شموخ

بارت 9

///شموخ ///

بقلمي ((رونق السلطاني ))

✨✨✨✨✨✨✨

‏الاحساس يكون نابع من اعماق الروح شيء جميل وشعور مريح للنفس

الاحساس ما يجي بسهوله اكو مجرد كلام ينكال  اكو تحس بالشخص ليتحبه من يصيبه اذى او مكروه وهذا ما يجي الا من محبه نابعه وصادقه من القلب

شكد جنت اتمنى واحلم يكون عندي اخ حنين يحس بيه ويهتم الأمرلي  ويتفقد احوالي حتى لو مره بالشهر المهم اكو من يسأل عني

حبيب او زوج  يحس بيه من اتألم من اضوج افرح او احزن حتى لو هو بعيد عني  بس يكون بينا تواصل روحي 

مثل غالي شلون يسأل على ادق التفاصيل لصغيره ولكبيره من يكلم اهله ويسأل عنهم وعن احوالهم   وعن خواته وحده وحده يسأل عنهم بتفصيل  هيج افتهمت من خلال كلامه

كاعده بالغرفه على طارف السرير وباب الغرفه مفتوح عالنص
مو قصدي اتصنت عليه واجسس  لاكن الصوت واضح واني اسمعه يكول

شنونكم عمه شخباركم  عساكم بخير خابرتي الغزاله شو اهجس گلبي مو مرتاح  ما سمعتي شي من هين مناك  امي واخواتي وابوي وعشيرتي كلهم كلبي مطمن ومرتاح من جانبهم  عمه عليا فاهمتني شنهو اقصد لتغشمين روحج 

اي اي انطيتها رقمج اي طبعا اكيد تسحي عاد جان انتي خابرتي علوله  تريدين اعلمج شنون اطلعين حجه تا تخابرين  هااا اااخ منج

دحكي گلبي يكولي اكو شي صاير بس شنهو ما ادري اني يجوز باجر احدر عدكم محتاج فلوس تا اكمل عالشغله لبيدي انتي بس ادعيلي  ولحلحي نفسج وخابري اريد بس اطمن

اي الصبح اطلع من هين الظهر يمكم  مو تشلعين گلبي اي ماشي
ااخ من الغزاله لتخليني معلك بداعتي عندج  هلا فيمالا

هو صارله اكثر من يومين اباوعله بس يصفن ويفكر ما اعرف بشنو بس عجبني احساسه 

بعدها طلعو وما رجعو لليل

قررت احجي  شصار ويايه  بس بطريقه مختصره لان صعب جدا اكعد اشرحله تفاصيل حساسه  يبقى انسان غريب مجرد عطف عليه وأواني بيته هل كم يوم  وهذا شي مراح انسى اله طول ما اني عايشه

بهالفتره علمني اصلي صلاه صحيحه والاذكار بعد الصلاه وجابلي كتيبات اذكار الصباح والمساء  وعلمني اقره سورة تبارك قبل النوم

يكول تا ما تكعدين باليل اتصيحين وتجيج الكوابيس

وفعلا من بديت بهالخطوه هوايه ارتاحيت  واحس راضيه عن نفسي خصوصاً بعد ما التزمت بالحجاب وسترت  نفسي 

هذا الانسان ماشفت مثله ولا راح اشوف

هادئ بكلامه  بحركاته  نظيف مرتب ودقيق بكل شي 

ارتاحله واحب اسمع كلامه وانفذه  اخجل منه  فارض احترامه ابد ميباوعلي بنظرات مو زينه  دائماً نظراته تطمني وتبث بنفسي الراحه

بعد ما رتبت الشقه وكملت  كعدت انتظر جيتهم  هم مالهم وقت محدد يجون بي  مرات يجون العصر ومرات يبقون طول اليوم برا ما يجون لليل 

بعد صلاة العشا بالظبط انفتح باب الشقه ودخلوا ما طلعت علىمود ياخذون راحتهم لان مهند كولش متضايق من وجودي وياهم

جنت ادعي بلكت الله مهند يتعشى ويطلع حتى اكدر اخذ راحتي واحجي  تعبت هوايه تعبت  روحي مخنوكه واحس بثقل على گلبي وصدري  محتاجه احد يحتويني يشاركني همي يخفف عني حمل المصيبه الي اني بيها

سمعتهم ياكلون ويسولفون   ومهند كال  بس اتعشى وارتاح اروح التقي بي  لدير بال وانت باجر حدر لأهلنا

مرت تقريبا ساعه وطلع 

حجيت ويا من ورا الباب  خويه ممكن اخذ من وقتك شوي

كال تعالي يول هاي انتي كاعده واني عبالي نايمه

فتحت الباب وطلعت اجر بخطواتي وافرك بيدي وجسمي نارر من الخجل  كلتله ... السلام عليكم

