شموخ

بارت 12

///شموخ///

بقلمي .... رونق السلطاني

✨✨✨✨✨✨

شرد اوصفك ..
وانتة وصفك مو سهل
خاف اكلك انتة روحي
وما يجي وصفي عدل
خاف اكلك انتـــــة ليل
واني ادري الليل بعيونك كحل
وخاف اكلك انتـــة طير
وتمشي عني وينكطع حبل الوصل
وخاف اكلك انتة ابوي وانتة امي
وابقى بعيونك طفل
حرت شرد اوصفك
وانتة وصفك مو سهل
💔

بعدما كمال كال جاين خطابه على شموخ توجهت الانظار كلها عليا
دنجت راسي خجلانه حيل وجهي اهجس نارر وتطلع منه ايديه مدري شبيها صارت ثلج وارجف كمت طلعت من الهول وشروق ورايه كرصتني من ظهري

شروق ... هااا مو كلتلج عينه عليج هالركض مو لله يله تا يزفونه بيوم واحد وتخلص امي وتگط ورانا سبع حجارات وبرميل مي

شموخ ... هههه يولي صار عندي مغص وجسمي يرجف حطي ايدج على گلبي دحكي شنون يدك حيل

شروق ... اي هو هذا الحب من اول عمليه واني من اول دقه جبناهم سحل لدار لاصفكه ولا حنه

شموخ ... ضليت افتر بالغرفه مخبوصه وروحي ترفرف شنون فجأه حتى عمه ما خابرت ولا كالت شي 

صاحت امي علينا  كتله شروق روحي انتي شوفيها شتريد

- امشي نطلع سوه شنهو راح اضلين محبوسه هين امشي اطلعي مو من هسه  كل شي ينگط براسي

دفعتها وطلعتها من الغرفه  كلبي يرجف مابيه احجي كلمه شوفيها شتريد وتعالي بداعت قدوري

وكفت كبال المرايه ادحك بوجهي صاير احمر مره ابتسم ومره تخنكني العبره وادمع عيوني ياربي مو مصدكه

شروق ... يله يعروس امشي نرتب البيت والدوانيه ما ضل وكت وامين وكمال راحو للسوك وام غالي وجدته خابرو على امي جانت تحجي وياهم باليل الساعه تسعه يجون

- عجل نزال وين شو ما جى

- شمدريني بي وين يروح هذا حتى مرته متدري بي امشي خلي نخلص تا تسبحين واشسور شعرج

بديت انظف وايدي ما تاخذ عالشغل غير يهدء گلبي

للمغرب خلصنا وسوينا عشى من وگت
كحلت عيوني وطبيت سبحت لبست  كلابيه وعدلت الكحله وحطيت مسكاره اعشق الكحل والمسكاره روحي بي
نشفت شعري وشروق سحبته بالكاويه ورفعته فوك ما اشتهيت
اكل شي ما جاي اهدء ابد

بخرنا البيت وحضرنا كل شي كاعده على نار واستحي اطلع من الغرفه

جى امين يضحك كال ... غالي خوش زلمه بس شنهو ذنبه ياخذ وحده عيونها عيون الهايشه

- هيج اشوفني يول عود اكول انت الحنين واحسن واحد بيهم منيلي هايشه يمصگوع شو طويله ورشيقه واذا على عيوني هاي يسموها عيون غزال المها مدري غزال الريم بس انتم متعرفون غير الهايشه وينكم وين الغزال

- ايباااااه ليسمعج يكول جايه من عرب الشيخ وضاح ماتعرفين
غير الغزلان والحصن جكمه ام كفشه

بعدنا نحجي وطب نزال يرعد وينها ول هين شموخ

امين ... خير شبيك صوتك عالي

نزال ... وخرر انت هم كوا**** ماخذهم يطببون لو
يتمعشكون شسويتو بغداد هاا احجي

امين ... عيب عليك هالحجي شسامع انت شو مدري شنون تسولف

نزال ... ليش الا هسه جاي يخطب لو ما صاير شي احجي وين شافج شحجى وياج

هم نفسه عليا يريد يضربني وامين صار بينا

جتي امي كضبته من ايده كالتله شبيك انت جاي شايش علينا
من برا اختك وياي واخوك شنهو مو بعينك وتكول كوا****
ما تخجل الزلمه ما رفع عينه ولا شفنه شي منه مو زين
وخلف الله علي وكفنا لنا

نزال ... لو مابينها وبينه شي  ما اخذكم لبغداد ويفتر بيكم مو
لسواد عيونكم شمدريكم بي شسوا ما سوا من وراكم وياها

