هذيانٌ بين جمرٍ وجليد ..(ارملة اخي المجنونة)

49//

السلام عليكم
رواية هذيان بين جمر وجليد ..
الفصل ثمانية وأربعين ..
نورا ناصر ..

****

شمسوين...
آنه وگلبي عفتونه بمسية آخ"
نتحسر
چآ ذآك ألتعب وألشوگ
مآغزر'💔

****

فرح ..

سمعت صوت سيارة دخلت للكراج مال المزرعة
كمت على حيلي طلعت من الغرفة واني الف شال على راسي وامشي بثكل ورجلي منملة لان هواي كاعدة..

طليت من شباك الصالة شفته علي نزل ونزلها وياه
مبينه منعسة شعرها كيرلي اشكر مفتوح حد كتفها وفيونكه بيضة بنص راسها ..

تمشي مثل البطريق وتباوع لخطواتها ، بيد لازمة ممة والايد اللخ لعابة مدري دبدوب ابيض مخليته جوه ابطها وتمشي ..

تقربوا شرار وموج سلموا على الشيخ وبعدها شرار شالها وظل يبوس بيها وظل رافعها ليفوك ويحاجيها وهيه تباوعله مبتسمة ونظرات خجل و استغراب على وجهه .

سمعته كاللهم وين ام جاسم!!
قوست شفايفي وهزيت راسي نننن ام جاسم كلش مشتاق لام جاسم انته لو كاتل روحك عليها.

طلعت اباوعله وكفت بالباب بس لا سلمت عليه ولا كتله حمدلله ع السلامة وگلبي مليان منه غل وحقد ..

هو باوعلي بنظرة عدم رضى واني بقيت اتفرج ..
لزمها من ايدها واجه باتجاهي ..
كال جبت يمج بنت المرحوم حتى تديرين بالج عليها ..

كتله بنبرة سريعة امها وين ؟

سكت وباوعلي بنظرات اجهل تفسيرها
يمكن عباله لمن اسأله عن امها قصدي ماريدها يمي
بس هو مو هيج ..

اني سألته اريد استفسر ليش اخذها من امها معقولة سجنها ؟؟

تجاهل سؤالي ورد عليه بغير كلام ..
كال اريدج تديرين بالج عليها ، تخافين الله بيها وتعتبرينها بنتج وعلميها تكلج ماما وخلي تربى ويه اخوها ..

باوعتله بنظرات باردة وهزيت راسي ، كرفصت كدامها رغم ثكل بطني والحمل ..

اخذتها من ايدها ودخلتها جوة .. وجتي موج ورايه
دخلنا للغرفة وويانه فاتت المرية الي مرات اشوفهه بس ابد متحجي ولا حتى عبالك تسمع ..

مو دائما اشوفهه مرات واكثر شي من يجي علي الدر ..

هيه متسوي شي احنه البيت هذا الي كاعدين بي احنه نسوي حاجاتنا بنفسنا الريوك الصبح على شرار هاي متعودين عليه ..

يومية الصبح يسوويلنه حفلة يم الباب ويكعدنا نروح للمطبخ الريوك جاهز ..

بس هالايام مطنكر ونافخ ريشاته مدري شبيه يمكن مل من موج ، الله يساعده هيه من تلح على موضوع خلص تقفل بعد تحصله يله تسكُت ..

والغدة هيه موج تسوي والعشه اني مااتعشى لان تصير عندي حموضة وهاي الفقرة اكرهه بالحمل وخاصة بهالاشهر ..

عاد راس الجزر جاهز مخليته جوة المخدة اكرطه وانام ..

وهم يومية انظف و دانيال يزعبل واكعد ارتب وراه وامسح واساعد بغسل المواعين ..

الطبيبة رحت مرتين من لمن اجيت لهسه اخذوني موج وشرار جيكت حالتي وكالت كل شي طبيعي الحمدلله ..

لمن طلعت المرة نطت موج كالت اشو فجاة يجي ولا ينطي خبر انخلسنا بجيته ..

