عشق في بلاد حروبها لا تنتهي 5 ( شهيد الواجب )

البـــ الخامس ـــارت

_
_
عِــشق فـي بِـلاد حُـروُبِهـــا لا تنتّٰــهي 5 ( شهيـد الـواجب )

في البارت السابق
تعلت ضحكتهم علي صوت جابر لقال من بين ضحكته :هههه  مافهمتش ياراجل نحسابهم بعاقبوني علي خاطر ندير في التمارين غلط ههههه
قاسم تنهد من وسط ضحكته :عمله ياولاد ماتعرفش تضحك لا تبكي
ورجع قاسم اتكه بـ ضهره علي الكرسي وشبح لـ رواد لـ مسح علي الشاش الملفوف علي راسه :هي رواد غنينا غنيه
رفع جابر حاجبه:ايه سمعنا صوتك هداكا اليوم فات علينا اني وهارون ومصعب قالو درتو زكرة  قدام الحمام اطلع طول هههه الشباب كلهم يدو عليها
منذر :تي زكره من الاخير اسمع وتعالا هههه تلمت علينا صاله الاكل كلها هههههه
رواد :خنقوني خنق فجأة إلتمو عليا قوم قريش يصفقو متع ياتغني يانبركو عليك
قاسم :ياكداب من الحمام وحني نغنو اصلا
ضحك رواد وضربه برجليه من تحت الطاوله :ماتعرفش تستر ياعن شكلك
جابر :هي سمعنا اي شي
قاسم :ايه ايه وراس امك هيا
ضربه منذر بـ رجله من تحت المقعد لين قريب رواد طاح :تي هيا ازح ماتنفخهاش
ردله رواد الضربه بـ رجله بـ القوة بـ تفنيصه خلت منذر يوقف وهوا بـ يهجم عليه بس نقز جابر وشده :لالا وراسك اجعله معاد غنا فكنا ياراجل وربي العساكر من نفخة يراجو فينا صلي علي النبي وقعمز
فك منذر روحه من جابر وقال :عليه افضل الصلاة والسلام

قراءة ممتعة 💛
البـــ الخامس ـــارت
.
.
سَـ أبتَعدْ خَوُفاً ، كيِ أقتَربْ حُباً 🍃
.
.
فتحت ساجده عيونها علي صوت الصغار لـ يلعبو برا وتلفتت وهيا تشبح في رانيا وأيه قعدات راقدات .
حكت عيونها بـ نعس وناضت قعمزت وهيا تلف في البطانية علي روحها من البرد ودخلت يدها تحت مخدتها وطلعت تليفونها لـ اول مافتحاته حست بـ نبضات قلبها زادو مع شعور غريب خلا جسمها كله يقشعر اول مادكرت رسالة سامح امبارح .
خشت علي الرسائل وهيا ترجع تقرا في الرساله بـ شبه ابتسامة ارتسمت علي شفايفها وهيا تفكر في داخلها ، شني فكره فيا بعد هدي السنين .
وقرنت حواجبها ، سناتين فاتو ولا مره بعتلي حاجه شن معني المره هدي
ونفخت وهيا تهز في راسها وترجع تبتسم لـ لحظات ادكرت بعدهم اخر مكالمه ليها معاه ...
(...:بالحقا حكيلك السِـيفاو
سامح شبح لمعاذ لقرب منه وقال :ايه حكيلي علاش ستغربتي
ساجده هزت راسها بـ ستغراب :لا شي بس هوا
قص عليها سامح :ماتخافيش نعرف كل شي
ساجده حست بـ غصه في صدرها وقالت :اممم يعني حتي انت تخدم معاهم
سامح :حاجه زي هكي
ساجده :اه اني لازم نسكر
سامح :خيرك خفتي ، ولا خفتي علي خاطر نخدم مع خوتك
ساجده :لالا بنسكر اني)
خدت ساجده نفسها بـ القوه وكـ انها فاقت من حلم وردي طفولي لـ واقع ماتبيش ترجع بيه لـ ماضي ملئ بـ الرعب والفساد والخوف لـ كانت عايشه فيه .
حطت التليفون ووقفت طلعت من الدار...
.
.
سـ نكــون يومـاً ما كـ النجــوم التي تضــوي السمــاء في ظلماتهــا ✨
.
.
