هذيانٌ بين جمرٍ وجليد ..(ارملة اخي المجنونة)

48//

السلام عليكم
رواية هذيان بين جمر وجليد ...
الفصل سبعة واربعون ..
نورا ناصر

****

أنا أقف تائهة في منتصف الطريق الحزين
أجهش و أبكي بنحيب
لاتساءل؟
هل لي بخلاص من هذا الحزن الكئيب
هل لجروحي الدامية بطبيب
هل لي احد على من يضلمني حسيب
فتزداد حيرتي وتكثر تساؤلاتي..؟
لماذا أنا
لماذا كل حياتي عقبات اتعثر بها في الطرقات
متى سيكون طوق النجاة فوالله قد تهشمت روحي الالاف المرات...
بقلم الكاتبة Cndrila_333

****

كملت راس الجزر كرطته كله ووياه مسحت دموعي ..

تحسرت ولفيت الشال ربطته على ركبتي مثل الي يريد يعدمونه بحرگه وطلعت من المطبخ ...

هرمونات الحمل مأثرة عليه دمعتي تريد الها الحجة بس حتى تنزل .. وتغسل وجهي بالدمع الغزير وياريت
تغسل وياهه هموم قلبي ..

رحت للغرفة شفت موج تسطر بالملابس وتحطهن بالكنتور هنه كلهن سود لأن احنه لابسين اسود بعدنا على بابا ..

اخذت ثوب مال حوامل حلو لبسته ولفيت الشال عدل وطلعت ادور على علي الدر ..

رحت شفته واكف يم بحيرة البط ويمه شرار ونسوان اثنين .. وحدة من النسوان هاي الي جانت كاعدة يمي عبالك تحرسني لمن كعدت من النوم ..

جان هو يحجي وهم مندمجين ودانيال يمهم يلعب ويشمر اكل للبطات ..

تقربت منهم شافوني هو سكت واني ضجت اكثر ..

كتله ليش سكتت احجي ؟ شنو الموضوع ! اذا الموضوع يخصني احجي خلي اسمعك ..

الشيخ كاللهم يله بويه توكلوا على الله ..
هو كاللهم هيج وهم كلهم راحوا .. ودانيال تبع شرار وذاك لزمه من ايده وراحوا يمشون اثنينهم ..

واني تقربت منه وهو بقى يباوعلي مخنزر عيونه
كتله شنو اذا حضرت الشياطين غابت الملائكة ؟

ظل يباوع لهيئتي بتفحص لأن قبل شوية جنت مبهذلة هسه لا صرت مرتبة ..

باوعلي والتاف على البحيرة وانطاني ظهره وكال زين تعرفين نفسج شنووو..

رحت وكفت يمه لزمته من كتفه وكتله
علي شنو هالمعاملة القاسية هاي ؟ ترة حرام عليك
انته روح حاسب الي أذوني مو بس اني تحاسبني!!

التاف عليه نصف التفاتة : ومنو كلج ماعاقبتهم ؟ محد يفلت من عقابي كلكم لازم تتعاقبون هذا هو العدل ..

حجيت بوجع وغصة : واني الي الحصة الاكبر مو ؟ دوم اني واكعة بيها شحصلت منك غير العقاب والحبس والضرب ..

كتلج من ايدج وانه عاقبت الكل بالعدل كلمن حسب خطأه وجرمه ..

وبعدين انتِ راح تظلين تشكين هيج؟ مو حتى البومة ماتشكي تون بكدج !

شبيج هسه انتِ شبيج!! ابنج يمج اختج شريكتج بالهروب يمج والطبيعة حلوة هنا تحسن مزاجج همين ..

_ واخويه المنفي واختي البعيدة عني!! وانته انته صارلك بالاسبوعين ما سألت عني ..

كال بعصبية اخووج من ايده مثل ما راد يحرمني من بنتي وبعدها ماجايه للدنيا ومن ابن اخوي الي ربيته وتعبت عليه ، احرمه من خواته ومن ديرته هذا العدل ..

وبعدين تعاي جاي ترديني اسأل عليج وأحن موو؟؟ ليش انتي مو تركتيني على فراش الموت وشردتي ومن صحيت ما كلفتي نفسج تسالين لو انه غلطان ...

ارتبكت ودرت وجهي ، عيوني ماخليتهم بعيونه ...
وهمست بتوسل لا عفية مو هيج ترة احمد جان يريد يحمينه! حرام عليك لاتصير ظالم .

لزم عصاته باثنين اديه ورفع راسه بشموخ
وكال انه مو ظالم بس الي يندك بيه ما أرحمه والي يغلط وياي يتحمل غلطه..ويدفع الثمن ..

_ واني شنو مصيري!!! ها علي شنو مصيري!!

_ ذبي حملچ والله كريم بعدني ماناسي افعالج وعقابج بعده ما بلش ..

_ شتعاقبني ترة اني حامل ببنتك ..

_ ولأنج حامل ببنتي عقابج راح يصير غير شكل ..