- وعليكم السلام  ماسمعتلج حس حسبتج نايمه  تغديتي اكلتي شي ؟

- اي الحمدلله اكل هوايه بثلاجه  الله يكثر خيركم  دنجت لميت الاكل وديته بالمطبخ  سويت جاي وصبيتله بالكوب مالته  واجيت قدمتله

كعدت  عدلت حجابي خاف طالع شعري لو صدري ولو هو كل الثياب لجايبهم صدرهم مقبط وطوال وعراض عبالك ازار صلاه

- شرب جاي ورث جكاره رحمه الله والديج  جر نفس وكال ... اي خيتي احجي اسمعج

- خنكتني العبره واحس نفسي مذبوحه بسكين ومو عارفه شلون ابدي وارتب الكلام  مسحت وجهي بكفوف اديه وجهي نارر

اني اتزوجت بدون عرس وبدله جنت بعدني حزينه على موت ماما وبابا  طلعت من بيتنا  ويه هذا الحقير لشقته بنفس اليله عاملني معامله قذره وبشعه ويتلفظ الفاظ مو حلوه ولا سامعتها بحياتي

يوميه يجون اصدقائه يسون كعده وشرب وسوالف مو حلوه جان يجبرني البس لبس فاضح واطلع كدامهم واذا ما اسمع كلامه يضرب بمناطق حساسه وتأذي وانجبر اطلع اقدملهم اكل واطب للغرفه اقفل على نفسي الباب 

بهذيج الليله  ماكدرت اكمل اختنك صوتي وجسمي رجف واطرافي ترجف عبالك هسه الموقف كدامي

رفعت نظري باوعتله ... جان مصدوم ومطير عيونه وملامحه وجهه عصبي كولش  وقابض على ايديه مبين عليه التوتر والعصبيه

كال بنبره حاده ومرعبه كملي شسوالج 

بلعت ريكي ومسحت دموعي شفافي ترجف وكملت ... قبلها بفتره مجان يجبرني على شي مخليني براحتي  بعدها مثل كل يوم يجون اصدقائه بس هالمره طلعو من وقت  هو دك عليه الباب وكال راحو ما كو احد بس اني محضرلج مفاجأه  فتحت الباب شويه وباوعت ماكو احد بس هو واكف دفع الباب ودخل  يضحك وراها دخل صاحبه عليه واثنينهم 

تهسترت كمت اضرب على صدري  وجهي وادعي على وهاب لباعني اله  اغتصبوني وراح شرفي  ياريت اموت ياريت  انهزمت منه لان جان واضح  راح يستخدمني وياخذ فلوس واني مو هيج ما تربيت هيج  هاي الشهرين شفت العجب عندا شي ما سامعته ولا اعرفه بحياتي 

الله يستر على احبابك  واهلك بس ساعدني اجيب رقم تلفون خاله واروحلها  وفضلك دين بركبتي مراح انسى طول ما اني عايشه

ورث جكاره لخ و تكلم بغضب ...  مياده انتي واعيه على نفسج عليش ما بلغتي اخوج كبل لا يولي وينكشر عليش ما طلعتي منه

- اخويه نذل مثله  اجى سلم عليه دقايق وراح ما لحكت احجي شي

- اني رحت سألت بمنطقتكم سمعتكم حلوه بين الجيران وكلها تمدح بيكم وبأهلج  ورحت عالمنطقه مالت زوجج وسألت عنه بالعماره سمعته مو زينه من زمان من گبل لا يتزوج  وفعلا هو سكير وعندا سوالف مكسره ديوث  وخنيث  لو الي سلطه عليه الا اخلي عبره لأمثاله   يابه انتي لازم تطلكين منه هذا اذا لكاج بعد راح يقفل عليج الباب وي*** استغفرالله  واتوب اليه

انوب خفت من ردت فعله وجهه صار احمر وشراين ركبته برزت حتى عيونه صارت حمره  وينفخ جكاره ورا جكاره كام يفتر يروح منا ويجي منا  ويفرك براسه 

كمت وكفت  قريب منه حلفته ... بداعت امك  ابوك واولادك لتورط نفسك انت انسان مسالم ونظيف  بس اوصل لخالتي هي تحل اموري واطلكني منه  هي تحبني من زمان  الله يستر اهلك وخواتك

-غسلي وجهج وروحي تعشي  ممنوع جدام مهند تحجين كلمه مفهوم

لا لا ما احجي ابد مشوف انتظرت يطلع 

غسلت وجهي ولميت الاكل حتى ماعندي نفسك اكل كرهت نفسي وكرهت حتى اهلي والساعه لنولدت بيها 

طبيت للغرفه وسديت الباب  واليل كله كاعده ابجي ساعه اتندم شلون حجيتله وساعه اكول  اكيد سأل عني وعرف بمصيبتي وخاف يكول اجذبين عليه  وتسوللهم نفسهم يعتدون عليه  ويعتبروني مو شريفه

