من رحت يمة خلة ايده بايدي و گلي ـ شيحاچوچ ظلي ساكتة و لا تردين
نزلت وياه سلمت على عمامي و گعدت بين مجتبى و امي
صاروا عمامي يحچون عن الخطبة و الناس الي جاية
عمي ابو زين گلي ـ عمي انتن بنات عز و دلال و البيت بي عائلتين ، عمي خاف ما تتحملين؟ احنا مو ماديين بس نريد نضمن راحتچ
جاوبته ـ عمو اتعايش وياهم، و ان شاء الله معاملتي وياهم بتربيتكم و ما انزل راسكم
عمي ابو محمد مسح وجهه و گام يگول ـ عمي انتِ طيبة و ربچ يحبچ ، خلصچ من ابني الأغبر و كتبلچ العافية و هذا الرجال الطيب المؤمن
إجة علية فگمت، لزم وجهي باثنين اديه و باسني براسي
طلع فلوس و انطاني استحيت آخذهن مجتبى گلي ـ اخذي من عمچ ولچ
اخذتهن و حضنته يلا طلعت
خطية كلش تعبان و من صوته الواحد يحس بقهره
صعدت و خواتي تلگنني صاحت منى ـ هاي شنو شگد انطاچ؟
عفتها و بوست اختي الچبيرة "ام فرح"
ما حسيت غير منى سحبت الفلوس من ايدي حتى تحسبهن
ردتهن الي و هي تگول ـ ولچ بس من عمي 250 الف ، اريد اعرس هسة تعرسوني يلا
انوب ادنت علية و لزمت ايدي تگلي ـ عليچ الله إذا عبيس عنده اخوان ما متزوجين ، ولد عم مرتبين ضميلي منهم
اختي ام فرح دفعتها عني و ردت عليها ـ وخري مو هم حلاوة و تضملچ ، ولي عنها
گعدنا و اختي الچبيرة سحبت جنطتها خلتها بحضنها و كملت كلامها ـ ولچن اسمعن : أخذت اجازة اسبوع كامل علمود ملچة سكينة ، من هسة خل نجيب ورقة و قلم و نسجل الغراض النحتاجهن
باثناء كلامها دخلت مرأت اخوية و بتها بيدها
سألتنا ـ شتسجلن؟
انوب التفتت علية و سألتني ـ سكينة شگد انطاچ خالي؟
اخذت الفلوس ضميتهن بميزي و اني ارد ـ 250 ألف
بت اخوية كمشت بأطراف جبتي و گلتلي ـ عمة انطيني ألف من فلوسچ
ضميت الفلوس بالصندقچة و طلعتلها ألف
دخل مجتبى يمنا سلم على اختي الچبيرة و باس بتها ، ركضتله خولة جرجرت بنطرونه
تأشرله بالالف الاخذته مني و تگله ـ بابا خل نروح اني و فرح بت عمة نشتري
رد عليها ـ ورة العشاء ان شاء الله، منو انطاچ عمو زين؟
جاوبته خولة ـ لااا من عمة العروسة، بابا اني هم راح اصير عروسة
گلب وجهه و رد ـ حتى اسحگ راسه … استغفر الله
طلع و عافنا، اختي منى جابت دفتر يسجلن لوازم الملچة
گعدت گبالهن و سألتهن ـ منو گال الملچة الجمعة الجاية؟
اختي الچبيرة ردت ـ الرياجيل حاچين و محددين
مرأت اخوية سألت ـ شگد تاخذون مهر؟
گلتلهن ـ اني اريد العقد مالتي بالامام علي
صفنن علية كلهن
اختي الچبيرة بللت شفايفها و سألتني ـ عباس يريد هيچ؟
رديت ـ لا و الله اني اريد
و لا عبالك سمعن رأيي رجعن يكتبن و مرأت اخوية تگول ـ بطرانة هاي
عفتهن و نزلت جوة چان مجتبى فاتح قناة كربلاء و ابوية جاي يتوضئ ، رحت يم ابوية ابتسم و هو يمسح على راسه
انتظرته يخلص وضوئه و گتله ـ خل يصير عقدي بالامير علي
رجع خطوتين طبگ باب المطبخ و رد ـ سلام الله عليه خطيبچ هيچ يريد؟
جاوبته ـ لا اني الاريد ، ما أريد الكل يباوع علية محتار بملابسي و شنو شكل الاتزوجه و شنو فلوسه ، أريد اعقد يم امير المؤمنين و هو راح يدعيلي و بدعائه ربي يبارك زواجي
