نزلت ركض و صرت الم بالطشار ، بس شفيد الشاشة متفلشة
بچيت عليه و رحت گعدت يمهن
مرأت خالي تگلي ـ يا عليمن تبچين؟ يجيبولچ احلى منه صدگ چذب !
امي ردت عليها ـ هي ام دميعة ، فوگ ما مخلصة روحه تبچي عليه، هاي ثالث مرة يرّگع بالگاع
مسحت دموعي و حاچيت امي ـ چا و دروسي شلون؟ اليوم آخر درس شلون بية؟
ردت امي ـ يمة اني اطيچ موبايلي و الله تبچين على هذا؟
زينب بت خالي ضحكت وگلتلي ـ خاف عندچ حبيب بالحوزة مَتتحملين فراگه
شمرت بقايا الموبايل على الطبلة و گمت الها ، صرت فوگاها و هي تدفع بية
نزلت مرأت اخوية شايلة بتها على چتفها ، بعدها خولة نعسانة و گوة فاتحة عيونها بس من شافتنا نتعارك دفعت امها و نزلت، اجت تفزعلي تريد تضرب زينب
سحبت خولة عن زينب و راويتها موبايلي شلون إمكسر
و هي حتى تواسيني تگلي ـ ابوية يجيبلچ احلى منه
اخواتي نزلن سلمن على مرأت خالي و زينب، شافن موبايلي و تشمتن بية
كل شوية خولة تريد تگوملهن و اگعدها
ندگت الباب طلعت فتحها ، چان خالي فات و سلم عليهن
گعد بالصالة ويانا
زينب خلت ايدها على رجلها و رددت ـ آه ولكم خولة عاضتني
خالي سأل شكو، سولفناله على موبايلي
گال ـ صدگ خطية عدها دروس
رديت عليه ـ خالي كلشي بي
منى جابت چاي لخالي، و زينب اخذت ايدي ورحنا لغرفة امي
سدينا الباب و گعدنا على چرباية امي
سألتها ـ شلونها السفرة؟
ردت زينب ـ تجننن ، عود مثل روحتنا وية ابوية ! ابوية خمسة ايام ما شفنا بيها بس المراقد لا طلعة لا ونسة
ولچ رحنا للشط و نصبنا خيمة بالجبل، الطلعة وياهم تجنن
گلتلها ـ بالعافية عليچ ، شفتهم مرة مخيمين بالجبال صدگ حلوة
انطتني موبايلها شفت صورهم، صارت تطلعلي صور لـ (خالد ابن خالتها)
جرت الموبايل مني
ابتسمت و رددت ـ ها ها ها
خلت ايدها على حلگي تسكتني و گلتلي ـ لا عليج الله اسكتي
هزيت ايدي و رديت ـ هاي شنو شصاير بالسفر...
قاطعتني ـ ولچ لا ترا انخطبنا رسمي بقة بس الحبشكلات الزايدة و مخليها سكتاوي
رفعتلها حاجبي و سالتها ـ انخطبتو و برير مگال شي !