افكار تعصف براسي  اريد الصبح يطلع احس الليل صار عليه سنه سمعت اذان الفجر  فتحت الباب شويه باوعت نايم وايده على عيونه طلعت بهدوء توضيت ورجعت صليت وغفيت عالسجاده بمكاني

فزيت على دكت الباب كمت عدلت حجابي وفتحته  باوعت واكف ايده بجيب البنطرون  والايده الثانيه  لازم التلفون ويكتب جان كولش انيق ومرتب لبسه متناسق ويه جسمه وعطره يجنن

تعوذت من الشيطان ونصيت راسي ضليت اباوع بالكاع

حجى ويايه وهو عينه بتلفون كال .... اني لازم اروح لأهلي وانتي ابقى هين ومهند راح يساعدج  تجيبن الرقم  واني ان شاءالله ما اتأخر عليج واسلمج بيد خالتج

طلع المفتاح من جيبه وباوعلي 

  - هذا مفتاح باب الغرفه هذا النسخه الثانيه قفلي على نفسج ولتطلعين ومهند اخوج لتخافين منه بس اقفلي الباب للحذره واي شي تحتاجي اطلبي منه  اني موصي عليج  بين ما ارجع

اخذت المفتاح منه  كلتله ... توصل بسلامه 

راح وقفل باب الشقه من برا  نزعت حجابي  وباوع ورا  دعيتله يرجع بسلامه 

عيني عالباب  غمضت عيوني واستنشق عطره  هنيال مرته عليه هنيال امه واخواته  هوايه يحبهم ويحبو مبين من يكلمهم ويشاقه وياهم  ويضحك  حتى ما اعرف عنده زوجه او لا حتى لو عندا شكد محظوظه والله رزقها بهيج انسان 

جريت حسره خليت المفتاح بالغرفه  دخلت للمطبخ حضرت ريوك وكعدت اكل بدون نفس 

وافكر بالايام الجايه شلون راح تكون ......!!  اي

غالي ... مهند دير بالك المكتب بأمانتك وهالبنيه همات امانه عدنا  هذا عنوان المنطقه والشقه شوف سميره اخذها وياك وراقب هذا زوجه الساقط الخنيث خلي تلهي تدبرلها حجه هي بعد صاحبتك  تعرف شنون تتفاهم وياها  المهم بأي طريقه تدخلون عالشقه وتاخذون الرقم  من ارجع تا نوصله لخالته وانت هم ترتاح منه ادري بيها غاثتك

مهند ... يول شنهو صاحبتك ترا المره اعرفه معرفة صداقه ماعندي شي وياها  بس هي تدري بيها تحب تضحك وتشاقه

  طبيعة شغلها كل البياعين هيج تا يكسبون زباين وخوش فادتنا عيني من اخذتني تا نشتري هدوم لمياده مدري مهياوى 

ما گصرت شكو شال وثوب طويل عبته بالعلاكه  انوب طردتني دكولي عيب تباوع  عالملابس الداخليه ترا اني كولش هوايه اغارر هههههههههههه طلعت كوولش دغار عليه ام شعفه صفره

غالي ... انت هم طايح دك سوالف وياها بس هي  كولته كووولش هوايه تحبك  مره كالتي عفيه مو هو صديقك كوله خلي يخطبني كوولشي ما اريد منه  حتى بيت عندي  يعني بس تخش برجلك اليمين

مهند ... يربك اصوم وافطر على شعفه صفره  مدكولي شصخم بيها حتى بوسه ما تنباس  جنها  خضير المطيرجي مطروكه طرك يول حتى صدر ماعدها  مابيه ريحة انوثه

غالي ... عجل عليش دك سوالف وضحك وياها طايح حظ وسربوت  خلي حدود بعلاقاتك حتى لو مصلحه البنيه رگله وانت ما مقصر وياها شقى من هذا الثجيل

منهد ... لا يمعود عاد مو هالثخون هي هيج طبيعتها واني لاطفتها بس اسد حكلي وعيوني شنهو ما احجي

غالي ... انطم شفتك من جبت هدوم لمياده شنون تشاقه وياها شكو تنتف شعراته وتكرص بيها اسمع هاي شغله تخصك المهم حط عينك على مياده ودير بالك عليها بين ما ارجع وسوي لكتلك عليه واذا جبتو الرقم لا تخابر الا اجي يله اني رايح ولك صارت ب11

طلعت من المكتب ركبت سيارتي مريت اخذتلهم بقلاوه وهدايا
وتوجهت لديرتنا وگلبي لا سبني اهجس غزالتي بيها شي الدرب صار عليه شطوله اريد بس اصل وعمتي عليا لا حس ولا خبر منها طبيت اهلنا الظهر تلكاني ابوي

عبالك صارلي سنه غايب عنه مو اسبوع  طلعت امي گطت نفسها بحظني عيونيها مدمعه حظنتها وبستها من راسها

