هذيانٌ بين جمرٍ وجليد ..(ارملة اخي المجنونة)

39//

السلام عليكم
هذيان بين جمر وجليد
الفصل ٣٨ ..

*****

البارت اهداء لفيروزة ام المسواك 😁

*****

وكأن حكايتي معك أصبحت ذُكرياتها ...
كأشباحٌ غامضةٌ مجهولة لا يراها
ويُشعر بها سوی... أنا وقلبي
عبثاً أن أنسی فأنتَ أتقنت لُعبةَ الحُب معي
وبتَّ كالطيف المواسي ليالي وحدتي...!!!
بقلم noora-1995

******

اخذني من لغرفة لحديقة المستشفى لازم إيدي قوي
حسيته من خلال قبضته هاي يريد ينتقم مني بس المكان الي احنا بي مانعه .

تركني بمكان مابي ناس ومعزول بالحديقة
يباوعلي بنظرات نارية وغاضبة

باوعتله برجاء ورمشت بعيوني وكَعت دموعي ...

صك سنونه وهو يحاصرني بجسمه واني خايفة لان نظراته تبين انو على وشك ان يفترسني .

كال بنبرة تهديد :ليش ضميتي عني احجي ؟ ابويه مجان يجيج ؟ مايخابر عليج ليش مكتيله ؟

تمتمت واباوع لعمق عيونه : لهيب اني بس جنت خايفة ..

اشر بأصبعه السبابة ..
خايفة هدى خايفة ؟؟ تضمين عني طفلة تسع شهور ولمن دتموت تخابريني وتكليلي تعال الحك بنتك
ولج انتِ شنووو ماتكليلي ؟

اشرتله بحركة الصبر : لهيب بس افهمني والله اني حتى تحليل حمل ما حللت ..

للج هذا موو عذر موو عذر موو عذر وضرب ايده على السياج المعدني الي يحوط الحديقة .

دنكت وخليت ايدي على حلكي واشهك ...
وهو يلح وممصدكني من اكوله جنت خايفة ...

صدمني لمن كال ليش سكتي ومحجيتي
لان جنت شاكة الطفلة موو مني ؟

باوعتله مصدومة ، فاتحة حلكي اريد اسيطر على رجفة جسمي ما اكدر ..

ظليت ااشرله بسبابتي لالا لهيب موو هيج عفية وين راح بالك والله بس جنت خايفة .

صك سنونه كال منووو ؟

انصدمت اكثر واكثر واباوعله بذهول وفزع ..
نطقت باحرف مبعثرة : والله ماكو احد والله لهيب صدكني .

لزمني من رسغي حييل وبفحيح شيطاني وعيونه
متوعدة وحاقدة ..
_ لعد هاي سوايتج شنوو ولج انتي بهاي فعلتج اكدتيلي انت مو بنيه لمن اخذتج ومو شريييفة هم ..

وبعدها كال بقهر : الطفلة بنتي اني حاس على روحي اخذت ليلة منج ....

بس حظ العواهر جواهر جنت سكران
وماعرفت اذا انتي بنت او لا وانت اعترفتي مو بنيه بكذبج وسوالفج الي ما تتسوى .

ظليت اتمتم وارجف وابجي
لا والله لهيب والله بس انته محد متقربلي غيرك بس جنت خايفة والله ....

عاط ولج لعد هااااي سوالفج شنووو يا غبي وحمار يصدكج بس كليلي شووون اصدكج ؟؟ شووون ..

حس على نفسه فقد اعصابه ومراح يسيطر ، بعد نظره مني وباوع للمحيط الي يمنا ، مد ايده رفع شعره ليفوك غمض عيونه وظل يستغفر .

بعدها لزمني من كف ايدي وسحبني بعنف وراه
عاصر ايدي بقوة واصابعه مطبكها على اصابعي بقسوة .

صعدنا للمستشفى وللغرفة الي بيها الطفلة
دخلنه احنه الاثنين جان الطبيب ديفحصها ..

لهيب سأله اذا يكدر ينقلها لبغداد واليوم ..

جان جواب الطبيب اي تكدر بس الافضل تنقلها بسيارة اسعاف بعدها حالتها حرجة ..

ظليت اباوع للهيب ، يباوع بنظرات جامدة على الطفلة
وتبع الدكتور وطلع برا .

كعدت يم عمة بلقيس ظلت تحجيلي ...
كالت فرح الله لايوفقها يا عمة هداوي شسووت بيننا
الشيخ مسافر سوتلها بلوى شكبرها وجابته مناك لهنا لمنيته .

كتلها بقهر اسم الله عمه عمره طويل ان شاءالله ..

مسحت دموعها كالت لو بيدي اخنكها والله جانت بيدي سجينة جيت انبتها بيها من شفناهه ماشفنه الخير كله بلاوي وحده اكبر من الثانية هيه واختها ام الرجولة .

اصلا اختها السبب خلت الشيخ يتدخل ويطلكها من اوس واوس ابوه وجده عاقبوه ع لي سواه بيها وهو طلع حركته بالشيخ وبمهيب سودة عليه .

