عشق في بلاد حروبها لا تنتهي 5 ( شهيد الواجب )

البـــ التالت ـــارت

_
_
عِــشق فـي بِـلاد حُـروُبِهـــا لا تنتّٰــهي 5 ( شهيـد الـواجب )

في البارت السابق
مد منذر السبسي والولاعة لـ رواد لـ حط السبسي بين شفايفه و ولعه وهوا يجبد منه ونفخه بـ تنهيده :الله وكبر اللــ..
وضم شفايفه لـ لحظه ستوعب فيها انه في الحمام وقال :استغفراللـ..
ونفخ بـ صوت خلا منذر يضحك وهوا يفك في السبسي من بين شفايف رواد ويجبد منه :ههههه مش لازم تقول شي اسكت
رجع رواد خدي السبسي من منذر :ماد كراع وباله فيها تي انم عندك باكو
منذر اتكه بضهره علي حاشية اللوندينو :مزالي ستة طروف يتم نقعد هكي
قرب قاسم منهم :والله كان اااااااه استغـ تفو عليا ، انسو انسو انسو انسو خلاص
ضحكو منذر ورواد لـ تكي بضهره علي الحيط وشد السبسي بين صوابعه وقال بـ صدا صوت الحمام لـ زد حلاوة صوته حلا:خــلاص انــســانــي يــاريــدي ، خــلاص انــســانــي يــاريــدي

قراءة ممتعة 💛
البـــ التالت ـــارت
.
.
سـ نَــروي قصصكــم البُــطوليــة لـ أجيــال الغـد وسـ يقتــدو بِكــم أبطــال المُستقبــل ✊🏻💛
.
.
تـــانــي يــوم الصبــح ...
خبط العسكري علي الباب لـ فتحه وقبل مايتكلم شاف ضيات الدار مفتوحة وهارون لـ قال :نضنا نضنا يافندي
تلفت العسكري ومشي وخلا منذر لـ دف هارون قدامه :مش فندي عسكري
هارون :خفت نقوله عسكري يصيحلي صيحة يقلع بيها شعر جلدي واني قعد مش مصحصح
ضحك منذر ولف يده علي رقبة هارون وطلعو هوا وياه ، وخلو جابر اللي اول ماسكر باب دولابه تلفت لـ رواد لـ قعد متمدد علي سريره وفاتح فمه وعيونه ويشبح لـ سقف لين خلا جابر يقرن في حواجبه ويشبح لـ قاسم لـ قرب منه ونخزه بـ صبعة علي كتفه :رواد
مادارش رواد اي ردت فعل خلت من جابر يزيد يقرب :رواد
وجبد من عليه البطنيه :نوض من غير تسهويك
حط قاسم يده علي جبهت رواد وقال :خايف نعطيه كف ينوضلي زي المتعفرت
وهوا كمل كلمته من هني ، ويعطي جابر كف لـ رواد لـ ناض قعمز وردلة الضربه علي بطنه لين جابر وخر التالي بـ صيحة مغصوصة وهوا يطبس ويشد في بطنه:يا........
