هذيانٌ بين جمرٍ وجليد ..(ارملة اخي المجنونة)

62//

السلام عليكم
هذيان بين جمر وجليد
الفصل اثنان وستون
نورا ناصر

أنا ضائعٌ سجينٌ
بين رمشك والخدُ النَدِيَ
أنا لم أسمع كلماتكِ بَتَّ ...أطربُ بها كالنُوتة المُوسيقية
تُثملُ بها كل مشاعري...
بقلم noora-1995
لشرار وموج ..

****
إياك أن تُفلت يداً ترى فيك كل شيء وتثق بك أكثر من أي شيء..
****

فرح ..

بهتت ملامحي ، صرت اتنفس سريع .. خاف يجذب عليه .. !! لو ماخذني على كد عقلي ! اني لان احتركت وتشوهت ما يريدني هم ذول الزلم بس نوكع يتخلون عنه ..

توترت وصار وجهي يحكني واماكن الحرق الي بجسمي كله تكرص وتحرك بيه ..

كتله واني التقط انفاسي ... احمد ماحجة اني ما اصدك بيك علي .. جذب ممطلك تاخذني على كد عقلي مو ؟ ترة متعبر عليه ماريدك طلكني

رد بعصبية .. زعطوط كدامج واجذب عليج ليش بالله وبعدين ترة انه هم تعبت منج واريد اجر نفس والطلاق اشوفه افضل حل الي والج وهم جاي انفذ طلباتج طالبتني طلابة بعد لو تلعبين عليه

ماادري شصار بيه حسيت بعصبية اجتاحتني ، اديه مكدرت اسيطر على رجفتهم ولساني هماتين معقولة علي بسرعة يتخلى عني!!!

لو مايريدني لان احتركت لو لان اني مسبب للحرق وقتلت بنته ببطني! واذيت ابن اخوه باهمالي .. تساؤلات هواي اريد اسأله بس شي يمنعني

زين اذا هو هيج قاسي طلكني وتخلى عني ليش ماكملها واخذ دانيال مني .. احتاريت حيل شي ممفهوم بالسالفة

كتله زين ليش اني اخر من يعلم ليش ماكتولي ؟ شنو اني مالي قيمة ؟ لو لان احتركت صرتوا ماتعترفون بيه؟

ولج بووويه انه رجال مطلكج شلوون بالله اظل كل شويه مخابر عليج هم حرام عليه والله مايرضاها وتالي اخوج ماكلج انه شنو ذنبي انت واخوج تنجازون عايل بويه وياكم انه .

جريت نفس بعصبية .. علي وو ووينها ووينها ورقة طلاقي ؟ صورها الي

رد ببرود .. توصلج .. ماكعد اكض تليفونات واصور انه مافارغ رجال مشغول

اي كضيت عمرك مشغول واني اخر همك قابل جديدة عليه هاي والورقة اريدها اريدها توصلي هنانه بس شووكت ؟

رد بنفاذ صبر .. عن قريب ..

اي وبيد منوو رح تدزها ؟

رد بعصبية وتهكم ... بيد الشيطان الشييييطان نفسه هذا الي يوسوسلج ويخليج تخابريني حتى تتعاركين وتصعدين ضغطي وتغثيني وانه كاعد بأمان الله لا بيها ولا عليها

هسه شوكت تعاركت اني بس غير انته ممخليلي قيمة تطلكني من وراي ياشيخ ماصارت هاي ابد والله ماراح ارتاح اني منكم ..

رد ... انت كل الي صار بيج بسبب تصرفاتج ليش تنكرين ..وتشمريها براس غيرج

لأ ما انكر واعرف اني بتصرفاتي طلعت اسوء ما بيك ..

كال استغفر الله استغفر الله .. انتي تردين تعاركين موو ؟ سهلة اجيج لكركوك وتعاركي على كيفج بويه ...

من تجي جيب ورقة طلاكي وياك ..

رد يعني ترديني اجي ؟

اني راح اجفص .. كتله الله وياك ابو مهيب اترخص اني .. واسفة ع الازعاج وورقة طلاكي اريدها ومحكمة هم لاتطلكني غيابي اريد اتطلك مثل العالم والناس خوش الله وياك

صار بويه عندج اوامر ثانية انه حاضر تردين ارجعج على ذمتي ميخالف نلعب شنو ورانا نطلك ونتزوج كدامنا العمر كله

علي اني ليش احسك انت تعاملني مثل ما تعامل مخبلة لوو طفلة بس كولي ليش ترة اني الكفها وهيه طايرة وادري بيك دتضحك وتلعب عليه