شبيكم شجرالكم غايب البلد يا يمه مو هين اني يمكم وكل ساعه اخابر شمركبه غدا مشتاك لطبخج اكل المطاعم تزوهرت منه
جوعان  حبيبه 

- سويت بانيه ادري بيك تحبها وترستها لحم يبعد امك يخسي الجوع عنك هساع اصب توي ردتلي روحي وجدتك هين جتي من الصبح

ابويه صعدت الغيره عنده مضيك عيونه ويدحك عليها ... هاا يول رضوه محد بعينج بس ابنج هساع ردتلج روحج مو هيجان صار الحجي عجل روحي ويه ابنج تا روحج تضل عندج وما اطير

طبيت جوه عفتهم يتغازلون سلمت على جدتي وبست راسه
شنونج يبعد شيبي منج من الشيطان جايه يمنا اليوم

- جايه علييك يبعد شيبي ابوك خابر الصبح كال غاليج اليوم يجي عاد جى اخذني وعمتك ضلت ايمن مصخن وابوه مو هين مدري وين مولي وخطيه امه محتاره بي شايلته وتفتر عليا ضلت تعاونهم دكول العصر اجي  شنونك  انت ما لكيتلك وحيده من هالبغداديات

مكومات البغداديات شحلاتهن بس اني عين ما ادحك الا لغزالتي
جوي جهال سمره يركضون عليه حجيهم مكسر ويضحك وصحتهم صايره زينه خدودهم مدنفشه وراده الروح بيهم ... هلا هلا يول واحدكم يسوى راس ابوه  كعدو بحضني مروه لسان ومدري شتخرط ومروان عاقل مستحي 

كالت جدتي ... اي بالمكلوب البنات اسبع من الولد وانوب هو احلى منها شيصخم بالحلاه دحك بله البنيه سميره وهذاك ابيض

موضوع سمره شاغل بالي وهذا رجله ماكو خبر منه غير اخوه وعمه خابروني كبل يومين كتلهم بغداد من اجي يصير خير شدكولين جده ارجعها اله ما اريد اكسب خطيتها خاف الها نفس بي

خلي يولي ما بي خير فاين الحظ بس دكول اريد ارجع غير اكسرها واخلي اجنوبها زرك بهالعصا ليموت جهاله جوع ويتبسع على مره هذا بي بخير

صبت امي الغدا والكعده بينهم عندي تسوى كنوز الدنيا

سعد ... شكثر تريد فلوس وعليش من البدايه ما اخذت زايد

غالي ... يابه جتني شغله وما ردت اضيعها من يدي وعوزت باجر ارجع  هذا الرجال مو صاحب كلمه خليت مهند يسرح بي لباجر

سعد ... بيه الخير ودوامك شنون وليدي لا تترك بعدين تفيدك

غالي ... ما اترك مرتبها وياهم  بس اكمل شغلي بغداد ارجع لدوام

رضيه ... وانت اضل رايح راد هين وهناك لشوكت لو عاجبتك حياتك هيج لا حرمه ولا جهال

غالي ... محد عاجبني غيرج رضاوي فديت گلبج اريد اناملي نص ساعه من الفجر كاعد  يابه جبتلك بقلاه من فرج نعوش كوم اخذت مرتك مبين اعصابها تعابنه

جنت مدد وجده تهمس براسي جرت شعري حيل وتضحك وانت شوكت تريح اعصابك تريدني اصدك ماعندك شي من هين مناك وتريح اعصابك بيها

صفكت بأديه... جده كلشي ماكو مكضيه صلاه وجهاد كل ليله اجهاد شياطين الانس والجن عليش ما مصدكه دحكي بيا زين

سعد ... ايباااه  نصلي على ذيالك 

- مصدكون بكيفكم  جده نوميني بروح جدي اهجس نارر تطلع من راسي  اي حيل جري شعري اوووف

رضيه ... انت ضل كلما نحجي وياك انهزم واكلب السالفه

غفيت العصر كعدت على رنت التلفون عمتي عاليه كمزت من مكاني
كمت غسلت  طلعت من باب المطبخ بسرعه وكفتني امي

- سويت جاي وين رايح وعليش مستعجل

هسه اجي يمه  شغله اخلصها واجي وطلعت من البيت   خابرتها

جيبي ايمن وياج هو مو مريض اي يله اطلعي اني بالباب
انتظرتها وگلبي نارر  بس صعدت كبل حركت السياره شبيها عمه احجي  مو تكطين كلمه وتسكتين

- يول شبيك ترجف على كيفك ... كبل شوي خابرت امها كالت بالمستشفى وينظرون الدكتوره تجي تشوفها  بعد ما يدرون شنهو بيها 

- وهذا ابوه الدثو وين  ما وديتو من الصبح دحكي وجهه احمر ولايبه روحه

- ما تدري بيه فايع من ديره لديره  اسمع  ضل برا واني اطب عليهم بحجه ايمن مريض واخابرك 