ضمت موبايلها بجنطتها و ردت ـ يا ما گال شي ، وين ما يشوفني يگول ( چا آني ما يناسبني غير كاتل الزهرة)
ضحكت من گلبي ، الله يسعد گلبك يا برير مثل ما ضحكتني
شفتها ضاجت خطية لزمت ايدها و درت وجهي للباب اگول ـ وين خولة ما ترضى الا ببدلتين لعرس ولد خالتي تگول مدام العراريس اثنين يعني الي بدلتين خل تسمع بيچ
رفعت ايدها و رددت ـ ياااارب
انوب غمزتلي و سألت ـ اي و انتي؟
جاوبتها ـ اني خل تخلص دراستي و نحل سالفة مرضي و عود الله كريم
سألت ـ و برير؟؟
اتدنيت عليها لزمت ايدها و حچيت بصوت ناصي ـ انتي صاحبتي و مثل اختي ، ما اريد اتزوج برير اي أحب اسولف وياه هو گلبه نظيف ، بس مو الرجال الأريد اتزوجه يختي من طفولتي اگضي العطلة وياكم حالكم حال اخوتي و الله ما تصير
سألتني ـ انتِ عندچ شي وية الولد السوة زرع وياچ؟
عفت ايدها و رديت مباشرة و بدون تفكير ـ شعندي صخام بوجهي و بس، لو اچفص وياه لو تجي بت خالته مدري شتصير منه تاخذ وياه صور
نزيت من سمعت الخرطته وخليت ايدية على حلگي ، شلزگت هنادي بلساني
زينب تربعت على الچرباية و گالت ـ يابة و حق الامام علي ما اطلع الا تسولفيلي عليه، چفصتيها بعد
حچيتلها رزلتني و گالت ـ اذا خوش ولد يخطبچ ، و إذا يلعب فأنتي خوثة و ثولة
كأبتني و راحت وية اهلها، اجو ابوية و و مجتبى و سمعو بوگعة موبايلي فرزلوني و زيدوها علية
صعدت لغرفتي و مانزلت منها، حتى الدرس الأخير راح علية
اختي الزغيرة تبارك تستعمل موبايل امي فاتعاركت وياية و اخذت الموبايل مني
لمنا بعد صلاة الصبح يلا گدرت آخذه
خليت بي خطي و شغلت الأنستا شگد جايتني رسائل من سمية
غلست و ماجاوبتها اليوم اداوم و اسولفلها
وحدة من زميلاتنا بالدُفعة دازتلي سؤال تريد جوابه
صورتلها الجواب، البينة گاعدة شافته و شكرتني
رحت للتلي بي 100 اشعار
فتت مباشرة للحوزة منزل الأستاذ آخر درسين بصوتيات و جواهن كاتب
« باقي 16 يوم من الأربعين و خلال هذه الايام راح اكون معكم لإجابة اسئلتكم»
فتحت الدرس الأول
التواصل الاجتماعي المحرم بين الرجل و المرأة في مواقع التواصل الاجتماعي
🎧السؤال شرعي و اخلاقي ايضاً
بالعنوان الأولي لا يوجد حرمة شرعية
و حتى متگولون الاستاذ حللنا او حرملنا راح انطيكم أمثلة سهلة و قريبة منكم
✨اول مثال مجموعتنا ، هنا يتواجدون طالبات و جاي يتواصلن وياية انا الرجل و يسألني
✨ مجموعة الطلاب و الطالبات بالجامعات ، اتذكر بواحد من الامتحانات چنت واگف فوگ راس الطلاب
كثر سؤالي عن أحد الاسئلة حاولت اذكرهم بي : اخذنا باليوم الفلاني يا شباب اتذكروا، هيچ يوم، هيچ مثال ما فاد الكلام
إلى ان وحدة من الطالبات گالت «استاذ امس نزلته الهم و حتى نزلت بي مثال عن حديث للامام علي عليه السلام»
مجرد گالت الطالبة هذا الكلام الكل تذكر و بدة يحل
إذن أين التواصل المحرم ؟
1- الحرام
2- مؤدي الى الحرام
اني رجل عراقي و استاذ جامعي و بالجامعة نشوف كل انواع العلاقات