صار يباوع وراية
إلتفتت لگيت مجتبى واگف يم باب الصالة و يتسمعلنا
من التفتت گل لأبوية ـ هاي هية براحتها شحصلت من الناس غير الأذية
ابتسمت و رحت على مجتبى حضنته ، نز و دفعني يگول ـ دوخري عني و روحي صلي وخـــري
ابوية دخل الصالة و شاف امي طلعت من الغرفة گلها ـ ها هالمرة ما انحسدوا؟
ردت عليه ـ و الله چانو محسودين و كف الله شر الحساد
عفتهم و رحت اتوضئ ، ياريت الحچي ببساطة مثل ماتتصور امي
احنا ما چننا محسودين اني الي چنت معيشة نفسي فوضى و خربطة و ما فاهمة كلشي
اني الي وصلت نفسي لهذيچ المواصيل
مجتبى بعد العشاء خابر عباس يتفق وياه
گايله عباس اعرف ناس هناك راح احجز بالامام و انطيكم خبر عن الموعد
بليلتها دز الاستاذ درس جديد ، نزلت و گعدت ادرس بالبراني لإن خواتي متجمعات بالغرفة
نزل الشيخ صوتية بإسم البُهتان :
قال الامام الصادق «عليه السلام»:
(إذا إتهم المؤمن أخاه إنماث الإيمان من قلبه كما ينماث الملح في الماء)
البهتان : ـ وهو اتهام المؤمن والتجني عليه بما لم يفعله ، وهو أشد إثماً وأعظم جرماً من الغيبة
فهو يجمع بين ذنبين كبار و هما
« الغيبة + الكذب»
انطيكم مثال بسيط: أنت ولد شاب مضوجك أو بنية عندچ شابة مضوجتچ
فحتى تقللين من قيمتها تذكريها بسوء مو بيها
﴿وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا وَإِثْمًا مُّبِينًا ﴾
من أهم الأمثلة على البهتان في عصرنا
هي الكلام في شرف البنت غير المحتشمة في حجابها
فقد يكون بهتانك سبباً لقلة ذنوبها يوم القيامة، فيؤخذ من حسناتك و يُضاف لحسناتها
امامنا الصادق عليه السلام يقول «البهتان على البريئ أثقل من الجبال الراسيات»
و جده امير المؤمنين يقول « اعظم من السماء»
فالذي يتهم بريئاً هو ظالماً له فإذا رفع ذلك البريئ يده في جوف الليل و قال ربي انتقم لي من فلان فدعواه سريعة الاستجابة
الي يُغتاب يكون فيه عيب صريح لكن في البهتان لا عيب فيه يكون مظلوما طاهراً
لهذا اولادي راقبو السنتكم كلمة عابرة قد تكون بهتاناً لكم يوم القيامة
الذي يقول البهتان على الناس هذا الشخص يرفع الله الحصانة عنه ﴿وَلَوْلَا فَضْلُ اللَّهِ عَلَيْكُمْ وَرَحْمَتُهُ مَا زَكَىٰ مِنكُم مِّنْ أَحَد﴾
هذي التزكية تنرفع ، الي ينرفع عنه الحصانة بعرفنا تنگال مهدور الدم
كل المصايب تصير تركض وراه لإن ماله حصانة ربانية
2) التكبر
الكبر هو عبارة عن حالة نفسية تجعل الإنسان يترفع ويتعالى على الآخرين، وتصرفات الإنسان هي التي تدل على وجود مثل هذه الحالة .
اذكرلكم درجات الكبر ما گلت انواع لا درجات
ممكن يصعد بيهن الانسان من اقل درجة الى الأكبر
1- التكبر على الله تعالى، وهذه الدرجة أقبح الدرجات وأشدها هلكة، و كما يمكن أن تجدها بين أهل الكفر والجحود ومدعي الألوهية. وهذا التكبر هو منتهى الجهل، جهل بمقام واجد الوجود
2- التكبر على الأنبياء والرسل والأولياء صلوات الله عليهم.