وخر قاسم طول وهوا ينقز من علي السرير لـ الجيه التانيه بـ ضحكه ويشبح لـ رواد لـ فتح فمه وهوا يحط في يده علي خده :بالة مش مكسورة يد هدي ياعن فيتك لين فكي تعوج
رفع جابر راسه وهوا يرفع في روحه ويمسح علي بطنه بـ وجع :شنو تبيني نديرلك وانت فاتح فمك وعيونك زي الممويا
ضحك قاسم عليهم وهوا يمشي لـ دولابه لـ فتحه وتلفت شبح لـ مصعب لـ قعد راقد وصيح :هي مصعب نوووض هيااااا
رفع رواد راسه شبح لـ مصعب وناض من علي السرير وهوا يمسح علي الشاش لـ ملفوف علي راسه بـ صداع خفيف ، وتلفت جبد شيشة لميه وقال :اللي ماينوضش حني انوضوه
تلفتله جابر طول وهوا يشبح فيه يتخطى فيه ويفتح في شيشة لميه ويقرب من مصعب بـ ضحكة خلاته يجبده من تشرته وهوا يشد في يده لـ شاد بيها لميه :لا ياراجل خلاص فكنا عاد
حول رواد يد جابر وهوا يتلفتله بـ تفنيصه :تي اقلب وجهك خير مانعطيك بوكس علي وجهك المرة هدي
ودفه من عليه وتلفت شبح لـ مصعب الراقد بـ ضحكه وهوا يحول من عليه في البطنيه بشويه ويفتح في شيشة لميه وصبها عليه بشويه ورجع غطاه وتلفت بعد من عليه بـ صدمة من قاسم لـ يضحك وجابر لـ مسح علي وجهه وقبل مايتكلم خشو منذر وهارون لـ صيح :مصعب هيا نوض العسكر جي
فتح مصعب عيونه وهوا يتململ في سريره بـ نعس بس اول ماحس بـ شي مبلول تحته توقف عن الحركه وهوا ييدخل في يديه تحت البطنيه ويمس في روحه بصدمه خلاته يتجمد في مكانه وهوا يتلفت لـ رواد لـ شبح لـ قاسم وقال :البيبي قعد ماشبعاش نوم ههههه الله يستر مايديرها تحته
تلفت هاون لـ رواد وهوا بيبدا فيها بس شده منذر من يده وقال :فكونا عاد
وتلفت فتح دولابه وشبح لـ مصعب لـ قعمز وهوا يكمكم في البطنيه :هيا نوض وربي كلنا ميتين نوم ره لكن بسيف
تحمحم مصعب وقال بـ توثر وتلبك بان علي ملامح وجهه :برو انتم تو نلحق
قاسم شبح لجابر لقال :اكيد الحمامات عليهم طابور هي برو تو يلحق هوا
مصعب :ايه ايه برو اهو تو نلحق
قرب رواد منه وجبد البطنيه من عليه :تي نوض بلا نفخ
تلفت هارون هجم علي رواد لشده من ياقة تشرته وقبل مايضربه ستغرب من ضحكته لـ تعلت مع صوته :لا حولي ولا قوة الا بالله هههههههههه
ضيق هارون عيونه وهوا يتلفت لـ مصعب لـ غمط عيونه بـ خجل حد الموت وهوا متربع علي السرير لـ شرشافه ابيض ومبين دائرة لميه المبلوله لخلت منذر يوقف تابت بصدمه وهوا يشبحله لـ لحظات قبل مايتلفت يشبح لجيها التانيه علي صوت جابر لقال وهوا يقص علي رواد لكان بيتكلم :هيا رواد هيا
وجبده من يدين هارون لفاتح فمه بـ صدمة ويشبح لمصعب وماهتم بـ رواد لـ يضحك وهوا يحول في يد جابر لـ حاول يسكته وهوا يشبح لقاسم لـ كاتم ضحكته وطلعو هما التلاته وخلو هارون لركز علي روحه وحول عيونه من مصعب وتلفت فتح دولابه وطلع فوطه حدفها علي مصعب :نوض غير سروالك ومشي للحمام
خدي مصعب الفوطه بـ صمت وعيون ماحولهمش من علي الارض ، ووقف فتح دولابه خدي سروال وبدله ورا دولابه وطلع وخلا منذر لـ حك راسه وشبح لـ هارون لجبد شرشاف سرير مصعب وهوا يشد فيه بـ روس صوابعه لين خلا منذر ماعاش يقدر يشد ضحكته لـ طلعها :هههههههههه واااك ياراجل
هارون نفخ وهوا يقرب من الشرشاف شمه لين خلا منذر لزاد من ضحكته :هههه ياعن شكلك ياجيفه شن ادير
ضيق هارون عيونه :تي زود هدي اميه
هداء منذر من ضحكته ولف لـ هارون وهوا يقرب يشد في الشرشاف وشمه وعيونه في هارون لقعد يشبح حولينه لين جت عينه في شيشة لميه لـ مليانه لـ النص علي كمادينو رواد .