«يجي يعترفلها و يظل بتواصل وياها ، يمعود يمتى تخطب؟ يجاوبها ما اگدر خلي نكمل دراسة ، ما اگدر أريد أبني نفسي إلى ان يتركها
تسأله ليش سويت السويته؟ يجاوبك أريد وحدة أحسن منها ، وحدة ماعدها علاقات وية الشباب و توگع بسهولة
ما يعرف الله بالمرصاد
الله يحفظ كل بناتي من هذا النوع و يستر عليهن و يجمعهن مع انظف خلقه
اما المؤدي الى الحرام ذاك الذي يبدأ بأخوة و يتبعها صداقة
تگلولي لا استاذ مجرد زملاء مثل الاخوة ، مقتنعين بزمنا هذا أكو اخوة
الامام الكاظم يقول «إذا كان الجور أغلب من الحق لم يحل لأحد أن يظن بأحد خيرا حتى يعرف ذلك منه»
الحذر كل الحذر بناتي ، الله وصف امثالهم بـ مرضى القلب هولاء مرضى
لا ياخذچن الهوى الى الهاوية
فاتح الگروب فأبن اخت الشيخ معلق على الدرس ـ شيخنا انت ليش تنزل بينا دوسة و نص ، 80% من كلامك على الرجال و 20% الهم شنو السالفة
عباس راد عليه - گال قبل كم يوم، هن يركزن اكثر من عدنا و أسئلتهن احسن من اسئلتنا. و محيطهن انظف من محيطنا و يهدن ناس اكثر منا ، حتى طبتهن للجنة يوم القيامة قبلنا
يوگفونا بالباب و يگلولك السيدات أولاً
ياااا شبي عباس مخلي راسة ويانا
إجة الشيخ فديته و دافع عنا ، شاف الولد كلش قافلين و معاجبهم كلامه
سد المجموعة عليهم و نزل آخر ذنب
الذنب الثاني عشر بالمعاهدة
ترك الامر بالمعروف و النهي عن المنكر
🎧 أوحى الله تعالى للنبي شعيب: اني معذب من قومك 100 الف
أربعين الفاً من شرارهم و 60 الفاً من خيارهم
فقال شعيب «عليه السلام» : يارب هولاء الأشرار ؛ فما بال الاخيار؟
فأوحى الله «عز وجل» إليه : داهنوا أهل المعاصي و لم يغضبوا لغضبي
و هناك الكثير من الأحاديث و الروايات بالأمر بالمعروف و النهي عن المنكر
المشكلة أين تكمُن؟
المشكلة هي في كيفية الأمر بالمعروف و النهي عن المنكر
قسم ما يقبلون التدخل ، ساكت عن الحق و كأن الامم بنوها الساكتين
بل يصل الى حالة التحريض على السكوت و عدم التدخل
اما القسم الثاني
فهو الاكثر شيوعاً بين المسلمين
و هو الأمر و النهي بالغِلظة
طيب ما رسولنا الأكرم «صلّ الله عليه و اله» وصفه القران بـ ﴿فلو كُنْتَ فَظًّا غَلِيظَ الْقَلْبِ لَانْفَضُّوا مِنْ حَوْلِكَ﴾
سبب التفات الناس حولك يارسول الله هو الرحمة البگلبك
لكن واحدنا بس شافلة فلان مسوي ذنب صاح حرااام
يمعود گول يالله مو بس هاي
الناس أصحاب فطرة سليمة و يتقبل منك لكن طريقتك خطأ
بل قد تقع فيما لايُغفر، تصور تذهب لتنصح انسان متصور من الله الرحمة و الغفران لكنك تقع في ما لا يغفره الله
و هو إراقة ماء وجه مؤمن
جاء في الحديث الشريف : لا تحتقرن عبدا فلربما يكون ولي من أولياء الله بين عباده، والله سبحانه يفغر للعبد المذنب إلا لأربعة لا يفغر لهم ما داموا على المعصية:
1ـ تارك الصلاة عمدا.
2ـ القاتل بغير حق.
3ـ عقوق الوالدين.
4ـ استحقار المسلم واراقة ماء وجهه.