سألتها يعني هو أوس الي ضربهم ؟ عرفتوا ؟؟ ومالزموا ؟

ردت : اي شارد محد يدري بي وين ما وين وله ...

جده وابوه اجو واخذوا منه عطوة وكالوا بس نطيح بي نجتفه ونجيبه الكم ونحطه بديوانكم وشتردون تسوون بي سوو .

تمتمت : الله ينتقم منه ان شاءالله بحق واحد احد ...

كالت وانتي يا عمة ليش هيج سويتي ويانه احنه نحبج ونعزج ليش تضمين عنه والله كلنا مصدومين بيج هداوي .

حجيت بقهر عمة والله الصار غصبا عليه والله اني حتى تحليل حمل ليومج اني ولدت وما حللت ابويه شوفة عينج واخويه هم وكع ولهسه متعلعل وحالته حاله وعمي مبتلي بينه وتليفون ماعندي .

كالت مو اجاج الشيخ ومرته عشتوو ليش ماكلتيله ..

ها عمه مو والله استحيت منه عمي..

ليش ماكلتلي الفريحة المخبلة ع الاقل ولو هيه هاي ماينحجيلها شي ولا يعتمد عليها بشي .

لا عمة والله هيه حبابة فرح خطية بس اني والله من جوي جان خامس عليه مدري رابع وممتأكدة وبفترة نزفت عبالي وكع والله وكولشي ما اعرف .

وهيه عينها ع الطفلة حجت : خامس او رابع جبير يا يمه ولو هيه بنتج كلش ناعمة خطية وعبالك لا تشبهج ولا تشبه ابوها ابد .

هي كالت هيج بدخلة مهيب للغرفة والظاهر سمعها

بس باوعتله خزرني ، ارتعش جسمي
عزااا بس لا يفهمها حسب تفسيره ..

بس اني بسرعة حاجيته عمه بلقيس ولساني يرجف بسبب وجوده ..
عمتي تكول خاف البزون بي جن وضرها بس والله عمه اول ما صارت مو هيج والله بليلة ويوم هيج انقلب شكلها .

كالت اي يمه هم صدك بس تطلع بسلامة نسويلها تحصين .

ودنكت ظلت تقرا ايات بأذنها ..

وهو سحبني عنها وظل يهمس بإذني
لا عبالج اصدك بهاي الخرافات اني راح اسويلها تحليل ووالله يا هدى اذا طلعت جذب مو بنتي هاي الي الله كتبها عليج .

سحبت نفسي منه واباوعله بصدمة ، عفته ورحت يم عمه بلقيس واباوع اله بحقد وهو يباوعلي بنفس النظرة .

بعدت نظري منه واني محتارة ، شلون اثبت برائتي ياربي شلوون!! والله محد لا زمني غيره ، فتحت عيني عليه والله ، راح ابقى اعيش ..

يا اللهي انتِ جاهي... اريدك تفرجهه عليه واني نفسه بريئة ويتيمة وبنتي الي تعبت بيها شهور الحمل وضيم الولادة صارت بحلك الموت هسه ، ارحمني وارحمها ياربي ..

للعصر اجه لهيب وطب ويا دكتور ، خلى الطفلة الي صفت بلا اسم لحد الان خلاهه على السرير وظل يفحص بيها .

وبعدها استقام بوكفته وكال هذا هو تكدرون تاخذوها بالاسعاف .

اريد اخذها لزم ايدي ومنعني ، باوعتله صاك سنونه ويباوعلي نظرات باردة .

باوعتله بقهر وتوسل وعيوني انترست دموع
وايدي توجعني من قبضة ايده ..

كال عمة حتى تصعدين وياهه بالاسعاف وانت هدى امشي وياي .

اتسعت محاجر عيني بصدمة لا يا الله على شنو ناوي لهيب ؟

ارتعشت شفايفي واني اوجه اله كلامي بقلة حيلة
وشتات : ل للهيب واني بنتي هاي ما اروح وياهه اني ؟

كال لااء انت ترحين وياي امشي يله ...

انهاريت وعمة بلقيس ظلت تتوسل بي
لهيب يمه ابوك واخوك بحلك الموت لاتعاقبها المسكينة وتحرمها من ضناهه..

التفت عليها وبصوت مصرور وصبر مفقود
: عمة اخذيها وروحي للاسعاف يله اتبعيني ..

بجيب بحركَة وهو لازمني من ذراعي
ابووس ايدك ابووس رجلك لاتسوي بيه هيج لهيب غلطت سامحني جنت خايفة .

كال اشششش وخزرني
وهمس يم اذني بفحيح امشي لبيت ابوووج ناخذ بيان الولادة مالة الطفلة حتى نطلعلها جنسية .

وكفت وهو يسحل بيه
كتله موو عندي والله ومادري بي يم مرة ابويه هيه جابته من المستشفى وبقى عدها .

