///شموخ ///
بقلمي ((رونق السلطاني ))
✨✨✨✨✨✨✨
ليس الحب ان تأخذ مكاناً في قلب احدهم
ولكن الحب ان تخلق مكاناً لا يمكن لأحد ان يأخذهُ
- اكلك انت تريد تورطنا شمعرفنا بيها وشنهو لوراها وين اكو بنيه تنهزم من اهلها توالي الليل وفوكها مريضه مدري شاربه وشمصخمه وانت صرتلي الفارس الملثم وجاي تنقذها
- مهند اسكت كافي البنيه مبينه تعبانه خلي ناخذها والصبح نوديها وين متريد امشي اصعد خلي نروح مو حلوه وكفتنا بالشارع
- غالي من عگلك انت تحجي وين ناخذها اذا هي متخاف على نفسها تصعد ويه شباب اثنين احنى هم نخاف لتذبنا بهبيه تريد تاخذها انت اخذها اني راح اروح اكعد بفندق هذا اول يوم النا بغداد وجتنا مصيبه عجل لو نضل اسبوع شصير
- كل شي مصير يول كافي فطرت راسي شكثر ما تكرگ شو صاير مثل ابوك خيبت ظني بيك واني اكول مهند يختلف عن عمي ياسين
- امشي اركب عود لتنام حط سجينه جوه راسك لو اقفل على نفسك الباب اركب مناك اني راح اسوق يله فضني عاد
جانت الجامه مفتوحه واسمع كلامهم حقهم ما الومهم شيكولون عني حاطه راسي عالباب ودموعي تنزل وجسمي هلكان من التعب يربي وين اروح حتى خالتي ما اندلها ورقم تلفونها ما حافظته مكتوب بدفتري وكل غراضي ضلت بالشقه
غمضت عيوني تعبانه مرهقه حيل وعقلي مبنج حتى ما اعرف بشنو افكر وشسوي
صعدو بالسياره يسوق بهدوء وكل شوي يباوعلي بالمرايه وهذا الثاني مو راضي بس ينافخ وعصبي طول الطريق ساكتين
ما اعرف شكد مر وقت بس مسافه بعيده وصلنا يم بنايه وكف السياره الي اسمه مهند نزل وطبك الباب فزيت وخفت منه حيل
الي يسوق نفخ بقله صبر كال ... حدري يابه تا انشوف شنهو قصتج
ما فهمت عليه كلتله ... شنو ما فهمت عليك
كال ... انزلي انزلي
نزلت وطبكت الباب اباوع المنطقه اغلبها بنايات وشبه ماكو احد
باوعت للسما ياربي استرني بعد ما عندي قدره اتحمل يصيرلي شي نفسيتي تحت الصفر مدمره الصار ويايه شي ما يستوعبه العقل مشيت بخطوات ثقيله وبأسه
هم يمشون كدامي واني وراهم طبينا جانت الشقه الطابق الاول
فتح الباب طبو اثنينهم اني تراجعت وخفت واكفه واتلفت منا منا