نفخ هارون ورد علي اللي معاه في التليفون :ايح علينا ياصالح شن تبيني نمشي نقلبها علي راسهم باش يخلوني نروح ولا كيف
جاه صوت خوه لكبير صالح :هني روحك لاتقلب لا تفشك لكن واللهي ابصر شن مداير باش حارمينك من عطلتك
بتسم هارون بـ تحمحيم وقال :مش مداير لا مشكله لا سو غير شنو حال بوي والعيلة
صالح :تمام الحمدالله خواتك لبنات مامخليين شن مداييرين علي لعشي يحسبوك اليوم بتروح
ضحك هارون :ههههه انت تلف تلف وتولي علي مرواحتي قلنالك عندنا تدريبات
صالح :اي اي صدقتك باهي
هارون رفع راسه لـ عبدالحميد لـ واقف علي الدرجات ويشبحله مع الشباب ويضحك بـ استفزاز خلت هارون يرفع حاجبه بـ تجاهل ويتلفت يطلع لـ الساحة ويكمل تهدريز علي صالح وبعدها سكر من عنده وهوا يقعمز تحت منصة الراية جنب جابر لـ تلفتله وقال :امي قريب طلعتلي من التليفون
هارون :علي خاطر المرواحة
هز جابر راسه وهوا يشبح لـ مصعب لـ يتكلم في التليفون ومبين انه يتناقش ويبرر وهوا يمشي يمين يسار بستمرار لين خلا جابر يضحك:هههه شكله حتي مصعب عالق في امه
هارون :حتي اني خوي قريب طلعلي من التليفون ومزال بوي توا وااااك بيبدا يخرط ويهزب لين يطيب كبدي
جابر :ياريت بوي عايش ويتصل بيا ويهزب ويخرط وربي علي قلبي زي لعسل
تلفتله هارون بـ رفعت حواجب وشبحله كيف شبحله بـ بتسامة ورجع شبح قدامه لـ مصعب لـ قرب منهم وقال :شوي تاني نتوقع امي جايه تقولهم طلعولي ولدي
ضحك جابر وهوا يرجع يشبح لـ هارون لـ طبطب علي كتفه وهمسله :الله يرحمة
غمظ جاب عيونه وفتحهم كـ ردت فعل لـ هارون وناضو وقفو مع مصعب لـ قال :الصف قريب يبدا
هارون :اليوم خميس مافيش
مصعب تلفتله بـ بتسامة تذمر:اراك فرحان ياشامخ حني متعاقبيين عندنا دروس توا وعندنا تمارين تانيه في الليل
هارون شبح لـ جابر :بالحقا
رفع جابر راسه فوق بـ نفخة وتذمر لين خلا هارون يمسح علي وجهه :واااااك ياربي وااااك
مصعب :برو جيبو كتاباتكم والحقو وخفو روحكم بالله
دف جابر هارون لـ قريب يبكي من تعب التمارين وغير الدروس الصباحيه لـ نافخة راسه وخلو مصعب لـ مشي لـ الفصل لـ لقي فيه منذر ورواد لـ واقف علي الروشن ويتكلم بـ التليفون وقريب يلم الكليه علي راسه من الصياح :علاش يمه علاش تزيدي في راسي علي مابيه علاش ، انتي وراجلك ماتتهنوش لين تجيبولي سكته قلبيه
جاه صوت امه نعيمة :والله يافرخ الشطانة ماحد بتجيه السكته غيري منك ماسد ماتبيش تقول وين مفاتيح الورشه وماتبيش تروح تبي بوك يطلعوله قرون منك ويجيك غادي
رواد زاد في صوته لين منذر حط يديه علي ودانه :تي خيرك ماتفهمش يام خيرك تبي ربي يغضب عليا من الصياح عليك قتلك متعاقب ولا تبي نهرب باش نبدا مطلوب ولا عندك باش تهربيني برا لبلاد قولي كان هدا خليني نهرب وعطيني ذهبك نهرب بيه
نعيمة :ذهب بوك ياطياح السعد والمزال مايقدرش عليك الا بوك انت
رواد :حلو عن سمائي انتي وراجلك بالله عليكم اونا قوليله يلهي في ولده المببي وانتي بري تعاركي مع ضرتك شن جايه تفرغي في غيضك فيها عليا