خزرتها واني ساكتة هيه ارتبكت وقربت مني وهمست
مو شرار قبل نخابر أحمد ومدام اجه علي مراح نحصل على شي بعد ..

ظليت اباوع للطفلة وهيه نظراتها تتوزع بيناتنا ومبرطمة ، اخذتها موج خلتها على رجلها وتبوس بيها وتحجي وياها ...

واني مصدومة من اجت لهسه ومحتارة شسوي وجية عليه همينه ربكتني ..

وهو كل مرة من يجي افرح اكول سامحني بس من اشوف نفس النظرات ونفس النبرة اضوج واتوتر ..

لشوية گعد دانيال يفرك بعيونه ، اخذته بوسته وهو يتمطط واني اضرب على صدره بخفة وابوس بخده ..

واحجي ويا بغصة : واكوله شوف الدادا الي جابها الك بابا حتبقى يمك وتلعب وياك ..

هو انتبه عليها كاعدة بحضن موج ، كام من حضني وراح لخالته وانوب عود يريد يكعد بحضن موج كعد على الطفلة ..

بسرعة اخذته موج وهيه تضحك عليه وخلته كاعد يم اخته وتحاجيهم اثنينهم ..

البنية مبينة نعسانة خطية وتعبانة من طول الطريق
وظلت تباوع للوجوه وتكول ماما ..

اخذتها خليتها بحضني وانطيتها ممتها تشرب بيها
دانيال شافها ومبين من هسة اشتغلت الغيرة ..

اخذتها خليتها على المخدة وظلت تشرب الممة الى ان غفت ونامت ..

بعدها سمعت صوت علي الدر يصيح ووينها ام جاسم ؟؟

ظليت كاعدة بمكاني ، صح انتفضت بداخلي بس من بره بينت ممهتمة ..

موج كرصتني كالت ولج كومي يصيحلج شوفي شنوو يريد عيب ترة ..

ظليت اهز اكتافي و راسي برفض .. باوعت لباب الغرفة
شفته محتل فتحة الباب بكل جبرووت ويباوع عليه ..

كمزت موج وراحت تريد تطلع ، هو سوالها مجال وطلعت ..

دانيال راح يركض شاله و حضنه يبوس بي وفرحان
ويأشر على فاطمة يكوول بابا اووف اووف دادا عنونه .. ((شوف شوف دادا عنونه))

هو خله ايده على راسه ويحجي وياه بحنية ..
_ اي حبيبي هاي اختك ، اريدك تدير بالك عليها خووش!! عفية السبع الزلمة ..

دانيال كاسر ركبته على فطومة الغافية ويهز ركبته بموافقة ..

وره مخلص حجي ويه دانيال باوعلي اني جنت صافنة عليه لم باوعلي اجت عيني بعينه ثواني و درت وجهي

اجاني صوته وهو يكول مثل ماكتلج فرح تديرين بالج على الطفلة خوش ولا تسألين عن امها ..

باوعتله كتله مدام ما واثق مني راح ادير بالي عليها ليش جبتها الي ؟

اجه وگعد يمي على السرير
كال شبيها ام جاسم مطنكرة اليوم ؟

خله ايده جوه حنجي ودار وجهي عليه
يريد مني إجابة لأن طالت فترة صمتي ..

رفعت حواجبي : لا والله ؟ وتسألني هالسؤال ؟ وانتَ أكثر واحد تعرف شبيه .. انت تريدني ملاك ومعيشني بجحيم

كام على حيله يباوعلي واني كملت
تعبانة علي تعبااااانة .. انته ماترحم

عدل البشت مالته من يم جتفه ويباوعلي
رافع تك حاجبه وبعيونه نظرة مكر
_ اجيبلج ضرة تساعدج؟

فتحت عيوني بجنون وكفت وكفة على السرير .. حتى دانيال خررب من الضحك عليه ..

كتله بعالي صوتي هلووو تريد تتزوج عليه لا والله اعتبر نفسك ماشفت شي من خبالي الفات هذا كله

راح سد الباب بسرعة وكال صووتج صووتج البيت مليان ناس شيكولون عليج ؟ مرة الشيخ مايطلع صوتها

وبعدين ضحك بثكل وكال يعني تعترفين بنفسج مخبلة اذا هيج معناهه يحق لي اتزوج ..