كمال ... الله يفين حضحك هاي عود انت الجبير من انت بغداد جان رحت  عليهم تكفلت بيهم وخليت الزلمه يروح شو الفلوس الى هسه ما طالبنا بيها ولا انت لخجلت من نفسك ورحت اتشكرت منه وحاسبته هسه جاي تتهجم على اختك جيف جى خطبها

امي كالت ... عجل البنيه شنون تنخطب لو اهلها يشوفها لو هو يشوفها هذا كمال هم عندا علاقه وياها شافها وعجبته ورحنا خطبنا وهاي شروق  لتسوي بلبله والناس راح يصلون

نزال بصياح ... بس يجون اطردهم مالهم مره يمنا  ازوجها لثامر

كمت الطم على وجهي واجبي احرك نفسي وما ازوج ثامر

نزال ... هاا شفتو ابن عمها متريده تريد هذا الدايح بغداد

امين ... انتي اسكتي لتحجين

امي كالتله ... عجل انت مو دايح بغداد وعايف مرتك وبنواتك بركبتي مو رحنا وشفنا بعيونه كاعد بشقه وابن عمه ويا وشغلهم هناك

كمال ... نزال كافي هسه تجي العالم قابل راح نوافق نستقبلهم وراها يصير خير امشن خلصن وحضرن جاي وانت امين روح افتح باب الدوانيه ودي الكهوى والمي

كعت مهدود حيلي خايفه وابجي خرب عليه فرحتي شسوي
هسه شروق كليلي گلبي يوجعني وخايفه منه ليفشلنا جدامهم

- مدري هالمصگوع عبالك هو مو دايح بغداد وعايف بنواته علينا
كحلتج سالت صرتي صدك هايشه كومي عدليها هسه بس يدحكون بيج يطكون نعالاتهم ويفلتون

- هههههههه لا ميفلتون يحبوني

- واضح يموتون عليج كومي عدلي خلقتج راح اتصير بتسعه

كمت عدلت عيوني ومسحت وجهي شربت مي نشف حلكي
من ورا الحقير مايوم حجى كلمه بيه خير شنون طب يصيح
وجهه ينكط  حقد وغيره

سمعت صوت امين يكول تفضلو يمه تعالي

طلعت امي تسلم عليهم وطببتهم للهول

جده شيخه كالت ...وينه وينه بنيته

شروق ... هاينها بنيتكم كومي عيني يبنيتنا يريدوج

ضحكت عليها يولي دحكي خمو اكو سواد بوجهي

- كلشي ماكو كطن ويلصف بس اطلعي خلي تفض على خير

حطيت شال على راسي  وطلعت  كلبي يدك وخجلانه افرك بيدي

طبيت كلت السلام عليكم  دنجت على جده بوستها وبست راسه شكد احب عطرها لو بس اعرف شنهو اسمه جان اشتريت

عمه عاليه بوستني وتضحك وامه صلت عالنبي عين البارده عليج

كتلها تسلمين عمه  وخواته اثنين وحده وياها جهال والثانيه هادئه وصوته ناصي بوستهن وكعدنا

جتي شروق سلمت عليهم وكعت بصفي شاورتني عمامج اجوي الله يستر وقدوري وياهم رعد رجل عفاف همات وياهم

اسكتي شروق اهجس راح اتخربط مغص بطني ومعدتي راح تطلع من حلكي ما اريد اسمع شي

سعدون ... الله بالخير عليكم ي وجوه الخير

الكل .. الله بالخير

سعدون ... نفتح سالفتنه وياكم بالصلاه على محمد وال محمد

الكل ... اللهم صلى على محمد وعلى ال محمد

سعدون ... الله سبحانه وتعالى يقول بكتابه العزيز : {وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً إِنَّ فِي ذَلِكَ لآيَاتٍ لِّقَوْمٍ يَتَفَكَّرُون}
صدق الله العظيم

والرسول عليه افضل الصلاه والسلام يقول :
(تُنكَحُ المرأةُ على مالِها وتُنكَحُ المرأةُ على جمالِها وتُنكَحُ المرأةُ على دِينِها خُذْ ذاتَ الدِّينِ والخُلقِ ترِبَت يمينُك) صدق رسول الله صلى الله عليه وسلم

الكل .. عليه الصلاه والسلام

وما نلكه احسن من بنتكم دين واخلاق واحنى اهل كبل گلشي ودمنا واحد وجيناكم اليوم بحكم الكرابه والدم  نطلب كريمتكم لأبنا وابن اخوي غالي  وان شاءالله ما تردونا والي تامرون بي  احنى حاظرين