صك سنونه وعيونه يتطاير منها الشرر
كال اخذي منها ..

رديت بتوسل ونحيب مموجودة والله رجعت لبغداد عدهم اهلها فاتحة .

كال اششش ولزم خدودي جعصهم بيد وحدة
وكال دوريه بالبيت تلكي اكيد .

طلعنا من المستشفى ، يسحلني سحل وراه وهو لازم ايدي ابجي وانحب والناس تباوع بس محد يتدخل ابد .

واحنه بالطريق خابر على السايق وكله حضر السيارة جايين ..

وصلنا للسيارة ، فتح الباب الوره وصعدني وطبكه حيل ..

شفت السايق مال عمو اعرفه اجه من بعيد
وفات بالسيارة ولهيب كعد بصفه .
كاله عمي ابو محمد انت تندل بيت ابو علي مو ؟

رد عليه : اي بعد عمك اندله مرتين اجيت مرة ويه الوالد الله يطول عمره ويكومة بالسلامة ومرة وحدي واذا مانندل نسأل مثل كل مرة .

رد عليه لهيب : لعد هذا هو توكل بالله عمي ..

كال توكلنا على الله ..

مديت ايدي لزنده ، التفت وخزرني
حاجيته بهمس متوسل : لهيب بنتي .

حجه بنبرة متوعدة : سكتتتي ..
نظراته خوفتني وجبرتني اسكت وسكتت بس باوعت ع المستشفى ، خايفة لا مايرجعني البنتي بعد خاف يشمرني ابيت اهلي ويروح عندي وياخذها طول الطريق واني ميتة خوف .

وصلنا لبيتنا ، نزل هو واني ظليت اراقبه واتوسل بي
بعيوني ، فتح الباب ومانتظرني انزل رجلي ، هو سحبني ونزلني بسرعة .

باب بيتنا مابي قفل بسرعة ينفتح دفره وانفتح ورجع دفره برجله وانسد .

دفعني لحد نص الطرمة وكال روحي طلعي البيان وتعالي بسررعة ..

رحت على باب البيت الداخلي شفتها مقفولة
باوعتله كتله بنحيب متوسل : مقفولة الظاهر عمو اخذ ابويه وعلاوي ويا لبيتهم .

_ تبعيهم وغير مرة اجي ع البيان اخذه
كال هيج والتاف وراح صوب الباب ..

شهكت وعطت وركضت وررااااه لزمته من ردان بلوزته
اندار ودفعني بعصبية وبنظرات مُحذِرة ورافع السبابة بتهديد باتجاهي .

تمتمت واني اباوع لعمق عيونه واتوسل
لهيب لاتحرمني من بنتي لا تخليني هنانه ارحم ضعفي الله يخليك والله اني ماسويت شي غلط فتحت عيني عليك والله

التاف التفاتة كاملة وصار بمواجهتي
دنك لمستواي وكال بعصبية
لعد هاي تصرفاتج شسميها ولللج شسميها ؟؟ شون تبررين الي سويتي ؟ ولج انت شون تستغفليتي شلوون طفلة ابطنج تسع شهور تضميها شيسموها هاي .

نطقت بس جنت خايفة ...

استقام بوكفته كال : احمدي ربج راح استر عليج وماافضحج والا انتي مفضوحة كدامي من سوالفج وهذا هو ورقة طلاكج توصلج والطفلة اخذها مايشرفني تبقين يمها .

ديروح رحت صرت ع الباب ظليت اصيح
لالا لهيييب لا تحرمني من بنتي لتاخذها انته اصلا ممتاكد اذا هي بنتك لووو لا ممتاكد .

لمن كلت هيج حسيته بركان وثاااار لزمني من شالي وكمش شعري بقوووة وعنف
وسالني بحدة : هيه بنتي لووو لا ؟؟

صدحت حنجرتي بوجع ونحيب ..
بنتك والله بنتك لهيب .

ضل وهو لازم شعري يضربني راشديات على وجهي
ويحجي بعصبية لعد لا تستفزيني ترة اول وتالي راح احلل dna واذا صدك موو بنتي راح يصير عقابج غير شكل .

تركني وكعت ع الكاع ، ديريد يتحرك جلبت برجلينه حضنتهم باديه ابجي اناشغ وانحب لااا تاخذها مني تعذبت لمن ولدتها لخاطر تعبي .

نمت على حذائه وشعري كله وكع ع الكاع الارض كلها مي لان جان مطر وشعري نترس مي وطين ..

ظل متصلب بوكفته ماحرك ساكن رفعت راسي اباوعله واحس الم فضيع بداخلي بجسدي وبروحي .

صارت عيني بعينه انفقت اخر توسلاتي
لهيب عفية البنية محتاجة ترضع حليب من صدري هيه مريضة حليبي الها دوا ميصير الها غير حليب .

جر نفس وكرفص يمي ، وخر اديه من على رجليه وحذائه وكومني من ع الكاع من زنودي ورفعني بيد وحدة .