لا بويه نكدر على ام جاسم احنه حتى نضحك عليها بس كليلي هسه التردينه شنوو انتِ مو كلتي الله وياك مرتين مو مرة وحدة وانه رجال عندي زلم جاي اتانيني
برة وكاعد هنا احجي وياج بس اريد اعرف شتردين ؟ وهم ماوصلت وياج لنتيجة

ها اي حجايتي ثكيلة صايرة اني بس ردتك تطلكني
مو كتلك

اي طلكتج بويه طلكتج وداعة خشمج طلكتج .. وورقتج هم توصلج وطلاك بالمحكمة هم اطلكج مثل العالم والناس بين قوسين مثل ماتردين

وهاي انه كاض ورقة وقلم وجاي اسجل خاف انسى وتزعلين انتي يابوية وانه ما ارضى على زعل ام جاسم

لا تكول ام جاسم كول ام داني ..

لا والله انه الي امداني ..

لا حشاك يله الله الله وياك طولت عليك ..

سديت التليفون جنت وحدي بالشقة ، احمد بالشغل وانين اخذت دانيال ونزلت تشتريله من المحل وهذا تعود يومية ياخذ الفلوس ويروح الها حتى تشتريله ..

كعدت وحدي وظليت ابجي .. واني على هالحال فاتت انين ووياهه دانيال واجت كعدت يمي .. هيه متعودة على النوح مالتي بس اليوم اني زدت بالبجي وتكأبت بالزايد ..

أنين ...

نزلنه اني و دانيال للمحل اشتريله ومن رجعنا ودا أصعد الدرج سمعت صوت ورايه يصيح بأسمي
..أنين ..

التفتت شفته جاي باتجاهي وديصعد ، توترت وخجلت هو صار هواي مشايفته بس هم نفس نظراته

صعدت كم بايه وبيدي دانيال عصرت ايده بسسبب توتري ..

اجه وكف صار يمي يباوعلي ، دنكت وخجلت ..
سألني شلونج اخبارج صار هواي مشايفيج ..

هزيت راسي وبلعت ريك وجاوبته الحمدلله زينة ..

هو دنك بوس دانيال وهو رفع ايده يشوفه السيارة االي اشتراها قبل شويه ..

هو ظل يحجي ويه دانيال شويه وبعدها استقام بوكفته واني دااصعد واروح للشقة هو وكفني بكلامه لمن كال بجدية انين سؤال ..

واني مدنكة وجنت اعرف سؤاله شنو بس هم كتله جواب ..

كال ماريد اطول وياج بللكلام ووكفتنه هنانه مو حلوة بس اني خطبتج هواي واريد اعرف ليش كل مرة جوابج الرفض ؟

رديت بارتباك اني مارفضك لشخصك اني ماريد اتزوج اريد ارجع للمدرسة واكمل دراسة

كال ميخالف ادرسي عندي اني مستحيل احرمج من دراستج ولا راح اشغلج عنها بالعكس افتخر بيج اذا نجحتي وتفوقتي .

بقيت ساكتة وهو كال يله روحي لتبقين واكفة هنا وياريت تفكرين ..

همست .. من رخصتك وصعدت لشقتنا .. دخلت شفت فرح كاعدة تبجي ..

رحت كعدت يمها ودانيال جان بعد شويه يبجي وياهه وصعد ع التخم ولزم راسها يبوس بي ..

سألتها ليش تبجين ؟
ردت... علي طلكني
جاوبت .. ياا صدك؟ شلون طلكج وانتي هنانه ..
_ طلكني غيابي انين غياابي

_ ها لعد انت مو جنتي رايدة تطلكين منه مفروض هسه فرحانة ليش هالبجي هذا ؟ موزين عليج

مسحت دموعها بظاهر كفها وكالت واحمد وعلي ضامين عني هالشي وهاي صار كم يوم موتوني ليش هيج يسوون بيه ..

رديت عادي هم معبالهم راح تضوجين لان اصلا انت طالبة الطلاق المفروض تتوقعينه بآي لحظة ...

باوعت بعيون دامعة ...
وكالت بغصة واصرار : ينه علاجي ؟
صار كم يوم متقبل تخلي علاج للحرق مالتها ..

رحت جبته وظليت اخلي على جسمها اماكن المحروقة تحديدا والي صايرة لونها بني فاتح وشي صايرة وردي وتختلف عن لون بشرتها الناصع البياض

وخليت على وجهه هماتين وكالت اريد انام شعلي السبلت احتريت ..

شون تنامين جوة السبلت هيج وانت ملابسة ملابس خلي ينشف جسمج من العلاج وافتحه

كالت نار نااار انين محترة حيييل جسمي كله نار

خفت عليها .. خاف مسخنه ، لزمت جبينها ، درجة حرارة جسمها طبيعية .. بس هيه يمكن لان مقهورة تحس هيج

واخيرا نامت بعد مانشف الدمع على عيونها ، اخذت دانيال وطلعنا من الغرفة ..

