خلصت ريما فتره نفاسها وبعدها كان عندها شهر تتجهز فيه لعرس فارس ونجد بدت تجهز وهي تطلع مع نجد واديم وامها وام نجد ويتجهزون ويشترون ملابس وفساتين وساعدو نجد بفستان العرس وخلصت وكان فهد يقعد مع ابوه ويعتني فيه لما ريما تطلع
قبل العرس بيوم اتصل فارس على نجد وهو يقول : يانجد بكره عرسنا بكرره
نجد : اييي
فارس. بضحكه : انتصر الحب
نجد : صادقق
فارس : اهخخ
نجد : تذكر الترندات الي وريتك اياها فتره الملكه؟
فارس : اي
نجد : بنسويها بالعرس
فارس : ابشري
نجد : يعني بتشيلني وترفعني بالهواء ؟
فارس : يفداك يشيخه بشيلك وبحضنك وبرقص معك بعد
مجد : يلبيى ذا الي ابيه اننا نرقص
فارس : تبين ذيك الرقصه الي امسك يدك وانتي تدورين وبعدها امسك خصرك وتطيحين كذا واكون ماسكك صح ؟
نجد : اي ذي رقصه الفالس
فارس : المهم هي
نجد : يلا فارس بقفل
فارس : ليه
نجد : ابي انام من وقت عشان بكره وراي يوم طويل
فارس : طيب تصبحين ع خير يازوجتيي
نجد : وانت من اهل الخيير يازوجيي
قفلت المكالمه وحاولت تنام لكنها متوتره مره
_
العصر
كانت كل البيوت فوضى وترتيب والبنات بالصالون والي بالبيت ترتب نفسها اما ريما واديم بالصالون ونجد كانت تصور زفتها بعد ما كشخت وسوت ميكب راحو للصالون مع بعضهم وامهاتهم معهم
ريما : اسمعي ابيك تسوين لي ويفي
الكوافيره : ابشري
بدت تسوي لها وجنبها اديم الي كانت تسوي ميكب لانها مخلصه نفسها
ريما : حظكك خلصتي
اديم : محد قالك ساعه تختارين تسريحه بعده وراك ميكب
ريما : لا الميكب ادري وش ابي اسوي
اديم : انا لما بخلص بروح اسوي مناكير
ريما : تم
اديم : يلا خليها تخلص تسريحتك عشان تلحقيني
ريما : ابشري
_
عند نجد وفارس الي كانو يصورون مع بعض ويتدربون للزفه والفيرست لوك
المصوره : ياعريس انت اوقف هنا وبعدها بتنزل العروس من الدرج وبتلمس كتفك اول ماتحط يدها ع كتفك لف عليها وشوفها
فارس : طيب
راحت المصوره لنجد الي كانت متوتره بشكل
المصوره : يعيوني ريلاكس خذي نفس
نجد خذت نفس وقالت : متوتره
المصوره : ادري انك خايفه تخرب الفيرست لوك بس صدقيني بيطلع حلو وانتي تهبلين بسم الله عليك يلا انزلي
حاول فارس يلف يناظر بس المصوره قفطته وقالت : ياعريسس لا تلفف ادري انك متحمس بس ياحظك فيها تهبل
فارس : ايي ادريي انها تهبل
المصوره : حتى العريس متوتر يلا عادي انزلي ذي ليله عمرك لا تخربينها بتوترك يعمري
نجد : خلاص بنزل
نزلت نجد والمصوره تصورها وتبتسم لها واول ماوصلت عند فارس وقفتهم المصوره وقالت : عروستي قربي شوي وحطي يدك ع كتفه
نجد : طيب
قربت نجد من فارس الي عاطيها ظهره وحطت يدها ع كتفه واول ماحطتها لف فارس بشويش واول ماناظرها ابتسم وهو يقول : بسم الله عليك تهبلين يحظي فيك
نجد : اي والله