- عجل اخليج وحدج وهالطفل وياج مريض حدري حدري ومالج شغل انتي بس شوفيهم وين وخليها عليه

__________________

طبت عمته سلمت علينا بوستني وكالت بصوت خافت ... غالي برا خايف عليج

فتحت عيوني بدهشه وبلعت ريكي وكلبي يدك الف يايمه شجابه من بغداد وامين برا وهذا ادري ميخاف اذا بنص بيتنا كالي گلبي عشگج عجل هين شيسوي  يمااي اذا طب عليه غير انجلط وروح ابوي

ويشيلوني ويدخلوني بالانعاش ويحطولي الااجهزه على گلبي ويجي يركض خايف عليه ويگضبو الدكاتره ميخلو يطب عليا وهو يدفعهم ويصيح عليهم عبن ذيب يجلط

ويطب غصب عنهم ويجر الكرسي ويكعد يمي ويكضب ايدي يبوسها ويمسح على راسي

وافتح عيوني واشوفه وارجع انجلط من جديد ويوكف گلبي وهو ينقذني ويسويلي تنفس اصطناعي ياااا صخام وينفخ بحلكي يبوي غير اموت شنون يصير شهكت حطيت ايدي على حلكي

جتني گرصه من شروق شاغت روحي وطيرت افكاري وامي بعدها تحجي ويه عاليه

- شبي الوليد يمه مبين عليه وجهه نارر مصخن جان سبحتي بردتي جسمه

- سبحنا من الصبح وكبل شوي همات بس هو يمكن مستبرد النهار كله يلعب بالمي وهدومه مطربسه ابوه مو هين ولا اكو احد من الولد وغالي خطيه الظهر وصل من بغداد خابرت عليه واجى جابنا

بهالحجي جتي الدكتوره ورحت وياها  امي وعاليه ما تركتنا ابد سويت سونار وصار الحجي كدامها

الدكتوره ... ماما انتي وينج ما تدرين بنفسج ما راجعتي من كبل عندج اكياس اربعه  عالمبيض واحد منهم كيس دم و جبير بأسرع وكت لازم اسويه عملي ولا راح ينفجر بطنج وهذا خطر حتى المبيض يتأذى واحتمال يشلو  لازم فورا عمليه وهنا امكانيات المستشفى ضعيفه افضل تروحون لبغداد حتى العلاج ميفيد مجرد راح اكتبلج على مسكن

امي مثل الاطرش بالزفه مافتهمت من كلام الدكتوره شي ...غير دكولها لا دكتوره من كثر متركص هيج صار بيها

فشلتني ولزكت بهالسالفه ياهو لتشوفه دكله من الركص عبالك اشتغل رقاصه اني شدخل هاي بهاي  بس هاي عقليتها شسوي

ضحكت الدكتوره كالتلها ... لا حجيه مو من الركص شدخل وضع بنتج خطر ولازم تاخذوها

عاليه طلعت تخابر مدري شبيها شو  انعقج وجها وانخبصت من يمها

طلعنا وشروق كالت .. ياحظج راح تروحين لبغداد علوا يصير بيا

- دنجبي شيصير بيج يول الوجع ما ينحمل جاي اموت يابغداد يا بطيخ
وعلى اساس اخوانج راح يركضون بيا  بله ما تنجعمين

امين جان واكف برا وغالي گلبي ويا يسولفون امي وكفت يمهم تسلم واحنى وكفنا ليغاد منهم 

بعد روحي وعيشرتي ولا رفع راسه ودحك بيا   عبن ثكيل مو مطركع بعد حيلي على كولته

اسمع امين يسأل امي .. هاا شطلع بيها

امي تفر بديها وما مقتنعه بكلام الدكتوره ... عدها جيس عالمبيض مدري شنهو هذا دكول لازم عمليه مو هين الا بغداد كبل ينفجر ويشلون المبيض

امين المصگوع يضحك وجدام غالي كال.... مبيض شنهو دجاجه وتبيض يول شموخ اني اكول ليش الديج جان طاير وراج اثاري طلع عندج بيض جم بيضه تبيضين باليوم

وجهي صارر نارر كبرى مدري اذبح نفسي من الفشله مالت امي وامين  شروق لافه الشال على حلكه وتضحك دست على رجله حيل وفركتها كمت اغلبي اهجس كلبي راح ينفجر

غالي يدحك عليهم ومن ملامح وجهه مو راضي كال ... انت شبيك اثول ودثو ماجاي تفتهم الخطوره لعلى اختك  اني باجر محدر بغداد اخذكم وياي لديرون بال اوديكم واجيبكم وعمه عاليه تروح ويانا