حسيت على روحي وبردة فعلي المبالغ بيها ، لا مو هاي المرجية منج ام جاسم ، اخذي ثكل وخلي يفهم انو ممهتمة بس بعديش !! بعد ما انلاصت ..

كعدت بأريحية وكتله اتزوج شكو بيها بس ها خلي على بالك تطلكني ترة والله هالمرة حصلتني المرة الخ تضل طول عمرك تدور عليه وما تلكاني ..

كال شنووو هاي ام جاسم صايرة تعرف تحجي لا وتهدد همين ؟ انت كدها كلمتج ام جاسم ؟ اتزوج يعني!

خليت رجل على رجل وامط بشفايفي ..
كتله وليش مستهين بيها ام جاسم ! ماسويتها وشردت ؟ ولو ما اختي جان هسه انتوا ولا تدرون بينا وين ..

ظل يدور بالغرفة واديه وره ظهره ويحجي
_ غير لو انه صاحي وبوعيي جان كدرتي تطلعين شبر بره بغداد لا والله واحلف ع القرآن جان ماكدرتي ..

بلعت ريك اي والله ماجذب حجيت بداخلي ..

كتله اي امنت بالله بس هذا عقابك شوكت ينتهي ..

كال بغموض بعده مابدأ ..

عضيت شفتي عزاا اي والله ..

اندار عليه كال شنو ااشتاقيتي للقصر والعركات والمكايد والمغثة لو شنو ؟

لاء بس انته لشوكت تظل هيج وياي!! محسسني غريبة لا والله عبالك اني والماكو سوى!!

وشتردين اسويلج اكلج عفية بنيتي شردتي مني!! اخذج بالاحضان واطبطب عليج!! لو ما لازمج جان انتِ هسه وين بالله ؟

صرختت اني دااختنك هنا دااختنك اريد اعيش حياااة طبيعية شنووو ملكتني احتكرتني حرام عليك ..

كال بصياح غلطتي تحملي النتيجة ..

كمت ع حيلي بانفعال اديه ترجف ..
اذا تبقى هيج حابسني وتعاملني والله حتى حملي حيطلع مو طبيعي ..

شبي حملج كلشي مابي جنه العافية مو طمنتج الدكتورة بطلي تمسكن خوش ..

انه رايح ماوصيج ع البنية بعد اعتبريها بنتج وديري بالج عليها ..

طلع طبك الباب واني رحت وراه وظليت اضرب ع الباب شكد خبيث ياربي شگد قاسي ومتعجرف شكم دوب حيعاملني هيييج ..

كعدت ع الكاع انتبه دانيال عليه جان يلعب
اجه يبوس براسي وحاضن راسي .. والطفلة هم كعدت تبجي خطية رحت سكتتها ..

هو بس جاي جايب البنية ... ولا كلف روحه يكلي شلونج ..

انوب اليوم متطوريين صاير يحجي بالزواج الثاني
صخااام "لطمت خدي" بس لا يسويهه!!!

اي والله يسويها لعد ليش يكول اعاقبج اكيد يعاقبني بمرة ثانية هو هذا هم حظج ام جاسم ، سنين هو متزوج ولمن تزوجني انفتحت الجبسة مالته ومو بعيدة يتزوج وحدة واثنين وتلاثة ..

بعدها ظل ع الغده هو ، بس اني بقيت حابسة نفسي بالغرفة وما طلعت اله ..

اخذ الجهال وظل يلعّب بيهم . .. موج مشطت للبنية وسوتلها تسريحة حلوة وراحت ويه علي الدر هي ودانيال ..

موج ..

بعد ماراح الشيخ علي الدر استلمت شرار أكس مربع
ظليت الح عليه بالساعة تقريباً واززن براسه وين ميروح اروح وراه ..

هو اول شي يحجي ويصيح بس بعدها تعب من الحجي واني ما أسكُت ..