قرن هارون حواجبه وهوا يشد في الشرشاف بـ قبضه يده بـ القوه :الحيوان وربي نربيه
هز منذر راسه بـ ضحكه وهوا يحط في يديه في نص خصره :صبرك ياربي صبرك هههه
.
.
أسْمــح لـ قلبــكــ أنْ يكــون دَليلــكـ ، ولــكن لا تَسمــح لــه أنْ يُذلــكــ 🍂
.
.
حطت رانيا راسها علي لمخدة وفتحت تليفونها وهيا تشبح لـ رقمه وفي داخلها ، يارب يرد عليا ياااااربي .
واتصلت وغمظت عيونها وخدت نفس طويل وفتحت عيونها وهيا اطلع في نفسها لـ شرقت بيه اول ماسمعت صوته :الو
ناضت رانيا قعمزت بـ بتسامة ورتباااك وخجل لون خدودها بـ اللون الاحمر:اهلين ، شن جوك
ميل هارون راسه وعيونه في رواد لـ مقعمز تحت منصة الراية في وسط الساحة وهوا ينابش في اللي ماشي واللي جاي ، ورد :ماشي الحمدالله
رانيا :شن جو الكلية
هارون :تمام
تنهدت رانيا وهيا تحس بـ غصة قلب علي رده الجاف وقالت :عارفاتك مضايق مني بس والله والله نحسابه صاحبتي كان هدا مارديتش ، وبعدين انت تعرف زكريا وزيدة الدوة متعه
بتسم هارون بـ هزوة وقال :ومن وين تعرفيه زكريا انتي وزيادة دوته ولا حتي هوا واخدة معاه شوط
قرنت رانيا حواجبها :لا بس العيلة كلها تعرفه وبعدين انت عارف كويس انه مش مكلمه حد غيرك
وقف هارون :لا من قالك عارف اني مش عارف شي
رانيا :هارون
هارون :اسمعي من الاخير لانه مش قادر نمشي معاك اكتر من هكي ، بنت عمي فوق عيني وراسي لكن من الاخير مانقدرش نمشي معاك انتي مش من توبي ولا اني من توبك
ملو الدموع عيون رانيا :هدا كله علي خاطر مـريم
هارون :كداب كان قتلك لا ، وبعيد علي موضوعها وبـ الصراحة وخوديها فكش هكي مش بالعك ولا هاضمك يابنت عمي بري في طريقك وخليني في طريقي و....
وقبل مايكمل سكرت رانيا الخط في وجهه وخلاته يبعد في التليفون من علي ودنه ويشبح لـ التليفون :يابنت الـ.. استغفرالله حتي اني كلب مدايرلك قدر مه
وحط تليفونه في جيبه وطلع لـ الساحة وعينه في رواد لـ جاي مع قاسم ومعاهم ولد ، وبـ حركة سريعة سرع هارون من خطواته وحط رجله قدام رواد لـ عتر وقريب طاح لو لا قاسم والولد شدوه واول ماتلفت التالي وهوا يسب شبح هارون لـ غمزله بـ ضحكة خلت رواد يفك روحه من الشباب وهوا بيتلفت بـ يمشيله بس جاهم صوت العسكري:هيا عساكر الحصة بتبدا بسرعة
.
.
.
السُنـة ، سُنـة رسُـولنــا الكريــم ، والفَــرض ، فَــرضه علينــا الّٰــلــه عـز رجـل ، ولا فـرق بينَهمـا الا أن السُنـة بـ النيــه ، والفَــرض واجـب علينا 💛🌿
.
.