وهو لازمني ويدردم تردين ترحين وياي وج موو وألله ماارحمج والله بس براحتج هاي انتي الردتيها .

بعده لازمني دنج على شالي اخذه من الكاع شافه كله مي شمره وعبايتي هماتين .

اكو حبل وعليه ملابس جوة المسكف مال الطرمة ماواكع عليه مطر دفعني كال جيبيلج ملابس مناك يله ..

وكفت مقابيله اوخر شعري عن وجهي مبتسمة وطعم الدم بحلكي مال شفايفي ...
يعني راح تاخذني هاا ؟ متبعدني عن بنتي ؟

عاط : لج خلصينا دنرووووح لج انت ماتحسين ابويه ومهيب عفتهم بين الحياة والموت شبيييج فضيها .

ظليت اهز براسي بقبول واتنفس سريع
وركضت على الحبل مال الملابس
جريت منه ملابس جبه وشال ...

همزين باقيات ع الحبل من قبل لا يصير الحادث ومحد شايلهم .

لبستهم بسرعة واباوعله متخصر ويباوعلي
تجنبت نظراته خاف استفزه بدون قصد ويخليني ويروح .

لفيت الشال وفوتت شعري بالجبة
وكفت كباله كتله خلصت ..
سحبني من ايدي وطلعنا من البيت متوجهين لبغداد ..

خفت اكوله اروح اشوف ابويه وعلاوي بس هو سمعته يخابر عمي اخو ابوي بالسيارة ويبلغهم بروحتنا .

فرح ..

اخذت ابني من ريلام وانطلقت بي وبس اسمع لهيب يصيح عليهن بعصبية ويكول منووو جانت ترادد وتغلط
منوووووو احجي .

عفتها عالكة ، موج اخذت دانيال ولزمتني من ايدي
واني مخليه الغترة على قلبي عبالك حصلت كنز من هالبيت قبل لا اطلع .

نزلنه ركض ، فتحنا باب الصالة بسرعة
ودنعبر الحديقة ونطلع من باب القصر الرئيسي
شفت ختام دتفوت .

تقربت منا باوعت بحقد وكالت حسبي الله ونعم الوكيل عليجن بسببجن صار الي صار لعلي عساهه بحظجن وابختجن .

وانت يافرح شكم قلب كسرتي الله يكسر قلبج ولا يجبره ان شاءالله طول العمر .

اني لساني انعكد وبعد مالي طاقة للكلام بس احس راح اوكع من طولي ولا اكدر بعد احجي وادافع عن نفسي .

ردتها مووج بقسوة شتحجييين انتي هااا ؟؟ شتحجييين ؟؟ صاحية انتي لو عقلج بي شي ؟

جاوبت باستهزاء : خلينا الصحة والعقل لاختج شوفيها شكم قلب كسرت اولهم اختي وحتى زوجة حمدان سحر والله مايضيع حوبة مظلوم حاشاه .

بعد ماكدرت اسكت الها رغم رجفت لساني
بس حجيت : لو يريدج علي جان تزوجج كل هالسنين

كالت بعصبية : سكتي انت متعرفين شنوو ظروفنا الي جبرتنا فلا تسفطين حجي بلا فهم و . ...

وهيه بعدها ممكملة كلامها ركزت بنظراتها على الغترة مخليتها على صدري ، جرتها مني بقووة .

وكالت هاي مالته اني جبتها اله حتى طبعت على اسمها ..

هيه من كالت هيج لا اراديا تركتها وخليتها تاخذها
الغترة الي قبل شويه جنت معتبرتها كنزي الكبير
صفت ولا شي عندي ولا شي احس يائسة وضعيفة
ومخذولة اعني على ضعفي يا الله قويني .

موج تريد تاخذها منها منعتها سحبتها ومشينا عنها
طلعت من القصر واني مليانه وجع واهات والم .

ظلت موج تخابر على احمد الى ان اجه علينا
الجو جان بارد حيل ودانيال ظل يرجف
مالابس بس تراك وجواته بلوز وحدة مو كلش ثخينة
مالحكنا حتى نلبس شي .

اخذنا احمد للمستشفى ، موج سألته عن أنين
كاللها مالحكت امر عليها للمدرسة
كتلها تروح لبيت عمي رأسا .

كعدت يمي وره حضنتني حيل تسكت بيه
خليت راسي على كتفها اباوعلها احجي وابجي .
موج مو نفس مكالت ختام موووو ؟ مستحيل ؟؟؟

خلت ايدها على راسي
لا عمري لا تهتمين الها هاي غيرانة منج كاتلها القهر لتضوجين والله هاي حية متلونة تريد تأذيج بس بكلامها ..

وخرت راسي منها كتلها شون عرفت لعد الغترة عليها اسمه هيج هلكد متعمقة بحياتها هو كلي ماللبسها بعد بيها ريحتج وريحتي معقولة يكذب !! معقولة لان هدية منها ؟

كالت اششش يكعد بالسلامة وتسألينه اكيد راح يجاوبج ميخليج هيج ابد واني متأكدة ختام كذابة .