ظل بس يفرك بلحيته ووجهه ويرجع بشعره ليفوك وينفخ ويتأفأف من الملل ..

التاف عليه كال اكلج احد كايلج انتِ مكروهة لمن تلحين !!

رفعت اديه بالهوا كتله والله حبيبي انته اذا صدُگ تحبني مثل متمول تتحملني وتحبني مثل ما أني ..
متكره شي بيه وهذا اني طبعي هيج ما اسكت عن حقي ..

كال وهو يتقرب مني و بخدر اووف تردين حقج سهلة ..

فتحت عيوني متفاجأة ودفعته من صدره
لااا تغيير الموضوع شرار انته وعدتني تره
وهسه راح أخوك شنو ليمنع ماتخليني اخابر

انطاني ظهره وكال بعصبية اووووووووو وكام من يمي ...

وبعدها التاف عليه مقلص عيونه كال ممنتبهه على نفسج متكولين حبيبي اله من تكونين عصبية ..

خليت ايدي على حلكي اكتم ضحكي

رفع تك حاجبه وراح ع البلكونة وكف ويباوع للشط .. شفت موبايله ع المسطبة اخذته ورحت ركض يم فرح ..

فرح ..

جنت دا افك عركة الجهال فاطمة تكوله داسم ((جاسم)) وهو ميقبل يكول اني اسمي تاني ((داني)) وميحب اسم جاسم ..

وهيه توهه متعلمة تحجي وترفع حواجبها وتكوله داسم داسم ..

وهو يضرب ايده على رجله ويكول اووف لبي اوووف لبي اتتلها .. ((اووف ربي اكتلها)) ..

وكلساع يريد يكمشها من شعرها واني اصير بنصهم وهم شبعت كتل منهم .. وهيه انوب ولا تخاف تباوعله خربانة ضحك ..

اخر شي كتله اني جاسم والله جاسم وجبار وعبد الاله وكولشي بس فكوووني ..

ابتليت بلوى من سميتك هالاسم .. هاي يمكن علي الدر كايل لفاطمة اسمه جاسم ..

واني ع هالحال طبت موج تتلفتت وسدت الباب بسرعة وراحت ركضت للكنتور فتحته وكالت اذا سأل عني شرار كوليله مشفتها ..

كمت ع حيلي رحت وراها عزااا شصاير ولج ؟

كالت اخذت موبايله اريد اعصبه مدام جذب عليه وخان الوعد ..

الكنتور يصير من كناتير قبل هو بابين بس قووي حيل وخاناته كبيرة كوولش ..

كلما اباوعله اتذكر فلم نارنيا لمن يفوتون بي الاخوة ويروحون لعالم ثاني بغابة وبالثلج وساحرة الثلج وأسد وتصير حرب بينهم ..

عاد هيه هم رشيقة يكفيها فاتت وسديت الباب اني

هو ما طول واجه وراها دك الباب رحت فتحته ..

كال بنفاذ صبر وينها اختج ؟ اللحوحة هاي !

نطيته ظهري ورحت كعدت يم الجهال
وجاوبته شمدريني موو جانت يمك ؟

كال فرح ادري بيها اجت يمج واحجي لا تجذبين

كمت على حيلي معصبة جذابة شرار جذابة سويتني ؟؟ نعم الله عليك اني مرة اخوك الشيخ من شوكت اجذب عليك ؟؟

دنحجي ررن الفون مالته بيد موج الثولة وهيه بالكنتور صايرة زعطوطة كلش..

فشلتني طلعت جذابة من وراها شكد عيب لو مفتنة عليها مو احسن

بس جان هم طلعت ام جاسم فتانة ..

باوعتله بارتباك وهو ابتسم ونظرة انتصار على عيونه ورفع تك حاجبه وكال لا حشاج من الجذب عيني مرة الشيخ ..

وصل يم الكنتور موج دفعته وكمزت منه كلتله هاك هذا فوونك ..

كاللها اريدج انتي والتليفون ...امشي وياي يله ..

كلتله اخذ تليفوونك ورووح يله ..

