني عاوديلي
رمشت جوري بـ عيونها بـ شعور الملل وتحمحمت وقالت:اممم جوري 23 سنة نقرا هندسة معمارية السنة الاخيرة
حازم :ربي يحفظك ويوفقك من عنده
اتكت جوري مرفق يدها علي الطاوله وحطت خدها علي كفها وغمظت عيونها بـ فكره انه تسكر الخط في وجهه وتسكر التليفون بكل ، وقبل ماتنفذ جاها صوت حازم تاني لـ قال :واني حازم 29 سنة خريج طب بشري تخصص عيون
جوري :ايه هدا قولتهولي في المقابله
حازم رفع حاجبه علي ردها اللي جاه بـ نبره بارده :اوك خلي نحكو في حاجه جديدة ، عندك علم رافض الزواج وفكرته
فتحت جوري عيونها مع فمها بـ صدمة لـ جرئته لـ جت فجأة وقالت :وعلاش جاي خاطبني كان رافض الفكرة
رفع حازم رجليه وحطهم علي الطاوله ورفع راسه شبح لـ السماء لمغيمة بـ الغيوم البيضه في وسط سوادها وقال :السنة الجاية عندي بعته لـ ألمانيا بنكمل الدكتورا غادي وامي واخواتي سكرو راسهم ياخدولي قبل مانسافر وياالصدفة جيتي انتي قدام عيونهم
ضيقت جوري عيونها بـ كمية قهر حست بيها وقالت من بين سنونها :شكلها صدفة مش حلوة بكل
وخدت نفسها وسبقت حازم لـ كان بيرد عليها ، وكملت كلام :عادي تو نرفض اني كانك مش قادر ترد امك وخواتك عادي نحطها في راس صلاة لستخارة ونقول مارتحتش
شد حازم ضحكته وقال :وانتي صليتيها
مسحت جوري علي جبهتها وفي داخلها ، ولا فكرة نصليها حتي .
وتحمحمت وقالت بـ ثقة :اكيد صليتها
حازم :اها به كويس وشن مارتحتيش ولا رتحتي
سكتت جوري بـ خجل وهيا مش عارفه شن ترد ، وندمت علي تقتها الزايدة لـ طلعتها من خجلة وحطتها في ورطة .
قرن حازم حواجبه ورجع قال :شني شكلك مارتحتيش
هزت جوري راسها :لا ، قصدي انه ماحسيتش بـ شي ، ماحسيتش بـ روحي لا رتحت ولا مارتحتش يعني عادي شكله صليتها غلط
ماقدرش حازم يشد ضحكته اكتر وضحك عليها :ههههههه مقنينتك يابنية
زاد الخجل علي جوري من كلامه لـ بدي يتجراء في الفصح بيه عكس بداية المكالمة لـ حساستها بـ الملل عكس توا لـ الارتباك والتوتر بدي يتمكن منها وخلا الكلام يهرب مع صوتها .
هدت ضحكت حازم لـ قال :نعرف لستيخارة تيسر لمور وتعجل في المكتوب ههههه لكن جو تستريحي وماتستريحيش هدي جديده هههههه
غمظت جوري عيونها بـ القوة وقالت :نفس الشي يعني وهما هكي قالولي
حازم :ههههههه اوك تمام تمام ههههه
نفخت جوري بـ خجل لين خلت حازم يحاول يكفي ضحك :ههه اني ممنون لـ تنقريز امي وخواتي علي المقابله الشرعيه معاك بارك الله فيهم لـ رفعوني وخلوني نشوف الجمال لـ رد فيا الروح
رتخت ملامح جوري المنقبضة من كلامه لـ خلا ارتباكها وتوترها يزيد اكتر وكتر مع كلامه ، لـ كملة :سامحيني بالله ياجميلة مظر نسكر خوي حسه جاي غدوة بـ اذن الله نكلمك لو تسمحيلي
قعدت جوري ساكته بـ صوت بـ جديات ماطاوعهاش وطلع معاها، بس اول ماجاها صوت حازم لـ كرر :تسمحيلي
زمطت جوري ريقها وتحمحمت وهيا تحاول اطلع صوتها المتجمد في احبالها الصوتيه وقالت بـ بحة مبحوحة : اي تمام
بتسم سامح :تصبحي علي خير نستأذنك
سكر حازم من جوري لـ حطت التليفون علي الطاوله وعيونها فيه متعلقات قعدو لـ دقيقة كاملة قبل ماتحاول وجها بـ يداها الزوز وتكتم بيهم عيطتها لـ طلعتها بـ كتم و نغصت بيها بـ خلعه من صوت عبدالمهيم :بسم الله الرحمن الرحيم ، اعذو بالله من الشيطان الرجيم ملبوسة يافرخة ولا خيرك