_ شلون يعني ؟؟

_ هسه تشوفين والايام الجاية راح تتوضح اكثر ...

ظليت أشر بديه بعد ششوف ماتكلي!! مو كافي اني منفية!! اخويه منفي مصيري مجهول هنا بمكان حتى مادري بي وين ..

باوعلي وتأفاف بعدم رضى .. وانطاني ظهره .. واني احجي وهو لا عبالك يسمعني ..

احنه واكفين على طريق مصبوب وعلى جوانبه البحيرة والجانب الثاني ارض ورجال ديقلب بالتربة بالمسحاة ..

كتله السلام عليكم عموو ..

هو بدون ميباوع عليه وكف عن شغله ورد السلام ..
كتله بلكي تزرع الارض هايه جزر ..

هز راسه صار تدللين بويه بس هسه مو وكته منا لشهر الثامن يله نكدر نزرعه ..

برطمت شفايفي وظليت ادردم بصوت مايوصل للفلاح بس للجلمود المتحجر عديم المشاعر والاحساس الواكف يمي ..

يله ميخالف اني الكل خذلني ظلت ع الجزر مايخذلني ويخوني ، منين اتلكاهه يربي من الجزر الي راح يخلص من دانيال الي محايلني من الناس المأذيتني ..

هو باوعلي كاتم ضحكه وكال ارجع واكول من ايدج ..

اي هو ك وبترت جملتي باوعتله انتبهت لابس الغترة الي اخذتها ختام مني ..

لزمت اطرافها اتفحصها بذهوووول ..

هو لزم ايدي وخرها وخزرني .. ونظراته تتجول خاف احد يشوفنه ..

اني مهتميت وكتله عزااا علي هاي مو جانت عند ختام شون رجعتها ..

ضرب عصاته على الارض بقوة وتصميم
كال مو شغلج يله رووحي طبي جوة كافي لغيتي هواي ..

بدون وعي مني عليت صوتي
كتله انزعها علي انزعها خاف مسويتلك بيها سحرررر ..

فتح عيونه الصارمة على اوسعها وظل يتلفت
وبنفس اللحظة لزم كف ايدي جعصها حيل ..

_ سدي حلكج كافي ولج انتِ شنوو؟ ماراح تكبرين ماراح تعقلين ؟ كدامي ع البيت يله كداااامي ..

ابتسمت ببلاهة راح ترجعني للقصر وياك يعني لغرفتي غرفتنا اني وياك ومكاني مووو؟ اي والله تعودت هناك بروح ابوك رجعني .. هنا كلش كآبة ..

خزرني بغضب واشر ع البيت هذا البيت هذاااا البيت امشي كدامي ونصي صوتج يله ..

اخذني للبيت دخلني بقسوة واني ظليت امسح زندي مكان قبضته متألمة التفتت عليه ..
كاافي وكف محاكمتك الباطلة هاي اني مظلووومة شبعت من ظلمكم كااااافي ..

طلكني ورجع اخويه واختي نعيش سوى ويمته ماتريد الجهال اخذهم هذا احسن حل ..

باوعلي رافع تك حاجبه : صايرة تعبين عقلج وتفكرين

كمل : شوفي بالمختصر لا الانفصال يريحنا ولا تبقين على ذمتي نرتاح ..

وبعدين انت ماعندج غير هاي الحجاية طلكني وطلكني!!

التاف وباوعلي بنظرة نارية مصممة : و أخوج مايرجع انسيها هاي ..

حاجيته واني ارجف بس هذا ظلم علي ظلم ..

باوعلي بنظرة شرسة لعد الي سواه اخوج شسمينه بالله هااا ؟ لمن راد يحرم اب من بنته والعكس شسمينها هاي ؟

بعدت نظراتي منه بعد ماكدرت اتحمل قساوتهم .. شكلها نار الحقد مراح تطفى ابد .. ولا راح ينسى الي حاولنا نسوي ..

احبه اي بس اكره غروره وتسلطه واكره هاي الوكفة الي بيها يحاسبني بكل جبروت ومايرحم بيها ضعفي ومرضي وألمي ..

مشيت صوب الغرفة امشي وابجي وادردم
والله ظلم ياربي يمته تاخذ امانتك تعبت عبالك عايشة مية سنة لا والله الف الفين سنة حملي وعذابي هذا مو مال مية ..

دخلت للغرفة الباب مفتوح وموج ماكو فتحت شالي وشمرته على الكاع واني امسح بدموعي احس الدنيا كلها مسودة بوجهي ..

نمت على الدوشك صفح وبعدها نمت على بطني
حسيته فات ع الغرفة ..

ووكف فوك راسي بعد لحظات صمت بس اسمع صوت انفاسه جانت مزيج حسرات آهات وانزعاج ..

الى تسربت لاسماعي نبرة صوته وهو يأمرني ..
_ لا تنامين على بطنج نامي عدل يله ..

غمضت عيوني وفركت وجهي بالمخدة وبقيت ساكتة ابد ما حجيت بس صوت نحيبي الشبه صامت ..