ام نزال ترا وضع بنتج خطر مو مال ضحك تهيرو باجر الصبح امر عليكم اخذكم

صار جدال وحجي امي وامين معارضين وعيب وشنون نروح ويا ونزال بغداد ننتظره يجي

عاليه وغالي ضلو يحجون عليهم اسمعه يكول ... يابه تتنظرونه يجي وبنتكم حالته خطره اذا انفجر بطنها يموتها اخذكم وهناك يجيكم ابو ساره  حظرو حالكم الساعه سبعه الصبح امر عليكم امشو اوصلكم للبيت ولديرون بال

ركبنا ويا وبعدهم يحجون امي كالت ... خلف عليك وليدي ما تگصر بس اخاف اخواها يعارض لو يسويلنا مشكله وماببينا حيل على لسانه هذا ميتفاهم

امين ... يمه هو بكيفه دا يكلج حالتها خطره مو مال حجي زايد عود بالبيت نتفاهم وكمال موجود اذا ما راح وياكم اني اروح 

وكف يم الصيدليه هو حدر ادحك علي من الجامه يفدوه لهلطول هيج تحبني وصارلك ساعه تقنع بيهم  اسد ريتك بعد عشيرتي

عاليه ... هذا هو ام نزال توكلو بالله واني وياكم همات اريد تونس بغداد صارلي فوك السنتين ما وصلت

شروق كرصتني وتحجي بصوت ناصي ... اي يابه شتريدين بعد اكلج هذا شعنده ذبح نفسه الا ياخذكم ويا

- انجعمي زلمه وقدمنا خدمه وكرايبنا مو زين راح ياخذنا لو اضل على امج واخواني الا ينقلوني بالاسعاف

- الله يجثر كرايبنا وكون مثل هذا جعل محد لبس الدشداشه غيره عاد شدعوه هالثكل لو رافع عينه شوي ومدحج بينا شبينا ترا والله حلوات مال كشخه

- نصي حسج هسه يجيج نعال كشخه من امج لو تصيح وتطرش اذانج

- ميخالف اتحمل بس يرفع عينه ويدحج بينا جى جى اعصار مو زلمه دخيل بختك وبخت شعرات لحيتك

غرت عليه وهاي تتغزل بي وكرصتها حيل من فخذها كمزت وسدت حلكه وتفرك بمكان الكرصه حتى عيونها دمعت متكدر تحجي بس تشهك

وصلنا يم بيتنا وامي لزكت عليهم الا تحدرون يمنا يمين بالحرم الا اطبون لبيتنا وتشربون جاي  محرم عليه الا تنزلون بعد شوي تحلف بطلاك

طبينا كبلهم حضرنا الجاي وكيك عدنا بثلاجه  جى امين اخذ الصينيه  شوي وطب كمال ومرته ويا تسحل بنفسه  واديها ورا ظهرها

سميه ... وجهج اصفر يولي شكالت الدكتوره

نبت شروق وهي تضحك ... مو طلع عدها بيض واذا ما طلعو راح ينفجر راح الديج المرحوم وخلاج حايره بيضاتج 

سميه .. ههههه بيضش يولي خلي نفتهم

- راح شكو بيضه بثلاجه اكطها براسج وبراس امين اني بيا حال وانتم تضحكون

سميه ... احجي يولي شبيج يا بيض هذا

- دكول اكياس عالمبيض ولازم عمليه كبل ما ينفجر بطني ويأثر عالمبيض ويجوز يشلو  ومدري بعد خلي اشوف امي شدكول

كومي انطي سم مي تا اشرب هذا الدوا

جابتلي مي وهي تضحك واني گلبي نارر وخايفه

طبت عاليه سلمت علينا وطلعت ضلو واكفين جثير وهم برا يحجون

حاطه ايدي على خدي وكاعده صافنه وبالي يمه وگلبي يرجف

طبت امي والولد كال كمال .. هذا هو توكلو باجر وامين يروح ونزال هناك يجيكم خابرته هسه كال خلي يجون كومي تهيري وحضري نفسج  

كمت صعدت فوك عقلي مشوش ومرتبكه يول شروق شلبس شاخذ هدوم  ماعندي بس هالثوبين وهذا الحذاء

تعالي هسه اشوف هدومي .. فتحنا الكنتور طلعت من هدوم شروق وعندي كلابيتين جديده  اخذت جنطه من سميه ورتبت بيها ملابسي وملابس امي وجنطه زغيره حظرت بيها غراض امين

حتى عشى ما اشتهيت اكل واليل كله ما نمت قلق وخوف حتى بجي بجيت على نفسي  صارت الساعه بسته الصبح كمت سبحت وبدلت

وحدرت جوه لكيت امي كاعده ومحضره الريوك وتكعد بأمين وهو تنبل مال نوم  لو تنكلب الدنيا يم راسه ما يكعد

الا امي داست على رجله حيل يله كعد

كعدت اكلت شويه  كمت وكفت كبال المرايه عيوني ذبلانه وجهي شاحب  لفيت حجابي وحطيت مرطب شفايف 