امين ... فاك حلكي على سوالفه حلفت بس اخطب الا اخذه هو يخطبلي  ادحك على على عمي حامد رافع خشمه ومنتجي
عالمخاد ويطك بسبحته كل خرزه بكبر خشمه ولونه
اصفر كركم تنحنح وعدل كعدته وكال

حامد... والله يا سعدون ذيج السنه جيناكم ذيج السنه ورديتونا ومن ذاك الوكت صار بينا كطع وهديتو علينا بالسلاح وصارت مچاتل

وزوجتو بنتكم  بديره بعيده من هين مدري المن انطيتوها وبذاك الوكت
جنت رايدها وكلتلكم شطلبون اني حاظر وانت بنفسك هديت عليه بسلاحك

وراها من مات ابوك جينا وعزيناكم وكلت هذا موت مابيه شماته وهم اهلنا والظفر ما يطلع من اللحم وضل السلام دارج بينا 

وهساع جايين تخطبون من عندنا واحنى عندنا ويلاد بعد ما زوجناهم شنون ترهم ي ابوعناد

سعدون ... ابو رعد السالفه قديمه فات عليه جثير سنين وهساع صرنا اجداد واحفادنا بطولنا وانت جاي تفتح دفاتر عتيجه نسيت انت شسويت وعليش اني هديت عليك بالسلاح  خلي السوالف تولي واحنى ولد اليوم وسالفتنا ماله دخل بخطبتنا وبنتكم اني جاي خاطبه لأبن اخوي مو لأبني ولا انت الك راي ثاني ي حمود

امين ... عمي حامد كاعد ويخوط بسوالفه  وعمي حمود شوي ويطير من النفخه ول عليش يعمامي ليشوفكم يكول وزراء

حمود ... راي من راي اخوي واخوها الجبير واشوف ابني ثامر يمكن يريدها وانت تعرف هو ابن عمها واولى بيها من ابنكم

سعد ... واذا ابنكم ما رادها وهي ما هوته شنهو تجبروهم تا ما تنطونا مره

حامد ... احنى  بنواتنا  ما الهن جلمه من بعد جلمتنا

طيبان ... بس هالشي مو صحيح كلنا زوجنا بنواتنا واخذنا رايهن وانطيناهن وكت يستخيرن ويفكرن وهذا زواج عمر مو يوم ويومين

نزال ... غالي عليش ما جى وياكم شنهو مستحي يخطب

سعدون ... غالي رجال من ظهر رجال والمستحى مو من اطباعه  وغالي يعرف الاصول عدل  الكبار تجي وتخطب  وبحكم احنى اهل وما بينا كلافه 

واذا تريدو هو يجي من باجر نجيبلكم ميشه تسد الشارع وهوعلى راسهم اذا احنى مو بعينك ي نزال

حامد ... نستشير ولد عمها  ونردلكم خبر

سعدون ... عجل احنى نترخص

كمال ... استريح عمي مو هيج الحجي عمي حامد خطارناما يطلع زعلان من بيت ابوي

سعد ... عشت وسلمت مو زعلانين وحگ يشورون ولدهم

كلهم  كامو وانتفضو  طلعو والوجوه مگدره

شموخ ...كاعدين وام غالي تسولف على ابنها صارلها اسنين تريد تزوجه  تحجي بفرح وطاير عقلها الى ما وصلت بابكم واني ما مصدكه جايه اخطبله

امي كالت ... كل الهلا بيكم وابنكم خوش زلمه ما گصر ويانا ونعم منه وكفلنا وكفه ولدي ما سوم الي سوا النا

جده شيخه ... ما مسوي الغربه ام نزال واحنى اهل وبنيتكم مثل بنياتنا انحبها ونريدها جنه بيتنا 

عاليه ... بنواتنا شكثرهن وكلهن بيهن الخير ومعدلات بس هو يكول اشوفهن خياتي شو من شاف شموخ هي الوحيده ما كال عليها اختي والله ما صدكنا الظهر من كال زوجوني شلع گلب امه يله كال رايد شموخ 

صاح امين حجيه الجماعه متانيكم برا

كامن وجده شيخه وجها انعقج  سلمن وطلعت امي وراهن

الولد وعمامي كلهم دخلو للهول من شفتهم خفت لان وجيهتهم
متبشر بخير كل واحد شايفه نفس مدري على شنهو

كال عمي حمود ... خلي يوولي ما ننطي ناخذها لثامرنا

نزال ... مو كلتلهم ثامر ياخذها

كمال ... عمي ما اجبر اختي اذا كالت لا وثامرنا لا شغل ولا مشغله مكضيها طربكه ومو حمل مسؤليه