نعيمة :اخخخخ تفوه عليك ياكلب ياللي ماتتحشم لا تستحي علي وجهك اتفوه عليا حتي اني لـ مكلماتك
وسكرت الخط في وجهه وخلاته يدفل :وتفوه علي راجلك حتي هوا خليه يتمصمص معانا بـ الدفال
شد مصعب ضحكته وشبح لـ منذر لـ ضحك وتلفت لـ رواد لـ كان بكمل باقية عراكة معاهم بس اول ماجت عينه في عين سيف لـ خش لـ الفصل بـ هدوء وبـ نظرات مستفزه شبحهم لـ رواد وتلفت حط كتباته علي مقعده متجاهل رواد لـ رفع حاجبه وتلفت لـ منذر لـ هزله بـ راسه بـ معني فوته
اشر رواد بـ صبعة علي روحك بـ ملامح مضحكة خلت منذر ومصعب يشدو ضحكتهم وهما يشبحو فيه قرب من سيف من الخلف وقبل مايقعمز علي الكرسي جبد رواد من تحته الكرسي وخلاه يطيح علي الارض وخلا صوت ضحكت مصعب تعلا بدون قصد وهوا مش قادر يوقف يشده مع منذر لـ وقف بضحكه وشد رواد من معصم يده وقال :فكنا ياراجل
فك رواد مرفقه من منذر وتلفت مشي لـ مقعدة وطيح كتباته علي الارض مع كرسيه لـ طيحة بـ رجلة علي الارض مع صوت سيف لـ وقف بـ غضب واعصاب وصيح :خير ....... خاطرك تنضرب ولا شني
حط رواد رجله  علي كرسية الطايح وتلفت لـ سيف ورفع صبعة وغمظ عيونه :لا للعنف لا لتنمر
وقف مصعب وهوا يكتم في باقي ضحكاته علي حركات رواد المضحكه و المستفزه لـ سيف لـ قرب من رواد وهوا يرفع في يده وضرب رواد علي كتفه :انت عقلك فيه حاجه ولا شني
رواد :ميت فيه حمار وشكله جاب تيس
تلفت منذر وهوا يطلع في ضحكته بصوت عالي وسيب مصعب لـ قرب من سيف لـ قبض قبضة يده ورفعها وضرب رواد علي بطنه لـ تكمش في بعضه بـ زيادة تمتيل اول ماشاف الافندي علي وصيح :ااااااه خيرك ياراجل خيرك قتلك خوده الكرسي ماعاش نبي نقعمز خلاص علاش الضرب شني درتلك
قرن سيف عيونه وقبل مايزيد يضرب جاه صوت الافندي علي :عسكري
تلفت سيف بـ صدمة وبـ خوف وتلبك وضرب التحيه مع مصعب اللي ضام فمه مانع روحه ومن الابتسامة ومنذر اللي زمط باقي ضحكته لـ شرق بيها وضرب التحية واول مالمح هارون لـ ورا العسكر ويأشرله شن صاير دار منذر علامة النصر او الاستشهاد بـ يده لـ ضارب بيها التحيه وبتسم بس اول ماشاف الافندي علي قرب ساوا من تحيته وخبا بتسامته ونزل يده وتلفت لـ رواد لـ مؤوفرها بدات قدام الافندي علي لـ اشر لـ العسكر لـ جو شدو سيف لـ قال :واللهي يافندي هوا لبدي هوا لـ قعد يحـ...
صيح الافندي علي :ولا كلمة وخودوه بسرعة
رفعو العسكر سيف وخلو الافندي علي لـ قرب من رواد لـ عتدل من وقفته واول مارفع راسه شهقو مصعب ومنذر اول ما شافو الدم لـ طالع من فم رواد لـ خلا الافندي يقرب ويحط يده علي كفته :انت كويس ياعسكري
مسح رواد دم فمه بـ كف يده وضرب التحيه لـ الافندي :ايه يافندي مافيا شي شوية دم عادي
الافندي :برا لـ الاسعافات وبعدها تعالا لـ مكتبي
هز رواد راسه وقعد يشبح لـ الافندي لين طلع من الفصل ونزل يده وشبح لـ منذر ومصعب لـ يدور في كلينكس في جيوبه وهوا يتمتم :واللهي نحسابك تمتل مانحسبكش بـ جديات ياراجل تي ماعنديش كلينكس يامنذر بالـ....