دك هورن سيارته  ويه كل دكه گلبي يدك الف عرفته هو

طلع امين فتحلهم الباب ودخلهم لدوانيه اخذلهم جاي اسمعه يكول 

ماكلين وشاربين بس تهير ورانا درب  تا نصل من وكت ونلحك عالدكاتره

امي وامين برا يحطون  الجنط بسياره واكفه بالطرمه طلعو من الدوانيه  تگربت عاليه سلمت وبوستني وحضنتني

كالت ..عليش هيج ذبلانه  ماكو شي يخوف 

خنكتني العبره واني اشوف اهتماهم بيا 

جان واكفه وجهه عالباب بدون ما يدحك علينا كال ... شنونج غزالتي عليش مو نايمه ومخربه هالعيون والوجهه ذبلان

يبوووي اهجس اعظامي تكسرت من الخجل اريد ارد كلمه ما اكدر
شنون شافني حتى ما شفته يدحك علينا

عاليه تضحك كالت ... امشي اطلع  لتفضحنا  وغزالتك تصير خروف مشوي  استر علينا

طلع شغل السياره  وكمال كعد يعمص بعيونه من النوم سلم علينا وحسب فلوس انطها لأمي وكالها بس هذا لعندي

ركبت بسياره كعدت ورا بالظبط وامي يمي حركت السياره وانطلق بينا جان يمشي بسرعه

كل شوي ارفع عيني ما اشوف منه شي بس شعره وجانب وجهه

لبس النظاره  دحكت بي بالمرايه رفعلي حواجبه  استحيت وصديت عالجامه ادحك عالشارع

امي وامين ما نسمع  منهم بس الشخير عبالك طالعين لطربيل مو لبغداد

عاد هو يحجي ويه عمته ... عمتي غزالتي نامي يابه التعب ماخذ حيلج يبعد الحيل وراعي

هي دكله ... اي اي يبعد الغزلان هسه انام  علي التبريد يمنا حاره والغزلان ما يتحملن الحر

اسمع كلامهم متت ضاعت علومي  يبوووي اني غزالته وهو ذيبي

شعور يخبل واحساس حلو

امي كل ساع تفز هاا وصلنا وين صارت بغداد

غالي يضحك .... بعد وينج وين  للعصر تا نصل  بغداد بعيده

تعدل بفوطتها وتعمص بعيونها كالت متعجبه ... بصلاة محمد عليك للعصر يهالعثره عجل شوكت نلحك للطبيب

تقريبا الساعه عشره وصلنا بغداد  مدري وين ودانا وجابنا يفر بينا اخر شي كال يله  هاي شقتنا هين حدرو ارتاحو وعينو من الله خير والعصر اخذكم للدكتوره

طبينا الشقه نظيفه ومرتبه

كال اخذو راحتكم  يله امين امشي ويايه

كطيت حجابي فتحت الجنطه طلعت ثوب اريد ابدل

عاليه ... تعالي شموخ نامي هين بهاي الغرفه مبين تعبانه حيل سوده عليه

امي مددت عالقنفه وتون من رجليها 

طبيت للغرفه مرتبه وفراش جديد الغراض مرتبه فتحت الكنتور فارغ مابي شي 

كطيت نفسي عالفراش راسي ثكيل ونعسانه حيل بسرعه نمت

كعدت عمه عاليه واكف فوك راسي ... كومي وليدي تغدي الساعه ثنتين الظهر بعد ساعتين موعدنا يم الدكتوره

بعدني نعسانه بس كمت غسلت الولد ماكو بس احنى تغدينا وكملنا طبيت للمطبخ ادحك شكد نظيف ومرتب هاي هو كاعد هين بعد روحي شكثر نظيف

يعني اذا اتزوجنا يجيبني هين ونطلع نفتر بغداد ونحط ايد بأيد ونكعد يم نهر دجله ناكل ذره وحب ونلعب  ويركض ورايا واني اضحك
واركض سريع وميلحك بيا  وبعدين يكضبني ويشيلني ويفرني ويكول كضبتج ويدغدغني واني اغص من الضحك

ضرتني على جتفتي شعندج صافنه وتضحكين

هاا عمه اني اضحك لا لا عليش شعندي استحيت منها

صلينا العصر وغير ملابسي وتحضرت  رن الجرس مال الشقه فتحته عمه  جان امين كال يلا حدرو تعالي ابوسج شموخ جبتينا لبغداد

اشرتله بيدي .. دروح ولي  اني ام البيض موو بس خلي ازينه شوف شسوي بيك

طلعنا كلنا وعمه قفلت الباب

وهمات مسافه بعيده تا وصلنا

كال .. هاي دكتوره طبو عليها

امين ... شنون نطب غير الا حجز شنهو تعرفها انت ؟!