شالها خلاها على كتفه صار راسها ليجوة وشعرها بعد شويه ويطخ بالكاع ... وهيه تحوس وتضرب على ظهره و تريد بس تفلت منه ..

والجهال خربوا عليهم من الضحك طلعوا وسديت الباب وراهم واني ادردم بسبب الموقف السخيف الي نحطيت بي ...

روحوا ناركم تاكل حطبكم اي والله بحالكم اني بحال سوالفكم الله يطيح حظكم ..

الي يشوفهم يكول عليهم زعاطيط وجهال لو بالغين
يعيشون فترة مراهقة متأخرة ..

موج ..

مرت كم يوم .. شرار كال يله حضري نفسج دنرووح ..

باوعتله شكوو وين نروح ..

فرك وجهه بتوتر نحضر لزواجنا هالاسبووع ..

انتفضت نحضر شنوو انته تحجي صدك عوود ؟؟ تريد تسافر صح ؟ مستعجل ع السفر!

كال اي موج اسافر وبعدها من يصير وقت التقديم ع الجامعة اجيج ..

روح سافر ما اتزوجك شرار ولا اعوف فرح وحدها هنا همين ..

التاف عليه بعصبية اكوولج موت اذا تبقى فرح هنا طول العمر انتي هم تبقين ؟؟

جاوبت بإصرار : إي طبعاً هايه أُختي شوون لعد اتخلى عنها تريد صدك جذب منك شرار ؟

كيفج لعد القرار بإيدج تردين تبقين هنانه ويه فرح إبقي اني اسافر وبعد معليه بيج حتى لو فرح طلعت منانه انتي تبقين هنا عقوبة الج ..

فرح متعوفني مثل ما اني ما اعوفهه .. وماخليها وحدها ويه الغربة ..

منو كالج هيه حتبقى ويه الغربة!! مووج يله عاد لتعاندين خلينا نفضها خطوبتنا طولت هواي

اني كاعدة ع الكرسي هو اجه وكرفص كدامي لزم اديه باثنين اديه ..
كال كافي موج الله يخليج خلي نتزوج هالاسبوع امشي وياي لبغداد جهزي اشتري ذهب وهالسوالف الي تعرفيها انتي بعد ..

سحبت ايدي منه ومسحت دمعه وكعت من عيني
كتله شجهز ترة اني حتى مهري بقى ويه جنطتي بالسيارة لمن اخذتونا انتوا ..

مد ايده مسح خدي بأبهامه كال فدوة الج يولي اني انطيج اعوضج اضعاف اضعافه ..

بعدت وجهي عنه وسكتتت رجع لزم ايدي وكال
ديلله عاد كااافي قرري هسه حتى نطلع لكركوك ..

باوووعتله مصدوومة كركوك شنسوي نرووح لكركووك ؟؟

ماتردين تعزمين اختج على عرسج ؟ ماترديها تحضره ؟ ماتردين تبلغين اخوج بزواجج ، عاد مو الهالدرجة تزوجين ومتنطيهم خبر ترة احنه هم نعرف الاصول مانريد نصير مثله ..

عفية شرار لتحجي عليه هيج مو كافي بعيدة عني هو !! وهو راد يحمينا!!

اي يحميكم بس ليش راد يهربجن وانتن زوجاتنا؟؟ ها انت مو ع ذمتي شنوو اني طرطور لمن رجعت للعراق ماكلف نفسه يخابر ويحجي ..

زفرت بملل ..

هو كال المهم شكلتي؟؟

شددت قبضة ايدي على ايده الدافية صدك تحجي شرار لو تجذب عليه ؟؟

لا والله احجي صدك شبيج واله اسويلج عرس مصاير
رناااان بمعنى الكلمة اخلي الدنيا كلها تسمع بي ويوصل خبره لأوس وخلي ينطحن طحن ..

كل هذا ومايشفي غليلي اذا ماشوفه ممطول كدامي

سألته عنه ماحصلتوا ماحليتوا االمشكلة وياه ؟
كال ابوه الكلب حاول بالكعدة يحلها بفلوس وبفصل بس احنه رفضنه ، الفلوس ماترد اعتبار النه واحنه شيوخ ..