منذر :شوفي الحجاب مش تقيد ولا قلة جمال وحلاوة يابُـتول وكان حني ماقلنالكش تحجبي ولا غصبناك عليه مايعنيش انه شي عادي ولا حني راضيين انك ماتتحجبيش
نفخت بُـتول وهيا ترد في باب البلكونه عليها وتقعمز :اوووف ياربي اوووف خيركم عليا كلكم اللي نشكيله يولي عليا ويفتحلي محاضرة السديسي
ضحك منذر :ياكلبه هههه ماتخلينيش نصيح في الحمام راني
ضحكت بُـتول :هههه بالحقا في الحمام هههههه
منذر :مانقدرش نحلفلك هههههه
بُـتول :ستاحشتك هلبااا امتي اجازتكم
منذر :نهاية الاسبوع ان شاء.... هاهاها ها هههههه
ضكت بُـتول :هههههه واااه باهي خلاص اقلب وجهك مانعطلكش
منذر :اسمعي
بُـتول :نعم
منذر :الحجاب مش سنة ، الحجاب فرض ولازم علي كل بنت ، حطيها في راسك يااختي زي مانخاف عليك في الدنيا نخاف عليك في الاخرة ، وهي تشاو توا الحصه بتبدا وراك تنسي تتكلمي مع امي علي موضوعي
بتسمت بُـتول :تمام ، تشاو
وسكرت منه وهيا ترجع بضهرها علي الكرسي وكليمات منذر تلود في راسها بـ تمعن ، ومافيقهاش الا صوت امها لفتحت عليها الباب وقالت : نوضي تغدي هيا
تلفتتلها بُـتول :تعالي شويه نبي ندوي معاك في حاجه
قرنت سميه حواجبها وقربت قعمزت قبال بُـتول :شني تبي تفسخي
بتسمت بُـتول بـ استفزاز وقالت :لا اطمني مش حـ نفسخ
تنهدت سميه :نحسابك
هزت بُـتول راسها بـ غيظ وهيا تحاول ماتتعصبش وتتكلم في الموضوع طول :ولدك يبي يخطب
رفعت سميه حواجبها بصدمه :منذر
بُـتول :علاش عندك ولد غيره
ضربتها سميه علي رجلها :ادوي زين يافرخة
نفخت بُـتول :تي ايه منذر ياامي وطبعا عارفه من يبي فـ خلينا نمشو ونتكلمو فيها لانه نفخلي راسي
بتسمت سميه :كان نندري عليه ره خيرته بينه وبين العسكريه لمعفنه هدي
ضيقت بُـتول عيونها :حتي هوا عارفك اصلا هدا علاش ماقالكش الا لما ضمن روحه ، المهم توا شن رايك
رفعت سميه كتافها :قعدين صغيرين هما مش عارفه
بُـتول :هما مش حـ يتزوجو توا بس هوا خايف حد يجي ياعطي فيها كلمه والبنت كبرت خلينا نمشو نعطو فيها كلمه والعرس مزال لين يتخرج من الكليه
سميه :يصير خير لين نتكلم مع بوه ونشوفو
هزت بُـتول راسها وتلفتت لـ بهار لـ جت تصيح :تي هياااا نوضو جعانه ...
.
.
الـحُب الاول دائمــاً مايتــركـ بنَـا بصمـة صعب أنْ تُمحي 🥀
.
.
فنصت جوري لشاده بنت ريم في حضنها في صهيب لـ قعمز في مكانه وقلب شفايفه بـ زعل وهوا يشبحلها كيف تلفتت بصياح :نهار احرف اسود تقول المربيه متعكم اني زودو لـ مفرخكم
جتها ريم وخدت منها بنتها :لـ يسمعك يقول حق وانتي خمس تواني تبدي تصيحي