حسيت بي لمن كعد يمي ، لحظات وحسيت ايده القوية على زندي وهو يلفني عليه ويحاول يمددني على ظهري .. ومثبتني باديه من زنودي وجهي مقابل وجهه ..

عاندت وتمردت ورجعت على نفس النومة
نمت على بطني واني اكوله عوفني معليك بيه حتى بهاي تتحكم ..

اخذني كلي لحضنه اجه وجهي على صدره ، تخللت لانفاسي ريحته ..

بالعادة الحامل تكره العطر والريحة بس اني هنا لا بالعكس لأن محرومة منها ..

ظليت اتلوى بين ذرعانه احاول اخلي يفلتني .. بس هو زاد من تقريبي اله حتى صار مايفصلنا عن بعض انش واحد .. سرت القشعريرة بجسمي لمن قرب حلكه من اذني وصار يهمس ..

يهمس برقة ضيعت دگات گلبي
_ اششش خلي بنيتي تنام وترتاح كافي شكد تتحركين ترة جاي تضوجيها ..

همست جعلني بنيتك ... وتخاف عليه هيج ..

كال شنو

كتله انام انام هو اني شعندي غير النوم واكل جزر واتعارك ويه دانيال واخبث على موج وشرار وادردم عليك هيه هاي حياتي صايرة هيج هااالايام ..

حسيته ابتسم سمعته سوه هيج هه
وانفاسه لسعت بشرتي ورة اذني ، ايده على بطني يتلمسها وايده الثانية لازم بيها اديه ومخليهم على صدري ..

غفيت على انفاسه ولمساته .. لمن كعدت حسيته فك حصار اديه من بين قبضته الخشنة ..

كعدت التفتت شفته غافي وايده على عيونه .. واللخ مددها بصفي .. حبيبي يمكن تعبان من الطريق اكيد طويل من بغداد لهنا ..

ظليت اباوعله ثواني .. وبعدها خليت راسي على كتفه وحوطت ايده الي مددها يمه ورجعت غفيت ..

بين الوعي والاوعي جنت احس بشفايفه على كتفي وركبتي ولحيته وشواربه تبزز بشرتي ..

لان الثوب الي لابسته على طول الدلعة لاستيك ينسحب وينزل بسرعة بدون معاناة ..

وعيت على حوسته بالغرفة فتحت عيوني شفته واكف ديلبس بعبايته الرجالية جان لونها رصاصي ..

نزلت ثوبي جان نازل على زندي ورجلي هماتين طالعة غطيتها ..

همست بتوسل ونبرة مبحوحة بسبب النوم
علي فدوه ..

هو اجه قرب مني ، ثبت جسمه باديه على السرير
وحصرني وصار قريب عليه ..

تكلم ببرود وهو يتأمل ملامحي المصدومة...
كال اسمعي فرح مال ترجعين وياي لو ارجع اخوج هاي شيلي من بالج نهائي لان حلم من احلامج هذا .

مثل ما عاقبت اهل بيتي ومااستثنيت احد من عقابي وحتى لا اصير ظالم وبس على ناس وناس لا راح اعفي عنج ولا عن اخوج وهذا اخر كلام عندي .

ظليت ابجي بصووووت عالي شمر الغترة عليه وطلع القاسي البارد المتعجرف ناوي يموتني والله دكافي حقد انته ماتمل ماتمل ..

اخذت الغترة وشمرتها ع الجرباية عود شنوو هاي كافي عليه ..

اتخذت وضعية الجنين وصفنت يربي والله مليت يعني محبوسة هنا وما اعرف شنو مصيري وهو يكولي تشكين مثل البومة!!

دخلت موج واجت كعدت يمي ..
كالت هاا شنو صار ولج شكد فشلة دانيال رادج ظل يبجي عليج وعلى الشيخ اجيت جبته الج هنا واشوفكم نايمين والوضع رومانسي كلش ..

وظلت تفرك باديها بحماس ..

اباوعلها وافر ايدي ولج انتي شمسوي بيج شرار شمسوي لو من عاشر القوم ؟ صار منهم ؟ صاير تفكيرج كله بالرومانسية ..

كالت اي بس اظل احسن منج لمن شفت هيج كلت خل ياخذون راحتهم خطية وانتي نهارج كله تدفعين بابنج علينا وتخربين كعدتنا ..

حتى لو اريد افر راسه بكلمتين داني يخرب ام السالفة ..

قلصت عيوني شرار تفرين راسه بكلمتين ؟ عقلج وينه ؟؟

أي افره والايام بيننا ، المهم الشيخ مكالج على احمد احنه شوكت يطلعنا منانه .. شرار ميحجي ويكولي لتلحين ..

هزيت راسي انسي موج انسي يكول نفس ما عاقبت اهل بيتي وماعفيت عنهم انتوا همينه حالكم حالهم ..

فتحت عيونها ياا عاقبهم صدك ؟؟ شلوون ؟؟

مهيب...