باوعتله يعني شون حيبقى الوضع هيج ؟ خاف اوس يرجع يأذيكم !!

كال ميكدر اصلا ولا يتجرأ بعد وسمعت ابوه حابسه بمكان وناوي يهربه بس خلي اتاكد اروح ادكهم ..

عفية شرار اتركه سلمه للدولة يحبسوا يولي ..

كال منين اكو دولة تحجين صدك؟انتي؟ حكنا اذا ماناخذه بيدنا نطلع زواج ..

تأفأفت هو اجه وكعد يمي حوط كتفي بيده وسحبني على صدره كال عوفي هالموضوع هذا هسه
بالنسبة للعرس اخذج من بيت عمج همين واذا تردين سوين حنه هم عليه تكاليفها واحجزلج قاعة همين ..

كتله بحزن وغصة لا شرار اني ماريد اسوي حنه بعده بابا حبيبي مصار ست أشهر من توفى .. وبعدين هم ماريد اطلع من بيت عمي مااشتهي بعد كرهتها ..

ليش ولج لاتصيرين حقودة ..

شون ماصير حقودة شرار انته مو كتلي هو باع بيتنا ..

يولي اعوضج اني انسي ..

انته تعوضني احمد خالة انو منو يعوضهم وشون يبقون هيج ؟؟

لاء ميبقون ديلله قرري هسه حتى نطلع باجر ..

وخرت من على صدره كتله خاف تجذب عليه ماارتاحلك ..

كال وداعة ابني ما احلف بي جذب وهو مريض موج دتعرفين شنو يعني مريض ؟ وتاركه صار اشهر
نص هالاشهر كضيتها واني ادور عليج والنص الثاني مكابلج وكاعد هنا وانت مسويتها عليه يابسة وتمن حتى بوسة هم كوة تنطينها ..

ضحكت ودرت وجهي افكر ..
ماكو غير هالحل اني حتى اذا ماتزوجت شرار راح تبقى حياتي بخطر بسبب اوس محد راح يحميني غيره وثانيا شرار مستحيل يتركتي هو مصمم عليه وثالث شي هو يحبني واني هم احبه ...

اعرف راح اتعذب بحبه واغار هوايه بس هو وعدني ميتركني وحياخذني ويا واكمل دراسه ماكو غير انو اوافق ..

تركته ورحت لفرح شفتها محتارة بالجهال خطية تسكت بيهم وتلعبهم انقهرت على حالها خطية الشيخ هواي قاسي عليها ومتجاهلها..

كعدت يمها باوعتلي بنظرة قهرتني كأنها حاسة انو موعد الفراق اجه وقته ..

حجيت الها كتلها اذا انتِ مقابلة ابقى هنا يمج ولا اعوفج وطز بكل شي ..

بلعت غصتها كالت لالا روحي شوفي حياتج اني امري كله بيد علي وانت هم لازم تتزوجين خو متبقين هيج معلكة ..

احنه صح خوات جسدين روح وحدة بس كل وحدة مصيرها وقدرها وحياتها ..

بلكي علي يحن عليه ويخلصني من منفاي هذا .. ونرجع نلتم ان شاءالله ..

لزمت اديها كتلها بس يسافر شرار ارجع يمج وهمينه راح اجيب انين تحضر عرسي واجيبها الج تشوفيها ..

اووف مشتاقتلها والله بس واني هم احضر عرسج لو هم ميخليني علي ..

والله ولا اعرسج اذا ماحضرتي انتي ، اشرد واجيج ..

ضحكت وحضنتها ..

ويوم ثاني الفجر كعدت حضرت نفسي فرح جانت كاعدة ضايجة حيل وعيونها مورمة للحظة ردت ماتركها وابقى بس هيه مقبلت كالت معليج بيه اني راح اتأقلم هنا ماكو غير هالشي .

بعدها طلعنا اني وشرار من المزرعة ...

فرح ..

بعد ماطلعت موج بجيت حد ما احس خلصت دموعي بس هذا الشي لازم يصير هيه خلص بذمة رجال واني همين وكل وحدة مصيرها وحد ..

