صمت اهلي قتلني 💔

البارت ٦

بارت ٦
🥀🥀

يبدو انها خيبه اخرى🖤🖤

ابوي وامي وره فتره راحوا للحج وي هواي ناس من المنطقه وصار يسمووه الحجي والحجيه

فالح :- وهو يفر بيده ويحجي شوف صار حجي والله يا الله
ابو رافد :- شيسوي الرجال اذا يرجع للبيت يضمضمن كلشي مايدري شوكت تطلع نوره وشوكت ترجع وين تروح
فالح :- سمعت مؤيد ضارب نوره رايح لبيت اهله للمغرب ماراجعه ولازمها كاسر سنها وباقيه امه ادعي عليه
ابو رافد :- بس كون تنعدل بعد
فالح :- مايفيد وداعتك بالعكس تعاند
....
نوره :- رحت اشوف مروه وشنو اخبارها سالفه جر سالفه وسوالف بنات طلعت منها لمحل ابو عباس اشتريت وهم دك سوالف على اهله وعلى الأوضاع ومناه ومناه وراح الوقت عليه
مخليه العبايه على راسي وامشي الدنيا مغرب شفت رافد وي جماعته يتمشون ما اعرف انزل راسي من امشي ابقه اباوع واتفحص خلق الله
علي :- رافد هاي مو بت ابو جاسم شعدها بهيج وكت طالعه
رافد :- ماشوف بيدها علاكه مشتريه
علي :- مو تزعل مني ياخويه بس مو وضعيه شوف لبسها ادري باقيه على العبايه خل تنزعها احسن

رافد :- لا تمصخها علي كاافي مناه العالم
علي :- حجيت لان امون عليك خويه اعتذر
رافد :- هذا انته هيج الغريب شيكول
( دائما يصير هيج كدامي حجي واسكت اكو بيهم مثل علي يعرفها اقاربنه ويحجي يفشلني واكو ميعرفون ويحجون وانه يا كاع انشكي وبلعيني )
.......
نوره :-
بس دخلت للبيت شفت مؤيد
مؤيد :- وين جنتي ولج
نوره :- يم مروه وشدعوه هيج عصبي
مؤيد :- السانج هذا اكصه احترمي
نوره :- معليك بيه اطب اطلع ما دخلك بشي
ما حسيت غير لزمني ودك كتل اجه بوكسي على حلكي حسيت سنوني تكسرت اجت سها توخره مني بس ما كدرت
وامي تصرخ ما تكدر تتحرك رجليها كلش وكفن
انه اغلط وهو يزيد بالضرب بلكوه وخر مني وامي ادعي على مؤيد لحد ما حصلتلها كم كلمه ياله طلع من البيت وهو يصيح اذا ما اكسر رجليها واكعدها بصفج ما اطلع مؤيد
رحت اغسل وشفت سني مكسور منه شويه ....

بيت حيدر ابو رافد

رافد : كلولي شسوي اضربها طلقه واخلص منها لو اذبحها تمشي بنص الشارع بلا جواريب وتتلفت ومناه جماعتي شسوووي اخوانها ابوها وينهم العارات هذوول

ام رافد : شلك دخل عدها اربع خوان ما يحجون المن حارك روحك الناس كلها تعرف احنه بس بالمناسبات وياهم

رافد : وانه ابقه هيج اشوف واسمع حجي واسكتتت شايفه شكد مأثره عليه خلي بالج حته على سمعه بناتج تآثر
ام رافد :- ادري والله ادري بس شنو الحل هو جاي عليها واحد وما منطينها شو اهل المنطقه صابغين سمعتها منو ليسئل يكلوله من بيت لبيت وبس تفتر وبعد الله اعلم
رافد :- منو يقبل يخلي هيج وحده بيته وانتي شبيج تباوعين وضحكين الفطيره
افاطم :- ههههههه اذكرت شغله بس مو وكتها
رافد :- غردي بله
افاطم :- تذكر من رحنالهم واحنه صغار
وكعدنه وهمه حته ما قلدولنه لا ماي لا شي ومن طلعنه كلت لام جاسم جايكم بالفرح ان شاء الله هههههههه
رافد :- من اكلج فطيره ما تقبلين ههههه

◇◇◇
استمع لما يقولون ولا اهتم رٌبيت هكذا وهذا طبعي وحياتي ياليت يوما سالت نفسي لماذا يتكلمون عني هكذاا ياليت ¡¡¡¡¡¡..