دخلت عمتي بلقيس هي و هيام باوعت لهيام جانت لابسه صايه مزركشه وشال ملمع ومكياج قوي
ياربي ما احبها ماتنطاق ..

مو مثل ذيج ذيج مثل النسمة ما تأذي احد حرامات ذن تقاسمن ضلمة الرحم سوى ..

اكيد هيام ببطن امها جانت هم تسوي مشاكل لريلي يايابه شلون تفكير طايح حظه و تافهه...بس هيام كلشي يطلع منها...

دخلت على ابوي جان كاعد بالمكتب مالته وحاط راسه بين جفوف اديه الضخمه بهيئته المهابه من الكل..

دكيت الباب حتى اثير انتباهه هو بسرعه رفع عيونه اليه بعد ما ابعد اديه من وجهه وهز راسه اليه باستفهام بمعنى شكو؟

باوعتله وحكيت ركبتي بتوتر
_ يابه اجتي عمتي وهيام ..

وكف بعصبية وباوعلي بغضب شديد وبنبرة أمر
_ روح صيحهن بسرررررعة وخليهن يجني للديوان ماريد حبوبتك تسمع بلي راح يصير وتنقهر ..

فزيت من مكاني ورحت بسرعة عمتي نزعت عبايتها وسفطتها صحت عليها
_ ابوووي يريدج عمه

دارت وجهه عليه بحركة سريعه ومصدومه
هاا شيريد اني هسه اجيت يالله شمسوين من مصيبه وتردون تبلونه بيها...

رفعت حاجب بعدم معرفه وكملت بهدوء
_ وهااا يكول خلي هيام تجي وياج بالديوان ينتظركم ..

حطت ايدها على صدرها بخوف
_ ياا وشيريد من هيام شمسويه هيام والله اخووي لو يكول ما اريدكم بالقصر.احسن بعد ليش كل شويه ورزلنه وهجم علينه؟

مجاوبتها ، عفتها ورحت للديوان بره ، دخلت لكيت ابووي واكف وكاف ارادانات دشداشته السودة ..

وجهه جامد وعاكد حواجبه بقسوه وجهه يعبر عن عاصفة هوجاء راح تصير بهالمكان...

شويه ودخلت عمتي بلقيس وهيام و وجوهن مخطووفه ويتلفتن وصفر...

عمتي سلمت بضحكه متوترة : هلا هلا خووويه شلونك والله ..

تقدمت خطوات وهي فاتحه اديها دلاله على رغبتها باحتضانه بس هو خله ايده كدام وجهه ممتنع من قبول سلامها...

وكفت بفشله ودارت وجهه عليه وعلى هيام بضحكة كاذبه...هههه خويه على بختك ليش ما تريد سلامي

تجاهل كلامها وتقدم خطوات بسيطه من هيام الي رجعت خطوات وهي تعصر بطرف من جبتها السوده المزكرشه...

لزمها من كتفها بقسوه عارمه وتكلم وهو صاك على اسنانه : احجيلي من الالف والياء واذا طيرتي حرف يا ويلج ويا سووواد ليلج...

بهتت ملامحها دلاله على رعبها من ملامح وجهه القاسية وردت بخفوت ورجفة وعيونها تطلع اله وترجع تنزلها منه ..
_ على شنووو ؟

مشى خطوات واثقه وتقرب من القنفه وسحب الموبايل اني على شنو متعب نفسي ودليلي بيدي اسمعي واحجيلي

فتح التسجيل وهي بلعت ريكها بصعوووبة وألم
عبالك واحد غاص بلگمه ...

ضلت ترمش بعيونها بخوف وقلق وتوتر وتفرك باديها وترعش من فوووگ ليجوه ...

ردت عليه بكلمات متقطعه وشهكات متتاليه والاحرف تلاشت عندها : اءء والله خخ خالوو اني انظلمت انظلمت وانتم محد فهمني ولا وكف بصفي انتم ما ممم ما تراعوون ظروفي

عقد حواجبه وباوعلي مستغرب ومستهزء وبعدها رجع باوعلها : وشنو ظروفج ست هيام

بلعت ريقها الجاف وردت برجفه : اني سويت هذا كله بسبب تهديد من ام سحر هي ام سحر الي طلبت مني هيج

كملت جملتها بثقه لكن افقدها هل ثقه راشدي قاسي من ابوووي افقدها السمع للحضات ودوه الصووت بارجاء الديوان ..

وكعت على الارض وهي تلمس خدها الي احتقن وصار بلون الدم وعلى صوتها بصرخة قويه هزت اركان القصر

ركضت امها عليها مصدومه من تصرف ابوي وحضنت بنتها و وجهت كلامها اللاذع الابوي : انت بأي حق تضربها ولخاطر منو لخاطر فريحه ام اللسان الي سودت وجهنا والله ما اقبل اي واحد ايمد ايده على بنتي

تجاهل كلامها ورفع هيام من بين اديها و حاول يثبت وكفتها صرخ بوجهه بغضب : باوعيلي ووولج ...

