___________/
#عشقت_طبيبة_عسكرية
#الحلقة ٢٤ _ Bölüm 24
شاهين : عسلامة
إسماعيل : احترم نفسك يا حضرة الرائد و نزل سلاحك
شاهين : تعرفو حتى خدمتي ياك ! وينو دوغان سيدك ؟ لكلب وين راه متخبي أهدررر
آخر جملة ليه كانت بلعياط .. ميل راسو و تبسم بإستهزاء مين شاف علي .. يحاول يخبي فصدمتو
شاهين : هذا نتا ؟ نورمالمو كان لازم عليا نفيق بيك من نهار لول بلي تخدم لصالحو ههههه
علي : وشنو راك تخلط ؟
كان راح يجاوب كون ماحسش بحاجة تحطت على راسو
.......... : نزل سلاحك أحسنلك ....
________________
وصلو إلين و إلياس .. نزلو من طوموبيل .. لمرة هذي إلين لي كانت تسوق .. نحى إلياس نواضر تع شمس و حطهم في فاست تاعو .. و دور راسو يشوف مع إلين .. لي هي بذاتها تشوف فيه .. حمحمت آبخي نحات نواضرها طلعتهم لفوق شعرها .. و مشات .. تبعها هو و سبقها و لإبتسامة ماخطاتش وجهو .. وصلو لغرفة لإجتماع مالقاو حتى واحد .. سقسا إلياس لي تما قالولو مزال مانزلوش علي و إسماعيل .. طلع ليهم و إلين وراه .. شاف عبد عاطيه بظهرو و رافد سلاح جيهة الجنرالين .. ولا جبد سلاحو و حطو في راس لبنادم هذاك
إلياس : نزل سلاحك أحسنلك بسك شي لي راك دير فيه موش فصالحك
شاهين : أوووهوووو وينتا سيدكم لكلب هذاك يتعلم يجي هو موش يبعت كلابو هههههه
إلين انصدمت من صوت هذا .. ساعة و هي تشوف مع جسمو من لور .. هو لالا هو لا خاطيه .. هذا وش راهي تخمم و مفجوعة .. حتى زادت انخلعت كتر مين دار لسلاح بوجهو بعد ما كانوا هو و إلياس يشوفو فبعضاهم و شعور مش نورمال حكمهم .. بصح مابينتش صدمتها عكس شاهين لي حل فمو من شوك مين جات عينو عليها
شاهين : إلين ؟!!
إلين : شاهين !!
إلين (حكمت يد إلياس هبطتها) : نزل سلاحك بلاك ديرلو حاجة
راحت تجري حظنتو .. تكذب كون تقول ماتواحشتش لي في مقام خوها لكبير .. زير هو عليها لعناق كتر و راسو مبلوكي و علامات الإستفهام طغاو على الفِكر تاعو
شاهين : بصح كيفاه ؟
إلين : راني خدامة هنا يعني راك فمقر فيه جنرالات و عملاء و كامل .. دعي مولاك مايصرا والو بسبة لحماقة لي دايرها دوك
شاهين : بصح .. بصح .... آه ربي راح نهبل ياك دوغان لي بعتلي لميساج ولا وشنو
حكاية هذي لكل صرات قدامهم .. علي و إسماعيل جاتهم شوية حيرة .. أما إلياس نارو تاكل فيه ماكلة .. كيفاه تلاحت عليه و خايفة عليه لا يتقاس .. بصح علاه حس كيما هكاك كي جات عينو في عينيه .. كان يخمم و هوما هابطين لقاعة الإجتماع .. تأفأف بعد مافاق من تخمامو و جبد إلين من ذراعها ليه .. حتى جا وجهها بحدا وجهو
YOU ARE READING
♡☆ عشقت_طبيبة_عسكرية ☆♡ ◇مكتملة◇ ♡☆ Bir askeri_doktoru_sevdim ☆♡
Actionرواية جزائرية 🇩🇿🇩🇿🇩🇿 تحكي على أقوى إنتقام عمرك ولا قريت(ي) لي كيفو حرب الحب ☠👻 __________________________________________.......%🔫❗ و لأنني أحبّ الأشياء الراقية ، التي يصعب وصول الآخرين إليها ، أحببتك أنت ❤ Ve güzel şeyleri sevdiğim için , ...