واني اسوي الغدة ، والشقة هدوء .. دانيال يلعب بالسيارة ويحجي وحده عود يحاجي فطومة ..

بعدها اجه وبيده لعابتي وعود يستأذن مني ياخذها يلعب بيها ويحلف والله ما اضربها

ضحكت عليه وكرفصت وبوسته بخده وكتله كدامك حبيبي فدوة الك يا روحي شتريد تسوي بيها سوي ..

وبقيت اسوي بالغدا وعيني عليه كل شويه وهماتين افكر واتذكر كلام احسان وعمر واربط حالة فرح والي صار الها

حسان يكولي شوفي الاحسن اني ليش اربط نفسي بالوهم

وعمر حباب وخوش ولد وعائلتهم كلهم حبابين وينحبون ويعاملوني معاملة زين مشفت منهم شي
مو زين ابد من اجينا لهنا لحد هسه ..

وبعد وعدني اكمل دراسة وهم من نوع مكملين كلهم يعني اكيد مراح يحرمني من دراستي وهذا المهم عندي

وقلبي غلقته وللابد وبعد ماكو مجال للحب بي .....

قررت انطي موافقتي لأحمد وأستعد لحياة جديدة ..

بقت فرح نايمة مدري تتظاهر بالنوم ودانيال هماتين نام وهو يلعب ، رحت اخذته وخليته بفراشه وغطيته ..

اجه احمد وسأل على فرح وكتله على كولشي ..
كال اووو واني نسيت اكللها على هذا الموضوع لزم جيوبه وكال المفروض هسه اني اشرد موو ؟ والله اذا كعدت تشمرني من فوك سطح العمارة لان مكتلها

عزاا احمد والله خطية هيه حيل مقهورة والله ليش استهانيت بالموضوع ومكتلها ترى من حقهه تعرف

تنهد وراح كعد على الكرسي بالمطبخ ورفع رجله وظل يهزها بتوتر ... ويفرك بوجهه

بقيت اباوع عليه .. واريد احجي وياه بموضوع خطوبة عمر وبقيت واكفة بمكاني هو حس بيه باوعلي
كال شكو بعد احس عندج حجي

بلعت ريك وكتله عمر مو خطبني ؟ بعدك انته موافق عليه لو لا

رفع اديه كال معليه اني القرار يمج انتي ..

رديت هذا هو اني موافقة ..

لهيب ...

كتلها خليها بجنطتج هسه وبعدين عود بالبيت نشوف شنو السالفة ..

من بعد ما رجعنه من السماوه هيه انطتني البيان وسويت جنسية لديما ..

واخو هدى ضل عدنه خطيه طفل ما بيها شي ما كاعد ببيت غريب كاعد ببيت نسيبه ههه

حلوه هاي مال نسيبه بس والله ما بيها شي خطيه خليني احتويهم هو واخته واكفر عن ذنوب صارت بالماضي وهو يتيم ...فأما اليتيم فلا تقهر...

الحمد لله هذا اني راضي بكون هدى زوجتي مهما كانت الظروف من طردني ابوي هي وكفت وياي وما تذمرت ولا حجت ولا فد يوم شكت ولو هااا هي ترى لسانها حيل طوويل...

واني هم جنت مو ادمي وشايف روحي بس من شفت ديمه ومن ابوي كطع عني الامدادات حسيت بقيمتها وحسيت اصلا بقيمة الحياة...

رحت اشتريت مسواك وجبت ملابس لاخو هدى خطيه اخاف ما عنده ...

رجعت للبيت دخلت لكيته يلعب هو وديمه ويضحك وياها ولا جنهم خال وبنت اخته هههه ...

خليت المسواك على الارض وكعدت على القنفه واني اباوع الهم ضحكت كتله...هلا بالخال وبنت اخته ...

رد عليه بطفوله...هلو عمو

ضحكت...ههههه ولك شنو عمو ولك اني زوج اختك كول لهيب كول ابو ديمه الي يعجبك

رد عليه بادب...لا عمو ميصير انت اكبر مني واني لازم احترمك...

مسحت وجهي بفخر...والله عمي محترم ما تعلم هديوه على الاحترام..

هي اجت من المطبخ لابسه ثوب اسود مخصر بارز ملامح انوثتها كالت بعصبية...شبيه عيني شنو اني مو مؤدبه وما عندي احترامات ليش تفتري عليه يا مفتري

ابتسمت بحب عليها...يالله مدري شبيه صاير مخبل عليها فجأة حبيتها حيييل واريدها واريد قربها احضنها بلهفه اضمها ابوسها انكون روحين بجسد...