باوعتله وهي تبجي وايدها على خدها خزرها بنظره هزت كل كيانها : وبعد مصايبج كلها كاعده تجذبين وتزيدين الطين بله

لعملج انتي جذابه وما تهددتي من قبل سحر تعرفين ليش؟

نزلت راسها ومجاوبت

ابتسم بسخريه كبيرة وصك على اسنانه وجاوبها
_ لان انتي مسمومة ومستحيل واحد يتعدالج على طرف وتسكتيين

والهالدرجه هامتج نفسج وصورج لو انتي فعلا مثل ما تكولين تحبين شرفج وعرضج وما تحبين احد يتعدى على اخلاقج جان احترمتي نفسج وانتي رفعتي اخلاقج بنفسج مو طيحتي حزج بيدج وطينتي ابو اخلاقج...

وهااا ما اريد اعرف السبب وره عملتج هاي لان اعذارج اقبح من افعالج وهل مره جذبتي المره الثانيه مراح تنطيني عذر صحيح ...

لذلك اني قررت الاتي وهذا ابسط عقاب الج...

نطت من يمها عمتي بلقيس وهي تبجي
_ تعاقب هيام لخاطر فرح ، هيام اليتيمة الي ربت عندك والي هيه امانة ووصية ابوها ابن عمك وصديقك ..

صرخ بيها بصرخة يبست عضامها
_ اسكتتتتتتي انتي محد خبل هالبنيه غيرج ومحد فسد اخلاقها غيرج

فرح حتى لو اعقابها لخاطرها بس يضل شي اقوى من هالشي وهو كلام الزور والتخطيط الباطل وهاي بنت لو نخليها قياديه الداعش جان هجمت كل العراق مو نصه

واردف ببرود : وهسه مثل ما كلت محد يقبل يخليله حيه ببيته لان هالحيه مو امان واكيد تلدغ لذلك خلي عمامها هم اليبتلون بيها
وهم الي يربونها لان هي محسوبه عليهم...

اشر على عمتي بهدوء من بعد العاصفه...وانتي اذا حابه روحي وياها واذا على امي تعالي خطار وشوفيها

لان انتي حتى لو جنتي اختي بس تدخلج زاد عن حده وايقنت انتم كلكم تمنيتوا موتي حتى تتخلدون بنعيم هل قصر وتلعبون بكيفكم...

‏لذلك الاخت الي تخاويني بالحقاره ما اريدها‏ ...

أنين ..

راح يصير شهر واحنه منعرف عن اخواتي شي ، قلبي طك عليهم ..

اتذكر لمن اضوج تكوم موج تسحلني من ايدي وتجبرني العب رياضة وياهه ..

واشتاقيت لفرح ودانيال جنه دوم نتناكر بس بعدين نضل نضحك بقلب مليان سعادة ..

وهسه وين تطشرنا ..

زفرت ببطيء احاول ارجع من رحلة ذكرياتي والعن نفسي الف مرة على غبائي ..

احمد شكد حاول يتواصل ويه الشيخ ودزله جماعة هو الشيخ راكب راسه ورافض وحارمنا من اخواتي ..

حتى احمد خطية استسلم لليأس هنانه وظل يشتغل بمطعم ويه عمر حتى يجمع ايجار الشقة ويعيشنا .

اجه على بالي إحسان ، اسأله عنهم فعلت حسابي وراسلته ..

هلو شلونك وين وديت خواتي!!!

وين يله اجاني جوابه ..
منو انته ولك ؟ واحنه شعدنا وي خواتك ادبسز احجي عدل احنه ماننتواجه بالنسوان احنه زلم ..

يايا هذا شبي ؟ ترة مبين حسابي اسم بنية شو يحاجيني بصيغة ولد!!

معقولة سكران!!

اتذكر مرة سمعت فرح تسولف لموج تكوللها احسان سكران ويغلط عليه ..

عزااا انقرفت وكرهته ...

كتله اني انو اخت فرح وموج داسالك عن اخواتي وين وديتوهم ؟

بعدها اجاني مسج منه ..

ها هاي طلعتي انتي شونج عنوني شهالغيبة الزفرة هاي ..

اشو هالايام مادزيلي عايش لو ميت .

شنو شبسرعة نسيتي يور هيرو ؟ ((بطلج))

ضحكت على سوالفه كتله عنونك شنووو

كال انت صغيرة لو متزوج قبل ١٥ سنة بنتي بكدج ...

جاوبته لا ترة عمري ١٧ سنة .

كال الله واحد والعمر واحد شبيج هو الجسد ليكبر مو الروح ..

اي المهم اخواتي وين ...

لتخافين عليهم عايشات ملكات خاصة الخبلة فرح مخلينهم بمكان كولش حلو على شط وبي اشجار وحيوانات تردين اوديج الهن ؟؟

اي حباب فدوة وديني بس شون اخويه ميكدر يطب لبغداد اخوك عمو الشيخ منعه !!