وكثيراً ما كان يحصل في زمن الأنبياء، قال تعالى على لسان المتكبرين: ﴿ أَنُؤْمِنُ لِبَشَرَيْنِ مِثْلِنَا..﴾
وقال تعالى على لسان آخرين: ﴿لَوْلَا نُزِّلَ هَذَا الْقُرْآنُ عَلَى رَجُلٍ مِّنَ الْقَرْيَتَيْنِ عَظِيمٍ﴾
وفي هذا الزمان أيضاً نجد نماذج منه في بعض المحسوبين على الإسلام.
3- التكبر على أوامر الله تعالى، وهو يظهر في بعض العاصين ، كأن يمتنع أحدهم عن الحج لأنه لا يستسيغ مناسكه من إحرام وغيره، أو لا يتقبل الكلام الحق إذا جاء ممن هو مثله أو دونه منزلة.
فقد يسمع الإنسان قولاً من زميل له فيرده بشدة ويطعن في قائله، ولكنه إذا سمع ذلك القول نفسه من كبير في الدين أو الدنيا قَبِله (و إن ترك القبول له ناحيتان: إحداهما تكبر على أوامر الله، وثانيهما تكبر على عباد الله تعالى).
4- التكبر على عباد الله تعالى، وهذا أيضاً يرجع إلى التكبر على الله،وأقبحه التكبر على العلماء بالله ، ويدخل في هذا التكبر أيضاً رفض مجالسة الفقراء، والتقدم في المجالس والمحافل وفي المشي والسلوك.
وهذا النوع من التكبر شائع بين الناس وشامل لجميع الطبقات
اهم اسباب التكبر:
•الاعجاب بالنفس و حب الذات
•الشعور بالمنقصة : تلگاه غني بس عنده منقصة مثل عائلة متفككة ، دين، اخلاق.
اهم آثار التكبر
يمنع الحكمة ينزلك اقل من الناس من ناحية العلم
عن الإمام الصادق عليه السلام: "ما من عبد إلا وفي رأسه حكمة ومَلك يمسكها فإذا تكبر قال له: اتّضع وضعك الله، فلا يزال أعظم الناس في نفسه وأصغر الناس في أعين الناس
وإذا تواضع رفعه الله عز وجل ثم قال (الملك): انتعش نعشك الله، فلا يزال أصغر الناس في نفسه وأرفع الناس في أعين الناس"
ثانياً يهبطك بعين الناس
لاحظتوا قول الإمام الصادق عليه السلام: "فلا يزال أعظم الناس في نفسه وأصغر الناس في أعين الناس"
ثالثاً : أصل المشاكل و النزاعات بين الناس
الامام الصادق عليه السلام يقول «الكبر مطايا النار» يعني ياخذك للنار
🎧 كيف تعالج التكبر
ببساطة امسح الجهل من بالك ، وتعلم أن التكبر ليس كمالاً، فهذا النبي الأكرم صلّ الله عليه وآله الذي كان علمه من الوحي الإلهي واختتم النبوة، كان يكره أن يقوم له أصحابه احتراماً وإذا دخل مجلس لم يتصدره ، ويتناول الطعام جالساً على الأرض قائلاً: "إنني عبد آكل مثل العبيد وأجلس مجلس العبيد"
فتح المجموعة و دزلنا الذنب الاخير استحقار الذنب أو استصغاره
منو يگدر يسولفلي عن هالذنب شوية؟ الكم خمس دقايق
خليت يمي ورقة و قلم و رحت لعمو گوگل ادور
حصلتلي بس حديث واحد عن الامام الباقر عليه السلام : (إياكم ومحقرات الذنوب فإن لها من الله طالباً وانها لتجتمع على المرء حتى تهلكه)
دزيت الحديث و الطلاب بين اليكتب منشورات و بين اليدز بصمات
عباس دز بصمة دقيقتين ضربنا بيها كلنا بعرض الحايط
صوتية عباس : بسم الله الرحمن الرحيم اللهم صلِّ على محمد و آل محمد