رفعت جوري حاجبها : كان نبي مفرخ ودوشتهم ووجع الراس متعهم هدا ره متزوجه
قعمزت ريم جنب صهيب لـ جبداته جنبها :خيرك حبيب عمتي شن دارتلك المجنونه هدي
صهيب :جوجو ببتني
تلفتتله جوري بـ شهقه :الكداب
ضحكت ريم وبساته :ههههه بالقاسم الصغير ههههههه
جوري :تي ماعاش تضحكيله
ريم نفخت :اسكتي يادراه عيل مايعرفش
جوري :ايه مه هوا شن مخربه غير دلعكم ليه
ريم :تو سيبينا من نكدك يانكد ، وقولي امي قالتلك علي سلفي
هزت جوري راسها بدون ماتنطق بـ كلمة
ريم :باهي شني رايك
جوري :مانبيش اني توا مزال لين نكمل قرايا علي الاقل مانبيش نلهي روحي بـ شي غيرها
ريم :ماتبيش علي خاطر لقرايا والا علي خاطر القلب مازال عند هداكا
شبحتلها جوري :اكيد لا هوا مشي في حاله واني مكمله حياتي
رفعت ريم حواجبها فيها لين خلت جوري تحول في عيونها منها محاوله تخفي عدم صدقها وقالت بـ نفخه :اوووف حشيشتك ادخلي الموضيع في بعض وتلبزي
رفعت ريم كتافها :اني ماقلت شي انتي لتوترتي بروحك
مسحت جوري جبهتا بـ يدها ورفعت راسها شبحت لـ اختها بـ استسلام وقالت :تمام معاك حق قعد في راسي لكن عادي يعني من الطبيعي اول شخص خش حياتي واول ولد كلمته بـ يأثر فيا
ريم :وعلي خاطر هكي اني نبيك ماتتعقديش من المواضيع هدي وماتسكريش الباب اعطي لروحك فرصه بس مش بـ المكالمات وبالغرام من الروشن اعطي روحك فرصه مع اللي جايك من الباب
خدت جوري نفسها كـ شهيق وطلعاته كـ زفير وهزت راسها :تمام قوليلهم يتفضلو
ورفعت صبعها كـ تهديد :بس كان طلع احرف من ناصر وزاد همي همين اللي ماقدرت نديره في نَــاصر حـ نديره فيك انتي
ضحكت ريم وحدفت عليها لمخده :ههههه كلبه واصلا سلفي جنتل حـ يعجبك ومش حـ يرخي بيك عاد بجيب اماليه
جوري :حسستيني هوا لمقايلك نبي اختك مش عزوزتك هيا لباعتاتك
ريم :وااااه ياخبيثه عارفه كل شي ومدايره روحك رزينه
جوري :ههههه كلبه رزينه غصب عنك واصلا في شن الخبث في جايبك عقدتني وهيا طول الوقت تشبحلي معروفه نيتها شن
ريم :هههههه فااانص نوضي نوضي نادي علي ايناس نوضي مايقدركش حد غيرها
خشت عليهم ايناس وهيا شاده صفرة الشاهي :اهو جيت وجبتلكم الشاهي
جوري ناضت خدت منها الصفره :جيتي وربي جابك
ايناس قعمزت وهيا تفتح في يدها لـ صهيب لـجاها يجري قعمز في حضنها :شني فيه شكله فيه خباريات
حطت ريم بنتها علي المندار وشبحت لـ جوري لـ عيطت :واااااك تو بتفضحيني في ليبيا كلها احكي احكي اصلا ماحد يقدر يشدك
ضحكت ريم وضربتها علي راسها بـ خفه ...
.
.
وإنْ كُنـا نَعلـم مـاهيـا نِهـايتنـا مع بعض الأشخٰاص لاكُنـا إبتَعدنـا من البِـدايـة 💔
.
.
فـي الليل ...