و ابسط مثال على التعليم السليم
قصة لطيفة تعلمناها من الصغر
عن سيدَي شباب الجنة « شافو عليهما السلام رجال چبير يتوضئ بطريقة خاطئة ، راحو للرجال روحي لهما الفداء
و گلولة : شوف وضوئنا و گللنا منو الصح»
توضؤوا بهدوء و الاثنين نفس الوضوء ففهمو الرجل الوضوء الصحيح دون احراجه
فيا محبيهم ليش تفضحون الميعرف؟ ليش تفشلوه؟ ليش طرق «الأمر بالمعروف و النهي عن المنكر» خاطئة ؟
خاصة الشباب ، انتو عايشين وية الشباب الآخرين
تعرفون الي يحيط بيهم من ملذات و مؤثرات، ليش تجي بطرق قديمة حتى تبين الموضوع الفلاني
بالعكس ادرس كل الروايات عن الذنب
اتكلم عن تجربتك و معاناتك و شنو الي ربحته بعد الخلاص من الذنب
هيچي انت تگل للي تنصحه آنة چنت مثلك، فما ينفر منك
تتذكرون شرح عباس ، منو منكم نسى انه عبارة "حي على" موجودة 12 مرة بالصلاة؟
إذاً ماهي الطريقة الصحيحة لـ « الأمر بالمعروف و النهي عن المنكر»؟
الجواب
1)من تأمر بالمعروف و تنهي عن المنكر سوي لأجل الله مو لنفسك
2)انت عانيت من الذنب ، ابتدي الكلام عن معاناتك حتى توصل لقلب الشخص
ثم اتكلم بالروايات الي خلوك تترك الذنب و أخيراً ما حدث لك في أيام ترك الذنب
و اكررر هذب اسلوبك يا عزيزي ، ما معقولة تجي لابوك تگلة انت سويت حرام
ادخلوا من غير باب و خاصة وية العائلة، هاي العائلة تعرف شنو صفاتك السيئة فما تتقبل منك انتقاد
لا تنتقدهم مباشرة ، خطط شلون تبدي كلام وياهم
خطط لأجل الله و شوف شلون رب العالمين يوگف وياك و يشرح صدورهم لكلامك
سجلت الگاله و دخلت على مراسلتنا اني و عباس ، دازلي صورة دعاء العهد و الأذكار
و كاتبلي تحتها ـ ان شاء الله ما توقفتي و بعدچ ملتزمة
جاوبته ـ لا قريتهن الحمد لله ، بس موبايلي انكسر و هسة استخدمت موبايل امي
بسرعة صار متصل و جاوبني ـ شفتي شلون ما اسأت الظن مثلچ
دزيتلة ـ هاي هية بعد راح تلزمها علية اسيئ الظن و اچفص بسرعة
جاوبني ـ لا حشاچ مو قصدي افشلچ، بس اني ما مسوي شي لإسراء
ابو حسن نزل علية بكلام ثگيل فطلعت من البيت حتى ماتصير مشكلة ، و الاخت مراددته و متعاركين
كتبتله ـ بس هي شمرتها براسك و گالت انت الي بادي بالكلام
دز ـ و منافق همين
رديت ـ آسفة على الكلمة ، كلها منها و اني نثولت و تسرعت
دز ـ لااا حشاچ، انتِ طيبة گلب مو قصدچ بس مو شايلة زايد على هنادي؟
رديت ـ انتَ ليش دوم تدافع عنها؟؟
رجع عقلي لمكانه و شفت ردي الغبي فبسرعة حذفت الرسالة و طفيت النت
طلعت خطي من موبايل امي
شسويت ، شبية انثول بس كله من ورة اسراء بسيطة اشوفها اليوم لو ما اشوفها
رحنا لبيت اهل عباس و طلعت اسراء بيديها ملازمها ، سوت نفسها ما شافتني و ركبت لگدام يم السايق و حتى ما احصلها
وهي أول وحدة نزلت من السيارة و فاتت للجامعة
اخذنا محاضرتين و بالثانية كلش طولنا
حدد الاستاذ مادة الامتحان فواحد من الطلاب گلة ـ استاذ هواي المادة
رد الاستاذ ـ مادة بوربوينت إذا تجمعهن كلهن مايصيرن 20 صفحة
گال الممثل ـ بس هواي
رد الاستاذ و هو يجمع لابتوبه ـ لو فلم ابو ساعتين كلش عادي ، لو مسلسل هم عادي تخلصوه بيوم كامل بدون نوم ، بس يم الدراسة كلشي يصير صعب
رد طالبنا بإستهزاء ـ استاذ تحچي صدگ ! الطليعيات و بيكي بلاندر !