حمود... يزوج ويعگل وكل الشباب هيج البنيا بنيتنا وما تطلع لغريب

امين ... هم مو غربه كرايبنا ولد عمامنا وغالي خوش ازلمه ما يرفض واني اشوفه مناسب

نزال ... انجعم زعطوط  لتدخل

قدوري ... ثامرنا طايش مو مال زواج عمي حمود ترى خوش نصيب لتشيل خطيتهم

نزال ... ثامرنا اولى بيها خلي يولون

ادحك عليهم عبالك طوبه بديهم واحد يگطني عالثاني ويقررون بكيفهم اشتعلت نارر

حامد ... مثل ما طردونا ذيج السنه نطردهم ومالهم مره يمنا

دحك عليه وكال  اي يابه تقبلين بثامرنا ابن عمج اولى بيج
هساع نقره فاتحتهم وباجر نكطع المهر

تخبلت كمت من مكاني ارجف كلتله احرك نفسي ولا اقبل بي

كام نزال وضربني بجف ايده على حلكي انشكت شفتي
وخشمي نارر والدم يطفر حطيت ايدي على حلكي وطلعت
جرني من شعري حيل اهجس ركبتي انخلعت يغلط ويفشر

حمود ... حيل بيها خلها تتربى واكفه وتشالط ما تستحي فاصخات الحيى مو هاي اختج قبلت بقدوري

امين فكني منه وكمال دفعه
قدوري كال ... مالك حگ تضربها
ما كالت شي عمي حمود اني مو مثل ثامر كلكم تعرفو وتعرفون ادروبه وهاي همات بنت اخوكم عليش تظلموها ويااا

اخذتني شروق غسلت وجهي وخشمي ينزف ونارر تسعر بگلبي

نزال بعده يصيح ويغلط يتهدد عليه يريد يضربني وامين
واكف بصدره تخبل شنون ضربني 

صاح علينا اصعدو فوك واقفلي الباب

ركضنا للغرفه وشروق قفلت الباب كعدت ابجي روحي مفرفحه

شروق ... حطي كطن خشمج ينزف الله لا ينطي طابك ويه عمامه
غشيم هو ما يعرف ثامر شنهو من بشر

احرك روحي وما اخلي ثامر يگضب شعره مني
اريد تلفون امي روحي جيبي ابوس ايدج شروق

- شسوين بي غير افتهم شنون احدر يولي اسمعي حسهم عالي

- خلي يولون وروحي جيبي بعدين افهمج

ضلينا كاعدين تقريبا ساعتين وصار هدوء مبين راحو اركضي
جيبيلي التلفون

راح احدر كومي اقفل الباب خاف يطب عليج يضربج

طلعت صار بوجهي نزال كبل قفلت الباب

يدك بالباب افتحي افتحي ساقطه ك***** ما تريدين ثامر مو
عاجبج هذاك عبن فرفرج بغداد شسوالج هااا

ارجف ارجف وابجي كلامه يوجع الگلب كلتله ... اگط نفسي من فوك السطح ولا اقبل بثامر هو الساقط مو اني هو ليدحك علينا بعين نكسه وما احترمكم ولا  يكول بنات عمي وعرضي

يدفر بالباب حيل ويحجي لو ما شايف منج شي ما دحك عليج
شعندج ويه غالي هااا

ينمرد گلبي من يكول اسمه كلتله ...  كل شي ماعندي ويا ولا رفع عينه ونظرلي نظره نكسه يسوى راس ثامر النكس

تخبل اكثر من كلت هيج هجم الباب هجم خفت ليكسره ويطب
عليه صعدو الولد عليه اسمع صوتهم  امين وقدوري
وكمال كال هسه اكطك من فوك ونخلص منك شبيك
متخبل علينا 

يدفع بيهم هدوني اليوم اموتها دكول يسوى راس ثامر
الكح**** شمسويلها شاف منها 

امين دك الباب ... شموخ افتحي خلي نفتهم ما اخلي يضربج
ورح ابويه

فتحت الباب وهجم عليه كضبه قدوري وجتفه كال احجي شحجيتي

وكفت ورا امين كلتله ... يكول عليش ما تقبلين بثامر وكلكم تدرون بي
احنى بنات عمه وعرضه يدحك علينا بعين نكسه وما يحترم يجفت جفت على غرفته امي جم مره سواها

ويتهمني ب غالي شعندج ويا اخذج لبغداد يفرفر بيج الزلمه اخذنا وطببنا وما رفع عينه علينا ودحكلي بغير نظره مثل ثامر النكس

اموت وما اقبل بي

يكمز بين ايدين قدوري هدني عليها يول  انت هم مكرن مثلهم

قدوري ظغط عليه حيل نزال صاح اااخ خلعت اديه وخرر ولك
دكلي يسوى راس ثامر هدني تا ارعط حلكه بالقندره الساقطه