قرب فارس وهو يبوس راسها وبعدها فتح البشت حقه عشان تحضنه نجد قربت نجد من حضنه ودخلت يديها بين خصره وحضنته وغطاها ببشته وكانت اللقطه تهبل
المصوره : ايواا كذا حلوه
نجد : اسمعي خاطري نسوي حركه
المصوره : ها يعيوني وش تبين تسوين
نجد : ابي نرقص فالس مع بعض
المصوره : نايس يلا بنشغل لكم اغنيه
اشرت المصوره لمنسقه الاغاني تشغل اغنيه تناسب الرقصه وفعلا شغلتها وتجهزو نجد وفارس للرقصه حطت نجد يدينها ف صدر فارس وحط فارس يديه ف خصرها وهو يرقص معها
بدو يرقصون والمصوره تصور كل لقطه بكثر ماتقدر بنص الرقص فارس سوا شي محد توقعه وقام رفع نجد من الارض وهو يدور فيها صرخت نجد وهي تضحك والمصوره صورتهم بعدها نزلها وحضنها
المصوره بأبتسامه : ماشاءالله والله انكم الطف عروسين مرو عليي الله يديمكم لبعض ياربب
فارس : امين يارب
نجد : امين يعيوني
فارس : الا وش نسوي الحين
المصوره : الحين بس بناخذ صور بسيطه وندرب العروس ع الزفه و بس
نجد : زين
فارس : اصبري
قام فارس جاب نظارات له ولها وشغلو اغنيه اجنبيه حماسيه وبدو يرقصون عليها زي الاجانب وكانو مشغلين كشاف جوالهم ومخلين القاعه ظلام وبالنص ضوء عليهم قعدو يضحكون وهم يرقصون ويحركون جوالاتهم ومستانسين على جوهم وكان فارس يهز كتفه وبعدها يرقص زي الاجانب ويقلد الرابر بحركات يده ونجد نفس الشي كانت تسوي نفس حركات الدي جي والمصوره منهاره على لطافتهم وجوهم
فارس : يا مصوره
المصوره :هلا
فارس : اسمعي قبل لا اخذ زوجتي معي البيت ابي اسوي شي
المصوره : وش
فارس : بخليها بالنص بفستانها وبدور حولها بالسياره وافحط
المصوره : تعرف تفحط يعني؟
فارس : اي
المصوره : عن تدعمها او تخوفها
فارس : لا معليك انا اعرف اسوق
المصوره :ها ياعروستنا وش قلتي
نجد : عادي عادي بتطلع اللقطه رهيبه
المصوره : اجل خلاص بنسويها اخر العرس
فارس : شكرا تعبتك معي
المصوره : شدعوه ليله عمركم ذي لازم تسوون كل شي بخاطركم لأنها ماتتكرر
فارس : صادقه
قعد فارس بالكرسي وهو يشوف المصوره تصور نجد وكيف تسوي الزفه وتدخل ع المعازيم وتدربها ابتسم وصور نجد الي كانت تبتسم للمصوره وتضحك معها
_
خلصو تدريب نجد وفارس وجت الساعه ٥:٠٠ وطلعت ريما واديم وامهاتهم على طول للقاعه عشان يجهزون ويشوفون الترتيبات ويقعدون مع نجد الي كانت مستانسه وراح توترها بعد ماشافت فارس
دخلو البنات للقاعه واستقبلو المعازيم وشافو بنات عمهم وعماتهم
كادي : هلااا
ريما : اهليين
مزن : نجد خويتك بتتزوج فارس ماتوقعت
ريما : اي ولا انا بس طلع فاارس يحبها
الهنوف : اها جد؟
ريما : ايوا
اديم : ريما انا بطلع شوي برا
ريما : ليه
اديم : مدري عبد الرحمن قال بيعطيني شي
ريما : تمام عيوني روحي
اديم : يلا
كادي : وين نجلس
ريما : شوفي هنا اهل العروس وذي الجهه اهل المعرس ف انتو اقعدو هنا