جاوبتها بلهفه...لا عمي انتي اصل الادب والاحترام

مشت وهي تضحك واني مراقبها بعيوني وراحت شالت المسواك كالت...اي والله مؤدبه ومحترمه وترى اخويه تربيتي...

راحت للمطبخ واني وكفت اريد اروح وراها شفت ديما بيدها جنطة امها وتلعب بيها و خالها طلع الها اوراق وضلت تلعب بيهن...

بستها بخدها ورحت لحكت هدى...حضنتها من وره وهي انصدمت ما متعوده عليه هيج مسوي عليها تصحر وجفاف عاطفي

باوعتلي فاتحه شفايفها ومصدومه بستها بقووه وهي ضلت بحالة صدمه هسه يغمي عليها...

كالت وهي تضيق عيونها...لهيب مصخن ؟ تحس بشي ؟ بطنك توجعك كلبك ؟ احجي شبييك

تجاهلت كلامها ودرتها عليه حضنتها مره ثانيه واني اتنقل بملامحهها ...الاسود يليق بيكي هديوتي

ضحكت مندهشه...هههههه والله مو طبيعي اليوم شبيك احجي..

بستها مره ثانيه...والله حلوووه تردين الروح

هزت راسها وهي تخفي ابتسامتها الخجوله.. ههه الله يهديك وتضل هيج طول عمرك ...

جذبتها اليه ورجعت بستها...ان شاء الله ما تشوفين بس الخير مني وكل شي بالماضي ننساه ونعيش الخاطر نفسنا والخاطر بنتنا

نزلت عيونها بتنهيده...هذا الي اريده لهيب نعيش اذا ما الخاطرنا الخاطر بنتنا

ضليت كاعد يمها شويه وبعدها طلعت لكيت ديمه مخليه الورقه بحلگها وتعلس بيها...

ركضت عليها وطلعتها من حلكها لكيتها كارطه منها شويه مسحتها وهزيت راسي بعدم قبول فتحته بس ما قريت المضمون ورجعت صفطته ولزمته

صحت بغضب...ولج هدى انتي ليش هيج مهمله شوفي بنتج ماكله نص الورقه هذا تقرير مدري تحليل

طلعت من المطبخ وصاحت بعدم مبالاة...يمعوود تحليل صار اكثر من سنه اشمره بالزباله...

تافئفت بضيق يالله مهمله هل بنيه شنو اشمره بالزبل...

اخذته وطلعت برا اريد اروح عندي شغله ويه مهيب...

اول ما طلعت واشوف واحد جان واكف قريب من باب بيتي اول ما شافني مشه سريييع وركب سيارته وانطلق

جان لابس شفقه ونظارات شكيت بي بس بصراحه ضيع عليه الحسبه استغربت شعنده جان واكف بباب بيتي وبعدين هو منو

غمضت عيوني بعدم مبالاة...يله يجوز يكون شخص عابر مو مهم ...

ركبت سيارتي وطلعت الورقه من جيبي دا اخليها بالچكمچه بس اثار الفضول عندي فتحته وقريته

اتسعت عيوني مصدوم من التقرير ومن الكلام القريته واحس اصابعي كلها ترجف...معقوووله ؟ هدى ؟

موج ...

اجه الوقت الي يسافر بي شرار .. واني من قبل يومين عيوني انملت ملي دمووع حتى ماكدر اتنفس وهو يوعدني يكمل كل شي ويجي ياخذني وهماتين مقهور عليه

كعدت وياه الصبح اسويله ريوك طيارته بالعشرة وجانوا كلهم موجودين حتى يودعوا .. سويت الهم الريوك واني حتى استحي اروح يمهم ، صوتي ميطلع وعيوني حمرة مورمة

ام حسام اخذت الهم الريوك واني صعدت للغرفة ، كعدت على السرير واديه على وجهي

حسيت الباب انفتحت ، وخرت اديه شفته اجه ، جانت دمعتي ناشفة بس الدنيا طالعة من عيني

اجه كرفص كدامي ولزم اديه ويباوع لعيوني بقهر ..
كافي حبيبتي مو عيونج الاحبها راحت عفية كافي تبجين ..كلها كم شهر واني يمج

اخذت ايدي منه وفركت بيها عيني كتله سكتت والله روح تريك انته معليك بيه مدا ابجي ترة

كام على حيله وهو يسحبني كومي تريكي ويانه يله ..

سحبت ايدي لا عفية استحي والله اني راح ابقى ارتب اغراضك واجيكهم خاف ناسي شي

هز راسه وسحبني حضني حيييل وباس راسي بقووة واديه يخليهم على شفافه ويبوسهم ..