ميجاوبني موج ميجاوبني واني هم تعبت ومستحيل ارجع اله بعد نتطلك اعيش حياتي تعبت منهم من هالعائلة تعبوني والله .

خلي اتطلك خلي يتزوجها هو ويريحوني منهم ..

همست بس ارتاحي انتي تعبانة ..

احمد باوع علينا بالمراية و ظل يستفسر
وموج حجتله كل شي ، عصب وظل يدردم واني نعست راسي راح ينفجر احسه غفيت وهو يدردم.

الى ان وصلنا للمستشفى هم كعدوني ..

كعدت ونزلت وياهم وصعدنا للردهة الانعاش الي بيها علي شفت هناك هوايه ناس وشيوخ ومن بينهم حسان

كوة خلوني افوت اشوفه ، انكسر قلبي على شوفته بهالحالة ، تقربت منه وروحي احس دتطلع ماريده هيج نايم لاحس ولا حركة وبغيبوبة وجسمه مليان جروح وصدره عاري ومشدود بشاش .

خليت ايدي على المكان العاري من صدره المابي شاش ودموعي وكعت ، قربت حلكي من اذنه وشكيتله حالي .

كتله بدموعي اختك هدت عليه بسجين من بعدك طعنتني بشرفي وطعنت بشرف اختي ترضاهه انته ؟

مسحت دموعي شهكت وكملت بنحيب
وختام ختام جابت البشت مالتك ومتقبل تكولي شيسوي عدها ، كل هذا وماتريدني اشك علي تسمعني ملابسك شنووو تسوي وي ختام منو حيجاوبني ع سؤؤالي ولشوكت ابقى اني ويه شكي لشوووكت !!!

علي هيام سبت ابوويه الي بعده قبره اخضر وما مرت اربعينه سبته وسمعتها بترس اذني .

علي اني ماعرف شنو راح يكولولك عني بس اني طلعت بصخام الوجه من القصر وتريد تصدكهم صدك.

بس اني مالي رجعة الك بعد حاخذ اطفالي واروح لبيت ابويه اي علي اطفالي دانيال وهالروح الي شاكة بيها برحمي
منك .

اني بعد خلص مايربطني وياك شي غير قلبي الي حبك ولساني الي راح يدعيلك تطيب .

عفته وطلعت بروح مجروحة وقلب مكسور ودموع مابطلت تنزل ..

موج ...

بقى بالي يم شرار من فترة مختفي ، لا اكدر اتصل بي واسأل عنه ولا اكدر اتوقف عن التفكير بي وليش مااجه ويه لهيب شعجب بقيت بس اراقب مواقعه واراقب اخر ظهوره ع الوتساب والمسنجر بس هم ماكو من اسبوع تقريبا .

رجعنا للبيت بالليل وانو بقت يم بيت عمي بس تخابر تبجي تريد تجي بس هيه دنيا ليل واحنه وصلنا بوقت متأخر وحسينا بسيارة تمشي ورانا واحمد ضيعها وحسينه بالخطر يداهمنا بس معرفنا من منو واني شكيت بأوس خايفة لا يأذيني ويأءذي اخواتي واخويه .

الليل كله مانمت وافكر بذاك البعيد عن عيني وقريب من قلبي ، وبأنين يم بيت عمي واحمد خاف يطلع باجر ويتعرض للخطر ، خاصة اوس شارد وميعرفون وين ويدورون عليه ومتوقع منه كولشي .

أنين ..

طلعت من بيت عمو بالسبعة ونص الصبح وتوجهت لمدرستي ، شويه بعيدة عن بيت عمي ، وكفت ع شارع انتظر احمد يجي عليه ما اجه وسالم مموجود واستحيت اكعد عمو يوصلني .

طلعت امشي رغم شويه بعيدة اخاف اصعد تكسي ، وعندي امتحان ما اكدر اغيب ، اخذت موبايلي ويايه وبالمدرسة اسلمه للادارة .

واني داامشي ، ررن الموبايل طلعته موج تتصل
كالت صباح الخير حبي وين انتي ؟

رديت طالعة للمدرسة ..

احمد اجاج يوصلج لوو لا ؟

لا مااجه

ياا وين صار هذا ؟؟ خاف نساج ولايهمج اني جايه عليج اوصلج للمدرسة لتتحركين من بيت عمو ماشي .

رديت باسف : يااا مووج اني طلعت وهسه داامشي بالفرع مال بيت عمو تأخرت واحمد ما اجه

دااحجي وياها وكفت سيارة بالفرع مني خررعتني انفتح الباب وانسحبت من الشارع بقوة وكع موبايلي وجنطتي وكتبي مني .

بس تريد اصرخ ماكدرت انسد حلكي وحسيت بادين تسحبني لداخل السيارة وشي نبت برقبتي مثل ابرة وبعدها ماحسيت بشي .

وعيت واني مربطة اديه ورجليه وجسمي كله خدران ومااحس بي ولا اكدر اتحرك بس عيوني اكدر ارمش بيها .