تلفتت ساجده لـ رانيا لـ صيحت :مـريم تليفونك يشرين زودي راجلك
ورجعت شبحت لـ ساجده لـ قالت :اقعدي باتي اليوم
رانيا :سامح خوي بعد غدوه ماشي لـ الصحراء ويبيني نوتيله شنطه
ساجده :غدوه بنمشو لـ رنيم نخطمو عليك ناخدوك معانا
رانيا هزت راسها :ماخاطريش خليها مره تانية
ساجده نفخت :اوووف بتقعدي هكي مدايرة في روحك علي خاطرة وهوا تراهو ولا همه
لمعو الدموع في عيون رانيا :مش قادرة وحقربي عارفاته من الاول تفكيره عليا هكي بس نحبه مش قادرة ننساه
ساجده :كان بتقعدي هكي حـ تاكلي علي كبدك الذل والتهزيب منه وحـ ترخسي روحك ليه باين مايبيكش و واخد عليك فكره غلط في غلط واحد زيه خساره فيه منك حتي التفكير اصلا
رانيا نفخت :انتم مش حاسيين بيا ، واللهي ماكم حاسيين بيا باللهي عليكم سيبوني في حالي
ساجده :اني ننصح فيك لانه مجربه دلك وحاسه بيك
شبحتلها رانيا بعيون مليانين دموع :بالحقا
رفعت ساجده كتافها :يعني نص تجربه هكي هههه
ضحكت رانيا وهيا تمسح في دموعها لـ سالو علي خدودها :كلبه تتسهوكي عليا
ضحكت ساجده وهيا تتلفت لـ مـريم لـ تلبس في عبايتها: بنات اني نازله نجيب علاء ونجي
ساجده :خليك تو ننزل اني نجيبه
مـريم تنهدت :اديري فيا طيب والله حاسه روحي دايخه ومش قادره نتحرك
ساجده بتسمت :بالك حامل
رفعت رانيا حاجبها :مش بعيد عليها وهيا كل سنه تجيب تقول مكينه
تلفتت مـريم وشدت الفوطه وحدفتها علي رانيا لـ عيطت بـ ضحكه :هههه تي ياحماره لا
مـريم :لا تتحشمي لا تستحي قداش عندي اني هما زويز حسستيني جايبه خمسه
طلعت ساجده وهيا تضحك عليهم وترد علي تليفونها :هههه هاي شنو الجو
جاها صوت حنين :شكله جو عندكم ياااربي قبل نبي نجي لكن حماواتي جوني
واتكت ساجده علي حديد الحمايه قدام شقتهم :ههه تعرفي انتي عاد رانيا وجوها بس مروحه مش قعدة
حنين :اخطمو عليها غدوة جيبوها معاكم لـ حوش رعد
ساجده :ماتبيش لكن تو نزيد نكلمها
حنين :تمام سلميلي عليهم وعلي امي والعيلة
ساجده :يوصل تصبحي علي خير
وسكرت منها وقربت طقت علي باب الشقه وهيا تتلفت علي صوت رجلين راكبه بس قبل ماتشوفه جاها صوت رانيا من فوق :ساجدة
وخرت ساجده ورفعت راسها فوق :نعم
رانيا :جيبيلي شحني نسيته عندكم
ساجده :تمام
واول مانزلت راسها نخلعت اول ماشافت سامح واقف في نص الدروج ويشبحلها لـ اول ماشبحتله تحمحم ونزل عيونه منها وخلاها تقرب من باب شقتهم وهيا تزيد اطق عليه وتساوي في وشاحها علي راسها بـ توتر لين تخطاها وركب وخلاها تتنهد وهيا تشبح لـ امها لـ فتحتلها الباب :خيرك العفو قريب كسرتي الباب علينا
ساجده :سنه حتي انتي باش تفتحي ياامي
وتخطتها وخشت ...
.
ذاكـ العابـر السبيـل قـد اخـد جنسيـة قـلبي واصبـح مواطـن فيـه 💛🍃
.
.
ورُبمـا الـصَديق الحقِيقِـي هوا عـدوُكـ الـدَّي يُـأذيـكـ ولا يُـرضي أنْ يُـأذيـكـ غَيـره ☘️
.
.
تــاني يوم الصبح ...
خش رواد لـ الفصل لـ قعد فاضي وقعمز في مقعده بـ نعس وتعب من التمرينات الشاقه ، وحط كتباته قدامه ورفع يديه حاوط بيهم راسه لـ حاسه يوجع فيه هلبا لدرجه مش قادر يتحمل حتي صوت نسمات لهواء لـ حاسها ترن في راسه بـ وجع وألم .
خش بعده مصعب لـ قعمز في مقعده وحط كتباته وشيشة لميه قدامه وعيونه في رواد لـ باين عليه التعب والالم .
خدي مصعب نفسه وشد شيشة لميه وكان بنوض يرفعها لـ رواد بس قبل مايوقف تلفت بـ راسه علي الشباب لـ خشو وهما يتهامسو ويضحكو وقربو من رواد و واحد منهم رفع يده وضرب رواد علي راسه ضربه قويه.