تجمعت الدموع بعيوني مرة ثانية ماعرف شون راح افاركه لو شلون راح اتحمل الافكار الي سيطرت من هسه

حيروح يمها .... هالفكرة تدمرني واحس نفسي داخل دوامة ضبابية ..

نزل تريك ووصعد وراها بربع ساعة مبين ماا اكل هوايه .. ورجع خلاني بحضنه بقينه على هالحال هوايه منرتوي من بعض ولا نشبع وشكد نريد نبقى هيج

راح سبح وبدل واني بس اباوع عليه عبالك اريد اترس عيوني بشوفته وكلما تقترب ساعة الفراق اني يزيد وجعي وعذابي

جنت مثل الي يعيش شهور على حلم جميل وبعدين يصحى على كابوس ..

خلص كل شي اني دموعي خلصت بهاللحظة هاي بس الالم الي بداخلي فضيع واحس من هسه اشتاقيت اله

لزم وجهي باثنين اديه وكال اوصيج على امي ديري بالج عليها ماشي

حتى لو تحجي ميخالف وكمل بغصة يمكن اليوم موجودة باجر لا

خليت ايدي على وجهه واداعب شعر لحيته بأبهامي ..
وحاجيته : بدون ماتوصي والله ..

اخذ ايدي وبوسها كال ادري بيج بنت اصول وهم اريد اوصيج على نفسج فدوة ماريدج تطلعين وحدج ابد ابد لو تطلعين ويه علي الدر لو مهيب وبس ماشي اخاف عليج اني

لزمت اديه وهزيت راسي لتخاف عليه مستحيل اكسر إلك كلمة طول ما اني عايشة

حضني حيل خلاني على صدره يبوس باديه وراسي جبيني ورجعت دموعي تنزل لا ارادي ..

وبعد وصاني على فطومة لان هيه بقت عدنا واني و ام حسام نداريها ممقصرين وياها ابد وهيه خطية يتيمة وامها متستاهلة تشمرها جانت عند الجيران وتعوفها بالايام ولذلك هيه صارت متستغرب ابد وتتعلق باي شخص تشوفه ..

اندكت الباب وصوت حسان من وراه يصيح عليه
يله وينك ترة مو وكتها هسه راح تتاخر ع موعد الطيارة

جاوبه من ورى الباب انزل جاي وراك ..

كتله حتروح ويه حسان ؟ والله اخاف عليك ...

لتخافين مايصير بس الي كاتبة الله ..

كال لازم اروح وهم لازم امر للشركة اودع علي الدر طالع من الصبح ملحكت اشوفه واسلم عليه ..

اخذ الجنطة واحسه هو هم مغصوب ع الروحة ..

اخذني من كتفي ودينزلني وياه .. وكفت خليت ايدي على صدره كتله برجاء فدوة خليني هنا تعبت والله

رد .. لا عمري امشي خلي اشبع شوف منج

خليت راسي على صدره بوسني قبل لنطلع ونزلنا جوة جانت عمتي لازمة بيدها كاسة مي

راح بوسها اديها وراسها ووجناتها وحضنها وهيه تبجي
وتشهك حضنه اثنينه اني ع جهة اليسار وهيه ع اليمين وطلع بينا برة

وراح ... سفره اليوم حسسني بضعفي .. بعدني اول يوم سفره وهيج متعذبة ..

وخاصة امه زادت قساوتهه ويايه ، تحملت شسوي امه ووصيته ادير بالي عليها ..

لمن وصل لروسيا يخابرني بس قليل وهالشي يعذبني بس ماحسسته اكول بداخلي ميخالف هستوة وصل وعائلته ومن حقه وحقهم يقضي وقت وياهم بعد شهور من البعد

بس اني ليش ارضى بالقليل ! احاجي نفسي نصيبي هذا شسوي ..

بعدها ظل يطلع ويخابرني يكول ابنه ذكي ويعرف عربي وحتى مرته هو معلمها

جان يحاجيني بمقهى وبقينه لوقت متأخر من ا لليل احنه نسولف وحتى جنت فاتحة ويا كام والعامل اجه حجى وياه وهو طلع

كتله شنو راد منك ؟ رد بضحكة راح يعزلون ..

كتله بقهر حاولت بجهد اسيطر عليه وعلى نبرة صوتي .. روح للبيت حبيبي غير مرة نحجي

كال لا راح ابقى هنا بالشارع احجي وياج

بقى كاعد على مسطبة بس مبين يطكطك من البرد وبعدين راح لسيارته واني تظاهرت بانو اني نعسانة بس احنه اثنينه نعرف بعض هو يعرف اني اجذب اريده يروح ويرتاح بالبيت ....