دفعو وطلعو برا وامي واكفه وتعظ على اصبعه وتصيح عليه
اسكتي لتردين عليه يهوبز لحاله

طبت شروق وقفلت الباب طلعت التلفون من صدرها اخذته منها
اريد اطلع الرقم مكدر اعصابي ترجف

شروق ... جيبي راح ينكسر التلفون هو صاير گرگمه خلي ساتر علينه وين تريدين تخابرين يمصگوعه

- طلعي رقم عمه عاليه ودكي عليها بالعجل ولتسألين شي ما بيه احجي كلمه

- الحظ المعثر التلفون مابي رصيد حتى رساله ما يدز

كعدت ايدي على راسي وابجي للصبح ما نمت روحي لايبه
شروق كعدت وحدرت جوه واني قفلت الباب

دحكت الساعه تسعه واسمع حس الصياح مرت عمي حمود
فتحت الباب وكفت اسمع هاي شبيها جايه من الصبح هداده

عروبه ....بنتكم مريضه لتگطوها على ابني ما اخذها جنه بيتي لوبس هي تضل بدنيا هالزيجه متصير لو تموتون

امي كالتلها ... ومنو منطيكم مره رجلج وابنج وابني وياهم
مطربك خوش نصيب اجاها عليش يكفون بوجها تريدوها تعالو
اخطبو مثل الوادم مو تنفتنون بنزال وتخلو يضرب اخته وهساع جايه هداده علينا

بسمه ... متدرين شسون البارحه صار غالي يسوى راس ثامر
يمه عوفيهم خلي ابويه وثامر هم يصرفون

حدرت من فوك تخبلت ماضل عگل براسي من سمعتهن

عمه انتي جايه هداده علينا من الصبح ابنج ما اقبل بي لو يموتوني
روحي على رجلج وابنج احجي وياهم مو جايه هين ماده لسانج

امين عالصوت كعد جان نايم طلع من الغرفه شعره كفشه
وجهه مطبع ومطعج احمر العيون وحده مغمضه وحده مفتحه
لابس بجامه وحده مرفوعه للركبه والثانيه نازله وفانيله علاكه

من شفته صديت بصفحه شكثر جنت مقهوره ماكدرت
اكضب نفسي الا اضحك على شكله
وهو يكول الله يعثرجن شبيجن من صباح الله خير
لا اجلن ولا تملن

امي كالته ... عروبه جايه هداده علينا متريد شموخ لثامر

امين ... ومنهو كال ننطي شموخ لثامر سدن الحجي وانتي
امشي سويلنا زقوم اشر عليه

اوف ارتحت وبرد گلبي طلعت وهي فشلانه

سويت رويوك وكعدت نتريك كلته امين ... بشاربك اني لتزوجوني
لثامر اموت نفسي وروحي ابويه ما زواج اريد ادرس

امين ... اسكتي ولتلجين ولسانج اگصري شوي شيحجي نزال
لتردين عليه من يجي اقفلي الباب

امين فدوه لتتأخر برا ارجع من وكت محد يفزعلي غيرك خاف
عمي يجي ويزوجني بذيج الساعه تجي تلكاني ميته

- انجعمي ولتهوبزين لتموتين هسه اريد اضحي بيج بالعيد

ميخالف اقبل اضحيني بالعيد ولا ازوج هذا راسه جنه تاير محروك وكل سن بكبر سمجت السردين لو خشمه عبالك معلاك صخله

ما احس غير هبده على ضهري انكطع نفسي وهي تكول ... ما جوزين لسانج يمصگوعه هسه يجي يطرج وصلتين استري
علينا كويه ااااخ شينكدرلج

واني شحجيت يمه فكيتي ظهري مو ايد عبالك جاكوج ابو الخمسه

دك تلفون امي خالتي سعاد وامي مبين عليها مقهوره
وضلن يسولفن وامي حجتلها بتفصيل شصار

كملت تنظيف البيت وامي ركبت الغدا صعدت فوك وقفلت الباب
للظهر شروق جابتلي غدا وكعدنا ناكل

شروق ... شكو عليج نابصه فوك ولغدا يجي ليمج شروق صعدي الغدا وشروق جيبي مي وجاي خدامة الخلفوج

هسه لو قدوري جان هم كلتيله خدامة الخلفوك او تركضين
جدامه وشوفني اني معدله اكلج امي ما اشترت رصيد