الجهال نايمين وشفت وحدة من الخرسات تفتر وراي عفتها وطلعت برة بالمزرعة افتر رحت شفت طليان دياكلون بالجزر الي زرعه الي الفلاح الثاني مدري منين جايين هذا هم حظي ..

ذاك الفلاح الي سألته طلع كولشي ميفهم ..وخطية هذا زرعه وكال لو يطلع لو لا مدري ليش ..

واني اموت خوف من الطليان بس الجزر عزيز وغالي على قلبي رحت اركض اخذت عودة وظليت اطرد بيهن

ورافعة كلبيتي مدري منين تجيني الطلايب والله من جوة الكاع الكل متحلف بيه حتى الطليان همينه مدري شبيها وياي الوادم والحيوانات همينه عليه ..

راحن الطليان واني كعدت على الكاع ابجي اشوفهن شمسويات بمزرعتي مال الجزر ..

سمعت صوت سيارة طبت للمزرعة مسحت دموعي وكفت على حيلي باوعت شفت سيارة بيضة دخلت
كلت هذا يمكن علي ..

بعدين شفته مهيب رحت سلمت عليه مبتسمة وكتله حمدلله على السلامة هو خطية باسني على راسي وباركلي ع الحمل ..

دخل جوة سويت له ريوك وكاعدين يمه دانيال وفاطمة يتناكرون وهو يصيح عليهم ويخوزر بيهم واني كاعدة اشكيله على ابوه خطية الولد ابتلى على عمره اجه يمي ..

سألته على سحر كال ابوي طيح حظهم وهم يمكن يحتاجوج لان راح يسوي عليهم قضية بسبب دعوة كيدية
والدعوة باسمج راح تصير ، هيه سحر سمعتها مو خوش وتسوي علاقات وجذب مال امها خبازة وخياطة

وهاي البنية من دمنا ولحمنا مايصير تبقى عند هيج ام ساقطة الكل يحجي بسمعتها ..

كتله والله اني متهمني امها ولا ابوها الكلب الحقير الله يرحمه والي سواه بيه

ضحك كال على كيفج فرح واذكروا محاسن موتاكم ..

كتله هو منيله حسنات

خله ايده على راس دانيال وكال هاي اعتبريها حسنة بعد كم يوم انتي تكبرين وهو يكبر وشوفي شون يداريج ..

هزيت راسي كتله اني اسويها لله واربيها اكسب بيها اجر وهمين ماانسى هيه اخت ابني بس لهيج رغم الي شفته سواء من ابوها ومن امها ..

كال هيه مالها ذنب طفلة ..

كتله اي اعرف بس تبقى لمن اشوفها اتذكر الي سواه بيه ابوها بس راح اكتم بقلبي .

سألته عن ريلام والله مشتاقتلها .

دنك ورد بحزن اخذتها امها وطلعت من القصر ..

تفاجئت ظل يحجيلي شون عاقبهم ابوه وبعدها ظل يحجيلي حتى عن لهيب ..

كتله سمعت صار عنده بنية فرحت اله هدى حبابة
كال اي ولهذا السبب ابوي طردهم من القصر .. لان ضموا عنه ..

تفاجئت عزاا لاعب بيهم طووبة خررب اني احمد الله واشكره بس هيج عاقبني ..

كتله والله مليت منانه حباب مهيب كول لابوك كافي ..

كال شبيج انتي اصلا هنا عايشة ملكة والله

ضحكت ورديت باستهزاء : اي خوش ملكة مكابلة الهوايش وتهش بالطليان ..

ريلام ..

دخلت ماما معصبة حييل وهيام تبجي وصفحة خدها حمرة كالت يله ولج حضري ملابسج امشي نروح

كمت على حيلي افرك بأصابعي وين نروح ماما وشنوو صاير؟

كالت بغضب وين نولي بعد وووين نوولي ؟؟ هااا ؟ بيت جدج ابو ابوج انطردنا منا ..

ياعزاا ليش انطردنا بالله ؟ شمسووين ..