سكت مصعب في نص كلامه اول ماسمع ضحكت رواد لـ خلاه يرفع راسه ليه بـ ستغراب وقبل مايتكلم زمط رواد ريقه وهوا يلحس في الدم لـ طالع علي شفايفه بـ تلذذ ونقز قعمز فوق المقعد بـ رفعت حاجب :شني رايكم فيا ، تي المفروض نخش كلية تمتيل مش كلية النحس هدي مالي ومال الحرب اني هههههه
فتح منذر فمه لـ لحظات قبل مايسكره وهوا يقرب يضرب في رواد علي كتفه :محقر فيتك ازح خلعتني ياكلب نحسابك تنزف بالحق
زادت ضحكت رواد وهوا يطلع من جيبه كيسة الكتشب لـ يحطو فيها مع البطاطه في الكفيتيريا :ههههه عندك علم مانحباش وماعمري دايقه بس تاريته طلع هـ الكتشب لذيذ هههههههه وووووه هدا وين مسحت علي كبدي ونقدر نكمل عقاب يومي
بتسم مصعب وشبح لـ منذر وهوا يهز في راسه وقال :مش طبيعي هدا ره
.
.
.
رفعت ايناس حواجبها بـ ضحكة :بالحقا
هزت امها فاطمة راسها وشدت فنجان القهوه ورشفت منه :ايه وقالت بعد غدوه بجو يعطو كلمة عليها
تحمحمت ايناس وقالت بـ مكر :وسما تعرف بالك ماتبيش ولا حاجه
تنهدت فاطمة بـ رفعت حاجبها :العبو علي غيري شنو تحسابو لمية ماشية من تحتي ومانندريش والله مانمشي فيها الا بـ كيفي
ضحكت ايناس :هههههه الله عليك ياامي الله عليك ههههه
بتسمت فاطمة :واصلا حتي امه تعرف قالت مادام يبو بعض نجو كـ شكل ونحددو مره وحده يوم لـ التلبيسه وبتجي هيا تلبسها قالت مرات هوا مايقدرش يجي
ايناس:علاش نقدرو نديرو التلبيسه يوم عطلته
فاطمة :مانندريش عليهم اني عاد يجو وبعدها يصير خير
هزت ايناس راسها وكانت بتوقف :نمشي نقولها
فاطمة :لالا قعمزي
ولت ايناس قعمزت بـ قرنت حواجب :علاش
فاطمة ضحكت :خلي بوها يقولها في ناس بجو يخطبوها
ايناس :حي تو تنخلع تحسابه حد تاني
فاطمة :خليها تنخلع مايصيرلها شي
ضحكت ايناس :ههههه حرام عليك ههههه
.
.
.
حطت أية تيم في سريره وتلفتت خدت تليفونها من فوق الزيانه وحطت علي رقم نَــاصر واتصلت وهيا تراجي في صوته لـ جاها بعد دقايق :الو
أية :وصلت
نَــاصر :حتي بديت نخدم ، شن جوك وجو تيم
أية :تمام ماشي حالنا غدوة بنمشي لـ اختي اكرام
رفع نَــاصر حاجبه :تسألي والا تعطي في علم
أية ضيقت عيونها :وكاني نعطي في علم متلا
نَــاصر :مافيش مشي
نفخت أية:اوووف ، لو سمحت ممكن نمشي لـ اختي
ضحك نَــاصر :هكي تقدري تمشي
أية بتسمت :هي تصبح علي خير
نَــاصر :خيرك مزال
ايه :بالك مشغول
نَــاصر رفع راسه لـ باب مكتبه لـ انفتح وقال :تمام غدوة نكلمك مع السلامة
وسكر وهوا يشبح لـ سامح لـ خش وحط قدامه ملفات :المدير طلب نبعتو لـ هدو استدعاء لـ الرجوع للعمل
خدي نَــاصر الملفات وقعد يشبح فيهم وقال :هدو متعين الاجازات
قعمز سامح وقال :لا هدو مستقيليين من الخدمة والادارة طلعت قرار بـ استدعائهم لو يبو يرجعو للخدمة
نَــاصر رفع حاجه وقعد يقرا في الاسامي وشده اسم كانت وظيفته ليها مركزها وقال :هدا كان مدير تنفيذي لـ القسم الهندسي
شبحله سامح :شن سبب الاستقاله
نَــاصر :مكتوب السبب مجهول
وشد التليفون الارضي وكتب رقمه وكمل :خلي نبدو منه
سامح وقف :ولو واحد منهم رقمه مقفل كلم الايدارة
هز نَــاصر راسه وهوا يحط في التليفون علي ودنه ويراجي في الرد لـ جاه في اخر لحظة :ايوا
نَــاصر :السلام عليكم معاي محمد ناصر
محمد :ايه تفضل خويا