مدري ما شفتها لتهيت اشتغل شسوين بي شموخ شعندج وياهم

قفلتي الباب

اي قفلته تلث طكات احجي شعندج

امانة الله ورسوله عليج بروح ابويه اذا حجيتلج مدكولين

انجبي واحجي قابل راح افتن عليج

وحجيتلها كل شي  شفتي ويريد يزوجوني لثامر

ياكلون تبن شجاب الثرا عالثريا  والله من شفته بالمستشفى
جنت حاسه اكو شي جان مبين مهتم وما تركنا بس تدرين
عجبني عفيه عليه والله مسيطر ولا رفع عينه ودحك عليج
هسه انزل بلجي اقنع امي ادز على رصيد لو اطلعلي حجه
هم لو هذا المصگوع جايبلي تلفون مرتين كال راح اجيبلج
وما جابلي

شسوي بس اخابر عاليه وابلغها واشوف شيصير

خلصت غدا ونمت تعبانه كعدت على صوت حلا تنده بيه
كومي يالعروس ابو لحيه لمدوخ العذاره طلع عينه عليج

كمت افرك بعيوني .. شجابكم يولي شنونج

جينا ويه امي جابنا نوفل صدك خطبوج والله فرحتلج من كالت امي

اي خطبوني وعمامي ونزال ما يقبلون شفتي يريدون يزوجني لثامر

الله يصگعهم ويعثرهم ماكو غير ثامر خمو موافقه

اموت ولا اوافق  امشي خلي نحدر مشتاكه لخالتي

غسلت وجهي وحدرنا سلمت على خاله ونغم جانت كاعده

جان دكول بنبرت حقد وشماته ... مو كلتلج لدحكين فوك
تنكسر ركبتج اكص ايدي اذا ما انطوج لثامر هههههههه

رديت عليها بغضب ومنا روحي طالعه ... ازوج لي ازوجه
انتي عليش معطبه ودخانج طالع شحارك گلبج

خزرتي وعيونها تريد اطك وتنافخ ... عبالج ما ادري بيج
تتختلين ويا بزرع كلما تجين علينا بحجة تطلعين تتمشين
الله ليعلم شنهو بينج وينه وشمسويلج

من كالت هيج تخلبت كمت عليها فركت حلكها وجزيت
شعرها طحت بيها دك

امي وخالتي يردون يفكوها مني ما يكدرن طلعت كل قهري بيها

خالتي تصيح شكو شبيجن انجلبتن

سحبتني شروق وحلا

يولو وخروعني خلي اطر حلكها جايه عيني عينك تتهمني

خالتي كالت ... شبيج مجلوبه عليش هيج سارده حلكها

تستاهل خاله دكولي شمسويلج شعندج ويا وتتهمني
كلما اجي عليكم اروح اتختل ويا بزرع

طب امين كمال ونوفل وياهم  سأل شكو شبيجن

جنت منفعله حيل وارجف كلتله ... اختك جاي تتهمني يا يوم
شفتوني اختل بزرع واتواعد شنهو بس اني انخطبت

امين تخبل كال لخالتي ... احتراماً الج ولا جان فركت حلكها

نوفل ما رضى سحب نغم وطلعها برا وكال لامه وحلا يله
امشن منجتونا الله لا ينطيجن

باليل اجوي عمامي ونزال وياهم طول اليوم مدري وين جان
وطب ثامر شاكت الحلك وينها خطيبتي

من شفته لعبت روحي منه واكفه باب غرفة امي
كلتله ... امشي ولي من هين خطبك ملك الموت وخلصنا منك

يدحك عليه وعيونه كلها شر يمسح على شواربه
كال ... ول ول ول شموختنا لسانها طولان ولازم انكصه
يله تهيري هسه نكطع مهر ونطب اهينه اكص لسانج بطريقتي

تكرب وكف يمي دفعته ... وخررر من هين دير بالك تتگلط
عليه تفوو عليك يا حقير

ضربتي راشدي اهجس بشرتي اتشكتت كمت اصيح وادفع
بي حيوان جلب والله لو تموتني ما اقبل بيك

امين كبل انطى بوكس وكمال دفعه برا ونزال يريد يضربني

امي ضربتني كالت .. متعرفين تنلصمين واسدين حليكج
بين ما تفض ونخلص بنت الزماله مو راح تموتوني

سميه جتي وكفت متخوصره كالت ... وشبي ثامرنا متقبلين بي
لو جيف ما عندا لحيه وكذله

عفتها وطبيت للغرفه

صاح عليه عمي حامد كال تعالي هين تا انشوف عليش
ما تقبلين بأبن عمج شبي شناقصه

مسحت وجهي وعدلت شالي وطبيت عليهم بدون ما اسلم
كلتله عمي حامد وكلكم تسمعون لو ادكون لحمي ولحمه
بالجاون ما اقبل بي