معنى استصغار هو الإستخفاف بالذنب
ماكو شي اسمه ذنب صغير و لكن احنا الي نصغره
نرجع للمثال الي أخذناه قبل فترة و هو تأخير الصلاة
انأخر الصلاة و نگول شكو بيها المهم صليناها
فيعتبر الإنسان هذا الذنب من الصغائر الي مراح يحاسب عليها
جاهل انّ تفكيره هذا اتجاه الذنب هو الي يمنع غفران الذنب و الدليل قول الامام الصادق«عليه السلام»: (اتقوا المحقرات من الذنوب فانها لا تُغفَر)
سألوه : وما المحقرات من الذنوب؟
گال «عليه السلام» : الرجل يذنب الذنب فيقول طوبى لي لو لم يكن لي غير ذلك)
امير المؤمنين «عليه السلام» يگول (اشد الذنوب ما استهان به صاحبه)
و لعله اعظم و أصعب قول للامام الباقر عليه السلام ( اياكم ومحقرات الذنوب فان لها من ألله طالبا وانها لتجتمع على المرء حتى تهلكه)
يعني تظل تجمع جبال من الذنوب و أنت ما تدري
اغلب الطلاب صارو يردون على بصمة عباس
•احسنت
•مبدع دوم
إلا واحد منهم ضحكني حچايته على الجرح رد على عباس
ـ خوية عليك الله شدز بعد؟ كل الأحاديث الي لگيناهن بالكتب و النت حچيتهن بدقيقتين
الاستاذ رد عليهم ـ هااا يعني ما اشرح كافي عباس فهمتو ماعندكم سؤال؟
جاوبناه - هاي هية
رد الشيخ على عباس ـ الله يجزيك الخير و يوفقك تمت خطبتك؟
جاوبه عباس ـ الحمد لله، تمت و يوم الخميس عقد قراني بمرقد امير المؤمنين
رد الشيخ ـ يا الله، بالخير و البركة الله يجمعكم بالود و الالفة و يكرمكم بخير و أصلح الابناء ديربالك عليها عباس ، اني استاذها و الاستاذ ابو
تدخلت طالبة و سألت ـ يعني هي ويانا؟
جاوبها عباس ـ حالياً اي بدورتنا الإخلاقية
طالب رد على رسالة الشيخ ـ يعني شنو ديربالك عليها شيخنا، شنو قصدك يشتغل وياها بالبيت؟
الشيخ رد عليه ـ اذا ما تدرون الامام علي «عليه السلام» چان يشتغل بالبيت چان يكنس و يحطب و يطحن وية الزهراء عليها السلام
و اكو رواية معتبرة انه دخل رسول الله صلى الله عليه و آله لبيت امير المؤمنين لگاهم يطحنون الدقيق
فسألهم: أيكما أتعب؟
رد مولانا امير المؤمنين : فاطمة يا رسول الله
فگللها قومي يابنية، گامت وجلس يطحن مع علي عليه السلام
لا يبابا اني من الصبح شغلي انظف الحديقة و اغسل الطارمة و مرات الزم غطة التنور لكنايني، اشتغلوا لا تعتبرون هالشغل حكر عليهن
و بالعكس ما أجمل التعاون
شغلهن بالمنزل مو خدمة، ربة المنزل يعني صاحبة المنزل و المشرفة على شؤونه و شؤون افراده
يعني مسؤولة عنك و عن جهالك بكل شؤونكم
مو بس مادياً لا معنوياً ايضاً
شغلهن بالمنزل شغل مقدس هن يديرن نواة المجتمع و المكان الي بي هالنواة و مع كل هذا، قوارير مرهفات الاحساس كثيرات العطف و العاطفة
وانتم يومية مطلعين سالفة تكسروهن بيها اتقوا الله ترا حسابكم عسير امامه
يا ويله الي تنام حريمه و هن شايلات بخاطرهن عليه
دزلة فراس ابن اخوه ـ شيخنا خو انت بس تريدلك حجة حتى ترزل الشباب