شكد حلووو عقلج العنون هذا ولج اله اجي اخطفج يله ..

رديت يمه تخطفنيييي ماريد يمعود ماريد ...

كال شبيج وثول اني حتى لو اخطفج المفروض متخافين لان نقذت قبل هالمرة مو صح ..

اخذتنا السوالف يحجي يحشش مرات احسه مو بوعيه حتى من يدز بصمة صوت لسانه ثكيل ، بس ماتعدى الخطوط الحمر ويحسسني طفلة ..

وطول ما اني اريد احجي وياه احس قلبي يريد يطلع من مكانه ..

دزيتله صوت اضحك واحجي ..

رد عليه بصوت وجان صوته عالي : عنوني شنوو هالضحكة هاي ستري عليه ..

ربي انت شاهد عليه كل ماحاول اتوب عن النسوان هنه يجنن ويجددن الاشتراك ياربي انت تعلم مافي القلوب ..

ضحكت من كل قلبي بلحظتها التهيت اضحك ومارديت عليه ..

ماحسيت اله صوت مفتاح الشقة يندار بالقفل
شمرت الفون من ايدي لا اراديا وبعدها اخذته وحذفت الحساب مال الفيس ..

وركضت طلعت لأحمد .. جان جاي بيده علاليك
انقهرت عليه قررت بعد مااحجي وي حسان ..

بس اني ردت اعرف شي عن اخواتي واخذتني السوالف وياه مو بيدي افقد عقلي ..

هو اجه بوسته على خده وكتله الله يساعدك حمودي ..

نزع الكلاو مالته هلا انوو ..

حضرتله ملابس نظيفة راح غسل واجه صبيت الاكل اله وكابلته وكعدت اباوعله ..

رفع عينه عليه شبيج ليش متاكلين ؟

اكول احمد ليش متحاجي حسان هو يتوسطلك يم الشيخ نرجع لبغداد زين اني تفوتني سنة ثانية ؟

هز راسه لا اسجلج هنا هو اني ناوي استقر هنا ارتاحيت وحصلت دوام بمدرسة أهلية وبالليل اشتغل بالمطعم ..

وخواتنا ؟

هو جايج بالحجي هم شكم دوب يظلون ضاميهن علينا هو الشيخ يريد يعاقبني بس مايأذيهن لو يريد جان هسه اني صرت في خبر كان بس هو ديعاقبنا وكل عقاب اله مدة وتنتهي بس يرادلها صبر ..

مدزيت عمو عليهم يستفسر منه عن فرح وموج؟

يولي عمي ديري بالج تجيبين سيرته بس اني دزيت خالي وكاله اطمئن هنه نسوانه واحنه مستحيل نأذيهن .. واني هم ناوي ادخل لبغداد متنكر واشوف ..

ارتعش قلبي المرعوب ..
و خليت الخاشوكة بالصينية ..
لا عفية احمد يلزموك يفوتوك بالسجن واني شنو مايعرفوك مني؟؟؟

هو المشكلة انتِ ماكدر اعوفج هنا وحدج ..

ء ا ء صدك انوو صح انت بعدج صغيرة واني مانطيج هسه بس المفروض اكولج ..

باوعتله باستغراب شنو احمد ؟؟

كال عمر طلبج مني ويكول اذا توافق تدلل عليه وادللها واذا تريد تكمل دراسة هم تكملها للااخير ماعندي مانع .

صابني ارتباك وذعر شديد عجزت عن اخفاءه
كمت على حيلي لا عفية احمد شنووو هالحجي ؟

كال شبيج ترة ماانطيج ولا اجبرج بس داانطيج علم واعرف رأيج خو مااضم عنج واتخذ قرار بمكانج ؟ وارفض .

بتلكأ اني ماريد اتزوج ...

باوعلي افتهم بس ترة عمر خوش ولد وشاغول واخلاق وخريج همينه وهيه بس وكفتهم ويانه تسوى الدنيا ..

بس اني ماريده ...

باوعلي باستغراب حسيت نظراتي راح تفضحني ..
كمت من الاكل بسرعة فتت للمطبخ اجه ورايه فات ..

وكفت ع السنك لزمني من اكتافي ودارني عليه
دنكت وهو رفع وجهي ..

كال شنو ضامه عليه ؟

ابتسمت بتوتر وهزيت راسي ماكو شي والله ..

اكو احد بحياتج ؟

هزيت راسي بقوة اكبر وعيوني بعيونه ..

رمش بعيونه وتركني وديطلع وكف بالباب ..
اني الي ثقة بيج اوكي وهذا يكفي بس ديري بالج على نفسج ..

رحت ركضت حضنته وهو حضني وباس راسي حيييل ورجع ياكل واني كعدت على الكاع اراقبه من بعيد
ومقهورة عليه ... وكارهة نفسي حيل ..

موج ..

مرت الايام هنانه جان شرار يظهرلي مشاعره لدرجة كبيرة وصلت لنفس النقطة اصارع حبي اله ...