رفعت جوري راسها بـ انفعال وصيحت :اعذو بالله منك انت يااخي قريب جبتلي الجلطه الله ياخدك
رفع مهيمن حواجبه بـ عدم فهم خيرها وصدمة لـ ردة فعلها لـ نتبهت عليها جوري لـ خدت نفسها وطلعاته بـ تنهيده وهيا ترجع تتكي بـ ضهرها علي الكرسي وحطت يدها علي قلبها وشبحتله :وااااه قلبي
جبد عبدالمهيمن الكرسي وقعمز قدامها :فجي ربي ينزل عليك ان شاءالله يارب
نفخت جوري وماردتش علي عبدالمهيمن لـ اتكي بـ ضهره علي الكرسي وتحمحم وقال :شن عندهم حوش عمي رجب الجمعة الجاية نسمع في امي وريم امبكري يدو علي حفله ماحفلة
شدت جوري تليفونها لـ فتحاته علي صوت مسج الفايبر وقالت :بيان سما الجمعة الجايه
قرن عبدالمهيمن حواجبه وقال بـ صوت عالي بدون مايركز علي روحك :شني
رفعت جوري راسها فيه بـ خلعة :تي خيرك انت اليوم ناوي تجيبلي الصفير من عياطك ، قلنالك بيان سما
هز عبدالمهيمن راسه :تي شن بيانها تي امتا نخطبت هيا وخيره ماقالي حد
جوري :وشن لواجعك انت تنخطب تتزوج ولا تسافر ولا حاط العين عليها
وقف عبدالمهيمن بـ اعصاب ودف الكرسي وراه لـ طاح وطلع من المظبخ وهوا يتخطا في ريم لـ كانت بـ تكلمه بس دفها لين خلها تعيط وهيا تتلفت تشبحله كيف طلع من الحوش وقربع باب الحوش وراه لين نخلعت وهيا تتلفت لـ جوري :خيره هدا خيركم متعاركين ولا شنو
جوري رفعت كتافها مع يداها :الباين خوك يبي سما
.
.
.
تـــــاني يـــــوم ...
سكر رواد الورشة وهوا يلبس في برنوسه فوق طاقيته بـ رجفت برد الصبح الباكر .
طلع تليفونه من جيبه لـ اول ماشاف من رد بـ نعس وعيون مقاومة النوم بـ غصب :ها يام بالله راسي يوجع رقدت في الورشه واهو مروح من غير نفخ
جاه صوت امه :ربي يهديك ياوليدي ربي يهديك ، كان تحتك فلوس جيب خبزه
رواد :تمام
سكر رواد من امه وخش للكوشه:صبخير ويدا
تلفتله وليد :صباح النور ، نور الشارع بيك تي امتي روحت انت
رواد مسح علي وجهه وقال :وراس ويدا ماخاطري في الدوه والهدرزة عطيني تمانيه فرادي خبزة سقدني بنمشي نتمرقد
ضحك وليد وحدف عليه الولاعة لـ تلاقاها رواد لـ طلع باكو الدخان من جيبه وطلع سبسي حطه بين شفايفه و ولعه وهوا يشبح لـ وليد لـ مدله بورزة الخبزة:دير دوره عليا عشية
رواد :تمام
طلع رواد من الكوشه تمشاية لـ حوشهم لـ اول ماقرب منه شبح سياره واقفه قدامة، لوح السبسي لـ عفس عليه وهوا يزيد يقرب من حوشهم  وعيونه في باب السياره لـ انفتح ونزلت بنت الدموع في عيونها لـ لونهم زي لون اعماق لبحر القاطع بـ سواد زروقيته ، قعدت تشبحله لـ لحظات قبل ماتنزل عيونها وتتلفت تنزل في الوليد صغير عمره حوالي اربع او خمس سنوات ورفعاته في حضنها وخشت لـ حوشهم لـ سرع خطواته بـ فضول انه يعرف من هدي وشن لـ مدخلها لـ حوشهم واول ماخش لـ جنانهم شبحها حاضنه مرت بوه ليلي لـ اطبطب عليها :خلاص يابنتي خلاص ربي يشفيها وينوضها بـ السلامة خلاص يابنتي ياسر بكي راك تخوفي في وخيك
بعدت البنت بـ رشفة عبرة واخذتها ومسحت دموعها واول ماتلفتت وشبحت لـ رواد لـ رفع حاجبه فيها بـ برود نظرات وشبح قدامه وخش لـ حوشهم وهوا يتخطا مع امه لـ طلعت علي صوت الدوشه لـ برا ...