كال اوصل للشقة واسده وبقى يحاجيني لحد ماوصل للعمارة وصعد المصعد واحنه نسولف وصل لباب الشقة وكال وصلت حبيبي ...

سلمت عليه وغلقت المكالمة ، حضنت نفسي وظليت ابجي بجي بحركة وقهر

سمعت صوت التليفون ررن عبالي اخواتي ، بس جان هو مسحت عيوني حيل باديه وفتحت

جان يهمس كال باعي حبيبي راح انام بالصالة

ضحكت عرفته يريد يطمني واني ماعرف اذا جان راح يروح يمها ورى ميختم المكالمة او لا بس احبه واحب اهتمامه بيه ..

أنين ..

كاعدين اني وفرح ، هيه طاكتهه صفنة ودانيال يلعب ... دخل أحمد كال كلت لعمي عمود خطوبتج
كال يولون لا تنطيهم ما انطونا مرة من خطبنا منهم

كمل كلامه هو هذا عمي نفسه الشيطان بس عنده كرعة وشوارب ومرته الشيطان بس لابس حجاب هم دخلت ع الخط وكالت اريدها لسالم

طفرت فرح وياريتها ماطافرة .. نعم نعم انوب لسالم دم سنوني سالم ننطيها لحسان ولا لسالم

تحركت المشاعر بأعماقي مثل السجين الحاد .. تطعن بيه وتعذبني واني اباوع عليها بقهر

واحمد كال بعد حسان شنووو فرح شهالحجي هذا

خلت اديها على حلكها وتباوعلي بعطف .. كالت والله قصدي هذا شسمه شيسموو يعني حسان احسن من سالم

يعني القصد يا احمد اني شكد اكره حسان بس مو كد كرهي لسالم هم خبيث .... هيج يعني بما معناه ماعرف شون افهمك بس هو هيج يعني

احمد كاللها طخت طخت ورجع يطكطك بموبايله ..

واني بقيت احارب لحتى ماتوكع دموووعي .. ترخصت منهم ورحت للمطبخ وهيه اجتي ورايه لزمنتني وحضنتني وتلعب بشعري والله مو قصدي انين اني لساني يرادله كص والله بس اجفص مدري شون اسيطر على نفسي التووبة التووبة بعد ماعيدها

حضنتها وباوعت بوجهه كتلها بضحكة بس عيوني مليانة دموع ... ولا يهمج عمري

ظلت تدعيلي الله يكتبلي ايام مليانة سعادة وتوفيق ...
كالت اني تزوجت الاحبه وهم ماتوفقت وياه خاني وأذاني ماتحمل مرضي مستفاديت شي ...

تمتمت واني حاضنتها كلمن ياخذ نصيبه من هاي الدنيا ..

كالت اي صح هو القدر والنصيب يلعب دور بس احنه هم بادينا نرسم طريق حياتنا ومستقبلنا والي اريده منج هسه تفكرين حتى عمر صح خوش ولد بس لتستعجلين فكري اكثر

ضحكت بقهر .. لا بعد ماكدر اتراجع انطيت موافقتي لأحمد وراضية بنصيبي واني حاسة انو عمر قسمتي

مسحت دموعي بإبهامها .. واخذتني من ايدي رحنا للصالة يم احمد ودانيال جان ديعاركه يريد تليفونه ..

اجت فرح اخذت دانيال وانطتها تليفونها وراحت كعدت يم احمد خلت ايدها على كتفه وتهمس باذنه بتوسل .. ها حمودي شكلت ؟

باوع بوجهه اوووو فرح بالله لا تظلين تلحين مقصر وياج اني ؟

ممقصر وداعتك ممقصر صح اني حاقدة عليك وكارهتك لان ضميت عليه طلاكي من الشيخ بس انته حباب واني احبك

فرح هالشغلة مو زينه الج انتي ميصير تتقربين من النار والصيف هالسنة شاد حيله ويانه احنه نريدج تطيبين لو تتأزم حالتج بالزايد هالشغلة شيليها من راسج

هيه جانت تلح عليه وضايجة كلش بالببيت وشكد جان يلح عليها نطلع ماتقبل تضوج من الطلعة بسبب وجهه

كتله خلي اني اخبز الكيك بالفرن وهيه عليها الخبط ..

كال انت مو راح تتزوجين شلج بهاي السالفة

حجيت بقهر واني مدنكة واعصر بأصابعي ..
هو وين راح اتزوج هنا بعد عنكم كم بايه بس هه ..