هيام جانت تسب وتغلط وكله على مهيب تكول كله منه هو شكد اكرهه

استغربت هسه ظلت تكرهه ممعقولة؟؟

كتلها ماما انتوا روحوا اني متعودة هنانه ابقى يم بيبي ..

اني كلت هيج وهيه هجمت عليه تضرب بيه وتجر بشعري .

انفتحت الباب بسرعة ودخل مهيب وسحبها مني فكني منها خلاني وراه
كاللها على كيفج عمه ليش تسوين بيها هيج ترة موو طفلة هيه وتضربيها

جان يحجي ومعصب وكوة مسيطر على اعصابه ..

امي ردت بعصبية ماعليك انته ماعليك مو طردتونا منانه وصفيتوا ويه ذيج الغريبة بعد شكوو

كاللها قابل بدون سبب يا عمة وبعدين ابوي ماطردج مو كلج اذا تحبين ابقي بس بنتج ماتكعد هنا وانتي المفروض تأدبيها مو تشجعيها ع الغلط!!

كالت معليكم بناتي وبكيفي

كاللها ريلام ماتطلع منا مجبورة خوش لا تجبريها !!

بهاللحظة جانت نظراتي لامي اني اذا ماتبعتها راح ابقى طول عمري ندمانة واكيد هيه من صدك حتكرهني .

لزمته من زنده كتله مهيب اني اريد اروح ويه ماما ..

التفت عليه والتقت نظراتنا سألني انتي متأكدة ؟

هزيت راسي واني ابلع غصتي هو كال بحزن براحتج وطلع من الغرفة ..

وبيومها طلعنا من القصر ورحنا كعدنا ابيت جدو
كاعدين بي بيت عمي وبيبي وجدو ...

هدى ..

الصبح بعد ما طلع لهيب من الشقة وراح للشغل ، ديما جانت نايمة واني داخلص شغلي قبل لتكعد وانشغل وياها ..

واني بالمطبخ سمعت صوت ضرب قوي ع باب الشقة
وصوت غلط وفشار مو طبيعي انصدمت وقلبي صار يريد يطلع من مكانه من الخوف ..

مشيت بخطوات ثقيلة وكل حواسي تترقب وكفت يم الباب وبعده الدك مستمر ..

صوت رجال مبين سكران ، تأكدت من قفل باب الشقة وطليت من العين شفته الرجال طب بالشقة الي كبالنا ..

ركضت للتليفون وخابرت على لهيب بسرعة حجيتله على الي صار وهو كال بسرعة هسه جاي ..

كعدت بالصالة وخليت اديه على راسي ، مر وقت سمعت صوت الباب تندك ركضت كلت بصوت يرجف منوو؟

رد لهيب بصوت عاصف انيييي افتحي ..

فتحته بسرعة دخل ووجهه مغيم لزمني من زنودي بعنف وقسوة تأوهت بألم وظل يصيح بوجهي وووينه هوو ولج ووينه خوو ما فتحتيله الباب!!!!

يتبع ..

اعتذر منكم ☹اعتقد تحملتوني هواي بس غصب عليه والله ، النت يمي المشكلة ، البارحة من ساعة ١٠ انا البارت مخلصته اريد بس يفتح النت ينشر ماكو

وهسه طلعت لبيت اهلي ودانشرلكم والله ...

حتى واهس ماكو للكتابة لان لا اشوف تفاعلكم ولا تعليقات بسبب النت

رغم مفعلة ع رصيد بس مايفتح شي ابد ابد وحتى المجاني مال الفيس هم ماكو حتى ابلغ انو معندي نت
خابرنا الشركة يكولون راح نحل المشكلة وهم بعده مليفتح ولا كدرت صديقتي تفتح حسابي يمها هم كلها مسدودة بوجهي

ولا اكدر اختمها ببارت وببارتين لان كومة احداث بعد

لذلك اسمحولي اوقف الرواية لحد ١ / ١٢
الى تنحل مشكلة النت يمي وارجع انشر بشكل يومي

اكرر اعتذاري منكم بس هالشي خارج عن ارادتي والله ..