.
العشــق كـ الهِــــرويــــن ، إنحــراف يُــأذي بـكـ لـ الإدمـــان 🚬
.
.
كَـ الشَمّسْ أَنْتُمْ ، كَـ القَمّرْ وَالنّجُومٌ ، مَكَانَكُمْ السَمَاء والعُلاَ ☁️🌈
.
.
فاتو يومين بسرعة علي الشباب ...
وفي صباح يوم الأحد ، وفي ساحت الكلية اللي مليانة بـ الطلبة لـ مصطفة صفوف مرتبة وهما رافعين يديهم لـ التحية علي صوت الملازم جبر الله لـ جاهم :استااااااريح
ردو الطلبة بـ صوت واحد وهما يضربو في التحيه :ثواااار
الملازم جبر الله :إستاعد
رجعو ردو الطلبه بـ صوت واحد :أحرار
الملازم جبر الله رفع يده الإيسار ويده الايمن حطها علي قلبه وتلفت لـ الرايه لـ فوقها العلم يرفرف بـ علا وفخر بـ حماته لـ تعلت اصواتهم بـ نشيدة الوطني ...
.
ياإبْنّ ليبيا ياإبْنّ آسَادِ الشَرَي ، إنّنا للمجدِ والمجدُ لنا 🇱🇾
.
فتح مصعب دولابه وخدي شحانه وهوا يتلفت لـ رواد لـ تلوح علي سريره :اااااه ياعضيماتي الرهيفات اااااه اراك يابوي طايح ومتكسر زي عضيماتي اراك متوجع في عضيماتك زي ماخليت عضيماتي يتوجعو يابوي
ضحك هارون لـ حدف عليه لمخده وهوا يشبح لـ منذر لـ اتكه علي سريره وقال :هههههههه وربي كلب ولسانك متبري منك
ناض قاسم قعمز :تي وراسكم ياولاد ماعاش تخلوني نوقف وراه ولا قدامه تخيلو حني نقولو في الناشيد وهوا يغني قريب جابلي الجلطه وهوا مايبيش يسكت
رواد شبحله علي الجنب ورجع شبح لـ السقف وحط يديه تحت راسه وقعد يدندن في الغنيه لـ الذكرها وخلا هارون لـ ضحك وقال :ههههههه شغلت دماغك ودرت زي جابر دار استاعد وتلفت مشي اخر واحد في الطبور هههههه
ضحك جابر واشر بـ صبعة علي راسه :هدا نعمة القليل بس يملكه ههههههه
منذر :اما وقفت النشيد هدي يوم تاني بتجمدني
رواد :عليك نشيد هوا اطول من امه مافيش
قاسم :كان ينقصونا منه شوي علي رحمة ولديهم
ضحكو الشباب علي فتحت باب الدار لـ خلت رواد ينوض يقعمز وقال :تي ناشيد ز...
واول ماشاف الافندي علي سكت في نص الكلمه وهوا يتلكمس في بعضه وناض وقف مع الشباب وضربوله التحيه .
قرب الافندي من رواد وقال :ايه كمل تي ناشيد ززززز شني
حس رواد بـ قرصت منذر لـ كان بيتكلم بس سبقه رواد وقال :زوييين ناشيد تبارك الله قداش اللي مألفه انسان راقي مرتقي مترقرق ان شاءالله ربي يحفظه يافندي ويحفظك حتي انت
شدو الشباب ضحكتهم مع الافندي علي لـ بتسم وطبطب علي كتف رواد وقال وهوا ياحول يخفي ضحكته :نقص منه اللسان نقص خير ماتلقي روحك برا
وبعد خطوه وقال :عندكم ساعتين راحة علي الـ6 نلقاكم في الساحة اليوم اني بندربكم
ضربو الشباب التحيه وقالو بـ صوت واحد :حاضر فندي
تلفت الافندي علي طلع من الدار وخلا الشباب لـ ستسلمو لـ ضحكتهم علي كلام رواد لـ تلوح علي سريره بـ تنهيده :ااااااااه ياقلبي الممغوص اااااه
ضحك منذر :ههههه وووووه خلاص بطني هههههه بطني
طبطب جابر علي كتف منذر وقال بـ ضحكة :هههههه اليوم بـ رعاية يابلادي يابلادي هههههههه
هارون :ههههههه بجهدي وجلادي يارواد ادفع كيد الاعادي ههههههه
حدف رواد لمخده علي هارون لـ تلاقها وحضنها وهوا يتكي علي سريره بـ ضحكة مع الشباب لـ تلفتو لـ رواد لـ تنهد بـ الصوت وساوي روحه علي سريره وعلا صوته وهوا ينشد في الناشيد لـ تعلت اصواتهم معاه ...