مزن : بنات نبي نقعد قدام عشان نشوف نجد بالفستان كويس
كادي : طيب
شروق : تم
نجود : ذي ذي طاوله فاضيه
سلمى : يلا نقعد فيها
قعدو البنات مع بعضهم اما ريما كانت جالسه مع امها وعهود واديم وامها وكانت تروح للبنات تسولف وترجع وهي ماخذه فهد معها وكل ثانيه تنتبه عليه او امها تهتم فيه لما هي تكون مشغوله
راحت ريما لنجد ودخلت عليها الغرفه ولقتها كانت متوتره ضحكت وقالت : يعنني متوتره وكذا
نجد : اسكتي انتي بعرسك كنتي متوتره اكثر من كذاا لدرجه كام بيغمى عليك يوم دخل عزام
ريما : يوو يالفشله لاتذكريني
نجد : اجل اسكتي
ريما : يعيوني عادي تنفسي
جواهر : اي شوفيها من ساعه اقولها هدي بس هي مو قادره تتنفس
نجد : يمه ترا ليله زواجي اكيد متوتره
جواهر : ادري
ريما : خليها تتوتر بكيفها الحين بتهدا اذا شافت فارس
نجد : لا ياشيخه بيزيد التوتر
ريما : اي ويوم التصوير ميانه والحين استحيتي يعني ؟
نجد : لا بس الحين وقت جد يعني خلاص بروح معه لحالنا فهمتي وما بكون ببيت اهلييي !
ريما : عادي حبيبتي ذي مشاعر الحين بتحسين فيها بس بعدين بتضحكين على نفسك وكيف كنتي متوتره بزياده
نجد بضحكه : صادقه
بدت ريما تسولف لها هي واديم لحد ماهدت ونست الموضوع وبدت تضحك وتسولف لحد ماجا وقت انها تدخل كانو البنات يرقصون وعهود بعد ترقص ومستانسه وترجع لامها تبوس فهد وترجع تكمل رقصها نزلت ريما وهي ماسكه الميكرفون وقالت :( لو سمحتو كل وحده ترجع مكانها العروس بتدخل الحين ) رجعو البنات لمكانهم وظلمت القاعه وانفتح ضوء خفيف عند البوابه الي بتدخل منها نجد شغلو الزفه وفتحو البوابه وكانت وراها نجد الي متمسكه بالمسكه حقها ورفعت راسها ع الكوشه وهي تسمع الاغنيه دخلت بفستانها الي كان يهبل عليها دخلت بهدوء والمصوره تصورها بدو الحريم يزغرطون لها ويصفقون وابتسمت نجد ووصلت للكوشه وقعدت بعدها بشوي تقدمو الحريم لها يسلمون عليها ويباركون لها والبنات يتصورون معها ومستانسين وبدو يرقصون عندها وسحبوها اديم وريما عشان تنزل ترقص وفلو امها وكادي شغلت اغنيه اجنبيه وقدحت من نفسها والحريم ناقدات عليهن لكن مزن قالت : بنات لاتهتمون ذي ليله ماتنعاد فلوووهااا
بدو يصارخون ويناقزون معها ويرقصون وامتلا المكان لان كل البنات جو عندها يرقصون
بعدها جا وقت الاكل وراح الكل ياخذ له صحن ويحط اكل ويرجع لطاولته ياكل وبعد ماخلصت ذي الفقره تكلمو بالمايك انه بيدخل العريس وكل الحريم لبسو طرحتهم وعباياتهم وقعدو بمكانهم
دخل فارس وهو يمشي بكل هيبه وثقه كان وده يركض لها لكن المصوره اشرت له انه يهدي وهو يمشي وبدا يمشي بشويش لحد ماوصل لها ورفع طرحتها وباس راسها وهو يقول : اخيرا
نجد :وش
فارس : صرتي حلالي صرتي لي انا بس
ابتسمت نجد وهي مستحيه ونزلت راسها ابتسم فارس لخجلها وسحب يدها ومسكها