دار وجهه الاستاذ ـ اي و هذا مو مافيا؟ شلون صار رجل المافيا بطل و تحبوه شنو مازوخيين انتو؟؟
إبتسمت اني و سمية تأشرلي بحواجبها شنو يعني
الاستاذ شافني و سألني ـ تعرفين شنو المازوخي؟
جاوبته ـ نعم استاذ " الي يحب يتعذب"
رد ـ بالضبط
طبگ الباب لإن طلعت الطلاب من المحاضرات و صارت هوسة
رجع لمكانه و گال ـ مو الجوكر عدو سوبرمان؟ و المافيا هي عصابات دموية همجية
شلون صارو ذولة ابطال و الهم محبين ؟
لإن احنا البشر بطبيعتنا فضوليين
و ثانياً لإن ملينا من حياة سوبرمان المتخفي
لو رجل الأعمال باتمان
و حتى يمكن ثنيناتهم حبيباتهم صحفيات مو صحيح؟
فالمنتجين استغلو هذا الملل و الفضول و صارو يبنون حياة لشخصية الشرير
يطلعولة حبيبة و زوجة و اغلب الاحيان تكون حبيبته انسانة وية القانون بس بعدين علمود حبه تصير ضد القانون و هذا بالضبط حالك انت بعد ما شفت المسلسل
يسوون علاقات اخوية بين رجل المافيا و بين جماعته فدوم يكون كلامه وياهم "اخي"
بينما الحقيقية علاقته بيهم علاقة مال بس يلگون احسن منه يتركوه و يبيعوه
و إذا اكتشف خيانتهم فمصيرهم الموت
يتعمقون بمشاكل بيته ، يطلعوه ببيته خوش رجال و عنده قوانين حلوة
و هم روح لبيوتهم تلگة نسوانهم تشتكي لو من خياناتهم لو من تعذيبهم و اولادهم عدهم عقد نفسية
و ما ننسى المبرر ، يگلك مثلاً هذا ابوه نكتل و عاش حياة صعبة فصار مو خوش بشر
هذا فقير ، هذا مريض نفسي ، هذا الدولة ظلمته
زين اسألكم بالله الناس الابرياء شنو ذنبهم؟
من يبيع المخدرات و يدمر مستقبل شباب هاي وينها؟
من يسرق من البنك و تروح مدخرات عوائل عديدة وينها؟
كل هذا صارو يهملوه و يركزولكم بس على ذني المواضيع، فأنتو و عقولكم خافو لا يوصلوكم مرحلة تتعاطفون وية الباطل ضد الحق
تمنيت الاستاذ ما طلع ، شگد حبيت كلامه هو ما يتدخل بينا أبد
أول مرة يحچيلنا و يوضحلنا هيچ
طلعنا اني و سمية برا، الممثل صاح طلاب الخميس امتحان
مو الاربعاء ولادة الرسول عطلة الخميس امتحااان
سمية سحبت اطراف المانتو و رددت
ـ يمممة بهالبردد امتحان، إشاااا شهالبرررد
رحنا گعدنا گبال القسم منتظرين اسراء اجتي و سمية لزمت إيدي حتى ما اضربها
رفعت ايدي أشرتلها تجي و اني صاكة سنوني، و إسراء برطمت و لطمت خدها
اجت هدى علينا و گالت ـ سكينة
بلعت ريگها و التفتت للقسم
بلقيس و شِلة منهن "زهراء" البنية الي حچيت عليها كلهن متجمعات بباب القسم
كملت هدى كلامها ـ سكينة نريد نستنسخ دفترچ
سمية ضحكت بسخرية و ردت عليها ـ روحي عليچ الله ، و شو زهراء ذاك اليوم گلبت الدنيا على راس سكينة و هسة واگفة وياچن !