بقربه احس نفسي ضعيفة حيل ماكدر له ابد ..

احلى شي بعلاقتنا احس نفسي على طبيعتي وياه ..

اكعد من النوم شعري مكفش كدامه كولش عادي ..

العب رياضة وامارس هوايتي الاحبها كدامه وهو هم راح للسوك القريب مالكه دمبلصات ، اخذ حديدة وشكل بيها طابوك حفرهن وربطهن وسواهن اثقال ويضل يلعب وياي ..

بالبيت الملحق اكو فوك باحة كبيرة مكشوفة جنت العب بيها رياضة وهو جايبلي مدات العب عليها ، وجنه دنلعب
جان اسمع صوت شي وكع ..

اني جنت ملتهية لمن سمعت الصوت متتتت خوف التفت عليه بسرعة عبالي تعور ..

شفته همزين ممتعور بس الدنبلصات ملاته خربن ..

خليت ايدي على قلبي مرعووبة هو انتبه عليه خفت عليه ، اشرلي ورحت له ..

وكفت يمه يله خيرها بغيرها ..

كال انت خوش دنبلص تره ..

كتله وانته تكدر تشيل اكثر من ٥٠ كيلوو

كال اعتبر نفسي شال جيس طحين ..

ضحكت من قلبي ..

وصدك مقصر خله ايده جوه ظهري واللخ جوه رجليه وظل يصعد بيه ليفوك عبالك صدك ثقل بيده ..

وشعري يوكع على وجهه واني ميتة ضحك ..

نزلني خلاني على رجليه كال شون ويه شعرج ادري متعرفين تربطي لمن تلعبين متضوجين منه ؟ ..

كتله لا بالعكس ينطيني نشاط زيادة ..

جان مخليني على رجليه ولاف ايده على كتفي وايده الثانية على خصري يقربني اله ..

وجهي قريب وجهه يحاجيني بنبرة عذبة ذوبت قلبي وروحي سوى ..

_ جنت اشوف نفسي انجذب للشكُر وعيونهم ملونة اكثر بس فجأة شفت نفسي منجذب الج اكثر ..

كتله لا حبيبي دكول غيرها

عكدت حواجبه كال شكوول مثلا !!!

كتله كول شبعت منهن وتشبعت وهسه دورنا احنه السمر خطية ..

كال كوليها مرة ثانية ...
كتله شنوو داكولك شبعت من
كال لالا ولج كلتي حبيبي اول مرة اسمعها منج كوليها بشرفج ..

ختلت بصدره العريض وكلت حبيبي واني اضحك ..

لان ادري بي مراح يتركني اله اكولها اله ..

الايام البعدها صرت هواي الح اريد اتواصل ويه احمد وانو ..

جنه دنمشي وجنت الح اكثر واكثر هو عصب وكفني وظل يباوعلي بنظرات من نار اول مرة اشوفه هيج ..

كال تدرين لو لا اكثر صفة بيج اكرهها الالحاح كافي تلحين تخابريه بالوقت المناسب ..

كتله بعصبية خووش لعد اني رايحة يم فرح وانته اتبع اخوك وبعد ماريد اشوفك شكو كاعد لعد لازك بيه انتوا مو معاقبينا ..

متروح لمرتك لابنك مو صرعتني بيهم اول مالزمتني ..

عصب اكثر ولزكني بالنخلة صار ظهري عليها توجعت
ظليت اضرب على صدره شبيييك شبيييك ترة ورايه نخلة دتشوفها انته لوو لا ؟؟؟ وجعتني ..

كال لا تستفزيني موووت اموووتج ترة بعدج ممتعرفة على الجانب المظلم العندي لحد الان مشفتي شي واني مو بيدي اخليج تخابرين اخوج لان الشيخ ميقبل ..

ترة مخايفة منك سوي الي تسوي شرار وبعدين شنو انته مو رجال اني موو مرتك ودااطلب منك هالطلب ليش الهالدرجة الشيخ متحكم بحياتكم

خزرني وصرت احسه بقمة غضبه ..
ترة متعبر عليه سوالفج كل هالفترة هاي وانتي عندج غايه وياي الاعيبج مووو عليه ..

لعد حسس على نفسك شرار حسسس وبعد لا تصيحني لان مراح اطلع الك والله اله لمن احاجي اخوووية ..

دااروح لزمني من ايدي سحبني وعصرني حييل
كال لا تخليني اجبرج ع شي وبعدين اتندم وانت هم تندمين على رعونيتج هاي!

سحبت ايدي كتله بعد شنو الي ماسويتوو بينا وخلي يكون بعلمك شرار ترة اني اكثر وحدة جنت رايدة اشرد منك وفرح اكثر وحدة معارضة ياريت توصل هالشي للشيخ وكافي يعذبها هيه مالها ذنب احنه جبرناهه ..

ووجهت اصبعي الشهادة بوجهه مثل مكتلك شرار لتصيحني بعد لأن ما أجي ..