غمظ رواد عيونه بـ ألم وهوا يرفع في راسه وكان بصيح بس حس بـ الوجع زاد خلاه يكتم صيحته ويقول بـ شويه :ياعن شكلك راسي يوجع ماتشوفش فيه مربوط
جاه صوت ضحكه خلاته يفتح عيونه ويشبح لـ الشاب لـ قال بـ هزوة وهوا يشبح لـ صاحبه :شن قال حسه ياعن شكلي هههه اني ياعن شكلي
ورجع قرب خطوه من رواد وقبل مايمسه قرب مصعب وهوا يخش بينهم و يشد في رواد من يده :خيرك خونا ماتشوفش فيه مريض
شبح الشاب لـ مصعب من لوطه لي فوق بـ رفعت حاجب :الدوه بين اتنين التالت من منين
فك رواد مرفقه من مصعب وشد راسه بـ يده وبـ يده التانيه دف بيها الشاب :برا العب بعيد سلم ولدي وماتخلينيش نكمل عقاب راسي فيك
ضرب الشاب يد رواد لـ علي صدره وهوا بـ يزيد يقرب منه خطوه بس شده صاحبه التاني من يده وقال :تي فكك منه ياسيف توا يجو العساكر
حول سيف يد صاحبه عبدالحميد وهوا يشبح لـ رواد لـ يضعط في راسه لـ زاد وجعه بـ يده وبـ يده التانيه يبعد في مصعب لـ يحاول يسنده وهوا حاس بـ ادعديع وعدم توازن رواد لـ يشبح لـ سيف لـ دفه من صدره :هي كمل عقاب راسك فيا هي
ضحك رواد بـ هزوه وبـ لدعة وجع وهوا يبعد في يد سيف من عليه :طولك شبرين الا ربع عندك جهد حتي اتعنتر ياعيل
رفع سيف حاجبه وخبط رواد علي كتفه بـ القوه لين رواد رجع التالي وهوا يخش في المقعد ويشد في راسه لـ مش متحمل ألمه لـ خلاه ضعيف ومش قادر يقاوم الوجع وينوض يهجم علي عبدالحميد وسيف لـ دفه مصعب من علي رواد بـ صيحه :تي خيرك انت جاي تتعارك مع دبان وجهك ماتشوفش فيه مريض ولا يعني ماتشوفش

دف سيف مصعب من عليه ويخلي فيه لـ صاحبه عبد الحميد لـ هجم علي مصعب لـ يبعد فيه ويصيح وعيونه في سيف لـ هجم ضرب رواد بوكس علي وجهه خلت من رواد يطيح بـ صيحه منه علي المقعد لـ تقربع مع صيحت مصعب لـ بعد عبدالحميد وضربه علي بضنه بوكس ودفه وهجم علي سيف من التالي وهوا يحاول يبعده من علي رواد لـ قعد يضرب فيه و رواد كان بين وعي والا وعي ومش قادر يحامي علي روحه من بوكسات سيف لـ طيحوه علي الارض علي خشت هارون لـ اول ماشافه طايح وهاجم عليه سيف لـ حاول مصعب يبعده عليه خش هارون يجري وشد سيف من بدلته العسكريه من التاليه وبعده من علي رواد وضربه بوكس وبدي لعراك بينهم وبدو الشباب يتلمو عليهم وهما يحزو والاصوات تعلا وجو العساكر والافنديه ...
.
إِحدا قَوانِين الصَداقَة ، بِـ إِستِطَاعتِي شَتم صَديقِي ولكَن سَـ أُهشّم فَــكـ الـذَّي يُشتِمه 🤞🏻
.
.
.
.
#يتبـــع لـ البـــ{ 4 }ــــارت
#لـيبيـا_وطني🇱🇾
____________________________________
عِــشق فـي بِـلاد حُـروُبِهـــا لا تنتّٰــهي 5
بداء كتابه الروايـة في 19 /أغســ8ٰـــطس/ 2020
تم تجهيز الـبارت في 29 / يــ1ــنايـر / 2021
عدد كلمات الـبارت 3045
من كتــابة #اليَــاقُــوت