ناظرت عليه نجد بعدها بدت المصوره تصور كم صوره بالسريع
خلص العرس ووقت الزفه فارس قرر يسوي حركته ووقفت نجد بالنص وماسكه الورد حقها وحاطه عبايه العروس عليها وطرحه وهي متوتره لكنها واثقه فيه وقف فارس بعيد وكانو اهله واهلها واقفين يناظرون من بعد دعس فارس البنزين وتقدم نحوها وكنه يبي يدعمها لكنه لف الطاره بقوه وصار يدور عليها وكانت المصوره تصور اللقطه وعيال عمه يصارخون ويعززون له امتلا الشارع بلون الكفرات حق السياره بعدها وقف ونزل ياخذها معه وراحو للفندق
راحو الفندق ونجد مستحيه بس تممو ليلتهم وبالصبح راحو يسلمون ع اهاليهم وسافرو لشهر العسل وبعد ماخلصو رجعو
_
مرت السنين واديم حملت وكان عبد الرحمن يساعدها ولما تتوحم ب شي بسرعه يجيبه لها بعد ماولدت جابت بنت وسمتها هيام كان فهد يحب يلعب معها بحكم انها اصغر منه وكان يحس انه مسوؤل عليها ويهتم فيها واذا احد ضربها يهاوش ويعتبرها اخته الصغيره وهيام نفس الشي كانت اديم توثق فيه لانه مايضربها وتحطها عنده من يومها بزر
بيوم من الايام لما كان عمر فهد سنتين وهيام سنه
قرر فارس انهم يطلعون مع بعضهم طلعه
وقال : اسمعو شرايكم نحط البزران مع امي وابوي وحنا نطلع للبحر بذا الشتاء ونولع نار ونقعد حولها ونسولف ونفلها
اديم : حلو والله
عبد الرحمن : قدام والله
فارس : برسل لريما وعزام عشان بكره نطلع
نجد : طيب
رسل لهم ورد عزام بسرعه وقال له انهم بيجون
جا صباح الرحله وكلهم تجهزو ع العصر عشان يروحون و راحت ريما مع عزام لبيت اهلها عشان يطلعون كلهم مع بعض
فارس : عزام انتم خذو سياره وحنا سياره احتياط
عزام : زين
ركب عزام السياره بعد ماودت ريما فهد عند جده وجدته وهيام وطلعو كلهم
عبد الرحمن : يلا مشينا
اديم : مشينا
ركبو سياراتهم ومشى عزام ورا سياره فارس لانه قال انه مجهز مكان يقعدون فيه
وصلو للمكان ولقو فيه جلسه تهبل وكان في كراسي ارضيه وفي مرايه وفي طاوله فيها العاب وكان في شاشه بروجكتر الي يشبكون فيها وتطلع لهم وفي سماعات واكل وكل شي مرتب
نزلو البنات يتراكضون يصورون المكان
نجد : فاررس متى حجزتت
فارس : لقيت حساب انستا يرتبون جلسات ب اي مكان تبونه وقلت لهم ابي بالبحر وبذا المكان ورتبوه لي
عزام: كفو يشيخ اي ذي الجلسات الزينه
ركضو البنات يصورون عند المرايه وجو ازواجهم معهم وصورو صوره جماعيه بعدين كل وحده قررت تصور مع زوجها بعد فقره التصوير قعدو يلعبون مع بعضهم ويسولفون
نجد : اسمعو كلنا جبنا ملابس شرايكم نلعب بالبحر
ريما : قدام
تراكضو البنات ووراهم العيال وهم يصارخون والبحر كان هادي مافيه احد اصلا لان فارس اختار مكان هادي ونادر احد يروح له وهو اكتشفه
نزلو للبحر والامواج كانت تجي على رجولهم وهم يلعبون ويناقزون
عبد الرحمن بغمزه وهو يأشر ع البنات والمويه : فارس عزام نسويها ؟