يـَــابِـلادِي يَـــابِـلادِي بـ جِهــدِي وجِــلاَدِي .
إدفَعــيِ كَــيد الأَعــادِي والعَـــوادِي .
وإِسلَمــي إِسلَمــي إِسلَمــي ، إِسلَمــي طُــول المَــدىَ إِنّنــا نَحـنُ الفـِداءْ .
لــيــبــيــا لــيــبــيــا لــيــبــيــا 🇱🇾

وسكتو الشباب وكمل رواد وهوا يغير في بعض كليمات الاغنية لـ خلت الشباب يضحكو عليه وهما يدندنو معاه ...

لــيــبــيــا مـــاتخـــاف عـــليهـــا مـــادام الـــغربـــاوي فـــيهـــا ، لــيــبــيــا مـــانـــي مـــخليهـــا وبـ دمـــي وروحـــي نـــفديهـــا
لــيــبــيــا مـــاتخـــاف عـــليهـــا مـــادام الـــشرقـــاوي فـــيهـــا ، لــيــبــيــا مـــانـــي مـــخليهـــا وبـ دمـــي وروحـــي نـــفديهـــا
لــيــبــيــا ولــيــبــيــا ولــيــبــيــا وبـــس .
لــيــبــيــا ولــيــبــيــا ولــيــبــيــا وبـــس.

لــيــبــيــا يـــاوطنـــي وأمـــي ، لــيــبــيــا وبـــس
يـــانبضـــي اليـــجـــري فـــي دمـــي ، لــيــبــيــا وبـــس
يـــابلســـم لـ جـــروحـــي وهـــمـــي ، ونـــدعـــو إن الـــلّٰـــه يـــهنيهـــا
لــيــبــيــا ولــيــبــيــا ولــيــبــيــا وبـــس .
لــيــبــيــا ولــيــبــيــا ولــيــبــيــا وبـــس

مـــرسومـــة بـ دم الـــشهيـــد لــيــبــيــا وبـــس
نـــجمـــة وســـط هـــلال الـــعيـــد ، لــيــبــيــا وبـــس
ورايـــة فـــيهـــا الـــدم جـــديـــد ، وبـــالــعــز الـــلّٰـــه مـــعليهـــا
لــيــبــيــا ولــيــبــيــا ولــيــبــيــا وبـــس .
لــيــبــيــا ولــيــبــيــا ولــيــبــيــا وبـــس

لــيــبــيــا مـــاتخـــاف عـــليهـــا مـــادام الـــجانوبـــي فـــيهـــا ، لــيــبــيــا مـــانـــي مـــخليهـــا وبـ دمـــي وروحـــي نـــفديهـــا
لــيــبــيــا مـــاتخـــاف عـــليهـــا مـــادام الأمـــازيغــي فـــيهـــا ، لــيــبــيــا مـــانـــي مـــخليهـــا وبـ دمـــي وروحـــي نــحميهــا
لــيــبــيــا ولــيــبــيــا ولــيــبــيــا وبـــس .
لــيــبــيــا ولــيــبــيــا ولــيــبــيــا وبـــس.
.
.
.
#يتبـــع لـ البـــ{ 8 }ــــارت
#لـيبيـا_وطني🇱🇾
____________________________________
عِــشق فـي بِـلاد حُـروُبِهـــا لا تنتّٰــهي 5
بداء كتابه الروايـة في 19 /أغســ8ٰـــطس/ 2020
تم تجهيز الـبارت في 26 / فبـــ2ـــراير / 2021
عدد كلمات الـبارت 3911
اسم الاغنية / ليبيا وبس لـ حسن كازوز
من كتــابة #اليَــاقُــوت
.