و بنية ردت على الشيخ ـ و الله شيخنا محد يفهمنا مثلك الله يكثر أمثالك
شفتهن بگروب البنات يسألن ـ موجودة خطيبة عباس؟
جاوبتهن ـ اي اني
اخذن اسمي
وحدة منهن دزت رسالة و سوت تاك لعباس كاتبتله ـ عرفناها خطيبتك بس تزعلها نگل للشيخ عليك
جاوبها عباس ـ اني گوة قنعت اخوها شلون ازعلها و اضوجها؟ ان شاء الله اقتدي بمولاي و اصيرلها خوش رجال
فدوة شگد فرحت لرده ، ما راسلته انتظرته يراسل بس عباس و يراسل ! كلشي ما دز
الصبح گللنا مجتبى ـ عباس حاجز يوم الخميس
أخذ مجتبى هويتي يوديها لعباس ، و سحب وياها موبايلي
يگلي ـ لمن تعقدون يلا انطيچياه
يوم الاربعاء بعد صلاة الظهر گعدنا اني و منى بحدائق الانگليزي و خابرنا اسراء تجينا
اجتي هي و عباس
چانن صديقاتي و بنات الخط موجودات عفتهن و رحت عليهم
إسراء اخذت منى و راحت يم البنات بقيت بس اني واگفة وياه
گعدنا على وحدة من البواري الموجودات
سألني ـ شلونه مجتبى وياچ؟
جاوبته بإستغراب ـ زين، بس اخذ موبايلي
ضحك و مسح لحيته و هو يگول ـ ههههه صدگ يسميني سواد عيشتي؟ شنو من لقب هذا لا و گاله گدام ولد عمي ، و تعاي و شوفي رسائلهم الي كلها بهاشتاگ"سواد عيشتي"، بس بسيطة الاربعاء نعقد و ماله شي ويانا
إجت اسراء و حاچته ـ يلا عباس ما نلحگ
سألتها ـ خير إن شاء الله؟
جاوبتني ـ نريد نشتري ملابس ، اليوم اقط خطيبچ
ابتسمت و رديت ـ بالعافية
گام عباس و صعد للشارع مد ايده لإسراء و ساعدها تصعد الرصيف
باوعلي و غير معالم وجهه كأنما متعاطف وياية لإن شافني مبوزمة سألني ـ هااا؟
ـ شنوو؟
اشر بيده على وجهي ـ شبيچ ليش ضجتي؟
اخته اسراء تگله ـ تغار مني
بالله هاي هسة شسوي بيها؟
اتدنيت عليهم و گتله ـ اشتري ملابس حلوة لعمتي و جيبوها للعقد، خطبة ماجبتوها العقد هم ماتجيبوها؟
اسراء گالت ـ علمودچ امي مريضة
رديت عليها ـ ليش شتسويلي؟ بالعكس افرح بجيتها عمتي هاي
و مرضها ما بي عيب يعني لو امي و يگلي عباس لا تدخليها الحفلة
و الله اعوفه و لا اريده ، امي اهم منه
شفته يضحك برطمت و گتله ـ مو قصدي اچفص بس...
قاطعني ـ بالعكس سكينة انتي اصيلة ، اجيبها إن شاء الله تتدللين
إسراء خلت ذراعها بذراع عباس و لوحتلنا ـ يلا باااي
رديت ـ الله وياكم
العصر رحنا اني و امي وية اختي ام فرح للسوگ ، اشترينا فستان الملچة
خابرنا مجتبى و إجة اخذنا للبيت
و ثاني يوم (يوم العقد) الصبح اني و عباس ختمنا الـ40 يوم دعاء العهد بس ماعندي موبايل و احچي وياه
مجتبى يشتري الشغلة و عينه بيها
العصر رحنا للنجف ، زينب بت خالي مسوية كيك و اشترت چكليت حتى يوزعوه بالإمام
صلينا ببيتهم و رحنا للحضرة
خابرو عباس حتى يدلينا ، زرنا الضريح و طلعنا للصحن اتلاگينا وياه
عباس جاي وية عمه و اخوه الچبير (ابوحسن)
فتنا للغرفة و مجتبى بقى بالباب
ظليت صافنة بوجه الشيخ، ما عرفته لمن سلم على عباس، هذا استاذنا !