گالت هدى ـ و شمسوين عيني هو دفتر طلبناه ، عادي ناخذ من منتظر
هزت راسها سمية و جاوبتها ـ اي يلا عود اخذن من منتظر
دنَگت و فتحت حافظة الملازم و طلعت الدفتر انطيته لهدى و گلتلها ـ خلي يم ابو الاستنساخ ، نتغدة و نصلي و ارجع آخذه
هزت راسها و ردت ـ اوك شكراً
راحت هدى و احنا تمشينا للمصلى
سألتني سمية ـ خيولن ليش تنطيهن؟
و اني اباوع لطريقي گتلها ـ قبل فترة حچالنا الاستاذ بالحوزة على موقف الإمام الصادق وية گرايبه
الرجال رايد يضرب الامام بخنجر بس ما گادر ، تالي جاي لبيت الإمام الصادق و هو ينازع من السم
شايف الامام حالة ملابس الرجل و عارف انو حالته المادية مو زينة
فالامام منطيه نفقته التاركها لعياله
شَحصل إذا عاملت الناس بنفس معاملتهم ، بالعكس يمكن إذا تعامليهم بأخلاق يتغيرون
إسراء گالت ـ لا و الله حبي ناس هالوكت مايتغيرون ، الله يعينكم انتو الطيبين تشبعون بهالدنيا دِگاك
ابتسمت و رديت متفاجأة ـ دگاگ الله ، حچاية علي هاي
ردت اسراء ـ الله يرحمه ، يمة بس لا راح امووت
سمية ضربتها على متنها و گالتلها ـ اي على اديها، احنا ماخذيچ حتى سكينة تذبحچ بشارع الكبلات
ضبيت أيد اسراء و قربتها مني و سألتها ـ شگال عقلچ من رحتي لأخوچ و سولفتيله ليش ولچ ليش؟
سمية ضحكت و سحبت ايدي عنها
و اسراء ردت ـ يااا شسويت؟ رحتله لغرفته و گتله اكو بنية تبچي عليك و تغار من هنادي
سألني منو گتله سكينة بس هاي
ضربتها على عضدها و گلتلها ـ طاح حظ سكينة الثولة
سمية حاچتني ـ لا ولچ عوفيها اسمعي شگايللها
نزيت و التفتت على اسراء سألتها ـ عليچ الله شگال
دنِگت لإن مرينا بزحمة طلاب اسنان يم العيادات ، يلا حچت اسراء ـ گلي انتي وردة و طيبة گلب و تردين صدگ تتغيرين
وگفتهن يم المصلى و سألت اسراء ـ و روح ابوچ هيچ گال علية؟
ردت ـ اي و الله ، بس من سألته تحبها طردني من الغرفة؛ يگلي سوالف كبار ما تفيدچ
فتنا نصلي، بالفرض الأول كل شوية عقلي طار لعملة اسراء
فمن خلصت الفرض جبت قرآن و قريت سورة الانسان، ذكر آل البيت بيها خلاني ارتاح و اطمئن و راح كل التشويش من بالي
گمت صليت العصر ، اجت اختي منى للمصلى و رحنا تغدينا
مريت للقسم اخذت دفتري من أبو الكشك، و سمية و إسراء بعدهن يدردمن
اسراء و منى التهن يسولفن بالخط و اني صفنت ؛ شجاي افكر
مرة مريضة و چفصاتچ وية الزلمة خير من الله شتردين منه؟ عود صدگ احبه ؟ لا و يگلها سوالف كبار، يبوووه يا اسراء فوگ چفصاتي انتي
سمعت السايق گال ـ هاي الحجية شنو مجدية لو مريضة؟ لا اله الا الله
الكل صار يباوع للشباك و إسراء شهگت شهگة مو طبيعية
گامت و السيارة بعدها ما واگفة ، و حتى عافت ملازمها بالسيارة
"ام عباس" على الگاع ، الشيلة مفتوحة و رجليها بدون جواريب و كرسيها يمها يمكن واگعة منه
لميت ملازم إسراء و نزلت وراها راحتلها اسراء تبچي دنگت عليها
سحلتها و خلتها على الكرسي
دفعتها و دخلت لبيتهم و اني فتت وراها وگفت بمطبخهم ، إسراء عافت امها يمي و دخلت للبيت تصيح ـ وينچن الله ليوفقچن وين مطلعات المرة بهالبرد
اجت مرأت اخوها تطلع بالأربعين تصيح ـ شكو شصاير
و الثانية نزلت و دخلت للمطبخ تباوعلي،
إسراء وصلت بكرسي امها باب المطبخ و عافته راحت تتعارك وية نسوان اخوها ، الحجية اشرتلي بإيدها الترجف على غرفتها فدفعتها و فتت للغرفة
الغرفة حلوة و اثاثها زين بس من دخلت تلگتني ريحة مو طبيعية جاية من سطلة الزبالة
إسراء تستخدم لأمها فوط صحية ،بس ميصير هيچ الريحة ما تطاق شلون تخليهن جوة البيت؟
غير الفراش الناصي كلش، اوك ممكن الفراش يحتاج تغيير بس مو هيچ فراش!
