روايه #نزيف_حاد
الحلقة 11
بقلم :رواسي بحرالدين
رويده : مرام خيرك و رفعت الابتوب و جسمها رعش و هي تشوف في صور هلبا بنات في منهن تعرفهن و منهن لا... وقعدت تنزل بالسهم لين شافت صورة مرام... شافت لمرام بنظره خوف و شك و تعجب !! مرام ؟؟
مرام: حطت يدها ع قلبها حمد لله ياربي حمد لله
رويده: فهميني شن فيه
مرام: تاخذ في نفس رويده حنحكيلك كل شي بس خليني نستوعب
رويده :-جبتبها اميه
مرام؛ شربت و حطت الطاسة ع الطاولة ... شافت لرويده القصة يا رويده ... و بدت تحكيلها ف قصة ابتزاز عماد ليها ...
رويده: تسمعلها بتركيز و مش مصدقة
مرام :- ..... و توا دكتوري النفسي علاء عطاني لفلاش هذا
رويده: باه شن يضمنلك انه الدكتور هذا ما يهددك بالصور هذين
مرام: وووه يا رويده ما تخوفيني ترا لو بيهددني كان هددني من اول يوم بس هو جاب الصور و عطاهن ليا
رويده:انا مش قادره نطمن له كيف ساعدك و بهل سرعه جابهن شن حيستفاد
مرام: حطت يديها ع راسها ... دخلتي في قلبي شك بعد ما تريحت لدقايق 😪😪
و مر يوم و ثاني و ثالث ....
و حنان صحتها زي ماهي حاطينها في العناية و لما تنوض ما تتحملش في الالام يعطوا فيها في مسكنات و اغلب الوقت راقده 😴💔
و مرام تراجي بفراغ الصبر جلستها من الصبح وتت نفسها
و لما جاء موعد الجلسة شالها محمد
_في المستشفي :-
مرام: دمعتها نزلت
محمد: خيرك مرام
مرام: خطرت عليا خالتي حنان كانت تجي معايا
محمد: تأثر ... خلاص مرام تفائلي خير بالهي
مرام: مسحت دمعتها و خشت ... و كان قبلها حالتين و هي اخر حاله
الممرضة: مرام محمود
مرام: خشت و قلبها قابضها ... السلام عليكم
علاء: برم كرسيه و عليكم السلام تفضلي مرام و اشر ع الكرسي
مرام: قعمزت
علاء: لبس نظارته كيف حالك و طمنيني
مرام: حمدلله
علاء: يستاهل الحمد ❤ ... بس مفروض يكون جوك احلى من هكي
مرام: كيف ؟؟
علاء: بفشل ... تستعبطي !! ناض و قعمز كالعادة في الكرسي يلي مقابلها ... و شافلها بنظرة كلها اهتمام ... انتي عندك إضطراب ناتج عن اثر صدمه و توا سبب الصدمه و سبب مشكلتك الرئيسة انتهاء لما عطيتك لفلاش
مرام: به علاش ما نهيت الجلسة ؟ و شافت للارض و شبكت اصابعها ... انا فكرت انتي حتي انت عندك نسخه و حتهددني بيهن 😔
علاء : طلقها ضحكه ...😂
مرام: تشوف له بفرح لانها اول مرة تشوف علاء يضحك 🙊يا يهدد فيها يا يسال بجد😐 " تحياتي: رواسي بحرالدين" 👉(ع اساس حقوق نشر و هكي 😂❤) نرجعوا لروايتنا:-
علاء: لو بنهددك ماكنت عطيته لك يوم شفتك عشان نفرحك كنت راجيت الجلسه و هددتك بيهن بس اطمني زي ماهو مديته لك و ياريت تكون ع قد الثقة حتي انتي و تحذفيه لانه حسب ضني فيه صور غيرك