بقينا هيج منتحاجى أيام .. فتت على فرح شفتها طاكة روحهه وتبجي ومالها خلك روحها .

كعدت يمها اهديها وهيه تدردم خلت راسها على كتفي كالت كل اسبوعين مرة يله يجي والله تعبني ..

كتلها شنردين منه انتي؟

رفعت راسها وتمسح دموعها كالت ادري بي هو ديعاقبني ...

كتلها مو كافي بعدج عن اهله ؟ وعن مكائدهم وطلايبهم ؟؟

ظلينه نحجي اكوللها الكعدة هنا بيها صالح الج انتي الخاطر اطفالج ..

هزت راسها وباوعتلي عبالي راح تكول شي
بس هيه كالت اكولج ماكو جزر بعد ؟

متتتت ضحك عليها اي والله اكرطي جزر وانسي همومج ..

طلعت رحت للثلاجة ماكو ولا جزراية ..

اني ماكدر احجي لا ويه السايق ولا ويه الفلاح ولا ويه البنگالي الي يشتغل هنا ممنوع ..

خلي ادور ابو صماخ الزعلان مقاطعني عشتو صار كم يوم هو يبيع ثكل واني ابيع طماطة اقصد جزر اوو اقصد ثكل ..

شفته كاعد بالحديقة مخلي رجل على رجل وبأذنه هيدفون ويحجي ..

لمن تقربت منه سمعته يحجي باللغة الروسية الي هو علمني هواي كلمات منها خلال هاي الفترة ..

وكفت كباله بس مااباوعله ولا احجي هو ختم المكالمة بسرعة وكال بنبرة زعل شكو

كتله بنفس نبرته فرح تريد تجزر كوم جيبلها يله ....

كال بنبرة انفعال ومزح بنفس الوقت
ادري شنو مربين ارنب احنه خو ما مربين ارنب ..

كتله ترة هو جزر شدعوة عليك ... متروح تجيب الها انطيني سويج السيارة اني اروح ..

كال هلووووو حتى وين احصلج هالمرة ؟

كتله برووسيااااا

ومال شسووين رايحة قبلي ..

اروح اكول لمرتك عليك اهجم بيتك اكووللها زوجج تزوج علينا ... اخليها تنجلط

ضحك واجه اقترب مني كال لايابه هسه اروح اجيب للارنب جزر لج هاي موو ارنب لا والله قندس على كد متاكل جزر ...

تقرب مني كال موت اروح وارجع حتى تخابرين اخوج

فتحت عيوني فرحاااانة طايرة من الفرح ، بلا وعي خليت ايدي على صدره كتله تحجي صدك ...

كال بذوبان اي احجي صدك بس هسه عطشان ..

كتله روح اشررررب ..

هجم على شفايفي ببوسهم بشغف ولهفة ..

دفعته لعق شفته وكال بنبرة مخدرة
ارتووووويت ...

اني امس بشفتي عزااا شرار ليشوفنا احد ..

كال شمدريني من اعطش ماافكر ..

حركت بوز شفايفي وهو كال من ارجع نحجي موضوعنا ..

قصدك زواجنا!! ترة اني مااقبل نتزوج شرار لتجبرني وخاصة احنه معاقدين عقد محكمة ..

افهميني موج ماكدر اعقد محكمة دتفهميني اني مجنس روسي وماعندي جنسية عراقية تنازلت عنها لمن اخذت الجنسية الروسية ..

كتله وليش تتنازل عنها ؟

كال هو هذا القانون مالتهم والجواز الروسي اقوى واني مقيم هناك .. انت اخذج هناك نسويلنا ولد روسي اني وياج حتى تاخذين الجنسية الروسية ..

زين ومرتك ؟

معليج اني ادبرها هسه بالايام الجاية حتشوفين شسوي ...

اني ماتنازل عن جنسيتي العراقية ...

كال ليش شعندج بالعراق الله يخليج !! عندج شبر بي ؟ عندج وظيفة ؟ شعندج الله يخليج!!

انتمائي وهويتي وكافي سنين اني اكل من خيراته عوفها هاي السالفة شرار ..

امنت بالله لج اني احبه العراق واموت على ترابه ووقت يحتاجني افدي بدمي يبقى انتمائي اله بروحي مو اله جنسية بس واحد يدور راحته مو صح ؟

بعدين نحجي شرار بس اني ممقتنعة عفية
شرار لتجبرني ...

اروح اوصي على جزر واجي ماشي !!
يله روح وربي متلهفة حيل عمود احاجي احمد ..

كال بس انتي تحاجينه فرح لا انوب تجفص كدام الشيخ واني ابتلي ..

كتله لا عفية ترة نفسيتها صفر ع الاقل شي يفرحها ..

مالها امان فرح تجفص ..

واحنه دنحجي وفات الشيخ بسيارته ونزل منها
ووياه وحدة!!!!!!

يتبع ...

منو هاي الوحدة 😬🤔الي يحزر اله غش 🙊