اخذ الاستاذ إذن من العتبة حتى يعقدلنا ، اصلاً السيد الگاعد يعرفه و يسولف وياه فسمحله يعقدلنا
بعد ما سجلنا الاسامي و وقعنا، استاذنا گل لابوية ـ خلي ايدها بإيد زوجها
سوة ابوية الطلبه فالتفت الاستاذ لعباس و گله ـ الباب گدامك اخذها و اطلع گبل ما عليك بأهلها
مجتبى مد راسه و رد عليه ـ شيخنا اخوها لازمله الباب
عباس اتشاقة وية مجتبى و اتدافعوا شوية يلا طلعنا للصحن
گعدنا اني وياه بزاوية گبال امير المؤمنين
لزم ايدي و التفت للقبة و هو يردد ـ عينك علينا مولاي ، ادعيلنا و خلينا نقتدي بيك و بالزهراء عليها السلام
نزلت دمعتي و اني اباوع لقبة أمير المؤمنين و رددت ـ إذا موجود هنا يا صاحب الزمان آني اشهد كل الي صارلي بدعائك و نظرتك
إذا تعرف علي و عينك عليه، فالمرحوم علي هو الي وصلني لهنا كلشي بسبب دفتره
و أشهد بامامتك و وجودك واطلب من ربي يعجل ظهورك و يجعلنا من انصارك و خدامك
مد عباس ايده و مسح دموعي ادنه علية و گلي ـ علي عقد بالامام علي (عليه السلام)
جر نفس عميق و خلة ايده على المرمر و كمل كلامه ـ اجيت ورة وفاته و گعدت هنا و گتله يا مولاي فد مرة سألت صاحبي علي : إذا كلش نقهرت المن تشكي يا إمام
رد : صاحب الزمان
و اني گتله : مولاي صاحب الزمان على راسي و احبه هواي و اعترف بوجوده
بس اني اشكي لأمير گلبي علي الكرار و اني هسة جايك شاكي
نزلت دموعه خلة اديه على حلگه حتى يمنع شهگاته و كمل ـ جيتك مشتكي وجعي و غربتي
راحلي أغلى صاحب و اعز اخو ، اليفهمني من نظرة
الي يحبني لدرجة يشوفني استاذه
ذاك الي ينزل بنص الليل من دوامه و يجي گبل لشوفتي ، لمن راح و اتوفى بحادث و چبده صارلي، خنگتني الغربة مولاي
مسح دموعه و ابتسم باوعلي بسمته چانت تجنن
كمل ـ بعدها عمي گلي جيب الدفتر لهاي البت و بدت لحظاتي وياچ ، بدت بضوجة منچ و قهر من اخوچ بس شگد تعلمت منچ
تعلمت شگد اني چنت بعيد عن صاحب الزمان ، شگد اكو ناس مثل مجتبى بس لسان و گلبهم ابيض طاهر سر التعامل وياهم حبهم بالله
صارلي 12 سنة بالحوزة و لا مرة وگفت فوگ السطح متحير وين و بأي جهة التفت اذا زرت صاحب الزمان
و لا مرة باوعت بالنجوم و تذكرته بحديث "اني أمان لأهل الأرض..."