مرام: تحشمت و طبست راسها ... اصلا كسرت ع 16 خليك مطمن ب نبي نعرف لو ممكن شن صار في عماد و كيف قدرتوا تجيبوا الصور منه
علاء: القصة هذي لازم يحكيها لك شخص له فضل كبير او له كل الفضل
مرام: كيف ؟ قصدك مش انت بس يلي عالم بالقصة ؟
علاء:رفع تلفونه و بعت رسالة .... اصبري اشوي بس و ناض قعمز ع كرسي مكتبه
براء: دق دقتين و فتح الباب ... السلام عليكم
مرام: صبت دكتور براء
علاء: قعمزي توا تفهمي
مرام: رجعتىقعمزت مكانها
براء: خش و حاط يديه في جيوب البالطو ... السلام عليكم
علاء: عليكم السلام ... قعمز براء
براء: قعمز في الكرسي يلي مقابلها نفسه يلي كان علاء مقعمز فيه
مرام: تشوف لبراء تبي تسال الف سوال و مش عارفه كيف
علاء: ابتسم ابتسمه عريضة .. عارف في عقلك الف سوال بس براء حيفهمك كل شي ونبداها لك انه انا عرفت كل شي صار معاك سابقا من الدكتور براء و هو يلي يعرض عليا نساعدوك
مرام: بين عيونها تتذكر قبل كيف هزبت براء
_( مرام بصوت عالي شن صاير معايا يعني شن في ضنك ؟؟؟ انا عيت من قولة مش عارفه شن سبب النزيف انتم الدكاترة يلي مفروض تعرفوا السبب مش انا
_ براء: مصدوم من جرئتها و ردها عليه .... كلامك صح نحن يلي لازم نعرفوا شن صار معاك و طلع عنها فاصل)
براء: مرام
مرام: ماضت من سرحانها .، اه
براء: اطمني مافيش شي يهددك توا و الافندي يلي اسمه عماد القيناه و شبع طريحه
و حتي تلفونه تكسر تكسير يعني كل شي امان
مرام: دمعتها نزلت ..و كانت بتحكي بس ...
براء: تلفونه رن ... رد عليه و بفجعه شاف لعلاء بصوت مقهور و مفجوع ..ياسين جت الشرطه بترفعه و طلع يجري
مرام: انخلعت
علاء: مادوري فيه طفل في القسم جاه اتصال طارئ عليه
مرام: بس كنت نبي نشكره ... و حتي انت شكرا هلبا دكتور مش عارفه كيف نجازي فعلكم هذا معايا 😔🙏
علاء:عني انا ديرلي طاجين بسبوسه 😋😋 و ضحك ضحكه خفيفه ... نبصر سلامتك و هذا واجبي
مرام: ربي يحفظك ... وياريت تشكر دكتور براء و تعتذرله عن ردت فعلي معاه سابقا
علاء: خذا ورقة ملاحظة و كتب رقم .. مدها ليه هذا رقمه تقدري تشكريه
و الجلسه الاخيره الباين صحتك احسن تقدري ماتجي الا لو حسيتي بشي
و خذا روشيته كتب فيها .... و هذين الادويه يلي وصفتهن لك سابقا فيه يلي معاش تاخذيه و فيه يلي برجعه اقل لمدة شهرين
مرام ؛خذت الاوراق منه ... بارك الله فيك دكتور وربي يفتحها عليك ماقصرت
علاء:في الجميع و قتلك مادرت غير واجبي و مد يده موفقه في حياتك
مرام:مدت سلمت عليه اجمعين يارب 💗 وطلعت و هي حاسة بفرحه مش سايعتها و طلعت لخوها محمد
محمد: شن صار تقابل فرحانه مش نفس ماخشيتي