كال عمي حمود ... ول عليش غير نعرف

كلتله ... هساع فات ضربني ويكول بس نكطع مهر
نطب اهينه بالغرفه اكص لسانج بطريقتي احرك روحي
هسه جدامكم واخلص منكم

كام نزال من مكانه ردم بوكسات مدري منين تجيني الضربه
ويدفر برجله تكورت على نفسي خفت لا يضربني بطني

وثامر يكله حيل بيها تساهل تا تتربى

الا قدوري ضربه بوكس ودفعه لطخه بالحايط يله فكوني منه

كومني امين

كال عمي حامد جيبو الشيخ نكطعلهم مهر هساع
هاي راح تمنجدنا

ثامر كال هسه اروح اخذ سويج سيارته وطلع يركض

غالي ... هاا مبين الوجه لابسه الجينكو شصار شبيكم

سعدون ... شكول شحجي هذا حامد كاعد يدور سوالف عتيجه

دحكت على ابويه وجده سوالفيش شبينكم وبينهم ؟!

سعدون ... ذيج السنه بحياة جدك راد عمتك نوفه وخطبها جم مره وجدك منطى حامد بذاك الوكت مثل ابنه ثامر سربوت وطايح حظ
لا شغله ولا مشغله مكضيها يتختل بالزرع ويتحرش بالبنوات ماوحده بيهن خلصت منه وابوه الله يرحمه جان يشكي منه
يكول راح يموتني ناقص عمر نزل راسي
ولطخ سمعتي بين العربان

جدك كاله عجل شنون انطي بنتي تراضاها انت لو خوش زلمه
انطي وانه مأمن

ضل يوميه يجي هداد علينا تنطوني نوفه لو اخرطكم
الديره كلها عرفت اسم نوفه من ورا

بذيج الليله جان سكران وشايل سلاح ويرمي علينا وينها نوفه
خلها تطلع تا اخذها ويايه وننهزم

حمود جان كاضبه وابوه وعمامه اجوي ورا بسيارتهم

طلعت شايل سلاحي كتلهم تاخذو من هين لو اني جتاله
ومحد يحگني وبدليل زرف بيتنا وهاي عباد الله كلها تشهد

شحطو شحط وگطو بسياره وابوه يتعذر امسحوها بشيباتي
ابني منجدني وشسون حگم ومحد يلومكم

وراها بشهر نوفه ازوجت وسمع بيها وهمات اجى سكران
وحمود ويا شايلين سلاحهم ويرمون علينا

صعدنا فوك انه وياسين خرطنا عليهم وجى ابوهم خلف شايل سلاحه وخرط جوى رجليهم واخذهم وراح

من ذاك اليوم صار كطع بينا مات حجي خلف جان خوش زلمه مايرضى بالعوجه رحنا بفاتحه وقمنا بالواجب وعماهم بذاك
الوكت متواصلين ويانا الا حامد وحمود كطعنا وياهم

من مات جدك الله يرحمه اجوي كلهم يعزون وعمهم دلف
كال تراضو والدنيا ما تسوى وحامد جان طايش وهساع عگل وتزوج وصار عنده ويلاد وتراضينا وعلى اساس انسدت السالفه

شو مبين اليوم كاعد يطك بسبحته وينبش بالماضي يكول
نشور ولد عمها هم اولى بيها

ياسين ... تا تشوف عليش اني ما رحت وياكم اااخ مو ادري
بي كلبه مثل البالوعه من تفتحه ما تطلع عليك بس الجيفه

طيبان ... مو بس هو نزال وحمود ويا حجتهم عليش انت ما جيت

رضيه ... يمه كل شي نصيب البنيه ما تعيب وحبيناها من باجرامشيلك على ياهي تعجبك

يمه عوفي هذا الحجي هساع مو وكته يعني شيردون اجيهم اني
ماعندي مشكله باجر انروحلهم واخذ شيخنا بعد تا نشوف حجتهم

عفتهم وطلعت الدنيا بكبرها ضاكت بعيني لصبح كاعد ادخن
روحي لايبه طلعت للمزرعه كملت الشغل هناك ورجعت للبيت
نمت من التعب التفكير ذبحني وامي ما سكتت عني

كاعدين نتعشى جده شيخه نروح نمشيلك على رواء بنت
عمتك نوفه خوش بنيه وحليوه ومعدله فكر وردنا خبر

عاليه ... دك تلفوني ام نزال كتلهم اسكتو هاي ام نزال
وين الله ودكول موافقين تعالو... الووووو اي يمه كولي
اسمعج هااا شنون يولي اي كوليلها خلي تقفل الباب
وما تفتحه لو ينهجم مو بكيفهم

