Married to Unknown

XXXV.

Gemma

"Rose? Ikaw na naman ba nagkalat dito?" Nakita ko yung basag na vase pagkapasok ko palang. Si Rose lang naman ang alam kong clumsy at isa pa bukas na yung pinto pagkadating ko kaya siya agad ang naisip ko.

"Hoy Rose may kailangan akong ikwento sa'yo...Rose?" Napakunot noo ako. Wala rin siya sa kitchen.

"Nakatulog ka na naman ba sa kwarto ko?" Nakita ko yung pinto ng kwarto ko na bukas kaya napabuntong hininga ako. Sabi ko na nga ba andito lang siya.

"Ro.." My room is a mess. Napatigil ako at hindi makapaniwala sa nakikita ko ngayon. Sakto namang nag ring yung phone ko at tumambad yung pangalan ni Rose sa screen kaya agad ko itong sinagot.

"Girl! Nakauwi ka na ba? Gusto mong sumama sa akin ngayon sa bagong bukas na club sa ***? Doon daw kami mag rereunion ng mga ka batch ko noon sa high school, mas maganda kung ipakilala kita sa kanila. Talino ko no? Para naman hindi puro bahay ang alam mo at isa pa baka makahanap mo doon si Mr...."

"Saan ka?"

"Huh?"

"Saan ka?"

"Ha? Ah nasa bahay, bakit?"

"Hindi ka nagpunta dito?"

"Girl hindi, magdamag lang aketch ditey sa bahay. Bakit?"

Sh*t.

"Gemma? Hello? Uy keribels ka lang ba diyan?"

"Sigurado ka ba?"

"Anong sigurado ako? Ako naguguluhan sayo Gemmy ha."

This is not good. Napatakbo ako sa mga drawer ko at nagsikalat din yung mga gamit ko doon. Pati yung mga damit ko sa closet nagkalat rin sa sahig. Para bang may bagyo na dumaan sa kwarto ko at nakakapanlumong tignan. Hindi ako makagalaw sa kinatatayuan ko kung hindi lang nagsalita si Rose sa kabilang linya.

"Gemma? Kung hindi ka pa sasagot, pupunta na talaga ako diyan. Linapakaba mo aketch dito. Di ka na funny."

"Rose..."

"Ano? Hoy ba't ka nanginginig? Ayos ka lang ba talaga?"

"May nakapasok dito sa bahay. Gulong-gulo lahat ng gamit ko dito sa kwarto." Nilapitan ko yung mga gamit ko para i-check kaso mukhang wala namang nakuha ni isa. Sunod na pinuntahan ko yung jewelry box ko, kokonti lang ang laman non pero puro bigay ni mama. Napansin kong natanggal yung lock nito at pagkabukas ko, gulo gulo ito kaso wala ring nawawala. Kaso napatingin ako sa isang baseball bat na hindi ko natatandaan na andito.

"Tatawag na ako ng pulis."

"Huwag! May kailangan muna akong tignan."

"Jusko naman mas pinapakaba mo ako."

Kung ang inaakala ko mas nakakagulat ang nangyari dito, nagkakamali ako. Lumabas ako sa kwarto ko at pumunta sa dating kwarto ni mama at doon ko nakita kung paano nawasak ang pinto nito at katulad nung nasa kwarto ko, gulong gulo rin lahat ng mga gamit dito. Para bang may galit kung sino man ang pumasok dito at ni isa bagay dito sa kwarto ay hindi pinatawad. Lahat wasak, lahat sira.

"R-Rose..."

"Bakit Gemma? Mas maigi kung lumabas ka na sa bahay na yan."

"Yung kwarto ni mama..."

Napahinto ako nang may marinig akong yabag ng paa mula sa attic. Tumayo lahat ng balahibo ko at nahihirapan na akong huminga dahil sa tinding kaba.

"Gemma? Naririnig mo ba ako? Lumabas ka na sa bahay na yan! Isa pa ala una ng umaga ngayon, paniguradong magnanakaw yung nakapasok diyan!"