مرام: لا غير الدكتور قالي وضعي احسن و حتي عطاني روشيته فيها تقليل من جرعة الادوية
محمد: باهي كويس
____________
براء: طلع يجري من حجرة الدكتور علاء و مشى لقسم الاطفال خش للغرفة يلي فيها ياسين
حمد:اهو جا الدكتور المسؤول
الشرطي:يشوف لبراء
براء: خش داهش ... شن فيه استاذ
الشرطي:انا الشرطي المسؤول و جاني امر برفع الطفل
براء: لوين بترفعه ؟ الطفل قاعد هنا بأمان و حتي صحته ممكن في اي وقت تدهور
الضابط علي: السلام عليكم
الكل : وعليكم السلام
الضابط علي؛ سلم ع براء و ضغط ع يده ... و انا الضابط المسؤول عن قضيته
براء: كنت نفهم في الشرطي انه صحت الطفل ممكن تدهور ولازم يبقي تحت الملاحظة
الضابط: شاف لحمد بس مديرك انبدري قالي صحة الطفل تمام و نقدروا في اي لحظة نجوا و نرفعوه ... وين الاوراق شرطي ناصر
ناصر: رفع الملف و مده للضابط علي
علي: مده لبراء .. تفضل دكتور الملف هذا يبين انه صحة الطفل ياسين مستقره و مختومة من المدير حمد
براء: تعابير وجهه انقلبن لغضب و شاف لحمد بنظره كلها حقد ... عزق الملف ع الارض انا الدكتور يلي مسؤول عنه مش حمد و نا يلي نقرر امتي الولد يطلع و بعدها الطفل يتيم وين بترفعه لميتم ولا ؟؟؟ و هنا في الجفرة مافيش ميتم حكومي او حتي خاص يعني الطفل بيتشرد
حمد:براء لحظة اشوي و كره من كتفة لناحية زواية الحجرة ...
براء:استاذ حمد احتراما للعشرة مانبيش نغلط فيك ياريت تبعد و تخليني ندير واجبي
حمد: بعصبيه و صوت عالي مش واجب عليك يا دكتور براء تعتني بالطفل واجبك تعالجه وانت درت الشي هذا بس الباقي مش شغلك
براء: بصوت حاد واجبي نهتم بطفل مريض ولا تبيني نخليه يتشرد ؟؟
علي: الطفل مش حيتشرد يا دكتور براء في مرا كبيرة في السن و عقيمه مع الاسف قررت تربي الطفل هذا
براء: يشوف لعلي بصدمه
حمد: قرب من وذن براء ... ياريت تفكر صح و تخلي الطفل يعيش حياة سعيده و خاصتا انه حصل ع ام حنونه ممكن انت مش حتقدر تجيبها له
براء:الكلام نزل عليه كيف السم طلع من القسم معصب .... و توجه للسيارة بيروح حتي قبل انتهاء دوامه و اول ما فتح السيارة وركب قعد يخبط ع استيرسوا السيارة و يعيط و اخر شي استسلم للواقع و بدا يبكي ... ايه بدا يبكي و ورا دموعه هذين ذكريات حزينه و مشاعر خذلان و فقد 💔
_________________
مرام:روحت للحوش حاست حوستها و طيبت العشاء و اتصلت بخليفة تطمن ع خالتها و اخر شي شطبت المطبخ و خشت لغرفتها قرت اشوي و مابين تفريعها لصفحات .... صبت و جابت سروالها الجينز يلي كانت لابسته دخلت يدها في الجيب و طلعت رقم براء تتصل بيها بس مايردش و فقدت الامل و قالت في خطرها ممكن يكون مايردش ع الارقام الغربية !