عرفت شگد اني مقصر وية امي
چنتي نعمة و رحمة و نتيجة دعاء مولاي أمير المؤمنين
اجانا مجتبى و گال ـ يلا عدنا باچر حفلة و وراية مسواگ
گمنا و عباس مد ايده لمجتبى يگله ـ جيب موبايلها ، انت عندك مسواگ احنا كلشي ماعدنا
طلعه من جيبه و هو يضحك انطانياه و رحنا وراه ، شفنا مصور صحناه أخذلنا كم لقطة طلعهن مجتبى من خشمنا
شگد لح علينا
عباس انطاني الصور حتى اضمهن و سأل مجتبى ـ بعدني سواد عيشتك؟
رد مجتبى و هو يضحك ـ لا يابة خلصتني منها، هاي هية انت خوش رجال
لزمت ذراع عباس و گتله ـ ذاك اليوم يگول عنك الملطوم
خزرني مجتبى و گلي ـ ظلي چفصي ظلي لمن يردچ علينا
عباس لزم ايده يسكته و رد عليه ـ لاااا خوية گوة حصلتها شنو اردها
مجتبى صدگ بس لسان و گلبه ابيض مرتين طلع للسوگ، و خابرت ام البيج ماعدها واحد يوصللها توزيعاتنا
فراح هو جابهن و رجع اخذني للصالون
اجو أهل عباس و دخلو گرايبه النسوان
تتقدمهن "ام علي" و اسراء
بس الدقني هنادي جاية وياهن
و الفرحني جية ام عباس، جابوها بعربانة و إسراء تدفعها
دنگت اريد ابوسها سمعت مرأت اخوه الچبيرة تگلي ـ يتخرب مكياجچ
سويت نفسي ما سمعت و بوستها ، و اخذت وياها صورة
دخل حبيب الگلب، فدوة و لا رفع عينه على أي مرأة
و باس ايد امه يلا إجة علية
من لبسني الگلادة همستله ـ لا تباوع لأي بنية هنا
رد بإستغراب ـ هاا؟
ما رديت عليه لمن گعدنا همستله مرة ثانية ـ ظل هيچ منزل عينك ، و لا تباوع لأي وحدة كلهن مخليات مكياح و مبدلات
صاحت هنادي ـ وين الكاميرا اسراء
برطمت و رددت ـ هاي حتى هنا وراية
و عباس يضحك
اسراء ردت على هنادي ـ اني اخذلهم صور اتفقنا غيــر
اجت إسراء وگفت گدامنا و غمزتلي، عباس افتهم اتفاقنا اني و اسراء فإدنه و همسلي ـ شلون بمعضلة هنادي ، المرأة تشتغل وياي هم تبطليني؟
و بالليل التهينا اني و عباس نتناقش بمعضلة هنادي ، عباس گوة يريد يقنعني
واني ما اريد اقتنع بس هو مدري شلون يدبرها
رجعت اداوم و مجتبى يگول الدوام حجة ، مابقة بس الدوام يبطلني منه
غير عقدنا شلحيت يخوي
ضايج شنو الصبح عباس يوصلني و كل ماعنده عطلة يجي للجامعة يشوفني
اتفقوا زواجنا يصير بعطلة نصف السنة ، بس قبل الموعد بخمسة ايام توفى جيراننا فما سوينا حنة بس زفة و بهدوء
بيوم الزفة طلبت موبايلي وسماعاتي خابرت عباس
رد علية ـ جاي ابدل
بس اني اصريت خليته يقرا وياية سورة الفتح
كل شوية اسمع حچي الشباب و ضحكهم عليه
هذا اليگله : للعروس يمعود
و هذا اليگول : شجاك متوازي تخابرها راح تگضي العمر كله وياها
بس هو اتحمل كلشي و قراها وياية
چان يقرا على الغيب
و هذا الي اكتشفته بعباس بعد زواجنا
عباس حافظ 15 جزء من القرآن و بعده يحفظ لحد هسة
فبعد الزواج خليت خشمي وياه و صرت ادرس منه و هسة حفظت تلث اجزاء
راد يسجلني معهد بس ما قبلت شنو يفتهم ادرس و اتعلم منه
اخذنا الطابق الأول بالبيت ، ما ادري شنو اليضوج الناس بمرض عمتي
سرعة الكلام و بعضه ماينفهم عادي اليتعود عليها يفهمه
رعاشها ما بي شي مرض بعد
بس عمتي ما بيها زهايمر ، عمتي عاقلة و تفهم كلشي
و ضعف جسمها لإن ما يعتنون بيها اخذناها طبيبة تغذية وصفتلها نظام غذائي شهرين وصارت مثل الورد