فارس : تم
عزام : قداامم
البنات ماكانو دارين ويلعبون مع بعضهم الا ويركضون العيال لهم وهم يرشون المويه عليهم ويضحكون
نجد بصراخ : يمهه
ريما : اوريكمم
بدو حرب بالمويه كل احد يرش ع الثاني تقدم فارس وهو يمسك نجد ويرفعها من خصرها عن المويه ويضحكون ومستانسين
بعد ماخلصو فقره اللعب راحو البنات يبنون قلعه والعيال نفس الشي وكانو مسوين سباق افضل قلعه والبنات ظبطوها
فارس : وشلوون ظبطتوها ؟
عزام : صارلنا ساعه نحاول وتطيح
نجد : we just a girls
عبد الرحمن : لا يشيخه عشانكم بنات يعني ظبطتوها
اديم : ايوا عندكم اعتراض لاسمح الله؟
فارس : اعتررض
نجد : وفر اعتراضك واذلف
ضحكو على فارس وبعدها رجعو وبدلو ملابسهم وراحو يقعدون بالجلسه حقهم وصلو المغرب وبدو ياكلون الحلا مع القهوه
ويلعبون بالألعاب الي موجوده والي كانت عباره عن تحديات واسئله ومسابقات ممتعه وحلوه
نجد : عندنا لعبه ( جلسه / لاتقول / الكذاب / بدون زعل ) كل ذول بنلعبهم بس وش تبون اول نلعب؟
عبد الرحمن : اي سمعت عنهم يلا سوي لعبه جلسه اول شي
نجد : طيب يلا اقعدو
قعدو كلهم وبدو يلعبون
بعد فتره من اللعب وختمو كل الالعاب وهم يضحكون ويصارخون وكل واحد يقول انه هو الفايز ويدخلون بنقاشات كثير بسبب اللعبه والي يجحد انه ما خسر وانه ما غلط
صلو العشاء وكان في حمام متنقل للي يبي يروح ويسبح حتى
فارس : تعلمت كيف اعزف ع العود تعالو اسمعكم
بدا عبد الرحمن يولع النار والي كانت بالنص وكان كل احد جالس جنب زوجته وملتمين ع النار يتدفون فيها
وكانت ريما ماسكه عصا وتلعب بالنار
عزام : تبي تعرف الملقوف حطه عند النار
ريما : شقصدككك
عزام : امزح معتس تفداتس العبي فيها بس انتبهي لاتحرقين نفستس
ريما : طيب
بدا فارس يعزف بالعود وكلهم منطربين معه ويغنون معه وكانت اصواتهم متحسنه وحلوه وكانو البنات يصورون كل شي يصير للذكرى خاصه ان اديم جابت كاميرا عشان يصورون مع بعض
طلع عزام مارشميلو وحطه بأعواد وفاجأ البنات واستانسو وبدو يحطونها ع النار وهم يسولفون
عبد الرحمن : شرايكن نقول قصص رعبب !!
فارس : قداام
نجد : لا اخاف
شدها فارس له وقال : انا معك يعيوني لاتخافين
نجد : خلاص اجل
اديم : يلا من بيبدا
عبد الرحمن : انااا
ريما : يلا عزام تعال
عزام : يلا جاي
جلس عزام جنب ريما وهو ماسك يدها وبدا عبد الرحمن يقول لهم القصه: ف يوم من الايام كان في حرمه تعيش لحالها هي مراهقه ومستقله وتشتغل حتى المهم كانت كل يوم بمنتصف الليل تسمع اصوات احد بالبيت مع انها تعيش لحالها وكانت تخاف لكنها نزلت مره وماشافت شي وجا اليوم الثاني واول مافتحت الباب طلع لها .......
قبل لايكمل كلمته صرخو كلهم بعد ماسمعو صوت قوي من ورا سياراتهم صرخ عبد الرحمن من صراخهم وضحك وقال : شفيكم لذي الدرجه تخوو..