بقيت على هالحال الى ان شفت الشمس بلشت تغرب وحيصير ليل ، زاد خوفي ودموعي صارت تجري على خدي وقلبي نبضاته كلما الها تصير اسرع .

حلكي مربوط وماكدر احجي ، بس ابجي والهج باسماء اخواتي وبابا اريد ينقذوني ونسيت انو بابا مات مايدري عني شي هسه ، بس اني ماكدر استوعب لحد الان انو بابا مات .

انفت الباب وانصدمت بالوجه الي دخل عليه
جان اوس ...

بيده مسدس يفر بي ومبتسم

صعد الدم لراسي وتجمع بي حسيت حينفجر راسي وقلبي وانفاسي صارت اسرع من الخوف ورجليه وهنه مربوطين يرجفن .

اجه وكرفص كدامي وبعده مبتسم ابتسامة صفرة خبيثة .. والمسدس بيده .

احاول احرك جسمي ما اكدر ، من كد الخوف احس تجمدت ..

اباوعله برجاء مايسويلي شي وهو فهم نظراتي اكيد
كال لاتخافين اخت موج الحلوة مراح تحسين بشي
طلقة وحدة بس وتنقلج يم باباتج ماتردين هالشي انتي ؟

بقلبي جنت اكول اي اريد اروح يم بابا وماما الي مشايفتها بس اخاف حيل اخاف من الموت والوضع الي اني بي زاد خوفي .

هو ظل يحجي كال اختج حركت كلبي ، سببتلي هواي مشاكل خلت جدي وابوي يحبسوني شهرين ويسحبون مني كل شي جنت اتمتع بي وهيه ولا همها راحت وتزوجت شرار وخلت ابن اخوه الضابط يحفر وراي ويلزم سلام يحقق ويا ويعذبه حتى يعترف عليه .

يحجي كلام ماافهمه ولابعمري سمعت عنه ظل يلغي هواي مرة يبجي مرة يضحك واني انجبر اسمعه وماكو شعور غير الخوف وحسيت بسبب هالخوف حيتوقف قلبي .

وهو على هذا الحال واسمع صوت حسان وهو داخل الهالمكان يصيح اووووووووس .

كام على حيله اوس وموجه المسدس على الباب
الي
ادنفرت بثواني ودخل منها حسان متخبل ومعصب ..

وويا حسان دخلوا رجال هوايه بيهم عشرين واحد ..

مصوبين المسدسات على بعضهم ..

اوس تخبل وظل يوجه كلامه لحسان بعصبية
شجااابك هناااا ولك شجابك انته منووو مخلي يتجسس عليه وولك كول منووو حتى هسه ادفنه بأرضه .

ظل حسان يباوعلي واني اباوعله بتوسل يخلصني من الي اني بي عندي امل كولش قوي ينقذني .

ظل يصيح حتى حسيت اوتاره الصوتية حتتكطع على كد شدة صوته .
يصيح ويأشر عليه .
انته تخبلت تخطف طفلة شجاك ولللك شجااك هاي حاسبها رجولة انته لوووو شنوو .

هنا عرفت اهلي لجأوله لان ماكو غيره هسه موجود ابيت الشيخ يتصرف ..

رد عليه اوس انته اخر واحد يحجي عن الرجولة نسيت الي سويته بسامر واحنه خلصناك ؟؟؟؟

رد بعصبية وانفعال : لاتظل تنعثل هيي مطي اني بريء من دم سامر ومالي ايد بقتله ولا قتلته وانته تعرف كلش زين .

اوس : سامر صديقك وانكتل بدم بارد كدامك وكدام حمدان واندفن وانته جبان تسترت على جماعتك الي قتلوه .

حسان : اكل تبن خسيس انته تعرف بيت مؤيد كلش زين محد يكدر الهم اله لمن ناس ظلت توكع بناس ووكعوا كلهم .

_ وتنكر احنه خلصناك منهم ...

_ ماانكر ولاتظل تعير هسه وثق يا اوس اني هاليوم ماكدر اسويلك شي لخاطر هالبريئة والا اني ناوي اخليك تتمنى الموت وماتلكاه .

كال هيج واجه باتجاهي ، اوس وجه السلاح عليه وخلاه بركبته وجماعة حسان سحبوا مسدساتهم وجههوها على اوس .

اوس كاله عوفها هاي حصتي اريد احرك كلب اختها عليها لاتصيرلي شريف شنو نسيت الي سوته بيك اختها لوو نسيت ؟

رد حسان اكل نعل ووخر يله لا تصير جبان ولك شتستفاد اذا كتلتها وشنو ذنبها هيه ؟؟

دفع اوس واجه كرفص كبالي ظل يباوع لي بتفحص
وهو يسألني سوولج شي ؟؟

ظليت اهز براسي بنفي وهو مد ايده فتح حلكي
شهكت وتنفست وبدا يفتح اديه ورجليه .

ويدردم ويه اوس وواحد يسب اللخ ..