مشكلتها الوحيدة انو ما تگدر تسيطر على نفسها و فد شي عادي
حاولت وية حمواتي و قنعت الچبيرة تاخذ مكاني و تعتني بيها الصبح من أروح للدوام
"ام حسن" گلبها طيب بس هي كلمة تجيبها و كلمة تردها
و اني إذا حاچتني حچاية تضوج ما ارد عليها
شنو تطلب أگلها حاضر على عيني و على راسي و حتى اصيحها عمة
و اصيح حماي الچبير "عمو"
و هذا أثر الكلمة الطيبة كلش اختلفت معاملتها، و صارت تعتني بعمتي و تجيب اطفالها و تجي يمنا
و صار غدانا و عشانا كله حوالي عمتي
بس حماية الوسطاني و زوجته شوية تعبونا بأسلوبهم، و دائماً من يضوج عباس ياخذنا للنجف نغير جو يم بيت عمه
استمر اخو عباس الوسطاني على حاله لحدما صار بينه و بين عباس كلام علمود عمتي
فگل لعباس ـ خلفوا اول يلا تتفلسفون براسنا
صح بيومها وگفت گدام عباس حتى اهديه ، بس ما گدرت اضم دموعي و نمت ليلتي يم عمتي
خليت راسي على مخدتها و لزمت ايدها گتلهاـ عمة ادعيلي الله يسمع منچ ارفعي ايدچ و ادعيلي ، راح يصير سنة اختنگت من العالم اني احب الإطفال ما اريد انحرم منهم
مدت ايدها الترعش ومسحت دموعي و هي تحاچيني ـ انذري يمة انذري
تذكرت نذر الشيخ لعلي و ابتسمت
و من يمها نذرت اغير حياة ناس بقصتي مثلما غيرني علي
بنفس الشهر اخذني عباس للمركز مالتهم و حللي
چنت گاعدة على كرسي هنادي و هي جاي تسحب دم من بنية شابة
تقربت بكرسي هنادي اليتحرك من البنية و سألتها ـ تحليل حمل؟
امها ردت ـ اي يمة تلث اطفال سقطت
شگد انقهرت عليها ، الحمد لله حتى بابتلائه لطيف
اني ماصاير عندي و هالگد متأثرة، شلون لو فاگدة مثلها
دخلو مراجعين للمركز فطلعت گعدت بالانتظار يم البنية
چانت راح تصير المغرب فتحت موبايلي و قريت زيارة آل ياسين
لحظة ما كملت آخر كلمة بالزيارة (آمين) صاح عباس ـ حاااامل و الله حاااامل
اسمع صوت عباس بس ما اگدر اگوم احس رجلية تجمدن
المرأة گالت ـ يمة يمكن هذا تحليلچ
بچيت و خليت ايدي على حلگي ، طلع عباس و اجاني
گمت عن الكرسي اتقرب مسح دموعي و حضني و هو يگول ـ ولچ ام دميعة حامل انتِ حااامل يحبيبتـ...
يعيب علية و هو كلمة حبيبتي ما گدر يخلصها و بچة
و الحمد لله البنية هم حامل لان خفت افرح گدامها و هي محرومة
ابد ما نسيت تصرفات عباس بذاك اليوم
أخذني للدكتورة
گلتله سكرتيرتها ـ راح تطلع
رد عليها ـ بلغيها عباس بالباب
فاتت السكرتيرة تسأل الدكتورة، عباس ما تحمل دگ الباب و دخل
خلاها تسوي سونار و لح إلا يريد صورة و الدكتورة تگله ما بي اسبوع
و هسة عمر " علي" راح يصير ستة شهور
الشهيد علي انطاني هواية و بيكم و بـبرنامجكم وفيت نذري
اتمنى تدعولي بالثبات و كلما تذكرون صاحب الأمر اذكروا كل شخص فات هذا الطريق و اطلبوا الدعاء منه مو بس الكم لكل الناس
حاولوا تصيرون سبب هداية الناس بس باللين و الحب و الكلمة الطيبة
كونوا لصاحب الزمان بأيام غربته مؤنسين، صيروله دواء لجروحه
حتى لو مليانين بالذنوب اگعدوا بأي وقت فراغ بمكان معزول عن الكل و سولفوا وياه ما عليكم هي تجي السوالف
حبوا الي حواليكم ذولي كلهم اعزاز على گلبه ، قبل ما تقهرون اي شخص تذكروا هو راح ينقهر منكم