انتفضت وكمت لحيلي ... احجي عاليه شصاير

عاليه ... جايبين الشيخ راح يكطعون مهرها على ثامر

____________

مياده ... كل يوم يمر بيت خالتي كله غموض وما جاي افهم شي
بيتها كبير عبالك قصر الذهب اللبس معارفها كلهم كبار
سيارتها اخر موديل شريد وشطلب يوصلني يمي مدللتني
كل يوم نطلع نتغدا بمطعم شكل من غير المشتريات كله ما ركات

ومعاملة الطلاق ماشيه  ننتظر بس يجينا بلاغ ونروح

غيرتلي الاثاث الفوك كله جديد وراقي

باليل متخليني بالبيت ترجعني فوك وتوصيني اقفل الباب زين

طلعت رقم غالي وسجلته بتلفوني بس استحيت اتصل بي
ما عرفت ارتب الكلام واحجي ويا  خليتها بعدين اخابره

جنت اصلي صلاة المغرب خلصت كاعده بمكاني اندك الباب
كمت كلت منو لان خالتي اعرفها دكول افتحي اني خالتج

كالت اني سماهرر افتحي ضايجه اويد اسولف وياج

فتحتلها الباب ودخلت وتعلج وجهه مهرج من المكياج

مرحبا عيوني شلونج هاي ليش حابسه نفسج هنا مضوجين

لا ما اضوج متعوده تفضلي اكعدي

كعدت وجل على رجل وتفر بعيونها تباوع عالمكان
كالت ... انصاف خالتج موو

اي خالتي انتي وين تعرفيها  يعني من شوكت عايشه وياها

تنهدت وجرته حسره ... صارلي ست شهور هنا

فتحت الثلاجه طلع باكتين عصير ونساتل قدمتلها

سألته ... ما عدج اهل مبين بعدج زغيره شكد عمرج

عمري 17 امي من جابتني ماتت وبابا اتزوج وبقيت جوه ايد
مرت ابويه شوفتني الويل قبل سنه مات بابا  رادت
تطردني بشارع رحت لبيت خالتي بقيت يمها تلث اشهر
ورجله يتحرش بيه

كلتله خاله رجلج هيج يسوي بيه ما صدكتني كتلتني وطردتني ورجعت لمرت ابويه

انتفضت ورجف جسمي من كالت يتحرش بيه يعني
كلهم الرياجيل بنفس القذاره كرهت شكو رجال بدنيا

شربت من العصير وكملت ... مرت ابويه جابتلي كرايبها
عندا هوايه فلوس ما ادري شكد منطيها ودخلته عليه للغرفه

مياده ... من كالت هيج وكع العصير من ايدي
ولطمت على وجهي لزمتها من اكتافه كتلها اغتصبج
  هااا احجي اغتصبج كمت ابجي

كالت دكعدي يمعوده شبيج شكو كمتي تبجين ما اغتصبني
طلع خوش رجال هاج اشربي ماي اووف هسه تصعد
انصاف اطيح حضي من وراج

خليت الكلاص عالطاوله واديه ترجف

سماهرر ... من دخل للغرفه كلتله سمعت مرت ابويه شحجت
وياك لتكسرني اذا تريدني ازوجني

مياده ببتسامه ... تزوجج مو

اي عقد عليه بس سيد بقى ويايه اسبوع يتونس بيه
وراها اجى انطاني فلوس وطلكني مرت ابويه اخذت
الفلوس مني وطردتني

من الصبح لليل افتر بشوارع مدري وين اروح جنت واكفه
يم ابو الفلافل وانصاف جانت بسيارته كاعده من
شافتني نزلت

سألتني شبيج منو انتي  اني جنت بوقته جوعانه وتعبانه

كتله خاله جوعانه اريد اكل وحجيتلها مقتطفات عن حياتي
اخذتني وياها وجابتني هنا ومن يومها بقيت يمها

صابني فضول وسألتها ... باليل هوايه ناس يجون يم خالتي
شلون تكدرين تخدميهم وانتي وحدج 

ضحكت ضحكه طويله وادرفت بحسره .... مو بس اني اخدم
هوايه بنات يجون ونخدم  يمكن يجي يوم وتنزلين تخدمين ويانا

تنهدت وكامت اني اروح خالتج على جيه اليوم عدها سهره للصبح

وراحت قفلت الباب وراها وكعدت افكر بكلامها وقررت انزل
اليوم من يجون

يتبع

💙🥀💙

اعرف الانتظار مو حلو وكلنا ما نحب نتتظر

اني اكتب حسب وكتي وظروفي

والقصه بيها تفاصيل جثيره ويرادلها تركيز

احبكم 😘