بيوم من الايام اجه جاسم
جاسم :- اكلج يمه شفت سياره جبيره يم بيت فالح يمكن جاي يشيل لان متحاجي وي اخوه

ام جاسم :- خاب سها جيبي عبايتي وجواريبي ولك جاسم امشينه الهم
جاسم :- شسوين رايحه
ام جاسم :- خايب ما اريد يفوتني شي امشينه يلا

ام رافد :- رحنه لبيت فالح بلكت نصالحهم طول عمرهم سوه ومايفرقهم شي خويه فالح رجع غراضك هسه عصبي وهيج تتصرف ما تستاهل الشغله
فالح :- كلمن بيته احسن هيج بعد ما ترهم
ام رافد :- شفت ام جاسم دخلت وكفت سلمت عليها
هله ام جاسم همزين اجيتي انتي الجبيره حاجي فالح خل يهدء ما تستاهل السالفه يشيل

ام جاسم :- اي خيه هسه اشوف شسالفه فالحح فالح
فالح :- هله ام جاسم
ام جاسم :- شنو السالفه شبيكم
فالح :- هيج تحاجينه واشوف احسن شي اطلع بعد هم ياله اسويلي بيت
ام جاسم :- مادام هيج اي سويلك بيت وهسه وين البيت لكيته
فالح :- قريب عليكم يم محطه الماي
ام جاسم :- اي زين ولك جاسم وينك جاسم
جاسم :- ها يمه كولي
ام جاسم :- ساعد فالح بالغراض بعد امك يلا
ام رافد :- عزه يااا يااا شوف المره ردتها عون صارت فرعون
حمل اغراضه فالح بس مبقه اسبوعين ورجع متعود على بيته وعلى الجيران ما يكدر يفارقهم وشماتت ام جاسم ما دامت ...

تسريع الاحداث

نوره :- خطار ابوي كثروا كلها شيوخ ومعارف قرر يسويله استقبال جبير وحمام خارجي وتجي الناس عليه يحل مشاكلهم لو فصل لو عركه

بهل الفتره دخلت فوك ٣٠سنه وسما هم منو ليجي علينه ماتصير اكثر من مره نروح للكشافه ( تاخذ خيره ) ودكول مسحورات ما تزوجن وراح اشتغل الجن وخلال هلفتره تجي قسمتجن طلبت فلوس وانطيناها
وراحت اشهر وكلشي ماكووو

سفرنه ابوي مرتين لايران انه وسها نتونس وصار عد ابويه اصدقاء ايرانين هواي
كلشي لاشوفه اشتريه وعدي كامره اصور بيها
جبت هدايه لاولاد سلوى بهل السنين صار عدها ٢ ولد و٢ بنات وصار بيتها وحد مرات نروح نبقه يمها ايام
لو امي وابوي يتعاركون وتروح امي عدها فتره
.......
و من ضمن لاعرفهم صديقتي ما مزوجه عدها صالون هم اكضي وكتي يمها شجعتني افتح صالون بس صبغ شعر واحف
شويه شويه صرت مشهوره بالمنطقه وتجيني زبائن من غير مناطق
بيوم اتصلت بيه افاطم أزوجت ابن عمتها وره ما تخرجت
افاطم :- شلونج نوره شخبارج مشتاقتلج
نوره :- خاب هلا عاش من سمع صوتج بخير انتي شلونج
افاطم :- زينه خيه عندي سالفه وياج
نوره :- غردي ولج
افاطم :- صديق زوجي مزوج ومرته مريضه من زمان متعلعله ويدور على مره بيتها عزال وبموافقه مرته الاولى وانه رشحتج اله شدكولين
نوره :- والله ما اعرف شكلج بس خاف اهلي يعترضون لان مزوج
افاطم :- باعي هي مريضه بعد بيد الله عمرها بيتج مو يمها والولد خوش ولد ونعرفه
نوره :- امممم جا خوش
افاطم :- ان شاء الله نفرح بيج
نوره :- الله كريم
وره ايام اجوا خوش ناس ودخلت اشوف الولد ويشوفني.......

يتبع .......

🥀🥀

Mays♡