وافق احمد وفرح جانت فرحانة حييل تسوي كيك تتعلم نودي للجيران منه ومرات ياخذ وياه للمطعم الي يشتغل بي ظلينه نسويلها ترويج وهيه ماشاءالله شاطرة ..

حتى كيكة الخطوبة مالتي هيه سوتها
وموج خبزتها لان اني جنت بالصالون اخذوني قبل يوم رحت عدلت حواجبي واجرت بدلة ..

بدلة جان لونها بنفسجي طوخ ع الاكثر عجبت سوزان اني جنت مثل لعابة يحركوها ماانطيت رأي بأي شي ابد بس طلعت حيل حلوة

وعمر هماتين مو قاصر حنطاوي عيونه جوزية لحية خفيفة شويه اطول مني وجسمه زين ... عقدنا .. دخل عليه جان لابس قاط زيتوني ..

تذكرت المجرم الاسمر الي جان لبسه اسود بأسود

كلما اكول ارضى بنصيبي تلزمني غصة ومرارة بحلكي والدمعة تتعلك برمشي غصب .. حسيت بقلبيى يتفتت ..

حاولت ابعد صورته عني ، لحظة قسوة حاولت بيها اقتل مشاعري وابتسم بمرارة .... والنار تلسع قلبي ...

تمت مراسيم الخطبة كلها ... ووراها طلع عمر وبقن البنات شغلن اغاني وظلن يركصن ..

من بين الاغاني جانت اغنية .المطرب السوري ناصيف زيتون بدايتها ..

بعرف بأنك ساكني..عايش بروحي مجنني
وجوا حبك آسرني وعم كابر ..

رغم القسوة الي بقلبك والتعب الي مرافق دربك
والبعد الي عشتو بقربك انا صابر ..

مش عم تزبط معي اعشق غيرك لا والله
مش عم تزبط معي اشكي لغيرك قول ال اه

حسيت هالأغنية تقصدني تمثل حالتي .. جانت الدنيا مو حارة بس اني بردت اسناني تضرب ببعضها .. دنكت اتوسل بالدمع مايوكع لكنه وكع غصب عني ..

بعدها توسلت بموج تبقى يمنه بس هيه بقت بس كم يوم وراحت اخذها مهيب وكالت شرار موصيها على امه ولازم تبقى يمها تداريها وجانت جايبة فطومة وياهه ودانيال كلب الدنيا يريدها خابروا على علي ترخصوا منه هو قبل وبقت يمنه ..

"كان الأمرُ هينًا عليك وكأنّك تخرجُ من غُرفة دخلتها توًّا، وكان الأمرُ شاقًّا عليّ وكأنّي أخرجُ مِن رُوحي"

ريلام ..

رحت ع النتيجة مالتي للجامعة واني كايلة لمهيب اليوم نتيجتي ورايحة اخذها

ولمن اخذتها وطلعت ناجحة الحمدلله .. واشوف سمير ابن عمي كال امج دزتني اوصلج للبيت ..

بقيت اتلفت انتظر مهيب لان تواعدنا نتشاوف ..

كتله روح هسه اني اريد ابقى يم صديقاتي ..

كال كتتلج امشي وحتى نحجي عندي موضوع وياج .. ظل يلح وحسيته حيفضحني ومهيب تأخر ، طلعنا خارج الجامعة ..

وجان يطلع مهيب .. سلم علينا كلنا ..

ومهيب كلي ليش ماكلتيلي اني اجي عليج اخذج للكلية وجان يباوع لسمير بنظرات عدم رضى ويرجع يباوع عليه ..

جاوبه سمير قبل ما اني اجاوب .. ترى اني خطيبها لو متدري بالموضوع

مهيب تفرعن الشيطان فووك راسه .. وكاله خطيبها شنوو ولك شلك بهالحجي وقبل ليجاوبه سمير مهيب ضربه بووكس على وجهه وتمالخو والتمت الناس وفارغتهم

ماحسيت بنفسي لمن طرت وياه مهيب وتوجه بيه للسيارة لازمني من ايدي ويركض بيه وسمير كاعد ع الرصيف والدم يطلع من وجهه

هذا بعده بس كال خطيبتي هيج سوى بي اذا صارت صدك شيسوي مهيب يطيح حظنا والله ..

اخذني بالسيارة شبعت رزالة ..حاولت اشرح اله
فرها عليه وانتي شوون تضمين عليه هيج موضوع وليش امج تنطيج اله واحنه شنوو طراطير يبووو
كال باجر جايب ابوي وجاي اخطبج ولا تحجيلي مشاكل ما مشاكل وامي وامي اكص لسانج اذا حجيتي والله كافي بعد ...

وظل يفتر بيه بشوارع بغداد ومعصب ... وصلني للبيت
راد يفوت يحاجي امي واني قنعته ميدخل وخلي يحاجي خالو احسن وهو اقتنع ..