دخلت اسراء و اخذت امها للحمام و اني سحبت السطلة و خليتها بباب الغرفة
فتحت الشبابيك حتى تطلع الريحة
طلعت اسراء من المطبخ تريد تاخذ ملابس لأمها
اشرت بإيدي على الفراش و حاچيتها و اني مخنوگة ـ ليل و نهار تحچين على نسوان اخوچ و انتي تنيمين امچ على هيچ فراش !
ردت إسراء ـ سكينة مو متسيطر على نفسها
قاطعتها ـ و هاي حجة ؟ من چنتي زغيرة هَم متسيطرين على نفسچ يا ترى نيمتچ على هيچي فراش؟ شكم فراش باليوم چانت تبدلة؟ چم مرة چانت تبدل ملابسچ؟
امي ما لبست اختي تبارك حفاظات لإن جسمها يتحسس، و ظلت ليل و نهار تغير الفراشات و تبدل الملابس
سألتني وحدة من نسوان اخوها ـ انتي منو حبيبتي؟ شكو تتدخلين ؟
إسراء صارت عصبية و تعاركت وياها و على صوت العرك اجت الثانية
عفتهن و طلعت للخط، صعدت مختنگة و لا كلمة طلعت مني
لمن وصلنا بيتنا يلا حاچيت متى و نبهتها متحچي شي لأهلي
امي من تمرضت محد من عدنا فارگها هاي أُم شلون هيچ يسوون بأمهم؟
احنا نستغل عيد الأم حتى نتفنن بغرفة اهلي، نرجعها غرفة عرسان
و اخوية كل شهر ياخذ فراش اهلي وي فراشة للنداف يجددهن
شلون عباس ينيم امه على هيچ فراش؟ شلون يطلعوها وحدها بالشارع؟
عندي عطلة و موبايل ماكو فذبيت كل جهدي و تركيزي على امتحاني
بيوم الامتحان دخلت اسراء الخط و هي مدنگة ، عبالك امها مسوية جرم مو مريضة و هم الهامليها
بعد الامتحان اخذنا محاضرة وحدة و سمية تغدت وياية و راحت لخطها
احنا آخر خط يطلع، اليوم النطلع بي قبل الثنتين لازم يصير يوم عالمي
يومية يتحججن البنات بحجة جديدة
حجتهن اليوم طالعات سفرة
فخابرتني بت اخو السايق تگلي بلغي اهلچ مانطلع لـ 2:30
رحت للمصلى صليت و بقيت بي لمن إجة المسؤول عنه يريد يقفله
خابرت على اختي منى ردت ـ تعاي لـ"نادي الرئاسة "
صرت گبال النادي و لاح عباس، رمشت عيوني مرتين حتى اتأكد هو لو لا
نزل من الدرج و هو ينزع نظاراته
إجة علية و هو يحاول مايخلي عينه بعيني
لحدما وصل يمي و گال ـ السلام عليكم
شگد عتعتت يلا رديت ـ و عليكم السلام
اشر بإيده على النادي ـ تحبين نروح للنادي لو نگعد بحدايق الانگليزي، أريد احچي وياچ
.
.
.
تابع