لزمني وكومني جلبت بقميصه وهو خلاني جوه ذراعه

وجه المسدس على اوس وكاله اني المفروض بعد مالكيت مكانك اجي عليك و اخذ ثار علي ومهيب منك بس وكفت بعيني هالطفلة بريئة ومالها ذنب والمرة الجاية انتظرني ولك والله اذا مات واحد منهم اله اخليك تتوسل بيه اكتلك .

ظل يضحك اوس باستهزاء وكاله قبل لتسويها كل وساختك وملفاتك وجرايمك بالمخدرات والسلاح راح اسلمها للجنائيات يا حسان اني تطعني بسيطة .

رد عليه حسان بثقة : اعلى مابخيلك اركبه ماتخوف جلبي .

اوس بعصبية : محد بظهرك بعد هسه حسان ....

حسان : طززززز ....

حسان ديطلع ولازمني كووةة امشي ميتة من الخوف
واوس ظل يصيح
حتى شيخك مايوووكفلك مااايوووكفلك تره محددد يوكفلك بعد محددددد .

حسان : انتظرني ارجع اخذ ثاره منك يا ابن الخال ...

طلع بيه ووراه جماعته انسحبوا ، تنفست حسيت طالعة من كبر ، باوعت للمكان مزرعة جبيرة حيل

صعدني للسيارة فتح الباب وظل يباوعلي ، ارتكيت ع الكشن واباوعله بانفاس مخطوفة
سال تردين ماي ؟

هزيت راسي بمعنى لا وتمتمت اريد اروح لاهلي ..

رد هسه اوديج لاتخافين بس خلي اخابرهم اطمنهم عليج ..

حركت راسي وهو سد باب السيارة وصعد بيها
طلع تليفونه وظل يخابر سمعته يحجي ويه احمد ..

هذا هو طلعتها مابيها شي لاتخاف بس مثل مكتلك تطلع من بغداد اخذها وروح للشمال هاي الفترة اني اكدر ائمنلك مكان هناك الوضع كلش خطير ومنها اطلع لتركيا احسلك ..

اي هاي هيه .. التفت لي كال تحجين ويا تكدرين ؟
هزيت راسي اخذت التليفون منه ..
وخليته على اذني واني ابجي
همست بشتات احمد ..

اجاني صوته وصوت فرح وموج يبجن ويصرخن ..
همست احمد خفت احمد
ظل يكرر عليه السؤال ماسوولج شي مابيج شي انتي مااذووج ؟؟

لالا بس انته ليش مااجيت عليه ليش احمد ..

حبيبتي والله دااجي عليج وتبعوني جماعة وصوبوني بيدي وانهزمت المهم انتي بخير حبيبتي مابيج شي بس كليلي ؟

اي اي بس خايفة داارجف لهسه خايفة احمد
كملت بجي وانطيت لحسان الفون ..

هو حاجه احمد وطمنه عليه وغلق المكالمة ..

وظل يحجي كال والله اني بريء من دم صديقي خاف انتي هسه خايفة مني وعبالج اني قاتل .

ظليت اباوعله بشرود وهو يسوق ويحجي ..

كال صارت مشادة كلامية بيننا تحولت عركة وسامر ظل يهددهم يفضحهم بالغلط كتلوا ودفنوا ....

هم مرادوا ينفضحون بس حمدان شاف وضع ام سامر صعب ظل يقنع بيهم يعترفون ويسلمون نفسهم

هم فهموا هذا تهديد وعرفوا حمدان مراح يسكت ولاراح يلزم نفسه ظلوا يهددون بي وحتى هددوا بفرح وبأبنه ..

وهو ظل يجفص كدامهم نصحته يطلكها حتى لا يأذوها ، بس هيه عاندت واله تبقى ، شكد نصحته يسكت عنهم ناس شرانيين وتورطنا وياهم
مسوي نفسه مصلح ويريد يريح كلب ام سامر
على ابنها وانو الي صار كله قتل عن طريق الخطأ .

هو ماتحمل يسكت ولا كدر يحجي هم جان خايف
انتحر الله يرحمه ويغفر له .

تحسر ومسح وجهه وكمل سياقة واني خليت ايدي على حلكي وابجي .

وصلنا للبيت دنيا الليل جانوا ينتظروني برا بس وصلنه فتحوا باب السيارة وحضنوني وشالوني فوتوني جوه
كابلوني وكعدوا يبجون فرح وموج واحمد يبوس براسي وكلساع يسألون سوولج شي واني اهز براسي بنفي .

احمد طلع ركض على صوت حسان واني بقيت بحضن اخواتي واني تحت تأثير صدمة بعدني ممستوعبة الي صار وممستوعبة اني بعدني عايشة وهنه بس يبجن .

دخل احمد كال حسان راح يخلي يم البيت سيارة بيها شباب لحمايتنا وباجر من الفجر نطلع من بغداد ضروري .