قاطعته نظراتهم لشي وراه ويأشرون وهم خايفين خاف وهو يحرك بعيونه وكنه يقول وش لف الا ويشوف كلاب ثلاثه وراه ويصرخ ويحط رجله ويركض وقامو يلحقونه
نجد : تكفوون شكله يضحكك
اديم : يراسيي دحووم روحو ساعدووووه
ركض عزام وفارس عشان يساعدونه والبنات دخلو بالخيم وسكرو ع نفسهم وهم منكتمين من صراخ دحوم وصوت الكلاب
بعدها صار صمت
اديم : يمه ماتو ازواجنا
نجد : تستهبلين رجال وش كبرهم بيموتو بسبب كلاب ولاتنسي بينهم رقيب واكيد يشوف كلاب بالدوام
اديم : ليه كلاب بالدوام
ريما : ترا في كلاب يستخدمونها تكشف المخدرات عشان كذا في وخاصه الجمارك كم مره عزام يروح معهم
نجد : ايوا
انفتحت عليهم الخيمه وصرخو البنات لكنهم سكتو بعد ماشافو انهم فارس ودحوم وعزام
اديم : دحوممم بسم الله عليك صار لك شي؟؟
عبد الرحمن : لا الحمدالله بخير
اديم : يحياتي
فارس بضحكه: انقذناه
عزام : شكله كان يضحك الحمدالله اني صورت بتكون ذكرى ماتنسى صراحه
عبد الرحمن : خير احذف
ريما : لا لا خله بالله ارسل لي
عزام : ابشري
رجعو قعدو بجلستهم وهم يضحكون ع الاشياء الي صارت ومستانسين على ذي الطلعه ونامو البنات بخيمه والعيال بخيمه بعد ما قال فارس : خير ليش البنات لحالهم ليش مو كل وحده مع زوجها
عبد الرحمن : عادي
فارس : لا انا ابي زوجتي طيب
عبد الرحمن : اقول كل تبن بس
نجد : عادي فارس بنام مع البنات
فارس : لا
عزام : الا بتنام مع البنات لان مافي غير خيمتين يحمار
فارس بعد ما استوعب : اوووه ما انتبهت يلا روحو نامو
اديم : طيب
راحو ينامون وع الفجر قامو يصلون ويصورون شروق الشمس على منظر البحر وكانو قاعدين كلهم بهدوء وكان الاجواء تهبل ونسيم الهواء خفيف وبااارد رجعو نامو وبالصبح افطرو ع البحر ورجعو لبيوتهم
مرت السنين وكبرو فهد وهيام ونجد بعد جابت ولد و سمته سيف
كانت نهايه ابطالنا حلوه صح فارس كانت نهايته الاولى مو حلوه وخاصه انه حبه الاول ما نجح لكنه تزوج نجد الي عوضته عن كثير اشياء ويحبها اكثر من كل شي وعزام تزوج ريما بعد حب سنين وعبد الرحمن تزوج اديم الي حبها من اول نظره كبرو وكبرو عيالهم قدامهم صح دايم نسمع الناس يقولون الحب مو دايم ينجح وهم صادقين لكن اذا الي يحب شخص يعرف الحب صدق بتكون نهايته مع الي يحبها حلوه وبيتزوجها وعيالهم بيكبرون في بيئه دافيه وحنونه بيكبرون بحب بين اهلهم
قولو لي اكثر بارت حبيتوه او اكثر موقف حبيتوه بالروايه كامل 😂🤍
YOU ARE READING
صحيح غيرها في العذارى مزايين لكن وش جاب النجوم لقمرها
General Fictionقبل ست سنوات كان عزام ولد مراهق عمره 17 سنه وريما طفله عمرها 11 سنه كان يهتم فيها ويدلعها ويحبها من بين كل الاطفال لكن بعدين غابت ريما عن الديره ل ست سنوات وماصارت تروح لكنها رجعت وسمعت ان عزام صار عسكري ولما شافته ماعرف انها ريما ومن هنا بتبدا قص...