وصلت للبيت شفت سمير كدامي جان واكف بالحديقة ويمسح الدم من سنه .. ومبتسم بحقد ..

كال تحبيه مووو ؟

كتله اي احبه لان ارجل منك انت شون تكوله خطيبتي منين اجاني خطيبتك ؟

اقترب مني كال تردين اشووفج رجولتي ؟؟ اطلع حليب امه الي شربتي من خشمج

فديته هو وامه للاسف طلعت اشاعه ممرضعتني ..

وماكوو داعي تفشل نفسك لان اني ارجل منك

ولا تكعد تكولي حليب امه عود تبسمر شوف اني افتخر اذا مرضعتني او لااا افتخر يكون اقرب شخص اليه ارجل منك ومهيب مو بس ارجل منك لا تاج رااسك هماتين ..

اقترب مني خازرني شلوون اقرب منج وضحي ولج ...

رفعت عيوني بتفكير....اممم يعني اذا طلع اخويه برضاعه فهو اقرب شخص اليه وما يرضى على اخته واحد يهينها. ويشك حلكه اليعتدي عليها

او اذا طلع مو اخويه بالرضاعه فهو حيكون هماتين اقرب شخص اليه لان حيكون زوجي وحبيبي ..

لزمني وخنكني بعصبية...انتي وحده وكحه وما تستحيين وتعترفين تحبينه وكدامي شكد ادبسز لعد وامه معرفت تربيج واني الي راح اربيج منا وجاي ..

ظليت ادفع بي وبثقه رديت ..شفت مو كتلك اني ارجل منك كدامك وانت ابن عمي واعترفت بحبي المهيب ..

خليته يكفر ويغلط ويتوعد .. دخلت جوة واني اعدل ملابسي .. لزمت موبايلي ودزيت رسالة لمهيب ..
يا شواربك يسون عمي وابن عمي وكل عشيرتنه شلع انت بس كولي احبج اترس العالم شمع

احترك عمج وابن عمج وجدج وياهم وباجر اجي اخطبج واشعل عشيرته االي يوكف بدربي ...

ضحكت وطبيت للبيت .. بس الي صار ابد ممتوقع ..

موج ...

بعد حفلة انو رجعت لبغداد ويه مهيب .. جانت الحجية قاسية ويايه حيل واني ميتة قهر ممسويتلهأ شي ابد احترمها واقدرها واداريها ..

تعبت وعفتها بعد لا ظليت اروح يمها ولا اشوفهه وجهي ابد ..

وخليت ام حسام تهتم بيها وتسوي الها الاكل ..

جنت بالمطبخ .. اجت ام حسام بيدها الصينية وبيها اكل وباوعتلي كالت الحجية تسأل عنج تكول وين مويجة ليش ماتجي يمي هالايام ؟

رديت عليها والله خالة تعبت اروح يمها ترزلني وتحجي على اختي كدام الكل واني افشل واخجل وحتى ما ار اردها عيب

خليت ايدها على كتفي يله ميخالف مرة كبيرة صدكيني كلساع تباوع للباب واذا دخل احد تكول عبالي مويجة

وهسه كالت جوعانة وديتلها هذا الاكل كالت منو طبخه ؟ كتلها اني كالت ماريده عبالي موج

دمعت عيوني ورحت سويت الها اكل ووديته الها هيه فرحت من شافتني ..

الايام الي بعدها تعلقت بيها وهيه هم تعلقت بيه هوايه .. صرت حتى انام يمها ولمن اخابر شرار يمها ابقى .. كله تصيحلي عزيزة شرار وتكولي يحبج وبس يحجي بيج ..

وبليلة جنت نايمة بصفها الليل كله ظليت يمها جانت تعبانة كولش ، سهرت عليها ، خابرنا شرار حجه وياهه بس هيه متكدر تحجي جانت كلامها قليل

كعدت قبل الفجر جانت يابسة وعيونها مفتحة ..

ظليت ابوس باديها تكعد وابجي

حبابة خالة لا تموتين شكوول لشرار اني فددوووة اكعدي فدددوة ةةةة

يتبع ..

الغلاف تصميم المبدعة noora-1995 يمثل انين وحسان عاشت ايدج نوارة

وهذا التصميم الجميل بنوتة من الفيس حنونه عاشت ايدج قلبي

اسفة البارت سريع سريع ماريد ابرر لاتكولون تعودنا على تبريراتج اسكت احسنلي ..

دعواتكم لهذا البيبي 😥حبيبي الضحكة الحلوة ميستاهل المرض الله يشفيك عمري لتقصرون ويا فدوة