_ بس ماكنتش عالمه وضع براء شنو
يلي روح للحوش مقهور خش سريرة و انطرح غارق في النوم يحاول يطرد الذكريات الحزينه من عقلة ... لانه كلنا عارفين انه النوم مش راحه بس و إنما هروب من الواقع المريب 😴🍃
و مر اليوم هذا بتفاصيله .... و بدا يوم جديد⛅
بأحداث جديده مختلفة:-
شارده:مرام مرم نوضي بنتي
مرام:نعم حنتي شن فيه
شارده:واوووه من امتي تقولي حنتي
مرام:فطنت قصدي امي شارده و تحك في عيونها
شارده: خالتك حنان ناضت و الدكاترة قالوا وضعها احسن غير رجلها ليسار ركبولها فيها بلاتين خارجي لازم تقعد ايام في المستشفي
مرام:قعمزت باهي الحمد لله ربي يرجعها سالمه لنا
شارده:امين يارب و هي نوضي غسلي ساعة قريب 12
مرام: اثاوبت هي هي
شارده: جت بتطلع
مرام: بصوت هادي،.... امي
شارده: نعم
مرام: عيونها في الغطاء و تحرك فيه... امي زهور مارنتش؟
شارده: بحزن ...من مكالمتها الاخيرة معاش اتصلت
مرام: قلبت عيونها لفوق... قصدي من ثاني يوم من سعفت خالتي
شارده: هزت براسها
مرام: ناضت من سريرها و تلف في شعرها كعكة و بصوت بدون شعور و وجه بدون اي تعابير ... هذا يلي مصبرني انه مش عديمة مشاعر معايا نا و خوتي بس مع الكل عديمة احساس حتي مع امها و خواتها
شارده: عيب يابنتي امك في النهاية
مرام: ضحكت و جت طالع .... شافت لشارده بالاسم بس و طلعت للحمام " يكرم القارئ"
شارده: ربك يعوضك خير يابنتي 🙌🙌😞
___________________
براء: خش للحوش كان جايب فطور من برا معاه قعمز ع الكرسي بيفطر و فتح تلفونه يتصفح و بعد اشوي خش بيتصل لقي مكالمة فائتة فاتها مادورهاش و كمل يفطر
______________
مرام: رجعت لغرفتها نظمتها و فتحت النافذه و مسكت تلفونها بعتت رسائل
ملخصها :-
(السلام عليكم و جمعتك مباركه دكتور براء انا مرام
امس ماحصلت نشكرك ع يلي درته شكرا و نعتذر عن ردة فعلي في السابق )
براء: كان ماسك التلفون و لما بدا يوصلن الرسائل ابتسم و عاود اتصل بيها
مرام: لما جاها اتصال براء شافت الباب لقاته مسكر خذت نفس و ابتسمت و ردت ع الاتصال
براء: ايوه السلام عليكم
مرام: وعليكم السلام
براء: كيف حالك مرام
مرام: احسن حمدلله
براء: وصلني رسائلك مافيش داعي تشكريني يلي عليا درته و اما ع لقطك يلي فاتت لازم تعتذريلي وجه لوجه وقتها نقبل اعتذارك
مرام: رفعت حواجبها متعجه من كلامه! وين بنقابلك وجه لوجه عشان نعتذرلك ..
براء: جلستك الجايه اكيده حنكون في المستشفي
مرام: قعمزت ع السرير.... لا وين كملت جلسات و لا ياودي هو مزال جلسه بس دكتور علاء قالي براحتك و نا وضعي كويس مش حنجي
براء: مش حتجي ولو عشاني ؟
مرام: انصدمت من الكلمة .،. كيف ؟
براء: انتبه لروحه قصدي ديري رأيك لو حاسة بالذنب هذا وتبي تعتذري
مرام: امممم نشوف ...
براء: تمام
مرام: هي نستاذنك
براء: سلام
مرام:- تسلمي ... و سكرت الخط ... حطت التلفون ع الطاولة و طلعت تفطر و تهدرز ع شارده
محمد: خش مرام مرام
مرام: نعم
محمد:المطول الاسود يا مرام مش قايلك معاش ترفعيه من المربوعه
مرام: الناس يقولوا خير و ماتصدعلي راسي تلقاه في الدار
محمد: خرا ... و خش لدراها يدور ع المطاولة و عينك ماتشوف الا تلفون مرام يضوي يرفع التلفون يلقي
اتصال من رويده
محمد: بصوت عالي مراااااااام
مرام: مرام جت تجري نعم شن فيه
محمد: صوته قوي و حاد كان ماسك تلفونها و عيونه مفتوحات بغضب... من امتي عندك شفرة ؟
مرام: ..... يتبع
حبيت نطول الروايه اشوي بدل لا نختصرها و احداثها حقيقة بس الحوار فيه زيادة و تعديل مني
عطوني رايكم بدون ملصقات 👇💗💗 " تحياتي رواسي بحرالدين "