ظل يباوعلنا اخواتي ساكتات هو باوع لفرح كاللها فرح ترحين ؟؟

هزت راسها بقبول بسرعة ومسحت دموعها وايدها على بطنها ..

الليل كله احنه حاضنين بعضنا وميتين خوف
احمد وراه سياقة نام شويه ..

وكعدنا قبل الفجر حضرنا اغراضنا وملابسنا ...
كتلهم بغصة وقهر مانودع خالة ؟؟

رد احمد حياتنا بخطر باي لحظة ننقتل اوس مراح يتركنا عمري تهدا الاوضاع ونسحبها يمنه هسه محد لازم يعرف احنه طلعنا خوش .

هزيت راسي وتقلصت ملامحي ، احبها خالة هي ربتني صح مااكوللها ماما بس لان فتحت عيني ع الدنيا ماكو ماما ابيتنا واخواتي واحمد يكولولها خالة متعودين فاني صرت مثلهم .

بعدها الدنيا ظلمة ، طلعنه من البيت بدموعنا ، ودعنا بيتنا الي بي ريحة بابا ، طفولتنا حياتنا كلها هنانه واجه الوقت الي لازم نودعها ماكو شي دايم الي الدايم الله سبحانه .

صعدنا احنا التلاثة بالورة ودانيال ويانا ، مشينه بالسيارة واحمد كال اكو سيارة تمشي ورانا وبعدنا بالفروع نمشي ماطلعنا على الشارع .

ورن موبايله وظل يحجي والظاهر ديحجي وي حسان .

وتعصب احمد وسد التليفون وصارت كدامنه سيارة وجبرت احمد يتوقف .

نزل من السيارة حسان ، واحمد هماتين نزل ..

اجه حسان وظل يصيح اخذ انين وروح موج وفرح نسوان اخواني يبقون هنانه وشرار يوصل بعد شوويه وعلي حالته استقرت واني اخذهن لقصر واحميهن انت بس اخذ انين .

رد احمد ياقصر تحجي عنه القصر الي بي يطعنون بشرفهن مايشرفني ابقيهن بي هذن خواتي وصية ابوي اطلع اخذهن وياي كافي الي شافنه منكم .

كلمة من حسان كلمة من احمد ، طلع حسان المسدس وظل يوجهه على احمد وواحد لزم الثاني ، وثارت طلقة من المسدس .

ظلينا نصرخ وطلعنا من السيارة ، بس فرح بقت لازمة ابنها وجسمها نفس سعفة يرجف .

شفت حسان وكع واحمد ابتعد عنه وذاك الدم صار يطلع ماعرف منين بس غرك كل جسمه .

اجه يركض علينه وعاط دخلوووووا بسرعة .

وكعت بالكاع واصرررخ لالا احمد لااا احمد ودي ودي عالجه لايموووت احمد نقذني هووو لاتمووووته احمدددد ..

دخلني للسيارة بسرعة ودفع موووج يمي واني صووتي يخترق السكون والظلام ..

ظليت اتوسل بي ينقذه بس هو لا جان كل همه يطلع منانه وحتى ايده مجروحه وملفوفة من يم زنده وطلع منها دم لمن تلازموا هو وحسان ...

جان يضغط على نفسه ويسووووق ..

وبذيج الليلة طلعنا من بغداد ، حاملين ويانا مأساتنا أهاتنا وصدماتنا ، ولا وحدة منه طلعت وما وياها الم وعذاب وحزن .

*****

فرح : لقد اكتفيت من هذا الهذيان...لقد اكتفيت من قلبك البارد كالجليد القاسي...اكتفيت من كل مايأذيني..وسأكتفي بنفسي وهذياني لها..بأنك كنت مجرد جبل جليدي اصطدمت به سفيتني فغرقت ولم ينجو منها احد...سوى بعض الحطام الراكد في اعماقي....وها هنا ينتهي الهذيان مابين الجمر والجليد...لنصبح كعاصفة مرت خربت ولكن انتهت......
بقلم الكاتبة asawir-altamimi95

للحكاية بقية ..

تصميم الغلاف الجميل alraawih

الشكر لجميع المتابعين في الوتباد ❤😍والادمونات واعضاء كروب ورود و فراشات .. وكل البيجات والكروبات والمواقع الي نقلت القصة

اخص بالشكر الكاتبة Smoo-1997 هواااي تعبتج يرووحي وتحملتيني رغم مشاغلج ❤❤❤

وكل الي كتبوا خواطر وصمموا اغلفة جميلة مثلهم واعتذر اذا ماذكرت الكل اكيد مو متعمدة ولكن لضيق الوقت ..

..

المتفاعلين على البارت فديتهم ..

Wyaam1990

user4149322

bndr8xavi

DaliaAlrawi

sajawiii

sarunuh_19

stories_gray

Lalo-91

wateen-Ali

smeersmeer73

YK_SOLOSAD20

user05980452

lilyan_197

hajora_khalid

user37426035

user54968699

ولا تزعلون مني الي ماذكرتهم ع جزء الثاني ان شاءالله 😍❤