غالي ...يابه من البارحه خابرت ولد صديقي هين وزجته هي لحجزت وكملت كلشي عمه انتو فوتو واحنى بسياره هين

امي حدرت تتمطى وتمط بنفسه تكسرنا من وراج وروح امي اذا طلع ما بيج شي لكسر اضلوعج تكسر

شحجي وياها بله

تقريبا ربع ساعه واجى دورنا طبينا للدكتوره جانت جبيره بالعمر
شرحتلها حالتي واتذكرت امي من جانت تنطيني دارسين واعشاب

كلتلها ويه الشهريه اتكطع من الوجع وامي جانت تنطيني هاي الشغلات اشربها غصب

الدكتوره ... تعالي ماما اصعدي وطلعي بطنج

نمت ورفعت النفنوف جنت لابسه ستريج  تا ما تطلع رجليه

حطت الجهاز وادور بي كالت فعلا هاي شوفي ماما شصاير بيج فورا عمليه انطتنى اسم المستشفى لداوم بيها وكتبت تقرير طويل عريض بحالتي

من الليل تكطعين الاكل والشرب على مود البنج باجر من الصبح ندخلج حالتج متسمح تتأخرين اكثر

وعمه عاليه مركزه بكل كلمه تنطقها الدكتوره  واخذ ت الاوراق منها

طلعنا منها   عمه راحت تحجي ويا ضلو جثير يحجون وراها صعدو وطلع بينا گبل للمستشفى هو وامين راحو ورا ساعه يله اجوي

كال امين كملنا كل شي وحجزنا حاله طارئه 

رجعنا للشقه والخوف مسيطر عليه اتخيل نفسي اموت بالعمليه وما اشوف غالي بعد دمعت عيوني وگلبي وجعني

احبه واريده ما اريد افاركه  من البارحه واليوم اتعلقت بي اكثر واني اشوف خوفه عليه ويركض ويانا

امي تحجي كل شي مو عاجبها بس ادردم وكل ساعه تخابر على سميه تسأل عنهم ليسمعها يكول رايحه للجبه تقاتل

امين ضل يمنا وهو راح عمه كالت روحي نامي وارتاحي عمليه متخوف واني وياج ما عوفج

كمت رحت للغرفه وجت ورايه انطتني تلفونها ... خلي يمج راح يخابرج  يطمن عليج  كلبه نار من البارحه لا نام ولا ارتاح  شنون اب وخايف على بنته يولي يحبج يموت عليج 

اني بس اهز براسي خجلانه مدري شرد عليها عاد كتلها الله يحبج

شو هي ضلت تضحك وطلعت

سويت نفسي نايمه والتلفون جوه المخده ما فتحته  صافنه بالسكف  وكل شوي ارفع المخده وادحك خاف يخابر

اغفى وافز ادحك بتلفون  بعده والساعه صارت ب12

اخر شي نور اسمه عالشاشه كاتبته ( الغالي )

فتحت خط كلت بصوت خافت ... الوووو

غالي ... يبعد الووو والهلاو شنونج يگلبي

- شوفتك تخليني بخير

- ااااخ يگلبي من شوكت انتي مريضه

- يعني شسمه مدري شنون اشرحله كمت اكطع بالحجي

- احجي وليدي شبيج

- كبل فتره طويله اكول لأمي وهي تنطيني اعشاب وبالغصب اشربني بس هالاسبوع متت من الوجع يله اخذوني وعرفت حالتي

- من شفتج البارحه شنون تعبانه اهجس الوجع صار بنص گلبي نامي وارتاحي سهله ان شاءالله

غالي

- يضوه العين كولي

اشكرك على كل شي جثيرر احبك

سديت التلفون بسرعه وجسمي ينتفض واتلفت اهجس العالم كله سمعني

الجوع ذبحني مدري نفسي انفتحت نمت مرتاحه واني اتحلم بي

ثاني يوم من الصبح رحنا للمستشفى والساعه تسعه دخلوني للعمليات
كمت ابجي ومجلبه بأمي

ساميحني يمه خاف اموت بوسيلي شروق وسمسمه واشتري ديج جبير وانطي لجده سنيه خطيه امين اكل الديج

وزعي على روحي جبن وخبز حارر احبه

مسحت دموعها وضربتني وعمه عليا تضحك عليه حضنتها  وشاورتها

سلميلي على غالي خاف اموت لتخلي يزوج غيري واذا ازوج اجي اكلب العرس عزه عليكم اموته بيدي

ضحكت بصوت كالت ... ميخالف كافي كلبتيها مناحه راح يشنقوج

ماخليت ايه ما قريتها سامحت شكو بشر شايفته حتى حارس المدرسه مره تكاونت ويا من جنت زغيره وكطيت عليه حجاروفجيته براسه مدري عايش لو ميت يله مسامحتك

حطولي البنج كمت اغمض عيوني بس ما اريد انام احاول افتحها بس ما اكدر ومدري بعد بنفسي

عاليه .... طلعوها من العمليات تهذي غالي
.
.
.
.

يتبع

💙🥀💙